1. Даԝьд чь һʹаләки зорда бу?

 ДАԜЬД жь Шаԝул Пʹадша дьрʹәвийа, йе кӧ ԝи нәфрʹәт дькьр у дьхԝәст әԝ бькӧшта. Гава Даԝьд һʹәԝще хԝарьне бу, әԝи бажаре Нобеда пенщ нан хԝәстьн (1 Самуйел 21:1, 3). Паше, әԝи тʹәви һәвалед хԝә, шкәфтәкеда хԝә вәшарт (1 Самуйел 22:1). Гәло Даԝьд чьрʹа кʹәтә һʹаләки ӧса зор?

2. Шаԝул сәре хԝә чаԝа кьрә бәлайе? (1 Самуйел 23:16, 17)

² Шаԝул һʹәвсудийа Даԝьд дькьр, чьмки щьмәʹте ԝи һʹьз дькьр у әԝ әскәрәки гәләк пешдачуйи бу. Ӧса жи, Шаԝул заньбу кӧ сәва нәгӧһдарибуна ԝи, Йаһоԝа әԝ инкʹар кьрьбу у дәԝса ԝи Даԝьд ча пʹадше Исраеле бьжартьбу (1 Самуйел 23:16, 17 бьхунә, ИМ). Диса жи, ордикә мәзьн у гәләк кәсед дьн пьштгьрийа Шаԝул дькьрьн, ләма жи Даԝьд мәщбур бу кӧ бьрʹәвә. Гәло Шаԝул бь рʹасти дьфькьри, кӧ дькарә рʹийа Хԝәде бьгьрә, ԝәки Әԝ ԛьрара хԝә һьндава Даԝьд бинә сери? (Ишайа 55:11) Кʹьтеба Пироз щаба ве пьрсе надә, ле ча те кʹьфше Шаԝул сәре хԝә кьрә бәлайе, чьмки кәсед кӧ мьԛабьли Хԝәде шәрʹ дькьн, тʹьме дьдьнә дәр!

3. Нава тәнгасийед хԝәда Даԝьд чь гот?

³ Даԝьд йәки мьлук бу. Әԝ пәй ве йәке нәкʹәтьбу ԝәки бьбә пʹадше Исраеле, ле Йаһоԝа әв щабдари да ԝи (1 Самуйел 16:1, 12, 13). Шаԝул Пʹадша гәләк Даԝьд нәфрʹәт дькьр, ле Даԝьд сәва һʹале хԝәйи хьраб  Йаһоԝа сущдар нәдькьр у газьна нәдькьр кӧ хԝарьна ԝи кем бу у кӧ әԝ мәщбур бу хԝә шкәфтәкеда вәшерә. Сәрда жи, дьбәкә әԝи ве шкәфтеда әв готьнед пәсьндайине ньвиси: «Әԝед кӧ Йаһоԝа дьгәрʹьн ԝе кемасийа тʹӧ ԛәнщийе нәвиньн» (Зәбур 34:10, ДТʹ).

4. Әме щабед кʹижан пьрса бьстиньн, у әв пьрс чьма фәрз ьн?

⁴ Иро, гәләк хьзмәткʹаред Йаһоԝарʹа чәтьн ә әʹбура хԝә бькьн у нане рʹоже дәст хьн. Ԝәʹде пандәмийе, әв йәк дьһа зор буйә. * Ӧса жи, чьԛас әм незики «тәнгасийа мәзьн» дьбьн, әм заньн ԝәки жийин ԝе дьһа зор бә (Мәтта 24:21). Ләма жи, ԝе баш бә кӧ әм дина хԝә бьдьн ван чар пьрса: Даԝьд чаԝа «кемасийа тʹӧ ԛәнщийе» нәдьдит? Чьма фәрз ә, ԝәки чьԛас дәсте мәда һәйә бь ԝан рʹази бьн? Әм чьрʹа дькарьн баԝәр бьн, ԝәки Йаһоԝа ԝе мә хԝәй кә? У әм ча дькарьн хԝә бона ахьрийе һазьр кьн?

5-6. Даԝьд чь дьхԝәст бьгота чахе гот, ԝәки хьзмәткʹаред Йаһоԝа «ԝе кемасийа тʹӧ ԛәнщийе нәвиньн»?

