1. Ль гора 2 Корьнтʹи 3:1-3, дәрбазкьрьна һинбунед Кʹьтеба Пироз йед кӧ бәрбь ньхӧмандьне дьчьн, чьма ԛәдьрәки мәзьн ә? (Бьньһерʹә шькле рʹуйе журнале.)

ГАВА хԝәндәкʹарәки Кʹьтеба Пироз те ньхӧмандьне, һәмьки дьле тә ша дьбә (Мәт. 28:19). Һәгәр дәрсдаре ԝи тӧ йи, дьлшадийа тә бешьк һе зедә йә! (1 Тʹеслн. 2:19, 20) Шагьртед ну ԝәк «шәʹдәнәʹма» нә – нә тʹәне бона дәрсдаред хԝә, ле бона тʹәмамийа щьвате (2 Корьнтʹи 3:1-3 бьхунә).

2. (а) Гәрәке әм дина хԝә бьдьн кʹижан пьрса фәрз, у чьма? (б) Һинбуна Кʹьтеба Пироз чь йә? (Бьньһерʹә спартьн.)

² Чар салед пашԝәхтийе, ль тʹәмамийа дьнйайе һәр мәһ ԝәкә 10 милйон һинбунед Кʹьтеба Пироз * һатьн дәрбаз кьрьн. Ль ван сала, һәр сал зедәтьри 280 һʹәзар мәрьв һатьн ньхӧмандьн у бун шагьртед Иса Мәсиһ. Гәло әм чаԝа дькарьн али һе зедә кәса бькьн, кӧ әԝана жи пешда һәрʹьн у бенә ньхӧмандьне? Һʹәта кӧ Йаһоԝа бь сәбьр һивийе дьсәкьнә кӧ мәрьв бьбьн шагьртед Иса Мәсиһ, бьра әм бь дьл у щан али ԝан бькьн кӧ әԝ бәрбь ньхӧмандьне һәрʹьн. Бәле, ԝәхт һьндьк майә! (1 Корн. 7:29а; 1 Пәт. 4:7)

3. Ве готареда, әме чь бьвиньн?

 ³ Гәләк фәрз ә кӧ әм мәрьва бькьн шагьртед Иса, ләма жи Кʹома Рʹебәрийе чәнд филиала пьрси кӧ әм чаԝа дькарьн али хԝәндәкʹара бькьн ԝәки әԝана бәрбь ньхӧмандьне һәрʹьн. Ве готареда у готара дьнда, әме бьвиньн кӧ һьнә мисйонер, бәрпьрсийаред мьһале у пешәнгед щерʹьбанди ль сәр ве йәке чь дьбежьн * (Мәтʹлк. 11:14; 15:22). Әԝана шьровәдькьн кӧ дәрсдаред Кʹьтеба Пироз у хԝәндәкʹаред ԝан дькарьн чь бькьн сәва кӧ һинбуна Кʹьтеба Пироз һе пешдачуйи бә. Ве готареда, әме пенщ тьшта бьвиньн, йед кӧ гәрәке һәр хԝәндәкʹар бькә, ԝәки әԝ бәрбь ньхӧмандьне һәрʹә.

4. Гәло һинбунед ль бәр дәри бәс ьн кӧ мәрьв пешда һәрʹьн?

⁴ Гәләк хушк у бьред мә һинбунед Кʹьтеба Пироз бәр дәри тʹәви мәрьва дәрбаз дькьн. Дәстпекеда әв метод чьԛас баш бә жи, һʹәчʹи зәʹф хәбәрданед ӧса кьн ьн у һинбун жи һәр һʹәфтә дәрбаз набьн. Сәва кӧ һʹәԝаса мәрьва һе зедә пешда биньн, һьнә мьзгинван һәжмара тʹела мәрьва дьхԝазьн, ԝәки әԝана бькарьбьн пешийа сәрледана дьн һьнә фькред жь Кʹьтеба Пироз бь тʹеле йан бь смсәке ԝанрʹа бьшиньн. Хәбәрданед ӧса щарьна бь гәләк мәһа бәрдәԝам дьбьн, ле һинбун пешда начә. Һәгәр хԝәндәкʹар Кʹьтеба Пироз тʹәне һаԛас леколин бькә, гәло әԝе бькарьбә пешда һәрʹә у рʹожәке бе ньхӧмандьне?

