1. Йаһоԝа чь һеви дайә мә?

 ЙАҺОԜА һевийа жийина һәрһәйи дайә мә. Һьнә кәс һивийа жийина сәр әʹзмана нә. Ԝедәре, әԝана ԝе мина рʹӧһʹед нәмьри һʹәта-һʹәтайе бьжин (1 Корьнтʹи 15:50, 53). Ле һʹәчʹи зәʹф мәрьв һивийа жийина һʹәта-һʹәтайе йа сәр әʹрде нә, кʹидәре кӧ әԝана ԝе сьһʹәт-ԛәԝат у бәхтәԝар бьн (Әʹйанти 21:3, 4). Һәр дӧ һеви жи гәләк ԛимәт ьн, һьм һевийа жийина һәрһәйи сәр әʹзмана, һьм жи һевийа жийина һәрһәйи сәр әʹрде.

2. Һевийа мә сәр һʹиме чь йә, у әм чьма ӧса дьбежьн?

² Кʹьтеба Пирозда хәбәра «гӧман» те һʹәсабе «һивийа тьштед баш бьн». Гӧмана мә һьндава ахьрийа баш ԝе әʹсәйи бе сери, чьмки әԝ йәк жь Йаһоԝа йә (Рʹомайи 15:13). Әм заньн кӧ әԝи чь соз дайә, у Әԝ созе хԝә һәртʹьм тинә сери (Жьмар 23:19). Әм баԝәр ьн ԝәки Йаһоԝа һьм дьхԝазә, һьм жи дькарә һәр тьште кӧ әԝи готийә, бинә сери. Ләма жи, һевийа мә чʹирок нинә, әԝ сәр һʹиме рʹастийе у избатийа йә.

3. Ве готареда әме дәрһәԛа чь хәбәр дьн? (Зәбур 27:14)

³ Баве мәйи әʹзмана мә һʹьз дькә, у әԝ дьхԝазә кӧ әм итʹбарийа хԝә ԝи биньн (Зәбур 27:14 бьхунә). Бь сайа һевийа ԛәԝи, әм дькарьн нава тәнгасийада Йаһоԝарʹа амьн бьминьн, у ӧса жи мерхаси у шабуна хԝә ӧнда нәкьн. Ԝәрә әм бьвиньн кӧ һевийа мә чаԝа дькарә мә бьпарезә. Йа пешьн, әме бьвиньн кӧ һеви чаԝа мина ләнгәр у кʹӧмзьрьһʹе йә. Паше әме бьвиньн, кӧ әм чаԝа дькарьн һевийа хԝә дьһа ԛәԝи кьн.

4. Һеви чаԝа мина ләнгәре йә? (Ибрани 6:19)

⁴ Паԝлосе шанди һевийа мә бәрамбәри ләнгәре кьр (Ибрани 6:19 бьхунә). Әԝи гәләк щар бь гәмийа  рʹеԝити дькьр, ләма жи әԝи заньбу кӧ ләнгәр гәмийе дьгьрә, ԝәки ав гәмийе нәбә. Щарәке, гава Паԝлос бь гәмике дьчу щики, фьртонәкә ԛайим рʹабу. Ԝәʹде фьртоне, әԝи дит кӧ гәмивана ләнгәр авитьнә аве, ԝәки гәми зьнара нәкʹәвә (Кʹаред Шандийа 27:29, 39-41). Чаԝа кӧ ләнгәр гәмийе дьгьрә кӧ ав ле нәбә, һевийа мә жи мә хԝәй дькә, ԝәки әм нава тәнгасийада жь Йаһоԝа дур нәкʹәвьн. Һевийа мә али мә дькә, кӧ әм һьмбәри фьртонед жийине сәбьр кьн, чьмки әм рʹьнд заньн ԝәки хьлази незик ә. Иса Мәсиһ готьбу кӧ әме рʹасти пәйкʹәтьна бен (Йуһʹәнна 15:20). Ләма жи фькьрандьна кʹур сәр созед Йаһоԝа ԝе али мә бькә, ԝәки әм жь рʹийа рʹастийе дәрнәйен.

