Әз 19 Гӧлане, сала 1940 ль бажаре Амйуне (Лӧбнан) һатьм буйине. Чәнд сал шунда, малбәта мә дәрбази бажаре Триполи бу. Малбәта мьн малбәтәкә бәхтәԝар бу у Йаһоԝа һʹьз дькьр. Әм пенщ зарʹ бун, у әз йе лапи бьчʹук бум. Де у баве мьн әʹбура мале ԝәк тьште һәри фәрз нәдьдит; бона ԝан, леколина Кʹьтеба Пироз, щьвин у хьзмәт һе фәрз бун.

Ль щьвата мә чәнд хушк у бьред бь рʹӧһʹ кʹьфшкьри һәбун. Йәк жь ԝан, Мишәл Абуд бу, йе кӧ леколина кʹьтебе щьватеда дәрбаз дькьр. Әԝ ль Нийу Йорке бьбу Шәʹде Йаһоԝа, у сала 1921-да, әԝ бона бәлакьрьна мьзгине вәгәрʹийабу Лӧбнане. Те бира мьн кӧ әԝи чаԝа ԛәдре дӧ хушкед кӧ Мәкʹтәба Гиләде хьлаз кьрьбун – Аннә у Гԝән Бәавор – дьгьрт у али ԝан дькьр. Әв дӧ хушк бун һәвалед мә. Гәләк сал шунда, мьн Аннә ль Америкайе дит, у паше жи, әз рʹасти Гԝәне һатьм, йа кӧ бь Ԝилфред Гочрʹа зәԝьщибу у Бәйтʹәла Лондонеда хьзмәт дькьр.

Гава әз щаһьл бум, Лӧбнанеда Шәʹдед Йаһоԝа һьндьк бун. Диса жи, мә мьзгин бь хирәт у бь шабун бәла дькьр. Һьнә  сәрԝеред религи мә һʹьз нәдькьрьн, ле мә хьзмәта хԝә бәрʹнәдьда.

Рʹожәке, әз у хушка мьн Сана, мә ль авайике хьзмәт дькьр. Гава мә тʹәви мәрьва хәбәр дьда, кʹәшишәк һат бал мә. Әшкәрә бу кӧ кәсәки гази ԝи кьрьбу. Кʹәшиш дәстпекьр хушка мьн беһӧрмәт бькә. Паше, әԝи хушка мьн жь пʹепәльнге авит хԝаре, у әԝ бьриндар бу. Кәсәк гази полиса кьр, у гава әԝана һатьн, ԝана кәсәкирʹа готьн кӧ али хушка мьн бькә. Паше, ԝана кʹәшиш бьрә полисе, у ль ԝедәре, ԝана дит кӧ чʹәке ԝи һәйә. Комисәр жь ԝи пьрси: «Тӧ кʹи йи? Тӧ кʹәшиш и йан сәроке мафйа йи?»

Щарәкә дьн, әм тʹәви щьвата хԝә бь отобусе чун бажарәки дур кӧ мьзгине ль ԝедәре бәла бькьн. Хьзмәта мә хԝәш дәрбаз бу һʹәта кӧ кʹәшишәк бьһист кӧ әм чь дькьн. Һьнге әԝи мәрьв тʹоп кьрьн кӧ һʹьщуми мә бькьн. Ԝана кәвьр авитьн мә, у баве мьн бьриндар бу. Те бира мьн кӧ рʹуйе ԝи хун бу. Әԝ тʹәви дийа мьн вәгәрʹийа отобусе, у әм жи пәй ԝан чун. Әзе тʹӧ щар бир нәкьм гава дийа мьн рʹуйе баве мьн паԛьж дькьр, әԝе ӧса гот: «Йаһоԝа, ԝана бьбахшинә. Әԝ ньзаньн кӧ әԝ чь дькьн».

Диса щарәкә дьн, әм чун бажаре хԝә кӧ тʹәсәлийа мәрьвед хԝә бькьн. Ве рʹоже епископосәк һатьбу мала кальке мьн. Әԝи заньбу кӧ де у баве мьн Шәʹдед Йаһоԝа нә. Ԝе дәме, әз һе шәш сали бум, ле әԝи жь мьн пьрси: «Кӧрʹе мьн, тӧ чьма нәһати ньхӧмандьне?» Мьн гот кӧ әз һе зарʹок ьм, у сәва кӧ әз бемә ньхӧмандьне, лазьм ә кӧ әз Кʹьтеба Пироз рʹьнд һин бьм у баԝәрийа хԝә ԛәԝи бькьм. Щаба мьн ле хԝәш нәһат, у әԝи кальке мьнрʹа гот ԝәки әз зарʹәкә бемәʹрифәт ьм.

