Әз Минесотайеда (Америка), сала 1954 һатьмә буйине. Малбәта мә Католик бун, у әм нә кʹәсиб бун, нә жи дәԝләти. Әм пенщ хушк-бьра бун, әз йе дӧда бум. Әз мәкʹтәба Католикида һин дьбум, у бәрдәстийе кʹәшиш бум. Мьн Кʹьтеба Пироз рʹьнд ньзаньбу. Әз дьфькьрим кӧ Хԝәде һәйә, йе кӧ һәр тьшт әʹфьрандийә, ле һьндава ве дереда мьн баԝәрийа хԝә ӧнда кьрьбу.

Чахе әз сала пешьн колеща ԛанунзанийеда һин дьбум, щарәке Шәʹдед Йаһоԝа зәнгьле дәре мьн хьстьн. Һьнге әз бәтал нибум, чьмки мьн кʹьнще хԝә дьшушт, у әԝ жьн-мер ԛайил бун, ԝәки щарәкә дьн бен. Гава әԝана һатьн, мьн дӧ пьрс да ԝан: «Чьрʹа мәрьвед хьраб пешда дьчьн, ле йед ԛәнщ на?» у «Мәрьв ча дькарә рʹасти бәхтәԝар бә?» Ԝана кʹьтеба «Рʹастийа кӧ Дьбә бәрбь Жийина Һʹәта-Һʹәтайе» у Кʹьтеба Пироз «Ԝәлгәрʹандьна Дьнйа Тʹәзә» данә мьн. У әз ԛайил бум, кӧ әԝана Кʹьтеба Пироз мьн һин кьн. Әԝе һинбуне те бежи чʹәʹве мьн вәкьр. Әз ӧса ша бум  чахе пеһʹәсийам, ԝәки Пʹадшатийа Хԝәде ԝе сәрԝертийе сәр әʹрде бькә. Мьн дьдит кӧ һʹӧкӧмәтийа мәрьва чь ахьрийе тинә, у әԝе чьԛас еш, кӧл-дәрд, нәһәԛи у хәзәб анийә дьне.

Сала 1982-да щьвата мәзьн, бажаре Ст. Полда авайикә мәзьнда дәрбаз бу, у ԝедәре әз һатьмә ньхӧмандьне. Һʹәфтийа дьн, әз диса чумә ԝедәре, ԝәки екзамина адвокатийе бьдьм. Мәһа Щотмәһеда әз пеһʹәсийам, кӧ әз дәрбаз бумә, у әз ида дькарьбум ча адвокат бьхәбьтьм.

Сәр ве щьвата мәзьн, әз рʹасти Майк Ричардсон һатьм, йе кӧ Бәйтʹәла Бруклинеда хьзмәт дькьр. Әԝи мьнрʹа гьли кьр, ԝәки офиса мәйә сәрәкәда, идара шьхӧлед диԝане һатә сазкьрьне. Һьнге һатә бира мьн гьлийед нәмере Әтйопи, кӧ Кʹаред Шандийа 8:36-да ньвисар ьн. Мьн пьрс да хԝә: «Чь наһелә кӧ әз ве идареда хьзмәт кьм?» Ләма жи мьн бланка бона хьзмәтийа Бәйтʹәле тʹьжә кьр.

Дьле де-баве мьн нәһат, кӧ әз бумә Шәʹде Йаһоԝа. Баве мьн жь мьн пьрси гәло кʹара ве йәке һәйә, һәрге әз Бәйтʹәледа аликʹарийе бьдьм. Мьн жерʹа шьровәкьр, кӧ әз ве йәке дьхԝазьм рʹәзәдьли бькьм, у ча әндәме Бәйтʹәле, әзе тʹәне 75 долара һәр мәһ бьстиньм.

Мьн нькарьбу дәрберʹа Бәйтʹәледа хьзмәт кьм, чьмки әз диԝанәкеда ида ԛайил бьбум, кӧ ча адвокат бьхәбьтьм. Ләма мьн сала 1984-да дәстпекьр Бәйтʹәледа хьзмәт кьм. Ԝедәре әз идара шьхӧлед диԝанеда һатьмә кʹьфшкьрьне. Чьԛас баш бу, кӧ әз пешда диԝанеда хәбьтим, чьмки шьхӧле адвокатийеда бумә щерʹьбанди.

