1. Чьма фәрз ә кӧ әм хԝә бона тʹәшԛәла һазьр кьн?

 ҺАЗЬРБУНА баш дькарә әʹмьре мәрьва хьлаз кә. Кәсед кӧ бона тʹәшԛәла һазьр ьн, дькарьн һьм хԝә хьлаз кьн һьм жи али мәрьвед дьн бькьн. Тʹәшкиләтәкә Әԝропайе, йа кӧ али мәрьва дькә, ӧса дьбежә: «Һазьрбуна баш әʹмьре мәрьва хьлаз дькә».

2. Чьма әм гәрәке бона тәнгасийа мәзьн хԝә һазьр кьн? (Мәтта 24:44)

² Тәнгасийа мәзьн ԝе ньшкева дәстпебә (Мәтта 24:21). Әԝ жь тʹәшԛәлед тʹәбийәте щӧдә дьбә бь ве йәке, кӧ әм заньн ԝәки әԝ рʹож ԝе әʹсәйи бе. Ԝәкә 2 000 сал пешда, Иса тʹәми да шагьртед хԝә, ԝәки бона ԝе рʹоже һазьр бьн (Бьхунә Мәтта 24:44). Һәрге әм һазьр бьн, ԝе мәрʹа дьһа һеса бә ве дәма чәтьнда тәйах кьн у али кәсед дьн бькьн (Луԛа 21:36).

3. Сәбьр, дьлшәԝати у һʹьзкьрьн ча али мә дькьн, ԝәки әм бона тәнгасийа мәзьн һазьр бьн?

³ Се һʹӧнӧр дькарьн али мә бькьн, ԝәки әм бона тәнгасийа мәзьн һазьр бьн. Бьдә бәр чʹәʹве хԝә, кӧ әм дәрһәԛа рʹожа диԝана Хԝәде әʹлам дькьн у мәрьв мьԛабьли мә дәртен (Әʹйанти 16:21). Ԝи чахи сәбьр лазьм ә, ԝәки әм гӧра Йаһоԝа бькьн у баԝәр бьн, кӧ әԝе мә бьпарезә. Ле һәрге хушк-бьред мә мал-мьлкʹе хԝә ӧнда кьн, әме чь бькьн? (Һәбаԛуԛ 3:17, 18) Һьнге әм гәрәке дьлшәԝат бьн, ԝәки аликʹарийе бьдьнә ԝан. Йан жи бьдьнә бәр чʹәʹве хԝә, кӧ әм жь бо һʹьщумкьрьна коалисйа мьләта тʹәви хушк-бьра маләкә бьчʹукда дьминьн (Һәзәԛел 38:10-12). Ԝи чахи һʹьзкьрьна мә һьндава хушк-бьра гәрәке гәләк ԛәԝи бә,  ԝәки әм тʹәвайи ԝан чәтьнайада тәйах кьн.

4. Кʹьтеба Пироз ча нишан дькә, кӧ әм гәрәке сәбьр, дьлшәԝати у һʹьзкьрьна хԝә дьһа ԛәԝи кьн?

⁴ Хәбәра Хԝәде мә һелан дькә, кӧ әм сәбьр, дьлшәԝати у һʹьзкьрьнеда һе зедә пешда һәрʹьн. Луԛа 21:19-да те готьне: «Бь сәбьра хԝә һуне рʹӧһʹе хԝә хьлаз кьн». Колоси 3:12 дьбежә: «Дьлшәԝатийе . . . ль хԝә ԝәргьрьн». У 1 Тʹесалоники 4:9, 10-да те готьне: «Һун хԝәха жь Хԝәде һин бунә, кӧ һәв һʹьз бькьн. . . . Ле әм һиви жь ԝә дькьн хушк-бьрано, кӧ һун ԝе йәкеда һе пешда һәрʹьн». Әв рʹез бона шагьртед Иса һатьбунә ньвисаре, кʹижана кӧ ида сәбьр, дьлшәԝати у һʹьзкьрьн дьданә кʹьфше. Ле диса жи лазьм бу кӧ әԝана бәрдәԝам кьн ван һʹӧнӧра пешда биньн. Әм жи гәрәке ве йәке бькьн. Ньһа әме шеԝьр кьн, кӧ ча Мәсиһийед ԛьрʹна йәке әв һʹӧнӧр пешда дьанин. Паше әме шеԝьр кьн, кӧ ча әм дькарьн чʹәʹв бьдьнә ԝан у бона тәнгасийа мәзьн һазьр бьн. Мәсәла ԝан ча дькарә али мә бькә, ԝәки әм ван һʹӧнӧра нав хԝәда дьһа ԛәԝи кьн у хԝә бона тәнгасийа мәзьн һазьр кьн?

