1. Паши ньхӧмандьне, гәрәке әм чь бькьн?

ГАВА кәсәк те ньхӧмандьне, әԝ ль бәр һәр кәси әшкәрә дькә кӧ әԝ баԝәрийа хԝә Йаһоԝа тинә у һазьр ә кӧ тʹәви тʹәшкиләта ԝи һәвкʹарийе бькә. * Паши ньхӧмандьне һьлбәт лазьм ә кӧ мәрьв баԝәрийа хԝә һьндава Йаһоԝа у тʹәшкиләта ԝи һе зедә ԛәԝи бькә.

2-3. Йаһоԝа чаԝа рʹебәрийе тʹәшкиләта хԝә дькә? Мәсәлә бинә.

² Әв йәк кӧ Йаһоԝа чаԝа рʹебәрийе тʹәшкиләта хԝә дькә, хәйсәт, нет у принсипед ԝи әʹйан дькә. Ньһа әме бьвиньн кӧ се һʹӧнӧред Йаһоԝа дь тʹәшкиләта ԝида чаԝа тенә кʹьфше.

³ Йа йәке, Хԝәде йәки бетʹәрәф ә, демәк әԝ фьрԛийе накә нава мәрьва (Кʹар. Шанд. 10:34). Жь һʹьзкьрьне, Йаһоԝа Кӧрʹе хԝә ԝәк ԛӧрбан бона һәр кәси дайә (1 Тимтʹ. 2:6; Йуһʹн. 3:16). Бь дәсте хьзмәткʹаред хԝә, Йаһоԝа мьзгине дьгьһинә һәр кәсе кӧ гӧһ дьдә, у али ԝан дькә кӧ әԝ жь ве ԛӧрбане кʹәрәма бьстиньн. Йа дӧда, Йаһоԝа Хԝәдайе әʹдьлайе у тʹәрбәтийе йә (1 Корн. 14:33, 40). Ләма, хьзмәткʹаред ԝи жи гәрәке бь әʹдьлайе у бь аԝайәки тʹәрбәт у маԛули ԝирʹа хьзмәт бькьн. Йа сьсийа, әԝ хьзмәткʹаред хԝә һәртʹьм һин дькә (Иб. 36:22). Ләма, тʹәшкиләта ԝи һьм ль щьвате һьм жи ль хьзмәте бь сайа Кʹьтеба Пироз һин дькә. Әв се һʹӧнӧред Йаһоԝа ль ԛьрʹна йәке чаԝа әʹйан дьбун у иро чаԝа әʹйан дьбьн? Ӧса жи, гава тӧ тʹәви тʹәшкиләта Йаһоԝа һәвкʹарийе дьки, рʹӧһʹе пироз чаԝа дькарә али тә бькә?

4. Ль гора Кʹаред Шандийа 1:8, Иса Мәсиһ шагьртед хԝәрʹа гот кӧ гәрәке әԝ чь бькьн, у ԝана ԝе чь аликʹари бьстанда?

⁴ Ль ԛьрʹна йәке. Мьзгина кӧ Иса Мәсиһ бәла дькьр һеви дьда һәр кәси (Луԛа 4:43). Әԝи әʹмьр да шагьртед хԝә кӧ әԝ ве мьзгине «һʹәта сәре дьне жи» бәла бькьн (Кʹаред Шандийа 1:8 бьхунә). Ԝана һьлбәт нькарьбуйа әв иш бь ԛәԝата хԝә биньн сери. Ләма, сәва әԝ бькарьбьн ви иши бькьн, Иса Мәсиһ соз да кӧ әԝе рʹӧһʹе пироз бьстиньн (Йуһʹн. 14:26; Зәкәр. 4:6).

5-6. Рʹӧһʹе пироз чаԝа али шагьртед Иса дькьр?

⁵ Ль Рʹожа Пенщийе Һʹәсабе йа сала 33 Д.М., шагьртед Иса рʹӧһʹе пироз стандьн. Бь сайа аликʹарийа рʹӧһʹе пироз, ԝана дәрберʹа бәлакьрьна мьзгине дәстпекьр, у дь ԝәхтәкә кьнда, бь һʹәзара кәса мьзгина Пʹадшатийе ԛәбул кьр (Кʹар. Шанд. 2:41; 4:4). Гава зерандьн дәстпебу, шагьртед Иса тʹәрка шьхӧле хԝә нәкьрьн, ле жь Хԝәде аликʹари хԝәстьн. Ԝана ӧса дӧа кьр: «Кʹәрәме хӧламед хԝәрʹа бькә, ԝәки әм меркʹими хәбәра тә хәбәр дьн». Һьнге әԝана бь рʹӧһʹе пирозва тʹьжи бун у бәрдәԝам дькьрьн «хәбәра Хԝәде меркʹими» бәла кьн (Кʹар. Шанд. 4:18-20, 29, 31).

