1. Ԝәʹде Сәрԝертийа Һʹәзарсали, ԝе чь ԛәԝьмандьнед мәхсус бьԛәԝьмьн?

 ЧАХЕ рʹабуна мьрийа ԝәʹде Сәрԝертийа Иса Мәсиһ йа Һʹәзарсали сәр әʹрде дәстпебә, ньге мә ԝе шабуна әʹрд нәгьрә! Әм һʹьзрәта ве йәке нә кӧ диса мәрьвед хԝәйә һʹьзкьри бьвиньн, у Йаһоԝа жи һʹьзрәта ве йәке йә (Ибо 14:15). Бьдә бәр чʹәʹве хԝә, кӧ гава әм диса ԝана бьвиньн, әме чьԛас ша бьн! Готара пешийа веда, әм пеһʹәсийан кӧ «йед һәԛ», наве кʹижана кʹьтеба жийинеда ньвиси нә, ԝе «бона жийине» бенә сахкьрьне (Кʹаред Шандийа 24:15; Йуһʹәнна 5:29). Һьм жи гәләк мәрьвед мәйи һʹьзкьри, дьбәкә ԝәʹде дәстпека рʹабуна мьрийа, бона жийина сәр әʹрде бенә рʹакьрьне. * Ӧса жи, «йед нәһәԛ», демәк кәсед кӧ пешийа мьрьне епʹещә мәщала ԝан тʹӧнә бу, кӧ Йаһоԝа нас кьн йан жь ԝирʹа бь амьни хьзмәт кьн, ԝе «бона диԝане» бенә рʹакьрьне.

2-3. (а) Чаԝа кӧ Ишайа 11:9, 10-да те готьне, бәрнама һинкьрьне йа һәри мәзьн ԝе чь бә? (б) Ве готареда, әме дәрһәԛа чь шеԝьр кьн?

² Ԝе лазьм бә ԝәки һʹәму кәсед сахкьри бенә һинкьрьне (Ишайа 26:9; 61:11). Ләма жи, бәрнама һинкьрьне йа һәри мәзьн ԝе дәстпебә (Ишайа 11:9, 10  бьхунә). Гәло чьма? Чьмки ԝе лазьм бә ԝәки мәрьвед нәһәԛ, йед кӧ ԝе бенә рʹакьрьне, һин бьн дәрһәԛа Иса Мәсиһ, Пʹадшатийа Хԝәде, ԛӧрбане у пьрса дәрһәԛа нав у сәрԝертийа Йаһоԝа. Ӧса жи ԝе лазьм бә ԝәки мәрьвед һәԛ жи занәбуна һәри тʹәзә дәрһәԛа нета Йаһоԝа бона әʹрде, бьстиньн. Һьнә кәсед амьн бь сәда сала пешийа кӧ ньвисандьна Кʹьтеба Пироз хьлаз бу, мьрьбун. Бәле, ԝе лазьм бә кӧ һьм кәсед нәһәԛ һьм жи йед һәԛ гәләк тьшта һин бьн.

³ Ве готареда, әме ван пьрса шеԝьр кьн: Әв бәрнама һинкьрьне ԝе чаԝа бе дәрбазкьрьне? Әв бәрнамә ԝе ча ль сәр ве йәке һʹӧкӧм кә, һәла наве кәсәки ԝе сәр һʹәта-һʹәтайе кʹьтеба жийинеда бе ньвисаре йан на? Гәләк фәрз ә кӧ әм щабед ван пьрса бьстиньн. Ләма жи, әме дина хԝә бьдьнә һьнә тьшта, йед кӧ бәрева кʹьтебед Данийел у Әʹйантида һатьбун готьне. Бь сайа ван пʹехәмбәртийа, әме дьһа зәлал фәʹм бькьн, кӧ паши рʹабуна мьрийа чь ԝе бьԛәԝьмә. Пешийе, ԝәрә әм дина хԝә бьдьнә готьнед жь Данийел 12:1, 2.

4-5. Данийел 12:1 дәрһәԛа рʹожед хьлазийе чь дьбежә?

⁴ Данийел 12:1 бьхунә. Кʹьтеба Данийел пешда готьбу кӧ хьлазийа рʹожед ахьрийе, чь ԝе пәй һәв бьԛәԝьмә. Мәсәлә, ве рʹезеда те готьне кӧ Мьхайил, демәк Иса Мәсиһ щьмәʹта Хԝәде «дьпарезә». Пʹарәкә ве пʹехәмбәртийе дәстпекьр бе сәри, гава сала 1914-да, Иса һатә кʹьфшкьрьне ча Пʹадше Пʹадшатийа әʹзмани.

