Паԝлосе шанди ӧса ньвиси: «Әз бь Ԛануни бона Ԛануне мьрьм, ԝәки бона Хԝәде бьжим» (Галати 2:19).

Готьнед Паԝлос гьредайи бун тʹәви фькред кӧ әԝи щьватед ль һәрема Галатйайерʹа шьровәдькьр. Ԝедәре, һьнә хушк у бьра дькʹәтьн бәр байе дәрсдаред ԛәлп. Ван дәрсдара дьгот кӧ сәва мәрьв хьлаз бә, лазьм ә кӧ әԝ ль гора Ԛануна Муса бьжи. Илаһи, ԝана дьгот кӧ гәрәке мер бенә сьнәткьрьне. Ле Паԝлос заньбу кӧ Хԝәде әв йәк ида дәʹԝа нәдькьр. Бь избатед ԛәԝи, әԝи нишан кьр кӧ һинкьрьнед ԝан ԛәлп ьн, у әԝи баԝәрийа хушк у бьра һьндава ԛӧрбана Иса Мәсиһ шьданд (Галати 2:4; 5:2).

Кʹьтеба Пироз зәлал дьбежә кӧ гава мәрьв дьмьрә, әԝ тьштәки ньзанә у тʹӧ тьшт ида нькарә сәр ԝи һӧкӧм бькә (Ԝаиз 9:5). Гава Паԝлос гот кӧ әԝ «бона Ԛануне» мьр, әв йәк дьһатә һʹәсабе кӧ әԝ ида бьн һʹӧкӧме Ԛануна Мусада нинә. Паԝлос баԝәр бу кӧ бь сайа баԝәрийа хԝә һьндава ԛӧрбане, әԝ ида «бона Хԝәде» дьжит.

«Ԛануне» һʹале Паԝлос гӧһаст. Гәло чаԝа? Пешийа ван готьна, әԝи зәлал кьрьбу кӧ «мәрьв бь кьред Ԛануне нькарә рʹаст бе һʹәсабе, ле тʹәне бь Иса Мәсиһ баԝәркьрьне» (Галати 2:16). Ԛанун һьлбәт бона сәбәбәкә фәрз һатьбу дайин. Паԝлосе шанди Галатийарʹа ӧса гот: «Ԛанун сәрда зедә бу кӧ нәһәԛи бе наскьрьне, һʹәта һатьна зӧрʹәта ԝи, кʹижанирʹа соз дабу» (Галати 3:19). Бәле, Ԛануне әшкәрә нишан дькьр кӧ инсанед гӧнәкʹар нькарьн Ԛануне бь щурʹәки беԛьсур пек биньн. Ләма жи ԝанрʹа ԛӧрбанәкә кʹамьл лазьм бу. Ӧса Ԛануне инсан дьбьр бәрбь ‹зӧрʹәте›, демәк бәрбь Мәсиһ. Хԝәде кәсед кӧ баԝәрийа хԝә Иса Мәсиһ тиньн, ча кәсед рʹаст һʹәсаб дькә (Галати 3:24). Паԝлосе шанди әв йәк фәʹм дькьр, чьмки бь сайа Ԛануне, әԝи Иса Мәсиһ ԛәбул кьрьбу у баԝәрийа хԝә һьндава ԝи анибу. Һьнге Паԝлос «бона Ԛануне» мьр у «бона Хԝәде» дьжит. Әԝ ида бьн һʹӧкӧме Ԛанунеда нибу, ле бьн һʹӧкӧме Хԝәдеда бу.

Ль нәʹмәйа Рʹомайарʹа жи, Паԝлос бәʹса ве фькре кьр: «Һун хушк-бьрайед мьн, бь бәдәна Мәсиһ һьндава Ԛанунеда мьрьн . . . Ле ньһа әм һьндава Ԛанунеда мьрьн, жь ԝе хьлаз бун, бь кʹижане әм гьрти бун» (Рʹомайи 7:4, 6). Чаԝа Галати 2:19, әв рʹез жи нишан дькә кӧ Паԝлос бәʹса мьрьна гӧнәкʹарәки кӧ ль гора Ԛануна Муса сущдаркьри бу, нәдькьр, ле әԝи бәʹса азабуне дькьр. Әԝ у кәсед дьн ида бьн һʹӧкӧме Ԛануна Мусада нибун, чьмки бь сайа баԝәрийа һьндава ԛӧрбана Иса Мәсиһ, әԝана ида аза бун.