1. Әм чьрʹа кәсед бь сәбьр ԛимәт дькьн?

 ӘМ ГЬШК ԛәдьре ԝан мәрьва дьгьрьн, йед кӧ сәбьре дьдьнә кʹьфше. Гәло чьрʹа? Чьмки әԝана бь сәбьр һивийа тьштәки дьсәкьньн. Гава әм шашийа дькьн у мәрьвед дьн һьндава мәда сәбьре дьдьнә кʹьфше, әм ве йәке дьшекьриньн. Чахе мәрʹа чәтьн бу рʹастийа Кʹьтеба Пироз фәʹм кьн, ԛәбул кьн йан биньн сери, әм гәләк рʹази бун кӧ дәрсдаре мә һьндава мәда сәбьр дьда кʹьфше. Ле һʹәчʹи зәʹф әм жь Йаһоԝа Хԝәде рʹази нә, ԝәки әԝ һьндава мәда бь сәбьр ә! (Рʹомайи 2:4)

2. Кʹижан дәрәщада дьбәкә һеса нинә сәбьр кьн?

² Рʹаст ә, әм ԛимәт дькьн гава мәрьвед дьн һьндава мәда бь сәбьр ьн, ле щарна һеса нинә кӧ әм хԝәха сәбьре бьдьнә кʹьфше. Мәсәлә, гава әм дькʹәвьнә трафике, демәк кʹидәре гәләк авто нә, илаһи чахе дәрәнги дькʹәвьн, дьбәкә әм сәбьра хԝә ӧнда дькьн. Гава кәсед дьн мә әʹщьз дькьн, дьбәкә әм гәләк һерс дькʹәвьн. Щара жи һеса нинә ԝәки әм бь сәбьр һивийа дьнйа тʹәзә бьсәкьньн. Гәло тӧ дьхԝази сәбьра хԝә зедә бьки? Ве готареда әме шеԝьр кьн, кӧ әм чаԝа дькарьн сәбьре бьдьнә кʹьфше у әв йәк чьрʹа фәрз ә. Ӧса жи әме пебьһʹәсьн кӧ чь дькарә али мә бькә, ԝәки әм һе зедә сәбьр кьн.

3. Гава һерса мәрьве бь сәбьр тиньн, әԝ ча хԝә дьдә кʹьфше?

³ Ԝәрә әм чар гава шеԝьр кьн, бь сайа кʹижана әм дькарьн сәбьре бьдьнә кʹьфше? Йа пешьн, мәрьве бь сәбьр зу һерс накʹәвә. Дәрәщед чәтьнда, гава кәсәк һерса ԝи рʹадькә, әԝ рʹьһʹәт дьминә у һʹәйфе  һьлнадә. Кʹьтеба Пирозда, готьна «сәбьр-ськʹане», щара әʹԝльн дәрһәԛа Йаһоԝа те готьне. Әԝ дьбежә: «Хӧдан, Хӧдан ьм! Хԝәдейе рʹәʹм у кʹәрәме, сәбьр-ськʹане, бь һʹӧб у амьнийеда хьнейо» (Дәркʹәтьн 34:6).

4. Гава мәрьве бь сәбьр һивийа тьштәки йә, әԝ чь дькә?

⁴ Йа дӧда, мәрьве бь сәбьр бь дьлрʹьһʹәти дькарә һивийа тьштәки бьсәкьнә. Гава тьштәк дәрәнги дькʹәвә, мәрьве бь сәбьр диса жи һәр тьшти дькә, ԝәки бинтәнг у әʹщьз нәбә (Мәтта 18:26, 27). Гәләк дәрәщада, әм гәрәке бь дьләки рʹьһʹәт һивийа тьштәки бьн. Мәсәлә, гава кәсәк хәбәр дьдә, әм гәрәке бь сәбьр гӧһ бьдьнә ԝи у хәбәрдана ԝи нәбьрʹьн (Ибо 36:2). Ӧса жи, чахе әм али кәсәки дькьн, ԝәки әԝ рʹастийа Кʹьтеба Пироз дьһа баш фәʹм бькә, йан жи хәйсәтәки хьраб бьтʹәрькинә, мәрʹа сәбьр лазьм ә.

