1-2. Мина Лут әм рʹасти чь чәтьнайа тен?

 ВЕ ДЬНЕДА, бенамуси нава мәрьвада чьԛас дьчә һаԛас зедә дьбә. Гава әм ван тьшта дьвиньн, әм жи хԝә мина Лут тʹәхмин дькьн. Әԝ «жь бепʹәргалийа нәпʹакайә бенамуси ащьз бьбу», чьмки әԝи заньбу кӧ Хԝәде хьрабийа ԝан нәфрʹәт дькә (2 Пәтрус 2:7, 8). Жь тьрс у һʹьзкьрьна Хԝәде, Лут нәдькʹәтә бәр байе кәсед бенамус. Иро жи гәләк мәрьв ԛәдьре принсипед Хԝәдейә нав-намусийе нагьрьн. Диса жи, һәрге тьрс у һʹьзкьрьна Хԝәде дьле мәда һәбә, әме бькарьбьн нав-намусийе хԝәй кьн (Мәтʹәлок 14:2).

² Йаһоԝа бь сайа кʹьтеба Мәтʹәлок ширәтед баш дьдә мә. Фьрԛи тʹӧнә әм чәнд сали нә, әм гьшк жи дькарьн жь ширәтед ве кʹьтебе кʹаре бьстиньн.

3. Ль гора Мәтʹәлок 17:3, чьрʹа әм гәрәке дьле хԝә бьбьнә хԝәйи? (Бьньһерʹә ӧса жи шькьл.)

³ Йаһоԝа Хԝәде дьвинә кӧ дьле мәда чь һәйә. Ләма жи, гәрәке әм дьле хԝәйи симболик рʹьнд бьбьнә хԝәйи. Тьште һәри фәрз әԝ нинә кӧ әм рʹува чаԝа ньн, ле әв ә кӧ кʹурайа дьле мәда бь рʹасти чь һәйә (Бьхунә Мәтʹәлок 17:3). Һәрге биланийа Хԝәде һʹьш у дьле мәда һәбә, Әԝе мә һʹьз бькә (Йуһʹәнна 4:14). Ӧса әме жь бенамусийе, дәрәԝед Мире-щьна у жь мәрьвед хьраб, бенә хԝәйкьрьне (1 Йуһʹәнна 5:18, 19). Чьԛас әм незики Йаһоԝа бьн, һаԛас һе зедә әме ԛәдьре ԝи бьгьрьн у ԝи һʹьз бькьн. Әм нахԝазьн дьле Баве хԝәйи әʹзмана бешиньн, ләма жи әме жь фькьред кӧ дькарьн бьбьнә  сәбәбе гӧнәкьрьне, бьрʹәвьн. Ԝәʹде щерʹьбандьна, әм гәрәке жь хԝә бьпьрсьн, ‹Әзе ча дьле кәсе кӧ һаԛас мьн һʹьз дькә, бешиньм?› (1 Йуһʹәнна 4:9, 10).

4. Тьрса бәр Хԝәде чаԝа али Мартайе кьр кӧ гӧнә нәкә?

⁴ Щарәке һьндьк мабу хушка мә Марта, йа кӧ Хорватйайеда дьжи, бенамуси бькьра. Әԝе ньвиси: «Мьнрʹа чәтьн бу бь зәлали бьфькьрьм у хԝә контрол кьм, ԝәки гӧнә нәкьм. Ле тьрса бәр Йаһоԝа әз парастьм». b Гәло чаԝа? Мартайе гот, кӧ әԝ фькьри ԝәки чь дькарә бьԛәԝьмә һәрге әԝ бенамусийе бькә. Әм жи гәрәке бьфькьрьн, кӧ һәрге әм гӧнә бькьн, бәри пешьн әме дьле Йаһоԝа бешиньн у ӧса жи һевийа жийина һʹәта-һʹәтайе ӧнда кьн (Дәстпебун 6:5, 6).

