1. Гәләк мәрьв сәр биланийа рʹаст чаԝа дьньһерʹьн? (Мәтʹәлок 1:20, 21)

 ГӘЛӘК ԝәлатада, мьзгинванед Пʹадшатийа Хԝәде әʹдәбйәтед дәрһәԛа Кʹьтеба Пироз сәр кʹучед, кӧ гәләк мәрьв дьчьн тен, бәла дькьн. Тә ԛә бь ви щурʹәйи хьзмәт кьрийә? Ԝе дәме, дьбәкә әв готьна жь кʹьтеба Мәтʹәлок һатә бира тә, кʹидәре кӧ ньвисийә ԝәки сәрԝахти кʹучада дькә гази, кӧ мәрьв гӧһ бьдьне (Мәтʹәлок 1:20, 21 бьхунә). «Сәрԝахти», демәк биланийа кӧ Йаһоԝа дьдә, жь Кʹьтеба Пироз у жь әʹдәбйәтед мә те. Сәва кӧ мәрьв бенә сәр рʹийа кӧ бәр бь жийине дьбә, әԝана һʹәԝще ве сәрԝахтийе нә. Чахе кәсәк әʹдәбйәтед мә ԛәбул дькә, әм гәләк ша дьбьн. Ле нә һәр кәс әʹдәбйәтед мә ԛәбул дькә. Һьнә мәрьв нахԝазьн бьзаньбьн, кӧ Кʹьтеба Пироз чь дьбежә. Һьнәк жи ԛәрфед хԝә мә дькьн. Әԝана дьфькьрьн ԝәки Кʹьтеба Пироз ида кәвьн буйә. Һьнәк жи дьфькьрьн ԝәки готьнед Кʹьтеба Пироз дәрһәԛа нав-намусийе бь зедәйи сәрт ьн. Диса жи, Йаһоԝа бь дьловани һәр кәси тʹәглиф дькә, ԝәки биланийа рʹаст бьстиньн. Гәло чь щурʹәйи?

2. Әм ча дькарьн биланийа рʹаст ԛазанщ кьн, ле һʹәчʹи зәʹф мәрьв чь дькьн?

² Йаһоԝа биланийа рʹаст, бь сайа Кʹьтеба Пироз мәрьва дьдә бьһистьне. Һʹәчʹи зәʹф мәрьв дькарьн ве кʹьтебе һеса дәстхьн. Бь сайа кʹәрәма Йаһоԝа, әʹдәбйәтед мәйә сәр һʹиме Кʹьтеба Пироз, сәр 1 000 зьмани зедәтьр тенә бәлакьрьне. Кәсед кӧ ԝан әʹдәбйәта дьхуньн у ль гора ве йәке дьжин, кʹаре дьстиньн. Сәд һʹәйф кӧ һʹәчʹи зәʹф мәрьв гӧһ надьн дәнге биланийа рʹаст. Гава әԝана сафикьрьна дькьн, әԝана хԝә дьсперьн аԛьле хԝә йан жи готьнед хәлԛе. Дьбәкә мәрьвед дьн хԝә жь мә четьр һʹәсаб кьн, жь бо ве йәке кӧ әм ль  гора рʹебәрийа Кʹьтеба Пироз дьжин. Ве готареда, әме бьвиньн кӧ гәләк мәрьв чьрʹа ӧса дькьн. Ле пешийе ԝәрә әм бьньһерʹьн, кӧ әм чаԝа дькарьн биланийа рʹаст жь Йаһоԝа бьстиньн.

3. Биланийа рʹаст чьва гьредайи йә?

³ Билани али мә дькә ԝәки әм занәбуне бьдьнә хәбате, кӧ сафикьрьнед баш бькьн. Ле биланийа рʹаст тьштәки дьнва жи гьредайи йә. Кʹьтеба Пироз дьбежә: «Сәре сәрԝахтийе хофа Хӧдан ә, Йе Һәри Пироз наскьрьн биланти йә» (Мәтʹәлок 9:10). Ләма жи, пешийа кӧ сафикьрьнәкә фәрз бькьн, гәрәке әм ве йәке сәр һʹиме ньһерʹандьна Йаһоԝа бькьн, демәк сәр һʹиме занәбуна дәрһәԛа «Йе Һәри Пироз». Бона ве йәке, әм дькарьн Кʹьтеба Пироз у әʹдәбйәтед сәр һʹиме Кʹьтеба Пироз леколин кьн. Бь ви щурʹәйи, әме биланийа рʹаст бьдьнә кʹьфше (Мәтʹәлок 2:5-7).

