1. Ль гора Ибрани 12:1, сәва кӧ әм рʹәва жийинеда бьгьһижьнә хьлазийе, әм гәрәке чь бькьн?

 КʹЬТЕБА Пироз жийина хьзмәткʹаред Хԝәде бәрамбәри рʹәве дькә. Рʹәвокед кӧ дьгьһижьнә хьлазийе, ԝе бь әʹмьре һʹәта-һʹәтайе бенә хәлаткьрьне (2 Тимотʹейо 4:7, 8). Әм гәрәке чь жь дәсте мә те бькьн, ԝәки бәрдәԝам кьн бьрʹәвьн, чьмки хьлази гәләк незик ә. Паԝлосе шанди, йе кӧ рʹәва жийинеда сәр кʹәт, готьбу кӧ чь ԝе али мә бькә, ԝәки әм жи ве йәкеда сәркʹәвьн. Әԝи ӧса готьбу: «Һʹәму гьранийе . . .  жь хԝә дур хьн у бь тәйах ләщмәйдана пешийа хԝәда бьрʹәвьн» (Бьхунә Ибрани 12:1).

2. Чь те һʹәсабе кӧ әм гәрәке «һʹәму гьранийе . . .  жь хԝә дур хьн»?

² Паԝлосе шанди гот, кӧ әм гәрәке «һʹәму гьранийе . . .  жь хԝә дур хьн». Гәло әԝи дьхԝәст бьгота кӧ гәрәке хьзмәткʹаред Хԝәде тʹӧ барәки һьлнәдьн сәр хԝә? На! Нета гьлийед ԝи әԝ бу, кӧ әм гәрәке һʹәму гьранийед нәлазьм жь сәр хԝә бавежьн. Баред ӧса дькарьн мәрʹа бьбьнә кәвьре лькʹӧмандьне у мә гәләки бьԝәстиньн. Сәва кӧ әм сәбьр кьн, әм гәрәке зу тедәрхьн кӧ кʹижан баред нәлазьм сәр пьшта мә нә у ԝана жь сәр хԝә бавежьн. Ле диса жи әм нахԝазьн баред кӧ гәрәке әм һьлдьн, жь сәр хԝә бавежьн. Һәрге әм баред лазьм һьлнәдьн, әме нькарьбьн рʹәве бәрдәԝам кьн (2 Тимотʹейо 2:5). Гәло әм гәрәке кʹижан бара һьлдьн?

3. (а) Ль гора Галати 6:5, әм гәрәке кʹижан бара һьлдьн сәр хԝә? (б) Ве готареда, әме дәрһәԛа чь шеԝьр кьм у чьрʹа?

 ³ Бьхунә Галати 6:5. Паԝлосе шанди ньвиси, кӧ «һәр кәсе хӧрща хԝә һьлгьрә». Бь ве йәке, Паԝлосе шанди бәʹса щабдарийед мәйә бәр Хԝәде дькьр. Тʹӧ кәс нькарә дәԝса мә ви бари һьлдә. Ве готареда, әме бьвиньн кӧ кʹижан баред мә һәнә у әм чаԝа дькарьн ԝана һьлдьн. Ӧса жи, әме пебьһʹәсьн кӧ кʹижан баред нәлазьм сәр пьшта мә нә у әм чаԝа дькарьн ԝана жь сәр хԝә бавежьн. Һәрге әм баред хԝә һьлдьн сәр хԝә у баред нәлазьм жь сәр хԝә бавежьн, әме рʹәва жийинеда сәркʹәвьн.

4. Сонда тʹәсмилбуне чьрʹа барәки гьран нинә? (Бьньһерʹә ӧса жи шькьл.)

⁴ Сонда тʹәсмилбуне. Гава мә жийина хԝә тʹәсмили Йаһоԝа кьр, мә соз да ԝи кӧ әме жерʹа хьзмәт кьн у хԝәстьна ԝи биньн сери. Әм гәрәке хԝәйе созе хԝә бьн. Жийина ль гора сонда тʹәсмилбуне щабдарикә гәләк фәрз ә, ле барәки гьран  нинә, чьмки Йаһоԝа әм әʹфьрандьнә ԝәки әм ль гора хԝәстьна ԝи бьжин (Әʹйанти 4:11). Әԝи әм сурәте хԝәда әʹфьрандьнә у хԝәстьн кьрийә дьле мә, ԝәки әм жерʹа хьзмәт кьн. Ләма жи, әм дькарьн незики ԝи бьн у жь пеканина хԝәстьна ԝи шабуне бьстиньн (Зәбур 40:8). Ӧса жи, гава әм ль гора хԝәстьна Хԝәде дьжин у чʹәʹв дьдьнә Иса, әм «рʹьһʹәтийе» дьстиньн (Мәтта 11:28-30).

