1-3. Һьнә хьзмәткʹаред Йаһоԝа чьрʹа дьгьрин?

 ТЕ БИРА тә кӧ щара пашьн, тӧ кʹәнге гьрийайи? Щарна, чʹәʹвед мә жь бо шабуне тʹьжи һесьр дьбьн, ле һʹәчʹи зәʹф, мәʹнийа һесьред мә дьлтәнги йә. Мәсәлә, гава мәрьвәки мәйи һʹьзкьри дьмьрә, әм дьгьрин. Хушкәкә бь наве Лорел, йа кӧ ль Америкайе дьжи, ӧса ньвиси: «Паши мьрьна ԛиза мьн, еша дьле мьн щара ӧса гьран дьбу, ԝәки тʹӧ тьшти нькарьбу дьле мьн рʹьһʹәт кьра, чьмки ԛәԝат у сәбра мьн ԛәт нәдьма». *

² Мәрьв сәва тьштед дьн жи дьгьрин. Мәсәлә, пешәнгәкә бь наве Һироми, йа кӧ ль Жапонйайе дьжи, ӧса дьбежә: «Щара чахе мәрьв хьзмәтеда гӧһ надьнә мьзгине, әз дьлтәнг дьбьм. Ләма жи, әз щарна бь һесьра жь Йаһоԝа аликʹарийе дьхԝазьм, ԝәки рʹасти мәрьвәки ӧса бем, кʹижан кӧ рʹастийе дьгәрʹә».

³ Әм жи рʹасти дәрәщед ӧса тен, ӧса нинә? (1 Пәтрус 5:9) Рʹаст ә әм дьхԝазьн «бь шабуне» Йаһоԝарʹа хьзмәт кьн, ле диса жи щара кӧл-дәрд йан проблемед кӧ амьнийа мә дьщерʹьбиньн, дьбьн мәʹни кӧ әм бь һесьра Йаһоԝарʹа хьзмәт дькьн (Зәбур 6:6; 100:2). Гәло әм чь дькарьн бькьн чахе хԝә ӧса тʹәхмин дькьн?

4. Ве готареда, әме чь шеԝьр кьн?

⁴ Ԝе баш бә кӧ әм дина хԝә бьдьн мәсәла Иса. Щара һәбун дәрәщед ӧса, кӧ Иса жи дьгьрийа (Йуһʹәнна 11:35; Луԛа 19:41; 22:44; Ибрани 5:7). Ԝәрә әм дина хԝә бьдьн ван дәрәща у бьвиньн кӧ әм чь дькарьн һин бьн. Ӧса жи, әме бьвиньн кӧ әм ча дькарьн сәри бь ван чәтьнайа дәрхьн, йед кӧ дьбьнә мәʹнийа һесьред мә.

5. Готьнед жь Йуһʹәнна 11:32-36 дәрһәԛа Иса чь мә һин дькьн?

⁵ Зьвьстане, сала 32 Д.М., достәки Иса бь наве Лазар нәхԝәш кʹәт у мьр (Йуһʹәнна 11:3, 14). Дӧ хушкед ԝи һәбун, Мәрйәм у Мәртʹа. Иса ве малбәте гәләк һʹьз дькьр. Мәрйәм у Мәртʹа сәва мьрьна бьре хԝә гәләк хәмгин дьбун. Паши мьрьна Лазар, Иса чу гӧнде ԝан. Гава Мәртʹайе бьһист кӧ Иса те, әԝ ләзә-ләз чу, ԝәки ԝи бьвинә. Гава әԝ рʹасти Иса һат, әԝе бь хәмгини ӧса гот: «Хӧдан, һәгәр тӧ вьр буйайи, бьре мьн нәдьмьр» (Йуһʹәнна 11:21). Чахе Иса дит ԝәки Мәрйәм у кәсед дьн дьгьрин, әԝ жи гьрийа (Йуһʹәнна 11:32-36 бьхунә).

6. Ве дәрәщеда гәло Иса чьрʹа гьрийа?

