1. Йаһоԝа бона мә чь кьрийә?

ЙАҺОԜА һәр кәси жь мә кʹьшандийә бал хԝә (Йуһʹәнна 6:44). Бьфькьрә әв йәк чь те һʹәсабе: Бь милйарда мәрьв бәр чʹәʹве Йаһоԝа нә, у әԝ дьле ԝан леколин дькә. Әԝи дит кӧ тӧ йәки дьлпʹак и у һазьр и ԝи нас бьки у ԝи һʹьз бьки (1 Дирок 28:9). Бәле, Йаһоԝа тә нас дькә, фәʹм дькә у тә һʹьз дькә. Гәло әв йәк дьле тә гәрм накә?

2. Иса чаԝа зәлал кьр кӧ Йаһоԝа бона һәр пәзәкә хԝә хәм дькә?

² Йаһоԝа ча бона тә хәм дькә, әԝ ӧса жи бона һʹәму хьзмәткʹаред хԝә йед дьн жи хәм дькә. Иса әв йәк бь сайа мәсәләке зәлал кьр. Әԝи гот кӧ Йаһоԝа мина шьванәки йә. Һәгәр 100 пәзед шьван һәбьн у йәк жь ԝан ӧнда бә, гәло әԝ ԝе чь бькә? Әԝ ԝе 99 пәзед хԝә чʹийабанийа бьһелә у һәрʹә кӧ йа ӧндабуйи бьгәрʹә. Гава әԝ ве пәзе бьвинә, әԝе сәр ве һерс нәкʹәвә, ле жерʹа ша бә. Әв мәсәлә чь мә һин дькә? Йаһоԝа һʹәму пәзед хԝә ԛимәт дькә. Иса ӧса гот: «Баве ԝәйи әʹзмана нахԝазә кӧ жь ван бьчʹука йәк ӧнда бә» (Мәтта 18:12-14).

3. Ве готареда, әме дәрһәԛа чь хәбәр дьн?

³ Әм һьлбәт нахԝазьн дьле хушк у бьра бешиньн. Сәва кӧ әм кәсәки нәлькʹӧминьн, гәрәке әм чь бькьн? Һәгәр кәсәк дьле мә бешинә, гәрәке әм чь бькьн? Ве готареда, әме щабед ван пьрса бьстиньн. Ле пешийе, әме бьвиньн кӧ кʹи нә йед «бьчʹук», бәʹса кʹижана кʹьтеба Мәтта сәре 18 дькә.

4. Йед «бьчʹук» кʹи нә?

⁴ Йед «бьчʹук», һʹәму шагьртед Иса нә. Фьрԛи тʹӧнә  әԝана чәнд сали нә, йәкә әԝана «мина зарʹока» ньн, чьмки әԝана һазьр ьн кӧ бь мьлукти жь Иса Мәсиһ һин бьн (Мәтта 18:3). Әԝана чьԛас жь щурʹә-щурʹә кʹок у мьләта бьн жи, у ньһерʹандьн у хәйсәтед ԝан жь һәв щӧдә бьн жи, әԝана гьшк баԝәрийа хԝә Иса Мәсиһ тиньн, у Иса ԝана гәләк һʹьз дькә (Мәтта 18:6; Йуһʹәнна 1:12).

5. Гава кәсәк хьзмәткʹарәки Йаһоԝа дьлькʹӧминә йан дьле ԝи дешинә, әԝ чь тʹәхмин дькә?