5. Чь али шагьртед Иса дькьр, ԝәки сәбьр кьн?

⁵ Ԛьрʹна йәкеда, лазьм бу кӧ шагьртед Иса сәбьр кьн (Ибрани 10:36). Хенщи чәтьнайед һәррʹожи, әԝана жь алийе рʹебәред Щьһуйа, дәԝләте у малбәта хԝә жи рʹасти пәйкʹәтьна дьһатьн, чьмки әԝана шагьртед Иса бун (Мәтта 10:21). У щьватеда жи әԝана гәрәке фәсал буна, ԝәки һинкьрьнед рʹабәра, йед кӧ дьхԝәстьн щӧдәбун бькьрана щьвате, сәр ԝана һʹӧкӧм нәкә (Кʹаред Шандийа 20:29, 30). Ле хьзмәткʹаред Хԝәде бь амьни тәйах дькьрьн (Әʹйанти 2:3). Гәло чь али ԝан дькьр? Әԝана дәрһәԛа сәрһатийед жь Ньвисаред Пироз кʹур дьфькьрин, мәсәлә, дәрһәԛа сәрһатийа Ибо, йе кӧ сәбьр дьда кʹьфше (Аԛуб 5:10, 11). Ԝана бона ԛәԝате дӧа дькьр (Кʹаред Шандийа 4:29-31). У ԝана бир нәдькьр, кӧ һәрге әԝана сәбьр кьн, Хԝәде ԝе әʹсәйи ԝана кʹәрәм кә (Кʹаред Шандийа 5:41).

6. Әм жь сәрһатийа Меритайе чь һин дьбьн?

⁶ Һәрге әм сәрһатийед жь Хәбәра Хԝәде у әʹдәбйәтед мә бьхуньн у дәрһәԛа ԝан кʹур бьфькьрьн, әме бькарьбьн һе зедә сәбьр кьн. Ԝәрә әм дина хԝә бьдьнә сәрһатийа хушка мә Мерита, йа кӧ Албанйайеда дьжи. Әԝ алийе малбәта хԝәда рʹасти пәйкʹәтьна гьран дьһат. Әԝ дьбежә: «Сәрһатийа дәрһәԛа сәбьра Ибо гәләк мьн ԛәԝи кьр. Рʹаст ә әԝи гәләк еш кʹьшанд у ньзаньбу мәʹни чь бу, ле йәкә әԝи гот: «Һʹәта нәфса хԝә йа даԝи, әзе дәв жь кʹамьлийа хԝә бәрʹнәдьм» (Ибо 27:5, ИМ). Әз дьфькьрим кӧ дәрде мьн бәр дәрде ԝи тьштәк нинә. Ибо пʹехәмбәр ньзаньбу кӧ тәнгасийед ԝи жь кʹӧ тен, ле мьн заньбу кӧ мәʹнийа проблемед мьн кʹе бу».

7. Һәрге чәтьнайед мәйә мәзьн һе тʹӧнә нә, гәрәке әм ньһада чь бькьн?

⁷ Ӧса жи һәрге әм гәләк щар Йаһоԝарʹа дӧа кьн у ԝирʹа бәʹса хәм у дәрдед хԝә бькьн, әме бькарьбьн һе зедә сәбьр кьн (Филипи 4:6; 1 Тʹесалоники 5:17). Дьбәкә чәтьнайед тәйә гьран ньһа тʹӧнә нә. Ле диса жи, гава тӧ дьлтәнг у тʹәвльһәв дьби, йан жи ньзани чь бьки, гәло тӧ Йаһоԝарʹа бона аликʹарийе дӧа дьки? Һәрге тӧ ньһада бона чәтьнайед һәррʹожи аликʹарийе жь Хԝәде бьхԝази, тӧйе һин би чәтьнайед мәзьнда жи хԝә бьспери Йаһоԝа. Бь ви щурʹәйи, тӧйе бь тʹәмами баԝәр би, ԝәки әԝ рʹьнд занә, кӧ чаԝа у кʹәнге али тә бькә (Зәбур 27:1, 3).

