Дьжмьнед Иса гәлә щар тʹәви ԝи дькʹәтьнә дәʹԝе у дьхԝәстьн ԝи у шагьртед ԝи сәр гьлийа бьгьрьн. Дәрһәԛа әʹдәте паԛьжбуне Ԛануна Мусада гәләк тʹәми һәбун. Мәсәлә, паԛьжбун жь гәмаржечуйине, кʹотибуне, у дәстлекʹәтьна щьнийаза у щәндәке һʹәйԝана. Ԛанунеда ӧса жи рʹебәри дьһатә дайине, кӧ мәрьв ча дькарьбу паԛьжбуйа. Мәсәлә, бь ԛӧрбане, бь шуштьне, йан бь рʹәшандьне нәпаԛьжбун тʹәмьз дьбу (Ԛан. Кʹаһ., сәре 11-15; Жьмар 1:1, сәре 19).

Сәрԝеред рʹелигийа Щьһуйа, ԝан ԛанунада жь бәр хԝә әʹдәт зедәкьрьнә. Кʹьтебәкә дәрһәԛа дирока мьләте Щьһу, гьли дькә кӧ һәр мәʹнийа нәпаԛьжбуне гәрәке бьһата леколинкьрьне. Мәсәлә, кʹьтебеда дьһатә готьне кӧ сәрԝеред рʹелигийа Щьһуйа леколин дькьрьн кӧ «ча у кʹижан дәрәщада мәрьв дькарьбу нәпаԛьжбуйа, ча у чь щурʹәйи әԝ нәпаԛьжбун дькарьбу дәрбази сәр мәрьвед дьн буйа. Ӧса жи кʹижан фьраԛ у һащәт дькарьбун тʹәмьзбуна у нәтʹәмьзбуна, у бь кʹижан һащәта у рʹетуала паԛьжбун гәрәке бьһата кьрьне».

Дьжмьнед Иса жь ԝи пьрсин: «Чьма шагьртед тә пәй рʹаԝ-рʹьзьмед кал у бава начьн у бь дәстнәшушти нан дьхԝьн?» (Марԛ. 7:5). Әԝ Ферьси нәдьготьн дәрһәԛа һигиенайе, демәк дәстшуштьн пешийа нанхԝарьне. Ле ԝана дьгот дәрһәԛа рʹетуала, кӧ чаԝа гәрәке дәсте хԝә бьшон. Ԝана жь мәрьва дәʹԝа дькьрьн, кӧ пешийа нанхԝарьне ав гәрәке сәр дәсте ԝанда бе рʹетьне. Ԝе кʹьтебеда, йа дәрһәԛа дирока мьләте Щьһу, ӧса жи те готьне: «Ԝи чахи ӧса жи дәʹԝ пешда дьһатьн, кӧ кʹижан фьраԛ гәрәке бе хәбьтандьне сәва паԛьжкьрьне, ава ча гәрәке бе хәбьтандьне, кʹе гәрәке аве бәри сәр дәсте ԝан дә у ав гәрәке сәр дәст һʹәта кʹӧ бьһата рʹетьне».

Ньһерʹандьна Иса жь йа ԝан мәрьва щӧдә дьбу, чьмки ԝана хԝәха әԝ әʹдәт бәр хԝә дәрдьхстьн. Ләма Иса сәрԝеред рʹелигийа Щьһуйарʹа гот: «Ишайа бона ԝә дӧрʹуйа рʹаст пʹехәмбәрти кьрийә! Чаԝа кӧ һатийә ньвисаре: ‹Әва щьмәʹта бь заре хԝә ԛәдьре мьн дьгьрә, ле дьле ԝан жь мьн дур ә. Бадиһәԝа мьн дьһʹәбиньн, тʹәмийед мәрьва чаԝа ԛанунед мьн щьмәʹте һин дькьн›. Һун тʹәмийед Хԝәде дьһельн у пәй рʹаԝ-рʹьзьмед мәрьвайийе дькʹәвьн» (Марԛ. 7:6-8).