1. Хьзмәткʹаред Йаһоԝа чьма хԝә щарна тʹәне тʹәхмин дькьн?

ЩАРНА әм гьшк хԝә тʹәне тʹәхмин дькьн. Һьнә кәс зу жь ԝи һʹали дәртен, ле бона һьнәка әв йәк һеса нинә. Чьԛас дәр-дора мә гәләк мәрьв һәбьн жи, дьбәкә һьнге жи әм хԝә тʹәне тʹәхмин дькьн. Һьнәкарʹа зор ә кӧ щьватәкә нуда хԝәрʹа һәвала бьвиньн. Һьнәкарʹа жи чәтьн ә кӧ жь малбәта хԝә дур кʹәвьн у дәрбази щики дьн бьбьн. Һьнә кәс жи бира мәрьвед хԝәйи незик дькьн, йед кӧ мьрьнә. У һьнә хушк у бьра – илаһи йед кӧ тʹәзә һатьнә ньхӧмандьне – хԝә тʹәне тʹәхмин дькьн, чьмки мәрьвед ԝан у достед ԝан йед бәре пьшта хԝә дьдьн ԝан йан жи пәй ԝан дькʹәвьн.

2. Ве готареда, әме щабед кʹижан пьрса бьстиньн?

² Йаһоԝа дәрһәԛа мә һәр тьшти занә, у әԝ һʹале мә фәʹм дькә. Гава әм хԝә тʹәне тʹәхмин дькьн, әԝ ве йәке дьвинә у дьхԝазә али мә бькә кӧ әм дьлтәнг нәбьн. Гәло Йаһоԝа ча али мә дькә? Әм ча дькарьн али хԝә бькьн? У әм ча дькарьн аликʹарийе бьдьн хушк у бьред кӧ хԝә тʹәне тʹәхмин дькьн? Ньһа әме щабед ван пьрса бьстиньн.

3. Йаһоԝа ча һатә һәԝара Елйас?

³ Йаһоԝа ԛәнщийа һʹәму хьзмәткʹаред хԝә дьхԝазә. Әԝ незики һәр йәки жь мә йә, у гава әм дьлтәнг дьбьн, әԝ ве йәке дьвинә (Зәбур 145:18, 19). Дина хԝә бьде кӧ Йаһоԝа ча бона Елйас пʹехәмбәр хәм дькьр у  али ԝи дькьр. Елйас хьзмәткʹаре Хԝәде йе амьн бу, у әԝ дәмәкә гәләк хьрабда дьжит. Ԝи чахи дьжмьнед Хԝәде пәй хьзмәткʹаред ԝи дькʹәтьн, у әԝана илаһи пәй Елйас кʹәтьбун кӧ ԝи бькӧжьн (1 Пʹадшати 19:1, 2). Сәрда жи, Елйас дьфькьри кӧ әԝ тʹәне йә у ида ԛәт хьзмәткʹаред Йаһоԝа нәманә (1 Пʹадшати 19:10). Ле Хԝәде дәрберʹа һатә һәԝара Елйас у мәләкәк шанд бал ԝи. Мәләк Елйасрʹа гот ԝәки әԝ тʹәне нинә у кӧ диса гәләк хьзмәткʹаред Йаһоԝа һәнә (1 Пʹадшати 19:5, 18).

4. Ча Марԛос 10:29, 30 нишан дькә кӧ Йаһоԝа хәм дькә бона кәсед кӧ пьштгьрийа дост у мәрьвед хԝә ӧнда кьрийә?

⁴ Йаһоԝа занә кӧ гава кәсәк ԛьраре дьдә кӧ ԝирʹа хьзмәт бькә, щарна лазьм ә кӧ әв кәс ԛӧрбанед мәзьн бькә. Мәсәлә, дьбә кӧ әԝ пьштгьрийа дост у мәрьвед хԝә йед нәбаԝәрмәнд ӧнда бькә. Щарәке, Пәтрусе шанди жь Иса Мәсиһ ӧса пьрсибу: «Аԝа мә һʹәму тьшт һьштийә у пәй тә һатьнә, ле ахьрийа мә ԝе чаԝа бә?» (Мәтта 19:27). Иса Мәсиһ шагьртед хԝәрʹа гот кӧ әԝе бьбьн пʹара малбәтәкә мәзьн (Марԛос 10:29, 30 бьхунә). Ӧса жи, Йаһоԝа – йе кӧ Сәре малбәта мәйә рʹӧһʹани йә – соз дьдә, кӧ әԝе пьштгьрийа хьзмәткʹаред хԝә бькә (Зәбур 9:10). Хенщи ве йәке, һәгәр әм хԝә тʹәне тʹәхмин бькьн, гәло әм чаԝа дькарьн аликʹарийа Йаһоԝа бьстиньн?

