• «Мьн хԝә ӧса тʹәхмин дькьр, те бежи мере мьн бәрдәԝам дькьр бенамусийе бькә».

• «Мьн хԝә бекер у беԛимәт һʹәсаб дькьр».

• «Мьн тʹәви тʹӧ кәси нькарьбу дәрһәԛа ве йәке хәбәр да. Кәс тʹӧнә бу, кӧ еша дьле мьн сьвьк кә».

• «Мьн дьгот дьбәкә Йаһоԝа дәрде мьн навинә».

Әв гьли нишан дькьн, кӧ гава мер порнографийайе дьньһерʹә, жьна ԝи гәләк еше дькʹьшинә. У һәрге әԝи бь мәһа йан бь сала дьзикава әве йәке дькьр, дьбәкә жьна ԝи бьфькьрә кӧ ида нькарә итʹбарийа хԝә ԝи бинә. Кʹӧлфәтәке гот: «Әз дьфькьрим ԝәки әз ча лазьм ә мере хԝә нас накьм? Гәло әԝ тьштед дьн жи жь мьн вәдьшерә?»

Әв готар бона ԝан кʹӧлфәта һатийә һазьркьрьне, меред кʹижана порнографийайе дьньһерʹьн. a Принсипед Кʹьтеба Пироз, йед кӧ ве готареда һатьнә дайине, нишан дькьн ԝәки Йаһоԝа кʹӧлфәта гәләки ԛимәт дькә. Әԝ дьхԝазә бәр дьле ԝанда бе, у жь алийе емосийали у рʹӧһʹанида али ԝан бькә. b

Тӧ нькари һәр тьште кӧ мере тә дькә, контрол ки. Ле сәва кӧ еша дьле тә сьвьк бә у әʹдьлайи бькʹәвә дьле тә, тӧ дькари тьштәки бьки.

Хԝә нәһәԛ нәкә. Гава мер порнографийайе дьньһерʹә, дьбәкә жьн бьфькьрә кӧ тьштәкида нәһәԛ ә. Данйела c дьфькьри ԝәки пе һерса хԝә әԝе һʹале зәԝаща хԝә дьһа хьраб дькьр, чьмки гава мере ԝе порнографийайе дьньһерʹи, әԝ гәләк һерс дькʹәт. Ле Алис дьфькьри ԝәки әԝ бәр чʹәʹве мере хԝә нә һаԛас бәдәԝ ә. Әԝе пьрс дьда хԝә: «Гәло мере мьн чьрʹа дәԝса кӧ дина хԝә бьдә мьн, жьнед дьн дьньһерʹә?»

Һәрге дәрәща тә жи ӧса нә, бир нәкә ԝәки Йаһоԝа тә жь бо кьред мере тә, нәһәԛ накә. Аԛуб 1:14-да те готьне: «Һәр кәс дьбә машоԛе дьлһавьжийед хԝә, дьхапә у те щерʹьбандьне» (Рʹомайи 14:12; Филипи 2:12). Йаһоԝа тә сущдар накә, Әԝ амьнийа тә ԛимәт дькә (2 Дирок 16:9).

 Ӧса жи гава мер порнографийайева мьжул дьбә, әв йәк найе һʹәсабе ԝәки жьна ԝи бәдәԝ нинә. Ль гора леколина зандара, порнографийа һʹьше мерада фантазйа у һәстед ӧса пешда тинә, кӧ бь рʹасти тʹӧ жьн нькарә әв һәстед ԝан рʹази кә.