⁶ Шагьртед Иса рʹасти тәнгасийед дьн жи дьһатьн. Мәсәлә, копийед Ньвисаред Пироз ль ԝе дәме һьндьк бун. Әʹдәбйәтед леколине тʹӧнә бун. Сәрда жи, лазьм бу кӧ шагьрт мьзгине бьдьн кәсед кӧ бь зьманед хәриб хәбәр дьдан. Нава ван тәнгасийада, ван шагьртед бьхирәт бь дәһа сала мьзгина Пʹадшатийе «жь һʹәму әʹфьринед ль сәр рʹуйе әʹрдерʹа» бәла кьр (Колс. 1:6, 23, ИМ).

7. Сәд сал пешда, хьзмәткʹаред Йаһоԝа жь кʹӧ заньбу кӧ Хԝәде жь ԝана чь дьхԝазә, у ԝана чь кьр?

⁷ Ль рʹожед мә. Йаһоԝа иро жи рʹебәрийе хьзмәткʹаред хԝә дькә у ԛәԝате дьдә ԝан. Рʹебәрийа Хԝәде һьлбәт һәри зедә жь Кʹьтеба Пироз те, йа кӧ бь сайа рʹӧһʹе пироз һатийә ньвисандьн. Мәсәлә, Кʹьтеба Пироз мәрʹа әʹйан дькә кӧ Иса Мәсиһ чаԝа хьзмәт дькьр у әʹмьр да шагьртед хԝә кӧ әԝ ви иши бәрдәԝам бькьн (Мәт. 28:19, 20). Ль мәһа Тирмәһе йа сала 1881, журнала «Бьрща Ԛәрәԝьлийеда» дьһатә готьне: «Хԝәде гази мә нәкьрийә у әм кʹьфш нәкьрьнә кӧ әм хԝәрʹа һӧрмәте бьстиньн у мал у мьлкʹ ԛазанщ кьн, ле бона кӧ әм мьзгине бь дьл у щан бәла бькьн». Бәлавокәкеда («To Whom the Work Is Entrusted»), йа кӧ дь сала 1919-да һатьбу дәрхьстьне, ӧса дьһатә готьне: «Иш гәләк мәзьн те кʹьфше, ле бь ԛәԝата кӧ әм жь Хӧдан дьстиньн, әме ви иши биньн сери». Бәле, ԝәк шагьртед ль ԛьрʹна йәке, ван хушк у бьра ише бәлакьрьна мьзгине бь мерхаси дьани сери, у әԝана баԝәр бун кӧ рʹӧһʹе пироз ԝе али ԝан бькә ԝәки мьзгине бьдьн һәр щурʹә инсана. Әм баԝәр ьн кӧ рʹӧһʹе пироз ԝе али мә жи бькә!

8-9. Тʹәшкиләта Йаһоԝа мьзгине бь кʹижан метода бәла дькә?

⁸ Тʹәшкиләта Йаһоԝа мьзгине бь сайа һащәтед лапә баш бәла дькә. Мәсәлә, мьзгина Пʹадшатийе бь аликʹарийа әʹдәбйәтед нәшьркьри, «Фото-Драмайа Әʹфьрандьне,» фонограф, әʹрәбәйед бьдәнг у бәрнамәйед радйойе дьһат бәла кьрьн. Иро, техноложийед тʹәзә тенә хәбьтандьне. Ӧса жи, тʹәшкиләта Хԝәде дь алийе ԝәлгәрʹандьнеда ишәки пʹьрʹ мәзьн дькә. Гәло чьма? Нет әв ә кӧ мәрьвед жь щурʹә-щурʹә мьләта мьзгине бь зьмане хԝә бьбьһен. Йаһоԝа бетʹәрәф ә, ләма әԝи жь бәреда готьбу кӧ мьзгин ԝе бона «һʹәму мьләта,  бәрәка, зьмана у щьмәʹта» бе дайин (Әʹйан. 14:6, 7). Хԝәде дьхԝазә кӧ һәр кәс хәбәра Пʹадшатийе бьбьһе.

