Сәва кӧ Леколинкʹаред Кʹьтеба Пироз бькарьбьн шьхӧле хԝә биньн сери, лазьм бу кӧ әԝана мерхас бьн, чьмки ԝана гәрәке кәсед мьлукрʹа «мьзгин» әʹлам кьрана, ле кәсед хьрабрʹа ‹рʹожа һʹәйфһьлдане›.

Канадайеда, бьре Щон Һенри Һоскин мьзгин нава пәйкʹәтьнада бе тьрс бәла дькьр. Бьһаре сала 1921, әԝ рʹасти кʹәшишәки Методист һат. Бьре Һоскин бь ван готьна хәбәрдан дәстпекьр: «Ԝәрә әм бь зарʹе ширьн дәрһәԛа Ньвисаред Пироз хәбәр дьн, у һәгәр фькред мә жь һәв щӧда бьн жи, ԝәрә әм әʹдьлайа нав хԝәда хьраб нәкьн». Ле йазьх ӧса дәрнәкʹәт. Бьре Һоскин ӧса гот: «Паши чәнд дәԛа, [кʹәшиш] дәри һаԛас сәрт гьрт кӧ һьндьк мабу шуша дери бьшкәста».

Кʹәшиш кьрә ԛирʹин: «Дә һәрә бал пʹутпʹарьста у тʹәви ԝан хәбәр дә!» Бьре Һоскин дәнге хԝә нәкьр, ле паши кӧ әԝ жь ԝедәре чу, әԝи хԝәрʹа гот: «Бь тʹәхмина мьн, һәма һежа мьн тʹәви пʹутпʹарьстәки хәбәр дьда!»

Рʹожәк шунда, гава кʹәшиш дереда һин дькьр, әԝи диса һʹьщуми сәр бьре мә кьр. Бьре Һоскин гот: «Әԝи мәрьварʹа гот ԝәки әԝана гӧһ нәдьнә мьн. Әԝи гот кӧ әз мәрьве һәри хьраб ьм, йе кӧ һатийә ви бажари, у ль гора фькра ԝи, гәрәке әз бьһатама кӧштьне». Бьре мә ԛәт нәтьрсийа. Әԝи хьзмәта хԝә бәрдәԝам кьр у бәред баш жи станд. Әԝи гот: «Хьзмәти гәләк баш дьчу. Һьнә кәса дьгот: ‹Әз заньм кӧ тӧ хьзмәткʹаре Хԝәде йи!› Ӧса жи, ԝана жь мьн дьпьрси һәла әз тьштәкида һʹәԝщә мә йан на».

Сәва кӧ мәрьв кʹижан гӧһ дьданә мьзгине, рʹӧһʹанида пешда һәрʹьн, Леколинкʹаред Кʹьтеба Пироз журнала «Ԛьрʹна Зерʹинда» * бәрнамед бона леколина Кʹьтеба Пироз дәрхьстьн. Бәрнама Леколина Кʹьтеба Пирозда бона Зарʹа, пьрс дьһатьн дайине, йед  кӧ де у бава дькарьбу тʹәви зарʹед хԝә шеԝьр кьрана. Де-баварʹа дьһатә готьне, ԝәки әԝана «ван пьрса жь зарʹед хԝә бьпьрсьн у али ԝан бькьн ԝәки әԝана щаб Кʹьтеба Пирозда бьвиньн». Һьнә пьрс – мәсәлә пьрса «Кʹьтеба Пирозда чәнд  кʹьтеб һәнә?» – дина ԝан дькʹьшанд сәр тьштед сәрәкә дәрһәԛа Кʹьтеба Пироз. Пьрсед ӧса ча «Гәло һәр Мәсиһийе рʹаст ԝе рʹасти пәйкʹәтьна бе?» али зарʹа у щаһьла дькьр ԝәки әԝана бьбьнә мьзгинванед мерхас.

Хенщи ве йәке бона хушк-бьред щерʹьбанди жи бәрнама леколине дьһатә нәшьркьрьне. Щабед пьрсед ве бәрнаме пʹара йәкеда йа «Леколинед Ньвисаре» дьһатьнә дайине. Бь һʹәзара хԝәндәвана жь ван бәрнама кʹар дьстанд, ле журнала «Ԛьрʹна Зерʹин» йа 21 Кануна Пешьн 1921-да һатә әʹламкьрьн кӧ һәр дӧ бәрнамә ԝе ида нәйенә нәшьркьрьне. Гәло чьма?

Бьред кӧ рʹебәри дькьрьн, фәʹм кьрьн ԝәки хԝәндәкʹаред тʹәзә гәрәке рʹастийед сәрәкә дьһа бь организә һин бьн. Бона ве йәке мәһа Мьждаре, сала 1921-да, кʹьтебәкә бь наве «Лире Хԝәде» һатә дәрхьстьне. Ӧса жи, кәсед кӧ әв кʹьтеб ԛәбул дькьр, хԝәха шәхси ве кʹьтебе леколин дькьрьн. Ве һинбуне али хԝәндәкʹара дькьр, фәʹм бькьн кӧ нета Хԝәде әв ә, ԝәки мәрьв һʹәта-һʹәтайе бьжин. Кʹара ве һинбуне чь бу?

Гава кәсәки әв кʹьтеб ԛәбул дькьр, ԝирʹа бәрнама хԝәндьне дьһатә дайине, йа кӧ сәр картәкә бьчʹук ньвиси бу. Һʹәфтек шунда, әԝи картәкә бь чәнд пьрса дьстанд, йед кӧ бәрнама хԝәндьнева гьредайи бу. Ӧса жи, сәр карта бона һʹәфтийа дьн диса бәрнама хԝәндьне һәбу.

Хԝәндәкʹара нава 12 һʹәфтийада һәр һʹәфте картәкә тʹәзә бь пʹоште жь щьвате дьстанд. Гәләк щар ван карта хушк-бьред әʹмьрда мәзьн дьшандьн, йан йед кӧ жь бо сьһʹәт-ԛәԝата сьст нькарьбун жь мал дәркʹәтана. Мәсәлә, хушка Анна Гарднер, йа кӧ Милвеиледа (Дәԝләтед Йәкбуйи) дьжит, ӧса гот: «Гава кʹьтеба ‹Лире Хԝәде› дәркʹәт, мәщал кʹәтә дәсте хушка мьнә сәԛәт Тайле, ԝәки һәр һʹәфте карта бьшинә у бь ви щурʹәйи дьһа зедә хьзмәт бькә». Ԝәхта кӧ һинбун хьлаз бу, сәрледана хԝәндәкʹар дькьрьн, ԝәки әԝ жь Кʹьтеба Пироз дьһа зедә әʹламәтийе бьстинә.

Хьлазийа сала 1921, бьре Щозеф Рутерфорд һʹәму щьватарʹа нәʹмәк шанд. Әԝи гот ԝәки «шәʹдәтийа кӧ исал дәрһәԛа Пʹадшатийе һатә дайине, һьмбәри һʹәму салед бәре дьһа зедә бәр ани». Ӧса жи, әԝи гот: «Шьхӧл һе зәʹф ә. Ләма жи дьле кәсед дьн ԛәԝи бькьн, ԝәки әԝана жи хьзмәта пироз биньн сери». Әшкәрә йә кӧ Леколинкʹаред Кʹьтеба Пироз гӧһ данә ве ширәте. Сала 1922-да, ԝана мьзгинийа Пʹадшатийе бе тьрс бь щурʹәки мәхсус әʹлам кьр.