5. Ль гора Луԛа 14:27-33, Иса Мәсиһ бәʹса чь кьр, у готьнед ԝи чаԝа һинбунед Кʹьтеба Пирозва гьредайи нә?

⁵ Щарәке, Иса Мәсиһ готьбу кӧ һәгәр кәсәк дьхԝазә бьрщәке ава бькә, гәрәке әԝ пешийе хәрще хԝә һʹәсаб бькә у бьфькьрә ԛәԝата ԝи ԝе бьгьһиже әве йәке бинә сери йан на. Ӧса жи, Иса гот кӧ пешийа кӧ пʹадша дьчә кӧ шәрʹ бькә, гәрәке әԝ рʹуне у бьфькьрә кʹа әскәред ԝи ԝе бькарьбьн сәркʹәвьн йан на (Луԛа 14:27-33 бьхунә). Мина ве, Иса Мәсиһ заньбу кӧ һәгәр кәсәк дьхԝазә бьбә шагьрте ԝи, гәрәке әԝ рʹьнд фәʹм бькә кӧ чь те һʹәсабе бьбьн шагьртед ԝи. Ләма, ԝе баш бә кӧ әм хԝәндәкʹаред хԝә һелан бькьн кӧ әԝ һинбуна Кʹьтеба Пироз һәр һʹәфтийе дәрбаз бьн. Гәло әм чаԝа дькарьн әве йәке бькьн?

6. Бона кӧ һинбунед мә пешда һәрʹьн, әм дькарьн чь бькьн?

 ⁶ Дь сәрида, хәбәрданед ль бәр дәри һәвәки дьреж бькә. Бәлки тӧ дькари дь һәр хәбәрданеда нә тʹәне ль сәр рʹезәке, ле ль сәр дӧ рʹеза хәбәр ди. Һәгәр хԝәйе малерʹа һʹәԝас бә дәрһәԛа ве йәке хәбәр дә, жь ԝи бьпьрсә кʹа һун дькарьн ль щики рʹунен у хәбәрдане бәрдәԝам бькьн. Щаба хԝәйе мале ԝе али тә бькә, ԝәки тедәрхи кӧ хԝәстьна ԝи чьԛас мәзьн ә кӧ Кʹьтеба Пироз һин бә. Паше, сәва кӧ әԝ һе зедә пешда һәрʹә, тӧ дькари жь ԝи бьпьрси кʹа әԝ дьхԝазә һинбуна Кʹьтеба Пироз һʹәфтә дӧ щара дәрбаз бә. Диса гәрәке әм чь бькьн кӧ хԝәндәкʹаред мә пешда һәрʹьн?

7. Дәрсдар чаԝа дькарә бона һинбуна Кʹьтеба Пироз хԝә рʹьнд һазьр бькә?

⁷ Лазьм ә кӧ дәрсдар бона һәр дәрсе хԝә рʹьнд һазьр бькә. Дәрсе бьхунә у рʹеза вәкә. Рʹьнд фәʹм бькә кӧ фькьред сәрәкә чь нә. Наве сәри, бьнсәри, пьрс у рʹезед кӧ гәрәке бен хԝәндьн, бьньһерʹә. Бьфькьрә кӧ шькьл у видео чаԝа дькарьн дәрсе зәлал бькьн. Паше, бинә бәр чʹәʹве хԝә кӧ тӧ чаԝа дькари әве информасийе бь щурʹәки һеса хԝәндәкʹаре хԝәрʹа шьровәки, кӧ әԝ бькарьбә информасийайе рʹьнд фәʹм бькә у жийана хԝәда бьхәбьтинә (Нәһәм. 8:8; Мәтʹлк. 15:28а).

8. Ль гора Колоси 1:9, 10, гәрәке әм чь бькьн?

⁸ Гава тӧ хԝә һазьр дьки, дәрһәԛа хԝәндәкʹар у һʹәԝщәдарийед ԝи дӧа бькә. Аликʹарийе жь Йаһоԝа бьхԝазә кӧ тӧ бькарьби Кʹьтеба Пироз бь аԝайәки баш һин бьки у бьгьһини дьле хԝәндәкʹар (Колоси 1:9, 10 бьхунә). Пешда бьфькьрә кӧ ԝе бәлки бона ԝи чь зор бә кӧ фәʹм бькә йан ԛәбул бькә. Бир нәкә кӧ тӧ дьхԝази али ԝи бьки кӧ әԝ бәрбь ньхӧмандьне һәрʹә.

