1. Сафикьрьна һәрә баш чь йә?

САФИКЬРЬНЕД де-бава дькарьн ԝәхтәкә дьреж ль сәр зарʹед ԝан һʹӧкӧм бькьн. Һәгәр де у бав сафикьрьнед хьраб бькьн, әв йәк дькарә бьбә сәбәба проблемед мәзьн. Ле һәгәр әԝ ԛьраред баш бьдьн, әԝана дькарьн али зарʹед хԝә бькьн кӧ жийана ԝан баш бә. Һьлбәт лазьм ә кӧ зарʹок жи сафикьрьнед баш бькьн. Әм һевидар ьн кӧ әԝе сафи кьн кӧ Йаһоԝарʹа хьзмәт бькьн. Жийина мәрьвада әва сафикьрьна һәрә баш ә (Зәб. 73:28).

2. Иса у де-баве ԝи чь сафикьрьнед баш дькьрьн?

² Де у баве Иса дьхԝәст али зарʹед хԝә бькьн кӧ әԝана Йаһоԝарʹа хьзмәт бькьн, у сафикьрьнед ԝан нишан дькьр кӧ нета ԝан йа сәрәкә әв бу (Луԛа 2:40, 41, 52). Иса жи ԛьраред баш дькьрьн, йед кӧ али ԝи дькьрьн кӧ әԝ хԝәстьна Йаһоԝа бинә сери (Мәт. 4:1-10). Иса бу мәрьвәки дьлован, амьн у мерхас. Һьлбәт һәр де у бав дьхԝазьн кӧ зарʹед ԝан бьбьнә мина Иса.

3. Ве готареда, әме щабед кʹижан пьрса бьстиньн?

³ Ве готареда, әме щабед ван пьрса бьстиньн: Йаһоԝа дәрһәԛа Иса чь сафикьрьнед баш кьр? Де у бав дькарьн жь сафикьрьнед де-баве Иса чь һин бьн? Щаһьл дькарьн жь сафикьрьнед Иса чь һин бьн?

4. Йаһоԝа һьндава Кӧрʹе хԝә кʹижан сафикьрьна фәрз кьр?

⁴ Йаһоԝа бона Иса де у бавәки гәләк баш һьлбьжарт (Мәт. 1:18-23; Луԛа 1:26-38). Готьнед Мәрйәме, йед кӧ ль Кʹьтеба Пироз һатьнә ньвисаре, нишан дькьн кӧ  әԝе Йаһоԝа у Хәбәра ԝи чьԛас һʹьз дькьр (Луԛа 1:46-55). Ӧса жи, әв йәк кӧ Усьв рʹебәрийа Йаһоԝа чаԝа ԛәбул кьр, нишани мә дькә кӧ әԝ жь Хԝәде дьтьрсийа у дьхԝәст дьле ԝи ша бькә (Мәт. 1:24).

5-6. Йаһоԝа Кӧрʹе хԝә жь кʹижан проблема нәдьпараст?

⁵ Йаһоԝа бона Иса де у бавәки дәԝләмәнд нәбьжарт. Ԛӧрбана кӧ Усьв у Мәрйәме паши буйина Иса пʹешкʹеш кьр, нишан дькә кӧ әԝ кʹәсиб бун (Луԛа 2:24). Ль Ньсрәте, Усьв ише нәщартийе дькьр. Щийе кӧ әԝи ише хԝә дькьр бәлки незики мале бу. Әшкәрә йә кӧ әԝана бь жийинәкә сьвьк дьжитьн, чьмки һәри кем 7 зарʹед ԝан һәбун (Мәт. 13:55, 56).

