1. Ль гора Малахи 3:16, Йаһоԝа кʹижан кʹьтебе дьньвисә, у теда чь те ньвисаре?

 БЬ ҺʹӘЗАРА сала, Йаһоԝа кʹьтебәкә мәхсус дьньвисә. Ве кʹьтебеда, навед кәсед амьн һәнә. Мәрьве пешьн, йе кӧ наве ԝи ве кʹьтебеда һатьбу ньвисандьне, кӧрʹе Адәм Һабил бу * (Луԛа 11:50, 51). Жь ԝи чахива, Йаһоԝа навед мәрьвед дьн жи ве кʹьтебеда зедә кьрьнә, у иро теда бь милйона нав һәнә. Кʹьтеба Пироз ве кʹьтебе ча «пʹьртукәк[ә] биранине» у «кʹьтеба жийине» нав дькә. Ве готареда, әме жерʹа бежьн «кʹьтеба жийине» (Малахи 3:16 бьхунә; Әʹйанти 3:5; 17:8).

2. Навед кʹе кʹьтеба жийинеда ньвиси нә, у сәва кӧ наве мә теда бе ньвисандьне, әм гәрәке чь бькьн?

² Ве кʹьтеба мәхсусда навед ԝан һʹәму мәрьва ньвиси йә, йед кӧ бь хоф у һӧрмәте Йаһоԝа дьһʹәбиньн, у наве ԝи ԛимәт дькьн. Мәщала ԝан һәйә кӧ жийина һʹәта-һʹәтайе бьстиньн. Һәрге әм сәр һʹиме ԛӧрбана Иса Мәсиһ незики Йаһоԝа бьн, наве мә жи дькарә ве кʹьтебеда бе ньвисандьне (Йуһʹәнна 3:16, 36). Фьрԛи тʹӧнә кӧ әм һивийа жийина сәр әʹзмана нә йан сәр әʹрде, әм гьшк жи дьхԝазьн ԝәки наве мә ве кʹьтебеда һәбә.

3-4. (а) Һәрге наве мә ньһа кʹьтеба жийинеда ньвиси бә, гәло әв йәк те һʹәсабе кӧ әме һʹәта-һʹәтайе бьжин? (б) Ве готареда у готара дьнда, әме щабед кʹижан пьрса бьстиньн?

³ Гәло әв йәк кӧ наве кәсәки кʹьтеба жийинеда ньвиси йә, те һʹәсабе кӧ әԝе сәд-сәләфи жийина һʹәта-һʹәтайе  бьстинә? Дәркʹәтьн 32:33-да, Йаһоԝа Мусарʹа ӧса готьбу: «Кʹе ль бәр мьн гӧнә кьрийә, әзе ԝи жь кʹьтеба хԝә рʹәсит кьм». Бәле, һәрге наве кәсәки ве кʹьтебеда ньвиси бә жи, Йаһоԝа дькарә ви нави тʹәмьз кә, чьмки әԝ нав ча бежи пе ԛәләме ньвиси йә, нә кӧ пе һʹӧбьре (Әʹйанти 3:5). Һʹәта кӧ наве мә сәр һʹәта-һʹәтайе пе һʹӧбьре бе ньвисандьне, әм гәрәке алийе хԝәда һәр тьшти бькьн, ԝәки наве мә ве кʹьтебеда бьминә.

⁴ Дьбәкә чәнд пьрсед мә һәбьн. Мәсәлә, Кʹьтеба Пироз дәрһәԛа кәсед кӧ навед ԝан кʹьтеба жийинеда ньвиси нә у дәрһәԛа кәсед кӧ навед ԝан теда нә ньвиси нә, чь дьбежә? Кәсед кӧ навед ԝан ве кʹьтебеда дьминә, ԝе кʹәнге жийина һʹәта-һʹәтайе бьстиньн? Һʹале мьрийед кӧ мәщала ԝан тʹӧнә бу Йаһоԝа нас бькьн, ԝе чь бә? Гәло навед ԝан дькарә ве кʹьтебеда бен ньвисандьне? Ве готареда у готара дьнда, әме щабед ван пьрса бьстиньн.

НАВЕД КʹЕ КʹЬТЕБА ЖИЙИНЕДА ҺӘЙӘ?

5-6. (а) Ль гора Филипи 4:3, навед кʹе кʹьтеба жийинеда ньвиси нә? (б) Навед ԝан ԝе кʹәнге сәр һʹәта-һʹәтайе кʹьтеба жийинеда бенә ньвисандьне?

