ГАВА Лизайе * щара пешьн дәрһәԛа рʹастийе бьһист, гәло чь ԝе хԝәш һат? Әԝ дьбежә: «Һәри зедә чь кӧ сәр мьн һʹӧкӧм кьр, әԝ һәйә ԛәнщийа хушк-бьра». Анна жи ӧса дьбежә: «Серида, жь һинкьрьнед Шәʹдед Йаһоԝа зедәтьр, ԛәнщийа ԝан дьле мьн гьрт». Иро, һәрдӧ жи хушкед мә нә, у әԝана жь хԝәндьна Кʹьтеба Пироз шабуне дьстиньн. Ле дәстпекеда һәри зедә ԛәнщийа Шәʹдед Йаһоԝа сәр ԝан һʹӧкӧм кьр.

Ве готареда, әме бьвиньн кӧ әм чаԝа дькарьн бь готьн у кьред ԛәнщ бьгьһижьн дьле мәрьва. Ӧса жи, әме бьвиньн кӧ гәрәке әм һьндава кʹе ԛәнщ у һʹәйф ьн.

Мәтʹәлок сәре 31 бәʹса жьнькәкә жир у сәрԝахт дькә, сәр зьмане кʹижане ԛәнщи йә (Мәтʹәлок 31:26). Әԝ изьне дьдә ԝәки ԛәнщи у һʹьзкьрьн рʹебәрийа зьмане ԝе бькә. Бона сәре малбәта жи гәләк фәрз ә кӧ ԛәнщи сәр зьмане ԝан бә. Гәләк де-бав рʹьнд заньн кӧ готьнед сәрт у һерс нагьһижьн дьле зарʹа. Ләма жи, сәва кӧ готьнед ԝан баш һʹӧкӧм бьн, лазьм ә кӧ де у бав бь һʹьзкьрьн у нәрм хәбәр дьн.

Һьлбәт фәрз ә кӧ нә тʹәне де у бав, ле әм гьшк бь һʹьзкьрьн у нәрми хәбәр дьн. Гәло тӧ чаԝа дькари бь һʹьзкьрьне хәбәр ди? Щьмла пешьн йа Мәтʹәлок 31:26 ӧса дьбежә: «Әԝ дәве хԝә бь сәрԝахтийе вәдькә». Демәк, лазьм ә кӧ әм мьԛати хәбәрдана хԝә бьн. Ԝе баш бә кӧ әм жь хԝә бьпьрсьн: «Гәло хәбәрдана мьн ԝе әʹдьлайе пешда бинә йан һерсе гӧрʹ бькә?» (Мәтʹәлок 15:1). Бәле, гәләк фәрз ә кӧ әм рʹьнд бьфькьрьн пешийа кӧ тьштәки бежьн.

Рʹезәкә дьн ӧса дьбежә: «Һьнәк бь хәбәра мина шур мерьв бьриндар дькьн» (Мәтʹәлок 12:18). Сәва кӧ әм зьмане хԝә контрол кьн, гәрәке әм пешда бьфькьрьн кӧ хәбәрдана мә чаԝа дькарә сәр кәсед дьн һʹӧкӧм бькә. Бәле, һәгәр һʹьзкьрьн у ԛәнщи сәр зьмане мә бә, әме сәрт хәбәр нәдьн (Әфәси 4:31, 32). Дәԝса фькьр у готьнед негатив, ԝәрә әм готьнед нәрм бьдьнә хәбате у бь зьмане ширьн хәбәр дьн. Ви алида, Йаһоԝа мәрʹа мәсәлә йә. Мәсәлә, гава Елйас пʹехәмбәр мерхасийа хԝә ӧнда кьрьбу, Йаһоԝа бь сайа мәләкәки, бь дәнгәки нәрм у ньмьз перʹа хәбәр да (1 Пʹадшати 19:12). Һьлбәт, сәва кӧ әм ԛәнщ у бь һʹьзкьрьне бьн, бәс нинә тʹәне бь һʹьзкьрьне хәбәр дьн. Ԛәнщи гәрәке кьред мәда жи бе кʹьфше. Гәло чаԝа?

Кәсед кӧ чʹәʹв дьдьнә Йаһоԝа, һьм бь һʹьзкьрьн хәбәр дьдьн, һьм жи кьред ԛәнщ дькьн (Әфәси 4:32; 5:1, 2). Лиза ӧса дьбежә: «Гава ньшкева лазьм бу кӧ әм мала хԝә бар бькьн, дӧ щотед жь щьвате жь хәбата хԝә изьн хԝәстьн ԝәки али мә бькьн. Ԝе дәме, мьн һинбуна Кʹьтеба Пироз һе дәстпенәкьрьбу». Ԛәнщийа хушк-бьра сәр Лизайе ӧса һʹӧкӧм  кьр, кӧ әԝе хԝәст рʹастийе леколин кә.

Аннайе жи ԛәнщийа Шәʹдед Йаһоԝа ԛимәт кьр. Әԝ дьбежә: «Сәва һʹале дьнйайе, мьнрʹа зор бу ԝәки итʹбарийа хԝә мәрьва биньм. Гава әз рʹасти Шәʹдед Йаһоԝа һатьм, мьн шьк дьбьр гәло нета ԝан чь йә. Мьн хԝәрʹа дьгот: ‹Гәло чьрʹа әԝана һьндава мьнда ӧса һʹәйф ьн?› Ле гава мьн дьдит ԝәки хушка кӧ Кʹьтеба Пироз мьн һин дькьр бь рʹасти ԛәнщ у һʹәйф ә, мьн итʹбарийа хԝә ле ани». Гәло ахьри чь бу? Әԝ дьбежә: «Ԝәʹдә шунда, мьн дьһа зедә дина хԝә да тьштед кӧ әз һин дьбум».