⁶ Йаһоԝа Кӧрʹе хԝә Иса жь һьнә тʹәлька дьпараст, ле әԝи әԝ жь һʹәму проблема хԝәй нәдькьр (Мәт. 2:13-15). Мәсәлә, һьнә мәрьвед Иса баԝәрийа хԝә бь ԝи нәдьанин. Бинә бәр чʹәʹве хԝә кӧ Иса чьԛас хәмгин дьбу, кӧ серида һьнә нәфәред малбәта ԝи әԝ ча Мәсиһ ԛәбул нәдькьрьн (Марԛ. 3:21; Йуһʹн. 7:5). Ӧса жи, ча те кʹьфше Усьв зу мьр, ләма бәлки лазьм бу кӧ кӧрʹе мәзьн, демәк Иса, шьхӧле баве хԝә бәрдәԝам бькьра (Марԛ. 6:3). Гава Иса мәзьн дьбу, дьԛәԝьмә әԝи әʹбура малбәта хԝә дькьр, ләма әԝи рʹьнд заньбу кӧ бәри еваре, мәрьв чьԛас ԝәстийайи йә.

7. (а) Ԝе баш бә кӧ жьн у мер жь хԝә чь бьпьрсьн? (б) Готьнед жь Мәтʹәлок 2:1-6 чаԝа дькарьн али де у бава бькьн кӧ әԝ зарʹед хԝә һин бькьн?

⁷ Пешийа кӧ жьн-мер зарʹа биньн дьнйайе, ԝе баш бә кӧ әԝана жь хԝә ӧса бьпьрсьн: «Гәло Йаһоԝа мә ча мәрьвед мьлук у баԝәрмәнд дьвинә, йед кӧ һазьр ьн ԝәки зарʹәке мәзьн бькьн?» (Зәб. 127:3, 4) Һәгәр зарʹед ԝә һәнә, жь хԝә бьпьрсьн: «Гәло әм зарʹед хԝә һин дькьн кӧ гәләк фәрз ә хәбатһʹьз бьн?» (Ԝаиз 3:12, 13) «Гәло әм чь жь дәсте мә те дькьн кӧ зарʹед хԝә жь хьрабийа дьнйайе бьпарезьн?» (Мәтʹлк. 22:3) Һун һьлбәт нькарьн зарʹед хԝә жь һʹәму проблемед жийане бьпарезьн, чьмки әв йәк набә. Ле бәле, һун дькарьн ԝана һеди-һеди бона жийане һазьр бькьн у ԝана ширәт бькьн  кӧ әԝана чаԝа дькарьн жь Хәбәра Хԝәде рʹебәрийе бьстиньн (Мәтʹәлок 2:1-6 бьхунә). Мәсәлә, һәгәр мәрьвәки ԝә жь рʹийа рʹастийе дәркʹәвә, зарʹед хԝәрʹа шьровәкьн кӧ ль гора Кʹьтеба Пироз чьма фәрз ә кӧ әԝана Йаһоԝарʹа амьн бьминьн (Зәб. 31:23). Йан жи, һәгәр һʹьзкьрийәки ԝә бьмьрә, зарʹед хԝәрʹа нишан кьн кӧ Хәбәра Хԝәде чаԝа дькарә бәрдьли у дьлрʹьһʹәтийе бьдә ԝан (2 Корн. 1:3, 4; 2 Тимтʹ. 3:16).

8. Усьв у Мәрйәме чаԝа гӧһ дьда рʹебәрийа Ԛануна Дӧщари 6:6, 7?

⁸ Усьв у Мәрйәме али Иса дькьр, ԝәки әԝ дьле Хԝәде ша бькә. Ԝана гӧһ дьда рʹебәрийа Йаһоԝа йа кӧ бона де-бава бу (Ԛануна Дӧщари 6:6, 7 бьхунә). Бәле, ԝана Йаһоԝа гәләк һʹьз дькьр, у ԝана дьхԝәст али зарʹед хԝә бькьн, ԝәки әԝ жи Йаһоԝа һʹьз бькьн.

9. Усьв у Мәрйәме кʹижан сафикьрьнед фәрз кьрьн?

