Де-баве мьн ԝәʹде Шәрʹе Һʹәмдьнйайе йа II, жь Естонйайе дәрбази Алманйайе бун, у әз ԝедәре һатьмә буйине. Паше ԝана сафи кьр дәрбази Канадайе бьн. Пешийе әм кʹохе мьришкада дьман. Әм гәләк кʹәсиб бун, ле бона тәʹште бал мә тʹьме һекед тʹәзә һәбун.

Рʹожәке, Шәʹдед Йаһоԝа гьлийед жь Әʹйанти 21:3, 4 дийа мьнрʹа хԝәндьн. Тьштед кӧ әԝе бьһист ӧса дьле ԝе гьрт, кӧ һесьр жь чʹәʹвед ԝе һатьн. Тʹохьме рʹастийе дьле де-баве мьнда шин бу у әԝана һатьнә ньхӧмандьне.

Де-баве мьн зьмане Инглизи рʹьнд ньзаньбун, ле диса жи ԝана бь хирәт Йаһоԝарʹа хьзмәт дькьр. Шәв баве мьн кʹархана һʹәландьна никәледа дьхәбьти. Әԝ чьԛас ԝәстийайи бу жи, йәкә рʹожа Шәмийе әԝи әз у хушка мьн Силвиа, дьбьрә хьзмәтийе. Ӧса жи мә һәр һʹәфте Бьрща Ԛәрәԝьлийе тʹәви малбәте леколин дькьр. Де-баве мьн али мьн дькьрьн, ԝәки әз Хԝәде һʹьз бькьм. Бь аликʹарийа ԝан, сала 1956-да, гава әз 10 сали бум, әз һатьмә ньхӧмандьне. Әв йәк кӧ де-баве мьн Йаһоԝа гәләк һʹьз дькьрьн, һʹәта ньһа али мьн дькә, ԝәки әз бь амьни Йаһоԝарʹа хьзмәт кьм.

Чахе мьн мәкʹтәб хьлаз кьр, мьн ида һаԛас дина хԝә нәдьда хьзмәтийе. Әз дьфькьрим кӧ һәрге әз бьбьм пешәнг, пʹәре кӧ әзе ԛазанщ кьм, ԝе тʹӧ щар тʹера ве йәке нәкә, кӧ әз пе тәйаре дьнйайе бьвиньм. Мьн радио стансйәкида хԝәрʹа хәбат дит. Мьн әв шьхӧл гәләк һʹьз дькьр. Әз евара дьхәбьтим, ләма жи щара нәдьчумә щьвата у мьн тʹәви кәсед кӧ Хԝәде һʹьз нәдькьрьн, ԝәʹдә дәрбаз дькьр. Ле паше, исафа мьн әз дьчәрчьрандьм у мьн фәʹм кьр, кӧ гәрәке әз әʹмьре хԝә бьгӧһезьм.

Мьн мала хԝә бар кьр у әз чумә шәһәре Ошаԝайе (Онтарйо, Канада). Ԝедәре мьн Рей Норман, хушка ԝи Лесли у пешәнгед дьн нас кьрьн. Ԝана бь дьл әз ԛәбул кьрьм. Гава мьн шабуна ԝан дит, әз диса дәрһәԛа нетед хԝәйә бәре фькьрим. Ԝана әз һелан дькьрьм кӧ әз бьбьмә пешәнг у мәһа Илоне, сала 1966-да, әз бумә пешәнг. Әʹмьре мьн гәләк хԝәш бу, у мьн ньзаньбу кӧ һьнә гӧһастьнед мәзьн пешийа мьн ьн.

Гава әз һе дьчумә мәкʹтәбе, мьн бона хьзмәтийа Бәйтʹәла Торонтойе (Канада), бланк тʹьжә кьрьбу. Паше, гава мьн ча пешәнг хьзмәт дькьр, әз һатьмә тʹәглифкьрьне, ԝәки чар сала Бәйтʹәледа хьзмәт кьм.  Ле дьле мьн кʹәтьбу Лесли, у әз дьтьрсийам кӧ һәрге әз ве тʹәглифе ԛәбул кьм, әзе ԝе ӧнда кьм. Ле паши дӧакьрьна дьреж, әз ԛайил бум Бәйтʹәледа хьзмәт кьм, у мьн бь дьләки тәнг хатьре хԝә жь Леслийе хԝәст.

