1. Мина Даԝьд Пʹадша, әм дьбәкә чь дьпьрсьн?

ӘМ ГЬШК дьхԝазьн бь жийанәкә рʹьһʹәт у бедәрд бьжин. Ле әм чь жи бькьн йәкә әм щарна дьлтәнг дьбьн у рʹасти тәнгасийа тен. Гава әм рʹасти зәʹмәта тен, дьбәкә әм жи мина Даԝьд Пʹадша жь Йаһоԝа ӧса дьпьрсьн: «Һʹәта кʹәнге әзе бьнәʹльм, һәр рʹож дьлда дәрд у кӧл бьм?» (Зәбур 13:2).

2. Ве готареда, әме дәрһәԛа чь хәбәр дьн?

² Рʹаст ә, әм нькарьн жь һʹәму тәнгасийа бьфьльтьн, ле диса жи нә лазьм ә кӧ әм бь зедәйи хәма бькʹьшиньн. Ве готареда әме дәрһәԛа һьнә сәбәбед хәмед хԝә шеԝьр кьн. Ӧса жи, әме дина хԝә бьдьн шәш ширәтед керһати, йед кӧ дькарьн али мә бькьн ԝәки әм нава проблемада рʹьһʹәтийе хԝәй кьн.

3. Һьнә сәбәбед хәмед мә чь нә? Гәло әм дькарьн ван тьшта контрол бькьн?

³ Һьнә тьштед кӧ нә дь дәсте мәда ньн дькарьн хәма мә зедә бькьн. Мәсәлә, кʹьнщ, хԝарьн у кʹьрейа мала чьԛас дьчә бьһа дьбә. Ль мәкʹтәбе йан ль щийе хәбате, гәләк кәс ԛәлпи у бенамусийе дькьн, у әԝана щарна зоре ль мә дькьн кӧ әм жи бьбьнә мина ԝан. Ӧса жи дәр-дора мә зӧлми у зордари тʹьжә йә. Әм һьлбәт нькарьн тьштед ӧса бьдьн сәкьнандьн. Бь рʹасти сәбәба ван чәтьнайа әв ә кӧ пʹьрʹанийа мәрьва принсипед Кʹьтеба Пироз ԛәбул накьн. Шәйтʹан, йе кӧ хԝәйе ве дьнйайе йә, дьхԝазә  кӧ әм бь «хәмед ве дьнйайе» һаԛас мьжул бьн, ԝәки әм нькарьбьн Йаһоԝарʹа хьзмәт бькьн (Мәтта 13:22; 1 Йуһʹәнна 5:19). Ләма, әм әʹщебмайи наминьн кӧ дьнйа бь дәрдед гьранва тʹьжә йә!

4. Тәнгасийед жийане чаԝа дькарьн ль сәр мә һʹӧкӧм бькьн?

⁴ Тәнгасийед жийане дькарьн бона мә бьбьн баред гьран. Мәсәлә, әм дьбәкә дьтьрсьн кӧ әме хәбата хԝә ӧнда бькьн йан нәхԝәш кʹәвьн у нькарьбьн әʹбура малбәта хԝә бькьн. Йан жи, әм бәлки дьтьрсьн кӧ гава әм бен щерʹьбандьн, әме сьст бьбьн у ԛануна Хԝәде бьтʹәрьбиньн. Әм заньн кӧ дь дәмәкә незикда, Шәйтʹан ԝе кәсед кӧ дь бьн контрола ԝида ньн, дәʹф дә кӧ әԝ һʹьщуми сәр хьзмәткʹаред Хԝәде бькьн, ләма әм дьбәкә бәрхԝә дькʹәвьн кӧ ль ԝе дәме, әме чь бькьн. Гәло әв йәк кӧ әм дәрһәԛа тьштед ӧса бәрхԝә дькʹәвьн, нәрʹаст ә?

5. Мәʹнийа ван готьнед Иса Мәсиһ чь йә: «Хәма нәкьн»?

⁵ Әм заньн кӧ Иса Мәсиһ шагьртед хԝәрʹа ӧса готьбу: «Хәма нәкьн» (Мәтта 6:25). Гәло әв йәк те һʹәсабе кӧ гәрәке әм бона тʹӧ тьшти хәма нәкьн? На. Мәсәлә, ль дәмед бәре, һьнә хьзмәткʹаред Йаһоԝа дьлтәнг дьбун, ле Йаһоԝа диса жи ԝана ԛәбул дькьр * (1 Пʹадшати 19:4; Зәбур 6:3). Бь рʹасти Иса Мәсиһ бь готьнед хԝә дьхԝәст мерхасийе бьдә мә. Әԝ нахԝазә кӧ әм бь хәмед жийане һаԛас баргьран бьн, ԝәки әм нькарьбьн һәри зедә дина хԝә бьдьн хьзмәта Хԝәде. Гәло әм чаԝа дькарьн хәмед хԝә контрол бькьн? (Чаргошә « Чь Дькарә Али Тә Бькә?» бьньһерʹә.)