9. Дәрсдар чаԝа дькарә али хԝәндәкʹар бькә кӧ әԝ бона һинбуне хԝә һазьр бькә?

⁹ Һевийа мә әв ә кӧ хԝәндәкʹар ԛимәте бьдә кьрьнед Йаһоԝа у Иса Мәсиһ у бьхԝазә һе зедә әʹламәти бьстинә (Мәт. 5:3, 6). Сәва кӧ хԝәндәкʹар жь һинбуне кʹаре бьстинә, гәрәке әԝ дина хԝә бьдә тьштед кӧ әԝ һин дьбә. Ләма, ԝи һин бькә кӧ чьԛас фәрз ә ԝәки әԝ бона һинбуне хԝә һазьр бькә. Бона ве йәке, ԝе баш бә кӧ әԝ дәрсе пешда хԝәрʹа  бьхунә у бьфькьрә кӧ әв информасийа бона ԝи чьма керһати йә. Ԝи щурʹәйи, тӧ чаԝа дькари али ԝи бьки? Мәсәлә, тʹәвайи бона дәрсәке хԝә һазьр бькьн. * Нишан бькә кӧ әԝ чаԝа дькарә щабед пьрса бьвинә у хәбәр йан щӧмлед сәрәкә кʹьфш бькә. Паше, али ԝи бькә кӧ әԝ һин бә щаба бь готьнед хԝә бинә зьмен. Бь ԝи аԝайи, тӧйе бьвини кʹа әԝи дәрс фәʹм кьр йан на. Ӧса жи, ԝе баш бә кӧ хԝәндәкʹар чь бькә?

10. Чьма фәрз ә кӧ хԝәндәкʹар Кʹьтеба Пироз һәр рʹож бьхунә, у әԝ чаԝа дькарә жь хԝәндьна Кʹьтеба Пироз кʹаре бьстинә?

¹⁰ Хенщи дәрбазкьрьна һинбуне тʹәви дәрсдар, ԝе баш бә кӧ хԝәндәкʹар хԝәха һьнә тьшта бькә. Мәсәлә, ԝе баш бә кӧ әԝ һәр рʹож гӧһ бьдә Йаһоԝа у ԝирʹа хәбәр дә. Гәло әԝ чаԝа дькарә дәнге Йаһоԝа бьбьһе у гӧһ бьдә ԝи? Бона ве йәке, гәрәке әԝ Кʹitеба Пироз һәр рʹож бьхунә (Йешу 1:8; Зәб. 1:1-3). Нишани ԝи бькә кӧ әԝ чаԝа дькарә бона хԝәндьна Кʹьтеба Пироз бәрнамәкә баш чекә. Сәва кӧ әԝ жь хԝәндьна Кʹьтеба Пироз кʹаре бьстинә, ԝи һелан бькә кӧ әԝ ль сәр готьнед Кʹьтеба Пироз йед дәрһәԛа Йаһоԝа кʹур бьфькьрә у тедәрхә кӧ әԝ чаԝа дькарә готьнед Кʹьтеба Пироз дь жийана хԝәда пек бинә (Кʹар. Шанд. 17:11; Аԛуб 1:25).

11. Хԝәндәкʹар чаԝа дькарә һин бьбә кӧ чаԝа дӧа бькә, у чьма фәрз ә кӧ әԝ тʹьме дӧа бькә?

