1. Гава тә дәстпекьр Кʹьтеба Пироз һин би, тӧ чь пеһʹәсийайи?

 ТЕ БИРА тә гава тә дәстпекьр Кʹьтеба Пироз һин би? Дьбәкә тӧ әʹщебмайи майи, чахе пеһʹәсийайи кӧ наве Хԝәде һәйә. Дьԛәԝьмә дьле тә һеса бу гава тә бьһист, ԝәки Хԝәде тʹӧ кәси щәʹньмеда начәрчьринә. У дьбәкә тӧ гәләк ша буйи, кӧ тӧйе мьрийед хԝә диса бьвини у тʹәви ԝан щьнәтеда сәр әʹрде бьжийи.

2. Паши һинбуна рʹастийед Кʹьтеба Пироз, тӧ чаԝа пешда чуйи? (Әфәси 5:1, 2)

² Чьԛас тә Хәбәра Хԝәде леколин дькьр, һаԛас һе зедә һʹьзкьрьна тә һьндава Йаһоԝа мәзьн дьбу. Әве һʹьзкьрьне тә һелан кьр, ԝәки ԝан тьшта, чь кӧ һин буйи, бини сери. Бь аликʹарийа принсипед Кʹьтеба Пироз, тә сафикьрьнед баш дькьр. Тә дьхԝәст ԝәки Хԝәде жь тә рʹази бә, ләма жи тә әʹмьре хԝә гӧһаст. Чаԝа кӧ зарʹ чʹәʹв дьдьнә баве хԝә, тә жи чʹәʹв дьда Баве хԝәйи әʹзмана (Бьхунә Әфәси 5:1, 2).

3. Әм кʹижан пьрса дькарьн бьдьнә хԝә?

³ Дьбәкә әм жь хԝә дьпьрсьн: «Гәло жь ԝи чахива, гава әз бумә Шәʹде Йаһоԝа, һʹьзкьрьна мьн һьндава Йаһоԝа дьһа ԛәԝи буйә? Гәло әз чʹәʹв дьдьмә Йаһоԝа кӧ һе зедә һʹьзкьрьне һьндава хушк-бьра бьдьмә кʹьфше?» Һәрге һʹьзкьрьна тәйә «бәре» сар буйә, хәмгин нәбә. Ԛьрʹна йәкеда, әв йәк һатә сәре шагьртед Иса Мәсиһ жи. Иса әԝ инкʹар нәкьрьн у әԝ мә жи инкʹар накә (Әʹйанти 2:4, 7). Әԝ занә кӧ әм дькарьн һʹьзкьрьна хԝәйә бәре диса ава кьн.

4. Әме ве готареда дәрһәԛа чь шеԝьр кьн?

 ⁴ Ве готареда әме бьвиньн, кӧ ча әм дькарьн бәрдәԝам кьн һʹьзкьрьна хԝә һьндава Йаһоԝа у кәсед дьнда, һе зедә кьн. Паше, әме дина хԝә бьдьне, кӧ Йаһоԝа ԝе һʹьзкьрьна мә ча кʹәрәм кә.

5-6. Паԝлос рʹасти чь чәтьнайа дьһат у чь али ԝи дькьр бәрдәԝам кә Йаһоԝарʹа хьзмәт кә?

⁵ Паԝлосе шанди бь дьл у щан Йаһоԝарʹа хьзмәт дькьр, ле әԝ рʹасти гәләк тәнгасийа жи дьһат. Әԝи гәләк щар рʹеԝитийед мәзьн дькьр, у рʹеԝитийед бәре нә һаԛас рʹьһʹәт бун. Сәр рʹийа хԝә, Паԝлосе шанди щара рʹасти щурʹә-щурʹә чәтьнайа дьһат. Щара жи әԝ жь алийе дьжмьнанда дьһатә кʹӧтане (2 Корьнтʹи 11:23-27). Ӧса жи хушк-бьра щара ԛимәт нәдькьрьн әв йәк, чь кӧ әԝи бона ԝан дькьр (2 Корьнтʹи 10:10; Филипи 4:15).