⁵ Йаһоԝа Хԝәде «ван бьчʹука» гәләк ԛимәт дькә. Сәва әм фәʹм бькьн кӧ әԝ сәр ԝана ча дьньһерʹә, бинә бәр чʹәʹве хԝә кӧ әм чаԝа сәр зарʹока дьньһерʹьн. Әԝана бона мә гәләк ԛимәт ьн. Әм дьхԝазьн ԝана бьпарезьн, чьмки ԛәԝат, щерʹьбандьн у биланийа ԝан һе кем ә. Гава тьштәки хьраб те сәре мәрьвәки, әм һьлбәт хәмгин дьбьн, ле гава кәсәк дьле зарʹокәке дешинә у зийане дьдә ԝи, әм дьһа бәрхԝә дькʹәвьн у һерс дькʹәвьн. Мина ве йәке, Йаһоԝа жи дьхԝазә мә бьпарезә, у гава кәсәк хьзмәткʹарәки ԝи дьлькʹӧминә йан дьле ԝи дешинә, әԝ хәмгин у һерс дьбә (Ишайа 63:9; Марԛос 9:42).

6. Ль гора 1 Корьнтʹи 1:26-29, дьнйа чаԝа сәр шагьртед Иса дьньһерʹә?

⁶ Шагьртед Иса диса чьда мина «бьчʹука» нә? Мәрьвед ве дьнйайе һәри зедә ԛимәте дьдьн кәсед дәԝләмәнд у навдар, ле шагьртед Иса Мәсиһ  бәр чʹәʹве ԝан «бьчʹук» у беԛимәт ьн (1 Корьнтʹи 1:26-29 бьхунә). Ле Йаһоԝа ԝана ӧса һʹәсаб накә.

7. Йаһоԝа дьхԝазә кӧ әм һьндава хушк у бьрада ча бьн?

⁷ Йаһоԝа һʹәму хьзмәткʹаред хԝә һʹьз дькә, һьм йед кӧ гәләк сала ԝирʹа хьзмәт дькьн һьм жи йед кӧ тʹәзә һатьнә сәр рʹийа рʹастийе. Йаһоԝа һʹәму хушк у бьред мә ԛимәт дькә, ләма әм жи гәрәке ԝана ԛимәт бькьн. Әм «бәдәнәк ьн у һәр кәс жь мә әндәмед һәв ьн», ләма гәрәке әм һʹәму хушк у бьра һʹьз бькьн (Рʹомайи 12:5). Гәрәке әм чь жь дәсте мә те бькьн, кӧ ԝан бьпарезьн у хԝәй бькьн. Һәгәр әм тедәрхьн ԝәки мә дьле кәсәки ешандийә, гәрәке әм нәфькьрьн кӧ әв йәк тьштәки бьчʹук ә йан кӧ әв кәс бь зедәйи хәйдок ә. Гәло һьнә кәс чьма зу дьхәйидьн? Һьнә хушк у бьред мә сәва мьләт у култура хԝә ньмьз һʹәсаб дькьн. Һьнә кәс жи тʹәзә һатьнә сәр рʹийа рʹастийе у ньзаньн кӧ гәрәке әԝана сәр кемасийед хушк у бьра чаԝа бьньһерʹьн. Проблем чь бә жи, гәрәке әм һәр тьшти бькьн ԝәки ль һәв бен. Һьлбәт лазьм ә ԝәки әԝе кӧ зу дьхәйьдә һин бә ве хәйсәте хԝә бьгӧһезә. Әв йәк ԝе али ԝи бькә кӧ әԝ шабуна хԝә ӧнда нәкә у достийа тʹәви хушк у бьра хԝәй кә.

8. Чь ньһерʹандьн сәр шагьртед Иса һʹӧкӧм дькьр?

⁸ Гәло Иса чьрʹа бәʹса «ван бьчʹука» кьр? Чьмки шагьртед ԝи жь ԝи пьрсин: «Ль нав Пʹадшатийа Әʹзманада кʹи йә йе һәри мәзьн?» (Мәтта 18:1). Гәло шагьртед Иса Мәсиһ чьма ӧса пьрсин? Ԝи чахи гәләк Щьһу дьфькьрин кӧ нава щьмәʹтеда щийе бьльнд у навдәнги гәләк фәрз ьн. Леколинкʹарәк ӧса дьбежә: «Ԝи чахи мәрьв бона һӧрмәт, нав, навдари у ԛәдьре хԝә, дьжитьн у дьмьрьн».

