Баве мьн дереда кʹәшиш бу. Ләма жи, әԝи әз у хушка мьн рʹожа Ләʹде дьшандьн дере, кʹидәре кӧ зарʹ дьһатьнә һинкьрьне. Паши сьһʹәта 11 әм тʹәви баве хԝә дьчунә дере. Ле паши нивро, әм тʹәви дийа хԝә дьчунә Ода щьвате йа Шәʹдед Йаһоԝа. Мә һеса дькарьбу фьрԛийа ортʹа һәрдӧ баԝәрийада бьдита.

Дийа мьн тьштед кӧ жь Кʹьтеба Пироз һин дьбу һәвалед хԝәрʹа, Боб у Марион Һачесонрʹа дьгот, у әԝана жи бунә Шәʹдед Йаһоԝа. Сала 1958, Нийу Йоркеда, Щьвата Мәзьнә Һʹәмдьнйайе йа 8 рʹожи бь наве «Хԝәстьна Хԝәде», дәрбаз бу. Малбәта Һачесон әз у се кӧрʹед хԝә бьрьнә ԝедәре. Ньһа әз фәʹм дькьм, кӧ бона ԝан һеса нибу мьн жи тʹәви хԝә бьвьн, ле әԝ Щьвата Мәзьн йәк жь биранинед мьнә һәрә хԝәш ә.

Һʹәта дәһ салийа мьн, әм фермәкеда дьман у мьн һʹьз дькьр һʹәйԝана хԝәй кьм. Мьн дьхԝәст бьбьм дохдьре һʹәйԝана. Дийа мьн әв йәк рʹуспики щьватерʹа гот. Әԝи бь дьловани ани бира мьн, кӧ әм «рʹожед ахьрийеда» дьжин. Ӧса жи, әԝи жь мьн пьрси кӧ хԝәндьна занингәһеда, йа кӧ ԝе чәнд сала бькʹьшанда, ԝе чаԝа сәр достийа мьн тʹәви Йаһоԝа һʹӧкӧм кьра (2 Тимотʹейо 3:1). Ахьрийеда мьн сафи кьр нәчьм занингәһе.

 Әз дьфькьрим, һәла әз дьхԝазьм паши мәкʹтәбе чь бькьм. Әз һәр хьлазийа һʹәфтийе дьчумә хьзмәтийе. Ԝи чахи, бәлакьрьна хәбәра мьзгинийе мьнрʹа шабун нәдьани у мьн нәдьхԝәст бьбьмә пешәнг. Баве мьн у апе мьн, йед кӧ нә Шәʹдед Йаһоԝа бун, әз һелан дькьрьм кӧ әз Торонтойеда, фирмәкә мәзьнда йа щьхаре бьхәбьтьм у һʹәчʹи зәʹф ԝәʹде хԝә ԝедәре хәрщ кьм. Ԝедәре, апе мьн ԛӧльха бьльндда бу, ләма жи мьн әв хәбат ԛәбул кьр.

Торонтойеда, әз гәләки дьхәбьтим у тʹәви һәвалхәбатчийед хԝә, йед кӧ Шәʹдед Йаһоԝа нибун, ԝәʹдә дәрбаз дькьр. Ләма жи ԝәʹде мьн бона шьхӧлед рʹӧһʹани ԛә нәдьма. Әз щәм кальке хԝә, йе кӧ нә Шәʹде Йаһоԝа бу, дьмам. Ле паши мьрьна ԝи, маләкә тʹәзә мьнрʹа лазьм бу.