Бәйтʹәледа, серида мьн щийе кʹьнщшуштьнеда кʹар дькьр, ле паше әз бумә секретар. Ԝи ԝәʹдәйи, Лесли бажаре Гатинойеда (Кԝебек, Канада), ча пешәнге мәхсус һатә кʹьфшкьрьне. Әз гәләк щар дьфькьрим, һәла әԝ ньһа чь дькә у мьн сафикьрьнәкә баш кьрийә, йан на. Паше тьштәки гәләк баш ԛәԝьми. Бьре Леслийе, Рей, һатә тʹәглифкьрьне кӧ Бәйтʹәледа хьзмәт кә у әм тʹәвайи дьман! Бь ви щурʹәйи, һәвалтийа мьн тʹәви Леслийе тʹәзәда дәстпебу, у чахе чар салед хьзмәтийа мьнә Бәйтʹәледа тʹәмам бу, әм зәԝьщин, демәк 27 Сьбате, сала 1971-да.

Әз у Лесли Кԝебекеда һатьнә кʹьфшкьрьне, щьватәкә сәр зьмане Франси. Чәнд сал шунда, гава әз 28 сали бум, әз һатьмә тʹәглифкьрьне кӧ ча бәрпьрсийаре мьһале хьзмәте кьм. Әз дьфькьрим кӧ әз гәләк щаһьл ьм у нькарьм әви шьхӧли бькьм, ле гьлийед жь Йерәмйа 1:7, 8 дьле мьн ԛәԝи кьрьн. Лесли чәнд щара кʹәтьбу ԛәзийе у жерʹа зор бу шәв рʹазе. Ләма жи әм дьфькьрин кӧ ԝе чәтьн бә хьзмәтийа бәрпьрсийартийеда кʹар бькьн. Ле йәкә әԝе гот: «Һәрге Йаһоԝа щабдарике бьдә мә, әм гәрәке бь дьл у щан әве щабдарийе ԛәбул кьн». Мә әв щабдари ԛәбул кьр у мә 17 сала ве йәкеда кʹар кьр.

Гава әз бәрпьрсийаре мьһале бум, әз ԛә вала нәдьмам, у щарна мьн ԝәʹдә бона Лесли жи нәдьдит. Лазьм бу кӧ әз тьштәки фәрз һин бьм. Щарәке, Дӧшәме сьбе зу, кәсәк зәнгьле хьст. Гава мьн дәри вәкьр, бәр дәри кәсәк тʹӧнә бу, тʹәне сәләк һәбу. Теда пʹәрчʹе сьфьре, емиш, нан, пәнир, шәрав, кʹас у нәʹмәк һәбу, кʹижанеда ньвиси бу «Кʹӧлфәта хԝә бьвә пикнике»! Ԝе рʹоже һәԝа гәләк хԝәш бу. Мьн Леслийерʹа гот, кӧ әз гәрәке чәнд готара һазьр кьм, ләма жи нькарьм һәрʹьмә пикнике. Әԝ һьнәки хәмгин бу, ле әԝе мьн фәʹм кьр. Чахе әз бәр сьфьре рʹуньшти бум, исафа мьн нәрʹьһʹәт бу. Гьлийед жь Әфәси 5:25, 28 кʹәтьн бира мьн. Бь ԝан рʹеза, Йаһоԝа ча бежи мьнрʹа гот, кӧ әз гәрәке дина хԝә бьдьмә һәстед жьна хԝә у бона ԝе хәм бькьм. Мьн дӧа кьр у паше Леслийерʹа гот, ԝәрә, әм һәрʹьн! Лесли гәләк ша бу! Әм бь әʹрәбе чунә щики хԝәш, бәр чʹәмәки. Мә пʹәрчʹе сьфьре сәр әʹрде рʹахьст у мә тʹәвайи ԝәʹдәки гәләк хԝәш дәрбаз кьр, у ԝәʹдә жи ма кӧ әз готаред хԝә һазьр бькьм.

Гава мьн ча бәрпьрсийаре мьһале хьзмәт дькьр, әм дьчунә щьватед Колумбйа Британи һʹәта Нйуфаундленде. Бь ви щурʹәйи, хԝәстьна дьле мьн кӧ әз рʹеԝитийе бькьм, һатә сери. Әз бона Мәкʹтәба Гиләде дьфькьрим, ле мьн нәдьхԝәст ча мисйонер  ԝәлате хәрибда хьзмәт кьра. Бона мьн мисйонер мәрьвед мәхсус бун, у әз дьфькьрим кӧ әз һежа ниньм кӧ бьбьмә мисйонер. Хенщи ве йәке, әз дьтьрсийам кӧ тʹәшкиләт ԝе мә бьшинә ԝәлатәки Африкайе, кʹидәре кӧ нәхԝәши у шәрʹ һәнә. Ләма жи әз дәрәща хԝә рʹази бум.