6. Ль гора Филипи 4:6, 7, чь дькарә хәмед мә дьһа сьвьк бькә у дьле мә рʹьһʹәт кә?

⁶ (1) Тʹьме дӧа бькә. Гава әм рʹасти тәнгасийа тен, дӧа дькарә али мә бькә (1 Пәтрус 5:7). Бь сайа дӧа, әм дькарьн «әʹдьлайийа Хԝәде кӧ жь һәр һʹьш-аԛьли дәрбазтьр ә», бьстиньн (Филипи 4:6, 7 бьхунә). Йаһоԝа ԝе пе рʹӧһʹе хԝәйи пироз хәмед мә дьһа сьвьк бькә у дьле мә рʹьһʹәт кә (Галати 5:22).

7. Гәрәке әм дәрһәԛа чь дӧа бькьн?

⁷ Гава тӧ Йаһоԝарʹа дӧа дьки, дьле хԝә ԝирʹа вәкә. Ԝирʹа һур бь һур бежә кӧ проблема тә чь йә, у гьли кә кӧ әв проблем ль сәр тә чаԝа һʹӧкӧм дькә. Һәгәр чʹарәйа проблема тә һәйә, жь ԝи билани у ԛәԝате бьхԝазә кӧ тӧ бькарьби ве чʹарәйе бьвини у бьхәбьтини. Ле һәгәр сафикьрьна проблеме дәсте тәда нинә, жь Йаһоԝа аликʹарийе бьхԝазә, ԝәки тӧ бь зедәйи хәма нәки. Һәгәр тӧ дь дӧайед хԝәда рʹастә-рʹаст бәʹса проблемед хԝә бьки, ԝәхт шунда тӧйе дьһа зәлал бьвини кӧ Йаһоԝа чаԝа щаба ван дӧайед тә дьдә. Һәгәр тӧ дәрберʹа щаба дӧайед хԝә нәстини жи, бәрдәԝам кә дӧа бькә, чьмки Йаһоԝа дьхԝазә кӧ тӧ һәртʹьм ԝирʹа дӧа бьки (Луԛа 11:8-10).

8. Ԝе баш бә кӧ әм дь дӧайед хԝәда бәʹса чь бькьн?

⁸ Хенщи ве йәке кӧ тӧ дь дӧайед хԝәда хәмед хԝә давежи сәр Йаһоԝа, ԝе баш бә кӧ тӧ рʹазибуна хԝә жерʹа бьди кʹьфше. Һʹале мә чьԛас зор бә жи, гәрәке әм кʹәрәмед кӧ мә жь Йаһоԝа стандьнә, бир нәкьн. Щарна бәлки ль тә зор те кӧ тӧ фькьр у хәмед хԝә бь зәлали әʹйан ки. Һәгәр тӧ тʹәне дькари бежи «Лава дькьм али мьн бькә!», Йаһоԝа ԝе диса жи щаба  дӧайа тә бьдә (2 Дирок 18:31; Рʹомайи 8:26).

9. Чахе тьрс дькʹәвә дьле мә әм гәрәке чь бькьн?

⁹ (2) Хԝә нәсперә аԛьле хԝә, ле хԝә бьсперә биланийа Йаһоԝа. Ль ԛьрʹна 8 йа Б.Д.М., щьмәʹта Щьһудайе жь Асурийа дьтьрсийа. Жь бо кӧ әԝ нәкʹәвьн бьн нире Асурийа, ԝана жь Мьсрийед пʹутпʹарьст аликʹари хԝәст (Ишайа 30:1, 2). Ле бәле, Йаһоԝа ԝанрʹа гот кӧ нета ԝан ԝе вала дәркʹәвә (Ишайа 30:7, 12, 13). Бь сайа Ишайа пʹехәмбәр, Йаһоԝа нишани ԝан кьр кӧ әԝана чаԝа дькарьн бенә хԝәйкьрьне. Ишайа гот: «Ԛәԝата ԝә ԝе йәкеда нә, ԝәки дьле хԝәда рʹьһʹәтийе хԝәйи кьн у итʹбари бьдьнә кʹьфше» (Ишайа 30:15б, ДТʹ).