4. Чьма тʹәне Йаһоԝа дькарә биланийа рʹаст бьдә мә?

⁴ Тʹәне Йаһоԝа дькарә биланийа рʹаст бьдә мә (Рʹомайи 16:27). Гәло әԝ чьрʹа Канийа биланийе йә? Йа пешьн, Әԝ Әʹфьрандаре һʹәму тьшти йә у дәрһәԛа әʹфринед хԝә һәр тьшти занә (Зәбур 104:24). Йа дӧда, биланийа Йаһоԝа һʹәму кьред ԝида те кʹьфше (Рʹомайи 11:33). Йа сьсийа, ширәтед Йаһоԝайә билан кʹаре дьдьнә ван мәрьва, йед кӧ ль гора ван ширәта дьжин (Мәтʹәлок 2:10-12). Сәва кӧ әм биланийа рʹаст ԛазанщ кьн, гәрәке әм ван рʹастийед сәрәкә ԛәбул кьн у изьне бьдьн, кӧ әԝ рʹебәрийа сафикьрьн у кьред мә бькьн.

5. Чахе мәрьв Йаһоԝа ча Канийа биланийа рʹаст ԛәбул накьн, ахьрийа ве йәке чь йә?

⁵ Гәләк мәрьвед кӧ хьзмәтийеда рʹасти мә тен, тʹәбийәтерʹа һʹәйр-һʹӧжмәкʹар дьминьн. Ле әԝана инкʹар дькьн кӧ Хԝәде һәйә, у баԝәр дькьн ԝәки һәр тьшт хԝәха пешда һатийә. Һьнә мәрьв жи баԝәр дькьн кӧ Хԝәде һәйә, ле бь дитьна ԝан, ширәтед жь Кʹьтеба Пироз ида кʹәвьн бунә, ләма жи әԝана ль гора фькьр у хԝәстьнед хԝә дьжин. Ахьрийа ве йәке чь йә? Гәло әв йәк кӧ һʹәчʹи зәʹф мәрьв биланийа Хԝәде ԛәбул накьн, ле хԝә дьсперьн аԛьле хԝә, һʹале дьнйайе дьһа баш кьрийә? Гәло ԝана шабуна рʹаст йан жи һевийа баш стандийә? Гава әм дәр-дора хԝә дьньһерʹьн, әм дьбиньн кӧ әв готьн чьԛас рʹаст ә: «Тʹӧ сәрԝахти, биланти у шеԝьр тʹӧнә кӧ һьмбәри Хӧдан бьсәкьнә» (Мәтʹәлок 21:30). Әшкәрә йә, сәва кӧ әм биланийа рʹаст ԛазанщ кьн, гәрәке әм хԝә бьсперьн Йаһоԝа. Сәд һʹәйф, кӧ гәләк мәрьв ӧса накьн. Гәло чьрʹа?

6. Ль гора Мәтʹәлок 1:22-25, йед кӧ гӧһ надьн биланийа рʹаст кʹи нә?

⁶ Гава биланийа рʹаст «кʹучада дькә гази», гәләк кәс гӧһ надьне. Кʹьтеба Пироз кәсед ӧса нав дькә ча «беһʹьш», «ԛәрфкьр» у «ахмах» (Мәтʹәлок 1:22-25 бьхунә). Ԝәрә әм дина хԝә бьдьнә хәйсәтед ван мәрьва, йед кӧ биланийа Хԝәде инкʹар дькьн, у шеԝьр кьн кӧ әм чь гәрәке бькьн, ԝәки нәбьнә мина ԝан.

7. Һьнә мәрьв чьрʹа хԝәха сафи дькьн кӧ «беһʹьш» бьминьн, демәк нәщерʹьбанди бьн?