5. Чь дькарә али тә бькә, ԝәки тӧ сонда тʹәсмилбуне бини сери? (1 Йуһʹәнна 5:3)

⁵ Тӧ ча дькари ви бари һьлди? Йа пешьн, һʹәзкьрьна хԝә һьндава Йаһоԝада дьһа ԛәԝи кә. Ль сәр һʹәму тьштед кӧ Йаһоԝа бона тә кьрьнә, у сәр ԛәнщи у кʹәрәмед кӧ әԝе сәр тәда бьбаринә, кʹур бьфькьрә. Гава һʹәзкьрьна һьндава Хԝәде дьле тәда дьһа мәзьн бә, ԝе тәрʹа дьһа һеса бә хԝәстьна ԝи бини сери (Бьхунә 1 Йуһʹәнна 5:3). Йа дӧда, чʹәʹв бьдә Иса. Әԝи хԝәстьна Хԝәде ани сери, чьмки бона аликʹарийе Йаһоԝарʹа дӧа дькьр у дина хԝә дьда кʹәрәмед кӧ һивийа ԝи бун (Ибрани 5:7; 12:2). Мина Иса, дӧада ԛәԝате жь Йаһоԝа бьхԝазә у жийина һʹәта-һʹәтайе бьдә бәр чʹәʹве хԝә. Гава һʹәзкьрьна тә һьндава Хԝәде дьһа мәзьн бә у тӧ чʹәʹв бьди Иса, тӧйе сонда тʹәсмилбуне бини сери.

6. Чьрʹа әм гәрәке щабдарийед малбәте биньн сери? (Бьньһерʹә ӧса жи шькьл.)

⁶ Щабдарийед малбәте. Рʹәва жийинеда, әм гәрәке Йаһоԝа у Иса жь мәрьвед хԝә зедәтьр һʹәз бькьн (Мәтта 10:37). Ле әв йәк найе һʹәсабе кӧ әм гәрәке щабдарийед малбәте нәйньн сери. Сәва кӧ Хԝәде у Иса жь мә рʹази бьн, әм борщдар ьн щабдарийед малбәте биньн сери (1 Тимотʹейо 5:4, 8). Һәрге әм ӧса бькьн, әме шабуне бьстиньн. Йаһоԝа дьхԝазә кӧ жьн-мер һәвдӧ һʹәз бькьн у ԛәдьре һәв бьгьрьн. Әԝ дьхԝазә ԝәки де-бав зарʹед хԝә һʹәз бькьн у ԝана һин кьн. Ӧса жи әԝ дьхԝазә, кӧ зарʹ гӧрʹа де-баве хԝә бькьн. Бь ви щурʹәйи малбәтеда ԝе әʹдьлайи һәбә (Әфәси 5:33; 6:1, 4).

7. Тӧ ча дькари щабдарийед хԝә малбәтеда бини сери?

⁷ Тӧ чаԝа дькари ви бари һьлди? Малбәт гәрәке хԝә бьсперьн биланийа Кʹьтеба Пироз. Изьне нәдә ԝәки ньһерʹандьна ван мәрьва, занәбуна кʹижана кӧ һәйә, әʹдәт у һәстед ԝә, сәр сафикьрьнед ԝә һʹӧкӧм кьн (Мәтʹәлок 24:3, 4). Әʹдәбйәтед мәда, ширәтед баш һәнә. Ԝана рʹьнд лекʹолин бькә. Әԝана ԝе али тә бькьн, ԝәки тӧ принсипед Кʹьтеба Пироз әʹмьре хԝәда бьди хәбате. Мәсәлә, рʹеза готарада «Аликʹари Бона Малбәте», ширәтед баш бона жьн-мера, де-бава у зарʹа һәнә. b Һәрге нәфәред тә ве йәке нәкьн жи, тӧ хирәт бькә ԝәки готьнед Кʹьтеба Пироз бь дьл у щан бини сери. Гава тӧ ӧса бьки, малбәта тә ԝе жь ве йәке кʹаре бьстинә у кʹәрәмед Йаһоԝа ԝе ль сәр ԝәда бьбарьн (1 Пәтрус 3:1, 2).