Ле ԛәԝьмандьнед мә йед нәбаш һьндьк бун. Щьмәʹта Лӧбнане һʹәчʹи зәʹф һәвалһʹьз у меванһʹьз ьн. Ләма, мә гәләк щара дәрһәԛа Кʹьтеба Пироз тʹәви мәрьва хԝәш хәбәр дьда, у мә гәләк һинбунед Кʹьтеба Пироз дәрбаз дькьрьн.

Гава әз дьчумә мәкʹтәбе, бьраки щаһьл жь Венесуелайе һат Лӧбнане. Әԝ һат щьвинед мә, у әԝи тʹәви хушка мьн Ԝафайерʹа һәвалти кьр. Ԝәʹдә шунда, әԝана зәԝьщин у чун Венесуелайе. Ԝафайе гәләк бира мә дькьр, ләма әԝе нәʹмед хԝәда баве мьнрʹа дьгот кӧ бьра әм жи дәрбази Венесуелайе бьн. Ль хьлазийе, әԝе ӧса кьр, кӧ мә сафи кьр дәрбази ԝедәре бьн.

Дь сала 1953-да, әм дәрбази Венесуелайе бун, у әм ль Каракасе, незики ԛәсра сәроке ԝәлат, щиԝар бун. Әз һе бьчʹук бум, у мьн хԝәш дьһат бьньһерʹьм кӧ сәроке ԝәлат чаԝа бь әʹрәба хԝә дьһат. Ле ль де у баве мьн зор дьһат кӧ һини ԝәлат, зьман, култур, хԝарьн у һәԝа ну бьн. Гава әԝана һеди-һеди һин дьбун, тьштәки хьраб ԛәԝьми.

Ньшкева, баве мьн нәхԝәш кʹәт. Әм әʹщебмайи ман, чьмки сьһʹәт у ԛәԝата ԝи һәр тʹьм баш бу. Бәре, әԝ тʹӧ щара нәхԝәш нәкʹәтьбу. Нәхԝәшийа ԝи, кансәра панкрәасе бу, ләма әԝ һат операсйонкьрьне. Ле сәд һʹәйф кӧ һʹәфтек шунда, баве мьн әʹмьре хԝә жь дәст да.

Гава баве мьн мьр, әз һе 13 сали бум. Әм гәләки хәмгин бун у бь рʹасти жи бечʹарә ман. Һʹәта ԝәхтәке, ль дийа мьн зор дьһат кӧ мьрьна баве мьн ԛәбул бькә. Ле мә һеди-һеди дьдит кӧ жийин бәрдәԝам дьбә, у бь аликʹарийа Йаһоԝа, мә бәр ви дәрди тәйах кьр. Гава әз 16 сали бум, мьн мәкʹтәб хьлаз кьр, у мьн дьхԝәст бьхәбьтьм, ԝәки әʹбура малбәта хԝә бькьм.

Хушка мьн Санайе бьраки бь наве Рубен Араущора станд, йе кӧ Мәкʹтәба Гиләде хьлаз кьрьбу у вәгәрʹийабу Венесуелайе. Паши кӧ әԝана зәԝьщин, әԝана дәрбази Нийу Йорке бун. Малбәта мьн сафи кьр ԝәки гәрәке әз һәрʹьм занингәһе, ләма әз жь бо хԝәндьне чум Нийу Йорке у щәм хушка хԝә дьмам. Гава әз ль ԝедәре бум, хушка мьн у мере ԝе гәләк али мьн дькьр кӧ әз жь алийе рʹӧһʹанива пешда һәрʹьм. Әм ль Бруклине дьчун щьвата бь зьмане Испани, у щьвата мәда гәләк бьред щерʹьбанди һәбун. Мәсәлә, Милтон Һеншел у Фредерик Франс щьвата мәда бун, у һәрдӧ жи ль Бәйтʹәла Бруклине хьзмәт дькьр.