⁷ Мәрьвед «беһʹьш», демәк кәсед нәщерʹьбанди әв ьн, йед кӧ һеса һәр тьшти баԝәр дькьн йан жи тенә хапандьне (Мәтʹәлок 14:15). Хьзмәтийеда әм гәләк щар рʹасти кәсед ӧса тен. Иро бь милйона мәрьв жь алийе сәрԝеред религи йан политике тенә хапандьне. Һьнә мәрьвед  кӧ фәʹм дькьн ԝәки әԝана һатьнә хапандьне, әʹщебмайи дьминьн, ле йед кӧ Мәтʹәлок 1:22 бәʹса ԝан дькә, сафи дькьн ԝәки «беһʹьш» бьминьн, демәк нәщерʹьбанди, чьмки әв йәк ԝана хԝәш те (Йерәмйа 5:31). Әԝана һʹьз дькьн ль гора дьле хԝә бьжин, у нахԝазьн бьзаньбьн кӧ Кʹьтеба Пироз чь дьбежә у гӧһ бьдьн ԛанунед ԝе. Канадайеда жьнькәкә кӧ хԝә ль религийе дьгьрә, мьзгинванәкирʹа ӧса гот: «Һәрге кʹәшише мә әм хапандьнә, бьра гӧнә стуйе ԝи бә, әв гӧне мә нинә»! Йазьх кӧ гәләк мәрьв ӧса дьфькьрьн, ле әм нахԝазьн мина ван мәрьва нәщерʹьбанди бьн! (Мәтʹәлок 1:32; 27:12)

8. Чь ԝе али мә бькә ԝәки әм биланийе ԛазанщ кьн у дьһа щерʹьбанди бьн?

⁸ Ԝе баш бә кӧ әм гӧһ бьдьн ве ширәта Кʹьтеба Пироз: «Һʹьше хԝәда гьһишти бьн» (1 Корьнтʹи 14:20). Чахе әм ль гора принсипед Кʹьтеба Пироз дьжин, әм биланийе ԛазанщ дькьн у дьбьнә мәрьвнә щерʹьбанди. Һеди-һеди, әм педьһʹәсьн кӧ әв принсип чаԝа дькарьн али мә бькьн, ԝәки әм хԝә жь проблема дур бьгьрьн у сафикьрьнед билан бькьн. Ԝе баш бә кӧ әм хԝә бьщерʹьбиньн, һәла әм ве йәкеда пешда дьчьн йан на. Мәсәлә, һәрге әм Кʹьтеба Пироз һин дьбьн у тʹәне чәнд щара чунә щьвата, ԝе баш бә кӧ әм жь хԝә бьпьрсьн, һәла мә чьма һе соз нәдайә Йаһоԝа, ԝәки ԝирʹа хьзмәт кьн у һе нәһатьнә ньхӧмандьне. Йан жи, һәрге әм ида ньхӧманди нә, гәло әм ча мьзгинван у дәрсдар пешда дьчьн? Гәло сафикьрьнед мә нишан дькьн, ԝәки әм ль гора рʹебәрийа Кʹьтеба Пироз дьжин? Гәло әм ван һʹӧнӧра һьндава мәрьвада дьдьнә кʹьфше йед кӧ Иса дьда кʹьфше? Һәрге лазьм бә кӧ әм һьнә тьштада хԝә рʹаст кьн, ԝәрә әм гӧһ бьдьн ширәтед Йаһоԝа, йед кӧ биланийе дьдьнә кәсед нәщерʹьбанди (Зәбур 19:7).

9. Мәрьвед «ԛәрфкьр» чаԝа биланийе инкʹар дькьн?

⁹ Мәрьвед дьн, йед кӧ биланийа Хԝәде инкʹар дькьн «ԛәрфкьр» ьн. Щарна әм хьзмәтийеда рʹасти мәрьвед ӧса тен. Әԝана ԛәрфед хԝә кәсед дьн дькьн у жь ве йәке шабуне дьстиньн (Зәбур 123:4). Кʹьтеба Пироз пешда готьбу, кӧ рʹожед ахьрийеда мәрьвед ӧса ԝе гәләк бьн (2 Пәтрус 3:3, 4). Мина зәʹвед Лут, иро жи һьнә кәс гӧһ надьн хәбәра Хԝәде (Дәстпебун 19:14). Гәләк мәрьв сәр кәсед кӧ ль гора принсипед Кʹьтеба Пироз дьжин, дькʹәньн. Әԝана ӧса дькьн, чьмки хӧламед «хԝәстьнед дьле хԝәйә нәпʹак» ьн (Щьһуда 7, 17, 18). Бь рʹасти жи Кʹьтеба Пироз рʹьнд шьровәдькә, кӧ мәрьвед рʹабәр у йед кӧ Йаһоԝа инкʹар дькьн, чь щурʹәйи нә.