Малбәта Һачесон, йа кӧ сала 1958-да әз тʹәви хԝә бьрьм сәр Щьвата Мәзьн, мьнрʹа мина де у бав бун. Ԝана әз мала хԝәда ԛәбул кьрьм у али мьн дькьрьн, кӧ әз рʹӧһʹанида пешда һәрʹьм. Сала 1960-да, әз у кӧрʹе ԝан Щон һатьнә ньхӧмандьне. Щон дәстпекьр ча пешәнг хьзмәт кә. Мәсәла ԝи әз һелан кьрьм кӧ дьһа зедә хьзмәт кьм. Хушк-бьра дьдитьн кӧ әз рʹӧһʹанида пешда дьчьм. Паше әз бумә бәрпьрсийаре Мәкʹтәба Данасинкьрьне. a

Сала 1966-да, әз хушкәкә бь наве Ранди Бергрʹа зәԝьщим. Әԝ пешәнгәкә сәр хԝә бу у жь дьл дьхԝәст ԝи щийи хьзмәт кә, кʹидәре кӧ мьзгинван лазьм бун. Бәрпьрсийаре мьһале гӧһ да мә у әм һелан кьрьн дәрбази щьвата Орлийайе (Онтарйо) бьн. Ләма жи әм дәрбази ԝедәре бун.

Гава әм дәрбази Орлийайе бум, әз жи бумә пешәнге һәртʹьм. У мьн жи мина Рандийе хьзмәтийеда шабун дьстанд! Чахе мьн бь хирәт чаԝа пешәнг хьзмәт дькьр, мьн дьдит кӧ Кʹьтеба Пироз чьԛас сәр мәрьва һʹӧкӧме дькә. Гава мә Орлийайеда али жьн-мерәки кьр, ԝәки әԝана әʹмьре хԝәда гӧһастьна бькьн у бьбьн хьзмәткʹаред Йаһоԝа, әм гәләки ша бун.

Гава әм щарәке чунә Торонтойе, әз тʹәви бьраки бь наве Арнолд МакНамара бумә нас, йе кӧ Бәйтʹәледа бьраки щабдар бу. Әԝи пьрс кьр һәла әм дьхԝазьн бьбьн пешәнгед мәхсус. Мьн дәрберʹа щаба ԝи да: «Сәр чʹәʹва, сәр сәра! Ле тʹәне мә нәшиньн Кԝебеке»! Мьн чьрʹа ӧса гот, чьмки ԝи чахи, мәрьвед кӧ Канадайеда дьжитьн у сәр зьмане Инглизи хәбәр дьдан мьԛабьли ԝан мәрьва бун йед кӧ сәр зьмане Франси хәбәр дьдан. У политикед Кԝебеке дьхԝәстьн ԝәки Кԝебек жь Канадайе башԛә бә у бьбә ԝәлатәки аза.

Бьре Арнолд гот: «Ве гаве, Бәйтʹәл пешәнгед мәхсус тʹәне дьшинә Кԝебеке». Мьн дәрберʹа ԛәбул кьр кӧ әм һәрʹьн ԝедәре. Жьна мьн Ранди ида пешда һазьр бу, кӧ ԝедәре хьзмәт кә. Паше мьн фәʹм кьр, кӧ әԝ сафикьрьна мә, сафикьрьнәкә һәрә баш бу!

Паши кӧ әм пенщ һʹәфтийа чунә сәр һинбуна зьмане Франси, әз у Ранди тʹәви жьн-мерәки дьн чунә Римускийе, ԝәкә 540 километр ль бакӧр-рʹоавайа Монреале. Лазьм бу кӧ әм зьмане Франси дьһа баш һин бьн. Гава мьн щьвинәкеда чәнд әʹламәти хԝәндьн, әв йәк әʹйан бу. Дәԝса кӧ әз бежьм «делегатед Австрйайе» ԝе бен, мьн гот ԝәки «һештьрмә» (тәйрәдә) ԝе бен.

Римускийеда, чар хушкед нәмеркьри у сәр хԝә, малбәта Һабердос у дӧ ԛизед ԝан дәстпекьрьн тʹәви мә чар мәрьва хьзмәт кьн. Малбәта Һабердос маләкә мәзьн бона мә һʹәмуйа дитьн, теда 7 одед бона рʹазане һәбун. Мә наве ԝе дани Мала Сьпи, чьмки стун у диԝаред ԝе сьпи бун. Ԝедәре жь 12 һʹәта 14 пешәнг дьман. Чаԝа пешәнгед мәхсус, әз у Ранди жь сьбәһе һʹәта еваре дәрдькʹәтьн хьзмәтийе. Тʹьме мәрьв һәбун кӧ әм тʹәви ԝан дәркʹәвьн хьзмәтийе, һәла һе зьвьстане евара жи. Әм гәләк бона ве йәке рʹази бун.