Тʹәшкиләта мә шәһәре Нийу Щерсида, мәһа Мьждаре, сала 1983, Ода Театра Стенли кʹьрʹи. Бьра жь мәрьвед дәԝләте изьн хԝәстьн, ԝәки системед әләктрики у лулед аве бьгӧһезьн, чьмки һʹаләки хьрабда бун. Чахе бьра рʹасти ԝан һатьн, шьровәкьрьн кӧ әве ода Театра Стенли, дьхԝазьн бона щьватед мәзьнә Шәʹдед Йаһоԝа бьдьнә хәбате. Әве йәке проблем пешда ани. Әв театр говәка шәһәрда бу, у ль гора ԛанунед ԝи шәһәри, авайед бона һʹәбандьне гәрәке ԝи щийи нибуна. Ләма жи мәрьвед дәԝләте ԝанрʹа ԛайил нәбун. Бьра әв шьхӧл данә диԝане, ле диԝане ԛәбул нәкьр, кӧ әве пьрсе сафи кә.

 Чахе тʹәшкиләта мә әв пьрс да диԝана фәдәралийә һәреми, һьнге ида һʹәфтек бу, кӧ мьн Бәйтʹәледа хьзмәт дькьр. Әз дӧ сала ве диԝанеда ча адвокат хәбьтибум, ләма жи әз һаш жь шьхӧлед ӧса һәбум. Адвокатәки мә шьровәкьр, кӧ ве ода Театра Стенлида щурʹә-щурʹә щьвин, бәʹса хәбәре синәм у рок консерт, дәрбаз дьбун. У әԝи гот ле чьрʹа изьн тʹӧнә, ԝәки щьвинед кӧ һʹәбандьнева гьредайи нә, дәрбаз бьн? Әԝе диԝане пьштгьрийа мә кьр, гот кӧ мәрьвед дәԝләте йе шәһәре Щерси, азайа мәйә һʹәбандьне тʹәрьбандьнә. Диԝане сафи кьр кӧ изьна мә һәйә әви авайи бьдьнә хәбате, у мьн дьдит ча Йаһоԝа шьхӧлед диԝанеда тʹәшкиләта хԝә кʹәрәм дькә, сәва шьхӧле ԝи пешда һәрʹә. Әз гәләк ша дьбум, кӧ мьн жи алийе хԝәда кʹомәк да.

Бьра проектәкә мәзьн саз кьрьн, ԝәки әве ода театре тʹәзә кьн, у нава саләкеда кемтьр ида 8 Илоне, сала 1985, шәһәре Щерсида хьлазкьрьна мәкʹтәба Гиләд дәрбаз бу. Мьнрʹа ԛәдьрәки мәзьн бу, кӧ мьн бона шьхӧле Йаһоԝа аликʹари да. Әԝе йәке мьнрʹа һе зедә шабун ани, нә кӧ хәбата мьнә бәре. Мьн нә жи дькарьбу бьда бәр чʹәʹве хԝә, кӧ Йаһоԝа ԝе ԛәдьрәки һаԛас мәзьн бьдә мьн, у диса гәләк шьхӧл бона мьн һазьр кә.

Салед 1980-да, гәләк нәхԝәшханә мәрʹа ԛайил нәдьбун, кӧ бе хун Шәʹдед Йаһоԝа ԛәнщ кьн. Илаһи кʹӧлфәтед һʹәмлә ве пьрседа рʹасти чәтьнайе дьһатьн, чьмки һʹакьма дьгот, ԝәки изьна ԝан тʹӧнә кӧ нәһельн хуне бәри ԝан дьн. Ԝана мәʹни дьгьртьн, кӧ һәрге кʹӧлфәт хуне бәри хԝә нәдә, дькарә бьмьрә у зарʹа ԝе бе де бьминә.

Хушка мә Денис Николо 29 Кануна Пешьн, сала 1988, чахе зарʹ жерʹа бу, гәләк хун ӧнда кьр, у һемоглобина ԝе һʹәта 5.0 бәржер бу. Доктор гот, кӧ әʹмьре ԝе бьн ԛәзийеда нә, у лазьм ә хуне бәри ԝе дьн. Хушка мә ԛайил нәбу. Шәбәԛа дьн, доктора жь һʹакьм изьн хԝәстьн, ԝәки хуне бәри ԝе дьн. Һʹакьм бе диԝан, нә хушка мә пьрси нә жи мере ԝе, изьн да кӧ хуне бәри ԝе дьн.

