МӘРЬВЕД дьлсах кӧ Кʹьтеба Пироз һин дьбьн, мина ԝан мәрьва ньн йед кӧ зерʹ дьгәрʹьн. Әԝ мәрьв гәрәке гьран бьхәбьтьн у бәрдәԝам кьн Кʹьтеба Пироз леколин бькьн, сәва кӧ биланийа ԛимәт ԛазанщ кьн. Ԝәрә әм шеԝьр кьн се дәрәща, кӧ чаԝа зерʹ те дитьн, у әм чь дькарьн һин бьн жь ве йәке.

Бьдә бәр чʹәʹве хԝә, кӧ тӧ бәр дәве голе дьгәрʹи у дьвини кӧ тьштәки бьчʹук дьбьрьԛә. Тӧ хԝә куз дьки, дьньһерʹи у тӧ гәләк ша дьби, чьмки тӧ зерʹ дьвини. Әԝ жь сәре пьтьке (спичке) бьчʹуктьр ә, у һе чәтьн дәстдькʹәвә, нә кӧ алмаса бьһа. Тӧ дәрдоре хԝә сәр әʹрде дьньһерʹи, кӧ бьвини һәла дьбәкә диса зерʹ һәйә.

Мина ве йәке, дьбәкә те бира тә чахе щара пешийе Шәʹдед Йаһоԝа дәре мала тә хьстьн у тәрʹа жь Кʹьтеба Пироз дәрһәԛа созед Хԝәде гьли кьрьн. Дьбәкә тӧ бь шабуне тини бира хԝә әԝе дәме, чахе тә щара пешийе зерʹе рʹӧһʹани дит. У дьбәкә әв йәк ԛәԝьми тʹәви тә, чахе тә щара пешьн Кʹьтеба Пирозда наве Хԝәде дит (Зәб. 83:18). Йан чахе тӧ пеһʹәсийайи, кӧ тӧ дькари бьби досте Йаһоԝа (Аԛуб 2:23). Ԝи чахи, тә дәрберʹа фәʹм кьр, ԝәки тә тьштәки ӧса дитийә, кʹижан кӧ жь зерʹ ԛимәттьр ә. У тә хԝәст һе зедә зерʹе рʹӧһʹани бьвини.

Кӧдӧр у һурькед зерʹ, щара чедьбьн у тʹоп дьбьн дәлавада у чʹәмада. Сезонәкеда, мәрьвед кӧ зерʹ дьгәрʹьн, дькарьн ԝәкә чәнд килограм һурькед зерʹ бьвиньн. Әԝ һурьк жь дәһа һʹәзара долара зедәтьр ә.

Чахе тә һинбуна Кʹьтеба Пироз дәстпекьр тʹәви Шәʹде Йаһоԝа, дьбәкә тә хԝә тʹәхмин дькьр мина мәрьве кӧ зерʹе бьһа дитийә. Чахе тӧ дьфькьрийи дәрһәԛа рʹезед жь Кʹьтеба Пироз, әԝе йәке занәбуна тә зедә дькьр, у рʹӧһʹанида тӧ дәԝләти буйи. У чахе тӧ дьфькьрийи сәр рʹастийед Кʹьтеба Пироз, тӧ пеһʹәсийайи кӧ ча тӧ дькари незики Хԝәде би, һʹьзкьрьна ԝида бьмини у әʹмьре һʹәта-һʹәтайе бьстини (Аԛуб 4:8; Щьһуд. 20, 21).

Чаԝа мәрьве кӧ һурькед зерʹә ԛимәт дьгәрʹә, дьбәкә тӧ жи гәләк гьран дьхәбьти сәва тьштед рʹӧһʹанийә ԛимәт бьгәрʹи. Паше, чахе тә рʹастийед сәрәкә жь Кʹьтеба Пироз пеһʹәсийайи,  тӧ һелан буйи кӧ пешда һʹәрʹи у хԝә тʹәсмили Хԝәде бьки у бейи ньхӧмандьне (Мәт. 28:19, 20).

Чахе жь волкане лав дәрдькʹәвә, әԝ сар дьбә у дьбә мина кәвьр. Ԝан кәвьрада щара зерʹ һәйә, чьмки әԝ лав жь бьне әʹрде дәрдькʹәвә. Ле һәрге сәр ԝи кәвьри рʹува бьньһерʹьн, зерʹ дәрберʹа найе кʹьфше. Ле чьрʹа? Чьмки мәсәлә, кәвьре кӧ гьранийа ԝи тонәк ә, дькарә тʹәне ԝәкә 10 гр. зерʹ теда һәбә. Ләма мәрьв гьран дьхәбьтьн сәва ԝан кәвьра бьшкеньн у зерʹ дәрхьн. У сәва ԝан әԝ йәк баргьрани нинә, чьмки әԝана заньн кӧ әԝ зерʹ чьԛас ԛимәт ә.

Ӧса жи чахе мәрьв занәбуна пешьн дәрһәԛа Иса стандийә, ԛәԝат лазьм ә ԝәки әԝ бәрдәԝам кә диса рʹӧһʹанида пешда һәрʹә (Ибрн. 6:1, 2). Һун гәрәке бь дьл у щан бьхәбьтьн сәва жь һинбуна Кʹьтеба Пироз фькьред ԛимәт у дәрсед керһати бьстиньн. Ле һун чь дькарьн бькьн сәва һинбуна ԝәйә шәхси тʹьме керһати бә, һәла һе жи һәрге һун ида бь сала Кʹьтеба Пироз һин дьбьн?

Бь дьл у щан бьхԝазьн һин бьн. Ԝәʹде хԝәндьне дина хԝә бьдьнә детала. Бәрдәԝам кьн гьран бьхәбьтьн у һуне жь Кʹьтеба Пироз зерʹед ԛимәт бьвиньн, демәк биланийа жь Хԝәде у рʹебәрийа ԝи (Рʹом. 11:33). Сәва занәбуна хԝә дәрһәԛа Кʹьтеба Пироз зедә кьн, ԝәʹде леколинкьрьне бьдьнә хәбате һащәтед кӧ сәр зьмане ԝә дәстдькʹәвьн. Рʹебәрийа Хԝәде у щабед сәр пьрсед хԝә дәрһәԛа Кʹьтеба Пироз, бь сәбьр бьгәрʹьн. Жь хушк-бьра бьпьрсьн кӧ кʹижан рʹез у готар гәләк али ԝан кьрьн у әԝана ԛәԝи кьрьн. Чахе һун ԝәʹде хԝәндьна у леколинкьрьна Хәбәра Хԝәде тьштед һʹәԝас педьһʹәсьн, мәрьвед дьнрʹа жи гьли кьн.

Бәле, нета тә гәрәке әԝ нибә кӧ тʹәне занәбуна хԝә зедә ки. Паԝлосе шанди ширәт кьр, кӧ занәбун дькарә мәрьва бабах кә (1 Корн. 8:1). Ләма әм гәрәке сәр хԝә бьхәбьтьн кӧ тʹьме мьлук бьн у баԝәрийа хԝә ԛәԝи хԝәй кьн. Ԛӧльхкьрьна тʹәви малбәте у һинбуна Кʹьтеба Пирозә шәхси, ԝе али тә бькә кӧ ль гора принсипед Йаһоԝа бьжийи у ԝе тә һелан кә кӧ али мәрьвед дьн бьки. Хенщи ве йәке, тӧйе шабуне бьстини, чьмки тә ԛазанщ кьрийә тьштәки ӧса, кʹижан кӧ жь зерʹ ԛимәттьр ә (Мәтʹлк. 3:13, 14).