⁹ Усьв у Мәрйәме һәртʹьм тʹәви зарʹед хԝә Йаһоԝа дьһʹәбандьн. Әԝ бешьк һәр һʹәфтә дьчун щьвинед кʹьништа Ньсрәте у һәр сал бона Щәжна Дәрбазбуне дьчун Оршәлиме (Луԛа 2:41; 4:16). Гава әԝ дьчун Оршәлиме, ԝана бәлки Иса у хушк у бьрайед ԝирʹа тʹәриха хьзмәткʹаред Йаһоԝа гьли дькьр. Рʹеда, әԝана дьԛәԝьмә тʹәвайи ԝан щийарʹа дьчун, йед кӧ Ньвисаред Пироз бәʹс дькьр. Гава малбәт һәр кӧ дьчу һе мәзьн дьбу, ида бона Усьв у Мәрйәме нә һеса бу кӧ һʹәбандьна хԝә бь аԝайәки тʹәрбәт бәрдәԝам бькьн. Ле бәле, ԝана диса жи әԝ йәк дькьр у жь ве йәке гәләк кʹар дьстанд. Әԝ йәк кӧ ԝана жийана хԝәда һәри зедә дина хԝә дьда һʹәбандьна Йаһоԝа, малбәта ԝан незики Йаһоԝа бу.

10. Де у бав дькарьн жь Усьв у Мәрйәме чь дәрса бьстиньн?

¹⁰ Де у бавно, һун дькарьн жь Усьв у Мәрйәме чь һин бьбьн? Йа һәрә фәрз, бь готьн у кьрьнед хԝә нишани зарʹед хԝә бькьн кӧ һун Йаһоԝа гәләк һʹьз дькьн. Пʹешкʹеша һәрә мәзьн, йа кӧ һун дькарьн бьдьн ԝана әв ә, кӧ али ԝан бькьн ԝәки әԝана Йаһоԝа һʹьз бькьн.  Ләма, ԝана һин кьн кӧ әԝ чаԝа дькарьн һәртʹьм леколина бькьн, дӧа бькьн, һәрʹьн щьвина у мьзгине бәла бькьн (1 Тимтʹ. 6:6). Ӧса жи, һьлбәт лазьм ә кӧ һун алийе һʹәԝще физикида бона зарʹед хԝә хәм бькьн (1 Тимтʹ. 5:8). Ле бәле, бир нәкьн кӧ мал у мьлкʹ нькарә жийане бьдә ԝан. Тʹәне достийа тʹәви Йаһоԝа али ԝан бькә кӧ әԝ ахьрийа ве система кәвнда сах бьминьн у дәрбази дьнйа тʹәзә бьн. Бона ве йәке достийа тʹәви Йаһоԝа гәләк фәрз ә (Һәзԛл. 7:19; 1 Тимтʹ. 4:8).

11. (а) Ширәта ль 1 Тимотʹейо 6:17-19 чаԝа дькарә али де у бава бькә кӧ әԝ сафикьрьнед баш бькьн? (б) Малбәта ԝә дькарә хԝәрʹа кʹижан нета дайнә, у кʹара ве йәке дькарә чь бә? (Чаргошә бь наве « Хԝәрʹа Нета Дайньн» бьньһерʹә.)

¹¹ Әм пʹьрʹ ша нә кӧ гәләк де у бав бона малбәтед хԝә сафикьрьнед баш дькьн. Әԝана һәртʹьм тʹәвайи Йаһоԝарʹа хьзмәт дькьн. Әԝана мьзгине бәла дькьн у дьчьн щьвина. Һьнә малбәт жи мьзгине ль щийед дур бәла дькьн. Һьнәк жи дьчьн Бәйтʹәле сәр екскурсийайе йан пьштгьрийа проектед авакьрьна авайед тʹәшкиләте дькьн. Малбәтед кӧ сафикьрьнед ӧса дькьн, һьлбәт пʹәре хԝә хәрщ дькьн, у әԝана дьбәкә рʹасти һьнә чәтьнайа жи тен. Ле бәле, кʹаред кӧ әԝ дьстиньн ԝана бь рʹасти жи жь алийе рʹӧһʹанива дәԝләмәнд дькьн (1 Тимотʹейо 6:17-19 бьхунә). Гәләк кәсед кӧ дь малбәтед ӧсада мәзьн дьбьн ль сәр ве рʹе дьминьн у тʹӧ щара пʹошман набьн (Мәтʹлк. 10:22).