Әм тʹәви ԝан пешәнга ӧса незики бун, кӧ бунә ча малбәтәк. Щара әм бәр кӧчʹьк рʹудьньштьн, йан жи мә тʹәвайи хԝарьн чедькьр. Бьрак сазбәнд бу, у гәләк щар Шәмийе евара мә кʹьлам дьготьн у дьрәԛьсин.

Гәләк мәрьвед Римускийе дьхԝәстьн рʹастийе бьзаньбьн! Нава пенщ салада, гава мә дит кӧ гәләк хԝәндәкʹаред Кʹьтеба Пироз пешда дьчун у дьһатьнә ньхӧмандьне, әм гәләк ша дьбун. Щьват мәзьн бу у ида ԝәкә 35 мьзгинван теда һәбун.

Кԝебекеда мә дәрсәкә гәләк баш станд. Мә дит кӧ Йаһоԝа хьзмәтийеда чаԝа али мә дькә у бона һʹәԝщед мә хәм дькә. Ӧса жи әм һин бун, кӧ зьмане Франси, мәрьва у култура ԝан һʹьз бькьн. Әв йәк али мә кьр, ԝәки әм мәрьвед жь щурʹә-щурʹә култура жи һʹьз бькьн (2 Корьнтʹи 6:13).

Ньшкева филиале жь мә хԝәст, ԝәки әм дәрбази бажаре Трекадийе бьн, ль бәрава рʹоһьлате йа Нийу Брансԝике. Әв йәк һеса нибу, чьмки мә ида маләк кʹьре һьлдабу у мьн хԝәрʹа хәбатәк дитьбу. Мьн соз дабу кӧ һʹәфте чәнд сьһʹәта әзе мәкʹтәбеда дәрса бьдьм. Ӧса жи һьнә хԝәндәкʹаред мәйә Кʹьтеба Пироз, тʹәзә бьбунә мьзгинван у мә Одәкә Щьвате ида нивида ава кьрьбу.

Мә тʹәмамийа хьлазийа һʹәфте, бона щигӧһастьна хԝә дӧа дькьр. Паше, әм чун кӧ Трекадийе бьвиньн, кʹижан кӧ жь Римускийе гәләк щӧдә бу. Ле мә ида сафи кьрьбу кӧ һәрге әв хԝәстьна Йаһоԝа бә, әме һәрʹьн. Мә Йаһоԝа щерʹьбанд у дит кӧ әԝ ча рʹийа мә рʹаст дькә (Малахи 3:10). Баԝәрийа Рендийе  тʹьме ԛәԝи бу, әԝ тʹьме дькʹәтә һʹәйра мәрьвед дьн у йәкә һʹәнәкчи бу. Ләма жи мәрʹа һаԛас чәтьн нибу щигӧһасти бьн.

Щьвата мәйә тʹәзәда, хенщи бьре мә Роберт Рос, рʹуспийед дьн тʹӧнә бун. Әԝи тʹәви кʹӧлфәта хԝә Линдайе, чаԝа пешәнг хьзмәт дькьрьн у чахе зарʹа пешьн ԝанрʹа һатә буйине, ԝана пешәнгтийа хԝә нәһишт. Рʹаст ә зарʹа ԝан һе бьчʹук бу, ле диса жи әԝана меванһʹьз бун у бь хирәт хьзмәт дькьрьн. Мәсәла ԝан әм һелан дькьрьн.