8. Сафикьрьнед мә ча дькарьн сәр мә һʹӧкӧм кьн?

⁸ Әм бона сафикьрьнед хԝә щабдар ьн. Йаһоԝа азайа бьжартьне дайә мә у дьхԝазә ԝәки әм жь сафикьрьнед баш шабуне бьстиньн. Ле әԝ мә жь ахьрийа сафикьрьнед нәбаш хԝәй накә  (Галати 6:7, 8). Ләма жи әм хԝәха бона гьли, сафикьрьн у кьред хԝәйә нәбаш, щабдар ьн. Кьред мә дькарьн исафа мә бьчәрчьриньн. Ле занәбуна ве йәке, кӧ әм бона сафикьрьнед хԝә щабдар ьн, али мә дькә ԝәки әм гӧнед хԝә биньн рʹуйе хԝә, шашийед хԝә рʹаст кьн у диса ван шашийа нәкьн. Һәрге әм ӧса бькьн, әме рʹәва жийинеда сәркʹәвьн.

9. Һәрге тә сафикьрьнәкә нәбаш кьрийә, тӧ дькари чь бьки? (Бьньһерʹә ӧса жи шькьл.)

⁹ Тӧ ча дькари ви бари һьлди? Һәрге тә сафикьрьнәкә нәбаш кьрийә, тӧ чь дькари бьки? Тьште чу нәдә ду. Ԝәʹдә у ԛәԝата хԝә сәр ве йәке хәрщ нәкә, ԝәки хԝә һәԛ дәрхи йан жи кәсед дьн сущдар ки. Дәԝса ве йәке, шашийед хԝә ԛәбул кә у ль гора дәрәща хԝә, сафикьрьнед баш бькә. Һәрге тӧ хԝә нәһәԛ дьки, бь мьлукти Йаһоԝарʹа дӧа бькә, шашийа хԝә ԝирʹа бежә у жь ԝи рʹәща бькә, кӧ әԝ бьбахшинә тә (Зәбур 25:11; 51:3, 4). Жь кәсед кӧ тә дьле ԝан ешандийә, бахшандьне бьхԝазә. Һәрге лазьм бә, жь рʹуспийа аликʹарийе бьхԝазә (Аԛуб 5:14, 15). Жь шашийед хԝә һин бә, ԝәки диса ван шашийа нәки. Һәрге тӧ ӧса бьки, тӧ дькари баԝәр би ԝәки Йаһоԝа ԝе һьндава тәда дьлрʹәʹм бә у али тә бькә (Зәбур 103:8-13).

10. Чаԝа тьштед пʹучʹ дькарьн бона мә бьбьнә баргьрани? (Галати 6:4)

¹⁰ Пәй тьштед пʹучʹ нәкʹәвьн. Һәрге әм хԝә бәрамбәри кәсед дьн бькьн, баре мә ԝе дьһа гьран бә (Бьхунә Галати 6:4). Әв йәк дькарә һʹьш у дьле мәда чʹәʹвнәбари у һерсе пешда бинә (Галати 5:26). Һәрге әм чʹәʹв дьдьнә мәрьва у дьхԝазьн ԝан тьшта бькьн чь кӧ әԝана дькьн, ле әв йәк жь ԛәԝата мә дәр ә, ви чахи әм дькарьн зийане бьстиньн. Кʹьтеба Пироз дьбежә: «Гӧмана кӧ дәрәнги дьбә, дьл дешинә». Дә бьдьнә һʹәсабе хԝә, ԝәки сафикьрьнед нәбаш дькарьн гәләк дьле мә бешиньн (Мәтʹәлок 13:12). Тьштед ӧса дькарьн мә бьԝәстиньн у бьбьн мәʹни, кӧ әм рʹәва жийинеда һеди-һеди сьст бьн (Мәтʹәлок 24:10).

11. Чь дькарә али тә бькә ԝәки тӧ тьштед жь ԛәԝата хԝә дәр, жь хԝә дәʹԝа нәки?