10. Чаԝа кӧ Зәбур 1:1 дьбежә, әм ча дькарьн жь ԛәрфкьрьн у кӧтә-кӧте хԝә дур бьгьрьн?

¹⁰ Гәло әм ча дькарьн хԝә бьпарезьн, ԝәки нәбьн кәсед ԛәрфкʹар? Бона ве йәке, гәрәке әм хԝә жь ван мәрьва дур бьгьрьн, йед кӧ һәртʹьм бӧхдана давежьнә кәсед дьн (Зәбур 1:1 бьхунә). Мәсәлә, әм гәрәке гӧһ нәдьн рʹабәра у кʹьтеб у нәʹмед ԝан нәхуньн. Һәрге әм һаш жь хԝә тʹӧнә бьн, әм һеса дькарьн сәр кәсед дьн бькьнә кӧтә-кӧт у итʹбарийа хԝә һьндава Йаһоԝа у рʹебәрийа тʹәшкиләта ԝи, ӧнда кьн. Сәва кӧ әм нәкʹәвьнә ве дәрәще, ԝәрә әм жь хԝә бьпьрсьн: «Гава әз әʹламәти йан рʹебәрикә тʹәзә дьстиньм, гәло әз дькьмә кӧтә-кӧт? Гәло әз бьред щабдарда шашийа дьгәрʹьм»? Ԝе баш бә ԝәки әм зу сәр хԝә бьхәбьтьн у жь хәйсәт-һʹӧнӧред ӧса хԝә дур бьгьрьн, ԝәки Йаһоԝа жь мә рʹази бә (Мәтʹәлок 3:34, 35).

11. Йед «ахмах» сәр принсипед Йаһоԝайә нав-намусийе чаԝа дьньһерʹьн?

 ¹¹ Ле һьнә мәрьв йед кӧ биланийе инкʹар дькьн, кәсед «ахмах» ьн. Әԝана ӧса тенә навкьрьне, чьмки ԛанунед Хԝәдейә нав-намусийе инкʹар дькьн у ль гора хԝәстьна дьле хԝә дьжин (Мәтʹәлок 12:15). Мәрьвед ӧса, Йаһоԝа, йе кӧ Канийа биланийе йә, инкʹар дькьн (Зәбур 53:1). Чахе әм хьзмәтийеда тʹәви кәсед ӧса хәбәр дьдьн, әԝана гәләк щар һьндава мәда сәрт ьн у дәрһәԛа мә тьштед нәбаш дьбежьн, чьмки әм хԝә ԛанунед Хԝәде дьгьрьн. Ле рʹийа кӧ ԝана хԝә ле гьртийә, бәрбь әʹмьрәки баш набә. Кʹьтеба Пироз ӧса дьбежә: «Сәрԝахти бона ахмах гәләки бьльнд ә, дәргәһ-диԝанеда әԝ нькарә дәве хԝә вәкә» (Мәтʹәлок 24:7). Рʹасти жи, жь дәве кәсед ахмах ширәтәкә баш дәрнайе. Ләма жи, Йаһоԝа тʹәми дьдә мә: «Жь мәрьве ахмах дур кʹәвә» (Мәтʹәлок 14:7).

12. Чь дькарә али мә бькә, ԝәки әм хԝә жь рʹийа ахмаха дур бьгьрьн?

¹² Бәле, гәләк мәрьв ширәтед Хԝәде нәфрʹәт дькьн, ле әм рʹийа Хԝәде у ԛанунед ԝи гәләк һʹьз дькьн. Сәва кӧ әм дьһа зедә ван ԛануна ԛимәт кьн, ԝе баш бә кӧ әм ахьрийа гӧһдарикьрьне у нәгӧһдарикьрьне, бәрамбәри һәв кьн. Һьлбәт тә дитийә, ԝәки кәсед кӧ биланийа Йаһоԝа инкʹар дькьн, рʹасти чьԛас чәтьнайа тен. Дә ньһа бьдә һʹәсабе хԝә, кӧ жийина тә чьԛас жь йа ԝан четьр ә, чьмки тӧ гӧһ дьди Хԝәде у ль гора принсипед ԝи дьжийи (Зәбур 32:8, 10).