⁵ Навед кʹе ве кʹьтеба симболикда ньвиси нә? Бона щаба ве пьрсе, әме дина хԝә бьдьн пенщ щурʹә-щурʹә кʹомед мәрьва. Навед һьнәка жь ԝан, кʹьтеба жийинеда ньвиси нә, ле навед һьнәка жи теда нә ньвиси нә.

⁶ Кʹома пешьн әԝ һәнә кәсед кӧ һатьнә бьжартьне, ԝәки тʹәви Иса сәр әʹзмана сәрԝертийе бькьн. Гәло навед ԝан ньһа кʹьтеба жийинеда ньвиси нә? Бәле. Ль гора гьлийед Паԝлосе  шанди кӧ әԝи «һәвал-хәбатед» хԝәрʹа жь Филипйайе готьбу, навед кәсед бь рʹӧһʹ кʹьфшкьри, йед кӧ ԝе тʹәви Иса сәрԝертийе бькьн, ньһа кʹьтеба жийинеда ньвиси нә (Филипи 4:3 бьхунә). Ле сәва кӧ навед ԝан ве кʹьтеба симболикда бьминә, әԝана гәрәке амьн бьминьн. Паше, гава әԝана мора хԝә йа хьлазийе бьстиньн, йан пешийа мьрьна хԝә йан жи пешийа дәстпека тәнгасийа мәзьн, навед ԝан ԝе сәр һʹәта-һʹәтайе ве кʹьтебеда бенә ньвисандьне (Әʹйанти 7:3).

7. Ль гора Әʹйанти 7:16, 17, навед кәсед жь әʹлаләта мәзьн, ԝе кʹәнге кʹьтеба жийинеда сәр һʹәта-һʹәтайе бенә ньвисандьне?

⁷ Кʹома дӧда әԝ һәнә мәрьвед кӧ дькʹәвьн нава әʹлаләта мәзьн, демәк пәзед дьн. Гәло навед ԝан ньһа кʹьтеба жийинеда һәнә? Бәле. Паши кӧ әԝана жь Һармәгәдоне сах дәрбаз бьн, гәло навед ԝан ԝе һәла һе кʹьтеба жийинеда һәбә? Бәле! (Әʹйанти 7:14). Иса готьбу ԝәки кәсед кӧ бь симболик ча пәз тенә һʹәсабе «ԝе һәрʹьнә жийина һʹәта-һʹәтайе» (Мәтта 25:46). Диса жи, кәсед кӧ жь Һармәгәдоне дәрбаз бьн ԝе жийина һәрһәйи дәрберʹа нәстиньн. Навед ԝан ԝе ча бежи бь ньвиса ԛәләме кʹьтеба жийинеда бьминә. Ԝәʹде Сәрԝертийа Һʹәзарсали, Иса «ԝе шьвантийе ль ԝан бькә, ԝан бьбә сәр канийед ава жийине». Кәсед кӧ рʹебәрийа Иса ԛәбул кьн у ԝәʹде диԝанкьрьна хьлазийе ча мәрьвед амьн бенә һʹәсабе, навед ԝан ԝе кʹьтеба жийинеда сәр һʹәта-һʹәтайе бенә ньвисандьне (Әʹйанти 7:16, 17 бьхунә).

8. Навед кʹе кʹьтеба жийинеда тʹӧнә, у чь ԝе бе сәре ԝан?

⁸ Кʹома сьсийа әԝ һәнә мәрьвед кӧ бь симболик бьзьн ьн, йед кӧ ԝе Һармәгәдонеда бенә ԛьрʹкьрьне. Навед ԝан кʹьтеба жийинеда тʹӧнә. Иса готьбу кӧ әԝана ԝе сәр һʹәта-һʹәтайе бенә кʹӧтакьрьне (Мәтта 25:46). Бь рʹебәрийа Хԝәде, Паԝлосе шанди жи готьбу кӧ әԝана ԝе «ԝеранбуна һʹәта-һʹәтайе бьбиньн» (2 Тʹесалоники 1:9; 2 Пәтрус 2:9). Һʹале ԝан мәрьва жи ӧса йә, йед кӧ мьԛабьли рʹӧһʹе пироз гӧнә кьрьнә. Әԝана жи ԝе сәр һʹәта-һʹәтайе бенә ԛьрʹкьрьне, демәк ԝе жь мьрьне рʹанәбьн у жийина һәрһәйи нәстиньн (Мәтта 12:32; Марԛос 3:28, 29; Ибрани 6:4-6). Ньһа ԝәрә әм дина хԝә бьдьнә дӧ кʹомед кӧ ԝе бона жийина сәр әʹрде бенә рʹакьрьне.