Незики хьлазбуна сала пешьн йа занингәһа ль Нийу Йорке, әз дьфькьрим кʹа гәрәке әз жийина хԝә ча дәрбаз кьм. Мьн ль журнала «Бьрща Ԛәрәԝьлийе» хԝәндьбу кӧ гәрәке әм нетед рʹӧһʹани дайньн пешийа хԝә, у әз сәр ве йәке кʹур дьфькьрим. Мьн дьдит кӧ пешәнг у Бәйтʹәлванед ль щьвата мә чьԛас дьлша нә, у мьн жи дьхԝәст мина ԝан бьм. Ле әз һе ньхӧманди нибум. Ләма, мьн фәʹм кьр кӧ гәрәке әз жийина хԝә бьдьм дәсте Йаһоԝа, ләма 30 Адаре йа сала 1957, әз һатьмә ньхӧмандьне.

Паши ве гава фәрз, мьн бәре хԝә да гавәкә дьн: Мьн ида дьхԝәст бьбьм пешәнг, ле мьн фәʹм кьр кӧ әв йәк ԝе чәтьн бә. Гәло мьне чаԝа бькарьбуйа һьм хьзмәта хԝә биньм сәри һьм жи занингәһеда һин бьм? Мьн дийа хԝәрʹа у хушк у бьред хԝәрʹа гот кӧ әз дьхԝазьм һинбуна занингәһеда бьдьмә сәкьнандьне, вәгәрʹьм Венесуелайе, у бьбьм пешәнг.

Ль мәһа Һʹәзиране йа сала 1957, әз вәгәрʹийам Каракасе. Ле чьмки һʹале малбәта мьн нә баш бу, лазьм бу кӧ әз жи хԝәрʹа хәбатәки бьвиньм у пьштгьрийа ԝан бькьм. Мьн банкайеда хԝәрʹа хәбатәк дит, ле мьн гәләк дьхԝәст бьбьмә пешәнг жи, чьмки әз бона ве нете вәгәрʹийабум Венесуелайе. Ләма чәнд сала мьн һьм банкайеда һәр рʹож дьхәбьтим һьм жи ча  пешәнг хьзмәт дькьр. Әз һәр чьԛас мьжул бум жи, дьле мьн гәләк ша бу!

Ӧса жи, әз рʹасти хушкәкә хԝәшьк йа бь наве Силвиа һатьм, йа кӧ тʹәви де у баве хԝә жь Алманйайе дәрбази Венесуелайе бьбу. Силвиайе Йаһоԝа гәләк һʹьз дькьр. Бь зәманрʹа, әм зәԝьщин, у мәрʹа дӧ зарʹ бун, кӧрʹе мә Мишел (Маик) у ԛиза мә Самира. Хенщи ве йәке, дийа мьн бал мә дьма. Сәва щабдарийед малбәте, лазьм бу кӧ әз хьзмәта пешәнгийе бьдьмә сәкьнандьне. Диса жи, мьн хирәта хԝә ӧнда нәдькьр, у ль дәма татиле, әз у Силвиа, мә гәләк щара ԝәк пешәнгед кʹомәкдар хьзмәт дькьр.

Дь сала 1984-да, зарʹед мә һе дьчун мәкʹтәбе. Жийина мә гәләк рʹьһʹәт бу, у банкачийед дьн ԛәдре мьн дьгьртьн. Диса жи, ча мьн ль дәстпека ве готаре готьбу, мьн дьхԝәст кӧ мәрьв мьн нә тʹәне ча банкачи, ле һәри зедә ча хьзмәткʹарәки Йаһоԝа бьвиньн. Әв фькьр жь һʹьше мьн нәдьчу. Ләма, әз у Силвиа, әм рʹуньштьн у мә шеԝьр кьр кӧ әм дькарьн чь бькьн. Мьн заньбу кӧ һәгәр әз хәбата хԝә бьһельм, банк ԝе пʹәре ԛальм бьдә мьн. Жь бәр кӧ дәйне мә тʹӧнәбу, әм дьфькьрин кӧ һәгәр әм бь жийинәкә һеса бьжин, пʹәре мә ԝе һʹәта ԝәхтәке тʹери мә бькә.

Әв йәк гавәкә нә һеса бу, ле Силвиа у дийа мьн диса жи ԛайил бун кӧ әм ве гаве бавежьн. Әз гәләк ша бум кӧ әзе диса бьбума пешәнг. Әм дьфькьрин кӧ ида тʹӧ тьшт нькарә рʹийа мә бьгьрә. Ле гәләк ԝәхт дәрбаз нәбу кӧ мә мьзгинәк станд.

