1. Гәләк кәс чь дьпьрсьн?

БЬ ҺʹӘЗАРА дин у баԝәри һәнә, йед кӧ дьбежьн ԝәки һʹәбандьна ԝан, йа рʹаст ә. Ләма жи, гәләк кәс ӧса дьпьрсьн: «Гәло дине рʹаст тʹәне йәк ә, йан жи гәло Хԝәде жь һʹәму дин у баԝәрийа рʹази йә?» Гәло әм баԝәр ьн ԝәки әм сәр рʹийа рʹастийе нә у Йаһоԝа һʹәбандьна Шәʹдед Йаһоԝа ԛәбул дькә? Гәло әʹсәйи йә әм ве йәкеда баԝәр бьн? Ԝәрен әм щабед ван пьрса бьньһерʹьн.

2. Ль гора 1 Тʹесалоники 1:5, Паԝлосе шанди чьма баԝәр бу кӧ баԝәрийа ԝи рʹаст ә?

² Паԝлосе шанди баԝәр бу ԝәки әԝ сәр рʹийа рʹастийе йә (1 Тʹесалоники 1:5 бьхунә). Баԝәрийа ԝи нә кӧ сәр һʹиме емосийа бу, ле сәр һʹиме избаткьрьна бу. Паԝлос Хәбәра Хԝәде һур у кʹур леколин дькьр, у баԝәр дькьр кӧ «тʹәмамийа ньвисаре жь бина бәр Хԝәде йә» (2 Тимотʹейо 3:16). Гәло Паԝлосе шанди, жь леколина Ньвисаред Пироз чь һин бу? Мәсәлә, әԝи избатед әшкәрә дитьн ԝәки Иса бь рʹасти жи Мәсиһе создайи бу. Сәроке дине Щьһуйа чʹәʹвед хԝә сәр ван избатийа дьгьртьн. Ԝана хԝә ча бьжартийед Хԝәде һʹәсаб дькьр, ле бь кьред хԝә Хԝәде инкʹар дькьр (Тито 1:16). Паԝлос мина ԝан нибу. Әԝи нә тʹәне һьнә тьшт жь Хәбәра Хԝәде, ле «тʹәмамийа ԛьрара Хԝәде» һин дькьр у пек дьани (Кʹаред Шандийа 20:27).

3. Сәва кӧ әм баԝәрийа хԝә рʹастийе биньн, гәло лазьм ә ԝәки әм щабед һʹәму пьрсед хԝә бьстиньн? (Чаргошә « Кʹар у Фькред Йаһоԝа ‹Беһʹәсаб ьн›» бьньһерʹә.)

³ Һьнә кәс дьфькьрьн, ԝәки дине рʹаст гәрәке щаба һәр пьрсе бьдә – һʹәта пьрсед ӧса жи, кӧ Кʹьтеба Пироз рʹастә-рʹаст щаб надә. Гәло әв фькьр рʹаст ә? Һәла дина хԝә бьдьнә мәсәла Паԝлос. Әԝи кәсед баԝәрмәнд  һелан дькьр, ԝәки «һәр тьшти бьщерʹьбиньн», ле диса жи әԝи ԛәбул дькьр ԝәки әԝ гәләк тьшта фәʹм накә (1 Тʹесалоники 5:21). Паԝлосе шанди ӧса ньвиси: «Әм жь пʹьрʹи-һьндьки заньн . . . Ньһа әм чаԝа ԛәрәтʹуки нәйнькеда дьбиньн» (1 Корьнтʹи 13:9, 12). Паԝлос һәр тьшт фәʹм нәдькьр, у әм жи һәр тьшти фәʹм накьн. Ле Паԝлос хԝәстьн у нета Йаһоԝайә сәрәкә фәʹм дькьр, ләма жи баԝәр бу кӧ әԝ сәр рʹийа рʹастийе йә.

4. Әм чаԝа дькарьн дьһа баԝәр бьн, ԝәки әм сәр рʹийа рʹастийе нә, у ве готареда әме дина хԝә бьдьнә чь?