Чахе мә дӧ сала Трекадийеда хьзмәт кьр, мә ньшкева диса тʹәглифкьрьнәкә тʹәзә станд. Әз һатьмә кʹьфшкьрьне кӧ ча бәрпьрсийаре мьһале хьзмәте кьм. Һʹәфт сала мә сәрледана һәремед сәр зьмане Инглизи дькьр. Паше әм һатьнә шандьне һәремәкә сәр зьмане Франси ль Кԝебеке. Бәрпьрсийаре нәһийе Кԝебекеда, Леонс Креполт бона готаред мьн пʹайе мьн дьда. Ле паше әԝи тʹьме дьпьрси, «Тӧ чаԝа дькари готаред хԝә дьһа баш ки?» b Әв йәк кӧ әԝи дина хԝә дьда мьн, али мьн кьр ԝәки әз һинкьрьнеда дьһа пешдачуйи бьм, у готаред хԝә дьһа һеса кьм.

Сала 1978-да, ль Монреале Щьвата Мәзьнә Һʹәмдьнйайе, бь наве «Баԝәрийа Сәркʹәти» дәрбаз бу. Мьн Идара Хԝарьнеда кʹар дькьр. Әм һивийа 80 000 мәрьви бун, у ве идареда гәләк шьхӧл һәбу, у мә гәрәке нә кӧ чаԝа бәре, ле бь щурʹәки дьн мәрьва тʹер кьра. Һәр тьшт тʹәзә бу: фьраԛ у дәрдан, хԝарьн у метода һазьркьрьна хԝарьне. Бал мә ԝәкә 20 әʹрәбед бузханә һәбун, йед кӧ щара нәдьхәбьтин. Рʹожәк пешийа щьвата мәзьн, мә тʹәне ниве шәве дькарьбу стадион һазьр кьра, чьмки ԝедәре гәрәке листькәкә спорте дәрбаз буйа. У бона һазьркьрьна тәʹште, фьрʹнә гәрәке ида бәрбанге зу бьшьхӧлийана! Әм ԝәстийайи бун, ле әз жь хирәт у һʹәнәкед хушк-бьред рʹӧһʹанида гьһишти, һини гәләк тьшта бум. Әм һʹәта иро достед һәв ьн. Әв Щьвата Мәзьн ль Кԝебеке, щьвинәкә мәхсус бу! Чьмки ԝедәре жь салед 1940-1960, хушк-бьред мә рʹасти гәләк пәйкʹәтьна дьһатьн.

Әз сәр ве Щьвата Мәзьн йа кӧ Монреаледа дәрбаз бу, нав ԝан чәнд рʹожада жь бәрпьрсийаред дьн гәләк тьшт һин бум.  Щарәке, бьре мә Девид Сплейн, йе кӧ ньһа ча әндәмәки Кʹома Рʹебәрийе хьзмәт дькә, бәрпьрсийаре Щьвата Мәзьн бу. У чахе сәр Щьватәкә Мәзьнә дьн әԝ щабдари мьнрʹа һатә дайине, Девид бьра бь дьл у щан али мьн кьр.

Сала 2011-да, гава мә 36 сала хьзмәтийа рʹеԝитийеда кʹар кьр, әз һатьмә тʹәглифкьрьне кӧ бьбьмә дәрсдар, ԝәки Мәкʹтәба бона Рʹуспийед Щьвате дәрбаз кьм. Әз у Ранди нава дӧ салада нав 75 ньвинед щӧдәда рʹазан, ле хьзмәтийа мә һежайи һәр тьшти бу. Хьлазийа һәр һʹәфтийе, рʹуспи гәләк рʹази бун кӧ Кʹома Рʹебәрийе рʹӧһʹанида бона ԝан хәм дькьр.