5. Диса чь щурʹәйи әм дькарьн сәбьра хԝә бьдьнә кʹьфше?

⁵ Йа сьсийа, мәрьве бь сәбьр ләз накʹәвә. Һәмьки, һьнә дәрәщада әм гәрәке зу тьштәки бькьн. Ле гава кәсәки бь сәбьр шьхӧләки фәрз дькә, әԝ ве йәке ләз-бәз накә ԝәки йаха хԝә ле хьлаз кә. Дәԝсе, әԝ ԝәʹдә бона ԝи шьхӧли кʹьфш дькә, ԝәки паше ча лазьм ә әви шьхӧли бькә.

6. Мәрьве бь сәбьр гава рʹасти чәтьнайа те, чь дькә?

⁶ Йа чара, мәрьве бь сәбьр дәрәщед чәтьнда жи бе газьна сәбьр дькә. Һәмьки тьштәк нә рʹаст ве йәкеда тʹӧнә йә, кӧ дьле хԝә һәваләки хԝәйә незикрʹа вәкьн у бежьн, кӧ әм рʹасти чь чәтьнайе һатьнә. Ле мәрьве бь сәбьр дина хԝә дьдә сәр тьштед позитив, у чь жь дәсте ԝи те дькә, ԝәки тʹьме бь шабуне Йаһоԝарʹа хьзмәт кә (Колоси 1:11). Чаԝа хьзмәткʹаред Хԝәде, әм гәрәке ван һʹәму  дәрәщада сәбьре бьдьнә кʹьфше. Гәло чьрʹа? Әме ньһа дина хԝә бьдьнә чәнд мәʹнийа.

7. Ль гора Аԛуб 5:7, 8, сәбьркьрьн чьрʹа һаԛас фәрз ә? (Бьньһерʹә ӧса жи шькьл.)

⁷ Бе сәбьркьрьне әм нькарьн әʹмьре һʹәта-һʹәтайе бьстиньн. Мина хьзмәткʹаред Хԝәдейе бәре, әм жи гәрәке бь сәбьр һивийе бьн, һʹәта кӧ Хԝәде созед хԝә бинә сери (Ибрани 6:11, 12). Кʹьтеба Пироз һʹале мә бәрамбәри һʹале щоткʹарәки дькә (Бьхунә Аԛуб 5:7, 8). Щоткʹар бона чандьн у авдайина тʹохьм, гәләки дьхәбьтә, ле әԝ ньзанә кӧ тʹохьм ԝе кʹәнге шин бә. Әԝ бь сәбьр һивийа бәре әʹрде хԝә дьсәкьнә. Мина ве йәке, рʹаст ә әм «ньзаньн Хӧдане [мә] кʹижан рʹоже бе», диса жи әм шьхӧлед рʹӧһʹанида кʹар дькьн (Мәтта 24:42). Әм бь сәбьр һивийа ве рʹоже нә у баԝәр ьн, кӧ Йаһоԝа ԝе һʹәму созед хԝә ԝәʹдәда бинә сери. Һәрге сәбьра мә нәминә, дьбәкә әм бьԝәстьн у һеди-һеди жь рʹастийе дур кʹәвьн. Ӧса жи дьбәкә әм пәй ԝан тьшта кʹәвьн, кʹижан кӧ тʹәне ԝәʹдәлу дькарьн дьле мә ша кьн. Ле һәрге әм сәбьр кьн, әме һʹәта хьлазийе тәйах кьн у бенә хьлазкьрьне (Миха 7:7; Мәтта 24:13).

8. Сәбьркьрьн чаԝа али мә дькә ԝәки әм һьндава мәрьвада ԛәнщ бьн? (Колоси 3:12, 13)

⁸ Сәбьркьрьн али мә дькә, кӧ әм һьндава мәрьвада ԛәнщ бьн у чахе кәсәк тʹәви мә хәбәр дьдә, рʹьнд гӧһ бьдьнә хәбәрдана ԝан (Аԛуб 1:19). Сәбьркьрьн ӧса жи әʹдьлайе пешда тинә. Һәрге сәбьра мә тʹӧнә бә, әме зу һерс кʹәвьн. Ле һәрге сәбьра мә һәбә, гава кәсәк дьле мә бешинә, әме зу нәхәйидьн. Дәԝса кӧ әм һʹәйфе һьлдьн, әме «ль һәв сәбьр кьн у ль һәв бьбахшиньн» (Бьхунә Колоси 3:12, 13).