⁵ Гәло хьзмәткʹаред Йаһоԝа чаԝа «ԝе кемасийа тʹӧ ԛәнщийе нәвиньн»? Сәва кӧ әм ван готьна дьһа баш фәʹм бькьн, ԝәрә әм бьньһерʹьн Даԝьд Зәбура 23-да чь гот (Зәбур 23:1-6 бьхунә). Дәстпека ве зәбуреда, Даԝьд ӧса гот: «Хӧдан шьване мьн ә, әз нә һʹәԝще тьштәки мә». Рʹезед дьнда жь ве зәбуре, Даԝьд бәʹса кʹәрәмед рʹӧһʹани кьр, йед кӧ әԝи дьстанд, чьмки Йаһоԝа ча шьване хԝә ԛәбул дькьр. Йаһоԝа әԝ «шьвәрʹийед рʹастийеда» дьбьр, у ԝәʹде баш у хьрабда тʹьме бь амьни кʹеләка Даԝьд бу. Даԝьд фәʹм дькьр ԝәки жийина «мерген» Йаһоԝада, демәк дәштед ԝида, найе һʹәсабе жийинәкә бедәрд. Әԝи заньбу ԝәки щарна,  әԝе дьлтәнг бә, у ча бежи «гәлийе сийа мьрьнеда» дәрбаз бә, у дьжмьнед ԝи ԝе һәбьн. Ле чьмки Йаһоԝа Шьване ԝи бу, әԝ жь тʹӧ тьшти нәдьтьрсийа.

⁶ Гәло Даԝьд чаԝа «кемасийа тʹӧ ԛәнщийе» нәдьдит? Жь алийе рʹӧһʹанива, тʹӧ кемасийа ԝи тʹӧнә бу. Шабуна ԝи мал у мьлкʹва гьредайи нибу. Даԝьд бона һәр тьшти чь кӧ Йаһоԝа дьда ԝи, рʹази бу. Бона ԝи тьште һәри фәрз әв бу, ԝәки Йаһоԝа әԝ кʹәрәм дькьр у дьпараст.

7. Ль гора Луԛа 21:20-24, һьнә шагьртед Иса рʹасти чь тәнгасийе һатьн?

⁷ Һәмьки әм дькарьн жь мал у мьлкʹе хԝә шабуне бьстиньн, ле ча готьнед Даԝьд нишан дькьн, гәрәке әм жийина хԝәда тьштед материали ча тьштед һәри фәрз һʹәсаб нәкьн. Ԝе йәкеда, шагьртед Иса, йед кӧ ԛьрʹна йәкеда ль Щьһустане дьжитьн, мәрʹа мәсәлә нә (Луԛа 21:20-24 бьхунә). Иса пешда шагьртед хԝәрʹа готьбу, ԝәки рʹожәке әԝана ԝе «бьбиньн кӧ ордийа дора Оршәлиме гьртийә». Һьнге ԝе лазьм буйа кӧ әԝ «бьрʹәвьнә чʹийа». Бәле, әԝана ԝе ԝәʹде ԝеранкьрьна Оршәлиме сах бьмана, ле сәва ве йәке ԝана гәрәке гәләк тьшт ԛӧрбан кьра. Чәнд сал пешда, «Бьрща Ԛәрәԝьлийеда» ӧса һатьбу готьне: «Ԝана хани у зәвийед хԝә һишт, у нькарьбун һәбука хԝә тʹәви хԝә бьвьн. Әԝана баԝәр бун ԝәки Йаһоԝа ԝе али ԝан бькә у ԝана хԝәй кә, у жийина ԝанда һʹәбандьна Йаһоԝарʹа сәр щийе пешьн бу».

8. Әм дькарьн жь сәрһатийа шагьртед Иса, йед кӧ ԛьрʹна йәке Щьһустанеда дьжитьн, чь дәрсе һин бьн?

⁸ Гәло әм дькарьн жь ван шагьртед Иса чь дәрсе һин бьн? Ве «Бьрща Ԛәрәԝьлийеда» ӧса һатьбу готьне: «Рʹожед ахьрийеда, дьбәкә ньһерʹандьна мә сәр һәбуке ԝе бе щерʹьбандьне. Ԝи чахи бона мә тьште һәри фәрз ԝе чь бә? Тьштед материали йан әв йәк кӧ Йаһоԝарʹа амьн бьминьн у хьлаз бьн? Рʹожед хьлазийа ве дьнйайе дьбәкә әм рʹасти тәнгасийед ӧса бен, кӧ әме мәщбур бьн гәләк тьшта жь хԝә кем кьн. Мина Мәсиһийед кӧ жь Щьһустане рʹәвийан, гәрәке әм жи һазьр бьн чь лазьм бә бькьн, ԝәки хьлаз бьн». *

9. Ширәта кӧ Паԝлосе шанди дабу Ибранийа чаԝа һелане дьдә мә?