Бь зедәйи хәмгин нәбә. Катринайе гот, ԝәки хенщи дәрәща мере хԝә, кӧ әԝи порнографийайе дьньһерʹи, әԝ дәрһәԛа тʹӧ тьшти нькарьбу бьфькьрийа. Кʹӧлфәтәкә дьн жи бь наве Франсис гот: «Гава мьн ньзаньбу кӧ мере мьн кʹидәре йә, әз гәләк дьлтәнг дьбум, у тʹәмамийа рʹоже бәр хԝә дькʹәтьм». Гәләк жьн жи дьбежьн, кӧ гава әԝана тʹәви ԝан хушк-бьра нә, йед кӧ дьбәкә һаш жь проблема меред ԝан һәнә, әԝана шәрм дькьн. Һьнә кʹӧлфәтед дьн жи тʹәнебуне тʹәхмин дькьн, чьмки дьфькьрьн ԝәки тʹӧ кәс һʹале ԝан фәʹм накә.

Һәстед ӧса нормал ьн. Ле һәрге тӧ тʹәне ль сәр ван тьшта бьфькьри, хәмгинийа тә ԝе дьһа зедә бә. Дәԝса ве йәке, хирәт бькә ԝәки тӧ дина хԝә бьди достийа хԝә тʹәви Йаһоԝа. Һәрге тӧ ӧса бьки, тӧйе ԛәԝате бьстини у бькарьби сәбьр ки (Зәбур 62:2; Әфәси 6:10).

Кʹьтеба Пироз бәʹса һьнә сәрһатийед ԝан кʹӧлфәта дькә, дәрдед кʹижана гьран бун, ле ԝана бь сайа дӧа әʹдьлайа дьл станд. Лекʹолинкьрьна сәрһатийед ԝан, дькарьн ԛәԝат у дьлрʹьһʹәтийе бьдьн тә. Рʹаст ә Йаһоԝа щарна ԝана жь дәрдед ԝан хьлаз нәдькьр, ле әԝи әʹдьлайа дьл дьда ԝан. Мәсәлә, Һанна ль сәр һʹале хԝә «бь дьләки шәԝьти гьрийа» у ньзаньбу кӧ ԝе һʹале ԝе ча бә. Ле паши кӧ әԝе «лавайед хԝә ль бәр Хӧдан дькьрьн», әʹдьлайи кʹәтә дьле ԝе (1 Самуйел 1:10, 12, 18, ИМ; 2 Корьнтʹи 1:3, 4).

Жь рʹуспийед щьвате аликʹарийе бьхԝазә. Ԝәʹде чәтьн, әԝана ԝе бона тә бьбьнә сьтʹаргәһ (Ишайа 32:2). Әԝана дькарьн тәрʹа бежьн, ԝәки тӧ кʹижан хушкерʹа дькари дьле хԝә вәки, кӧ дьлрʹьһʹәтийе бьстини (Мәтʹәлок 17:17).

Гәло тӧ дькари али мере хԝә бьки ԝәки әԝ тʹәрка порнографийайе бьдә? Дьбәкә. Кʹьтеба Пироз дәрһәԛа сафикьрьна проблемәке йан алткьрьна дьжмьнәки, дьбежә кӧ «дӧ кәс жь кәсәки ԛәнщтьр ьн» (Ԝаиз 4:9-12, ИМ). Лекʹолин нишан дькьн, кӧ гава жьн-мер тʹәвайи һәр тьшти дькьн, ԝәки мер тʹәрка порнографийайе бьдә, ԝи чахи меррʹа дьһа һеса йә тʹәрка ве йәке бьдә, у жьна ԝи диса дькарә баԝәрийа хԝә ԝи бинә.

 Һәмьки, сәва кӧ мер тʹәрка порнографийайе бьдә, әԝ гәрәке хԝәха бь дьл у щан бьхԝазә ԝе йәке бькә. Гәло әԝи жь Йаһоԝа рʹәща кьрийә ԝәки ԛәԝате бьдә ԝи, у жь рʹуспийа аликʹари хԝәстийә? (2 Корьнтʹи 4:7; Аԛуб 5:14, 15) Әԝи сафи кьрийә чь бькә, ԝәки хԝә жь порнографийайе дур бьгьрә? Мәсәлә, гәло әԝи бона хәбьтандьна һащәтед електроник хԝәрʹа һьнә синор данинә? Гәло әԝ хԝә жь дәрәщед ӧса дур дьгьрә, йед кӧ дькарьн жерʹа бьбьнә тʹәльк? (Мәтʹәлок 27:12) Гәло әԝ һазьр ә аликʹарийа тә ԛәбул кә у һьндава тәда һәԛ бә? Һәрге әре, ԝәки ӧса нә тӧ дькари али ԝи бьки.

