ЧАХЕ әз 12 сали бум, һьнге мьн фәʹм кьр кӧ әз дькарьм тьштәки гәләк ԛимәт мәрьварʹа гьли кьм. Сәр щьвата мәзьн, бьраки жь мьн пьрси һәла әз дьхԝазьм тʹәви ԝи һәрʹьм хьзмәтийе. Рʹаст ә мьн тʹӧ щара мьзгини бәла нәкьрьбу, ле йәкә әз ԛайил бум. Әм чунә мьһаләке у әԝ бьра һьнә бәлавок да мьн дәрһәԛа Пʹадшатийа Хԝәде. Бьра готә мьн: «Тӧ ви алийе кʹуче мьзгинийе бәла кә, ле әз алийе дьн». Әз бәрхԝә дькʹәтьм кӧ ԝе ча бә, ле йәкә мьн дәстпекьр мал бь мал мьзгинийе бәла кьм. Әз әʹщебмайи мам кӧ мьн ча зу һʹәму бәлавок бәла кьр. Бәле, гәләк мәрьв гӧһ дьданә мьн у әʹдәбйәт ԛәбул дькьрьн.

Әз һатьмә буйине сала 1923, шәһәре Чатемеда (Инглистан). Ԝан салада паши Шәрʹе Һʹәмдьнйайе йе йәке, мәрьв һивийе бун кӧ дьнйа ԝе хԝәш бә. Ле чахе һʹал хԝәш нәбу, щьмәʹт у ӧса жи де-баве мьн дьлтәнг бун. Әԝана ӧса жи дьлтәнг дьбун жь бо кʹәшише Баптист, кʹижан кӧ тʹәне сәва ве йәке хәм дькьр, ԝәки дереда щийе бьльнд бьгьрә. Чахе әз ԝәкә нәһ сали бум, дийа мьн дәстпекьр һәрʹә ода Леколинкʹаред Кʹьтеба Пироз, демәк Шәʹдед Йаһоԝа. Ль ԝедәре ԝана щьватед хԝә дәрбаз дькьр. Хушкәке тʹәви мә зарʹа ль ԝедәре дәрс дәрбаз дькьр сәр һʹиме Кʹьтеба Пироз у кʹьтеба «Лире Хԝәде». Әԝ һинбун гәләк мьн хԝәш дьһат.

Гәләк мьн хԝәш дьһат мәрьварʹа гьли кьм дәрһәԛа созед жь Хәбәра Хԝәде. Рʹаст ә гәләк щар әз тʹәне дьчум кӧ мал бь мал хьзмәт кьм, ле әз һин бум кӧ тʹәви хушк-бьра жи дәрем. Щарәке әз тʹәви бьраки әʹмьрда мәзьн дәркʹәтьм хьзмәтийе. Әм пе бисиклете чунә хьзмәтийе. Әм бәр кʹәшишәкирʹа дәрбаз бун у мьн гот: «Ва бьньһерʹә бьзьн те». Бьра сәкьни у мьнрʹа гот кӧ әз тʹәви ԝи рʹунем сәр кочʹе даре. У әԝи мьнрʹа гот: «Әԝ кʹе изьн дайә тә кӧ диԝана мәрьва бьки? Ԝәрә әм бь шабун мьзгинийе бәла кьн, ле диԝанкьрьне, Йаһоԝа ԝе бькә». Нава ԝан салада әз гәләк тьшт һин бум, кӧ ча шабуне бьстиньм дайинеда, демәк хьзмәтийеда (Мәт. 25:31-33; Кʹар. Шанд. 20:35).

Бьраки дьн йе кӧ әʹмьрда мәзьн бу, әз һин кьрьм кӧ сәва шабуне бьстиньм хьзмәтийеда, сәбьр лазьм ә. Жьна ԝи бьрайи Шәʹдед Йаһоԝа һʹьз нәдькьр. Щарәке әԝи әз тʹәглифи мала хԝә кьрьм, ԝәки әм һеса бьн. Жьна ԝи ӧса һерскʹәти бу жь бо хьзмәтийа мере хԝә, кӧ пакетед чайе дьавитә мә. Бьра дәԝса кӧ ле һьлата, әԝи бь бәшәра хԝәш чай һьлда у дани щийе хԝә. Паше һьнә сал, сәбьра ԝи һатә кʹәрәмкьрьне, жьна ԝи һатә ньхӧмандьн у бу Шәʹде Йаһоԝа.