⁵ Данийелрʹа ӧса жи һатьбу готьне, ԝәки Иса Мәсиһ ԝе «рʹабә» ԝәʹде «тәнгасикә жь рʹожа кӧ . . . һʹәта иро нәһатийә дитьн». Әв «тәнгаси», ‹тәнгасийа мәзьн› ә, йа кӧ Мәтта 24:21-да те готьне. Хьлазийа ве тәнгасийе, демәк ԝәʹде Һармәгәдоне, Иса Мәсиһ ԝе рʹабә кӧ хьзмәткʹаред Хԝәде бьпарезә. Кʹьтеба Әʹйанти ԝана нав дькә ча «әʹлаләтәкә мәзьн», йа кӧ жь «тәнгасийа мәзьн» һатийә (Әʹйанти 7:9, 14).

6. Чахе әʹлаләта мәзьн жь тәнгасийа мәзьн хьлаз бә, чь ԝе бьԛәԝьмә? (Дәрһәԛа рʹабуна жийина сәр әʹрде, бьньһерʹә готара «Пьрсед Хԝәндәвана» йа кӧ ве журналеда һәйә.)

⁶ Данийел 12:2, бьхунә. Паши кӧ әʹлаләта мәзьн жь ве тәнгасийе сах дәрбаз бә, чь ԝе бьԛәԝьмә? Бәре әм дьфькьрин кӧ әв рʹез бәʹса сахкьрьна симболик дькә, демәк рʹабуна рʹӧһʹани йа хьзмәткʹаред Хԝәде рʹожед ахьрийеда. * Ле ньһа әм фәʹм дькьн кӧ әв рʹез бәʹса рʹабуна мьрийа дькә, йа кӧ ԝе дьнйа тʹәзәда дәстпебә. Әм чьрʹа ӧса дьфькьрьн? Чаԝа Ибо 17:16-да те готьне, хәбәра «ах» те һʹәсабе «ԝаре мьрийа», демәк мәзәл. Ләма жи әм фәʹм дькьн кӧ Данийел 12:2 бәʹса рʹабуна мьрийа дькә, йа кӧ ԝе паши хьлазбуна рʹожед ахьрийе, демәк паши шәрʹе Һармәгәдоне дәстпебә.

7. (а) Һьнәк ԝе чаԝа бона «жийина һәрһәйи» бенә рʹакьрьне? (б) Рʹабуна ԝан чьрʹа «һе ԛәнщ» ә?

⁷ Ӧса жи, Данийел 12:2, дьбежә кӧ һьнә кәс ԝе рʹабьн бона «жийина һәрһәйи, ИМ». Әв те һʹәсабе ԝәки мәрьвед кӧ ԝәʹде сәрԝертийа 1 000 сали жь  мьрьне бенә рʹакьрьне, Йаһоԝа у Иса Мәсиһ нас бькьн, йан жи бәрдәԝам кьн «нас кьн» у гӧһ бьдьн ԝан, ԝе жийина һʹәта-һʹәтайе бьстиньн (Йуһʹәнна 17:3). Әԝана ԝе «жь мьрьне рʹабьн бьгьһижьнә жийинәкә һе ԛәнщ», демәк жийина һʹәта-һʹәтайе, нә кӧ мина мәрьвед бәре кʹижан кӧ жь мьрьне һатьбун рʹакьрьне, ле паше диса мьрьн (Ибрани 11:35).

8. Һьнәк ԝе чаԝа бона «жийанәкә рʹурʹәш» бенә рʹакьрьне?

⁸ Гәло һәр кәс ԝе бәрнама һинкьрьне жь Йаһоԝа ԛәбул кә? На. Кʹьтеба Данийел дьбежә кӧ һьнәк ԝе рʹабьн бона «жийанәкә рʹурʹәш, ИМ». Ле чьмки ԝе әԝана рʹастийе ԛәбул нәкьн, навед ԝан ԝе кʹьтеба жийинеда нәйе ньвисаре, у әԝана ԝе жийина һәрһәйи нәстиньн, ле һʹәта-һʹәтайе кʹӧта бьн. Данийел 12:2 әшкәрә дькә, кӧ ахьрийа ԝан кьред ԝанва гьредайи йә, йед кӧ әԝана ԝе паши рʹабуна жь мьрьне бькьн * (Әʹйанти 20:12). Һьнә мәрьв ԝе жийина һәрһәйи бьстиньн, ле һьнәк жи на.

9-10. Паши тәнгасийа мәзьн диса чь ԝе бьԛәԝьмә, у кʹи ԝе мина шәԝԛа әʹзмани бьбьрьԛьн?