⁹ Щарна зор ә кӧ әм бьгьһижьн һьнә кәса, мәсәлә мәрьвед кӧ дь авайед парастида дьжин. Гәло кәсед ӧса чаԝа дькарьн мьзгине бьбьһен? Сәва кӧ әм карьбьн мьзгине бьгьһиньн һе зедә мәрьва, тʹәшкиләта Йаһоԝа щурʹә-щурʹә методед хьзмәте дьдә хәбате. Мәсәлә, дь сала 2001-да, Кʹома Рʹебәрийе изьн дабу кӧ стендед әʹдәбйәта ль Франсайе у паше ль щийед дьн жи бенә хәбьтандьн. Кʹара ви щурʹе хьзмәте пʹьрʹ баш бу! Дь сала 2011-да, бажаре Нийу Йоркеда ль щийед кӧ тʹьме тʹьжә мәри нә, тʹәшкиләте бәрнамәйәкә мәхсус дәстпекьрьбу. Бь сайа ве бәрнамәйе, дь сала пешьнда, 102 129 кʹьтеб у 68 911 журнал һатьн бәла кьрьн, у 4 701 кәси һинбуна Кʹьтеба Пироз хԝәст! Әшкәрә йә кӧ рʹӧһʹе пироз пьштгьрийа ви иши дькьр. Ләма, Кʹома Рʹебәрийе изьн да кӧ стендед әʹдәбйәта ль тʹәмамийа дьнйайе бенә хәбьтандьн.

10. Әм чаԝа дькарьн дь хьзмәтеда бьбьн һостә?

¹⁰ Тӧ дькари чь бьки? Жь ширәткьрьна кӧ Йаһоԝа щьвинада мәрʹа дьдә, кʹаре бьстинә. Һәртʹьм тʹәви кʹома хԝә йа хьзмәте, һәрʹә хьзмәте. Бь ви аԝайи, тӧ дькари аликʹарийе бьстини у жь мәсәла кәсед дьн һелане бьстини. Дь хьзмәтеда сәбьр бькә. Ԝәк рʹеза сәрәкә йа ве готаре нишан дькә, әм хԝәстьна Хԝәде, нә бь ԛәԝата хԝә, ле бь аликʹарийа рʹӧһʹе пироз пек тиньн (Зәкәр. 4:6). Бәле, гәрәке әм бир нәкьн кӧ шьхӧле кӧ әм дькьн, шьхӧле Хԝәде йә!

11. Ль ԛьрʹна йәке, кʹома рʹебәрийе чаԝа һәвкʹари дькьр кӧ әʹдьлайа дь нав хьзмәткʹаред Хԝәдеда хԝәй бькә?

¹¹ Ль ԛьрʹна йәке. Кʹома рʹебәрийе, йа кӧ ль бажаре Оршәлиме бу, һәвкʹари дькьр кӧ әʹдьлайе у тʹәрбәтийе дь нав хьзмәткʹаред Хԝәдеда хԝәй бькә (Кʹар. Шанд. 2:42). Мәсәлә, дь сала 49-да Д.М., гава пьрса сьнәтбуне пешда һат, кʹома  рʹебәрийе дәрһәԛа ве проблеме бь аликʹарийа рʹӧһʹе пироз шеԝьра хԝә кьр. Һәгәр әв проблем сафи нәбуйа, әв йәк ԝе бәлакьрьна мьзгинерʹа бьбуйа астәнг. Шанди у меред әʹмьрда мәзьн Щьһу бун, ле әԝана дь бьн һʹӧкӧме әʹдәтед Щьһуйада йан дь бьн һʹӧкӧме кәсед кӧ пьштгьрийа ван әʹдәта дькьр, нәман. Ԝана рʹебәрийа Хәбәра Хԝәде у рʹӧһʹе пироз дьгәрʹийан (Кʹар. Шанд. 15:1, 2, 5-20, 28). Ахьрийеда, Йаһоԝа сафикьрьна ԝан кʹәрәм кьр, әʹдьлайи у йәкти хьраб нәбу у ише бәлакьрьна мьзгине пешда чу (Кʹар. Шанд. 15:30, 31; 16:4, 5).

12. Чь нишан дькә кӧ тʹәшкиләта Йаһоԝа бь тʹәрбәт ә?