8. Мәсәла Мирайе ча нишан дькә, кӧ сәбьркьрьна һьмбәри проблемед иройин, дькарә ахьрийеда жи али мә бькә? (Аԛуб 1:2-4) (Бьньһерʹә ӧса жи шькьл.)

⁸ Һәрге әм ньһада һьмбәри проблемед  хԝә Йаһоԝарʹа амьн бьминьн, әме тәнгасийа мәзьнда жи сәбьр кьн (Рʹомайи 5:3). Гәло чьрʹа? Гәләк хушк-бьра дьбежьн, кӧ чахе әԝана чәтьнайед гьранда сәбьр дькьн, әв йәк али ԝан дькә, ԝәки һьмбәри дәрдед дьн жи тәйах кьн. Сәбьр али ԝан кьрийә ԝәки баԝәрийа хԝә дьһа ԛәԝи кьн, у баԝәр бьн кӧ Йаһоԝа тʹьме һазьр ә али ԝан бькә. Әв баԝәри али ԝан дькә, кӧ һьмбәри проблемед дьн жи сәркʹәвьн (Бьхунә Аԛуб 1:2-4). Ԝәрә әм дина хԝә бьдьн пешәнгәкә бь наве Мира, йа кӧ Албанйайеда дьжи. Әԝ щара дьфькьрә кӧ проблемед тӧ кәси мина проблемед ԝе гьран ниньн. Ле паше әԝ тинә бира хԝә, кӧ Йаһоԝа 20 салед пашьнда чаԝа али ԝе кьрийә, у әԝ хԝәрʹа дьбежә: «Амьн бьминә! Бьра әԝ һәр тьшт, чьда Йаһоԝа али тә кьрийә кӧ сәбьр ки, бош-бәтал нәчә». Тӧ жи дькари бьфькьри кӧ һʹәта ньһа, Йаһоԝа ча али тә кьрийә ԝәки тӧ сәбьр ки. Һәр щар чахе тӧ бәр чәтьнайике тәйах дьки, Хԝәде дьвинә у Әԝе тә кʹәрәм кә (Мәтта 5:10-12). Паше, гава тәнгасийа мәзьн дәстпебә, тӧйе ида бона ве йәке һазьр би у бькарьби диса жи тәйах ки.

9. Щьвата Әнтакйа Сурйайе чаԝа дьлшәԝатийа хԝә нишан кьр?

⁹ Ԝәрә әм шеԝьр кьн, кӧ чь ԛәԝьми гава Щьһустанеда хәлайикә гьран дәстпебу. Чахе щьвата Әнтакйа Сурйайе дәрһәԛа ве йәке пеһʹәсийа, бешьк, дьле ԝан сәр хушк-бьред ль Щьһустане шәԝьти. Ле паше ԝана дьлшәԝатийа хԝә бь кьред хԝә нишан кьр. Ләма жи ԝана «ԛьрар кьрьн кӧ жь дәсте кʹева чьԛас те аликʹарийе бона баԝәрмәндед Щьһустане бьшиньн» (Кʹаред Шандийа 11:27-30). Рʹе чьԛас дур бу жи, хушк-бьред ль Әнтакйайе бь дьл у щан дьхԝәстьн али ԝан бькьн (1 Йуһʹәнна 3:17, 18).

10. Чахе тʹәшԛәлә дьԛәԝьмьн, әм ча дькарьн хушк-бьрарʹа дьлшәԝатийе бьдьнә кʹьфше? (Бьньһерʹә ӧса жи шькьл.)