Сала 1992-да, Шәʹдед Йаһоԝа диса дькарьбун һьнә жь ԝан ԝәлатада хьзмәт кьн, кʹижан кӧ пʹара Йәктийа Совйәте бун. Ләма бьра жь мә пьрсин, һәла әм дьхԝазьн ча мьзгинванед мисйонер дәрбази Естонйайе бьн. Әм әʹщебмайи ман, ле мә дәрһәԛа ве йәке дӧа кьр. Әм диса фькьрин: «Һәрге Йаһоԝа щабдарике бьдә мә, әм гәрәке бь дьл у щан әве щабдарийе ԛәбул кьн». Ләма жи мә щабдарийа тʹәзә ԛәбул кьр у мьн хԝәрʹа гот, «ча баш ә кӧ әм начьн Африкайе».

Мә перʹа-перʹа дәстпекьр зьмане Естони һин бьн. Паши чәнд мәһа, әз ча бәрпьрсийаре мьһале һатьмә кʹьфшкьрьне. Тʹәшкиләте хԝәст, ԝәки әм се ԝәлатед Балтике у Калининградеда (Русйа), тʹәсәлийа 46 щьвата у кʹома бькьн. Бона ве йәке лазьм бу әм һьнәки зьмане Латвйайи, Литвани у Урьси һин бьн. Мәрʹа гәләк чәтьн бу. Ле хушк-бьред мә хирәта мә ԛимәт дькьрьн у али мә дькьрьн. Сала 1999-да, Естонйайеда филиаләк һатә вәкьрьне, у әз, Томас Әдур, Лембит Реиле у Томи Кауко, ча әндәмед комитейа филиале һатьнә кʹьфшкьрьне.

Мә насийа хԝә да гәләк хушк-бьра, кʹижана кӧ бәре шандьбунә Сибирйайе. Рʹаст ә гьртигәһеда гәләк чәтьн бу у әԝана жь малбәта хԝә һатьбунә ԛәтандьне, йәкә ԝана шабуна хԝә ӧнда нәдькьр у бь хирәт хьзмәт дькьр. Мәсәла ԝан нишан дькә, ԝәки мәрьв дькарә һьмбәри тәнгасийа жи сәбьр кә у дьлша бьминә.

Мә гәләк сал бе һесабун хьзмәт дькьр, ләма жи ԝәʹдә шунда Лесли гәләк ԝәстийа у тʹаԛәт кʹәт. Мә дәрберʹа фәʹм нәкьр, ԝәки әԝ жь нәхԝәшийа фибромиалжийайе дьԝәстийа. Әм дьфькьрин кӧ вәгәрʹьн Канадайе. Гава мә тʹәглифи мәкʹтәба бона әндәмед комитейа филиале кьрьн, кʹижан кӧ Патерсонеда (Нийу Йорк) гәрәке бьһата дәрбазкьрьне, әм фькьрин кӧ дьбәкә әме нькарьбьн һәрʹьн. Ле чахе мә жь дьл дӧа кьр, мә әв тʹәглифкьрьн ԛәбул кьр. Йаһоԝа сафикьрьна мә кʹәрәм кьр. Бь сайа ԛәнщкьрьна кӧ Лесли ԝәʹде һинбуне дьстанд, әм диса дькарьбун бь әʹмьрәки нормал бьжин.

Сала 2008-да, гава әм диса Естонйайеда бун, жь офиса сәрәкә мьнрʹа тʹелехьстьн у пьрсин, һәла әм һазьр ьн һәрʹьнә Конгойе, йан на. Әз әʹщебмайи мам, илаһи лазьм бу ԝәки әз рʹожәк шунда щаб бьдьм. Пешийе мьн Леслийерʹа тьштәк нәгот, чьмки мьн заньбу кӧ һәрге әз бәʹса ве йәке бькьм, хәԝ ԝе нәкʹәвә чʹәʹве ԝе. Ле ԝе шәве хәԝ нәкʹәтә чʹәʹве мьн у мьн дәрһәԛа тьрс у хәмед хԝә дӧа кьр.