5. Ԝе чьма баш бә ԝәки тӧ дина хԝә биди кӧ Йаһоԝа ча пьштгьрийа тә дькә?

⁵ Дина хԝә бьде кӧ Йаһоԝа чаԝа пьштгьрийа тә дькә (Зәбур 55:22). Бь ви аԝайи, тӧйе фәʹм бьки кӧ тӧ тʹәне нини. Хушкәкә азәп йа бь наве Карол *, йа кӧ мәрьвед ԝе нә Шәʹдед Йаһоԝа нә, ӧса дьбежә: «Гава әз тиньм бәр чʹәʹве хԝә кӧ Йаһоԝа тәнгасийада чаԝа пьштгьрийа мьн кьр, әз фәʹм дькьм кӧ әз тʹәне ниньм у Йаһоԝа ԝе һәр тʹьм али мьн бькә».

6. Готьнед 1 Пәтрус 5:9, 10 чаԝа дькарьн дьл бьдьн кәсед кӧ хԝә тʹәне тʹәхмин дькьн?

⁶ Бьфькьрә кӧ Йаһоԝа ча аликʹарийе  дьдә хушк у бьред кӧ хԝә тʹәне тʹәхмин дькьн (1 Пәтрус 5:9, 10 бьхунә). Бьраки бь наве Һироши, йе кӧ гәләк сала малбәта хԝәда тʹәк Шәʹде Йаһоԝа йә, ӧса дьбежә: «Щьватеда рʹьнд те кʹьфше кӧ проблемед һәр кәси һәнә. Һәр кәс чь жь дәсте ԝи те дькә кӧ Йаһоԝарʹа хьзмәт бькә, у әв йәк дькарә дьл бьдә кәсед кӧ сәр рʹийа рʹастийе тʹәне нә».

7. Дӧа ча дькарә али тә бькә?

⁷ Тʹьме дӧа бькә, хьзмәт кә у щьвина бәрнәдә. Дьле хԝә Йаһоԝарʹа вәкә (1 Пәтрус 5:7). Гава хушкәкә щаһьл йа бь наве Массиел дәстпекьр Йаһоԝарʹа хьзмәт кә, әԝе хԝә тʹәне тʹәхмин дькьр, чьмки мәрьвед ԝе Шәʹдед Йаһоԝа нибун. Әԝ ӧса дьбежә: «Гава кӧ мьн хԝә тʹәне тʹәхмин дькьр, дӧайед жь дьл гәләк али мьн дькьрьн кӧ әз сәбьр бькьм. Йаһоԝа мьнрʹа ча Бав бу, у мьн рʹож бь рʹож гәләк щара ԝирʹа дӧа дькьр у дьле хԝә ԝирʹа вәдькьр».

8. Тӧ ча дькари жь хԝәндьн у фькьрандьна сәр Кʹьтеба Пироз кʹаре бьстини?

⁸ Бәрдәԝам кә Кʹьтеба Пироз бьхунә у сәр сәрһатийед кӧ нишан дькьн, ԝәки Йаһоԝа тә һʹьз дькә, кʹур бьфькьрә. Хушкәкә бь наве Бианка, йа кӧ щарна сәва готьнед мәрьвед хԝәйә нәбаԝәрмәнд хәмгин дьбә, ӧса дьбежә: «Әз жь хԝәндьн у фькьрандьна сәр сәрһатийед Кʹьтеба Пироз у сәрһатийед хушк у бьред кӧ рʹасти тәнгасийед мина йед мьн дьһатьн, кʹарәкә мәзьн дьвиньм». Һьнә хушк у бьра рʹезед кӧ дьлбинийе дьдьн ԝан, әзбәри дькьн, мәсәла Зәбур 27:10 у Ишайа 41:10. Һьнә хушк у бьра жи, сәва кӧ хԝә тʹәне тʹәхмин нәкьн, гава хԝә бона щьвина һазьр дькьн йан жи Кʹьтеба Пироз дьхуньн, гӧһ дьдьн аудио ньвисандьнед жь малпәра мә.