5. Гава Иса бәр мьрьне бу, һевийа ԝи чаԝа али ԝи дькьр?

⁵ Дина хԝә бьде кӧ гава Иса бәр мьрьне бу, әԝ чаԝа амьн ма. Рʹожа Пенщийә Һʹәсаб Д.М.-да, Пәтрусе шанди бәʹса готьнәкә жь Зәбуре кьр, йа кӧ нишан дькә ԝәки Иса Мәсиһ чьма һаԛас ԛәԝи у рʹьһʹәт ма: «Бәдәна мьнә мьри жи ԝе бь гӧман бьжи, чьмки тӧ мьн дийаре мьрийада наһели, нә жи те бьһели кӧ Пирозе тә бьрʹьзә. . . . Те шабуна диндара хԝәва мьн тʹьжи ки» (Кʹаред Шандийа 2:25-28; Зәбур 16:8-11). Иса заньбу кӧ әԝе бьмьрә, ле һевийа ԝийә ԛәԝи һәбу кӧ Хԝәде ԝе ԝи жь мьрьне рʹакә у әԝе вәгәрʹә бал Баве хԝә (Ибрани 12:2, 3).

6. Бьраки дәрһәԛа һевийе чь гот?

⁶ Һевийа кӧ Кʹьтеба Пироз дьдә, али гәләк хушк-бьра кьрийә, ԝәки сәбьр кьн. Мәсәлә, сәрһатийа бьраки амьн бь наве Леонард Чин, йе кӧ ль Инглистане дьжит, ве йәке нишан дькә. Ԝәʹде Шәрʹе Һʹәмдьнйайе йа Пешьн, әԝ кʹәтә кәле, чьмки әԝи инкʹар кьр һәрʹә әскәрийе. Дӧ мәһа әԝ отʹахәкә башԛәда тʹәне бу у паше хәбатәкә гьран данә ԝи. Чәнд сал шунда әԝи ӧса ньвиси: «Тьштед кӧ һатьн сәре мьн нишани мьн кьрьн, ԝәки һевийа мә чаԝа али мә дькә, кӧ әм сәбьр кьн. Һьм Иса, шандийед ԝи у пʹехәмбәра, мәрʹа мәсәләкә баш һиштьнә, һьм жи созед жь Кʹьтеба Пироз һевийа мә ԛәԝи дькьн у али мә дькьн кӧ әм сәбьр кьн». Бона Леонард, һеви мина ләнгәре бу, у бона мә жи дькарә ӧса бә.

7. Тәнгаси чаԝа һевийа мә дьһа ԛәԝи дькьн? (Рʹомайи 5:3-5; Аԛуб 1:12)

⁷ Чахе әм бәр тәнгасийа сәбьр дькьн у дәсте Йаһоԝа дьвиньн, һевийа мә дьһа ԛәԝи дьбә (Рʹомайи 5:3-5; Аԛуб 1:12 бьхунә). Ләма жи, ньһа һевийа мә ида дьһа ԛәԝи йә, нә кӧ чахе мә тʹәзә рʹасти ԛәбул кьр. Мире-щьна дьхԝазә, ԝәки әм мерхасийа хԝә жь бо тәнгасийа ӧнда кьн, ле бь аликʹарийа Йаһоԝа, әм дькарьн сәркʹәвьн.

8. Һеви чаԝа мина кʹӧмзьрьһʹе йә? (1 Тʹесалоники 5:8)

⁸ Ӧса жи, Кʹьтеба Пироз һевийе бәрамбәри кʹӧмзьрьһʹе дькә (1 Тʹесалоники 5:8 бьхунә). Әскәр кʹӧмзьрьһʹе дькә сәре хԝә ԝәки сәре хԝә жь чʹәкед дьжмьна бьпарезә. Ле шәрʹе рʹӧһʹанида, гәрәке әм һʹьше хԝә жь һʹьщумед Мире-щьна бьпарезьн. Мире-щьна дьхԝазә мә бьщерʹьбинә у һʹьше мә бь фькьред шаш тʹьжә кә. Чаԝа кӧ кʹӧмзьрьһʹ сәре әскәр дьпарезә, һеви жи һʹьше мә дьпарезә, ԝәки әм Йаһоԝарʹа амьн бьминьн.