 Мьн гәләк дьхԝәст мәрьварʹа гьли кьм дәрһәԛа ахьрийа баш, кʹижан кӧ Хԝәде соз дьдә. Әз у дийа мьн сала 1940 мәһа Адаре һатьнә ньхӧмандьне шәһәре Дувреда. Сала 1939, мәһа Илоне, чахе әз 16 сали бум, Британйа Алманйайерʹа шәрʹ әʹлам кьр. Сала 1940 мәһа Һʹәзиране, әз бәр шемика мала хԝә сәкьни бум, мьн дит ча мәкʹинед мәзьн, бь әскәред бьриндар тʹьжә, дәрбаз дьбун. Әԝ әскәр шәрʹе кӧ Данкеркеда бу, сах мабун. Мьн чахе ԝан дьньһерʹи, мьн тʹәхмин дькьр кӧ һивийа ԝан сәр тʹӧ тьшти нинә. Ләма мьн гәләк дьхԝәст ԝанрʹа гьли кьм дәрһәԛа һатьна Пʹадшатийа Хԝәде. Һьнәк дәрәнг ԝе саледа, Алманйайе дәстпекьр Британйа, да бәр бомба. Һәр шәв әскәред Алмани сәр мәрʹа дьфьрʹийан. Мә бьһист ча ԝана бомб давитьн у әм гәләк дьтьрсийан. Чахе шәбәԛе әм дәрдькʹәтьн дәрва, мә дьдит кӧ ча һʹәму щийа мал һьлшийанә. Әԝ һʹәму тьшт һе зедә әз дьдамә баԝәркьрьне кӧ тʹәне Пʹадшатийа Хԝәде дькарә ахьрийа баш мьнрʹа бинә.

Сала 1941 мьн дәстпекьр хьзмәт кьм ча пешәнг. Хьзмәткьрьна пешәнги әз гәләк бәхтәԝар кьрьм. Әз шәһәре Чатемда, кʹарханеда дьхәбьтим. Ԝедәре әз һин бум гәмийа чекьм. Гәләк мәрьва дьхԝәстьн ԝе кʹарханеда бьхәбьтьн, чьмки һәԛ зәʹф бу. Хьзмәткʹаред Йаһоԝа заньбун, кӧ Мәсиһи гәрәке мьԛабьли һәв шәрʹ нәкьн. Сала 1941, мә фәʹм кьр кӧ әм гәрәке тʹәви тʹӧ тьшти нәбьн чь кӧ гьредайи йә тʹәви чʹәка у шәрʹа (Йуһʹн. 18:36). Ԝе кʹарханеда кʹидәреда әз дьхәбьтим, ԛәйька бьнави чедькьрьн. Ләма мьн әԝ хәбат һишт у дәстпекьр хьзмәт кьм ча хьзмәткʹаре һәртʹьм. Щара пешийе әз һатьм кʹьфшкьрьне кӧ хьзмәт кьм ль шәһәре бәдәԝ Сайренсестере.

Чахе 18 салед мьн тʹәмам бун, әз кʹәтьмә кәле чьмки нәчумә әскәрийе. Мьнрʹа гәләк зор бу чахе щара пешийе дәре кәле сәр мьн дадан у әз тʹәне мам. Паше нобәдара у гьртийа жь мьн пьрсин кӧ чьрʹа әз кʹәтьмә кәле. Әз ша бум, чьмки мәщал вәбу, ԝәки әз дәрһәԛа баԝәрийа хԝә бежьмә ԝан.

Паши азабуне, жь мьн һиви кьрьн кӧ тʹәви бьре Леонард Смит, * шарьстана Кентда ль Инглистане щурʹә-щурʹә бажарада мьзгинийе бәла кьн. Ԝи чахи, тәйаред реактив Натсиста (Нази), бь бобма тʹьжә дькʹәтьнә шарьстана Кент, демәк пʹарәкә Инглистане, кʹидәре кӧ мә хьзмәт дькьр. Жь сала 1944 дәстпекьри, һʹәзари зедәтьр тәйаред Натсиста, йе кӧ бь бомба тʹьжә бун, дьһатьнә авитьне сәр шарьстана Кент. Чахе дәнге ԝан тәйара дьһатә бьрʹине, мә ида заньбу кӧ ԝа ида ԝе бькʹәвьн у бьтʹәԛьн. Һәр кәс гәләк дьтьрсийа. Ԝи чахи мә тʹәви малбәтәке  һинбуна Кʹьтеба Пироз дәрбаз дькьр. Щарна ԝәʹде һинбуне, мә тʹәви пенщ нәфәред мала ԝан, бьне сьфьра һʹәсьн рʹуньштьбун, сәва хԝә жь бомба хԝәй кьн. Ахьрийе әԝ малбәт тʹәмам һатьн ньхӧмандьне у бунә Шәʹдед Йаһоԝа.