¹² Ль рʹожед мә. Тʹәшкиләта Йаһоԝа һәр тьшти дькә кӧ нава хьзмәткʹаред Йаһоԝада әʹдьлайе у тʹәрбәтийе хԝәй бькә. Дь сала 1895-да, ль журнала «Бьрща Ԛәрәԝьлийеда» йа 15 Мьждаре, готарәкә бь наве «Бь Тʹәрбәти у Маԛули» дәркʹәтьбу. Ве готареда, йа кӧ ль гора 1 Корьнтʹи 14:40 һатьбу һазьр кьрьн, ӧса гот: «Шандийа гәләк щара щьватерʹа дәрһәԛа тʹәрбәтийе дьньвисин . . . Гәрәке әм бир нәкьн кӧ ‹чь кӧ пешда һатә ньвисаре, бона һинбуна мә һатә ньвисаре›» (Рʹом. 15:4). Бәле, мина шагьртед Иса йед кӧ ль ԛьрʹна йәке дьжитьн, тʹәшкиләта Йаһоԝа йа иройин жи дьхԝазә бь тʹәрбәт у маԛул бә. Мәсәлә, һәгәр тӧ бона Һинбуна «Бьрща Ԛәрәԝьлийе» бьчуйайи щьватәкә дьн, бәлки жи ль ԝәлатәки дьн, ль ԝе дәре, тәйе хԝә рʹьһʹәт тʹәхмин бькьра, чьмки тәйе бь зәлали бьзаньбуйа кӧ щьвин ԝе чаԝа дәрбаз бьбә у кʹижан готар ԝе бе леколин кьрьн. Тʹәне рʹӧһʹе Хԝәде дькарә йәктикә ӧса нава тʹәшкиләтеда хԝәй бькә (Сефн. 3:9).

13. Аԛуб 3:17 дина мә дькʹьшинә сәр чь, у ԝе баш бә кӧ әм жь хԝә чь бьпьрсьн?

¹³ Тӧ дькари чь бьки? Йаһоԝа дьхԝазә кӧ хьзмәткʹаред ԝи «йәктийа рʹӧһʹ пе һәвгьредана әʹдьлайийе хԝәй кьн» (Әфәс. 4:1-3). Ләма, жь хԝә бьпьрсә: «Гәло әз әʹдьлайийе у йәктийа щьвате хԝәй дькьм? Гәло әз гӧһ дьдьм бьред щабдар? Гәло әз йәки бь итʹбар ьм, илаһи  һәгәр дь щьватеда щабдарийед мьн һәнә? Гәло әз һәр тьшти ԝәхтда дькьм у һазьр ьм кӧ хьзмәт бькьм?» (Аԛуб 3:17 бьхунә). Һәгәр тӧ тедәрхи кӧ гәрәке тӧ дь һьнә алийада хԝә рʹаст бьки, дӧа бькә ԝәки Йаһоԝа рʹӧһʹе пироз бьдә тә. Чьԛас тӧ изне бьди кӧ рʹӧһʹе пироз ль сәр хәйсәт у кьред тә һʹӧкӧм бькә, һаԛас хушк у бьра ԝе һе зедә тә ԛимәт кьн у һʹьз бькьн.

14. Ль гора Колоси 1:9, 10, Йаһоԝа ль ԛьрʹна йәке хьзмәткʹаред хԝә чаԝа һин дькьрьн?

¹⁴ Ль ԛьрʹна йәке. Йаһоԝа хьзмәткʹаред хԝә жь дьл һин дькә (Зәб. 32:8). Хԝәде дьхԝазә кӧ әԝана ԝи нас бькьн у ԝи һʹьз бькьн. Әԝ ԝана ԝәк зарʹед хԝә һʹәсаб дькә у дьхԝазә кӧ әԝана һʹәта-һʹәтайе бьжин. Әв йәк бе ширәт у рʹебәрийа ԝи набә (Йуһʹн. 17:3). Ль ԛьрʹна йәке, Йаһоԝа хьзмәткʹаред хԝә бь сайа щьвате һин дькьрьн (Колоси 1:9, 10 бьхунә). Чаԝа кӧ Иса Мәсиһ соз дабу, «Пьштован», демәк рʹӧһʹе пироз, пʹьрʹ али ԝан дькьр (Йуһʹн. 14:16). Рʹӧһʹе пироз али шагьрта дькьр кӧ әԝ Хәбәра Хԝәде фәʹм бькьн у гәләк тьштед кӧ Иса Мәсиһ готьбун у кьрьбун, дьанин бира ԝан. Әв готьн у кьрьнед Иса Мәсиһ паше ль Мьзгинида һатьн ньвисандьн. Ве занәбуне баԝәрийа ԝан ԛәԝи дькьр у али ԝан дькьр кӧ әԝана Хԝәде, Иса Мәсиһ у һәвду һе зедә һʹьз бькьн.