¹¹ Тӧ чаԝа дькари ви бари жь хԝә дур хи? Йаһоԝа тьштәки жь ԛәԝата мә дәр жь мә дәʹԝа нәкә. Гәрәке әм жи ԝан тьшта нәхԝазьн, чь кӧ жь ԛәԝата мә дәр ә (2 Корьнтʹи 8:12). Йаһоԝа тʹӧ щар мә бәрамбәри кәсед дьн накә (Мәтта 25:20-23). Хьзмәтийа тә, амьнийа тә у сәбьра тә, бәр чʹәʹве ԝи гәләк ԛимәт ә. Бь мьлукти ԛәбул кә ԝәки әʹмьр, сьһʹәт-ԛәԝат у дәрәща тә, дькарьн мәщалед тә синор кьн. Мина Барзиллай, гава сьһʹәт-ԛәԝата мә хьраб бә, әм гәрәке ԛәбул кьн, кӧ һьнә тьшт әме ида нькарьбьн бькьн (2 Самуйел 19:35, 36). Мина Муса, аликʹарийе ԛәбул кә у һәрге дьбә, һьнә щабдарийа бьдә кәсед дьн (Дәркʹәтьн 18:21, 22). Мәрьве мьлук тьштед жь ԛәԝата хԝә дәр жь хԝә дәʹԝа накә, чьмки әв йәк дькарә бьбә мәʹни, кӧ әԝ рʹәва жийинеда һʹал бькʹәвә.

12. Гәло әм бона сафикьрьнед нәбаш йед кәсед дьн щабдар ьн? Шьровәкә.

¹² Чахе бона сафикьрьнед нәбаш йед мәрьвед дьн, хԝә щабдар тʹәхмин дькьн. Әм нькарьн дәԝса кәсед дьн сафикьрьна бькьн у ԝана жь ахьрийа кьред ԝанә хьраб бьпʹарезьн. Мәсәлә, дьбәкә кӧрʹ йан ԛиза тә сафи кә ида Йаһоԝарʹа хьзмәт нәкә. Әв сафикьрьн  дькарә дьле де-бава гәләки бешинә. Ле де-бавед кӧ хԝә жь бо сафикьрьнед нәбаш йед зарʹед хԝә сущдар дькьн, барәки гьран датиньн сәр пьшта хԝә. Йаһоԝа нахԝазә ԝәки әԝана барәки ӧса һьлдьн сәр хԝә (Рʹомайи 14:12).

13. Де-бав гәрәке дәрһәԛа сафикьрьнед нәбаш йед зарʹед хԝә чаԝа бьфькьрьн?

¹³ Тӧ ча дькари ви бари жь хԝә дур хи? Бир нәкә кӧ Йаһоԝа азайа бьжартьне дайә мә һʹәмуйа, ԝәки әм хԝәха сафикьрьна бькьн. Мәсәлә, һәр кәс гәрәке сафи кә һәла әԝ дьхԝазә Йаһоԝарʹа хьзмәт кә йан на. Йаһоԝа занә кӧ де-бав беԛьсур ниньн, ле Әԝ дьхԝазә ԝәки һун чь жь дәсте ԝә те бькьн. Сафикьрьнед кӧ зарʹед ԝе дькьн, щабдарийа ԝанә шәхси йә, нә кӧ йа ԝә (Мәтʹәлок 20:11). Ле диса жи дьбәкә де-бав жь бо шашийед кӧ ԝана бәре кьрьбун, хԝә нәһәԛ кьн. Һәрге ӧса нә, дьле хԝә Йаһоԝарʹа вәкә у бахшандьне жь ԝи бьхԝазә. Әԝ занә ԝәки һун нькарьн тьште чуйи пашда вәгәрʹиньн. У зарʹ чь бьчинә, ԝе әве йәке жи бьчьнә. Демәк, Йаһоԝа жь ԝә нахԝазә кӧ һун зарʹед хԝә жь ахьрийа нәбаш бьпʹарезьн. Һәрге зарʹа ԝә бьхԝазә вәгәрʹә бал Йаһоԝа, Әԝе жь дьл ԝи ԛәбул кә (Луԛа 15:18-20).

14. Чьрʹа әм гәрәке бь зедәйи хԝә сущдар нәкьн?