⁶ Ԝе дәрәщеда гәло Иса чьрʹа гьрийа? Кʹьтеба «Фәʹмкьрьна Ньвисареда» ӧса һатийә готьне: «Жь бо мьрьна досте хԝә Лазар у жь бо еша дьле хушкед ԝи, ‹кʹәсәра кʹур› һатә Иса у әԝ ‹гьрийа›». * Дьԛәԝьмә Иса дәрһәԛа нәхԝәши у еша досте хԝә фькьри у да бәр чʹәʹве хԝә, кӧ гава Лазар бәр мьрьне бу, әԝи чь тʹәхмин дькьр. Ӧса жи, дьле Иса шәԝьти гава әԝи дит, кӧ Мәрйәм у Мәртʹа шина бьре хԝә дькьн. Һәгәр тә жи һәвал йан мәрьвәки хԝә ӧнда кьрийә, һәмьки тӧ жи дәрдәки гьран дькʹьшини. Ԝәрә әм бьньһерʹьн кӧ жь ве дәрәще әм чь дькарьн һин бьн.

7. Әв йәк кӧ Иса бона достед хԝә дьгьрийа, дәрһәԛа Йаһоԝа чь мә һин дькә?

⁷ Йаһоԝа һәстед тә фәʹм дькә. Иса һәр алийава чʹәʹв дьдә Баве хԝә у «хут мина һәйинтийа ԝи йә» (Ибрани 1:3). Гава Иса дьгьрийа, әԝи һәстед Баве хԝә әʹйан дькьр (Йуһʹәнна 14:9). Һәгәр тә мәрьвәки хԝәйи һʹьзкьри ӧнда кьрийә, баԝәр бә кӧ Йаһоԝа еша дьле тә дьвинә, у дьле ԝи сәр тә дьшәԝьтә.  Әԝ дьхԝазә еша дьле тә сьвьк кә (Зәбур 34:18; 147:3).

8. Әм чьрʹа дькарьн баԝәр бьн, ԝәки Иса ԝе мәрьвед мәйи һʹьзкьри жь мьрьне рʹакә?

⁸ Иса дьхԝазә мәрьвед тәйи һʹьзкьри жь мьрьне рʹакә. Пешийа кӧ Иса гьрийа, әԝи Мәртʹайерʹа гот: «Бьре тәйе жь мьрьне рʹабә». Мәртʹа баԝәрийа хԝә готьнед Иса дьани (Йуһʹәнна 11:23-27). Мәртʹа хьзмәткʹара Йаһоԝа бу, ләма жи әԝе заньбу кӧ чәнд ԛьрʹнә пешда, Елйас у Елиша пʹехәмбәр һьнә мәрьв жь мьрьне рʹакьрьбун (1 Пʹадшати 17:17-24; 2 Пʹадшати 4:32-37). Ӧса жи, Мәртʹайе дьбәкә бьһистьбу ԝәки Иса жи һьнә кәс жь мьрьне рʹакьрьбун (Луԛа 7:11-15; 8:41, 42, 49-56). Тӧ жи дькари баԝәр би ԝәки рʹожәке, тӧйе мәрьвед хԝәйи һʹьзкьри кӧ мьрьнә, диса бьвини. Әв йәк кӧ Иса тʹәви достед хԝә дьгьрийа, нишани мә дькә ԝәки әԝ бь рʹасти дьхԝазә мьрийа рʹакә.

9. Мина Иса, әм ча дькарьн бәрдьлийе бьдьнә кәсед кӧ шине дькьн?

⁹ Дьлбинийе бьдә кәсед кӧ шине дькьн. Хенщи ве йәке кӧ Иса тʹәви Мәртʹа у Мәрйәме гьрийа, әԝи гӧһ да ԝан у бәр дьле ԝанда һат. Ԝе баш бә кӧ әм жи бәр дьле ԝан мәрьвада бен, йед кӧ шине дькьн. Рʹуспики бь наве Дан, йе кӧ ль Австралйайе дьжи, дьбежә: «Чахе мьн жьна хԝә ӧнда кьрьбу, әз һʹәԝще бәрдьлийе бум. Чәнд бьра тʹәви жьнед хԝә һазьр бун шәв у рʹож гӧһ бьдьн мьн. Әԝана сәва һесьред чʹәʹвед мьн әʹщьз нәдьбун у нәдьготьн кӧ ида бәс ә. Ӧса жи, ԝана гәләк али мьн дькьр. Мәсәлә, гава мьн хԝә бетʹаԛәт тʹәхмин дькьр, ԝана әʹрәба мьн дьшушт, бона мьн дьчунә дькʹане у хԝарьн һазьр дькьрьн. Ӧса жи, ԝана гәләк щара тʹәви мьн дӧа дькьр. Әԝана рʹасти жи ‹бона рʹожа охьрме гьран› мьнрʹа бун дост у бьра» (Мәтʹәлок 17:17).