¹⁰ Иро, гава щики тʹәшԛәләк дьԛәԝьмә, әм жи дькарьн хушк-бьред хԝәрʹа дьлшәԝатийе нишан бькьн у зу һәрʹьн һәԝара ԝан. Әм дькарьн жь рʹуспийа бьпьрсьн һәла әм ча дькарьн али хушк-бьра бькьн. Ӧса жи әм дькарьн бона шьхӧле һʹәмдьнйайе пʹәра ԛӧрбан кьн у бона кәсед зьрардити дӧа бькьн b (Мәтʹәлок 17:17). Мәсәлә, сала 2020-да, ԝәʹде пандемийа коронавирусе, сәр тʹәмамийа дьнйайе зедәтьри 950 Комитейед Аликʹарийе Ԝәʹде Тʹәшԛәлед Тʹәбийәте, һатьнә сазкьрьне. Һʹәму кәсед кӧ ван комитейада кʹар дькьн, һежайи пʹайа нә. Дьле ԝан сәр хушк-бьра дьшәԝьти, ләма жи ԝана аликʹарийа материйали бәла дькьр, бь сайа Кʹьтеба Пироз бәрдьли дьданә ԝан у щарна мал у щийед бона һʹәбандьне ава йан жи тʹәзә дькьрьн (Бәрамбәр кә 2 Корьнтʹи 8:1-4).

11. Дьлшәԝатийа мә ча рʹумәте дьдә Йаһоԝа Хԝәде?

¹¹ Гава әм паши тʹәшԛәләке дьлшәԝатийе дьдьнә кʹьфше, кәсед дьн дина хԝә дьдьнә ве йәке. Мәсәлә, сала 2019-да, фьртонәке Ода щьвате Баһамайеда һьлшанд. Чахе бьра одә тʹәзәда авакьрьн, ԝана гази авакʹаре фирмәке кьр, ԝәки әԝ хәрще авакьрьне һʹәсаб кә. Әԝи бьрарʹа гот: «Әз дьхԝазьм ... мәкʹинед бона авакьрьне, хәбатчи у материала бепʹәрә бьдьм ԝә. ... Әз дьхԝазьм ве йәке тʹәне бона тʹәшкиләта ԝә бькьм. Һʹьзкьрьна нав ԝәда гәләки дьле мьн гьрт». Һʹәчʹи зәʹф мәрьвед ԝе дьнйайе Йаһоԝа нас накьн. Ле гәләк жь ԝан дьвиньн, кӧ Шәʹдед Йаһоԝа чаԝа аликʹарийа  кәсед дьн дькьн. Әм гәләк ша нә, кӧ дьлшәԝатийа мә дькарә сәр кәсед дьн һʹӧкӧм кә, ԝәки әԝ бьхԝазьн Хԝәде нас бькьн, йе кӧ хԝәйе «рʹәʹма дәԝләмәнд ә» (Әфәси 2:4).

12. Дьлшәԝати ча али мә дькә, кӧ әм ирода бона тәнгасийа мәзьн хԝә һазьр кьн? (Әʹйанти 13:16, 17)

¹² Чьма гәләк фәрз ә ԝәки әм ԝәʹде тәнгасийа мәзьн дьлшәԝатийе бьдьнә кʹьфше? Ль гора Кʹьтеба Пироз, кәсед кӧ пьштгьрийа сәрԝеред ве дьнйайе накьн, ԝе рʹасти проблема бен, һьм ньһа һьм жи ԝәʹде тәнгасийа мәзьн (Бьхунә Әʹйанти 13:16, 17). Дьбәкә хушк-бьрарʹа аликʹари лазьм бә, ԝәки тьштед лазьм ԝанрʹа дәстхьн, чьда әԝана һʹәԝщә нә. Гава Пʹадше мә Иса, диԝана мәрьва бькә, у бьвинә кӧ әм һьндава һәвда дьлшәԝат ьн, әԝе мә тʹәглиф кә кӧ әм Пʹадшатийе «ԝар бьн» (Мәтта 25:34-40).

13. Ль гора Рʹомайи 15:7, Мәсиһийед пешьн һʹьзкьрьна нав хԝәда чаԝа ԛәԝи дькьрьн?