КʹЕ ԜЕ БОНА ЖИЙИНА СӘР ӘʹРДЕ БЕНӘ РʹАКЬРЬНЕ?

9. Ль гора Кʹаред Шандийа 24:15, кʹижан дӧ кʹом ԝе бенә рʹакьрьне, у фьрԛи нав ԝанда чь йә?

⁹ Кʹьтеба Пироз дьбежә кӧ дӧ кʹом, демәк «һʹәму һәԛ у нәһәԛе» жь мьрьне бенә рʹакьрьне, у мәщала ԝан ԝе һәбә һʹәта-һʹәтайе сәр әʹрде бьжин (Кʹаред Шандийа 24:15 бьхунә). «Йед һәԛ» әԝ ьн, йед кӧ бь амьни Йаһоԝарʹа хьзмәт кьрьбун. Кәсед «нәһәԛ» Йаһоԝарʹа хьзмәт нәкьрьбун, у рʹабун-рʹуньштьн у кьред ԝан нәбаш бун. Гава әԝ һәрдӧ кӧ кʹом бенә рʹакьрьне, гәло әв йәк те һʹәсабе кӧ навед ԝан кʹьтеба жийинеда ньвисарә? Бона щаба ве пьрсе, ԝәрә әм дәрһәԛа ван дӧ кʹома шеԝьр кьн.

10. «Йед һәԛ» ԝе чьрʹа жь мьрьне рʹабьн, у һьнә жь ԝан ԝе чь щабдарийе бьстиньн? (Дәрһәԛа рʹабуна мьрийа бона жийина сәр әʹрде, ӧса жи ве журналеда бьньһерʹьн «Пьрсед Хԝәндәвана».)

¹⁰ Кʹома чара, әԝ һәйә мәрьвед «һәԛ».  Пешийа мьрьне, навед ԝан кʹьтеба жийинеда һатьбу ньвисандьне. Ле чахе әԝана мьрьн, гәло навед ԝан жь ве кʹьтебе һатьн дәрхьстьне? На. Бира Йаһоԝада, әԝана һе «сах» ьн. Йаһоԝа нә кӧ «Хԝәдейе мьрийа йә, ле йе зендийа йә, чьмки бона ԝи һʹәму жи сах ьн» (Луԛа 20:38). Ләма жи гава йед һәԛ бона жийина сәр әʹрде бенә рʹакьрьне, навед ԝан ԝе кʹьтеба жийинеда ньвиси бьн, ле сәрида тʹәне ча бежи пе «ԛәләме» (Луԛа 14:14). Һьнәкед жь ԝан ԝе бешьк дьнйа тʹәзәда ча «сәрԝер сәр тʹәмамийа әʹрде» хьзмәт кьн (Зәбур 45:16).

11. Пешийа кӧ навед кәсед «нәһәԛ» кʹьтеба жийинеда бенә ньвисандьне, ԝе лазьм бә кӧ әԝана чь һин бьн?

¹¹ Кʹома пенща, әԝ һәйә кәсед «нәһәԛ». Пешийа мьрьне, ԝана бь жийинәкә рʹаст нәдьжитьн, чьмки дьбәкә дәрһәԛа ԛанунед Йаһоԝа ньзаньбун. Ләма жи навед ԝан кʹьтеба жийинеда нәһатьбу ньвисандьне. Гава Хԝәде ԝана жь мьрьне рʹакә, ԝе мәщале бьдә ԝан, ԝәки әԝана навед хԝә ве кʹьтебеда бьдьнә ньвисандьне. Жь бо ве йәке, кәсед «нәһәԛ» ԝе һʹәԝще аликʹарийе бьн. Жийина хԝәйә бәреда, һьнә жь ван кәса тьштед гәләк хьраб кьрьбун. Ләма жи гәрәке әԝана бенә һинкьрьне, кӧ чаԝа ль гора ԛанунед Йаһоԝа бьжин. Бона ве йәке, бьн сәрԝертийа Пʹадшатийа Хԝәдеда, бәрнама һинкьрьне йа һәри мәзьн ԝе дәстпебә.

12. (а) Кʹе ԝе кәсед нәһәԛ һин кә? (б) Чь ԝе бе сәре кәсед кӧ аликʹарийе ԛәбул нәкьн?