⁴ Сәва кӧ әм баԝәр бьн ԝәки әм сәр рʹийа рʹастийе нә, ԝе баш бә әм леколин бькьн һәла Иса Мәсиһ чаԝа Хԝәде дьһʹәбанд, у ве йәке бәрамбәри һʹәбандьна Шәʹдед Йаһоԝа бькьн. Ве готареда әме бьвиньн, ԝәки Мәсиһийед рʹаст (1) хԝә жь пʹутпʹарьстийе дур дьгьрьн, (2) ԛәдре наве Хԝәде дьгьрьн, (3) рʹастийе һʹьз дькьн у (4) жь дьл һәвдӧ һʹьз дькьн.

5. Иса чаԝа Хԝәде дьһʹәбанд, у әм чаԝа дькарьн чʹәʹв бьдьнә ԝи?

⁵ Иса гәләк Хԝәде һʹьз дькьр. Әԝи тʹәне Йаһоԝа дьһʹәбанд, һьм чахе әԝ сәр әʹзмана бу һьм жи чахе сәр әʹрде бу (Луԛа 4:8). Иса Мәсиһ шагьртед хԝәрʹа гот ԝәки әԝана жи ӧса бькьн. Иса у шагьртед ԝийә амьн тʹӧ щар пе пʹута у шькла, Хԝәде нәдьһʹәбандьн. Хԝәде Рʹӧһʹ ә, ләма жи тʹӧ кәс нькарә тьштәки дьлԛе ԝида чекә (Ишайа 46:5). Ле гәло изьн һәйә ԝәки әм шьклед мәрьва, йед кӧ ча кәсед пироз һʹәсаб дькьн, чекьн у ԝанрʹа дӧа бькьн? Ԛануна дӧдада жь Дәһ Тʹәмийа, Йаһоԝа ӧса готьбу: «Тʹӧ  пʹути мина дьлԛе тьштәкида хԝәрʹа ченәки, нә жор ль әʹзмен, нә жер ль сәр әʹрде . . . Бәр тʹӧ пʹути та нәби у хӧламтийа ԝан нәки» (Дәркʹәтьн 20:4, 5). Кәсед кӧ дьхԝазьн дьле Хԝәде ша кьн, ван готьна рʹьнд фәʹм дькьн.

6. Шәʹдед Йаһоԝа ча Хԝәде дьһʹәбиньн?

⁶ Ль гора леколинед тʹәрихзана, Мәсиһийед пешьн тʹәне Хԝәде дьһʹәбандьн. Мәсәлә кʹьтебәк дьбежә, һәгәр щийед һʹәбандьнеда пʹут һәбуна, әв йәк ԝе Мәсиһийед ԛьрʹна йәке «гәләк әʹщьз бькьра» («History of the Christian Church»). Иро, Шәʹдед Йаһоԝа мина Мәсиһийед пешьн тʹәне Йаһоԝа дьһʹәбиньн. Әм шьклед мәрьвед «пирозрʹа» йан мәләкарʹа дӧа накьн. Әм һәла һе Иса Мәсиһрʹа жи дӧа накьн. Ӧса жи, әм сәре хԝә бәр симболед дәԝләте данайньн. Һәгәр мәрьв зоре мә бькьн жи, әме диса жи гӧһ бьдьн ван готьнед Иса Мәсиһ: «Сәре хԝә ль бәр Хӧдан [Йаһоԝа, ДТʹ] Хԝәдейе хԝә дайнә» (Мәтта 4:10).

7. Шәʹдед Йаһоԝа ча жь религийед дьн щӧдә дьбьн?

⁷ Гәләк мәрьв пәй сәрԝеред религийа у кʹәшишед нав-дәнг дьчьн. Әԝана һаԛас ԝанарʹа фьрнаԛ дьбьн, ԛәй те бежи сәре хԝә бәр ԝан датиньн. Әԝ дьчьн деред ԝан, кʹьтебед ԝан дькʹьрʹьн у пе ԛӧрбанкьрьнед ԛальм пьштгьрийа ԝан дькьн. Готьнед ԝан бона мәрьва ԛанун ә. Мәрьв ӧса ԝан сәрԝеред религийарʹа ша дьбьн у ԝанрʹа дьрʹьщьфьн, те бежи Иса бәр ԝан сәкьнийә! Ле Шәʹдед Йаһоԝа ӧса накьн. Сәрок у кʹәшишед мә тʹӧнә нә. Әм чьԛас жи ԛәдре бьред щабдар дьгьрьн, әм ван готьнед Иса ԛәбул дькьн: «Һун һʹәму жи бьра нә» (Мәтта 23:8-10). Әм сәре хԝә бәр сәрԝеред религийайе у бәр сәрԝеред политике данайньн. Әм, Шәʹдед Йаһоԝа, пьштгьрийа нетед ԝан накьн. Әм тʹәвнәбуйине хԝәй дькьн у тʹәви шьхӧле ве дьнйайе набьн. Бь ԝи щурʹәйи, Шәʹдед Йаһоԝа бь рʹасти жи жь религийед, кӧ хԝә ча Мәсиһи нав дькьн, щӧдә дьбьн (Йуһʹәнна 18:36).