9. Щьвин чьда дькарьн али тә бькьн?

⁹ Тʹьме һәрʹә щьвина. Бь ве йәке тӧйе һьм жь бәрнаме кʹаре бьстини һьм  жи хушк у бьра нас бьки (Ибрани 10:24, 25). Массиел ӧса дьбежә: «Рʹаст ә әз шәрмокә бум, ле мьн ԛьрар кьрьбу ԝәки әзе һәрʹьм һәр щьвине у һәма щабәке бьдьм. Ве йәке али мьн дькьр кӧ әз хԝә ча әндәме щьвате тʹәхмин кьм».

10. Чьма фәрз ә кӧ әм тʹәви хушк у бьред амьн һәвалтийе бькьн?

¹⁰ Тʹәви хушк у бьред амьн һәвалтийе бькә. Щьватеда хушк у бьред жь щурʹә-щурʹә кʹок у култура һәнә. Һьнә жь ԝан щаһьл ьн, һьнә жи әʹмьрда мәзьн ьн. Тӧ дькари жь ԝан һәр кәса тьштәки һин би. Мәсәлә, тӧ дькари жь биланийа хушк у бьред кӧ жь тә мәзьнтьр ьн, һин  бьби (Ибо 12:12). Ӧса жи, тӧ дькари жь йед кӧ тә бьчʹуктьр ьн жи гәләк тьшта һин бьби. Даԝьд жи жь Йонатʹан бьчʹуктьр бу, ле әԝана бунә достед һәв (1 Самуйел 18:1). Даԝьд у Йонатʹан али һәвдӧ дькьрьн кӧ нава тәнгасийед гьранда жи Йаһоԝарʹа хьзмәт бькьн (1 Самуйел 23:16-18). Хушкәкә бь наве Ирина, йа кӧ малбәта хԝәда тʹәк Шәʹда Йаһоԝа йә, дьбежә: «Хушк у бьред мә бь рʹасти дькарьн бьбьн малбәта мә йа рʹӧһʹани. Бь сайа ԝан, Йаһоԝа дькарә бе һәԝара мә».

11. Бона ԛазанщкьрьна достед незик, гәрәке әм чь бькьн?

¹¹ Һьнә кәс шәрмокә нә, у ԝанрʹа һеса нинә кӧ хԝәрʹа һәвалед тʹәзә бьвиньн. Хушкәкә шәрмокә бь наве Ратна, йа кӧ гава бу Шәʹда Йаһоԝа рʹасти мьԛабьлибуне һат, ӧса дьбежә: «Мьн фәʹм кьр кӧ әз һʹәԝще пьштгьри у аликʹарийа хушк у бьра мә». Рʹаст ә, щарна дьбәкә зор ә дьле хԝә кәсәкирʹа вәки, ле бьзаньбә кӧ әв йәк дькарә рʹийа тә бона достикә незик вәкә. Дост у һәвалед тә һьлбәт һазьр ьн кӧ дьле тә ԛәԝи кьн у пьштгьрийа тә бькьн, ле гәрәке тӧ ԝанрʹа бежи кӧ әԝ чаԝа дькарьн ве йәке бькьн.

12. Хьзмәти ча дькарә али мә бькә кӧ әм хԝәрʹа һәвалед тʹәзә бьвиньн?

¹² Сәва кӧ тӧ хԝәрʹа һәвалед тʹәзә бьвини, тʹәви хушк у бьра дәркʹәвә хьзмәте. Карол ӧса дьбежә: «Чьмки мьн тʹәви хушка хьзмәтеда у шьхӧлед рʹӧһʹанида ԝәхт дәрбаз дькьр, мьн гәләк достед баш ԛазанщ кьрьнә. Гәләк сала, Йаһоԝа бь сайа ван доста пьштгьрийа мьн кьрийә». Бь рʹасти жи гәләк фәрз ә кӧ әм тʹәви хушк у бьред амьн һәвалтийе бькьн, чьмки Йаһоԝа дькарә бь сайа достед ӧса мерхасийе бьдә мә у али мә бькә кӧ әм хԝә тʹәне тʹәхмин нәкьн (Мәтʹәлок 17:17).

13. Лазьм ә кӧ һәр кәс жь мә чь бькә?