¹¹ Ӧса жи, хԝәндәкʹаре хԝә һелан бькә кӧ әԝ һәр рʹож дӧа бькә у бь ви аԝайи тʹәви Йаһоԝа хәбәр дә. Дәстпекеда у хьлазийа һәр дәрседа жь дьл дӧа бькә, у дӧада бәʹса хԝәндәкʹаре хԝә бькә. Гава әԝ дӧайед тә дьбьһе, әԝе һин бьбә кӧ әԝ чаԝа дькарә бь наве Иса Мәсиһ дӧа бькә у дьле хԝә Йаһоԝарʹа вәкә (Мәт. 6:9; Йуһʹн. 15:16). Бәле, һәгәр хԝәндәкʹар Кʹьтеба Пироз һәр рʹож бьхунә (демәк гӧһ бьдә Йаһоԝа) у дӧа бькә (демәк Йаһоԝарʹа хәбәр дә), әԝе һәр кӧ дьчә һе незики Хԝәде бьбә (Аԛуб 4:8). Бь ви аԝайи, әԝе һеди-һеди бәрбь сонда тʹәсмилбуйине у ньхӧмандьне һә-рʹә. Диса гәрәке әԝ чь бькә?

12. Дәрсдар чаԝа дькарә али хԝәндәкʹар бькә кӧ әԝ бьбә досте Йаһоԝа?

¹² Әм һьлбәт дьхԝазьн кӧ хԝәндәкʹаре мә дәрһәԛа Йаһоԝа һин бьбә. Ӧса жи,  әм дьхԝазьн кӧ һинбуна Кʹьтеба Пироз дьле ԝи бьгьрә, сәва кӧ әԝ тьштед кӧ һин дьбә дь жийана хԝәда бьхәбьтинә. Готьнед Иса Мәсиһ нә тʹәне ль сәр һʹьше мәрьва, ле ль сәр дьле ԝан жи һʹӧкӧм дькьр (Луԛа 24:15, 27, 32). Пʹьрʹ фәрз ә кӧ хԝәндәкʹар Йаһоԝа ԝәк Кәсәки реали у ԝәк Бав, Хԝәде у Досте хԝә һʹәсаб кә (Зәб. 25:4, 5). Ль дәма һинбуна Кʹьтеба Пироз дина хԝәндәкʹар бькʹьшинә сәр хәйсәт-һʹӧнӧред Хԝәде (Дәркʹ. 34:5, 6; 1 Пәт. 5:6, 7). Тʹема дәрсе чь бә жи, нишани хԝәндәкʹар бькә кӧ Йаһоԝа йәки чаԝа йә. Али ԝи бькә кӧ әԝ һʹьзкьрьн, дьловани у дьлрʹәʹмийа Йаһоԝа бьвинә. Иса Мәсиһ готьбу кӧ «тʹәмийа пешьн у һәрә мәзьн» әв ә кӧ мәрьв «Хӧдан Хԝәдейе хԝә һʹьз бькә» (Мәт. 22:37, 38). Хирәт бькә кӧ һʹьзкьрьна Хԝәде дь дьле хԝәндәкʹарда мәзьн бьбә.

13. Тӧ чаԝа дькари али хԝәндәкʹар бьки кӧ әԝ хәйсәт-һʹӧнӧред Йаһоԝа нас бькә?

¹³ Хԝәндәкʹаре хԝәрʹа зәлал шьровәкә кӧ тӧ чьма Йаһоԝа һʹьз дьки. Бь ви аԝайи, әԝе фәʹм бькә кӧ гәрәке әԝ жи бьбә досте Йаһоԝа у ԝи һʹьз бькә (Зәб. 73:28). Мәсәлә, һәгәр дь әʹдәбйәта леколинеда йан дь рʹезәкеда щӧмләкә хԝәш дәрһәԛа һʹьзкьрьн, билани, һәԛи йан ԛәԝата Йаһоԝа һәбә, дина хԝәндәкʹар бькʹьшинә сәр ве щӧмләйе. Бьра әԝ бьзаньбә ԝәки мәʹник кӧ тӧ чьма Йаһоԝа һʹьз дьки, әв һʹӧнӧред ԝи нә. Ле сәва кӧ хԝәндәкʹар бәрбь ньхӧмандьне пешда һәрʹә, гәрәке әԝ тьштәки дьн жи бькә.

14. Ль гора Ибрани 10:24, 25, щьвин бона пешдачуйина хԝәндәкʹар чьма фәрз ьн?