¹³ Мәсиһийед пешьн бь ве йәке нас дькьрьн, кӧ һʹьзкьрьн ортʹа ԝанда һәбу. Ле гәло ԝанрʹа һеса бу һʹьзкьрьне һьндава һәвда бьдьнә кʹьфше? Ԝәрә әм дина хԝә бьдьнә щьвата Рʹоме. Нав ԝанда һәбун һьм Щьһуйед кӧ ль гора Ԛануна Муса мәзьн бьбун, һьм жи кәсед жь мьләт у културед дьн. Һьнә Мәсиһи хӧлам бун, һьнәк жи мәрьвед аза бун у дьбәкә хӧламед ԝан жи һәбун. Ле диса жи, гәло шагьртед Иса чаԝа һʹьзкьрьн һьндава һәвда дьданә кʹьфше? Паԝлосе шанди әԝ һелан кьрьн, кӧ «һәвдӧ ԛәбул кьн» (Бьхунә Рʹомайи 15:7). Гәло әԝи дьхԝәст чь бьгота? Хәбәра Йунани, йа кӧ һатийә ԝәлгәрʹандьне ча «ԛәбул кьн», те һʹәсабе кӧ мәрьв кәсәки ль мала хԝә йан ча һәвале хԝә ԛәбул дькә. Мәсәлә, Паԝлосе шанди Фьлимонрʹа гот кӧ бьра әԝ Онисимо, йе кӧ хӧламе ԝийи рʹәви бу, «ԛәбул кә» (Фьлимон 17). Әкила у Прьскилайе жи мерәки бь наве Аполо ԛәбул кьрьн, әԝ бьрьнә бал хԝә у һе рʹаст дәрһәԛа Иса Мәсиһ жерʹа шьровәкьрьн (Кʹаред Шандийа 18:26). Шагьртед Иса изьн нәдьдан ԝәки фьрԛийа ортʹа ԝанда, йәкти у тʹьфаԛийа ԝан хьраб кә у ԝана һәвдӧ ԛәбул дькьр.

14. Хушка мә Анна у мере ԝе чаԝа нишан кьрьн, кӧ әԝана хушк-бьра һʹьз дькьн?

¹⁴ Әм дькарьн бьбьнә достед хушк-бьра у тʹәви ԝан ԝәʹдә дәрбаз кьн. Бь ви щурʹәйи, әм дькарьн һʹьзкьрьне ԝанрʹа нишан кьн. Паше әԝана жи ԝе һʹьзкьрьне мәрʹа нишан кьн (2 Корьнтʹи 6:11-13). Ԝәрә әм дина хԝә бьдьнә сәрһатийа хушка мә Анна у мере ԝе. Дәмәкә кьн паши кӧ әԝана жь бо кʹьфшкьрьна хԝә ча мисйонер дәрбази Африкайа Рʹоавайе бун, пандәмийа коронавирусе дәстпебу. Ләма жи, ԝана нькарьбу хушк-бьред жь щьвата тʹәзә, шәхси бьвиньн у ԝана нас бькьн. Гәло ԝана чаԝа хушк-бьрарʹа нишан дькьр, кӧ ԝана һʹьз дькьн? Ԝана бь сайа видеоконференсийайе ԝанрʹа хәбәр дьдан у дьготьн кӧ дьхԝазьн ԝана дьһа баш нас бькьн. Хушк-бьра гәләк ша бун. Ләма ԝана жи Аннайе у мере ԝерʹа тʹеле дьхьст у смс дьшандьн. Гәло Анна у мере ԝе чьма хирәт дькьрьн кӧ хушк-бьра дьһа баш нас бькьн? Анна дьбежә: «Әз ԛә бир накьм кӧ хушк-бьра чьԛас һʹьзкьрьн мьнрʹа у малбәта мьнрʹа нишан кьрьн, һьм рʹожед хԝәшда һьм жи рʹожед чәтьнда. Мәсәла ԝан әз һелан кьрьм, ԝәки әз жи һʹьзкьрьне нишани кәсед дьн бькьм».

15. Әм жь мәсәла хушка мә Ванесайе, дәрһәԛа һʹьзкьрьна һьндава хушк у бьра чь һин дьбьн? (Бьньһерʹә ӧса жи шькьл.)