8. Әм жь кʹӧ заньн ԝәки Йаһоԝа дьхԝазә кӧ наве ԝи бе рʹумәткьрьне у һʹәмушкарʹа бьбә нас?

⁸ Щарәке, Иса ӧса дӧа кьр: «Баво, наве хԝә бьльнд кә». Йаһоԝа жь әʹзмана щаб да у гот ԝәки әԝе наве хԝә бьльнд у рʹумәт кә (Йуһʹәнна 12:28). Иса һәр тʹьм наве Баве хԝә хьзмәтийеда рʹумәт дькьр (Йуһʹәнна 17:26). Ләма жи, Мәсиһийед рʹаст наве Хԝәде бь сәрбьльнди дьдьнә хәбате у мәрьварʹа әʹлам дькьн.

9. Мәсиһийед ԛьрʹна йәке ча ԛәдре наве Хԝәде дьгьртьн?

⁹ Ԛьрʹна йәке Д.М.-да, ԝәхтәкә кьн паши кӧ щьвата шагьртед Иса Мәсиһ һатьбу сазкьрьн, Йаһоԝа «рʹәʹма хԝә ль нәщьһуйа кьрьбу, кӧ жь нава ԝан щьмәʹтәке дәрхә, ԝәки наве ԝи һьлдьнә сәр хԝә» (Кʹаред Шандийа 15:14). Мәсиһийед ԛьрʹна йәке наве Хԝәде бь сәрбьльнди дьданә хәбате у мәрьварʹа әʹлам дькьрьн. Ԝана наве Хԝәде хьзмәтеда у ньвисаред хԝәда дьданә хәбате. * Ԝана избат дькьр, ԝәки әԝана әв щьмәʹт ьн, кӧ наве Хԝәде һьлдабунә сәр хԝә у мәрьварʹа әʹлам дькьрьн (Кʹаред Шандийа 2:14, 21).

10. Чь избати һәнә, ԝәки Шәʹдед Йаһоԝа щьмәʹта бона рʹумәткьрьна наве Йаһоԝа йә?

¹⁰ Гәло Шәʹдед Йаһоԝа щьмәʹта бона  рʹумәткьрьна наве Йаһоԝа йә? Иро гәләк сәрокед религийа чь жь дәсте ԝан те дькьн, ԝәки наве Хԝәде вәшерьн. Ԝана наве ԝи жь ԝәлгәрʹандьнед Кʹьтеба Пироз дәрхьстьнә у һьнә щийа ԛәдәхә дькьн деред хԝәда наве ԝи һьлдьн. * Тʹәне Шәʹдед Йаһоԝа бь рʹасти ԛәдре наве Хԝәде дьгьрьн. Әм жь һʹәму религийа зедәтьр дина мәрьва дькʹьшиньн сәр наве Хԝәде. Әм хԝә нав дькьн Шәʹдед Йаһоԝа у чь жь дәсте мә те дькьн, ԝәки һежайи ви нави бьн (Ишайа 43:10-12). Һʹәта ньһа мә 240 милйон зедәтьр Кʹьтеба Пироз йа «Ԝәлгәрʹандьна Дьнйа Тʹәзә» нәшьр кьрийә. Ве ԝәлгәрʹандьнеда наве Йаһоԝа гәләк рʹезада һатийә ньвисаре, кʹидәре кӧ ԝәлгәрʹандьнед дьнда нәданә хәбате. Хенщи ԝе йәке, әм әʹдәбйәтед кӧ наве Йаһоԝа бьльнд дькьн, сәр 1 000 зьмана зедәтьр дәрдьхьн!