⁹ Һәла бьдә бәр чʹәʹве хԝә кӧ бона ван шагьртед Иса Мәсиһ чьԛас зор бу һәр тьшти бьһельн у тʹәзәда һәр тьшти дәстпекьн! Лазьм бу кӧ әԝана баԝәрийа хԝә Йаһоԝа биньн, ԝәки әԝ ԝе бона һʹәԝщед ԝан хәм бькә. Ле пенщ сал пешийа кӧ Рʹомайа дора бажаре Оршәлиме гьрт, Паԝлосе шанди әв ширәта керһати дабу хушк-бьред Ибрани: «Пʹәрәһʹьзи бьра нава жийина ԝәда щи нәгьрә у дәстед ԝәда чьԛас һәйә, рʹази бьн, чьмки Хԝәде гот: ‹Әзе тʹӧ щар жь тә нәчьм у тʹӧ щар тә бәрʹнадьм›. Ләма жи рʹуйе мә дьгьрә кӧ әм бежьн: ‹Хӧдан пьштоване мьн ә у әз натьрсьм. Инсане чь ль мьн бькә?›» (Ибрани 13:5, 6). Ԝан Мәсиһийарʹа, йед кӧ пешийа һатьна ордийа Рʹоме гӧһ дабу ширәта Паԝлос, бешьк дьһа һеса бу һʹале хԝә рʹази бьн. Ԝана заньбу ԝәки Йаһоԝа ԝе бона һʹәԝщед ԝан хәм бькә. Готьнед Паԝлос баԝәрийа мә дьһа ԛәԝи дькә, ԝәки Йаһоԝа дькарә бона һʹәԝщед мә жи хәм бькә.

10. Паԝлосе шанди чь ширәт дабу?

¹⁰ Паԝлос ширәтәкә ӧса дабу Тимотʹейо, у дькарьн бежьн дайә мә жи: «Кʹьнщ у хӧрәке мә һәбьн, бь ԝан әм рʹази бьн» (1 Тимотʹейо 6:8). Гәло әв ширәт те һʹәсабе кӧ гәрәке әм жь хԝарьнәкә хԝәш, жь маләкә бәдәԝ йан жь кʹьнщед тʹәзә шабуне нәстиньн? На. Паԝлос готьбу кӧ чь дәсте мәда һәбә, гәрәке әм бь ван тьшта рʹази бьн (Филипи 4:12). Паԝлос әв дәрса фәрз хԝәха һин бу. Жийина мәда тьште һәри фәрз у ԛимәт әԝ һәйә достийа незик тʹәви Йаһоԝа, нә кӧ һәбука мә (Һәбаԛуԛ 3:17, 18).

11. Әм дькарьн жь готьнед Муса чь дәрсе бьстиньн?

¹¹ Ньһерʹандьна мә сәр ве йәке кӧ әм һʹәԝще чь нә, дькарә жь ньһерʹандьна Йаһоԝа щӧдә бә. Паши 40 салед бәрʹийеда, Муса пʹехәмбәр Исраелийарʹа ӧса гот: «Хӧдан Хԝәдейе тә һʹәму шьхӧлед дәстед тә бьмбарәк кьр. Әԝ һаш рʹеԝитийа тә һәйә ль ве бәрʹийа мәзьнда. Әва чьл сал ә кӧ Хӧдан Хԝәдейе тә тʹәви тәйә у кемасийа тʹӧ тьшти тә нәдит» (Ԛануна Дӧщари 2:7). Нава ван 40 салада, Йаһоԝа мана дьда Исраелийа. Кʹьнщед ԝан, демәк кʹьнщед кӧ ль сәр ԝан бун гава әԝана жь Мьсре дәркʹәтьн, нәмашийан! (Ԛануна Дӧщари 8:3, 4) Һьнге һьнә Исраели дьбәкә дьфькьрин, кӧ чь щәм ԝан  һәбу бәси ԝан нибу, ле Муса ԝанрʹа гот кӧ чь лазьм ә дәсте ԝанда һәйә. Йаһоԝа дьхԝазә, ԝәки чь кӧ әԝ дьдә мә, бьшекьриньн у ча кʹәрәм һʹәсаб кьн.

