Чахе Иса сала 29 Д.М., һатә ньхӧмандьне, һьнге әԝ бу Сәрәккʹаһин. Ле әм ве йәке жь кʹӧ заньн? Чахе Иса һатә ньхӧмандьне, әԝи да кʹьфше кӧ һазьр ә әʹмьре хԝә ча ԛӧрбан бьдә сәр горигәһа симболик, кʹижан кӧ ԛьрара Хԝәде дьһатә һʹәсабе (Галт. 1:4; Ибрн. 10:5-10). Әԝ йәк кӧ горигәһа симболик саз бу чахе Иса һатә ньхӧмандьне, нишан дькә кӧ пʹарьстгәһа рʹӧһʹани жи һьнге саз бу. У горигәһ ԝедәре тьштәки сәрәкә йә. Ве пʹарьстгәһеда, әԝед кӧ баԝәрийа хԝә ԛӧрбана Иса тиньн, дькарьн Йаһоԝа рʹаст бьһʹәбиньн (Мәт. 3:16, 17; Ибрн. 5:4-6).

Пʹарьстгәһа рʹӧһʹанида сәрәккʹаһин лазьм бу. Ләма жи Иса алийе Йаһоԝада «бь рʹӧһʹе пироз у ԛәԝате» ча сәрәккʹаһин һатә кʹьфшкьрьне (Кʹар. Шанд. 10:37, 38; Марԛ. 1:9-11). Ле чьрʹа әм дькарьн дӧдьли нәбьн, ԝәки Иса пешийа мьрьн у сахкьрьна хԝә һатә кʹьфшкьрьне? Мәсәла Һарун у сәрәккʹаһинед паши ԝи, ԝе али мә бькә щаба ве пьрсе бьстиньн.

Ль гора ԛануна Муса тʹәне сәрәккʹаһин дькарьбу конда у пʹарьстгәһеда бькʹәта Щийе Һәри Пироз. Щийе Һәри Пироз жь пирозгәһе пе пʹәрʹде башԛә дьбу. Сәрәккʹаһин тʹәне Рʹожа Кʹәԝандьне пʹәрʹдерʹа дәрбаз дьбу (Ибрн. 9:1-3, 6, 7). Чаԝа Һарун у сәрәккʹаһинед дьн дьһатьнә кʹьфшкьрьне пешийа кӧ «пʹәрʹде» конрʹа дәрбаз буна, Иса жи гәрәке пʹарьстгәһа рʹӧһʹанида бьһата кʹьфшкьрьне ча сәрәккʹаһин, пешийа мьрьна хԝә. Тʹәне паши ве йәке әԝ дькарьбу бь симболик «пʹәрʹдерʹа . . . аԝа готи бь бәдәна хԝә» бькʹәта жийина әʹзмани (Ибрн. 10:20). Ләма жи Паԝлосе шанди сәр Иса гот, кӧ әԝ ча «сәрәккʹаһин» те у паше «коне һе мәзьн у кʹамьлрʹа дәрбаз бу, йе кӧ нә бь дәста һатийә чекьрьне», у «хут кʹәтә әʹзмен» (Ибрн. 9:11, 24).

Ортʹа ве йәкеда кӧ кʹәнге пәймана ну һатә ԛанункьрьне у кʹәнге кʹәтә ԛәԝате тʹӧ фьрԛи тʹӧнә. Ле әм чьрʹа дькарьн ӧса бежьн? Чахе Иса чу ль әʹзмен у бона мә ԛимәте әʹмьре хԝәйи беԛьсур да бәр Хԝәде, бь ве йәке дәстпебу просеса ԛанункьрьна пәймана тʹәзә. Һәма әԝе просесе ӧса жи пәйман кьрә ԛәԝате. Ле кʹижан гав дькʹәтьнә нава ве просесе?

Йа пешьн, Иса бәр Йаһоԝа сәкьни; йа дӧда әԝи ԛимәта ԛӧрбана хԝә да бәр Йаһоԝа, йа сьсийа Йаһоԝа ԛимәте хуна Иса кӧ һатә рʹетьне, ԛәбул кьр. Һʹәта әв һәр се гав нәһатана кьрьне, пәймана тʹәзә ԝе нәкʹәта ԛәԝате.

Кʹьтеба Пирозда найе готьне Йаһоԝа кʹәнге ԛимәте ԛӧрбана Иса ԛәбул кьр. Ләма жи әм нькарьн бежьн әв пәймана тʹәзә чьчах һатә ԛанункьрьне у кʹәтә ԛәԝате. Ле йәкә әм заньн ве йәке, кӧ Иса дәһ рʹож пешийа Пенщийе Һʹәсабе чу ль әʹзмен (Кʹар. Шанд. 1:3). Әʹйан ә нава ԝи ԝәʹде кьнда, әԝи ԛимәта ԛӧрбана хԝә да бәр Йаһоԝа, кʹижан кӧ һатә ԛәбулкьрьне (Ибрн. 9:12). У чь кӧ Пенщийе Һʹәсабе ԛәԝьми, әшкәрә избаткьрьна ве йәке бу кӧ пәймана тʹәзә кʹәтийә ԛәԝате (Кʹар. Шанд. 2:1-4, 32, 33). Те кʹьфше, кӧ пәймана тʹәзә һьнге ида ԛанункьри у ԛәԝатеда бу.

Һәйнәсәр, пәймана тʹәзә һатә ԛанункьрьне у кʹәтә ԛәԝате, гава Йаһоԝа ԛимәте хуна Иса, кӧ һатә рʹетьне, ԛәбул кьр, у ӧса әԝ пәйман тʹәви йед бь рʹӧһʹе пироз бьжарти жи һатә гьредане. Һьнгеда әԝ пәйман кʹәтийә ԛәԝате, у Иса ча Сәрәккʹаһин ԝәкʹилтийе ве пәймане дькә (Ибрн. 7:25; 8:1-3, 6; 9:13-15).