Рʹаст ә нәфәред ԝе у меред ԝе мьԛабьли ве йәке рʹабун, йәкә рʹожа майин, Инийе, 30 Кануна Пешьн, доктора зоре хун бәри ве хушке дан. Һәма ве еваре, чәнд нәфәред ԝе у чәнд рʹуспи һатьнә гьртьне, сәва ве йәке кӧ нәдьһиштьн хуне бәри Николойе дьн. Шәмийе шәбәԛе, шәһәре Нийу Йоркеда у Лонг Айлендеда нучеда дәрһәԛа ве йәке әʹлам кьрьн.

 Дӧшәме шәбәԛе, мьн тʹәви Милтон Молен, һʹакьме диԝана бьльнд хәбәр да. Мьн жерʹа һәр тьшт шьровәкьр у әʹйан кьр, ԝәки һʹакьме майин хԝәстьна ве хушке һьлнәдайә һʹәсаб, нә жи йа нәфәред ԝейә мале. Әԝи ԛоле хԝә данийә, у бей изьна ԝан хун бәри ԝе данә. Милтон һʹакьм мьнрʹа гот, кӧ нивро бемә офиса ԝи, ԝәки дәрһәԛа избаткьрьна у ԛанунед бона дәрәщед ӧса, шеԝьр кьн. Сәркʹаре идара мьн Филип Брумлей, тʹәви мьн һатә офиса ԝи. Әԝи һʹакьми ӧса жи гази адвокате ве нәхԝәшхане кьр. Шеԝьра мә һеди-һеди дьбу дәʹԝ-доз, у бьра бь тактики сәр блокнота хԝә мьнрʹа ньвиси «дәнге хԝә нәрм кә». Әԝ йәк ширәтәкә баш бу бона мьн, чьмки мьн гәләк дьхԝәст ԝи адвокатирʹа избат кьм, кӧ әв нәрʹаст ә, у ләма мьн тʹәви ԝи сәрт хәбәр дьда.

Паши ԝәкә сьһʹәтәке, Милтон Һʹакьм гот, кӧ шәбәԛе әʹсә пешийе әв пьрс гәрәке бе сафикьрьне. Гава әм жь офиса ԝи дәрдькʹәтьн, әԝи гот кӧ сьбе шьхӧле ԝи адвокате ԝе гәләк хьраб бә. Әԝ дьһатә һʹәсабе, кӧ жерʹа ԝе нәһеса бә хԝә һәԛ дәрхә, чьмки изьна ԝи тʹӧнә бу ве йәке бькә. Һьнге мьн тʹәхмин кьр, ԝәки Йаһоԝа мьнрʹа әʹйан дькә, кӧ әме сәркʹәвьн. Әва рʹасти жи кʹәрәм бу бона мә, чьмки мә дьдит ча Йаһоԝа бона ԛьрара хԝә мә дьдә хәбате.

Мә һʹәта ниве шәве хԝә бона ве диԝане һазьр дькьр. Ода диԝане, незики Бәйтʹәла Бруклине бу, ләма жи һʹәчʹи зәʹф жь идара мә ньга чун ԝедәре. Гава һәр чар һʹакьма һʹәму избаткьрьн у информасийа жь мә бьһистьн, ԝана әʹлам кьр кӧ изьна ԝан тʹӧнә бу бьһельн хуне бәри хушка мә Николо дьн. Әԝе диԝана бьльнд пьшта хушка мә гьрт, у әʹлам кьр кӧ дәрәща ԝеда мафе мәрьва һатийә тʹәрьбандьне, чьмки хԝәстьна йе нәхԝәш һьлнәдан һʹәсаб у нә жи гӧһ дане.

Диԝана бьльнд йа Нийу Йорке әʹлам кьр, кӧ мафе хушка Николо һәбу кӧ хуне бәри хԝә нәдә. Диԝана бьльндда жь чар шьхӧлед хунева гьредайи, әԝ йа пешьн бу, кʹижанеда кӧ мьн кʹомәк да. (Бьньһерʹә чаргошә бь наве « Сәркʹәтьнед Диԝана Бьльндда».) Мьн ӧса жи тʹәви адвокатед  Бәйтʹәлейә майин кʹомәк дьда тʹәшкиләта мә ԝан пьрсада, чахе мәрьв бь ԛануни зарʹа дькә әԝләде хԝә, һәвԛәтандьна жьн-мера, у кʹьрʹин-фьротана авайада.