10. Баԝәрийа мә һьндава Йаһоԝа чаԝа дькарә бе щерʹьбандьн?

¹⁰ Әм чаԝа дькарьн нишан кьн кӧ әм баԝәрийа хԝә Йаһоԝа тиньн? Ван се мәсәла бинә бәр чʹәʹве хԝә: (1) Тәрʹа хәбатәкә баш дьдьн, ле әв хәбат ԝе дьһа зедә ԝәхт жь тә бьстинә у тӧйе кем хьзмәт бьки. (2) Ль щийе хәбате, дьле кәсәки дькʹәвә тә, ле әԝ Шәʹде Йаһоԝа нинә. (3) Мәрьвәки тә тәрʹа дьбежә: «Бьжберә: Йан әз йан жи Йаһоԝа!» Дәрәщед ӧсада, щарна һеса нинә кӧ мәрьв сафикьрьна рʹаст бькә. Ле бәле, Йаһоԝа ԝе рʹебәрийа тә бькә (Мәтта 6:33; 10:37; 1 Корьнтʹи 7:39). Ньһа пьрс әв ә: Гәло тӧйе баԝәрийа хԝә бь ве рʹебәрийе бини у гӧһ бьди Йаһоԝа Хԝәде?

11. Кʹижан сәрһатийед Кʹьтеба Пироз дькарьн али мә бькьн кӧ әм ԝәʹде зерандьна дьлрʹьһʹәт бьминьн?

¹¹ (3) Жь мәсәлед баш у хьраб дәрса бьстинә. Гәләк сәрһатийед Кʹьтеба Пироз нишан дькьн кӧ пʹьрʹ фәрз ә ԝәки мәрьв рʹьһʹәт бьминә у итʹбарийа хԝә Йаһоԝа бинә. Гава тӧ ван сәрһатийа дьхуни, дина хԝә бьде кӧ чь али хьзмәткʹаред Хԝәде дькьр кӧ әԝ ԝәʹде зерандьнед гьран дьлрʹьһʹәт бьминьн. Мәсәлә, гава диԝана бьльнд йа Щьһуйа шандийед Иса Мәсиһрʹа гот кӧ бьра әԝ мьзгине бәла нәкьн, әԝана нәтьрсийан. Ԝана гот: «Әм гәрәке гӧрʹа Хԝәде бькьн, нә кӧ йа мәрьва» (Кʹаред Шандийа 5:29). Паши кӧ шанди данә бәр ԛамчийа, әԝана диса жи нәкʹәтьн панике. Гәло чьма? Чьмки ԝана заньбу кӧ Йаһоԝа тʹәви ԝан ә у жь ԝан рʹази йә. Ләма, ԝана бәлакьрьна мьзгине нәданә сәкьнандьне (Кʹаред Шандийа 5:40-42). Гава Щьһуйа дьхԝәст Стәйфан бькӧжьн, әԝ ӧса дьлрʹьһʹәт бу, кӧ «рʹәнг-рʹуйе ԝи мина рʹәнг-рʹуйе мьлйакʹәта бу» (Кʹаред Шандийа 6:12-15). Гәло чьма? Чьмки Стәйфан заньбу кӧ Йаһоԝа ԝи ԛәбул дькә.

12. Ль гора 1 Пәтрус 3:14 у 4:14, һәгәр әм рʹасти зерандьне бен жи, әм чьма дькарьн дьлша бьн?