¹⁴ Әм гьшк дьхԝазьн кӧ хԝәндәкʹаред мә пешда һәрʹьн у рʹожәке бенә ньхӧмандьне. Чь дькарә али ԝан бькә кӧ әԝ бьгьһижьн ве нете? Мәсәлә, пʹьрʹ фәрз ә кӧ әм ԝан һелан бькьн ԝәки әԝ бен щьвина. Дәрсдаред щерʹьбанди дьбежьн кӧ хԝәндәкʹаред кӧ жь дәстпекева тен щьвина алийе рʹӧһʹанива зу пешда дьчьн (Зәб. 111:1). Һьнә дәрсдар хԝәндәкʹаред хԝәрʹа дьбежьн кӧ бона һинбуна Кʹьтеба Пироз, һинкьрьна кӧ щьватада те дайин мина һинбуна шәхси фәрз ә. Ибрани 10:24, 25 тʹәви хԝәндәкʹар бьхунә у ԝирʹа шьровәкә кӧ чь кʹаре әԝ дькарә жь щьвата бьстинә. Видеойа «Чь Дьԛәԝьмә Ода Щьватеда?» *  нишани ԝи кә. Али хԝәндәкʹар бькә кӧ әԝ фәʹм кә щьвин чьԛас фәрз ьн у али ԝи бькә кӧ әԝ бе һʹәму щьвина.

15. Әм чаԝа дькарьн хԝәндәкʹаред хԝә һелан бькьн кӧ әԝ һәртʹьм бен щьвина?

¹⁵ Һәгәр хԝәндәкʹаре тә һе нәһатийә щьвинәке йан һәгәр әԝ һәр һʹәфтийе найе щьвина, тӧ чаԝа дькари али ԝи бьки? Нә бәс ә кӧ тӧ ԝи тʹәне тʹәглиф бьки. Бона кӧ тӧ хԝәстьна ԝи зедә бьки, бь хирәт бәʹса тьштәки хԝәш бькә, йа кӧ тӧ ль щьвинәке һин буйи. «Бьрща Ԛәрәԝьлийе» у «Бәрнама Щьвине: Бьжин у Хьзмәт кьн» бьдә ԝи, йед кӧ ве һʹәфтийе ԝе дь щьвинада бен леколин кьрьн. Нишани ԝи бькә кӧ ль щьвина дьн чь ԝе бе шеԝьркьрьне, у ԝи бьпьрсә кʹа кʹижан тʹема ле хԝәш те. Тьштед кӧ хԝәндәкʹаре тә ԝе ль щьвина бьвинә у бьбьһе, ԝе жь һʹәму тьштед кӧ әԝи ль щьвинед баԝәрийед дьн дитьнә йан бьһистьнә, хԝәштьр бьн (1 Корн. 14:24, 25). Бь сәрда, әԝе кәсед дьн нас бькә, йед кӧ дькарьн ԝирʹа бьбьн мәсәлед баш у али ԝи бькьн кӧ әԝ бәрбь ньхӧмандьне һәрʹә.

16. Бона кӧ хԝәндәкʹаред Кʹьтеба Пироз бәрбь ньхӧмандьне һәрʹьн, гәрәке дәрсдар чь бькә, у готара дьнда, әме дәрһәԛа чь хәбәр дьн?

¹⁶ Бона кӧ хԝәндәкʹаред мә бәрбь ньхӧмандьне һәрʹьн, гәрәке әм чь бькьн? Гәрәке әм али һәр хԝәндәкʹари бькьн ԝәки әԝ фәʹм бькьн, кӧ һинбуна Кʹьтеба Пироз чьԛас фәрз ә. Ләма ԝе баш бә кӧ әм ԝана һелан бькьн кӧ әԝ һинбуне һәр һʹәфтийе дәрбаз бьн у бона һәр дәрсәке хԝә һазьр бькьн. Ӧса жи, гәрәке әм ԝана һелан бькьн кӧ әԝ һәр рʹож гӧһ бьдьн Йаһоԝа у ԝирʹа хәбәр дьн. Бь ви аԝайи, әԝе бьбьн достед ԝи. Хенщи ве йәке, гәрәке әм хԝәндәкʹара һелан бькьн, кӧ әԝана бен щьвина (Чаргошә бь наве « Хԝәндәкʹар Гәрәке Чь Бькә?» бьньһерʹә). Готара дьнда, әме ль сәр пенщ тьштед дьн хәбәр дьн, йед кӧ дәрсдар дькарә бькә кӧ хԝәндәкʹаред хԝә бәрбь ньхӧмандьне бьвә.