15. Йаһоԝа созе хԝә, йа кӧ Ишайа 2:2, 3-да ньвисар ә, чаԝа тинә сери?

¹⁵ Ль рʹожед мә. Йаһоԝа бәреда готьбу кӧ «дь рʹожед даԝинда», инсане жь һʹәму мьләта ԝе һьлкʹьшьн «чʹийайе» ԝи, ԝәки жь ԝи һинкьрьне бьстиньн (Ишайа 2:2, 3 бьхунә). Әв пʹехәмбәрти ньһа те сери. Һʹәбандьна рʹаст дь сәр һʹәму баԝәрийед ԛәлпрʹа һатийә бьльнд кьрьн. Йаһоԝа бь рʹасти жи занәбуна рʹӧһʹани бь мәрʹдани дьдә мә! (Иша. 25:6) Йаһоԝа  бь сайа «хӧламе амьн у сәрԝахт» тʹер у тʹьжә хԝарьна рʹӧһʹани дьдә мә, мәсәлә готар, видео у гәләк әʹдәбйәтед дьн (Мәт. 24:45). Әм жи мина Әлиһу тʹәхмин дькьн, йе кӧ дәрһәԛа Йаһоԝа ӧса готьбу: «Ма йе кӧ мина [Хԝәде] дьдә һин кьрьн кʹи йә?» (Иб. 36:22)

16. Тӧ чаԝа дькари жь алийе рʹӧһʹанива пешда һәрʹи?

¹⁶ Тӧ дькари чь бьки? Рʹӧһʹе Хԝәде ԝе али тә бькә ԝәки тӧ тьштед кӧ дь Кʹьтеба Пирозда дьхуни у леколин дьки, жийана хԝәда пек бини. Мина зәбурбеж дӧа бькә: «Хӧдан рʹийа Хԝә мьн һин кә, кӧ әз рʹастийа Тәда һәрʹьм, бькә кӧ дьле мьн жь наве Тә хоф бькә» (Зәб. 86:11). Хԝарьна рʹӧһʹани, йа кӧ Йаһоԝа бь сайа Кʹьтеба Пироз у тʹәшкиләта хԝә дьдә мә, тʹьме бьстинә. Нета тә һьлбәт нә тʹәне әв ә кӧ тӧ занәбуна хԝә зедә бьки, ле әв ә кӧ тӧ рʹастийе теки дьле хԝә у хԝәрʹа бьки рʹебәр. Рʹӧһʹе Йаһоԝа дькарә али тә бькә кӧ тӧ ве йәке бьки. Ӧса жи, һелане бьдә хушк у бьра (Ибрн. 10:24, 25). Әв йәк чьрʹа фәрз ә? Чьмки әԝана малбәта тәйә рʹӧһʹани нә. Ләма, дӧа бькә кӧ рʹӧһʹе Хԝәде али тә бькә ԝәки тӧ бькарьби ль щьвина щабед жь дьл бьди у щабдарийед хԝә бь аԝайәки баш пек бини. Бь ви щурʹәйи, тӧ дькари нишани Йаһоԝа у Иса Мәсиһ бьки кӧ тӧ «бәрхед» ԝанә ԛимәт, һʹьз дьки (Йуһʹн. 21:15-17).

17. Тӧ чаԝа дькари пьштгьрийа тʹәшкиләта Йаһоԝа бьки?

¹⁷ Дь дәмәкә незикда, тʹәне тʹәшкиләта кӧ дь бьн рʹебәрийа рʹӧһʹе Хԝәдеда йә ԝе ль сәр дьнйайе бьминә. Ләма, бь дьл у щан тʹәви тʹәшкиләта Йаһоԝа һәвкʹарийе бькә. Бир нәкә кӧ Хԝәде йәки бетʹәрәф ә, ләма фьрԛийе нәкә нава мәрьва, ле мьзгине бьдә һәр кәси. Мина Йаһоԝа тʹәрбәт бә у щьватеда йәктийе хԝәй бькә. Жь хԝарьна рʹӧһʹани, йе кӧ Мамостәйе Мәзьн һазьр дькә, кʹаре бьстинә. Гава дьнйа Мире-щьна бе ԛьрʹ кьрьн, әв йәк ԝе али тә бькә кӧ тӧ нәтьрси, ле бь мерхаси у амьни тʹәви тʹәшкиләта Йаһоԝа хьзмәт бьки.