¹² Ль ԛьрʹна йәке, Йаһоԝа Хԝәде әшкәрә дьда кʹьфше кӧ пьштгьрийа шандийа дькә. Мәсәлә, әԝи ԛәԝат да ԝан кӧ әԝана кʹәрәмәта бькьн (Кʹаред Шандийа 5:12-16; 6:8). Иро, Йаһоԝа ԛәԝатәкә ӧса надә мә. Диса жи, бь сайа Хәбәра хԝә, Йаһоԝа бь дьловани мәрʹа дьбежә кӧ гава әм бона рʹастийе дькʹәвьнә тәнгасийе, әԝ жь мә рʹази йә у рʹӧһʹе ԝи ль сәр мә йә (1 Пәтрус 3:14; 4:14 бьхунә). Ләма, нә лазьм ә кӧ әм бь зедәйи бьфькьрьн кӧ һәгәр зерандьна гьран дәстпебә, әме чь бькьн. Ԝе баш бә ԝәки әм бьфькьрьн кӧ әм чаԝа дькарьн баԝәрийа хԝә һьндава Йаһоԝа дьһа ԛәԝи кьн, чьмки тʹәне Йаһоԝа дькарә али мә бькә у мә хьлаз бькә. Мина шагьртед ль ԛьрʹна йәке, гәрәке әм баԝәрийа хԝә бь ве соза Иса  Мәсиһ биньн: «Әзе зар-зьман у сәрԝахтийе бьдьмә ԝә, кӧ дьжмьнед ԝәйе нькарьбьн ль бәр ԝә хәбәр дьн йан бьсәкьньн». Бәле, мәрʹа соз һатийә дайине кӧ һәгәр әм сәбьр бькьн, әме бенә хьлазкьрьне (Луԛа 21:12-19). Бь сәрда, һәгәр әм әʹмьре хԝә сәва амьнийа хԝә ӧнда бькьн жи, Йаһоԝа ԝе мә тʹӧ щара бир нәкә, у әԝе мә жь мьрьне рʹакә.

13. Ԝе чьма баш бә кӧ әм сәрһатийед кәсед кӧ дьлрʹьһʹәт нәдьман у итʹбарийа хԝә Йаһоԝа нәдьанин, леколин бькьн?

¹³ Ӧса жи, әм дькарьн жь сәрһатийед кәсед кӧ дьлрʹьһʹәт нәдьман у итʹбарийа хԝә Йаһоԝа нәдьанин жи, һьнә дәрса бьстиньн. Ԝе баш бә кӧ әм ван сәрһатийа леколин бькьн, ԝәки әм ԝан шашийа нәкьн. Мәсәлә, дь дәстпека һʹӧкӧмдарийа Аса, йе кӧ пʹадше Щьһуда бу, гава ордикә мәзьн һʹьщуми ԝи кьрьбу, әԝи хԝә спартьбу Йаһоԝа, у Йаһоԝа али ԝи кьр кӧ сәркʹәвә (2 Дирок 14:9-12). Ле чәнд сал шунда, гава Бааша, йе кӧ пʹадше Исраеле бу, бь ордикә дьһа бьчʹук һʹьщуми ԝи кьр, Аса Пʹадша дәԝса кӧ аликʹарийе жь Йаһоԝа бьхԝазә, әԝи зерʹ у зив да пʹадше Сурийайе, ԝәки әԝ али ԝи бькә (2 Дирок 16:1-3). Хенщи ве йәке, гава әԝ ида кал бу у гьран нәхԝәш кʹәт, әԝи хԝә нәспарт Йаһоԝа (2 Дирок 16:12).

14. Әм дькарьн жь шашийед Аса чь дәрсе бьстиньн?

¹⁴ Дь сәрида, гава Аса рʹасти чәтьнайа дьһат, әԝи итʹбарийа хԝә Йаһоԝа дьани. Ле паше, дәԝса кӧ аликʹарийа Хԝәде бьхԝазә, әԝи дьхԝәст проблемед хԝә бь методед хԝә сафи бькә. Әв йәк кӧ әԝи аликʹарийа Сурийайе хԝәст, дьбәкә ԝәк планәкә баш дьһат кʹьфше. Ле бәле, пʹьрʹ ԝәхт дәрбаз нәбу кӧ Йаһоԝа бь сайа пʹехәмбәрәки, ԝирʹа ӧса гот: «Мадәм кӧ тә хԝә сьпарт ԛьрале [пʹадше] Сурийе у тә хԝә нәсьпарт Хԝәдайе хԝә Хӧдан, ләма артеша ԛьрале Сурийе жь дәсте тәва рʹәвийа у хьлаз бу» (2 Дирок 16:7). Жь ве сәрһатийе, гәло әм дькарьн чь дәрсе бьстиньн? Дьбә кӧ проблемәкә мә һәйә у лазьм ә кӧ әм зу сафикьрьне бькьн. Дь һʹаләки ӧсада, гәрәке әм бь зедәйи хԝәбаԝәр нәбьн у нәфькьрьн кӧ әм дькарьн ве проблеме бей рʹебәрийа Хәбәра Хԝәде сафи бькьн. Ле бәле, һәгәр әм рʹьһʹәт бьминьн у хԝә бьсперьн Йаһоԝа, әԝе али мә бькә кӧ әм сафикьрьнәкә рʹаст бькьн.

15. Гава әм Кʹьтеба Пироз дьхуньн, ԝе баш бә кӧ әм чь бькьн?