Паше әз бумә дәрсдаре Мәкʹтәба бона Мьзгинванед Пʹадшатийе. Хԝәндәкʹар гәләк щара дьԝәстийан у дьлтәнг дьбун, чьмки рʹоже ԝәкә 7 сьһʹәта дәрс һәбун, паше һәр евар әԝана се сьһʹәта сәр дәрсед хԝә дьхәбьтин у һʹәфтийеда ԝәкә 4 йан 5 дәрсед ԝан һәбун. Мьн у дәрсдарәки дьн ԝанрʹа шьровәкьр, кӧ әԝана ԝе тʹәне бь аликʹарийа Йаһоԝа пешдачуйи бьн. Әз ԛә бир накьм, гава хԝәндәкʹара дьдит ԝәки бь аликʹарийа Йаһоԝа әԝана дькарьн тьштед ӧса бькьн, чь кӧ нә жи дьданә бәр чʹәʹве хԝә.

Дийа мьн дькʹәтә һʹәйра хԝәндәкʹаред хԝә. Бь ви щурʹәйи әԝе али ԝан дькьр, кӧ әԝана пешда һәрʹьн. Ӧса жи әԝе али баве мьн дькьр, ԝәки ньһерʹандьна хԝә дәрһәԛа рʹастийе бьгӧһезә. Се рʹож шунда паши кӧ дийа мьн мьр, гава баве мьн һатә Ода Щьвате сәр готара мьрьна дийа мьн, әм гәләк әʹщебмайи ман. Паше, әԝ 26 сал дьчу щьвина. Рʹаст ә баве мьн нәһатә ньхӧмандьне, ле рʹуспийа мьнрʹа готьн кӧ әԝ һәр һʹәфте пешийа һәр кәси дьһатә щьвате.

Дийа мьн мәсәләкә баш мәʹра һишт. Һәр се хушкед мьн у меред ԝан, бь амьни Йаһоԝарʹа хьзмәт дькьн. Дӧ хушкед мьн Бәйтʹәледа хьзмәт дькьн, йәк Португаледа йа дьн жи Һаитийеда.

Ньһа әз у Ранди ча пешәнгед мәхсус ль Һамилтоне (Онтарйо) хьзмәт дькьн. Гава мә кʹаре рʹеԝитийе дькьр, мә бь шабуне тʹәви кәсед дьн сәрледанед дӧбарә дькьр у дьчунә сәр һинбунед ԝанә Кʹьтеба Пироз. Ле ньһа, әм гәләк ша нә, ԝәки хԝәндәкʹаред мә рʹӧһʹанида пешда дьчьн. У әм тʹәви хушк-бьред щьвата хԝәйә тʹәзә бунә һәвал. Гава әм дьвиньн кӧ Йаһоԝа чаԝа рʹожед хԝәшда у рʹожед чәтьнда али ԝан дькә, әм һелане дьстиньн.

Чахе әм тиньн бира хԝә кӧ кәсед дьн чьԛас бона мә хәм дькьрьн, әм ве йәке гәләк дьшекьриньн. Ләма жи әм кәсед дьн һелан дькьн, ԝәки әԝана жи бь дьл у щан Йаһоԝарʹа хьзмәт кьн (2 Корьнтʹи 7:6, 7). Мәсәлә, малбәтәкеда, де, ԛиз у кӧрʹ ча пешәнгед һәртʹьм хьзмәт дькьрьн. Мьн жь малхе мале пьрси, һәла әԝ ԛә фькьри йә кӧ бьбә пешәнге һәртʹьм. Әԝи гот кӧ әԝ али се нәфәред хԝә дькә, ԝәки әԝана ча пешәнг хьзмәт кьн. Ләма жи мьн ле пьрси: «Ле тӧ дькари жь Йаһоԝа баштьр али ԝан бьки?» Мьн әԝ һелан кьр, ԝәки әԝ мина малбәта хԝә жь хьзмәтийа пешәнгтийе шабуне бьстинә. У паши шәш мәһа, әԝ бу пешәнг.

Әз у кʹӧлфәта мьн Ранди, әме тʹьме «ньсьле майинрʹа» дәрһәԛа кʹаред Йаһоԝа йед мәзьн гьли кьн. У әм баԝәр ьн кӧ әԝана жи ԝе мина мә жь хьзмәтийа Йаһоԝа шабуне бьстиньн (Зәбур 71:17, 18).