9. Мәрьвед бе һеви чаԝа дьжин?

 ⁹ Һевийа жийина һәрһәйи ԝе али мә бькә, кӧ әм сафикьрьнед билан бькьн. Жь алийе дьнва жи, һәрге һевийа мә сьст бә у әм изьне бьдьн кӧ хԝәстьнед бәдәне һʹьше мә контрол кьн, әм дькарьн нета жийина һәрһәйи пьшт гӧһе хԝәва бавежьн. Ԛьрʹна йәкеда, һʹале һьнә шагьртед Иса жи ӧса бу, йед кӧ бажаре Корьнтʹеда дьжитьн. Баԝәрийа ԝан дәрһәԛа һевийа рʹабуна мьрийа сьст бьбу (1 Корьнтʹи 15:12). Паԝлос зәлал кьр, ԝәки кәсед кӧ баԝәрийа хԝә ве һевийа фәрз найньн, тʹәне дина хԝә дьдьн хԝәстьнед хԝә (1 Корьнтʹи 15:32). Рʹожед мәда жи гәләк мәрьвед ӧса һәнә. Әԝана тʹәне дина хԝә дьдьн ве йәке, чь кӧ ньһа дькарьн бьстиньн. Ле әм ӧса накьн. Әм итʹбарийа хԝә созед Хԝәде тиньн. Мина кʹӧмзьрьһʹе, һевийа мә һʹьше мә дьпарезә у али мә дькә, ԝәки әм тʹәне ль сәр хԝәстьнед хԝә нәфькьрьн, чьмки әм заньн кӧ һәрге әм ӧса бьжин чаԝа дьле мә дьхԝазә, ԝи чахи достийа мә тʹәви Йаһоԝа дькарә хьраб бә (1 Корьнтʹи 15:33, 34).

10. Һеви чаԝа дькарә мә жь ньһерʹандьнед шаш бьпарезә?

¹⁰ Һеви дькарә мә жь ньһерʹандьнед шаш бьпарезә. Һьнә кәс дьфькьрьн кӧ әԝана чь бькьн жи, Йаһоԝа жь хирәта ԝан рʹази нинә. Мәсәлә, әԝана ӧса дьбежьн: «Әз һежайи жийина һәрһәйи ниньм. Әз нькарьм ль гора хԝәстьна Хԝәде бьжим. Хирәта мьн бадиһәԝа йә». Бинә бира хԝә кӧ Әлифаз, достәки Ибойи дәрәԝин, чь гот: «Ма мьров чи йә кӧ паԛьж бьбә?» Ӧса жи, Әлифаз дәрһәԛа Хԝәде ӧса гот: «А вай, Хԝәде жь пирозед хԝәрʹа әԝлә нинә, һʹәта әʹзман жи дь чʹәʹве ԝида нә паԛьж ьн» (Ибо 15:14, 15). Дәрәԝәкә ча мәзьн ә! Бир нәкә кӧ ньһерʹандьна ӧса жь Мире-щьна йә. Әԝ занә кӧ һәрге фькьред ӧса дьле тәда пешда бен, тӧйе һевийа хԝә ӧнда ки. Ләма жи, дәрәԝед ӧса инкʹар кә у дина хԝә бьдә созед Йаһоԝа. Баԝәр бә, Йаһоԝа дьхԝазә ԝәки тӧ һʹәта-һʹәтайе бьжи у әԝе али тә бькә, ԝәки тӧ бьгьһижи ве нете (1 Тимотʹейо 2:3, 4).