12. Гава Иса мәзьн дьбу, лазьм бу кӧ әԝ чь бькә?

¹² Баве әʹзмани йе Иса Мәсиһ һәртʹьм сафикьрьнед баш дькә, у де у баве ԝи йед сәр әʹрде жи сафикьрьн бь билани дькьрьн. Ле бәле, гава Иса мәзьн дьбу, лазьм бу кӧ әԝ ида хԝәха һьнә сафикьрьна бькә (Галт. 6:5). Чаԝа кӧ әм хԝәйе азайа бьжартьне нә, әԝ жи хԝәйе азайа бьжартьне бу. Әԝи дькарьбу кʹара хԝә тʹәне бьгәрʹийа, ле әԝи һәри зедә дина хԝә дьда достийа тʹәви Йаһоԝа (Йуһʹн. 8:29). Ԝи алида, щаһьл чаԝа дькарьн Иса Мәсиһ хԝәрʹа бькьн мәсәлә?

13. Гава Иса һе щаһьл бу, ԝи чь кьр?

¹³ Гава Иса зарʹок бу, әԝи гӧһдарийа де у баве хԝә дькьр. Әԝи рʹебәрийа де у баве хԝә тʹӧ щара пʹепәс нәдькьр у нәдьфькьри кӧ әԝ жь ԝан баштьр занә, ле әԝ һәртʹьм «гӧрʹа ԝанда бу» (Луԛа 2:51). Жь бәр кӧ Иса кӧрʹе мәзьн бу, һьнә щабдарийед ԝи һәбун, у әԝи әв щабдари бешьк бь аԝайәки баш дьанин сери. Ӧса те фәʹм кьрьн кӧ әԝ ише нәщартийе жь Усьв һин бу, бона кӧ бькарьбә пьштгьрийа малбәте бькә.

14. Әм жь кʹӧ заньн кӧ Иса Хәбәра Хԝәде рʹьнд леколин дькьр?

 ¹⁴ Дьԛәԝьмә, де у баве Иса ԝирʹа готьбун кӧ әԝ чаԝа һатә дьнйайе у мәләка дәрһәԛа ԝи чь готьбун (Луԛа 2:8-19, 25-38). Хенщи һинкьрьне кӧ Иса жь де у баве хԝә дьстанд, әԝи Ньвисаред Пироз хԝәха жи леколин дькьрьн. Әм ве йәке жь кʹӧ заньн? Гава әԝ һе зарʹок бу, мамостәйед ль Оршәлиме «сәр занәбун у щабед ԝи зәндәгьрти дьман» (Луԛа 2:46, 47). Гава Иса 12 сали бу, әԝи ида фәʹм дькьр кӧ Йаһоԝа Баве ԝи йә (Луԛа 2:42, 43, 49).

15. Иса чаԝа нишан кьр кӧ әԝи дьхԝәст хԝәстьна Йаһоԝа бинә сери?

¹⁵ Гава Иса фәʹм кьр кӧ хԝәстьна Йаһоԝа һьндава ԝида чь йә, әԝи сафи кьр кӧ ве ԛьрара Хԝәде бинә сери (Йуһʹн. 6:38). Иса заньбу кӧ гәләк кәс ԝе ԝи нәфрʹәт бькьн, у әв йәк тьштәки зор ә. Диса жи, әԝ һазьр бу хԝә тʹәсмили Йаһоԝа бькә. Гава Иса дь сала 29 Д.М., һатә ньхӧмандьне, әԝи ԛьрар кьр кӧ һәртʹьм ль гора хԝәстьна Йаһоԝа бьжи (Ибрн. 10:5-7). Ԝәхта кӧ әԝ ль сәр стуне һат мьх кьрьн жи, әԝи һәри зедә дина хԝә да хԝәстьна Баве хԝә (Йуһʹн. 19:30).