9. Лазьм бу кӧ шагьртед Иса чь бькьн?

⁹ Иса рʹьнд заньбу кӧ бона шагьртед ԝи һеса нинә нәкʹәвьнә бьн байе култура Щьһуйа у мәрьварʹа нәкʹәвьнә рʹьке.  Әԝи ԝанрʹа гот: «Йе нав ԝәдайи һәри мәзьн, бьра бьбә мина йе һәри бьчʹук у бьра йе сәрԝертийе дькә жи бьбә мина йе хӧламтийе дькә» (Луԛа 22:26). Гава әм мәрьва сәр хԝәрʹа дьгьрьн, бь рʹабун-рʹуньштьна хԝә әм дьбьнә мина «йе һәри бьчʹук» (Филипи 2:3). Һәгәр ньһерʹандьна мә ӧса бә, әме дьле кәсед дьн нәешиньн.

10. Гәрәке әм кʹижан ширәта Паԝлосе шанди бир нәкьн?

¹⁰ Һʹәму хушк у бьред мә һьлбәт тьштәкида мә четьр ьн. Һәгәр әм дина хԝә бьдьн хәйсәтед ԝанә баш, әме ве йәке һеса бьвиньн. Ԝе баш бә кӧ әм ве ширәта Паԝлосе шанди бир нәкьн: «Кʹи тә жь хәлԛе фьрԛи дькә? Чи тә  һәйә, кӧ тә пʹешкʹеш нәстандийә? Ле ԝәки тә стандийә, чьма пʹәйе хԝә дьди чаԝа тә нәстандьбә?» (1 Корьнтʹи 4:7). Гәрәке әм нәфькьрьн кӧ әм жь кәсед дьн четьр ьн. Һәгәр кәсәк пʹайе мә бьдә, чьмки готаред мә хԝәш ьн йан чьмки әм һеса һинбунед Кʹьтеба Пироз дәстпедькьн, гәрәке әм дәрберʹа рʹумәте бьдьнә Йаһоԝа.

11. Мәсәла Иса дәрһәԛа пʹадша у хӧламе дәйндар чь мә һин дькә?

¹¹ Паши ве йәке гава Иса шагьртед хԝәрʹа готьбу кӧ гәрәке әԝ кәсед дьн нәлькʹӧминьн, әԝи мәсәла пʹадша у хӧламе дәйндар ани. Пʹадша дәйне мәзьн йе хӧлам бахшанд, ле паше, ви хӧлами дәйне бьчʹук йе хӧламәки дьн нәбахшанд. Ахьрийеда, пʹадша хӧламе берʹәʹм авитә кәле. Әв йәк чь мә һин дькә? Иса ӧса гот: «Ӧса жи Баве мьни Әʹзмана ԝе ль сәре ԝә һәр йәки бькә, һәгәр һун бь дьл нәбахшиньнә бьре хԝә» (Мәтта 18:21-35).

12. Гава әм набахшиньн кәсәки, әв чь зьраре тинә?

¹² Хӧламе берʹәʹм бь кьред хԝә зьрар да хԝә у кәсед дьн. Пешийе, әԝи хӧламе дьн «авитә кәле, һʹәта кӧ әԝ дәйне хԝә бьдә». Бь ви аԝайи, әԝи зьрар да хӧламед дьн жи, чьмки «чахе хӧламһәвалед ԝийә дьн әв йәк дитьн, гәләки бәр хԝә кʹәтьн». Гәрәке әм бир нәкьн кӧ кьред мә сәр кәсед дьн жи һʹӧкӧм дькьн. Һәгәр кәсәк дьле мә ешандийә у әм набахшиньн ԝи, чь дькарә бьԛәԝьмә? Йа пешьн, гава әм нахԝазьн бьбахшиньн ԝи, әм зьраре дьдьнә ԝи, чьмки әм һьндава ԝида дьлсар дьбьн, у дьбәкә хԝә жь ԝи дур дьгьрьн. Йа дӧда, гава ортʹа мә у ви кәсида әʹдьлайи тʹӧнә, әв йәк дькарә хушк у бьред щьватеда жи әʹщьз бькә.