11. Чьрʹа лазьм ә ԝәки әм бь сәбьр һивийе бьн, һʹәта кӧ Йаһоԝа созед хԝә бинә сери?

¹¹ Щарна һеса нинә кӧ әм һевийа хԝә ԛәԝи хԝәй кьн. Әв йәк кӧ созед Хԝәде һе нәһатьнә сери, дькарә сәбьра мә бьщерʹьбинә. Йаһоԝа Хԝәдейе һʹәта-һʹәтайе йә, ләма жи ньһерʹандьна ԝи сәр ԝәʹдә, жь йа мә щӧдә йә. Ԝәʹде кӧ мәрʹа гәләк дьреж те кʹьфше, бона ԝи гәләк кьн ә (2 Пәтрус 3:8, 9). Әԝе нета хԝә бь щурʹе һәри баш бинә сери, ле дьбәкә әԝ ви ԝәʹдәйи нәйнә сери, чахе әм һивийе нә. Гәло чь дькарә али мә бькә, ԝәки һевийа мә ԛәԝи бә у әм бь сәбьр һивийа ви ԝәʹдәйи бьн, чахе Хԝәде созед хԝә бинә сери? (Аԛуб 5:7, 8)

12. Ль гора Ибрани 11:1, 6, һеви чаԝа баԝәрийева гьредайи йә?

¹² Сәва кӧ һевийа мә ԛәԝи бә, гәрәке әм незики Йаһоԝа бьн, чьмки әԝе һәр тьшти бинә сери, чь кӧ әм һивийе нә. Ль гора Кʹьтеба Пироз, һеви баԝәрийева гьредайи йә. Бәле, гәрәке әм баԝәр бькьн «кӧ Хԝәде һәйә у ԝе ԝан хәлат кә, кʹижан кӧ ль ԝи дьгәрʹьн» (Ибрани 11:1, 6 бьхунә). Чьԛас кӧ баԝәрийа мә һьндава Йаһоԝа ԛәԝи дьбә,  һаԛас әм дьһа зедә избат дьбьн, кӧ әԝе һʹәму созед хԝә бинә сери. Ньһа ԝәрә әм бьвиньн, кӧ әм чаԝа дькарьн достийа хԝә тʹәви Йаһоԝа дьһа ԛәԝи кьн, ԝәки һевийа мә ԛәԝи бьминә.

13. Әм ча дькарьн незики Хԝәде бьн?

¹³ Йаһоԝарʹа дӧа бькә у Хәбәра ԝи бьхунә. Әм нькарьн Йаһоԝа бьвиньн, ле диса жи әм дькарьн незики ԝи бьн. Әм баԝәр ьн кӧ гава әм бь сайа дӧа ԝирʹа хәбәр дьдьн, әԝ мә дьбьһе (Йерәмйа 29:11, 12). Жь алийе дьнва жи, гава әм Хәбәра ԝи дьхуньн у ль сәр ԝе кʹур дьфькьрьн, әм ча бежи дәнге Хԝәде дьбьһен. Чахе әм дьхуньн кӧ Йаһоԝа чаԝа хьзмәткʹаред хԝәйә бәре хԝәй дькьр, һевийа мә дьһа ԛәԝи дьбә. Кʹьтеба Пирозда те готьне: «Чь кӧ пешда кʹьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн» (Рʹомайи 15:4).

14. Чьрʹа фәрз ә ԝәки әм сәр тьштед кӧ Йаһоԝа бона кәсед дьн кьрьнә, кʹур бьфькьрьн?