Чаԝа мә дит, ԛәнщийа хушк-бьра дьле Лиза у Аннайе гьрт у али ԝан кьр, кӧ әԝана итʹбарийа хԝә Йаһоԝа у хьзмәткʹаред ԝи биньн.

Һьнә кәс жь бо хәйсәт йан култура хԝә, мәʹрифәт, һʹәйф у нәрм ьн. Әв йәк тьштәки баш ә. Ле әв найе һʹәсабе кӧ кәсед ӧса чʹәʹв дьдьнә ԛәнщийа Хԝәде (Бәрамбәр кә Кʹаред Шандийа 28:2).

 Кʹьтеба Пироз дьбежә кӧ ԛәнщийа рʹаст пʹарәкә бәре рʹӧһʹе Хԝәдейи пироз ә (Галати 5:22, 23). Сәва кӧ әм мина Йаһоԝа у Иса Мәсиһ ԛәнщ бьн, гәрәке әм изьне бьдьн ԝәки рʹӧһʹе пироз сәр мә һʹӧкӧм бькә. Әм Мәсиһи нә у әм бона мәрьва хәм дькьн. Һʹьзкьрьна Йаһоԝа у һʹьзкьрьна мәрьва мә һелан дькә ԝәки әм ԛәнщ бьн. Һәгәр әм ви һʹӧнӧри жь дьл бьдьнә кʹьфше, Хԝәде ԝе жь мә рʹази бә.

Һьлбәт мәрʹа һеса йә кӧ әм һьндава кәсед кӧ әм нас дькьн йан кәсед кӧ һьндава мәда баш ьн, ԛәнщ бьн (2 Самуйел 2:6). Мәсәлә, әм дькарьн ԛәнщийа хԝә бь ве йәке нишан кьн, кӧ ԝан мәрьварʹа рʹазибуна хԝә нишан кьн (Колоси 3:15). Ле һәгәр әм дьфькьрьн кӧ кәсәк һежайи ԛәнщийа мә нинә, һьнге гәрәке әм чь бькьн?

Бинә бира хԝә кӧ Йаһоԝа һьндава һәр кәси, һәла һе һьндава кәсед кӧ һежайи ԛәнщийа ԝи ниньн жи. Кʹьтеба Пироз дәрһәԛа ви һʹӧнӧри дәрсәкә фәрз нишани мә дькә. Ньвисаред Йунани гәләк щара бәʹса ве ԛәнщийа нәһежа дькә. Гәло Хԝәде ԛәнщийа хԝә чаԝа мәрʹа әʹйан дькә?

Бинә бәр чʹәʹве хԝә кӧ бь милйона мәрьв чаԝа жь ԛәнщийа Йаһоԝа кʹаре дьстиньн. Жь бәр кӧ Хԝәде ԛәнщ ә, әԝ бона һʹәԝщед мәрьва хәм дькә (Мәтта 5:45). Һьм жи, пешийа кӧ мә Йаһоԝа нас кьрьбу жи, әԝи ԛәнщийа хԝә мәрʹа нишан кьрьбу (Әфәси 2:4, 5, 8). Мәсәлә, әԝи Кӧрʹе хԝәйи тайе тʹәне бона инсанәте ԛӧрбан кьр. Чаԝа кӧ Паԝлосе шанди ньвисибу, Йаһоԝа әԝ йәк кьр жь бо «дәԝләмәндтийа кʹәрәма» хԝә (Әфәси 1:7). Ӧса жи, жь бо ве йәке кӧ әм гӧнәкʹар ьн у щарна дьле Йаһоԝа дешиньн, әԝ бәрдәԝам дькә рʹебәрийа мә дькә у мә һин дькә. Готьнед ԝи бона мә мина «барана һур» ьн (Ԛануна Дӧщари 32:2). Әм нькарьн бь тʹәмами бьн ԛәнщийа ԝи дәрен. Рʹасти әв ә, кӧ жийина мәйә һәрһәйи ԛәнщийа ԝива гьредайи йә (Бәрамбәр кә 1 Пәтрус 1:13).

Ԛәнщийа Йаһоԝа мә һелан дькә кӧ әм жи ԛәнщ бьн. Мина Йаһоԝа, ԝе баш бә кӧ әм нә тʹәне һьндава һьнә мәрьва, ле һьндава һәр кәси ԛәнщ бьн (1 Тʹесалоники 5:15). Һәгәр әм һәр гав ԛәнщийе дьдьнә кʹьфше, әме хушк-бьрарʹа, һәвалдәрсхан, һәвалхәбатчи, щинар у нәфәред хԝәрʹа бьбьн мина агьрәки кӧ рʹожа сар мәрьва гәрм дькә.

Бьдә бәр чʹәʹве хԝә, кӧ малбәта тә у хушк-бьред щьвате ԝе жь готьн у кьред тәйә ԛәнщ чьԛас кʹаре бьстиньн. Мәсәлә, дьбәкә хушк йан бьракирʹа бона шьхӧлед бахчә, йан мале йан бона шьхӧлед базаре аликʹари лазьм бә. Йан жи, дьбәкә кәсәки кӧ тӧ хьзмәтийеда рʹасти ԝи тейи, һʹәԝще аликʹарийа тә бә. Гәло тӧ һазьр и дәрәщед ӧсада ԛәнщийе нишан ки?

Ԝәрә әм чʹәʹв бьдьнә Йаһоԝа, ԝәки ԛәнщи сәр һʹәму готьн у кьред мә һʹӧкӧм кә!