Рʹожа дьн, чахе мьн Леслийерʹа бәʹса ве йәке кьр, мә хԝәрʹа гот: «Йаһоԝа дьхԝазә  кӧ әм һәрʹьнә Африкайе. Һʹәта кӧ әм нәщерʹьбиньн, әме жь кʹӧ бьзаньбьн һәла хьзмәтийа ԝедәре ԝе мә хԝәш бе йан на». Ләма жи паши кӧ мә 16 сал Естонйайеда хьзмәт кьрьбу, әм дәрбази Конго, бажаре Киншасайе бун. Филиала Конгойе нава тʹәбийәтеда, щики гәләк хԝәш у бәдәԝ бу. Чахе әм жь Канадайе дәркʹәтьн, мә тʹьме картәк тʹәви хԝә дьбьр, кʹидәре кӧ ньвиси бу, «Тӧ кʹидәре тейи чандьне, ԝедәре жи шин бә у гәш бә»! Гава әм гьһиштьнә Конгойе, Лесли әв карт отʹаха мәда диԝерва кьр. Чахе мә тʹәви хушк-бьра ԝәʹдә дәрбаз дькьр, һинбунед Кʹьтеба Пироз дәрбаз дькьр у кʹәрәмед жь хьзмәтийа мисйонерти дьстанд, әм гәләк ша дьбун. Ԝәхт шунда мә сәрледана 13 филиалед ԝәлатед Африкайә дьн кьр, у мә дит кӧ ԝан ԝәлатада мәрьв чьԛас жь һәв щӧдә дьбьн у хԝәшьк ьн. Тьрсед мәйе бәре ӧнда бун, у әм жь Йаһоԝа рʹази бун, кӧ әԝи әм шандьнә Африкайе.

Конгойеда лазьм бу кӧ әм һини хԝарьнед тʹәзә бьн. Мәсәлә, ԝедәре кʹезька дьхԝарьн. Серида әм дьфькьрин, ԝәки әме нькарьбьн тьштед ӧса бьхԝьн, ле гава мә дит кӧ хушк-бьра ве йәке чьԛас һʹьз дькьн, мә жи тәʹм кьр. Бь рʹасти жи хԝәш бу!

Ӧса жи мә аликʹарийа рʹӧһʹани у материали дьбьрә рʹоһьлата Конгойе. Ԝедәре әскәра һʹьщуми гӧнда дькьр у зьрар дьданә жьн-зарʹа жи. Һʹәчʹи зәʹф хушк-бьра алийе материалида гәләк кʹәсиб бум, ле һевийа ԝан һьндава рʹабуна мьрийа ԛәԝи бу. Ԝана Йаһоԝа гәләк һʹьз дькьр у тʹәшкиләта ԝирʹа амьн бун. Баԝәрийа ԝан дьле мә дьгьрт у мә һелан дькьр кӧ әм баԝәрийа хԝә дьһа ԛәԝи кьн. Һьнә хушк-бьра һьм малед хԝә, һьм жи бедәра хԝә ӧнда кьрьбун. Мьн фәʹм кьр, кӧ тьштед материали чьԛас зу дькарьн ӧнда бьн, ле ԛимәта тьштед рʹӧһʹани чьԛас мәзьн ә. Һʹале хушк-бьред мә чьԛас чәтьн бу жи, ԝана диса жи нәдькьрә кӧтә-кӧт. Ньһерʹандьна ԝан дьле мә ԛәԝи дькьр, кӧ әм һьмбәри чәтьнайа у нәхԝәшийед хԝә сәбьр кьн.

Паше диса тьштәк ԛәԝьми. Бьра диса мәрʹа тʹелехьстьн у готьн, кӧ әм дәрбази филиала  Һон-Конге бьн. Тʹӧ щар нә жи дькʹәтә һʹьше мә, кӧ рʹожәке әме Асйайеда бьжин! Ле жь бәр кӧ мә һʹәму кʹьфшкьрьнед хԝәда дьдит, кӧ Йаһоԝа тʹәви мә йә, мә әв кʹьфшкьрьн жи ԛәбул кьр. Сала 2013-да, гава әв рʹож һат, кӧ әм достед хԝәйә әʹзиз у Африкайа бәдәԝ бьһельн, чʹәʹвед мә тʹьжи һесьр бун.