¹⁴ Бьдә бәр чʹәʹве хԝә кӧ Йаһоԝа созед хԝә ча анинә сери. Мәсәлә, бинә бира хԝә кӧ Хԝәде бона Бьраһим у Сарайе чь кьрьбу. Әԝана ида кал-пир бьбун, ләма жи зарʹ ԝанрʹа нәдьбун. Диса жи Хԝәде соз дабу ԝана, кӧ зарʹ ԝе ԝанрʹа бьбә (Дәстпебун 18:10). Бьраһим «бь гӧман баԝәр кьр, кӧ әԝе бьбә баве гәләк мьләта» (Рʹомайи 4:18). Һʹале ԝи чьԛас бечʹарә дьһатә кʹьфше жи, диса жи Бьраһим баԝәр бу, ԝәки Йаһоԝа ԝе созе хԝә бинә сери. Һевийа ви мере амьн бадиһәԝа нибу (Рʹомайи 4:19-21). Сәрһатийед ӧса мәрʹа дьдьнә кʹьфше, ԝәки һʹал чьԛас чәтьн бе кʹьфше жи, Йаһоԝа созед хԝә һәртʹьм тинә сәри.

15. Чьрʹа лазьм ә әм сәр тьштед кӧ Хԝәде ида бона мә кьрийә, кʹур бьфькьрьн?

 ¹⁵ Бинә бира хԝә кӧ Йаһоԝа бона тә чь кьрийә. Бьфькьрә кӧ һʹәта ньһа, тә жь созед Хәбәра Хԝәде чь кʹар стандийә. Мәсәлә, Иса соз дайә кӧ Баве ԝи ԝе бона һʹәԝщед тәйә сәрәкә хәм бькә (Мәтта 6:32, 33). Ӧса жи, Иса соз дайә кӧ гава тӧ бьхԝази, Йаһоԝа ԝе рʹӧһʹе пироз бьдә тә (Луԛа 11:13). Йаһоԝа әв соз анинә сери. Әԝи гәләк созед дьн жи данә. Мәсәлә, Әԝи соз дайә кӧ ԝе бьбахшинә тә, дьле тә рʹьһʹәт бькә у тә рʹӧһʹанида тʹер бькә (Мәтта 6:14; 24:45; 2 Корьнтʹи 1:3). Фькьрандьна сәр тьштед кӧ Хԝәде бона тә кьрьнә, ԝе һевийа тә дьһа ԛәԝи кә кӧ ахьрийеда, Әԝе созед хԝәйи дьн жи бинә сери.

16. Һеви чьма пʹешкʹешәкә ԛимәт ә?

¹⁶ Һевийа жийина һәрһәйи пʹешкʹешәкә гәләк ԛимәт ә, кӧ Хԝәде дайә мә. Бәле, ахьрикә гәләк хԝәш һивийа мә йә! Әм баԝәр ьн кӧ әме пекһатьна созед Хԝәде бьвиньн. Мина ләнгәре, әв һеви али мә дькә ԝәки әм ль һьмбәри тәнгаси, пәйкʹәтьн у һәла һе мьрьне жи сәбьр кьн у амьн бьминьн. Мина кʹӧмзьрьһʹе, һевийа мә һʹьше мә дьпарезә, ԝәки әм бькарьбьн тьштед хьраб инкʹар кьн у тьштед рʹаст бькьн. Һевийа мә али мә дькә ԝәки әм дьһа незики Хԝәде бьн у фәʹм бькьн кӧ әԝ мә чьԛас һʹьз дькә. Ләма жи, гәләк фәрз ә кӧ һевийа мә һәртʹьм ԛәԝи бә.

17. Һевийа мә чьрʹа али мә дькә кӧ әм ша бьн?

¹⁷ Паԝлосе шанди хушк-бьрарʹа ӧса готьбу: «Бь гӧмане ша бьн» (Рʹомайи 12:12). Паԝлос ша дьбу, чьмки әԝ баԝәр бу кӧ һәрге әԝ амьн бьминә, әԝе сәр әʹзмана бьгьһижә жийина һәрһәйи. Әм жи дькарьн «бь гӧмане ша бьн», чьмки әм рʹьнд заньн кӧ Йаһоԝа ԝе һʹәму созед хԝә бинә сери. Кʹьтеба Пироз ӧса дьбежә: «Хԝәзи ль ԝи, кӧ . . . гӧмана ԝи ль сәр Хӧдан, Хԝәде ԝи йә» (Зәбур 146:5, 6).