1. Паԝлосе шанди чь әшкәрә дьани сәр хԝә?

ПАԜЛОСЕ шанди әшкәрә дьани сәр хԝә, ԝәки щара әԝ сьст ә. Әԝи ӧса жи гот, ԝәки бәдәна мерьв «дерьс» дьбә дьчә. Щара жи ԝирʹа чәтьн бу әԝ йәк бькьра, чь кӧ рʹаст бу, у һьн жи гәләк щар Йаһоԝа щаба дӧайед ԝи ӧса нәдьда, ча әԝи дьхԝәст (2 Корн. 4:16; 12:7-9; Рʹом. 7:21-23). Паԝлос ӧса жи заньбу, ԝәки йед мьԛабьл әԝ сьст һʹәсаб дькьрьн. * Ле әԝи нәдьһишт ԝәки фькьред мәрьвайә нәрʹаст у сьстбунед ԝи, бьбьнә мәʹни әԝ хԝә бекер һʹәсаб кә (2 Корн. 10:10-12, 17, 18).

2. Ль гора 2 Корьнтʹи 12:9, 10 Паԝлос кʹижан дәрсәкә ԛимәт хԝәрʹа һин бу?

² Ле Паԝлос хԝәрʹа дәрс һьлда, ԝәки мәрьв дькарә һьнге жи ԛәԝат бә, чахе хԝә сьст тʹәхмин дькә. (Бьхунә 2 Корьнтʹи 12:9, 10.) Йаһоԝа готә Паԝлос «ԛәԝата мьн сьстийада мийасәр дьбә», әԝ дьһатә һʹәсабе, ԝәки Йаһоԝа ԝе һаԛас ԛәԝат бьдә Паԝлос, чьԛас кӧ ԝирʹа лазьм бә. Пешийе ԝәрә әм шеԝьр кьн, чьрʹа әм гәрәке дьлтәнг нәбьн, чахе мә беһӧрмәт дькьн.

3. Чьрʹа әм дькарьн ша бьн чахе мә беһӧрмәт дькьн?

³ Тʹӧ кәси хԝәш найе, гава ԝи беһӧрмәт дькьн. Чахе дьжмьн мә беһӧрмәт дькьн у әԝ йәк сәр мә һʹӧкӧм дьбә,  әм дькарьн дьлтәнг бьн (Мәтʹлк. 24:10). Ле дәрәщед ӧсада әм гәрәке ча хԝә бьдьнә кʹьфше? Әм жи дькарьн мина Паԝлос ша бьн, чахе мә беһӧрмәт дькьн (2 Корн. 12:10). Чьрʹа? Чьмки әԝ беһӧрмәткьрьн у мьԛабьлибун дьдьнә кʹьфше, ԝәки әм шагьртед Исайә рʹаст ьн (1 Пәт. 4:14). Иса гот, ԝәки ԝе пәй шагьртед ԝи кʹәвьн (Йуһʹн. 15:18-20). Әԝ йәк һәма тʹәви Мәсиһийед ԛьрʹна йәке ԛәԝьми. Һьнге мәрьвед кӧ пе әʹйд-ԛәйде Йунанийа дьжитьн, Мәсиһи һʹәсаб дькьрьн һесир у беаԛьл. Ле Щьһуйа сәр ԝана ча сәр Пәтрус у Йуһʹәнна дьньһерʹин, демәк ча сәр мәрьвед «нәхԝәнди у нәзан» (Кʹар. Шанд. 4:13). Гәләк мәрьва Мәсиһи сьст һʹәсаб дькьрьн. Әԝана тʹәви политикайе нәдьбун, ләма жи мәрьва ԛәдьре ԝан нәдьгьртьн.

4. Мәсиһийед бәре чь дькьрьн һьнге жи, чахе мәрьва әԝана беһӧрмәт дькьрьн?