Паши шәрʹ мьн Ирләндеда дӧ сала хьзмәт кьр ча пешәнге һәртʹьм. Ԝедәре әм дьчунә мал бь мал у щи дьгәрʹийан кʹидәре кӧ дькарьн бьминьн. Мә мәрьварʹа дьгот кӧ әм мисйонер ьн у журналед мә кʹучада бәла дькьн. Әԝ йәк рʹасти жи нәаԛьлайи бу, чьмки ԝи ԝәлатида мәрьв Католик ьн. Мәрьвед жь Ирләнде гәләк щӧдә дьбун жь йед Инглистане. Чахе мерькәки мә да тьрсандьне кӧ ԝе мә бькʹӧтә, мьн шькийате ԝи полисрʹа кьр. Ле полис готә мьн: «Ле тӧ һивийа чь буйи?» Әм әʹщебмайи ман чахе мә дит кӧ һʹӧкӧмәтийа кʹәшиша чьԛас зәʹф һәйә сәр мәрьва. Һәгәр мәрьв әʹдәбйәтед мә һьлдьдан, кʹәшиша ԝана жь хәбате дәрдьхьстьн. У паши ԝе йәке, кʹәшиша бәри мә дьдан у дәрдьхьстьн, жь ԝи щийи кʹидәре кӧ әм дьжит.

Ахьрийеда мә сафи кьр, кӧ пе бисиклете жь мал дур хьзмәт кьн, кʹидәре кӧ кʹәшиш мә нас накьн. Ле хьлазийе мә незики мале хьзмәт дькьр. Шарьстана Килкенида гәләк мәрьв мьԛабьли мә дәрдькʹәтьн, ле йәкә мә һʹәфте се щара һинбуна Кʹьтеба Пироз тʹәви мерькәки щаһьл дәрбаз дькьр. Мьн шабунәкә гәләк мәзьн дьстанд, чахе һинбуна Кʹьтеба Пироз тʹәви мәрьва дәрбаз дькьр. Ләма жи мьн сафи кьр кӧ бланка Мәкʹтәба Гиләд тʹьжи кьм у һазьр бьм сәва хьзмәтийа мисйонери.

Паши пенщ мәһед һинбуна Нийу Йоркеда, жь мә чар бьра һатьнә кʹьфшкьрьне кӧ хьзмәт кьн сәр гьравед бьчʹук йа Бәʹра Карибе. Сала 1948, мәһа Мьждаре, әм жь Нийу Йорке чун у дәрбази гәмийа 18 метьре бун, наве кʹижане «Сибиа» бу. Әз тʹӧ щар нәкʹәтьбумә гәмийе, ләма жи әз дьтьрсийам. Нав мәда Гаст Маке гәмиване щерʹьбанди бу. Әԝи чәнд тьштед фәрз сәва ажотьна гәмийе әм һин кьрьн. Гаст 30 рʹожи рʹебәрийа ажотьна гәмийе дькьр, һʹәта әм гьһиштьнә Баһамайе. Һьнге әм рʹасти фьртона жи дьһатьн.

Паши ԝе йәке кӧ мә чәнд мәһа хьзмәт кьр сәр гьравед Баһама, әм дәрбази гьравед дьн бун. Әԝ гьрав ортʹа Гьравед Верщин у Тринидадеда бун, кʹижан кӧ ԝәкә 800 километьр дури һәв бун. Мә 5 сала хьзмәт дькьр ԝан гьравада, кʹидәре кӧ Шәʹдед Йаһоԝа тʹӧнә бун. Щара бь һʹәфтийа мә нькарьбу нәʹмә бьшанда йан жи бьстанда. Ле әм гәләк ша дьбун кӧ мә Хәбәра Йаһоԝа ль сәр гьрава бәла дькьр (Йерәм. 31:10).