Ле чь щурʹәйи? Ԝәрә әм дина хԝә бьдьнә мәсәләке. Мере Фелисйайе, Етан, жь зарʹотийеда кʹәтьбу бьн һʹӧкӧме порнографийайе. Фелисйайе ԝирʹа готьбу, кӧ гава хԝәстьна ԝи пешда бе, ԝәки порнографийайе бьньһерʹә, әԝ һәртʹьм дькарә дәрһәԛа ве йәке жерʹа хәбәр дә. Етан дьбежә: «Әз бь һʹәлали дьле хԝә жьна хԝәрʹа вәдькьм. Әԝ бь дьловани али мьн дькә, кӧ әз хԝәрʹа синора дайньм, у әԝ һәр гав жь мьн дьпьрсә һәла әз чаԝа ньм. Ӧса жи әԝ али мьн дькә, ԝәки әз бона хәбьтандьна интернете хԝәрʹа синора дайньм». Гава хԝәстьна ԝи пешда те ԝәки порнографийайе бьньһерʹә, һәмьки дьле Фелисйайе дешә. Әԝ Дьбежә: «Еш у һерса мьн али ԝи накьн, кӧ әԝ тʹәрка ве йәке бьдә. Чахе әм дәрһәԛа проблема ԝи кʹур хәбәр дьдьн, әԝ ида һазьр ә кӧ тʹәви мьн дәрһәԛа еша дьле мьн хәбәр дә».

Хәбәрдана ӧса һьм али мер дькә, кӧ тʹәрка порнографийайе бьбә, һьм жи али жьна ԝи дькә, ԝәки әԝ диса баԝәрийа хԝә ԝи бинә. Һәрге мер һазьр бә бь һʹәлали дьле хԝә жьна хԝәрʹа вәкә, у беже кӧ әԝ ԝәʹде хԝә сәр чь у тʹәви кʹе дәрбаз дькә, у тʹӧ тьшти жь кʹӧлфәта хԝә вәнәшерә, ԝи чахи жьна ԝи ԝе бькарьбә итʹбарийа хԝә ԝи бинә.

Тӧ баԝәр дьки ԝәки тӧ жи дькари бь ви щурʹәйи али мере хԝә бьки? Һәрге әре, һун дькарьн ве готаре тʹәвайи бьхуньн у шеԝьр кьн. Гәрәке нета мер әԝ бә, ԝәки тʹәрка порнографийайе бьдә у итʹбарийа жьна хԝә ԛазанщ кә. Дәԝса кӧ мер жь бо хәм у дәрдед тә әʹщьз бә, гәрәке әԝ хирәт бькә ԝәки һәстед тә фәʹм бькә. Бьра нета тә әԝ бә, ԝәки тӧ али мере хԝә бьки у мәщале бьди ԝи, ԝәки әԝ диса итʹбарийа тә ԛазанщ кә. Гәрәке һун тʹәвайи бьфькьрьн һәла чь дьбә мәʹни, кӧ хԝәстьна ԝи пешда те ԝәки порнографийайе бьньһерʹә, у һун ча дькьн ве проблеме сафи кьн. d