⁶ Чь али Паԝлос дькьр, кӧ әԝ бәрдәԝам кә Йаһоԝарʹа хьзмәт кә? Әԝи бь сайа Ньвисаред Пироз у дәрәщед әʹмьре хԝә, дьһа баш Йаһоԝа нас дькьр. Әԝи баԝәр дькьр, ԝәки Йаһоԝа Хԝәде ԝи һʹьз дькә (Рʹомайи 8:38, 39; Әфәси 2:4, 5). У һʹьзкьрьна ԝи һьндава Йаһоԝа дьле ԝида дьһа пешда дьһат. Паԝлос һʹьзкьрьна хԝә Йаһоԝарʹа бь ве йәке нишан дькьр, кӧ «щьмәʹта Хԝәдерʹа хьзмәткʹари» дькьр (Ибрани 6:10).

7. Чь дькарә һʹьзкьрьна Йаһоԝа дьле мәда дьһа мәзьн кә?

⁷ Гава әм Хәбәра Хԝәде кʹур леколин дькьн, һʹьзкьрьна Хԝәде дьле мәда дьһа мәзьн дьбә. Ԝәʹде хԝәндьна Кʹьтеба Пироз, бьфькьрә кӧ әԝ пʹар дәрһәԛа Йаһоԝа чь нишан дькә. Жь хԝә бьпьрсә: «Әв сәрһати чаԝа нишан дькә, кӧ Йаһоԝа мьн һʹьз дькә у чаԝа али мьн дькә, кӧ әз Йаһоԝа һʹьз бькьм?»

8. Дӧакьрьн чаԝа али мә дькә, кӧ әм һʹьзкьрьна хԝә һьндава Хԝәде дьһа мәзьн кьн?

⁸ Ӧса жи гава әм һәр рʹож Йаһоԝарʹа дӧа дькьн у дьле хԝә ԝирʹа вәдькьн, һʹьзкьрьна ԝи дьле мәда һе мәзьн дьбә (Зәбур 25:4, 5). У Йаһоԝа ԝе щаба дӧайед мә бьдә (1 Йуһʹәнна 3:21, 22). Хушкәкә бь наве Хана, жь Асйайе, дьбежә: «Сәрида һʹьзкьрьна мьн һьндава Йаһоԝа тʹәне сәр һʹиме занәбуне бу. Ле чахе мьн дит кӧ әԝ щаба дӧайед мьн дьдә, һʹьзкьрьна мьн һьндава ԝида дьһа мәзьн бу. Ләма жи мьн дьхԝәст бь готьн у кьред хԝә дьле Хԝәде ша кьм». b

9. Тимотʹейо чаԝа нишан дькьр, кӧ һʹьзкьрьна ԝи һьндава кәсед дьн мәзьн буйә?

⁹ Чахе Паԝлосе шанди бу шагьрте Иса Мәсиһ, чәнд сал шунда әԝи хортәки дәлал бь наве Тимотʹейо нас кьр. Тимотʹейо Йаһоԝа у мәрьва һʹьз дькьр. Паԝлос дәрһәԛа Тимотʹейо, Филипйарʹа ӧса гот: «Әз дьле хԝәрʹа йәки мина [Тимотʹейо] набиньм, кӧ бона һʹале ԝә мина пешәԝьтики хәм бьхԝә» (Филипи 2:20). Паԝлос нә кӧ жь бо фәрәсәте Тимотʹейо чаԝа готарванәки баш пʹайе ԝи да, ле чьмки Тимотʹейо хушк-бьра гәләки һʹьз дькьр. Бешьк, хушк-бьра жь сәрледанед Тимотʹейо гәләк ша дьбун (1 Корьнтʹи 4:17).

10. Хушка мә Анна у мере ԝе чаԝа нишан кьрьн, кӧ хушк-бьра һʹьз дькьн?