¹² Кʹе ԝе кәсед нәһәԛ һин кә? ‹Әʹлаләта мәзьн› у «йед һәԛ», кӧ жь мьрьне бенә рʹакьрьне, ԝе ви шьхӧли бькьн. Сәва кӧ навед кәсед нәһәԛ кʹьтеба жийинеда бе ньвисандьне, гәрәке әԝана бьбьнә достед Йаһоԝа у жийина хԝә бьдьнә дәсте ԝи. Иса Мәсиһ у һәмпʹадшед ԝи, ԝе рʹьнд дина хԝә бьдьнә ԝан һʹәму  кәсед нәһәԛ, һәла әԝана һинкьрьнеда ча пешда дьчьн (Әʹйанти 20:4). Кәсед кӧ аликʹарийе ԛәбул нәкьн, ԝе бенә кʹӧтакьрьне, һәла һе һәрге әԝана 100 сали бьн жи (Ишайа 65:20). Йаһоԝа у Иса Мәсиһ дькарьн дьла бьхуньн, у әԝе изьне нәдьн ԝәки кәсәк дьнйа тʹәзәда хьрабийе бькә (Ишайа 11:9; 60:18; 65:25; Йуһʹәнна 2:25).

РʹАБУНА БОНА ЖИЙИНЕ У БОНА ДИԜАНЕ

13-14. (а) Бәре, мә Йуһʹәнна 5:29 чаԝа фәʹм дькьр? (б) Дәрһәԛа ван готьна, әм гәрәке дина хԝә бьдьнә чь?

¹³ Иса дәрһәԛа мәрьвед кӧ ԝе сәр әʹрде бенә рʹакьрьне, ӧса готьбу: «Ԝәхт незик дьбә, кӧ һʹәмуйед тʹьрбада ԝе дәнге ԝи бьбьһен. Йед кӧ ԛәнщи кьрьнә ԝе бона жийине рʹабьн, йед кӧ хьраби кьрьнә бона диԝане» (Йуһʹәнна 5:28, 29). Гәло әԝ рʹез чь те һʹәсабе?

¹⁴ Бәре әм дьфькьрин кӧ Иса дьгот дәрһәԛа кьред мәрьвед сахкьри, кʹижан кӧ ԝе паши рʹабуне бькьн; демәк әм дьфькьрин кӧ һьнәк ԝе бенә рʹакьрьне у тьштед баш бькьн у һьнәк жи ԝе бенә рʹакьрьне у тьштед хьраб бькьн. Ле Иса нәготьбу кӧ кәсед рʹакьри ԝе тьштед баш йан хьраб бькьн. Бь рʹасти әԝи сәр ԝан гот «йед кӧ ԛәнщи кьрьнә» у «йед кӧ хьраби кьрьнә». Готьнед ԝи нишан дькьн кӧ ԝана пешийа мьрьна хԝә ԛәнщи йан хьраби кьрьбун. Әва бь логики йә, ӧса нинә? Бь рʹасти, дьнйа тʹәзәда ԝе тʹӧ кәсирʹа изьн нәйе дайине, ԝәки зӧлмийе бькә. Ләма жи әшкәрә йә ԝәки йед нәһәԛ пешийа мьрьна хԝә хьраби кьрьбун. Ле гәло рʹабуна «бона жийане» у рʹабуна «бона диԝане» чь те һʹәсабе?

15. Кʹе ԝе «бона жийине» бе рʹакьрьне, у чьрʹа?

¹⁵ Кәсед һәԛ, йед кӧ пешийа мьрьна хԝә ԛәнщи кьрьбун, ԝе «бона жийине» рʹабьн, чьмки навед ԝан кʹьтеба жийинеда ньвиси нә. Демәк, рʹабуна ԝан «йед кӧ ԛәнщи кьрьнә», жь Йуһʹәнна 5:29, у рʹабуна «йед һәԛ», жь Кʹаред Шандийа 24:15, йәк ә. Әв шьровәкьрьн бь ван готьнед жь Рʹомайи 6:7 гьредайи йә: «Әԝе кӧ мьрийә, әԝ жь гӧнә азабуйи йә». Гава кәсед һәԛ дьмьрьн, гӧнед ԝан тенә паԛьжкьрьне, ле кьред ԝанә амьн найенә биркьрьне (Ибрани 6:10). Паши рʹабуна жь мьрьне жи һәмьки ԝе лазьм бә ԝәки әԝана амьн бьминьн, сәва кӧ навед ԝан жь кʹьтеба жийине нәйенә паԛьжкьрьне.

16. Рʹабуна «бона диԝане» чь те һʹәсабе?