13. Сәрһатийа пешәнгәке чь мә һин дькә?

¹³ Гава әм дьбахшиньн хушк у бьра, әв һьм бона мә һьм жи бона кәсед  дьн кʹар ә. Сәрһатийа пешәнгәкә бь наве Лейла * ве йәке рʹьнд әшкәрә дькә. Хушкәкә дьн дьле ԝе ешандьбу. Лейла ӧса дьбежә: «Готьнед ԝе әз бьриндар кьрьм. Гава әз дьчум хьзмәте, мьн нәдьхԝәст тʹәви ԝе әʹрәбәкеда рʹунем. Мьн хирәт у шабуна хԝә ида ӧнда дькьр». Рʹаст ә мәʹни һәбу кӧ Лейла хәйьд дьле хԝәда хԝәй кә, диса жи әԝе әв проблем дьреж нәкьр у нәкʹәтә һʹәйра хԝә, ле бь мьлукти ширәта жь готарәкә бь наве «Жь Дьл Бьбахшинә» да хәбате у бахшандә ве хушке («Бьрща Ԛәрәԝьлийе» йа 15 Щотмәһе, 1999). Лейла дьбежә: «Әз ньһа фәʹм дькьм кӧ әм гьшк сәр хԝә дьхәбьтьн ԝәки мәрьве ну ль хԝә бькьн, у Йаһоԝа һәр рʹож бь рʹәʹма дьле хԝә дьбахшинә мә. Барәки  гьран жь стуйе мьн кʹәт у шабуна мьн вәгәрʹийа».

14. Ль гора Мәтта 18:21, 22, Пәтрусрʹа чәтьн бу кӧ чь бькә, у әм жь щаба Иса чь һин дьбьн?

¹⁴ Әм һьлбәт заньн кӧ гәрәке әм бьбахшиньн кәсед дьн. Диса жи, әв йәк дьбәкә щарна мәрʹа чәтьн ә. Ча те кʹьфше Пәтрусе шандирʹа жи щарна зор бу кӧ бьбахшинә кәсед дьн (Мәтта 18:21, 22 бьхунә). Гәло чь дькарә али мә бькә кӧ әм бьбахшиньн кәсед дьн? Йа йәке, бьфькьрә кӧ Йаһоԝа чәнд щара бахшандийә тә (Мәтта 18:32, 33). Әм һежайи бахшандьна ԝи ниньн, ле әԝ диса жи жь дьл дьбахшинә мә (Зәбур 103:8-10). Һәрге Йаһоԝа мә һаԛас һʹьз дькә, демәк «гәрәке әм жи һәвдӧ һʹьз бькьн». Бәле, әм мәщбур ьн  кӧ хушк у бьра һʹьз бькьн (1 Йуһʹәнна 4:11). Йа дӧда, бьфькьрә кӧ бахшандьн чьԛас кʹаре тинә. Бь сайа бахшандьне әм дькарьн али кәсе кӧ дьле мә ешандийә бькьн, ӧса жи әме әʹдьлайе бькьнә щьвате, достийа хԝә тʹәви Йаһоԝа хԝәй кьн у жь барәки гьран хьлаз бьн (2 Корьнтʹи 2:7; Колоси 3:14). Йаһоԝа, йе кӧ дьхԝазә ԝәки әм бьбахшиньн һәвдӧ, һазьр ә али мә бькә. Ләма жи ԝирʹа дӧа бькә. Изне нәдә кӧ Мире-щьна әʹдьлайа нав мәда хьраб кә (Әфәси 4:26, 27). Сәва кӧ әм хԝә жь тʹәлька Мире-щьна хԝәй бькьн, әм һʹәԝще аликʹарийа Йаһоԝа нә.