11. Мәсиһийед пешьн ча нишан дькьрьн, ԝәки әԝана рʹастийе һʹьз дькьн?

¹¹ Иса Мәсиһ рʹастийе, демәк рʹастийа дәрһәԛа Хԝәде у ԛьраред Ԝи, һʹьз дькьр. Иса ль гора ве рʹастийе дьжит у ве рʹастийе кәсед дьнрʹа жи әʹлам дькьр (Йуһʹәнна 18:37). Пәйчуйед Иса жи рʹастийе һʹьз дькьрьн (Йуһʹәнна 4:23, 24). Пәтрусе шанди баԝәрийа  Мәсиһийа ча «рʹийа рʹастийе» нав кьр (2 Пәтрус 2:2). Жь бо ԝе йәке кӧ Мәсиһийед пешьн рʹастийе гәләк һʹьз дькьрьн, ԝана һʹәму әʹрф-әʹдәтед религийа у ньһерʹандьнед мәрьва, йед кӧ мьԛабьли рʹастийе дәрдькʹәтьн, инкʹар дькьрьн (Колоси 2:8). Иро жи Мәсиһийед рʹаст һʹәму тьшти дькьн, ԝәки «нава рʹастийеда» бьжин. Бона ԝе йәке әԝана ԛәԝате дьдьнә хәбате, сәва кӧ һʹәму һинкьрьнед ԝан у жийина ԝан ль гора Кʹьтеба Пироз бьн (3 Йуһʹәнна 3, 4).

12. Гава бьред жь Кʹома Рʹебәрийе тедәрдьхьн ԝәки һинкьрьнәк бь щурʹәки дьн гәрәке бе фәʹмкьрьне, әԝана чь дькьн у чьма?

¹² Хьзмәткʹаред Хԝәде набежьн, ԝәки әԝана рʹастийа Кʹьтеба Пироз бь тʹәмами заньн. Щарна ԝана һьнә һинкьрьнед Кʹьтеба Пироз шаш фәʹм дькьрьн у щьват нәрʹаст организә дькьрьн. Әԝ йәк мә әʹщебмайи накә, чьмки Кʹьтеба Пироз дьбежә кӧ гәрәке әм занәбунеда пешда һәрʹьн (Колоси 1:9, 10). Йаһоԝа рʹастийе гав пәй гав әʹйан дькә, у гәрәке әм бь сәбьр һивийе бьсәкьньн, һʹәта кӧ рʹонайа рʹастийе һе зедә шәԝԛ бьдә (Мәтʹәлок 4:18). Гава бьред жь Кʹома Рʹебәрийе тедәрдьхьн, ԝәки һинкьрьнәк бь щурʹәки дьн гәрәке бе фәʹмкьрьне, әԝана дәрберʹа ве гӧһастьне дькьн. Сәрԝеред религийа жи гәләк гӧһастьна дькьн, ле нета ԝан әԝ ә, ԝәки дьле мәрьва бькʹьрʹьн йан жи сәва кӧ жь ве дьнйайе щӧдә нәбьн. Ле тʹәшкиләта Йаһоԝа бь ве нете гӧһастьна дькә, ԝәки әм дьһа незики Йаһоԝа бьн у мина Иса Мәсиһ Хԝәде бьһʹәбиньн (Аԛуб 4:4). Әм һьнә фәʹмкьрьнед Кʹьтеба Пироз дьгӧһезьн нә жь бо ԝе йәке, кӧ фькред мәрьвед дьнйайе тенә гӧһастьне, ле жь бо ԝе йәке кӧ әм Кʹьтеба Пироз дьһа зәлал фәʹм дькьн. Бәле, әм рʹастийе һʹьз дькьн! (1 Тʹесалоники 2:3, 4)

13. Һʹӧнӧре сәрәкә йе Мәсиһийед рʹаст кʹижан ә, у әв һʹӧнӧр нав Шәʹдед Йаһоԝада ча әʹйан дьбә?