10. Ль гора Луԛа 19:36-40, гава Иса чу Оршәлиме, чь ԛәԝьми?

¹⁰ Иса, 9 Нисане сала 33 Д.М., гьһиштә Оршәлиме. Гава әԝ незики бажер бу, щьмәʹт тʹоп бу у кʹьнщед хԝә сәр рʹе рʹахьстьн, чьмки ԝана әԝ ча Пʹадше хԝә ԛәбул дькьр. Әԝ рʹож бь рʹасти жи рʹожәкә хԝәш бу (Луԛа 19:36-40 бьхунә). Ле паши ве йәке, тьштәки әʹщеб ԛәԝьми: «Гава [Иса] незики Оршәлиме бу, ль бажер ньһерʹи, сәрда гьрийа». Иса бь һесьра гот, кӧ чь ԝе бе сәре щьмәʹта Оршәлиме (Луԛа 19:41-44).

11. Иса чьма бона щьмәʹта Оршәлиме гьрийа?

¹¹ Гәло Иса чьма хәмгин бу? Рʹаст ә һьнә мәрьв Иса ԛәбул дькьрьн, ле диса жи әԝи заньбу кӧ һʹәчʹи зәʹф Щьһу ԝе мьзгинийа Пʹадшатийе инкʹар кьн. Ахьрийеда, Оршәлим ԝе бьһата ԝеранкьрьне, у кәсед кӧ ԝе сах бьмана ԝе бьбуна дил (Луԛа 21:20-24). Сәд һʹәйф кӧ ча Иса пешда готьбу, һʹәчʹи зәʹф мәрьва әԝ инкʹар кьрьн. Ле мәрьвед мьһала тәда мьзгинийа Пʹадшатийе ԛәбул дькьн? Һәгәр ниве зәʹф жь ԝана гӧһ надьнә тә, у тӧ дьфькьри ԝәки ԛәԝата тә бадиһәԝа йә, гәло тӧ дькари жь һесьред Иса чь һин би? Ԝәрә әм дина хԝә бьдьнә ван се дәрса.

12. Әв йәк кӧ Иса бона мәрьва гьрийа, дәрһәԛа Йаһоԝа чь әʹйан дькә?

¹² Йаһоԝа бона мәрьва хәм дькә. Һесьред Иса тиньн бира мә, ԝәки Йаһоԝа чьԛас бона мәрьва хәм дькә. Әԝ «нахԝазә тʹӧ кәс ӧнда бә, ле дьхԝазә ԝәки  һʹәму жь гӧнәкьрьне вәгәрʹьн» (2 Пәтрус 3:9). Гава әм тьштәк жь хԝә кем дькьн у бь хирәт мьзгинийе дьгьһиньнә дьле мәрьва, әм нишан дькьн кӧ әм ԝана һʹьз дькьн (Мәтта 22:39). *

13-14. Иса ча дьлшәԝати дьда кʹьфше, у әм ча дькарьн ве йәкеда чʹәʹв бьдьнә ԝи?

¹³ Иса бь дьл у щан хьзмәт дькьр. Әԝи һәр мәщал дьда хәбате, ԝәки мәрьва һин кә. Бь ви щурʹәйи, әԝи нишан дькьр кӧ ԝана һʹьз дькә (Луԛа 19:47, 48). Гәло чьрʹа? Чьмки дьле ԝи сәр мәрьва дьшәԝьти. Щарна мәрьвед кӧ дьхԝәстьн гӧһ бьдана Иса ӧса зәʹф бун, ԝәки әԝ у шандийед ԝи «нькарьбун нане хԝә жи бьхԝарана» (Марԛос 3:20). Иса һәла һе шәв жи һазьр бу гӧһ бьдә мәрьва. Мәсәлә, чахе мерәки хԝәст ниве шәве тʹәви Иса хәбәр дә, Иса хԝәстьна ԝи ԛәбул кьр (Йуһʹәнна 3:1, 2). Гәләк мәрьвед кӧ серида  гӧһ дьданә Иса, паше нәбун шагьртед ԝи. Ле йәкә ԝанрʹа шәʹдәтикә баш һатә дайине. Иро, әм жи дьхԝазьн мәщале бьдьн һʹәму мәрьва, ԝәки мьзгинийа Пʹадшатийе бьбьһен (Кʹаред Шандийа 10:42). Ләма жи, дьбәкә мәрʹа лазьм бә методед тʹәзә хьзмәтийеда бьдьнә хәбате.