⁹ Данийел 12:3 бьхунә. Хенщи тьштед кӧ рʹеза 2-да тенә готьне, рʹеза 3 жи бәʹса һьнә тьшта дькә, йед кӧ ԝе паши «тәнгасийа мәзьн» бьԛәԝьмьн.

¹⁰ Гәло кʹе «ԝе мина ԛубәйа әзмани», демәк шәԝԛа әʹзмани бьбьрьԛьн? Мәтта 13:43 ӧса дьбежә: «Һьнге мәрьвед рʹаст ԝе Пʹадшатийа Баве хԝәда мина тәʹве шәԝԛ бьдьн». Ве контекстеда, Иса бәʹса «мәрьвед пʹара Пʹадшатийе» дькьр, йед кӧ ԝе тʹәви ԝи Пʹадшатийа әʹзманида сәрԝертийе бькьн (Мәтта 13:38). Ләма жи әʹйан ә ԝәки Данийел 12:3 бәʹса кәсед бь рʹӧһʹ кʹьфшкьри дькә у шьхӧлед кӧ әԝана ԝе ԝәʹде Сәрԝертийа Һʹәзарсали бькьн.

11-12. Ԝәʹде Сәрԝертийа Һʹәзарсали, 144 000 кәсед бь рʹӧһʹ кʹьфшкьри ԝе чь бькьн?

¹¹ Кәсед бь рʹӧһʹ кʹьфшкьри ԝе чаԝа гәләка бьгьһиньн рʹастийе? Тʹәви Иса Мәсиһ, әԝана ԝе рʹебәрийа бәрнама һинкьрьне бькьн, йа кӧ ԝе ԝәʹде Сәрԝертийа Һʹәзарсали сәр әʹрде бе дәрбазкьрьне. Әԝ 144 000 кәсед бь рʹӧһʹ кʹьфшкьри ԝе нә тʹәне ча пʹадша, ле ча кʹаһин жи хьзмәт бькьн (Әʹйанти 1:6; 5:10; 20:6). Әԝана ԝе «бона ԛәнщбуна мьләта» кʹар бькьн у мәрьва һеди-һеди вәгәрʹиньн беԛьсуртийе (Әʹйанти 22:1, 2; Һәзәԛел 47:12). Әԝана ԝе жь ве йәке шабунәкә мәзьн бьстиньн!

¹² Нава ван гәләкада ԝе мәрьвед сахкьри бьн, йед кӧ жь Һармәгәдоне дәрбаз бьн у зарʹед кӧ ԝе дьнйа тʹәзәда бенә буйине. Хьлазийа Сәрԝертийа Һʹәзарсали, һʹәму мәрьв ԝе беԛьсур бьн. Гәло навед ԝан ԝе кʹәнге сәр һʹәта-һʹәтайе кʹьтеба жийинеда бе ньвисандьне?

13-14. Пешийа кӧ мәрьвед беԛьсур жийина һәрһәйи бьстиньн, ԝе лазьм бә кӧ әԝана чь избат кьн?

¹³ Әв йәк кӧ кәсәк беԛьсур ә, найе һʹәсабе кӧ әԝе жийина һәрһәйи бьстинә.  Дәрһәԛа Адәм у Һәԝайе бьфькьрә. Әԝана беԛьсур бун, ле сәва кӧ жийина һәрһәйи бьстиньн, лазьм бу кӧ ԝана гӧһдарийа Йаһоԝа бькьра. Сәд һʹәйф кӧ ԝан нәхԝәст гӧһдарийа ԝи бькьн (Рʹомайи 5:12).

¹⁴ Хьлазийа Сәрԝертийа Һʹәзарсали, һәр кәс ԝе беԛьсур бә. Гәло әԝана ԝе һʹәта-һʹәтайе пьштгьрийа сәрԝертийа Йаһоԝа бькьн? Йан һьнәк ԝе мина Адәм у Һәԝайе, йед кӧ беԛьсур бун ле Йаһоԝарʹа амьн нә ман, ԝе жь рʹийа Йаһоԝа дәркʹәвьн? Гәло щабед ван пьрса ԝе чаԝа бенә дайине?

15-16. (а) Һʹәму инсан ԝе кʹәнге бькарьбьн амьнийа хԝә Йаһоԝарʹа избат кьн? (б) Паши щерʹьбандьна пашьн чь ԝе бьԛәԝьмә?