¹⁰ Әм хирәт дькьн кӧ хушк-бьрарʹа ԛәнщийе бькьн (Ибрани 13:16). Ԝәрә әм дина хԝә бьдьнә сәрһатийа Аннайе, жь готара пешийа ве. Паши тʹәшԛәләкә тʹәбийәте, әԝ у мере ԝе чун сәрики малбәтәке хьн у ԝана дит, кӧ банийе мала  ԝан һьлшийа йә. Ләма жи, әԝ малбәт бе кʹьнщед тʹәмьз мабу. Хушка мә Анна дьбежә: «Мә кʹьнщед ԝан бьр, шушт, утʹи кьр у диса да ԝан. Бона мә, әв йәк чәтьн нибу. Бь сайа ве йәке, әм бунә һәвалед незик у һʹәта рʹожа иро әм һәвалтийе дькьн». Анна у мере ԝе хушк-бьра һʹьз дькьрьн, ләма жи али ԝан кьрьн (1 Йуһʹәнна 3:17, 18).

11. (а) Һʹьзкьрьна мә чаԝа сәр кәсед дьн һʹӧкӧм дькә? (б) Ль гора Мәтʹәлок 19:17, Йаһоԝа дәрһәԛа һʹьзкьрьн у ԛәнщийа мә чь дьфькьрә?

¹¹ Гава әм ԛәнщийе бона кәсед дьн дькьн у һʹьзкьрьне ԝанрʹа дьдьнә кʹьфше, әԝана дькарьн бьвиньн ԝәки әм ве йәкеда чʹәʹв дьдьнә Йаһоԝа. Бешьк, әԝана ԛәнщийа мә гәләк ԛимәт дькьн. Хушка мә Хана ԝан мәрьвед кӧ али ԝе кьрьбун, ԛә бир накә. Әԝ дьбежә: «Әз гәләк рʹази мә жь һʹәму хушкед дәлал, йед кӧ мьн тʹәви хԝә дьбьрьнә хьзмәтийе. Ԝана әз дьбьрьм мала хԝә, мә тʹәвайи нан дьхԝар у мьн вәрʹейи мале дькьрьн. Иро, әз заньм кӧ бона ве йәке ԛәԝат у хирәт лазьм бу, ле ԝана әв йәк бь шабуне дькьр». Һәмьки, нә һәр кәс кʹерʹа әм ԛәнщийе дькьн, рʹазибуна хԝә дьдьнә кʹьфше. Хушка мә Хана ӧса дьбежә: «Хԝәзи мьн жи бькарьбуйа бона кәсед кӧ сәва мьн ԛәнщи кьрьбун, тьштәк бькьра, ле әз ньзаньм әԝана иро кʹидәре дьжин. Ле Йаһоԝа һаш жь һәр тьшти һәйә, у әз дӧа дькьм ԝәки әԝ ԝана кʹәрәм кә». Бәле Йаһоԝа һәр ԛәнщийа бьчʹук, йа кӧ әм бона кәсед дьн дькьн, дьвинә. Әԝ ԛәнщийа мә ча ԛӧрбанәкә ԛимәт һʹәсаб дькә у әԝе әʹсәйи мә хәлат кә (Бьхунә Мәтʹәлок 19:17).

12. Бьред мә ча дькарьн һʹьзкьрьна хԝә хушк-бьред щьватерʹа бьдьнә кʹьфше? (Бьньһерʹә ӧса жи шькьл.)