Чахе мә гәми бәр дәве бәʹре да сәкьнандьне, щьмәʹт һатьн тʹоп бун, дьхԝәстьн бьзаньбьн һәла әм кʹе нә. Һьнәк жь ԝана, нә гәми, нә жи мәрьвед бь чʹәрме сьпи дитьбун. Мәрьве кӧ сәр ԝе гьраве дьжитьн, һәвалһʹьз у баԝәрмәнд бун, йед кӧ Кʹьтеба Пироз рʹьнд заньбун. Гәләк щар ԝана мәʹсийед тʹәзә, авокадо у фьстәԛ дьданә мә. Рʹаст ә гәмийа мә бьчʹук бу, ле мә дькарьбу сәр гәмийе хԝарьн чекьра, рʹазана, у кʹьнщ жи бьшушта.

Мә тʹәмамийа рʹоже бәр дәве бәʹре мьзгини бәла дькьр. Мә гьшкарʹа дьгот кӧ ԝе тема сәр һʹиме Кʹьтеба Пироз бе готьне. Бәре еваре мә зәнгьле гәмийе дьхьст, мәрьва дәнг дьбьһистьн у дьһатьн тʹоп дьбун. Чахе мә дьдит кӧ ча мәрьв тʹоп дьбьн мә шабунәкә мәзьн дьстанд. Чʹьрайед дәсте ԝанда мина стәйрка шәԝԛ дьдан у чʹийева бәржер дьбун дьһатьн. Щара бь сәда мәрьв дьһатьн, әԝана дьман һʹәта дәрәнг у пьрс дьданә мә. Ԝана  тʹәви мә кʹьламед Пʹадшатийе дьстьран, ләма мә кʹьлам сәр кʹахаза нәшьр дькьр у дьда ԝан. Чахе мә һәр чар бьра кʹьлама дьстьра, щьмәʹте дәстпедькьрьн тʹәви мә бьстьрен. Дәнге ԝана гәләк хԝәш дәрдькʹәт. Әԝ ԝәʹдәки гәләк хԝәш бу!

Чахе мә һинбуна Кʹьтеба Пироз хьлаз дькьр, әԝ шагьрт тʹәви мә дьһатьнә маләкә дьн, кʹидәре кӧ мә тʹәви малбәтәкә дьн һинбуна Кʹьтеба Пироз дәрбаз дькьр. Чәнд һʹәфти дәрбаз бун у әм ида гәрәке бьчуна щики дьн. Гәлә щар мә һиви жь ԝан дькьр, йед кӧ һин бьбун, сәва йед майин һин кьн, һʹәта әм вәдьгәрʹьн. Гәләк һʹәԝас бу чахе мә дьдит кӧ һьнәк жь ԝан әԝ шьхӧл ӧса дькьрьн, ча бежи борще ԝан ә.

Ньһа гәләк жь ԝан гьрава буйә щийе туриста, ле пешийе әԝ щи хәвлә бун. Ча һәргав, әм пе гәмийе шәв жь гьравәки дәрбази гьрава дьн дьбун. Әм чахе дьчун, делфин рʹәх гәмийа мә дькʹәтьн, у мә тʹәне дәнге аве жь гәмийа хԝә дьбьһист. Шәԝьԛа һиве дькʹәтә сәр бәʹре у рʹәнге зив дьда бәʹре.

Паши ԝе йәке ча мә пенщ сала сәр гьрава хьзмәт дькьр, әм чунә Порто Рико ԝәки гәмийа хԝә бьгӧһезьн кӧ йәкә бь мотор һьлдьн. Әм чахе чунә ԝедәре, мьн хушкәкә бәдәԝ дит наве ԝе Максен Бойд бу. Әԝ мисйонерәкә хирәт бу, кʹижан кӧ һе бьчʹуктайеда мьзгини бәла дькьр. Дьле мьн кʹәтә ԝе. Һьнәки дәрәнг әԝ ча мисйонер чу Кʹомара Доминике хьзмәт кьр һʹәта сала 1950 сәрԝертийа Католик бәри ԝе дан, жь ԝедәре дәрхьстьн. Ча гәмиван, тʹәне мәһәке изьна мьн һәбу кӧ Порто Рикода бьмама. Паше әз гәрәке диса сәр чәнд сала бьчума сәр гьравед дьн. Ләма жи мьн хԝәрʹа гот: «Роналд, һәрге тӧ дьхԝази әԝе кәчʹьке бьстини, тӧ гәрәке ләзкʹәви тьштәки бьки». Паши се һʹәфтийа мьн жерʹа гот, кӧ дьхԝазьм ле бьстиньм, у шәш һʹәфти шунда мә һәв станд. Әз у Максен ча мисйонер һатьнә кʹьфшкьрьне ль Порто Рикойе, ләма әз ида пе гәмийе щики дьнда нә дьчум.