¹⁴ Графика хԝә ль гора һʹәԝщед мәрийа бьгӧһезә. Һәгәр әм тʹәне ԝәʹдәки дьжберьн кӧ хьзмәт кьн, әме дьԛәԝьмә нькарьбьн рʹасти ԝан мәрьва бен, йед кӧ ԝе бьхԝәстана мьзгинийе ԛәбул кьн. Пешәнгәкә бь наве Матилда ӧса дьбежә: «Әз мере хԝәва щурʹә-щурʹә сьһʹәта дьчьнә хьзмәтийе. Шәбәԛе зу, әм дьчьн щийе хәбата мәрьва. Нивро, гава гәләк мәрьв дәрва нә, әм бь стенда хьзмәт дькьн. Паши нивро, әм дьчьн мал бь мал». Дәԝса кӧ ви чахи хьзмәт кьн гава мәрʹа дәст дьдә, ԝе баш бә ԝәки әм графика хԝә ӧса бьгӧһезьн, кӧ мьзгинийе бьгьһиньн һе зедә мәрьва. Һәгәр әм ӧса бькьн, әм дькарьн баԝәр бьн, ԝәки дьле Йаһоԝа ԝе ша бә.

15. Ль гора Луԛа 22:39-44, шәва пешийа мьрьна Иса, чь ԛәԝьми?

¹⁵ Еваре, 14 Нисане, сала 33 Д.М., Иса тʹәви шандийед хԝә чу бахче Гетшәмани. Ԝедәре, әԝи дьле хԝә Йаһоԝарʹа вәкьр (Луԛа 22:39-44 бьхунә). Ԝан сьһʹәтед чәтьнда, Иса бь «кʹәсәр у бь һесьра лава у рʹәща» Хԝәде дькьр (Ибрани 5:7). Шәва пешийа мьрьна хԝә, гәло Иса бона чь дӧа кьр? Әԝи ԛәԝат хԝәст, ԝәки бькарьбә Йаһоԝарʹа амьн бьминә у ԛьрара ԝи бинә сери. Йаһоԝа гӧһ да дӧайе Кӧрʹе хԝә у мәләкәк шанд, ԝәки ԝи бьшьдинә.

16. Гава Иса бахче Гетшәманида дӧа дькьр, әԝ чьма дьлтәнг бу?

¹⁶ Ԝе шәве, гәло Иса чьма бь һесьра дӧа кьр? Әԝ бешьк гәләк дьлтәнг бу, чьмки мәрьв ԝи һʹәсаб дькьрьн ча кәсе кӧ наве Хԝәде беһӧрмәт дькә. Ӧса жи, әԝи заньбу ԝәки гәләк фәрз ә кӧ әԝ амьн бьминә у наве Баве хԝә пироз кә. Гава тӧ дькʹәви дәрәщәкә ӧса кӧ амьнийа тә те щерʹьбандьне, гәло тӧ дькари жь һесьред чʹәʹвед Иса чь һин би? Ԝәрә әм дина хԝә бьдьнә ван се дәрса.

17. Әм дәрһәԛа Йаһоԝа чь педьһʹәсьн жь ве йәке, кӧ әԝи щаба дӧайе Иса да?