¹⁶ Ле гәло һʹале кәсед кӧ пешийа мьрьне хьраби кьрьбун, ԝе ча бә? Гава әԝана мьрьн, гӧнед ԝан жи һатьнә паԛьжкьрьне, ле чьмки ԝана бь амьни Йаһоԝарʹа хьзмәт нәкьрьбу, навед ԝан кʹьтеба жийинеда нәһатьнә ньвисандьне. Ләма жи рʹабуна ԝан, «йед кӧ хьраби кьрьнә» у рʹабуна кәсед «нәһәԛ», жь Кʹаред Шандийа 24:15, йәк ә. Әԝана ԝе «бона диԝане» бенә рʹакьрьне. * Диԝанкьрьна ԝан те һʹәсабе кӧ әԝана ԝе бенә щерʹьбандьне (Луԛа 22:30). Әв кәсед нәһәԛ гәрәке тʹәрка хьрабийа хԝәйә бәре бьдьн у хԝә тʹәсмили Йаһоԝа кьн, ԝәки навед ԝан кʹьтеба жийинеда бе ньвисандьне. Сәва кӧ бе кʹьфше әԝана һежайи ве йәке нә йан на, ԝәхт ԝе лазьм бә.

17-18. Ԝе лазьм бә ԝәки һʹәму кәсед рʹакьри чь бькьн, у «кьред» кӧ Әʹйанти 20:12, 13 бәʹса ԝан дькә, чь нә?

 ¹⁷ Ԝәʹде Сәрԝертийа Һʹәзарсали, кʹьтебед тʹәзә ԝе бенә вәкьрьне, у ԝе лазьм бә ԝәки һьм кәсед кӧ бәре һәԛ бун һьм жи йед кӧ нәһәԛ бун, гӧһ бьдьн ԛанунед жь ван кʹьтеба. Йуһʹәннайе шанди ӧса готьбу: «Һьнге мьн мьрийед бьчʹук у мәзьн дитьн кӧ ль бәр тʹәхт сәкьни бун. Кʹьтеб вәбун у кʹьтебәкә дьн жи вәбу, аԝа готи кʹьтеба жийине. Диԝана мьрийа анәгори ԝан кьред ԝанә кʹьтебада ньвисар һатә кьрьне» (Әʹйанти 20:12, 13).

¹⁸ Кәсед сахкьри ԝе сәр һʹиме кʹижан ‹кьра› бенә диԝанкьрьне? Гәло ль гора тьштед кӧ ԝана пешийа мьрьне кьрьбун? На! Бинә бира хԝә кӧ гава әԝана мьрьн, гӧнед ԝанә бәре һатьн паԛьжкьрьне. Ләма жи әшкәрә йә кӧ кʹьтеба Әʹйанти бәʹса «кьред» ԝанә паши рʹабуна жь мьрьне дькә, демәк паши кӧ әԝана дьнйа тʹәзәда бенә һинкьрьне. Һәрге ԝе лазьм бә ԝәки кәсед амьн ча Нӧһ, Самуйел, Даԝьд у Данийел жи дәрһәԛа Иса Мәсиһ һин бьн у баԝәрийа хԝә ԛӧрбана ԝи биньн, илаһи ԝе һе зедә лазьм бә ԝәки кәсед нәһәԛ ве йәке бькьн.

19. Чь ԝе бе сәре ван мәрьва, йед кӧ әве мәщале ԛәбул нәкьн?

¹⁹ Чь ԝе бе сәре мәрьвед кӧ ве мәщале нәдьнә хәбате? Әʹйанти 20:15 ӧса дьбежә: «Наве кʹе ве кʹьтеба жийинеда ньвисар тʹӧнәбу, әԝ һатә авитьне нава гола егьр». Бәле, әԝана ԝе сәр һʹәта-һʹәтайе ӧнда бьн һәрʹьн. Бь рʹасти жи гәләк фәрз ә кӧ әм һәр тьшти бькьн, ԝәки наве мә кʹьтеба жийинеда бе ньвисандьне у нәйе тʹәмьзкьрьне!

20. Ԝәʹде Сәрԝертийа Һʹәзарсали чь шьхӧләки мәзьн у мәхсус ԝе бе кьрьне? (Бьньһерʹә шькьле рʹуйе журнале.)

²⁰ Сәрԝертийа Һʹәзарсали ԝе ԝәхтәки гәләк хԝәш бә! Һьнге, бәрнама һинкьрьне йа һәри мәзьн ԝе бе дәрбазкьрьне. Ӧса жи, кьред кәсед һәԛ у нәһәԛ ԝе бенә щерʹьбандьне (Ишайа 26:9; Кʹаред Шандийа 17:31). Ле гәло әв бәрнама һинкьрьне ча ԝе бе дәрбазкьрьне? Готара дьнда әме дәрһәԛа ве йәке пебьһʹәсьн.