Сала 1956 әз һатьмә кʹьфшкьрьне ча бәрпьрсийаре мьһале у мә әԝ хьзмәтийа хԝә дәстпекьр. Гәләк хушк-бьра бәләнгазийеда бун, ле мә хԝәш дьһат тʹәсәлийа ԝан бькьн. Мәсәлә, гӧнде Потала Пастилода дӧ малбәт Шәʹдед Йаһоԝа бун у ԝан малбәтада гәләк зарʹ һәбун. Бона зарʹа, мьн тʹьме бьлуре дьхьст. Мьн жь ԝан кәчʹькәкә бьчʹук, кӧ наве ԝе Һилда бу, пьрси кӧ әԝ дьхԝазә тʹәви мә бе хьзмәт кә. Әԝе гот: «Әз дьхԝазьм, ле әз нькарьм. Соле мьн тʹӧнәнә». Мә жерʹа сол кʹьрʹи у әԝ тʹәви мә дәркʹәтә хьзмәткьрьне. Сал дәрбаз бун, у сала 1972, әз у Максен әм чунә Бәйтʹәла Бруклине. Хушкәк, кʹижан кӧ тʹәзә мәкʹтәба Гиләд хьлаз кьрьбу һатьбу кʹьфшкьрьне кӧ һәрʹә Әкԝадоре хьзмәт кә. Әԝ ида һазьр бу кӧ һәрʹә, һьнге незики мә бу у мәрʹа гот: «Ԝә әз наснәкьрьм, әре? Әз әԝ кәчʹька бьчʹук бум, жь гӧнде Пастило, кʹижан кӧ бе сол бу». Әԝ хушк Һилда бу! Әм жь шабуне гьрийан.

Сала 1960-да, мәрʹа готьн ԝәки әм һәрʹьн шәһәре Сан Хуане хьзмәт кьн филиала Порто Рикода, кʹижан маләкә бьчʹукда бу. Щара пешийе мьн тʹәви бьре Ленарт Щонсон гәләк хәбат ани сери. Ленарт Щонсон у жьна ԝи дь Кʹомара Доминикеда Шәʹдед Йаһоԝайи пешьн бун, у сала 1957 әԝана дәрбази Порто Рикойе бун. Һьнә ԝәʹдә шунда, Максене журнал ԝан мәрьварʹа шанд, йед кӧ пʹәрә ԛӧрбан кьрьбун. Әԝ шьхӧле кӧ әԝе дькьр, шабун жерʹа дьани, чьмки бь ԝе йәке мәрьв дәрһәԛа Йаһоԝа педьһʹәсийан.

Хьзмәткьрьна Бәйтʹәледа шабун мьнрʹа дьани, чьмки әԝ бона мьн мәщал бу, кӧ һе зедә сәва Йаһоԝа бькьм. Ле щара һеса нибу. Мәсәлә, сала 1967 ԝәʹде щьвата мәзьнә һʹәмдьнйайе, йа кӧ щара пешийе дәрбаз бу Порто Рикода, әз гәләк дьлтәнг бум чьмки мьн гәрәке һʹәму тьшт организә бькьра. Нейтан Нор кʹижан кӧ ԝи чахи рʹебәрийа Шәʹдед Йаһоԝа дькьр, һатә Порто Рико. Бьре Нейтан Нор тʹьре мьн организә нәкьрийә кӧ мисйонеред жь ԝәлата һатьбун, пе әʹрәба биньн. Ле бь рʹастийе мьн һʹәму тьшт организә кьрьбу. Паше әԝи сәрт ширәт да мьн кӧ ча гәрәке әз йәки организә бьм. У әԝи гот кӧ әԝ мьнда баԝәр бу, ле мьн әԝ шьхӧл нәкьр. Мьн нә хԝәст тʹәви ԝи бькʹәвьмә дәʹԝе, ле мьн ӧса хԝә тʹәхмин кьр, кӧ бь нәһәԛи әз һатьмә сущдаркьрьне. Әз дьлтәнг бум, ле дьлтәнгийа мьн дьреж нәкʹьшанд. Щарәкә майин әз у Максен рʹасти бьре Нор һатьн. Әԝи әм тʹәглифи отʹаха хԝә кьрьн, у бона мә хԝарьн һазьр кьр.