¹⁵ Щьватед мәда, хушк-бьред жь щурʹә-щурʹә мьләта һәнә у жь һәв щӧдә дьбьн. Һәрге әм дина хԝә бьдьнә хәйсәтед ԝанә баш, әме һʹьзкьрьна нав хԝәда дьһа ԛәԝи  кьн. Бона хушка мә Ванеса, йа кӧ ль Зәландайа Ну хьзмәт дькә, чәтьн бу кӧ щьватеда тʹәви кәсед дьн һәләԛәтийа баш хԝәй кә. Ле дәԝса кӧ әԝ жь ԝан дур кʹәвә, әԝе сафи кьр, ԝәки дьһа зедә ԝәхт тʹәви ԝан дәрбаз кә. Ӧса әԝе фәʹм кьр, кӧ чьрʹа Йаһоԝа ԝана һʹьз дькә. Әԝ дьбежә: «Жь ԝәхта кӧ мере мьн бу бәрпьрсийаре мьһале әм тʹәви һе зедә хушк-бьра бунә нас, хәйсәтед кʹижана щӧдә бун. Ньһа бона мьн дьһа һеса йә зьман ԝанрʹа бьвиньм. Иро әз щурʹә-щурʹә мәрьва һʹьз дькьм. Бешьк Йаһоԝа ԝана һʹьз дькә, чьмки әԝ изьне дьдә, кӧ щурʹә-щурʹә мәрьв ԝирʹа хьзмәт кьн». Бәле, һәрге әм һин бьн, кӧ мина Йаһоԝа дәрһәԛа кәсед дьн бьфькьрьн, әме избат кьн ԝәки әм ԝана һʹьз дькьн (2 Корьнтʹи 8:24).

16. Чьма гәләк фәрз ә кӧ әм ԝәʹде тәнгасийа мәзьн, һʹьзкьрьне һьндава хушк-бьра бьдьнә кʹьфше? (Бьньһерʹә ӧса жи шькьл.)

¹⁶ Ԝәʹде тәнгасийа мәзьн ԝе гәләк фәрз бә кӧ әм һʹьзкьрьне нишан кьн. Гава әв тәнгаси дәстпебә, гәло Йаһоԝа ԝе чаԝа мә бьпарезә? Дина хԝә бьдьне кӧ гава ԝәʹде бәре һʹьщуми сәр бажаре Бабилоне кьрьн, Йаһоԝа чь рʹебәри да хьзмәткʹаред хԝә: «Ԝәрә гәле мьн! Бькʹәвә одәйед хԝә йед һӧндӧрʹ у ль пьшт хԝә дәрийа бьгьрә. Дәмәкә кӧрт [кьн] хԝә вәшерә, һʹәта кӧ хәзәб дәрбаз бу» (Ишайа 26:20, ИМ). Ча кʹьфш ә ԝәʹде тәнгасийа мәзьн жи әм гәрәке гӧһ бьдьнә ве рʹебәрийе. Дьбәкә әв «одәйед һӧндӧрʹ» тенә һʹәсабе щьватед мә. Ԝе дәме, һәрге әм тʹәви хушк-бьра Йаһоԝарʹа хьзмәт кьн, Йаһоԝа соз дьдә кӧ әԝе мә бьпарезә. Ләма жи, гәрәке әм ньһада хирәт бькьн кӧ жь дьл хушк у бьра һʹьз бькьн. Дьбәкә хьлазбуна мә ве йәкева гьредайи бә!

17. Һәрге әм хԝә ньһада һазьр кьн, әме бькарьбьн тәнгасийа мәзьнда чь бькьн?

¹⁷ «Рʹожа мәзьн йа Хӧдан» ԝе бона һʹәму мәрьва ԝәхтәкә гәләк чәтьн бә (Сефанйа 1:14, 15). Хьзмәткʹаред Йаһоԝа жи ԝе рʹасти тәнгасийа бен. Ле һәрге әм хԝә ньһада һазьр кьн, әме бькарьбьн рʹьһʹәт бьминьн у али кәсед дьн бькьн. Чь жи бьбә, әме һьмбәри һʹәму проблема сәбьр кьн. Гава хушк у бьред мә еше бькʹьшиньн, әме хирәт бькьн кӧ дьлшәԝатийе ԝанрʹа нишан кьн у али ԝан бькьн. У һәрге әм ньһада хушк-бьра һʹьз бькьн, әме ахьрийеда жи ԝана һʹьз бькьн. Паше, Йаһоԝа ԝе жийина һʹәта-һʹәтайе бьдә мә. Һьнге ԝе тʹӧ тʹәшԛәлә у тәнгаси тʹӧнә бьн у ԝе бенә биркьрьне (Ишайа 65:17).