Кʹьтеба Пироз щаба ве пьрсе надә. Ле Кʹьтеба Пироз бәʹса чәнд тьшта дькә, йед кӧ дьԛәԝьмә сәр сафикьрьна Усьв у малбәта ԝи һʹӧкӧм кьрьбун.

Мәләкәк Мәрйәмерʹа готьбу кӧ әԝе һʹәмлә дәркʹәвә у зарʹәке бинә. Чахе мәләк әв йәк готе, Усьв у Мәрйәм ль Ньсрәта Щәлиле дьжитьн. Усьв жь ԝи бажари бу (Луԛа 1:26-31; 2:4). Чахе әԝана жь Мьсьре вәгәрʹийан, әԝана диса Ньсрәтеда щиԝар бун. Иса ԝедәре мәзьн бу (Мәтта 2:19-23). Ләма жи гава әм дәрһәԛа Иса Мәсиһ, Усьв у Мәрйәме дьфькьрьн, бажаре Ньсрәте дькʹәвә бира мә.

Йәк жь мәрьвед Мәрйәме, жьнькәкә бь наве Елизабет бу, йа кӧ Щьһудайеда дьжит. Елизабет жьна кʹаһинәки бь наве Зәкәрйа бу, у әԝ дийа Йуһʹәннайе Ньхӧмдар бу (Луԛа 1:5, 9, 13, 36). Мәрйәм чубу сәрики Елизабете хә у се мәһа щәм ԝе, Щьһудайеда мабу. Паше, Мәрйәм вәгәрʹийа Ньсрәте (Луԛа 1:39, 40, 56). Ләма жи, һәрема Щьһудайе ԝерʹа нас бу.

Гава фәрман һатә дайине «кӧ һәр кәс наве хԝә бьдә ньвисаре», Усьв ль гора ве фәрмане жь Ньсрәте чу бажаре Бәйтләһʹме, йе кӧ дьһатә навкьрьне ‹бажаре Даԝьд›. Пешда һатьбу пʹехәмбәртикьрьне кӧ Мәсиһ ԝе ль ԝедәре бе буйине (Луԛа 2:3, 4; 1 Самуйел 17:15; 20:6; Миха 5:2). Паши кӧ Иса Бәйтләһʹмеда һатә буйине, Усьв тʹәви малбәта хԝә ԝедәре ма. Ӧса Мәрйәм мәщбур нибу кӧ тʹәви зарʹа хԝәйә вьрʹни бькʹәвә рʹийа дур у һәрʹә Ньсрәте. Ӧса жи, жь бәр кӧ Бәйтләһʹм ԝәкә 9 километьра жь бажаре Оршәлиме дур бу, ԝанрʹа һеса бу кӧ зарʹа хԝә бьвьнә пʹарьстгәһе у ԛӧрбанәке ль гора Ԛануна Муса бьдьн (Ԛануна Кʹаһинтийе 12:2, 6-8; Луԛа 2:22-24).

Мәләке Хԝәде Мәрйәмерʹа готьбу, ԝәки кӧрʹе ԝе Иса, ԝе тʹәхте Даԝьд ԝар бә у пʹадшатийе бькә. Дьԛәԝьмә Усьв у Мәрйәм гәләк ша бун кӧ Иса бажаре Даԝьдда һатә буйине (Луԛа 1:32, 33; 2:11, 17). Дьбәкә ԝана дьхԝәст ԝедәре бьмана һʹәта кӧ бьзаньбьн һәла хԝәстьна Хԝәде бона ԝан чь йә.

Әм ньзаньн кӧ чьԛас ԝәхт дәрбаз бу һʹәта кӧ стәйрнас гьһиштьн Бәйтләһʹме. Ле малбәта Усьв ида маләкеда дьман, у Иса ида зарʹа вьрʹни нибу (Мәтта 2:11). Дәԝса кӧ әԝана вәгәрʹьн Ньсрәте, әԝана Бәйтләһʹмеда щиԝар бьбун.

Һеродәс «әʹмьр кьр кӧ һʹәму зарʹокед кӧрʹинә ль Бәйтләһʹме у дор бәре ԝе, йед дӧ сали у жь ԝан бьчʹуктьр һәбун, кӧ бенә кӧштьне» (Мәтта 2:16). Ләма жи, Хԝәде Усьврʹа гот кӧ әԝ тʹәви малбәта хԝә бьрʹәвә Мьсьре у ԝедәре бьминә, һʹәта кӧ Һеродәс бьмьрә. Паше Усьв тʹәви малбәта хԝә чу Ньсрәте. Ле гәло әԝана чьрʹа вәнәгәрʹийанә Бәйтләһʹме? Сәва кӧ һьм дури кӧрʹе Һеродәс Архелайо бьн, йе кӧ сәрԝерәки зӧльм бу, һьм жи гӧһ бьдьн тʹәмийа Хԝәде. Ньсрәтеда, ԝана дькарьбу Иса бьбуна хԝәйи у ча хьзмәткʹарәки Хԝәде мәзьн кьрана (Мәтта 2:19-22; 13:55; Луԛа 2:39, 52).

Усьв мьр пешийа кӧ Иса Мәсиһ рʹийа бона жийина сәр әʹзмана вәкьр. Ләма жи, Усьв ԝе бона жийина сәр әʹрде бе сахкьрьне. Дьнйа тʹәзәда әме бькарьбьн жь ԝи бьпьрсьн кӧ паши буйина Иса, әԝ чьрʹа тʹәви малбәта хԝә Бәйтләһʹмеда ма.