¹⁷ Йаһоԝа гӧһ дьдә дӧа-дьрозге тә. Йаһоԝа гӧһ да дӧа-дьрозге Иса. Гәло чьрʹа? Чьмки нета сәрәкә йа Иса әԝ бу, ԝәки Баве хԝәрʹа амьн бьминә у наве Ԝи пироз кә. Һәгәр нета мәйә сәрәкә жи әԝ бә кӧ әм Йаһоԝарʹа амьн бьминьн у наве ԝи пироз кьн, әԝе гӧһ бьдә дӧа-дьрозге мә жи (Зәбур 145:18, 19).

18. Гәло Иса һәстед мәрьвед дьлтәнг фәʹм дькә?

¹⁸ Иса һәстед тә фәʹм дькә. Чахе әм дьлтәнг ьн у һәваләки мә бәр дьле мәда те, әм гәләк ша дьбьн. Илаһи һәгәр әм заньн кӧ әԝ мә рʹьнд фәʹм дькә, чьмки әԝ хԝәха жи рʹасти тәнгасикә ӧса һатьбу. Иса һәма достәки ӧса йә, чьмки әԝи хԝәха сәр хԝә тʹәхмин кьрийә, кӧ чь те һʹәсабе дьлтәнги у бетʹаԛәти. Әԝ мә фәʹм дькә, у «гава әм һʹәԝщә бьн» әԝе әʹсәйи бе һәԝара мә у дьлбинийе бьдә мә (Ибрани 4:15, 16). Чаԝа кӧ бахче Гетшәманида,  Иса аликʹарийа мәләкәки ԛәбул кьр, гәрәке әм жи һазьр бьн ԝәки аликʹарийа Йаһоԝа ԛәбул кьн, кʹижан кӧ әԝ бь сайа әʹдәбйәт, видео, готар, сәрледана рʹуспийа йан достед гьһишти дьдә мә.

19. Гава амьнийа мә те щерʹьбандьне, әм жь кʹидәре дькарьн ԛәԝате бьстиньн?

¹⁹ Йаһоԝа ԝе «әʹдьлайийа Хԝәде» бьдә мә. Гәло Йаһоԝа ԝе ча али мә бькә? Һәрге әм дӧа дькьн, әме «әʹдьлайийа Хԝәде кӧ жь һәр һʹьш-аԛьли дәрбазтьр ә» бьстиньн (Филипи 4:6, 7). Әʹдьлайа кӧ Йаһоԝа дьдә, рʹьһʹәтийе дькә һʹьш у дьле мә. Ԝәрә әм дина хԝә бьдьн кӧ Йаһоԝа ча али хушкәкә бь наве Луз кьр. Әԝ дьбежә: «Щарна, әз хԝә тʹәне тʹәхмин дькьм у дьфькьрьм ԝәки Йаһоԝа мьн һʹьз накә. Ле ве дәме, әз дәрберʹа дьле хԝә Йаһоԝарʹа вәдькьм. Дӧа дьле мьн рʹьһʹәт дькә». Чаԝа кӧ мәсәла хушка мә нишан дькә, әм дькарьн бь сайа дӧа рʹьһʹәтийа дьл бьстиньн.

20. Мә жь һесьред Иса чь дәрс станд?

²⁰ Һесьред Иса дәрсед гәләк фәрз мә һин дькьн! Һесьред ԝи тиньн бира мә кӧ гәрәке әм аликʹарийе бьдьн һәвалед хԝә, йед кӧ шине дькьн, у баԝәр бьн кӧ һәгәр әм мәрьве хԝәйи һʹьзкьри ӧнда кьн, Йаһоԝа у Иса ԝе дьлбинийе бьдьнә мә. Ӧса жи, һесьред ԝи тиньн бира мә, ԝәки әм гәрәке мьзгинийе бь дьлрʹәʹми бәла кьн, чьмки дьле Йаһоԝа у Иса сәр мәрьва дьшәԝьтә. Хенщи ве йәке, һесьред Иса нишани мә дькьн кӧ Йаһоԝа у Кӧрʹе ԝи һәст у сьстбунед мә фәʹм дькьн у дьхԝазьн али мә бькьн ԝәки әм амьн бьминьн. Һʹәта рʹожа кӧ Йаһоԝа ԝе «һʹәму һесьред [мә] паԛьж кә», ԝәрә әм ван дәрсед фәрз тʹӧ щар бир нәкьн у әʹмьре хԝәда бьдьнә хәбате! (Әʹйанти 21:4)