12. Әм жь кʹӧ заньн кӧ Даԝьд баԝәрийа хԝә Йаһоԝа дьани?

¹² Даԝьд заньбу ԝәки Йаһоԝа амьн ә у кәсед кӧ ԝи һʹьз дькьн, хԝәй дькә. Гава әԝи Зәбура 34 дьньвиси, жийина ԝи ԛәзийеда бу, ле диса жи әԝи гот: «Мьлйакʹәте Хӧдан тʹәви хофкʹешед Ԝи йә, пьшта ԝан дьгьрә у ԝан хьлаз дькә» (Зәбур 34:7). Дьбәкә Даԝьд, мәләке Йаһоԝа бәрамбәри әскәрәки кьр, йе кӧ тʹьме һʹьшйар ә у дина ԝи ле йә ԝәки дьжмьн ньшкева һʹьщуми сәр щьмәʹте нәкә. Даԝьд хԝәха жи әскәрәки мерхас бу, у Йаһоԝа соз дабу ԝи кӧ әԝе бьбә пʹадша, ле диса жи Даԝьд хԝә нәдьспартә аԛьл у фәрәсәтед хԝә, ԝәки дьжмьна алт бькә (1 Самуйел 16:13; 24:12). Даԝьд итʹбарийа хԝә Йаһоԝа дьани, у әԝ баԝәр бу ԝәки мәләке Йаһоԝа «хофкʹешед Ԝи», хьлаз дькә. Рʹаст ә әм иро бь кʹәрәмәт найенә хьлазкьрьне, ле әм заньн кӧ тʹӧ зьрара һәр-һәйи ԝе нәйе сәре кәсед кӧ баԝәрийа хԝә Йаһоԝа тиньн.

13. Ԝәʹде һʹьщумкьрьна Гог жь Магоге, әме чьрʹа бехԝәйи бенә кʹьфше, ле әм дькарьн чьда баԝәр бьн? (Бьньһерʹә шькле рʹуйе журнале.)

¹³ Дәмәкә незикда баԝәрийа мә ԝе бе щерʹьбандьне. Гава Гог жь Магоге, демәк коалисйа мьләта, һʹьщуми сәр хьзмәткʹаред Хԝәде бькә, дьбәкә әме бьтьрсьн кӧ әԝана ԝе мә бькӧжьн. Ԝе дәме, гәрәке әм баԝәр бьн кӧ Йаһоԝа ԝе мә хьлаз кә. Бәр чʹәʹве мьләта әме мина пәзед бехԝәйи бенә кʹьфше (Һәзәԛел 38:10-12). Ле чьмки әме бе чʹәк бьн, мьләт ԝе бьфькьрьн кӧ ԝе һеса бькарьбьн ԛьрʹа мә биньн. Бь чʹәʹве баԝәрийе, әме бьвиньн ԝәки ордийа мәләка дора мә гьртийә, ле мьләт ԝе нькарьбьн ве йәке бьвиньн, чьмки әԝана алийе рʹӧһʹанива кор ьн. Гава ордийа әʹзмани бе һәԝара мә, дьжмьнед Хԝәде ԝе зәндәгьрти бьминьн! (Әʹйанти 19:11, 14, 15)

14. Әм чаԝа дькарьн хԝә бона ахьрийе һазьр кьн?

¹⁴ Гәло әм чаԝа дькарьн хԝә ида ньһада бона ахьрийе һазьр кьн? Йа пешьн, гәрәке ньһерʹандьна мә ль сәр мал у мьлкʹ рʹаст бә. Лазьм ә кӧ әм бир нәкьн ԝәки рʹожәке, дьбәкә әм мәщбур бьн һәбука хԝә бьһельн. Гәрәке әм бь тьштед кӧ дәсте мәда һәнә рʹази бьн у һәри зедә достийа хԝәйә тʹәви Йаһоԝарʹа ша бьн. Чьԛас незик әм Хԝәде нас бькьн, һаԛас баԝәрийа мә ԝе һьндава ԝи ԛәԝи бә, кӧ ԝәʹде һʹьщумкьрьна Гог жь Магоге, әԝе мә хьлаз кә.