¹² Гәло бьред мә чаԝа дькарьн һʹьзкьрьна хԝә кәсед дьнрʹа бьдьнә кʹьфше  у али ԝан бькьн? Бьраки щаһьл бь наве Щордан жь рʹуспики пьрси, һәла әԝ чаԝа дькарә дьһа зедә али щьвате бькә. Рʹуспи бона пешдачуйина ԝи пʹайе ԝи да у паше чәнд ширәт данә ԝи. Мәсәлә, әԝи Щорданрʹа гот кӧ әԝ дькарә дьһа зу бе Ода щьвате у сьлаве бьдә кәсед дьн, сәр щьвата щаба хԝә бьдә у тʹәви хушк-бьред жь кʹома хԝә тʹьме дәркʹәвә хьзмәтийе. Ӧса жи, әԝ дькарә дина хԝә бьде кӧ әԝ чаԝа дькарә али кәсед дьн бькә. Щордан гӧһ да ван ширәта. Әԝ һьм һини тьштед тʹәзә дьбу, һьм жи һʹьзкьрьна һьндава хушк-бьра дьле ԝида дьһа мәзьн дьбу. Щордан һин бу, кӧ гава бьрак дьбә бәрдәстийе щьвате, әԝ нә кӧ тʹәзәда дәстпедькә али кәсед дьн бькә, ле ве йәке бәрдәԝам дькә (1 Тимотʹейо 3:8-10, 13).

13. Һʹьзкьрьне чаԝа али бьраки кьр, кӧ диса ча рʹуспи хьзмәт бькә?

¹³ Дьԛәԝьмә тә бәре ча бәрдәстийе щьвате йан ча рʹуспи хьзмәт дькьр. Йаһоԝа хирәт у һʹьзкьрьна тә ԛә бир накә (1 Корьнтʹи 15:58). Әԝ дьвинә ԝәки тӧ диса жи һʹьзкьрьне нишан дьки. Бьраки бь наве Кристиан бәре рʹуспи бу. Гава әԝи әв щабдарийа хԝә ӧнда кьр, дьле ԝи ешийа. Әԝ дьбежә: «Мьн сафи кьр кӧ чьԛас дәсте мьн те, бь дьл у щан Йаһоԝарʹа хьзмәт бькьм, фьрԛи тʹӧнә щабдарийа мьн һәйә йан на». Ԝәхт шунда әԝ диса ча рʹуспи һатә кʹьфшкьрьне. Кристиан дьбежә: «Серида мьн хԝә һежайи ве щабдарийе һʹәсаб нәдькьрьн. Ле мьн сафи кьр, кӧ һәрге Йаһоԝа дьхԝазә ԝәки әз диса ча рʹуспи хьзмәт кьм, һәмьки жь бо хатьре һʹьзкьрьна һьндава Йаһоԝа у хушк-бьра, әзе ве йәке ԛәбул кьм».

14. Әм жь гьлийед хушкәкә жь Гӧрщьстане чь һин дьбьн?

¹⁴ Әм нә тʹәне хушк-бьред хԝә, ле һʹәму мәрьва һʹьз дькьн (Мәтта 22:37-39).  Мәсәлә, хушка мә Елена, йа кӧ жь Гӧрщьстане йә, ӧса дьбежә: «Серида, тʹәне һʹьзкьрьна мьн һьндава Йаһоԝа әз һелан дькьрьм хьзмәт кьм. Ле чьԛас һʹьзкьрьна мьн һьндава Йаһоԝа мәзьн дьбу, һаԛас һʹьзкьрьна мьн һьндава мәрьва жи зедә дьбу. Мьн дьани бәр чʹәʹве хԝә кӧ әԝана рʹасти чь проблема тен у чь тʹема ԝе бона ԝан дьһа керһати бә. Чьԛас әз дькʹәтьм һʹәйра ԝан, һаԛас һе зедә мьн дьхԝәст али ԝан бькьм» (Рʹомайи 10:13-15).

15-16. Чаԝа сәр шькьл те кʹьфше, һʹьзкьрьна мә ча сәр кәсед дьн һʹӧкӧм дькә?