15. Ль гора Колоси 3:13, һәгәр әм сәва готьн йан кьред хушк йан бьраки әʹщьз бунә, әм дькарьн чь бькьн?

¹⁵ Һәгәр хушк йан бьрак тә гәләк әʹщьз дькә, гәрәке тӧ чь бьки? Һәр тьшти бькә кӧ әʹдьлайе хԝәй ки. Дьле хԝә Йаһоԝарʹа вәкә. Жь Йаһоԝа рʹәща бькә кӧ бьра әԝ ԝи кәси, кӧ дьле тә ешандийә,  кʹәрәм бькә, у али тә бькә ԝәки тӧ жи һʹӧнӧред ԝийә баш бьвини, сәва кʹижана кӧ Йаһоԝа ԝи һʹьз дькә (Луԛа 6:28). Һәгәр тӧ нькари чʹәʹве хԝә сәр шашийа ԝи бьгьри, рʹьнд бьфькьрә кӧ тӧ чаԝа дькари тʹәви ԝи хәбәр ди. Нәфькьрә кӧ әԝи бь һʹәмде хԝә дьле тә ешандийә (Мәтта 5:23, 24; 1 Корьнтʹи 13:7). Гава һун хәбәр дьн, баԝәр бә кӧ нета ԝи баш ә. Ле һәгәр әԝ нахԝазә тʹәви тә ль һәв бе, гәрәке тӧ чь бьки? Бь сәбьр бә у һевийа хԝә жь ԝи нәбьрʹә (Колоси 3:13 бьхунә). Йа һәри фәрз, кʹине нәжо, чьмки кʹин дькарә достийа тә тʹәви Йаһоԝа хьраб кә. Изне нәдә кӧ тьштәк тә бьлькʹӧминә. Бь ви щурʹәйи тӧ дькари избат бьки кӧ тӧ жь һәр тьшти зедәтьр Йаһоԝа һʹьз дьки (Зәбур 119:165).

16. Щабдарийа һәр кәси жь мә чь йә?

¹⁶ Әм ви ԛәдри ԛимәт дькьн кӧ әм бь йәкти Йаһоԝарʹа хьзмәт дькьн. Әм кәрик ьн у шьване мә йәк ә (Йуһʹәнна 10:16). Кʹьтебәкә * мә ӧса дьбежә: «Һәрге тӧ жь ве йәктийе кʹаре дьстини, гәрәке тӧ жи алийе хԝәда тьштәки бьки ԝәки ве хԝәй бьки». Ләма жи, гәрәке әм «хԝә һин бькьн кӧ әм мина Йаһоԝа сәр хушк у бьра бьньһерʹьн». Йаһоԝа мә һʹәмуйа ча зарʹед «бьчʹук» һʹәсаб дькә. Гәло тӧ жи ӧса сәр хушк-бьра дьньһерʹи? Йаһоԝа һәр тьшти ԛимәт дькә чь кӧ тӧ дьки, ԝәки али хушк-бьра бьки (Мәтта 10:42).

17. Ԝе баш бә кӧ әм чь бькьн?

¹⁷ Әм хушк у бьра һʹьз дькьн, ләма гәрәке әм «ньг нәдьнә ль бәр бьра, кӧ нәлькʹӧмьн йан пʹьшк нәбьн» (Рʹомайи 14:13). Әм хушк у бьра жь хԝә бьльндтьр һʹәсаб дькьн, у әм һазьр ьн кӧ жь дьл бьбахшиньнә ԝан. Бьра әм сәва кьред кәсед дьн нәлькʹӧмьн, ле «әм һьндава һәвда сәр нета әʹдьлайийе у баԝәри авакьрьне бьн» (Рʹомайи 14:19).