16. Зарʹ дькарьн жь Иса чь дәрсе бьстиньн?

¹⁶ Гӧһ бьдә де у баве хԝә. Ԝәк Усьв у Мәрйәме, де у баве тә жи беԛьсур ниньн. Диса жи, Йаһоԝа щабдари дайә ԝан кӧ әԝана тә хԝәй бькьн, һин бькьн у рʹебәрийе тә бькьн. Һәгәр тӧ гӧһ бьди ширәтед ԝан у ԛәдьре ԝан бьгьри, тӧйе гәләк кʹәрәма бьстини (Әфәс. 6:1-4).

17. Ль гора Йешу 24:15, зарʹ у щаһьл гәрәке хԝәха кʹижан сафикьрьне бькьн?

¹⁷ Сафи кә кӧ тӧйе кʹерʹа хьзмәт бьки. Гәрәке тӧ рʹьнд фәʹм бьки кӧ Йаһоԝа кʹи йә, нета ԝи чь йә у хԝәстьна ԝи бона тә чь йә (Рʹом. 12:2). Һьнге тӧйе бькарьби ԛьрара һәри фәрз бьди – сафи ки кӧ тӧйе Йаһоԝарʹа хьзмәт бьки (Йешу 24:15 бьхунә; Ԝаиз 12:1). Бь сайа хԝәндьн у леколина Кʹьтеба Пироз, тӧйе һе зедә Йаһоԝа һʹьз бьки, у баԝәрийа тә ԝе дьһа ԛәԝи бә.

18. Ԝе баш бә кӧ зарʹ у щаһьл дина хԝә бьдьн чь, у чьрʹа?

¹⁸ Дь жийана хԝәда һәри зедә дина хԝә бьдә хԝәстьна Йаһоԝа. Дьнйайа  Мире-щьна дьбежә кӧ һәгәр тӧ һʹӧнӧред хԝә бона кʹара хԝә бьди хәбате, тӧйе бәхтәԝар бьби. Ле рʹасти әв ә кӧ кәсед кӧ дьхԝазьн мал у мьлкʹ ԛазанщ бькьн, хԝә дькьнә «хԝәйе кӧл у дәрда» (1 Тимтʹ. 6:9, 10). Ле һәгәр тӧ гӧһдарийа Йаһоԝа бьки у дь жийана хԝәда һәри зедә дина хԝә бьди хԝәстьна ԝи, тӧйе пешдачуйи у сәрԝахт би (Йешу 1:8).

19. Де у бав гәрәке чь бир нәкьн?

¹⁹ Де у бавно, али зарʹед хԝә бькьн кӧ әԝ Йаһоԝарʹа хьзмәт бькьн. Хԝә бьсперьн ԝи, у әԝе али ԝә бькә кӧ һун ԛьраред билани бькьн (Мәтʹлк. 3:5, 6). Бир нәкьн кӧ һʹӧкӧма кьрьнед ԝә, жь һʹӧкӧма готьнед ԝә мәзьнтьр ә. Ләма, ԛьраред баш бькьн, йед кӧ ԝе али зарʹед ԝә бькьн ԝәки әԝ дьле Йаһоԝа ша бькьн.

20. Зарʹ у щаһьлед кӧ сафи дькьн кӧ Йаһоԝарʹа хьзмәт бькьн ԝе кʹижан кʹәрәма бьстиньн?

²⁰ Зарʹ у щаһьлно, де у баве ԝә дькарьн рʹийа рʹаст нишани ԝә бькьн. Ле бәле, гәрәке һун хԝәха сафикьрьнед баш бькьн у дьле Йаһоԝа Хԝәде ша бькьн. Ләма, Иса Мәсиһ хԝәрʹа бькьн мәсәлә у сафи кьн кӧ Йаһоԝарʹа хьзмәт бькьн. Һәгәр һун ӧса бькьн, һуне гәләк кʹәрәма бьстиньн у жийана һʹәта-һʹәтайе ԛазанщ бькьн (1 Тимтʹ. 4:16).