⁴ Ле гәло әԝан мәсиһийа һиштьн, ԝәки беһӧрмәткьрьн у мьԛабьлибуна ԝан дьжмьна, ԝана бьдә сәкьнандьне? На. Мәсәлә, әԝ пәйкʹәтьн бона Пәтрус у Йуһʹәннайе шанди ԛәдьр бу, чьмки әԝана пәй Иса дьчун у дәрһәԛа ԝи һин дькьрьн, ләма жи пәй ԝан дькʹәтьн (Кʹар. Шанд. 4:18-21; 5:27-29, 40-42). Мәʹнийа шагьрта тʹӧнә бу, кӧ шәрм кьн. Рʹаст ә мәрьва ԛәдьре ԝан Мәсиһийа нәдьгьртьн, ле йәкә ԝана гәләк али мәрьва дькьрьн. Мәсәлә кʹьтебед жь бина бәр Хԝәде, кʹижан кӧ һьнә жь ԝан Мәсиһийа ньвисинә, һʹәта иро жи али бь милйона мәрьва дькьн. Әԝ Пʹадшати, дәрһәԛа кʹижани ԝана дьгот, нә тʹәне ньһа сәрԝертийе дькә, ле ӧса жи зутьрәке ԝе сәрԝертийе сәр тʹәмамийа дьнйайе бькә (Мәт. 24:14). Мәсәлә, әԝ сәрԝертийед ԛәԝат кӧ пәй Мәсиһийа дькʹәтьн, кʹӧта бунә, ле әԝ Мәсиһийед амьн ньһа ль әʹзмана пʹадша нә. Әԝ мәрьвед кӧ пәй ԝан дькʹәтьн, мьрьнә. Әԝана һәрге рʹабьн жи, ԝе бьн ве Пʹадшатийеда бьжин, кʹижанеда әԝ Мәсиһи ԝе сәрԝертийе бькьн, йед кӧ бәр чʹәʹве ԝан рʹәш бун (Әʹйан. 5:10).

5. Ль гора Йуһʹәнна 15:19, чьрʹа мәрьвед ве дьнйайе ԛәдьре щьмәʹта Йаһоԝа нагьрьн?

⁵ Рʹожа иройин гәләк мәрьв ԛәдьре мә чаԝа Шәʹдед Йаһоԝа, нагьрьн, мә дькʹәньн, у һʹәсаб дькьн кӧ әм сьст у нәзан ьн. Чьрʹа? Чьмки әм пе ньһерʹандьна хԝә жь ԝана щӧдә дьбьн. Әм дьхәбьтьн кӧ мьлук, шкәсти у гӧһдар бьн. Ле мәрьвед ве дьнйайе ԛӧрʹә, бабах у нәгӧһдар ьн. Әм тʹәви политикайе набьн, нә жи тʹәви шьхӧле әскәрийе дьбьн. Әм мина мәрьвед ве дьнйайе ниньн, ләма жи әԝана мә ньмьз һʹәсаб дькьн (Бьхунә Йуһʹәнна 15:19; Рʹом. 12:2).

6. Йаһоԝа бь щьмәʹта хԝә чь шьхӧли тинә сери?

⁶ Рʹаст ә мәрьвед ве дьнйайе мә һʹәсаб дькьн ча мәрьвнә сьст, ле Йаһоԝа ӧса нафькьрә, әԝ бь мә шьхӧлед мәхсус дькә. Әԝ шьхӧл һәйә бәлакьрьна мьзгинийе нав тʹәмамийа дьнйайе, кʹижан кӧ тʹәрихийа инсанәтеда тʹӧ щар тʹӧнә буйә. Иро хьзмәткʹаред ԝи сәр щурʹә-щурʹә зьмана журнала дәрдьхьн, кӧ нав тʹәмамийа дьнеда гәләк бәлабуйи нә. Әԝана пе Кʹьтеба Пироз али бь милйона мәрьва дькьн, ԝәки әԝана әʹмьре хԝә баш кьн. Сәва ԝи шьхӧле мәзьн, тʹәне Йаһоԝа һежайи һӧрмәт-рʹумәте йә, йе кӧ ԝан шьхӧлада мәрьвед сьст дьдә хәбате. Ле әм чь дькарьн бежьн дәрһәԛа мә һәр кәси башԛә? Гәло Йаһоԝа дькарә али мә бькә, ԝәки әм ԛәԝи бьн? Һәрге әре, әм чь гәрәке бькьн, ԝәки аликʹарийа ԝи бьстиньн? Ԝәрә ньһа әм се тьшта шеԝьр кьн, кӧ әм жь мәсәла Паԝлос чь дькарьн һин бьн.