¹⁴ Хԝәсущдаркьрьна зедә. Чахе әм гӧнә дькьн у бона ве йәке хԝә сущдар дькьн, әԝ тьштәки нормал ә. Ле Йаһоԝа ԛә нахԝазә ԝәки әм хԝә гәләк сущдар кьн. Әм гәрәке ви бари жь сәр мьле хԝә бавежьн. Һәрге әм гӧне хԝә бьдьнә рʹуйе хԝә, тʹобә кьн у гавед лазьм бавежьн ԝәки диса ԝи гӧнәйи нәкьн, әм дькарьн баԝәр бьн, кӧ Йаһоԝа ԝе бьбахшинә мә (Кʹаред Шандийа 3:19). Паши ве йәке, Йаһоԝа нахԝазә кӧ әм бәрдәԝам кьн хԝә бона ви гӧнәйи сущдар кьн. Әԝ занә кӧ һәрге әм бәрдәԝам кьн хԝә бона ве йәке сущдар кьн, әв йәк дькарә зьрарәкә мәзьн бьдә мә  (Зәбур 31:10). Һәрге әм гәләк хәмгин бьн, дьбәкә әм сьст бьн у рʹәва жийине бәрдәԝам нәкьн (2 Корьнтʹи 2:7).

15. Һәрге тӧ бь зедәйи хԝә сущдар дьки, чь дькарә али тә бькә? (1 Йуһʹәнна 3:19, 20) (Бьньһерʹә ӧса жи шькьл.)

¹⁵ Тӧ ча дькари ви бари жь хԝә дур хи? Һәрге әм бь зедәйи хԝә сущдар дькьн, һьнге әм гәрәке дина хԝә бьдьнә ве йәке, кӧ Хԝәде бь рʹасти дьбахшинә мә (Зәбур 130:4). Гава Хԝәде дьбахшинә кәсе кӧ жь дьл тʹобә кьрийә, әԝ соз дьдә ԝи: «Еди әз йе сущед ԝан нә дь бира хԝәда биньм!» (Йерәмйа 31:34). Әв йәк те һʹәсабе, кӧ Йаһоԝа ԝе гӧнед тәйә бәре нәдә рʹуйе тә. Ләма жи нәфькьрә кӧ ахьрийа хьраб йа гӧне тә избат дькә, кӧ Йаһоԝа нәбахшандийә тә. У һәрге шашийед тәйә бәре хьзмәтийа тәйә ньһа синор дькьн, дьлтәнг нәбә. Йаһоԝа ида дәрһәԛа гӧнед тә нафькьрә у гәрәке тӧ жи сәр ԝан нәфькьри (Бьхунә 1 Йуһʹәнна 3:19, 20).

16. Мина рʹәвока әм гәрәке чь тедәрхьн?

¹⁶ Рʹәва жийинеда әм гәрәке ӧса бьрʹәвьн, ԝәки «хәлате бьстиньн» (1 Корьнтʹи 9:24, ИМ). Һәрге әм баред зедә у йед нәлазьм тедәрхьн, әме хԝә баргьран нәкьн у бькарьбьн сәркʹәвьн. Ве готареда, мә бь сайа һьнә мәсәла дит, ԝәки әм гәрәке чь бари һьлдьн у чь бари жь сәр хԝә бавежьн. Ле һьнә мәсәлед дьн жи һәнә. Иса гот: «Мьԛати хԝә бьн, нәбә кӧ дьле ԝә хԝарьн, вәхԝарьне у хәмед ве дьнйайева гьредайи бә» (Луԛа 21:34). Гәләк рʹезед Кʹьтеба Пироз дькарьн али тә бькьн, ԝәки тӧ гӧһастьнед лазьм бьки, кӧ бькарьби рʹәва жийинеда сәркʹәви.

17. Әм чьрʹа дькарьн баԝәр бьн, кӧ әме рʹәва жийинеда сәркʹәвьн?

¹⁷ Әм баԝәр ьн кӧ әме рʹәва жийинеда сәркʹәвьн, чьмки Йаһоԝа ԝе ԛәԝате бьдә мә (Ишайа 40:29-31). Ләма жи бьрʹәвә у мина Паԝлосе шанди чь жь дәсте тә те бькә, ԝәки тӧ хәлате бьстини! (Филипи 3:13, 14) Тʹӧ кәс нькарә дәԝса тә бьрʹәвә, ле бь аликʹарийа Йаһоԝа тӧ дькари бьгьһижи нете хԝә. Йаһоԝа дькарә али тә бькә, ԝәки тӧ баре фәрз һьлди у йед нәлазьм жь хԝә дур хи (Зәбур 68:19). Бь ԛәԝата Йаһоԝа, тӧ дькари рʹәва жийинеда сәркʹәви! Нәтьрсә, Йаһоԝа тʹәви тә йә!