9. Сәбьркьрьн чаԝа али мә дькә, ԝәки әм сафикьрьнед баш бькьн? (Мәтʹәлок 21:5)

⁹ Ӧса жи сәбьркьрьн дькарә али мә кә, ԝәки әм сафикьрьнед дьһа баш бькьн. Дәԝса кӧ әм бь емосийа, ләзә-ләз тьштәки бькьн, әме кʹур лекʹолина бькьн у паше сафикьрьна лапә баш бькьн (Бьхунә Мәтʹәлок 21:5). Мәсәлә, гава әм хԝәрʹа хәбатәке дьгәрʹьн, дьбәкә әм һәма кʹижан хәбате бьдьнә мә, перʹа-перʹа ԛәбул кьн. Жь бо ве йәке, дьбәкә әм щара щьвата жи бәрʹдьн. Ле һәрге әм бь сәбьр бьн, әме рʹьнд бьфькьрьн кӧ хәбата тʹәзә кʹидәре йә, у әме чәнд сьһʹәта бьхәбьтьн. Жь хԝә бьпьрсә: «Хәбата мьн ԝе сәр малбәта мьн у достийа мьн тʹәви Йаһоԝа чаԝа һʹӧкӧм кә?» Сәбьркьрьн дькарә мә жь сафикьрьнед нәбаш бьпʹарезә.

10. Әм чаԝа дькарьн сәбьра хԝә зедә кьн у ӧнда нәкьн?

¹⁰ Дӧа бькә ԝәки Хԝәде сәбьра тә зедә кә. Сәбьр һʹӧнӧре бәре рʹӧһʹе пироз ә (Галати 5:22, 23). Ләма жи әм дькарьн бона рʹӧһʹе пироз дӧа кьн у жь Йаһоԝа бьхԝазьн кӧ али мә бькә, ԝәки әм сәбьра хԝә зедә кьн. Һәрге сәбьра мә бе щерʹьбандьне, әме дӧада рʹӧһʹе пироз жь Хԝәде «бьхԝазьн», ԝәки бькарьбьн сәбьр кьн (Луԛа 11:9, 13). Ӧса жи әм дькарьн жь Йаһоԝа рʹәща кьн, ԝәки әԝ али мә бькә кӧ әм ль гора ньһерʹандьна ԝи бьфькьрьн. Паши дӧакьрьне, әм гәрәке чь жь дәсте мә те бькьн, ԝәки һәр рʹож сәбьр кьн. Әм чьԛас бона сәбьркьрьне дӧа бькьн у һәр тьшти бькьн кӧ бь сәбьр бьн, әв һʹӧнӧр ԝе кʹурайа дьле мәда кʹока хԝә бәрдә у бьбә пʹара хәйсәте мә.

11-12. Йаһоԝа сәбьра хԝә чаԝа нишан кьрийә?

 ¹¹ Дәрһәԛа сәрһатийед Кʹьтеба Пироз кʹур бьфькьрә. Кʹьтеба Пироз бәʹса гәләк мәрьвед бь сәбьр дькә. Гава әм ван сәрһатийа дьхуньн у ль сәр ԝан кʹур дьфькьрьн, әм һин дьбьн кӧ сәбьр кьн. Пешийа кӧ әм дина хԝә бьдьнә һьнә жь ван мәсәла, әме дина хԝә бьдьнә мәсәла Йаһоԝа Хԝәде, йе кӧ һәри зедә сәбьр дькә.