7. Әм жь мәсәла Паԝлос кʹижан дәрсе һин дьбьн?

⁷ Дәрсәкә кӧ әм жь мәсәла Паԝлосе  шанди һин дьбьн, әԝ ә: Итʹбарийа хԝә ԛәԝата хԝә у фәрәсәтед хԝә нәйньн. Һәрге пе ньһерʹандьна мәрьва бьньһерʹьн, әм дькарьн бежьн ԝәки мәʹнийа Паԝлос һәбу, кӧ бабах бә у хԝәда баԝәр бә, чьмки гәләк мәрьва жь бо дәрәща ԝи у фәрәсәтед ԝи, әԝ һӧрмәт дькьрьн. Әԝ шәһәре Тарсусда мәзьн бьбу, кʹижан кӧ пайтʹәхте провинсийа Рʹоме бу. Тарсус шәһәрәки пешдачуйи у навдар бу, кʹижанида ӧса жи университетед навдар һәбун. Паԝлос йәки хԝәнди бу, әԝ бал сәрԝере Дине Щьһуйа һин бьбу, наве кʹижани Гамалйел бу у нав мәрьвада гәләк хԝәйи ԛәдьр бу (Кʹар. Шанд. 5:34; 22:3). Паԝлос ԝәʹдәки нав щьмәʹта Щьһу йәки хԝәйиһʹӧкӧм бу. Әԝи гот: «Әз нава щьһутийеда жь гәләк һәвалед хԝәйә щьһу пешдатьр чубум» (Галт. 1:13, 14; Кʹар. Шанд. 26:4). Ле Паԝлос тʹӧ щар итʹбарийа хԝә ԛәԝат у фәрәсәтед хԝә нәдьани.

8. Ль гора Филипи 3:8, Паԝлос ча дьньһерʹи сәр ԝан тьшта чь кӧ әԝи һишт, у чьрʹа әԝи сьстбунед хԝәда шабун дьдит?

⁸ Паԝлос һәр тьштед ве дьнйайе, кӧ дькарьбун әԝ навдар кьрана, пәй хԝә һишт у «чаԝа гәмар һʹәсаб» кьр. (Бьхунә Филипи 3:8.) Паԝлос гәләк чәтьнайи дит, сәва бьбә шагьрте Мәсиһ. Әԝ бәр чʹәʹве мьләте хԝә рʹәш бьбу (Кʹар. Шанд. 23:12-14). Әԝ алийе бажарванед хԝәда, демәк алийе Рʹомайада, ледайи-кʹӧтайи бу у кʹәтьбу кәле (Кʹар. Шанд. 16:19-24, 37). Әԝи ӧса жи фәʹм дькьр, ԝәки әԝ беԛьсур нинә у ԝирʹа чәтьн ә ве йәке бькә, чь кӧ рʹаст ә (Рʹом. 7:21-25). Паԝлос нәдьһишт ԝәки дьжмьн у сьстбунед ԝи сәр ԝи һʹӧкӧм бьн, ле дәԝсе сьстбунед хԝәда шабун дьдит. Чьрʹа? Чьмки чахе әԝ сьст дьбу, әԝи ԛәԝата Хԝәде сәр хԝә тʹәхмин дькьр (2 Корн. 4:7; 12:10).

9. Әм ча гәрәке бьньһерʹьн сәр ԝан һʹәму тьшта, чь кӧ дькарьн мә сьст кьн?