Чахе әз щара пешьн рʹасти Даԝн һатьм, әԝ жь мере хԝә ԛәтийа бу у се зарʹед хԝә хԝәй дькьр. Әԝ һьн дьхәбьти, ԝәки малбәта хԝә хԝәй кә у һьн жи ча пешәнг хьзмәт дькьр. Әԝе әʹмьре хԝәда гәләк дәрд дитьбу, у әз гәләк әʹщебмайи дьмам, кӧ әԝ ча бь хирәт Йаһоԝарʹа хьзмәт дькә. Сала 1992, әм чунә сәр щьвата мәзьн шәһәре Нийу Йоркеда, у мьн жерʹа гот кӧ әз дьхԝазьм ԝе һе незик нас кьм. Саләкеда әм зәԝьщин. Әԝ кʹӧлфәта рʹӧһʹани у һʹәнәкчи пʹешкʹеша жь Йаһоԝа йә. Даԝне рʹасти жи әʹмьре мьн бәхтәԝар кьр (Мәтʹлк. 31:12).

Чахе мә һәв станд, зарʹед ԝе 11, 13, у 16 сали бун. Мьн дьхԝәст ԝанрʹа бьбьмә бавәки баш, ләма мьн әʹдәбйәтед мәда дәрһәԛа зьрʹбав гәләк дьхԝәнд, у һәр ширәт дьда хәбате. Рʹаст ә нава салада чәтьнайи һәбун, ле дьле мьн ша дьбә, кӧ әԝан зарʹа әз ԛәбул кьрьм ча һәвале незик у баве һʹьзкьри. Дәре мә бона һәвалед зарʹа тʹьме вәкьри бу, у әм жи ԝан щаһьларʹа ша дьбун.

Сала 2013, әз у Даԝн дәрбази шәһәре Ԝисконсин бун, сәва мьԛати де-бавед хԝәйә әʹмьрда мәзьн бьн. Әз гәләк ша бум, кӧ мьн диса жи бәрдәԝам дькьр бона шьхӧлед диԝанева гьредайи аликʹари дьда Бәйтʹәле.

Мәһа Илоне, сала 2018, мьн тедәрхьст кӧ ԛьрʹька мьнда тʹьме бәлхәм тʹоп дьбә. Гава әз чумә щәм доктор, әԝи фәʹм нәкьр кӧ чьрʹа ӧса дьбә. Паше докторе майин мьнрʹа гот кӧ һәрʹьм щәм нәӧролог. Мәһа Чьләйе, сала 2019, нәӧролог мьнрʹа гот, кӧ әв нәхԝәшийа нәӧрологи йә, кʹижан кӧ зу пешда дьчә у сәр тʹәмамийа бәдәне һʹӧкӧм дьбә у найе ԛәнщкьрьне.

Се рʹож шунда, гава әз сәр бузе спортәкева мьжул дьбум, әз кʹәтьм у зәнда мьн шькәст. Пешийа ве йәке әз тʹәмамийа әʹмьре хԝәда ве спортева мьжул дьбум, чьмки мьн гәләк һʹьз дькьр. Ле мьн фәʹм кьр, кӧ әз ида нькарьм бәдәна хԝә контрол кьм. Бона мьн шок бу кӧ әв нәхԝәши ча зу пешда дьчә. Мьнрʹа ида чәтьн буйә хәбәр дьм, даԛорчʹиньм, у рʹе һәрʹьм.

Бона мьн ԛәдьрәки гәләк мәзьн ә, кӧ мьн пʹеше хԝәйи адвокатийе, бона кʹара тʹәшкиләта Йаһоԝа да хәбате. Әз ӧса жи ша дьбьм, кӧ мьн журналед зандарийеда гәләк готар ньвисин, кʹижан кӧ бона доктора, ԛанунзана у һʹакьма йә. Хенщи ве йәке, щурʹә-щурʹә ԝәлатада мьн готар дьхԝәнд, ԝәки мафе Шәʹдед Йаһоԝа бьпарезьм, кӧ ԛәнщкьрьн у операсийа бе хун бькьн. Ле ча Луԛа 17:10-да те готьне, әз жи ӧса дьфькьрьм, кӧ әз хӧламе бекер ьм. Чь кӧ мьн дькʹәт, мьн әԝ кьр!