15. Даԝьд чьрʹа баԝәр бу, ԝәки Йаһоԝа ԝе тʹӧ щар ԝи тʹәне нәһелә?

¹⁵ Гәло диса чь али Даԝьд дькьр у дькарә али мә жи бькә, ԝәки әм хԝә бона тәнгасийа һазьр кьн? Даԝьд ӧса готьбу: «Тәʹм кьн у бьзаньбьн кӧ Хӧдан ча ԛәнщ ә! Хԝәзи ԝи мәрьви, йе кӧ хԝә дайә бьн сийа Ԝи!» (Зәбур 34:8). Әв готьн нишан дькьн кӧ Даԝьд чьрʹа һәԝара хԝә Йаһоԝа дадьхьст. Әԝи гәләк щар итʹбарийа хԝә Йаһоԝа дьани, у Йаһоԝа әԝ тʹӧ щар тʹәне нәдьһишт. Гава Даԝьд һе щаһьл бу, әԝ һьмбәри Голйатʹе Фьлисти дәркʹәтьбу у ви әскәре тәʹрькирʹа ӧса гот: «Иро ԝе Хӧдан тә бьдә дәсте мьн» (1 Самуйел  17:46, ИМ). Паше, гава Даԝьд бәр дәсте Шаԝул Пʹадша хьзмәт дькьр, Шаԝул чәнд щара дьхԝәст әԝ бькӧшта, ле Йаһоԝа тʹәви Даԝьд бу (1 Самуйел 18:12). Әԝ йәк кӧ Даԝьд щаһьлтийеда дәсте Йаһоԝа дитьбу, баԝәрийа ԝи ԛәԝи кьр, ԝәки Йаһоԝа ԝе диса али ԝи бькә.

16. Әм чаԝа дькарьн ԛәнщийа Йаһоԝа «тәʹм кьн»?

¹⁶ Чьԛас зедә әм жийина хԝәда рʹебәрийа Йаһоԝа бьгәрʹьн, һаԛас әме дьһа баԝәр бьн кӧ әԝ дькарә ахьрийеда мә хьлаз кә. Жийина мәда гәләк мәщал һәнә ԝәки нишан кьн, кӧ әм хԝә дьсперьн Йаһоԝа. Мәсәлә, баԝәри у хԝәстьнәкә ԛәԝи лазьм ә, кӧ әм һәрʹьн бал мәзьне хәбата хԝә у жь ԝи бьхԝазьн ԝәки изне бьдә мә әм һәрʹьн сәр щьвата мәзьн. Йан жи ԝәки әԝ графика хәбата мә бьгӧһезә, сәва кӧ әм бькарьбьн һәрʹьн һʹәму щьвата у дьһа зедә хьзмәт кьн. Ле һәгәр мәзьне хәбата мә ԛайил нибә у мә жь хәбате дәрхә, һьнге әме ча хԝә бьдьнә кʹьфше? Гәло әме баԝәр бьн, ԝәки Йаһоԝа ԝе мә тʹӧ щар тʹәне нәһелә у бона һʹәԝщед мә хәм бькә? (Ибрани 13:5) Сәрһатийед гәләк хушк-бьред мә кӧ хьзмәта һәртʹьмда ньн, нишан дькьн, ԝәки Йаһоԝа тʹьме те һәԝара хьзмәткʹаред хԝә. Бәле, Йаһоԝа амьн ә.

17. Рʹеза бона сала 2022 кʹижан ә, у әв рʹез чьрʹа ԝәʹдәда йә?

¹⁷ Йаһоԝа тʹәви мә йә, ләма жи нә лазьм ә ԝәки әм ахьрийе бьтьрсьн. Һʹәта кӧ әм шьхӧле Пʹадшатийе датиньн щийе пешьн, Йаһоԝа ԝе тʹӧ щар мә нәһелә. Гәләк фәрз ә ԝәки әм ида ньһада хԝә бона тәнгасийед ахьрийеда һазьр кьн у баԝәр бьн кӧ Йаһоԝа ԝе мә тʹӧ щар тʹәне нәһелә. Ләма жи Кʹома Рʹебәрийе Зәбура 34:10 ча рʹеза сала 2022 бьжартийә: «Әԝед кӧ Йаһоԝа дьгәрʹьн ԝе кемасийа тʹӧ ԛәнщийе нәвиньн», (ДТʹ).