⁹ Һәрге әм дьхԝазьн ԛәԝате жь Хԝәде бьстиньн, әԝ йәк гьредайи нинә тʹәви сьһʹәт-ԛәԝат, хԝәндьн, култура мә у һәбуке. Йаһоԝа нә сәва ԝан тьшта мә ԛәбул дькә. Мәсәлә, гәләк хьзмәткʹаред Хԝәде «нә сәрԝахт бунә, жь ԝә гәләк дьнеда нә зор бунә у нә жи жь ԝә гәләк малед рʹәнгинда бунә». Демәк Хԝәде «сьстед дьне»  бьжарт (1 Корн. 1:26, 27). Һәрге әԝ һʹәму тьшт чь кӧ мә гот, бал мә тʹӧнә, әԝ найе һʹәсабе ԝәки әм нькарьн Йаһоԝарʹа хьзмәт кьн. Дәԝсе әм ве йәке һʹәсаб дькьн ча мәщал, кӧ ԛәԝата Хԝәде сәр хԝә тʹәхмин кьн. Мәсәлә, һәрге әм жь ԝан мәрьва дьтьрсьн, йед кӧ баԝәрийа мә дькьнә бьн шьке, әм гәрәке Йаһоԝарʹа дӧа бькьн, ԝәки мерхасийе бьдә мә, кӧ әм бькарьбьн баԝәрийа хԝә бьпарезьн (Әфәс. 6:19, 20). Һәрге нәхԝәшийа ԝәйә кʹроники һәйә, Йаһоԝарʹа дӧа бькьн ԝәки ԛәԝате бьдә ԝә кӧ һун чьԛас дькарьн ԝирʹа хьзмәт кьн. Һәр щар чахе һун аликʹарийа Хԝәде бьвиньн, баԝәрийа ԝә ԝе дьһа ԛәԝи бә у һуне һе бьшьдьн.

10. Чьрʹа әм гәрәке дәрһәԛа мәрьвед амьн леколин бькьн, мәсәлә дәрһәԛа кʹижана кӧ Ибрани 11:32-34-да ньвисар ә?

¹⁰ Паԝлос бь хирәт Ньвисаред Пироз леколин дькьр. Әԝи ԝан Ньвисарада гәләк избаткьрьн дит у ӧса жи әԝ жь мәсәлед хьзмәткʹаред Йаһоԝайә амьн гәләк тьшт һин бу. Паԝлос чахе Мәсиһийед Ибранирʹа нәʹмә дьньвиси, тʹәми да ԝан, ԝәки дәрһәԛа мәсәлед ԝан мәрьвед амьн бьфькьрьн. (Бьхунә Ибрани 11:32-34.) Ԝәрә әм мәсәла Даԝьд Пʹадша шеԝьр кьн. Хенщи дьжмьнед ԝи, әԝ мәрьвед кӧ ԝәʹдәки һәвалед ԝи бун, әԝана жи мьԛабьли ԝи дәркʹәтьн. Чахе әм дәрһәԛа Даԝьд шеԝьр кьн, әме бьвиньн кӧ чьрʹа Паԝлос дәрһәԛа әʹмьре Даԝьд дьфькьри, у әм ча дькарьн чʹәʹв бьдьнә ԝи.

11. Чьрʹа Даԝьд бәр чʹәʹве мәрьва сьст дьһатә кʹьфше? (Бьньһерʹә шькле рʹуйе журнале.)

¹¹ Даԝьд һьмбәри Голйате әскәр, сьст дьһатә кʹьфше. Чахе Голйат Даԝьд дит, сәр ԝи кʹәнийа. Голйат йәки тәʹрьки, ԛәԝи чʹәккьри у бона шәрʹ рʹьнд һинкьри бу. Рʹаст ә Даԝьд сьст дьһатә хане, ле бь рʹасти әԝ дьһа ԛәԝат бу. Әԝи итʹбарийа хԝә Йаһоԝа дьани, ләма жи Йаһоԝа ԛәԝат да ԝи, у әԝи дьжмьне хԝә алт кьр (1 Сам. 17:41-45, 50).

12. Даԝьд рʹасти кʹижан чәтьнайикә дьн һат?

