ГӘЛӘК ԚЬРʹНА, Исраелийа бона пьштгьрийа һʹәбандьна рʹаст пʹәрә дьдан. Ле бәле, ль рʹожед Иса Мәсиһ, хәрще кӧ жь мәрьва дьһатьн тʹопкьрьн ида пʹьрʹ гьран бьбун.

Бона пьштгьрийа ишед пʹарьстгәһе, жь һәр мере Щьһу нив шәкәл (дӧ зив) дьһат тʹопкьрьн. Ль ԛьрʹна йәке, әв пʹәрә бона ԛӧрбана у бона хԝәйкьрьна пʹарьстгәһа кӧ Һеродес Пʹадша ава кьрьбу, дьһатьн хәбьтандьн. Һьнә Щьһуйа жь Пәтрусе шанди пьрси кʹа Иса сәр ве йәке чь дьфькьрә. Иса Мәсиһ нәгот кӧ гәрәке әв хәрщ нәйе дайин, ле әԝи Пәтрусрʹа гот кӧ бьра әԝ жи ве хәрще бьдә (Мәтта 17:24-27).

Ӧса жи, жь мәрьва «дәһәк» дьһат  тʹоп кьрьн, демәк жь сәди дәһ жь кʹәда ԝан (Ԛануна Кʹаһинтийе 27:30-32; Жьмар 18:26-28). Сәрԝеред религи дьготьн кӧ гәрәке дәһәка һʹәму сәбза бе дайин, һʹәта «дәһәке пунге, анисойе у кʹемуне». Иса әʹдәта дәһәкдайине сущдар нәдькьр, ле әԝи дӧрʹутийа ԛанунзан у Ферьсийа әшкәрә дькьр (Мәтта 23:23).

Ль рʹожед Иса Мәсиһ, ԝәлат бьн һʹӧкӧмдарийа Рʹомайада бу, у ԝана жи жь хәлԛе щурʹә-щурʹә хәрщ тʹоп дькьрьн. Мәсәлә, жь кәсед кӧ әʹрде ԝан һәбу, хәрщ дьһат тʹопкьрьн, у ԝана дькарьбу әв хәрщ пе пʹәрә йан пе тьштед дьн бьдана. Ча те кʹьфше әв хәрщ ԝәкә жь сәди 20 йан 25 сәләф бу. Хенщи ве йәке, жь һәр Щьһуки хәрщ дьһат тʹопкьрьн. Ферьсийа дәрһәԛа ве хәрще жь Иса Мәсиһ пьрси. У Иса ӧса гот: «Чь кӧ йед Ԛәйсәр ьн бьдьнә Ԛәйсәр у чь йед Хԝәде нә бьдьнә Хԝәде» (Мәтта 22:15-22).

Ӧса жи, бона мал у һәбук кӧ дьһатьн фьротьн, хәрщ дьһат тʹоп кьрьн. Әв хәрщ ль щийед сәкьнандьна гәмийа, сәр пʹьра, ль кʹуча йан ль бәр дәргәһед бажар у дькʹана дьһат тʹопкьрьн.

Бьн һʹӧкӧмдарийа Рʹомеда, хәрщ пʹьрʹ гьран бу. Ль гора тʹәрихзане Рʹомайи Татсите, ԝәʹде һʹӧкӧмдарийа Тибәриус, гава Иса сәр әʹрде бу, «Хәлԛе Сурийе у Щьһустане дьхԝәст кӧ баре хәрще бе сьвьк кьрьн».

Метода тʹопкьрьна хәрща жи, жийина мәрьва дьһа баргьран дькьр. Әв мәрьв дькарьбу бьбуйа хәрщгьр, йе кӧ дьһа зедә пʹәрә дьда бона ԛазанщкьрьна ве хәбате. Паше ԝана тʹопкьрьна хәрща дьданә дәсте мәрьвед дьн у һәрдӧ йа жи кʹаре жь ве йәке дьстанд. Дьԛәԝьмә, Зәхайо жи бь дәсте кәсед дьн хәрщ тʹоп дькьр (Луԛа 19:1, 2). Әв йәк һьлбәт ль мәрьва хԝәш нәдьһат, ләма ԝана кәсед кӧ хәрщ тʹоп дькьрьн һʹьз нәдькьрьн.