Рʹожәке, дохдьр мәрʹа гот кӧ Силвиа һʹәмлә йә. Ве мьзгине дьле мә гәләк ша кьр, ле әм бәрхԝә дькʹәтьн кʹа әв йәк ԝе сәр пешәнгийа мьн чаԝа һʹӧкӧм бькә. Әм зу һини ве һʹале тʹәзә бун, у әм бь шабуне һивийе бун кӧ зарʹа мә бе дьнйайе. Ле әз дьфькьрим гәло мьне бькарьбуйа пешәнгийа хԝә бәрдәԝам кьра?

Паши кӧ мә һәврʹа шеԝьр кьр, мә сафи кьр ԝәки әме ль гора плана хԝәйа пешийе бькьн. Кӧрʹе мә Габриел ль мәһа Нисане йа сала 1985 һатә буйине. Диса жи, мьн хәбата банкеда һишт, у ль мәһа Һʹәзиране йа сала 1985, әз диса бум пешәнге һәртʹьм. Ԝәʹдә шунда, әз бум әндәмәки Комитейа Филиале. Жь бәр кӧ филиал ль бажарәки дури Каракасе бу, әз һәр һʹәфте  дӧ йан се рʹожа ԝәкә 80 киломәтр дьчум у дьһатьм.

Жь бәр кӧ филиал ль бажаре Ла Викториа бу, мә сафи кьр дәрбази ԝедәре бьн, ԝәки әм дьһа незики Бәйтʹәле бьн. Әв йәк бона мә гавәкә мәзьн бу, у малбәта мьн бь тʹәмами пьштгьрийа сафикьрьна мә кьр. Хушка мьн Баһа һазьр бу кӧ ль дийа мә бьньһерʹә. Маик зәԝьщи бу у жь мә щьһе бьбу, ле Самира у Габриел һе тʹәви мә дьман. Ләма, гава әм дәрбази Ла Викториайе бун, әԝана жь дост у һәвалед хԝә йед ль Каракасе дур кʹәтьн. Ӧса жи, лазьм бу кӧ Силвиа паши жийина бажаре мәзьнда һини жийина ль бажарәки бьчʹук бә. Ханийе мә жи, жь ханийе мәйи бәре бьчʹуктьр бу. Бона мә бь рʹасти жи гавәкә мәзьн бу кӧ әм ль бажарәки дьн щиԝар  бьн.

Паше, һʹале мә диса һатә гӧһастьне. Габриел зәԝьщи, у Самира жи дәрбази маләкә дьн бу. Дь сала 2007-да, әз у Силвиа, әм һатьн тʹәглифкьрьн кӧ Бәйтʹәледа хьзмәт бькьн, у әм һʹәта иро жи ль Бәйтʹәле нә. Кӧрʹе мәйи мәзьн Маик рʹуспи йә у тʹәви жьна хԝә Моникайе пешәнгийе дькә. Габриел жи рʹуспи йә у тʹәви жьна хԝә Амбрайе ль Италйайе хьзмәт дькә. Самира һьм пешәнг ә һьм жи жь дурва ише Бәйтʹәле дькә.

Жийина хԝәда, мьн гәләк гавед  мәзьн авитьн, ле әз ԛәт пʹошман нәбум. Һәгәр мәщала мьн һәбуйа, мьне әв гав диса бавитана. Әз гәләк ԛимәт дькьм щабдари у кʹьфшкьрьнед кӧ мьн хьзмәта Йаһоԝада стандьнә. Бь сала, мьн дитийә кӧ чьԛас фәрз ә кӧ достийа мә тʹәви Йаһоԝа ԛәԝи бьминә. Гавед кӧ гәрәке әм бавежьн, бьчʹук бьн йан мәзьн бьн, Йаһоԝа дькарә әʹдьлайа «кӧ жь һәр һʹьш-аԛьли дәрбазтьр ә» бьдә мә (Филипи 4:6, 7). Әз у Силвиа, әм жь хьзмәта ль Бәйтʹәле шабуне дьстиньн, у мә дитийә ԝәки гавед кӧ мә ль гора хԝәстьна Йаһоԝа авитьнә, һатьн кʹәрәмкьрьн.