Һон-Конг бажарәки мәзьн ә. Әʹмьре ԝедәре гәләк щӧдә бу, у һинбуна зьмане Кантони чәтьн бу. Ле хушк-бьра гәләк дьлгәрм бун, у хԝарьнед Һон-Конге жи пʹьр хԝәш бун. Шьхӧле Бәйтʹәле зу пешда дьчу, ле әʹрд у хани чьԛас дьчу, һаԛас бьһа дьбун. Ләма жи Кʹома Рʹебәрийе бь билани сафи кьр, ԝәки һʹәчʹи зәʹф мьлкʹед филиале бьфьрошә. Ԝәʹдәки кьнда, әм дәрбази Корейа Башуре бун у һʹәта рʹожа иро әм ԝедәре хьзмәт дькьн. Һинбуна зьмане Корейи һеса нинә, ле әм шанә кӧ әм ида дькарьн тʹәви һәвалед хԝә сәр ви зьмани һьнәки хәбәр дьн.

Щара чәтьн ә һәвалед тʹәзә хԝәрʹа бьвиньн, ле мә фәʹм кьр, кӧ һәрге әм гава пешьн бавежьн, ԝәки мәрьва тʹәглифи мала хԝә кьн, әм дькарьн дьһа зу ԝана нас кьн. Мә дит кӧ хушк-бьра гәләк мина һәв ьн у фьрԛийа нав ԝанда һаԛас мәзьн нинә. Бәле, Йаһоԝа әм ӧса әʹфьрандьнә, кӧ әм дькарьн дьле хԝә фьрә кьн у тʹәви гәләк мәрьва бьбьнә һәвал (2 Корьнтʹи 6:11).

Мә фәʹм кьр кӧ әм гәрәке мина Йаһоԝа сәр мәрьва бьньһерʹьн у тедәрхьн кӧ ча Әԝ һʹьзкьрьна хԝә мәрʹа дьдә кʹьфше у рʹебәрийа мә дькә. Чахе әм дьлтәнг дьбун у бәрхԝә дькʹәтьн, һәла кәсед дьн мә ԛәбул дькьн йан на, мә карт у нәʹмед дьлгәрм йед һәвалед хԝә, диса дьхԝәндьн. Йаһоԝа тʹьме щаба дӧайед мә дьда у дьле мә ԛәԝи дькьр.

Нава гәләк салада, әз у Лесли һин бунә, кӧ шьхӧлед мә чьԛас зәʹф бьн жи, фәрз ә ԝәки әм бона һәв ԝәʹдә бьвиньн. Ӧса жи мә фәʹм кьр, кӧ әм гәрәке щара сәр шашийед хԝә бькʹәньн, илаһи гава әм зьманәки тʹәзә һин дьбьн. У һәр евар әм бона тьштед баш кӧ әʹмьре мәда дьԛәԝьмьн, рʹазибуна хԝә Йаһоԝарʹа дьдьнә кʹьфше.

Рʹаст бежьм, әз дьфькьрим кӧ әзе тʹӧ щар нькарьбьм бьбьмә мисйонер йан жи ԝәлатед дьнда бьжим. Ле әз һин бумә, кӧ бь аликʹарийа Йаһоԝа, әм һәр тьшти дькарьн бькьн. Готьнед Йерәмйа пʹехәмбәр тенә бира мьн: «Йа Хӧдан, тә мьн хапанд» (Йерәмйа 20:7). Бәле, Йаһоԝа гәләк кʹәрәмед мәзьн данә мә, Әԝи һʹәта хԝәстьна дьле мьн жи кӧ бь тәйарә рʹеԝитийе бькьм, анийә сери. Гава әз һе зарʹ бум, мьн нә жи дьда бәр чʹәʹве хԝә кӧ әзе бь тәйаре һәрʹьмә һаԛас ԝәлатед щурʹә-щурʹә. Мьн сәрледана пенщ филиала щурʹә-щурʹә ԝәлатада кьрийә. Һʹәму кʹьфшкьрьнада Лесли тʹьме пьштгьрийа мьн дькьр.

Әм тʹӧ щар бир накьн, кӧ әм ви шьхӧли бона кʹе дькьн. Кʹәрәмед кӧ әм ньһа дьстиньн, тиньн бира мә кӧ ахьрийеда Йаһоԝа ԝе әʹмьре һʹәта-һʹәтайе бьдә мә у һʹәму хԝәстьнед дьле мә бинә сери (Зәбур 145:16).