¹⁵ (4) Рʹеза әзбәр бькә. Гәләк рʹезед Кʹьтеба Пироз нишан дькьн кӧ һәгәр әм рʹьһʹәт бьминьн у итʹбарийа хԝә Йаһоԝа биньн, әме ԛәԝат бьн. Гава әм Кʹьтеба Пироз дьхуньн у рʹасти рʹезед ӧса тен, ԝе баш бә кӧ әм ԝан әзбәр бькьн. Бона ве йәке, дьбәкә баш бә кӧ әм ван рʹеза бь дәнге бьльнд бьхуньн. Йан жи, әм дькарьн ԝана бьньвисьн у гәләк щара бьхуньн. Йаһоԝа Йешурʹа готьбу кӧ бьра әԝ кʹьтеба Ԛануне һәртʹьм бь дәнге ньмьз бьхунә, ԝәки әԝ билан бә. Әв рʹебәри ԝе али ԝи бькьра кӧ әԝ щабдарийа хԝә бетьрс пек бинә (Йешу 1:8, 9). Дь ве дьнйайеда, гәләк инсан сәва проблемед хԝә хәма дькʹьшиньн у дьтьрсьн. Гава әм рʹасти тәнгасийед ӧса тен, готьнед Хәбәра Хԝәде дькарьн али мә бькьн кӧ һʹьш у дьле мә рʹьһʹәт бә (Зәбур 27:1-3; Мәтʹәлок 3:25, 26).

16. Йаһоԝа чаԝа бь сайа щьвате али мә дькә кӧ әм рʹьһʹәт бьминьн у итʹбарийа хԝә ԝи биньн?

¹⁶ (5) Тʹәви хьзмәткʹаред Хԝәде ԝәхт дәрбаз бькә. Йаһоԝа бь сайа хушк-бьра  али мә дькә кӧ әм дьлрʹьһʹәт бьминьн у итʹбарийа хԝә ԝи биньн. Ль щьвина, әм жь рʹебәрийа кӧ жь сене те дайин, жь щабед гӧһдара у жь хәбәрдана тʹәви хушк-бьра, кʹаре дьстиньн (Ибрани 10:24, 25). Ӧса жи, әм дькарьн дьле хԝә хушк-бьред амьнрʹа вәкьн. «Готьнәкә ԛәнщ» йа достәки мә дькарә баре хәмед мә дьһа сьвьк бькә (Мәтʹәлок 12:25).

17. Ль гора Ибрани 6:19, һевийа Пʹадшатийе чаԝа дькарә али мә бькә кӧ әм сәбьр бькьн?

¹⁷ (6) Һевийа хԝә хԝәй бькә. Һевийа Пʹадшатийе мина «ләнгәр» ә бона мә у али мә дькә кӧ әм ԝәʹде хәм у тәнгасийа сәбьр бькьн (Ибрани 6:19 бьхунә). Йаһоԝа соз дайә кӧ дь дәмәкә незикда, фькред нәгатиф ԝе ида нәйен бира мә (Ишайа 65:17). Бинә бәр чʹәʹве хԝә кӧ тӧ ида дьнйа тʹәзәда ни, у кӧл у дәрд ида тʹӧнә (Миха 4:4). Сәва кӧ һевийа тә дьһа ԛәԝи бә, кәсед дьнрʹа бәʹса һевийа хԝә бькә. Мьзгина Пʹадшатийе бь дьл у щан бәла бькә. Бь ви аԝайи, тӧйе бькарьби һевийа хԝә һʹәта хьлазийе ԛайим бьгьри (Ибрани 6:11).

18. Һәгәр әм рʹасти тәнгасийа бен, чь дькарә али мә бькә?

¹⁸ Чьԛас әм незики хьлазийа ве системе дьбьн, һаԛас әме рʹасти һе зедә тәнгасийа бен, йед кӧ дькарьн хәмед мә зедә бькьн. Рʹеза сала 2021 дькарә али мә бькә кӧ әм нава тәнгасийед ӧса нә бь сайа аԛьле хԝә, ле бь сайа баԝәрийа хԝә һьндава Йаһоԝа рʹьһʹәт бьминьн. Исал, ԝәрә әм бь готьн у кьред хԝә нишан бькьн кӧ әм бь ве соза Йаһоԝа баԝәр ьн: Һәгәр һун дьле хԝәда рʹьһʹәтийе хԝәйи бькьн у итʹбари бьдьн кʹьфше, һуне ԛәԝат бьн! (Ишайа 30:15).