13. Гәло Йаһоԝа зоре кәсәки дькә, кӧ гӧһ бьдьн ширәтед ԝийә билан?

¹³ Һәр кәс дькарә биланийа Йаһоԝа ԛазанщ кә, ле әԝ зоре тʹӧ кәси накә, ԝәки биланийа ԝи ԛәбул кьн. Диса жи, әԝ дина мә дькʹьшинә сәр ве йәке, кӧ чь те сәре ԝан мәрьва, йед кӧ гӧһ надьн биланийа ԝи (Мәтʹәлок 1:29-32). Кәсед кӧ гӧһ надьн Йаһоԝа, ԝе «бәре әʹмәлед хԝә бьхԝьн». Ԝәхт шунда, щурʹе жийина ԝан ԝе хәм у тәнгасийа ԝанарʹа бинә у ахьрийеда жи ԝе бенә ԛьрʹкьрьне. Ле Йаһоԝа ԝан мәрьварʹа йед кӧ гӧһ дьдьн ширәтед ԝийә билан, ӧса соз дьдә: «Йе гӧһ дьдә мьн ԝе сах-сьламәт бьжи у жь саԝа хьрабийе тʹәвһәв нәбә» (Мәтʹәлок 1:33).

14-15. Әм жь Мәтʹәлок 4:23 чь һин дьбьн?

¹⁴ Биланийа Йаһоԝа һәр гав кʹаре мәрʹа тинә. Чаԝа кӧ мә дит, мәрьв һеса дькарьн биланийа Йаһоԝа ԛазанщ кьн. Мәсәлә, кʹьтеба Мәтʹәлокда, Йаһоԝа бона жийина һәррʹожи ширәтед гәләк керһати дьдә мә. Ԝәрә әм ньһа дина хԝә бьдьнә чар ширәтед билан.

¹⁵ Мьԛати дьле хԝәйи симболик бә. Кʹьтеба Пироз ӧса дьбежә: «Жь һәр тьшти зедәтьр мьԛати дьле хԝә бә, чьмки канийа әʹмьр жь ԝи дәрте» (Мәтʹәлок 4:23). Сәва кӧ әм дьле хԝәйи  бәдәни бьпарезьн, гәрәке әм хԝарьна керһати бьхԝьн, спортева мьжул бьн у хԝә жь хәйсәт-һʹӧнӧред хьраб дур бьгьрьн. Мина ве йәке, гәрәке әм дьле хԝәйи симболик жи рʹьнд хԝәй кьн. У бона ве йәке әм гәрәке һәр рʹож Хәбәра Хԝәде бьхуньн, хԝә бона щьвата һазьр кьн, һәрʹьн сәр щьвата у ԝедәре щабед хԝә бьдьн. Ӧса жи, әм гәрәке һәр гав бь дьл у щан хьзмәт бькьн. У гәләк фәрз ә, ԝәки әм хԝә һьм жь ԝәʹдәдәрбазкьрьнед нәбаш, һьм жи жь һәвалед хьраб, дур бьгьрьн, йед кӧ дькарьн ль сәр мә хьраб һʹӧкӧм кьн.

16. Готьнед жь Мәтʹәлок 23:4, 5 чьрʹа рʹожа иройин керһати нә?

¹⁶ Чь кӧ дәсте тәда һәйә, рʹази бә. Кʹьтеба Пироз ӧса дьбежә: «Нәкʹәвә дәмана дәԝләтибуне, . . . Чʹәʹве тәйе ль сәр ԝи тьште пʹучʹ бә, ле әԝе хԝәрʹа баска чекә у мина тәйра бьфьрʹә әʹзмен» (Мәтʹәлок 23:4, 5). Рʹожа иройин ча йед дәԝләти у ӧса жи йед кʹәсиб һәр тьшти дькьн, ԝәки һәбуке ԛазанщ кьн. Гәләк щар рʹуйе ве йәкеда наве ԝан хьраб дьбә, әԝана достед хԝә у һәла һе сьһʹәт-ԛәԝата хԝә жи ӧнда дькьн. У ахьрийеда ӧса дьбә, кӧ әԝана һәр тьшти ӧнда дькьн (Мәтʹәлок 28:20; 1 Тимотʹейо 6:9, 10). Билани али мә дькә ԝәки әм пәй һәбуке нәкʹәвьн, ньһерʹандьна рʹаст сәр ве йәке хԝәй кьн у чь дәсте мәда һәйә рʹази бьн (Ԝаиз 7:12).