¹⁵ Гава әм һʹьзкьрьне хушк-бьрарʹа дьдьнә кʹьфше, нә тʹәне әԝана жь ве йәке кʹаре дьстиньн. Мәсәлә, чахе пандәмийа коронавирусе дәстпебу, бьраки бь наве Паоло у жьна ԝи, али гәләк хушкед әʹмьрда мәзьн дькьрьн кӧ һащәтед хԝәйә әләктроник хьзмәтийеда бьдьнә хәбате. Хушкәк кӧ серида жерʹа чәтьн бу һащәта хԝәйә әләктроник бьдә хәбате, хьлазийеда һьн бу әве бьдә хәбате. Ләма жи, әԝе дькарьбу мәрьвед хԝә тʹәглифи сәр Евара Биранине кә. Жь ԝана 60 мәрьв бь сайа видеоконференсийайе текли бун! Һьм хушка мә һьм жи мәрьвед ԝе, жь хирәта бьре мә Паоло у жьна ԝи кʹар стандьн. Паше, хушка мә Паолорʹа ньвиси: «Зәʹф рʹази мә кӧ ԝә әм һин кьрьн. Әз ԛә бир накьм кӧ Йаһоԝа Хԝәде чаԝа бь сайа хирәта ԝә бона мә хәм кьр».

 ¹⁶ Паоло жь ве йәке дәрсәкә гәләк фәрз станд. Әԝи фәʹм кьр ԝәки һʹьзкьрьн жь занәбуне у жь фәрәсәта фәрзтьр ә. Әԝ дьбежә: «Бәре мьн ча бәрпьрсийаре мьһале хьзмәт дькьр. Иро дьбәкә хушк-бьра готаред мьн ида бир кьрьнә, ле әԝана аликʹарийа кӧ мьн дайә ԝан, тʹӧ щар бир накьн».

17. Гава әм һʹьзкьрьне нишан дькьн, әв йәк диса кʹерʹа кʹаре тинә?

¹⁷ Гава әм һʹьзкьрьне кәсед дьнрʹа дьдьнә кʹьфше, әм хԝәха жи кʹаре дьстиньн. Ԝәрә әм дина хԝә бьдьнә сәрһатийа бьре мә Щонатан, йе кӧ ль Зәландайа Ну дьжи. Рʹожәкә Шәмийе паши нивро, һәԝа гәләки гәрм бу у әԝи дит кӧ бьраки пешәнг тʹәне хьзмәт дькә. Щонатан сафи кьр, ԝәки һәр рʹожа Шәмийе тʹәви ԝи дәркʹәвә хьзмәтийе. Ԝи чахи әԝ нәдьфькьри кӧ әв йәк ԝе кʹарәкә мәзьн ԝирʹа жи бинә. Щонатан дьбежә: «Һьнге, мьн жь хьзмәтийе шабун нәдьстанд. Ле гава мьн дит кӧ әԝи чьԛас баш шәʹдәти дьда у чаԝа мәрьв гӧһ дьданә ԝи, мьн гав бь гав жь хьзмәтийе шабун дьстанд. Ӧса жи, мьн һәваләки баш ԛазанщ кьр, у әԝи али мьн дькьр кӧ әз хьзмәтийе һʹьз кьм у дьһа незики Йаһоԝа бьм».

18. Йаһоԝа дьхԝазә кӧ әм чь бькьн?

¹⁸ Йаһоԝа дьхԝазә кӧ әм һʹьзкьрьна һьндава ԝи у кәсед дьн, дьле хԝәда дьһа зедә пешда биньн. Чаԝа әм пеһʹәсийан, һәрге әм Хәбәра Хԝәде бьхуньн, сәр ԝе кʹур бьфькьрьн у һәр рʹож Хԝәдерʹа дӧа бькьн, һʹьзкьрьна ортʹа мә у Хԝәде ԝе дьһа мәзьн бә. Гава әм али хушк-бьра дькьн, әм нишан дькьн кӧ әм жь дьл ԝана һʹьз дькьн. Чьԛас һʹьзкьрьна мә мәзьн бә, һаԛас әме дьһа незики Йаһоԝа у хушк-бьра бьн. У әме жь достийа тʹәви ԝан һʹәта-һʹәтайе шабуне бьстиньн!