¹² Даԝьд паше рʹасти чәтьнайикә дьн һат, кʹижан кӧ дькарьбу әԝ бьшкенанда у ԛьдум бехьста. Даԝьд һьндава Шаԝулда, йе кӧ жь Йаһоԝа һатьбу кʹьфшкьрьне ча пʹадша, амьн бу. Шаԝул пʹадша пешийе ԛәдьре Даԝьд дьгьрт. Ле ԝәʹдә шунда әԝи жь бо бабахийе, дәхәси Даԝьд кьр. Шаԝул һьндава Даԝьд ӧса хьраб бу, кӧ һәла һе жи дьхԝәст ԝи бькӧжә (1 Сам. 18:6-9, 29; 19:9-11).

13. Даԝьд хԝә ча дьда кʹьфше чахе Шаԝул пʹадша һьндава ԝида нәрʹасти дькьр?

¹³ Шаԝул чьԛас жи нәһәԛи Даԝьд дькьр, йәкә Даԝьд һьндава бьжартийе Йаһоԝа ԛәдьр дьда кʹьфше (1 Сам. 24:6). Әԝи сәва кьред Шаԝул Йаһоԝа нәһәԛ нәдькьр. Дәԝсе Даԝьд итʹбарийа хԝә Йаһоԝа дьани, кӧ ԝе ԛәԝате бьдә ԝи, ԝәки ԝан чәтьнайада тәйах кә (Зәб. 18:1, бьнсәри).

14. Паԝлос кʹәтә кʹижан дәрәще кӧ мина йа Даԝьд бу?

¹⁴ Паԝлосе шанди жи кʹәтә дәрәщәкә мина йа Даԝьд. Дьжмьнед Паԝлос гәләк жь ԝи ԛәԝаттьр бун. Гәләк мәрьвед хԝәйиһʹӧкӧм ԝи нәфрʹәт дькьрьн. Ԝана гәләк щар ԝи дькʹӧтан у дькьрьнә кәле. Мина дәрәща Даԝьд, мәрьвед кӧ һәвалед Паԝлос бун, һьндава ԝида хьраб бун. Һәла һе һьнә Мәсиһийед жь щьвате жи, мьԛабьли ԝи бун (2 Корн. 12:11; Фили. 3:18). Ле йәкә әԝ нәшкәст. Чьԛас жи мьԛабьли ԝи дәрдькʹәтьн, йәкә әԝи бәрдәԝам дькьр мьзгинийе бәла кә. Әԝ  хушк-бьрарʹа амьн дьма һәла һе ԝи чахи жи, гава ԝана дьле ԝи дешанд. Хенщи ве йәке, әԝ Хԝәдерʹа амьн ма һʹәта хьлазийа әʹмьре хԝә (2 Тимтʹ. 4:8). Паԝлос нә кӧ пе ԛәԝата хԝә әԝ һʹәму чәтьнайи алт дькьр, ле Йаһоԝа ԛәԝат дьда ԝи.

15. Нета мә чь йә, у ча әм дькарьн әԝе нете биньн сери?

¹⁵ Ле һун ԛә рʹасти дәрәщәкә ӧса һатьнә, ԝәки һәвалдәрсхане ԝә, йан һәвалхәбаткʹаре ԝә, йан жи нәфәре мала ԝә кӧ Шәʹде Йаһоԝа нинә, мьԛабьли ԝә дәркʹәтийә? Ԛә ӧса буйә, ԝәки щьватеда кәсәк һьндава ԝәда хԝә хьраб бьдә кʹьфше? Һәрге әре, мәсәла Даԝьд у Паԝлос биньн бира хԝә у бәрдәԝам кьн «бь ԛәнщийе . . . сәр хьрабийе» кʹәвьн (Рʹом. 12:21). Әм мина Даԝьд нә кӧ гәрәке кәвьра бавежьнә әʹнийа мәрьва, ле Хәбәра Хԝәде бьгьһиньн һʹьш у дьле ԝан. Әм гәрәке бь Кʹьтеба Пироз щаба пьрсед мәрьва бьдьн, бь ԛәдьр у һʹәйф бьн һьндава ԝанда, у һʹәмушкарʹа, һәла һе дьжмьнарʹа жи ԛәнщийе бькьн (Мәт. 5:44; 1 Пәт. 3:15-17).