17. Әм чаԝа дькарьн «зьмане сәрԝахта», дәрһәԛа кʹижани кӧ Мәтʹәлок 12:18-да те готьне, ԛазанщ кьн?

¹⁷ Пешийа кӧ тьштәки бежи, бьфькьрә. Һәрге әм мьԛати хԝә нибьн, хәбәрдана мә дькарә зьраре бьдә кәсед дьн. Кʹьтеба Пироз ӧса дьбежә: «Һьнәк бь хәбәра мина шур мерьв бьриндар дькьн, ле зьмане сәрԝахта дәрмане дьла йә» (Мәтʹәлок 12:18). Гәрәке әм зьмане хԝә бькарьбьн у дәрһәԛа шашийед мәрьва пьшт ԝан хәбәр нәдьн, ԝәки ортʹа мәда йәкти у әʹдьлайи хьраб нәбә (Мәтʹәлок 20:19). Сәва кӧ хәбәрдана мә дьле мәрьва нәешинә, ле бәрдьлийе бьдә ԝан, гәрәке әм дьле хԝә бь занәбуна жь Хәбәра Хԝәде тʹьжә кьн (Луԛа 6:45). Фькьрандьна  кʹур сәр Кʹьтеба Пироз али мә дькә, ԝәки хәбәрдана мә мина «канийа сәрԝахтийе», мәрьва хԝәш бе (Мәтʹәлок 18:4).

18. Готьнед жь Мәтʹәлок 24:6 чаԝа дькарә али мә бькә, ԝәки әм хьзмәтеда пешдачуйи бьн?

¹⁸ Гӧһ бьдә рʹебәрийе. Сәва кӧ әм пешдачуйи бьн, Кʹьтеба Пироз тʹәмикә ӧса дьдә мә: «Шәрʹе хԝә кӧ дьки, дьди бәр һʹәсаба у сәркʹәтьн бь гәләк ширәткʹара те» (Мәтʹәлок 24:6). Ԝәрә әм бьньһерʹьн кӧ әв принсип чаԝа дькарә али мә бькә, ԝәки әм шьхӧле бәлакьрьна мьзгинийеда пешдачуйи бьн. Дәԝса кӧ әм ча дьхԝазьн ӧса хьзмәте бькьн, гәрәке әм гӧһ бьдьн ван рʹебәрийа, йед кӧ әм сәр щьвата дьстиньн. Ԝедәре әм дькарьн жь хушк-бьред щерʹьбанди һин бьн, кӧ чаԝа Кʹьтеба Пироз мәрьва һин кьн. Ӧса жи, тʹәшкиләта Йаһоԝа әʹдәбйәт у видеойед хԝәш дәрдьхә, йед кӧ али мәрьва дькьн ԝәки Кʹьтеба Пироз фәʹм бькьн. Ԝе баш бә кӧ әм һин бьн, ԝәки ван һащәта рʹьнд бьдьнә хәбате.

19. Тӧ чь дьфькьри дәрһәԛа биланийа кӧ Йаһоԝа дьдә мә? (Мәтʹәлок 3:13-18)

¹⁹ Мәтʹәлок 3:13-18 бьхунә. Әм ширәтед жь Хәбәра Хԝәде гәләк дьшекьриньн. Гәло бе ван ширәта мәйе чь бькьра? Ве готареда мә дина хԝә да һьнә мәсәлед биланийа жь кʹьтеба Мәтʹәлок. Һәмьки Ньвисаред Пирозда, кʹьтебед дьнда жи гәләк готьнед билан һәнә. Ԝәрә әм һәртʹьм ль гора биланийа кӧ жь Йаһоԝа те, бьжин. Гәләк мәрьв биланийа Хԝәде инкʹар дькьн, ле әм баԝәр ьн, ԝәки «йед кӧ [биланийе] ԛәԝин дьгьрьн бәхтәԝар дьбьн!».