¹³ Щьватеда, лазьм ә кӧ әм гьшк әʹдьлайе хԝәй кьн у һʹьзкьрьне нишан кьн, ԝәки тʹӧ кәс хԝә тʹәне тʹәхмин нәкә (Йуһʹәнна 13:35). Готьн у кьрьнед мә дькарьн кәсед дьн бьшьдиньн. Бьньһерʹә кӧ хушкәке чь гот: «Гава әз рʹастийе һин дьбум, щьват бу малбәта мьн. Бе аликʹарийа ԝан, мьне нькарьбуйа бьбьм Шәʹда Йаһоԝа». Гәло тӧ ча дькари али ԝан хушк-бьра бьки йед кӧ рʹастийеда тʹәне нә, ԝәки әԝана хԝә ча нәфәред щьвате тʹәхмин бькьн?

14. Әм ча дькарьн тʹәви кәсед тʹәзә һәвалтийе бькьн?

¹⁴ Тʹәви кәсед тʹәзә һәвалтийе бькә. Гава кәсед тʹәзә тен щьвинед мә, бь дьлгәрми сьлаве бьдә ԝан (Рʹомайи 15:7). Ле бәс нинә кӧ әм тʹәне сьлаве бьдьн ԝан, гәрәке әм ԝәхт шунда ԝанрʹа бьбьн дост у һәвал. Ләма, һьндава йед тʹәзәда ԛәнщ бә у бьдә кʹьфше кӧ тӧ бона ԝан хәм дьки. Хирәт бькә кӧ тӧ тәнгасийед ԝан фәʹм бьки, ле нәкʹәвә нав шьхӧлед ԝанә шәхси. Һьнә кәсарʹа чәтьн ә дьле хԝә вәкьн, ләма жи зоре ԝан нәкә. Бь нәрми у мәʹрифәти пьрса бьдә ԝан у гӧһ бьдә щабед ԝан. Мәсәлә, тӧ дькари бьпьрси кӧ ԝана чаԝа дәрһәԛа рʹастийе бьһист.

15. Хушк у бьред гьһишти ча дькарьн али кәсед дьн бькьн?

¹⁵ Бь сайа хәмкьрьна хушк-бьред гьһишти – илаһи рʹуспийа – тʹәмамийа  щьвате ԝе рʹӧһʹанида пешда һәрʹә. Хушкәкә бь наве Мелисса, дийа кʹижане ле рʹастийеда мәзьн кьр, ӧса дьбежә: «Әз пʹьр ԛимәт дькьм бьред кӧ гәләк сала мьнрʹа бун бавед рʹӧһʹани. Гава әз дьхԝазьм тʹәви кәсәки жь ԝан хәбәр дьм, әԝана һазьр ьн гӧһ бьдьн мьн». Бьраки щаһьл йе бь наве Маурисио хԝә тʹәне тʹәхмин дькьр паши кӧ дәрсдаре ԝи жь рʹастийе дәркʹәт. Маурисио ӧса дьбежә: «Рʹуспийед щьвате гәләк али мьн дькьрьн. Ԝана тʹәви мьн хәбәр дьда, тʹәви мьн дәрдькʹәтьн хьзмәте, һьнә фькред кӧ ԝана леколина шәхсида дьдитьн, мьнрʹа гьли дькьрьн, у һәла һе жи тʹәви мьн спортева мьжул дьбун». Ԝәхт шунда, һьм Мелисса һьм жи Маурисио хьзмәтийа һәртʹьм дәстпекьрьн.

16-17. Әм кʹижан алийава дькарьн аликʹарийе бьдьн хушк у бьра?

¹⁶ Хушк у бьрарʹа ԛәнщийе бькә (Галати 6:10). Мьзгинванәки мисйонер йе бь наве Лео ль ԝәлатәки гәләк дури малбәта хԝә дьжи. Әԝ дьбежә: «Щарьна, ԛәнщикә бьчʹук дькарә гәләк һʹӧкӧм бькә. Рʹожәке, әз бь әʹрәба хԝә кʹәтьмә ԛәзийе. Гава кӧ әз гьһиштьм мале, әз гәләк ԝәстийайи бум, ле хушк у бьраки әз тʹәглифи мала хԝә кьрьм сәр нанхԝарьне. Рʹаст ә, найе бира мьн кӧ мә чь хԝар, ле рʹьнд те бира мьн кӧ ԝана чаԝа бь дьловани гӧһ дьда мьн. Паши хәбәрдане, әз гәләк дьлрʹьһʹәт бум!»