¹² Бахче Еденеда, Мире-щьна бӧхдан авитә Йаһоԝа, у рʹәʹмти у дьлованийа Хԝәде чаԝа Һʹӧкӧмдар, кьрә бьн шьке. Йаһоԝа дькарьбу Мире-щьнайә дәрәԝин дәрберʹа ԛьрʹ кьра. Дәԝса ве йәке, Йаһоԝа сәбьр кьр, чьмки әԝи заньбу кӧ ԝәхт лазьм ә, ԝәки бе избаткьрьне кӧ һʹӧкӧмдарийа ԝи йа һәрә баш ә. Жь ԝи чахива, әԝ ԝан дәрәԝа кӧ сәр наве ԝи һатьнә готьне, сәбьр дькә. Хенщи ве йәке, Йаһоԝа бь сәбьр һивийе йә, ԝәки дьһа зедә мәрьв бькарьбьн жийина һʹәта-һʹәтайе бьстиньн (2 Пәтрус 3:9, 15). Бь сайа ве йәке, бь милйона мәрьв ида ԝи нас дькьн. Һәрге әм рʹьнд дина хԝә бьдьне, кӧ сәбьра Йаһоԝа чь кʹаре тинә, ԝе мәрʹа дьһа һеса бә һʹәта хьлазийе сәбьр кьн.

13. Иса чаԝа бь тʹәмами чʹәʹв дьда сәбьра Баве хԝә? (Бьньһерʹә ӧса жи шькьл.)

¹³ Иса бь тʹәмами чʹәʹв дьдә сәбьра Баве хԝә Йаһоԝа. Чахе әԝ сәр әʹрде бу, әԝи сәбьр дьда кʹьфше. Исарʹа тʹьме һеса нибу сәбьре бьдә кʹьфше, илаһи гава әԝ жь алийе ԛанунзан у Ферьсийава дьһатә щерʹьбандьне (Йуһʹәнна 8:25-27). Ле мина Баве хԝә Йаһоԝа, Иса зу һерс нәдькʹәт. Гава кәсед дьн әԝ әʹщьз у ньмьз дькьрьн, әԝи кʹине нә дажот (1 Пәтрус 2:23). Иса бе газьна һьмбәри тәнгасийа  сәбьр дькьр. Ләма жи Кʹьтеба Пироз дәрһәԛа Иса дьбежә, кӧ әм гәрәке «сәр ԝи бьфькьрьн, кӧ чаԝа ль ԝан гӧнәкʹаред мьԛабьли хԝә сәбьр кьр» (Ибрани 12:2, 3). Бь аликʹарийа Йаһоԝа, әм жи дькарьн һьмбәри һʹәму тәнгасийа сәбьр кьн.

14. Әм жь сәбьра Бьраһим чь һин дьбьн? (Ибрани 6:15) (Бьньһерʹә ӧса жи шькьл.)

¹⁴ Һәрге әм зудава нава рʹастийеда ньн, дьбәкә әм дьфькьрьн кӧ хьлазийа ве дьнйа хьраб гәрәке ида бьһата. Йан жи дьбәкә әм бьфькьрьн, кӧ дьԛәԝьмә әм нәжи дькарьн перʹа бьгьһиньн пе чʹәʹве хԝә ԝан ԛәԝьмандьна бьвиньн. Ле чь дькарә али мә бькә, ԝәки әм бь сәбьр һивийа ве рʹоже бьн? Ԝәрә әм дина хԝә бьдьнә мәсәла Бьраһим. Гава әԝ 75 сали бу у зарʹед ԝи тʹӧнә бун, Йаһоԝа соз да ԝи: «Әзе тә бькьм мьләтәки мәзьн» (Дәстпебун 12:1-4). Гәло Бьраһим бь чʹәʹве хԝә дит, кӧ әв соз чаԝа һатә сери? Нә бь тʹәмами. Чахе Бьраһим Чʹәме Фәратерʹа дәрбаз бу у 25 сала һивийе ма, әԝи дит ԝәки кӧрʹе ԝи Исһаԛ бь кʹәрәмәти һатә буйине. У 60 сал шунда, нәбийед ԝи, Әсаԝ у Аԛуб жерʹа һатьнә буйине (Бьхунә Ибрани 6:15). Ле Бьраһим ԛә нәдит кӧ нәбийед ԝи ча бунә мьләтәки мәзьн у Әʹрде Создайида щиԝар бун. Ле диса жи Бьраһим амьн ма у бу досте Хԝәде (Аԛуб 2:23). У гава Бьраһим жь мьрьне бе рʹакьрьне, әԝе гәләки ша бә кӧ һʹәму мьләтед дьнйайе бь сайа баԝәри у амьнийа ԝи һатьнә кʹәрәмкьрьне! (Дәстпебун 22:18) Әм жь ве йәке чь һин дьбьн? Дьбәкә әме бь чʹәʹве хԝә нәвиньн кӧ ча һʹәму созед Йаһоԝа ԝе бь тʹәмами бенә  сери. Ле һәрге әм мина Бьраһим сәбьр кьн, әм дькарьн баԝәр бьн, ԝәки Йаһоԝа ԝе мә һьм ньһа, һьм жи дьнйа тʹәзәда хәлат кә (Маркос 10:29, 30).