Һәрге тӧ дьтьрси ԝәки ԝәʹде хәбәрдана ԝә дькарә шәрʹ пешда бе, һун дькарьн аликʹарийе жь рʹуспики ӧса бьхԝазьн, йе кӧ ԝә рʹьнд нас дькә, ԝәки ԝәʹде хәбәрдана ԝә, әԝ  жи тʹәви ԝә бә. Ве йәке бир нәкә: Паши кӧ мере тә тʹәрка порнографийайе бьдә, у кӧ һун диса бькарьбьн баԝәрийа хԝә һәвдӧ биньн, ԝәхт лазьм ә. Сәбьр бькә! Дина хԝә бьде, ԝәки һәләԛәтийа ортʹа ԝәда чаԝа ԛәԝи дьбә. Баԝәр бә, ԝәхт шунда, һәрге һун һәр дӧ жи сәбьр кьн, зәԝаща ԝә ԝе диса ԛәԝи бә (Ԝаиз 7:8; 1 Корьнтʹи 13:4).

Һәрге мере тә паши кӧ тʹәрка порнографийайе бьдә, диса дәстпекә ве йәке бьньһерʹә, гәло әв йәк те һʹәсабе кӧ әԝе ида тʹобә нәкә у чʹарә тʹӧнә? На, әв йәк нә һәртʹьм ӧса нә. Илаһи һәрге әԝ порнографийайева һатийә гьредане, дьбәкә әԝ тʹәмамийа әʹмьре хԝә гәрәке тʹәви ве йәке шәрʹ бькә. Паши гәләк сала, дьбәкә әԝ диса дәстпекә порнографийайе бьньһерʹә. Һәрге әԝ диса бькʹәвә бәр байе ве хԝәстьна хԝә, әԝ гәрәке дьһа зедә фәсал бә у хԝә жь ԝан дәрәща дур бьгьрә, йед кӧ дькарьн ве хԝәстьне диса щәм ԝи пешда биньн, мәсәлә әԝ гәрәке бона хәбьтандьна һащәтед електроник хԝәрʹа синора дайнә (Мәтʹәлок 28:14; Мәтта 5:29; 1 Корьнтʹи 10:12). Гәләк фәрз ә кӧ мер «рʹӧһʹ у фькьред хԝәда нуйәжийин» бә у хьрабийе нәфрʹәт кә. Мәсәлә, гәрәке әԝ порнографийайе у һʹәму кьред хьраб нәфрʹәт бькә, мәсәлә мастурбасийайе (Әфәси 4:23; Зәбур 97:10; Рʹомайи 12:9). Гәло әԝ һазьр ә сәр хԝә бьхәбьтә у гӧһастьна бькә? Һәрге әре, демәк гӧман һәйә кӧ әԝе бькарьбә тʹәрка ве йәке бьдә. e

Ле һәрге мере тә нахԝазә ве проблеме сафи кә, гәло тӧ дькари чь бьки? Дәрәща ӧсада дьбәкә тӧйе дьлтәнг би, һерс кʹәви, йан жи хԝә ӧса тʹәхмин ки, кӧ нәмами тә кьрьнә. Әԝ һәр тьшт бьдә дәсте Йаһоԝа. Һәрге тӧ ӧса бьки, әԝ йәк дькарә али тә бькә, ԝәки тӧ әʹдьлайа дьл ӧнда нәки (1 Пәтрус 5:7). Бь сайа дӧакьрьн, лекʹолине у фькьрандьна кʹур, тʹьме незики Йаһоԝа бә. Һьнге тӧйе баԝәр би, ԝәки Йаһоԝа жи незики тә дьбә. Ишайа 57:15-да те готьне, кӧ Хԝәде незики дьлшкәстийа йә у дьхԝазә али ԝан бькә, ԝәки әԝана диса шабуне бьстиньн. Алийе хԝәда һәр тьшти бькә, ԝәки Хԝәде жь тә рʹази бә. Жь рʹуспийа аликʹарийе бьхԝазә. У гӧмана хԝә ӧнда нәкә, кӧ мере тә ԝе рʹожәке бе гӧһастьне (Рʹомайи 2:4; 2 Пәтрус 3:9).