¹³ Жь һʹәму хәйсәт-һʹӧнӧред шагьртед Иса йед ԛьрʹна йәке, йа һәри фәрз у бона һʹәмушка әшкәрә, һʹьзкьрьн бу. Иса Мәсиһ ӧса готьбу: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:34, 35). Иро, сәр тʹәмамийа дьнйайе нав Шәʹдед Йаһоԝада һʹьзкьрьн һәйә. Әм жь һʹәму религийед дьн щӧда нә, чьмки нав мәда йәкти һәйә у әм фьрԛийе накьн нав мәрьвада жь бо мьләт, култур, йан жи дәсте ԝанда чьԛс һәйә. Мәсәлә, әм ве һʹьзкьрьна рʹаст щьватед хԝәда дьвиньн. Әв һʹьзкьрьн баԝәрийа мә зедә дькә кӧ Йаһоԝа жь һʹәбандьна мә рʹази йә.

14. Ль гора Колоси 3:12-14, әм чаԝа дькарьн нишан кьн, ԝәки әм һәвдӧ һʹьз дькьн?

¹⁴ Кʹьтеба Пироз мәрʹа дьбежә: «Бәри һәр тьшти, һʹьзкьрьна ԝә һьндава һәвда бь дьл у щан бә» (1 Пәтрус 4:8). Әм һәвдӧ һʹьз дькьн, ләма жи әм һәвдӧ дьбахшиньн у кемасийед һәвдӧ сәбьр дькьн. Ӧса жи, әм мәщала дьгәрʹьн ԝәки һʹәму хушк-бьрарʹа, һәла һе йед кӧ дьле мә ешандьнә жи, дәствәкьри у меванһʹьз бьн (Колоси 3:12-14 бьхунә). Бәле, һʹьзкьрьн бь рʹасти жи нишана сәрәкә йа Мәсиһийед рʹаст ә.

15. Әм кʹижан алийава чʹәʹв дьдьнә Мәсиһийед пешьн?

¹⁵ Һʹәбандьна мә жь алийед дьнва жи мина һʹәбандьна Мәсиһийед ԛьрʹна йәке йә. Мәсәлә, әм мина щьвата ԛьрʹна  йәке организәкьри нә. Ләма жи, тʹәшкиләта мәда бәрпьрсийаред мьһале, рʹуспи у бәрдәстийед щьвате һәнә (Филипи 1:1; Тито 1:5). Мина Мәсиһийед пешьн, әм гӧһ дьдьн ԛанунед Хԝәде бона зәԝащ, нав-намусийе у хуне, у әм ԝан Мәсиһийед кӧ гӧне хԝә надьнә рʹуйе хԝә, жь щьвате дәрдьхьн, ԝәки щьват тʹәмьз бьминә (Кʹаред Шандийа 15:28, 29; 1 Корьнтʹи 5:11-13; 6:9, 10; Ибрани 13:4).

16. Готьнед Әфәси 4:4-6 чь мә һин дькьн?

¹⁶ Иса пешда готьбу, ԝәки гәләк мәрьвед кӧ хԝә ча Мәсиһи һʹәсаб кьн, бь рʹасти ԝе шагьртед ԝи нибьн (Мәтта 7:21-23). Ӧса жи, Кʹьтеба Пироз пешда готьбу ԝәки рʹожед ахьрийеда, гәләк мәрьв ԝе хԝә ча кәсед хԝәденас бьдьнә кʹьфше, ле бь рʹасти жь Хԝәде дур бьн (2 Тимотʹейо 3:1, 5). Ле Кʹьтеба Пироз әшкәрә дьбежә ԝәки Хԝәде тʹәне баԝәрик ԛәбул дькә (Әфәси 4:4-6 бьхунә).

17. Иро кʹе пәй Иса Мәсиһ дьчьн у ль гора баԝәрийа рʹаст дьжин?

¹⁷ Ве готареда, мә дит ԝәки Иса Мәсиһ у Мәсиһийед ԛьрʹна йәке чаԝа Хԝәде дьһʹәбандьн. Ль гора избатед кӧ мә леколин кьр, гәло кʹе бь рʹасти ль гора баԝәрийа рʹаст дьжи? Щаб әшкәрә йә: Шәʹдед Йаһоԝа! Әм чьԛас сәрбьльнд ьн жь бо ԝе йәке, кӧ әм нав хьзмәткʹаред Йаһоԝада ньн у рʹастийа дәрһәԛа Йаһоԝа у нетед ԝи заньн. Ләма жи, ԝәрә әм чь жь дәсте мә те бькьн, ԝәки хԝә ль рʹийа рʹастийе ԛайим бьгьрьн!