15. Ԝәʹде лекʹолина шәхси, әм дькарьн дина хԝә бьдьнә чь?

¹⁵ Кʹьтеба Пирозда гәләк сәрһатийед мәрьвед бь сәбьр һәнә (Аԛуб 5:10). Тӧ дькари ван сәрһатийа кʹур лекʹолин ки. b Мәсәлә, гава Даԝьд щаһьлтийеда ча Пʹадше Исраеле һатьбу бьжартьне, лазьм бу ԝәки әԝ гәләк сала һивийе буйа, һʹәта кӧ бьбуйа Пʹадша. Гава Шьмһʹун у Һана һивийа Мәсиһе создайи бун, ԝана бь амьни Йаһоԝарʹа хьзмәт дькьр (Луԛа 2:25, 36-38). Чахе тӧ дәрһәԛа ван сәрһатийа лекʹолин бьки, жь хԝә бьпьрсә: «Чь али ԝи мәрьви дькьр кӧ әԝ сәбьр кә? Сәбьр чь кʹар жерʹа ани? Әз ча дькарьм чʹәʹв бьдьмә ԝи?» Жь сәрһатийед мәрьвед бе сәбьр жи тӧ дькари һьнә тьшта һин би (1 Самуйел 13:8-14). Жь хԝә бьпьрсә: «Сәбьра ԝан чьрʹа тʹӧнә бу? Ахьрийеда чь һатә сәре ԝан?»

16. Сәбьркьрьн чь кʹаре тинә?

¹⁶ Дәрһәԛа кʹара сәбьркьрьне бьфькьрьн. Гава әм бь сәбьр ьн, әм дьһа бәхтәԝар у дьлрʹьһʹәт ьн. Сәбьркьрьн дькарә һьм сәр һәст у фькьред мә, һьм жи сәр сьһʹәт-ԛәԝата мә баш һʹӧкӧм кә. Гава әм һьндава мәрьвада сәбьре дьдьнә кʹьфше, әв йәк һәләԛәтийа мә тʹәви ԝан, дьһа баш дькә. Ӧса жи бь сайа сәбьре, щьвата мәда ԝе дьһа зедә тʹьфаԛи у йәкти һәбә. Һәрге кәсәк мә әʹщьз бькә, ле әм зу һерс нәкʹәвьн, проблем ԝе мәзьн нәбә (Зәбур 37:8; Мәтʹәлок 14:29). Ле йа лапә фәрз әв ә, кӧ гава әм бь сәбьр ьн, әм чʹәʹв дьдьнә Баве хԝәйи әʹзмана у дьһа незики ԝи дьбьн.

17. Әм бь дьл у щан дьхԝазьн чь бькьн?

¹⁷ Сәбьркьрьн һʹӧнӧрәки гәләк ԛимәт у керһати йә! Щарна һеса нинә сәбьре бьдьнә кʹьфше, ле бь аликʹарийа Йаһоԝа, әм дькарьн сәбьра хԝә зедә кьн. Әм бь сәбьр һивийа дьнйа тʹәзә нә. Әм баԝәр ьн, кӧ «чʹәʹве Хӧдан ль сәр хофкʹешед Ԝи нә у ль сәр ԝанә кӧ һивийа һʹӧба Ԝи нә» (Зәбур 33:18). Ԝәрен әм тʹьме һәр тьшти бькьн, ԝәки бәрдәԝам кьн сәбьре бьдьнә кʹьфше!