Әм чәнд щара чунә Инглистане, мә тʹәсәлийа де-баве мьн кьр. Чахе мьн тʹәви дийа хԝә рʹастийа Хԝәде ԛәбул кьр, баве мьн һьнге ԛәбул нәкьр.  Чахе бьрайед жь Бәйтʹәле дьһатьн мьһала мә, дийа мьн гәләк щар әԝана тʹәглифи мале дькьрьн. Баве мьн дьдит кӧ әԝ бьра чьԛас мьлук ьн. Әԝана гәләк щӧдә дьбун жь кʹәшиша, кʹижан кӧ бәр чʹәʹве баве мьн рʹәш бун. Ахьрийе сала 1962 баве мьн һатә ньхӧмандьне у бу Шәʹде Йаһоԝа.

Жьна мьнә дәлал сала 2011 мьр. Әз һивийа ԝе рʹоже мә, чахе әԝ жь мьрьне рʹабә. Әԝ йәк гәләк мьн ша дькә. Мә 58 сала тʹәвайи жит. Ԝи ԝәʹдәйида мьн у Максене дит кӧ ча Порто Рикода щьмәʹта Йаһоԝа зедә дьбун, һәжмара ԝан жь ԝәкә 650 гьһиштә 26 000. Паше, сала 2013 филиала Порто Рико тʹәви филиала Дәԝләтед Йәкбуйи бу. У мьнрʹа готьн кӧ әз ԝедәре хьзмәт кьм, демәк шәһәре Ԝолкил Нийу Йоркеда. Паши ԝе йәке кӧ мьн 60 сала хьзмәт кьр сәр гьраве, мьн хԝә тʹәхмин дькьр ча бьнәлийе Порто Рикойе, те бежи ԝедәре бьбум у мәзьн бьбум. Әз бәхтәԝар бум кӧ мьн ԝедәре хьзмәт дькьр, ле гәрәке мьн бәрдәԝам кьра пешда бьчума.

Әз һʹәта ньһа шабуне дьстиньм хьзмәткьрьна Бәйтʹәледа. Әз ньһа 90 сали зедәтьр ьм, у борщдарийа мьн әв ә, чаԝа шьване рʹӧһʹани, әндәме Бәйтʹәле ԛәԝи дькьм. Һьнгеда ча әз һатьмә Ԝолкиле, мьн тʹәсәлийа 600 зедәтьр хушк у бьра кьрийә. Һьнәк жь ԝан дьһатьнә бал мьн, кӧ әм шеԝьр кьн дәрһәԛа проблемед ԝанә шәхси, йан жи йед малбәте. Һьнәка жи ширәт дьхԝәстьн, сәва һе рʹьнд Бәйтʹәледа хьзмәт кьн. Һьнәк жи тʹәзә кʹәтьнә зәԝаще у дьхԝәстьн ширәта һьлдьн. Һьнәк жи һатьбунә кʹьфшкьрьне ча пешәнге һәртʹьм. Әз гӧһ дьдьмә гьшка кʹе те тʹәви мьн хәбәрдьдә. У чахе лазьм ә, әз дьбежьмә ԝан: «Хԝәде ԝан һʹьз дькә, ‹йе кӧ бь дьл у әшԛ дьдә›. Ләма жи һун чь дькьн, бь шабуне бькьн. Чьмки һун сәва Йаһоԝа дькьн» (2 Корн. 9:7).

Тӧ һәрге дьхԝази бәхтәԝар би хьзмәтийа Бәйтʹәледа йан жи хьзмәтийа щурʹәки дьнда, тӧ гәрәке тʹьме бира хԝәда хԝәй ки, ԝәки чьԛас фәрз ә әԝ шьхӧле кӧ тӧ дьки. Һʹәму шьхӧлед кӧ әм Бәйтʹәледа дькьн, пироз ьн. Әԝ йәк аликʹарийе дьдә «хӧламе амьн у сәрԝахт», кӧ әԝана хәм кьн дәрһәԛа хԝарьна рʹӧһʹани бона бьратийа һʹәмдьнйайе (Мәт. 24:45). Һʹәму дәра, әм кʹӧ жи хьзмәт кьн, әм тʹьме дькарьн Йаһоԝа һӧрмәт кьн. Ԝәрә әм бь шабуне бькьн әԝе йәке, чь кӧ Хԝәде мәрʹа дьбежә, чьмки Хԝәде ԝан һʹьз дькә, «йе бь дьл у әшԛ дьдә».