¹⁵ Ԝәʹде Сәрԝертийа Һʹәзарсали, Мире-щьна ԝе гьрти бьминә, ләма жи әԝе нькарьбә кәсәки бьхапинә. Ле хьлазийа Сәрԝертийа Һʹәзарсали, әԝе бе азакьрьне, у әԝе һәр тьшти бькә ԝәки инсанед беԛьсур жь рʹийа Йаһоԝа дәрхә. Әв щерʹьбандьна пашьн ԝе мәщале бьдә һʹәму мәрьва кӧ әшкәрә нишан кьн, һәла әԝана ԛәдьре наве Хԝәде у сәрԝертийа ԝи дьгьрьн йан на (Әʹйанти 20:7-10). Һәрге әԝана гӧһ нәдьн Мире-щьна, у Йаһоԝарʹа амьн бьминьн, навед ԝан ԝе сәр һʹәта-һʹәтайе  кʹьтеба жийинеда бе ньвисандьне.

¹⁶ Һьнә мәрьв ԝе сәрԝертийа Йаһоԝа ԛәбул нәкьн. Ле Кʹьтеба Пироз һәжмара ԝан әшкәрә накә. Гәло чь ԝе бе сәре ԝан? Әʹйанти 20:15 ӧса дьбежә: «Наве кʹе ве кʹьтеба жийинеда ньвисар тʹӧнәбу, әԝ һатә авитьне нава гола егьр». Бәле, кәсед кӧ мьԛабьли Йаһоԝа дәрен ԝе сәр һʹәта-һʹәтайе бенә кʹӧтакьрьне. Ле һʹәчʹи зәʹф мәрьвед беԛьсур ԝе ԝәʹде щерʹьбандьна пашьн амьн бьминьн, у навед ԝан ԝе сәр һʹәта-һʹәтайе кʹьтеба жийинеда бе ньвисандьне.

17. Мәләк дәрһәԛа рʹожед мә Данийелрʹа чь готьбу? (Данийел 12:4, 8-10)

¹⁷ Ча баш ә кӧ Кʹьтеба Пироз әʹйан дькә ԝәки ахьрийеда чь ԝе бьԛәԝьмә! Хенщи ве йәке, кʹьтеба Данийел дәрһәԛа рʹожед мә, демәк дәрһәԛа «ԝәхта даԝин» жи информасийа фәрз дьдә (Данийел 12:4, 8-10 бьхунә; 2 Тимотʹейо 3:1-5). Мәләк Данийелрʹа готьбу, кӧ занәбуна рʹаст ԝе зедә бә у хьзмәткʹаред Хԝәде ԝе готьнед жь кʹьтеба ԝи дьһа баш фәʹм бькьн. Ӧса жи, мәләк готьбу кӧ ԝе дәме, «ԝе йед хьраб хьрабийе  бькьн у ԝе тӧ кәси жь йед хьраба йә, фәʹм нәкьн» ван готьна.

18. Зутьрәке чь ԝе бе сәре мәрьвед хьраб?

¹⁸ Иро щарна ӧса те кʹьфше ԝәки кәсед хьраб бона кьред хԝә щәза настиньн (Малахи 3:14, 15). Ле зутьрәке, Иса Мәсиһ ԝе диԝана ԝан мәрьва бькә, йед кӧ мина бьзьна нә у ԝе ԝана жь кәсед кӧ мина пез ьн, вәԛәтинә (Мәтта 25:31-33). Әв мәрьвед хьраб ԝе нә тәнгасийа мәзьнда сах бьминьн, у нә жи дьнйа тʹәзәда ԝе жь мьрьне бенә рʹакьрьне. Навед ԝан ԝе кʹьтеба жийинеда нәйенә ньвисандьне (Малахи 3:16).

19. Гәләк фәрз ә кӧ әм чь бькьн, у чьрʹа? (Малахи 3:16-18)

¹⁹ Гәрәке әм бь рʹабун-рʹуньштьна хԝә избат кьн, кӧ әм нава мәрьвед хьрабда ниньн (Малахи 3:16-18 бьхунә). Йаһоԝа иро ван мәрьва тʹоп дькә, кʹижана кӧ әԝ ча мале хԝәйә хас һʹәсаб дькә. Гәло әм нахԝазьн нава ԝанда бьн?

20. Данийелрʹа чь соз һатьбу дайине, у тӧ чьма һивийа ви сози йи?

²⁰ Рʹожед мә бь рʹасти жи рʹожед мәхсус ьн. Дәмәкә незикда, һʹәму кәсед хьраб ԝе бенә кʹӧтакьрьне. Паше, әме пекһатьна ве йәке бьвиньн, чь кӧ Йаһоԝа Данийелрʹа соз дабу: «Те һʹьшйар бьби у хәлата хԝә бьстини» (Данийел 12:13, ИМ). Һәрге тӧ һʹьзрәта ԝе рʹоже йи кӧ Данийел у мәрьвед тәйи һʹьзкьри жь мьрьне рʹабьн, һәр тьшти бькә ԝәки тӧ амьн бьмини. Һьнге наве тә ԝе кʹьтеба жийинеда бьминә!