16-17. Паԝлос тʹӧ щар чь бир нәдькьр?

¹⁶ Пешийа кӧ Паԝлос бьбуйа шагьрте Иса, әԝ щаһьләки бабах бу у пәй ԝан мәрьва дькʹәт, йед кӧ пәй Иса дьчун (Кʹар. Шанд. 7:58; 1 Тимтʹ. 1:13). Чахе Паԝлос наве кʹижани һьнге Шаԝул бу, щьвата Мәсиһийа дьзеранд, Иса хԝәха ԝи да сәкьнандьне. Иса жь әʹзмана тʹәви Паԝлос хәбәр да у әԝ кор кьр. Паԝлос гәрәке аликʹари жь ԝан мәрьва бьхԝәста, кʹижана әԝи дьзеранд. Әԝи бь мьлукти аликʹари жь Һананийа шагьрт ԛәбул кьр, кʹижани кӧ рʹонайа чʹәʹве ԝи ани щи (Кʹар. Шанд. 9:3-9, 17, 18).

¹⁷ Ԝәʹдә шунда Паԝлос бу әндәме щьвата Мәсиһити, ле әԝи тʹӧ щар әԝ дәрса кӧ Иса сәр рʹийа Шаме ԝи һин кьрьбу, бир нәдькьр. Паԝлос мьлук ма у аликʹарийа хушк-бьра ԛәбул кьр. Әԝи ани сәр хԝә, ԝәки ԝана ԛәԝат дьда ԝи (Колс. 4:10, 11).

18. Чьрʹа щара әм нахԝазьн аликʹарийе ԛәбул кьн?

¹⁸ Әм жь Паԝлос чь дькарьн һин бьн?  Чахе әм дәрһәԛа рʹастийе тʹәзә пеһʹәсийан, дьбәкә мә дьхԝәст ԝәки кәсәк аликʹарийе бьдә мә, чьмки мә фәʹм дькьр, ԝәки әм гәләк тьшт ньзаньн у лазьм ә һин бьн (1 Корн. 3:1, 2). Ле ньһа әм чь дькарьн бежьн? Һәрге әм зудава Йаһоԝарʹа хьзмәт дькьн у әм ида рʹьнд щерʹьбанди нә, дьбәкә дьле мә нәйе кӧ аликʹарийа хушк-бьра ԛәбул кьн, илаһи йа ԝан, йед кӧ тʹәзә һатьнә нава рʹастийе. Ле Йаһоԝа бь аликʹарийа хушк-бьра мә ԛәԝи дькә (Рʹом. 1:11, 12). Ләма жи әм гәрәке аликʹарийа хушк-бьра ԛәбул кьн.

19. Чьрʹа Паԝлос дькарьбу шьхӧлед мәзьн бькә?

¹⁹ Паԝлос чахе бу Мәсиһи, әԝи шьхӧлед гьринг кьр. Чьрʹа? Чьмки әԝи фәʹм кьр, ԝәки култура мәрьва, ӧса жи ԛәԝат, хԝәндьн у һәбук фәрз нинә, ле һәрге мәрьв мьлук бә у итʹбарийа хԝә Йаһоԝа бинә, ԝе бькарьбә гәләк тьштед баш бькә. Ԝәрә әм һʹәму жи чʹәʹв бьдьнә Паԝлос кӧ 1) итʹбарийа хԝә Йаһоԝа биньн, 2) жь мәсәлед Кʹьтеба Пироз һин бьн, у 3) аликʹарийа хушк-бьра ԛәбул кьн. Һьнге фьрԛи тʹӧнә әм чьԛас жи хԝә сьст тʹәхмин кьн, Йаһоԝа ԝе ԛәԝате бьдә мә!