¹⁷ Әм гьшк жь бәрнамед рʹӧһʹани шабуне дьстиньн, мәсәлә жь щьватед мәзьн. Сәр щьвинед ӧса, әм дькарьн тʹәви хушк у бьра ԝәхт дәрбаз кьн у дәрһәԛа бәрнаме хәбәр дьн. Ле Карол ӧса дьбежә: «Сәр щьватед мәзьн, әз хԝә тʹәне тʹәхмин дькьм». Гәло чьма? «Һәр чьԛас дәр-дора мьн бь сәда йан бь һʹәзара хушк у бьра һәбьн жи, әԝана һәр тʹьм тʹәви малбәта хԝә нә. Гава әз ԝан дьньһерʹьм, әз дьлтәнг дьбьм». Һьнәкарʹа йед кӧ жьн йан мере хԝә ӧнда кьрьнә, гәләк чәтьн ә щара пешьн бейи ԝан һәрʹьн щьватәкә мәзьн. Гәло тӧ кәсәки кӧ рʹасти тәнгасийед ӧса тен, нас дьки? Гәло тӧ дькари щарәкә дьн кәсәки ӧса тʹәглиф ки кӧ әԝ тʹәви тә у малбәта тә рʹуне?

18. Гәло әм чаԝа дькарьн ль гора 2 Корьнтʹи 6:11-13 меванһʹьзийе нишан бькьн?

 ¹⁸ Тʹәви кәсед дьн ԝәхт дәрбаз бькә. Ԝе баш бә кӧ тӧ тʹәви щурʹә-щурʹә хушк у бьра ԝәхт дәрбаз бьки, илаһи тʹәви кәсед кӧ хԝә тʹәне тʹәхмин дькьн. Әм һьлбәт дьхԝазьн али кәсед ӧса бькьн (2 Корьнтʹи 6:11-13 бьхунә). Мелисса ӧса дьбежә: «Гава хушк у бьра мә тʹәглифи мала хԝә дькьн йан жи мә тʹәви хԝә дьбьн һесабуне, әв йәк мә гәләк ша дькә». Жь щьвата хԝә, гәло тӧ дькари кʹе тʹәглифи мала хԝә бьки?

19. Хушк у бьра илаһи кʹәнге һʹәԝще аликʹарийа мә нә?

¹⁹ Щарна дьбәкә хушк у бьред мә һе зедә һʹәԝще һәвалтийа мә нә. Мәсәлә, ԝәʹде щәжна, гава һʹәму мәрьвед ԝан йед нәбаԝәрмәнд тʹәвайи кʹеф дькьн, әԝана хԝә дьбәкә тʹәне тʹәхмин дькьн. Йан жи, әԝана дьбәкә һьнә рʹожа, мәсәлә ԝәʹде әʹйда мьрьна мәрьвәки хԝә, гәләк дьлтәнг дьбьн. Гава әм ԝәʹде ӧса гази ван кәса дькьн кӧ тʹәвайи ԝәхт дәрбаз бькьн, әм нишан дькьн ԝәки әм бона ԝан хәм дькьн (Филипи 2:20).

20. Гава әм хԝә тʹәне тʹәхмин дькьн, готьнед Иса йед жь Мәтта 12:48-50 ча дькарьн али мә бькьн?

²⁰ Гәләк сәбәб һәнә кӧ әм хԝә щарна тʹәне тʹәхмин бькьн. Ле гәрәке әм бир нәкьн кӧ Йаһоԝа һаш жь мә у һәстед мә һәйә. Әԝ бона һʹәԝщед мә хәм дькә, у әԝ ве йәке гәләк щара бь сайа хушк у бьра дькә (Мәтта 12:48-50 бьхунә). Ԝе баш бә кӧ әм бь дьл у щан пьштгьрийа малбәта хԝәйә рʹӧһʹани бькьн. Бь ве йәке, әм дькарьн нишан бькьн кӧ әм жь Йаһоԝа шькьрдар ьн, чьмки әԝи хушк у бьред рʹӧһʹани дайә мә. Һʹале мә чь бә жи, әм тʹәне ниньн, чьмки Йаһоԝа мә тʹӧ щара тʹәне наһелә!