5. Тә жь сәрһатийа бьре мә Лео чь дәрс хԝәрʹа һьлда?

⁵ Һәрге әм жь Йаһоԝа Хԝәде бьтьрсьн, әме нәбьн һәвале кәсед кӧ тьштед хьраб дькьн. Бьре мә Лео, йе кӧ Конгойеда дьжи, чар сал шунда паши ньхӧмандьне, кʹәтә бәр байе һәвалед хьраб. Әԝ дьфькьри, һʹәта кӧ әԝ хԝәха һьмбәри Йаһоԝа гӧнә нәкә, тьштәк хьраб ве йәкеда тʹӧнә. Ле паши дәмәкә кьн, һәвалед ԝийи хьраб зоре ле дькьрьн, кӧ әԝ дьһа зедә ичке вәхԝә у бенамусийе бькә. Паше, әԝ ль сәр тьштед кӧ жь де-баве хԝә һин бьбу, кʹур фькьри у ани бира хԝә, ԝәки бәре әԝ йәки чьԛас бәхтәԝар бу. Ӧса һʹьше ԝи һатә сәре ԝи. Бь аликʹарийа рʹуспийа, әԝ вәгәрʹийа щәм Йаһоԝа. Иро әԝ бь шабуне чаԝа рʹуспи у пешәнге мәхсус хьзмәт дькә.

6. Әме ньһа дәрһәԛа кʹижан дӧ жьнед симболик шеԝьр кьн?

 ⁶ Ньһа, әме дина хԝә бьдьнә кʹьтеба Мәтʹәлок сәре 9. Ве сәрида, билани у ахмахи бәрамбәри дӧ жьна дьбә (Бәрамбәр кә Рʹомайи 5:14; Галати 4:24). Гава әм әви сәри бьхуньн, бир нәкьн кӧ дьнйа Мире-щьна бь бенамусийе у порнографийайе тʹьжә буйә (Әфәси 4:19). Ләма жи гәләк фәрз ә кӧ әм тьрса бәр Хԝәде дьле хԝәда пешда биньн у жь тьштед хьраб бьрʹәвьн (Мәтʹәлок 16:6). Әм гьшк дькарьн жь ширәтед ви сәри гәләк тьшта һин бьн. Һәр дӧ жьн жи кәсед «беһʹьш» тʹәглифи мала хԝә дькьн у дькьнә гази: «Ԝәрьн бьхԝьн нане мьн» (Мәтʹәлок 9:1, 5, 6, 13, 16, 17). Ле гәло ахьрийа бьжартьна ԝан чь бу?

7. Ль гора Мәтʹәлок 9:13-18, чь ԝе бе сәре кәсед кӧ тʹәглифкьрьна жьна ахмах ԛәбул дькьн? (Бьньһерʹә ӧса жи шькьл.)

⁷ Ԝәрә әм дина хԝә бьдьнә тʹәглифкьрьна ‹жьна ахмах› (Бьхунә Мәтʹәлок 9:13-18). Әԝ бь мерхаси дькә гази: «Кʹи беһʹьш ә, бьра бе вьра!» Паше чь ԛәԝьми? «Әԝе гӧһ дьдә ԝе ньзанә кӧ ль ԝьр мьри нә». Сәре 2-да жи мәсәла жьнәке һәйә. Ԝедәре тʹәми мәрʹа те дайине, кӧ әм жь «кʹӧлфәта хәриб» у «кʹӧлфәта нәрʹедайә» хԝә дур бьгьрьн. Дәрһәԛа ԝе ӧса те готьне: «Мала ԝе бәрбь мьрьне дьбә» (Мәтʹәлок 2:11-19). Ӧса жи, Мәтʹәлок 5:3-10 дәрһәԛа «жьна зьнекʹар» те готьне кӧ «ньгед ԝе бәрбь мьрьне дьбьн».

8. Әм гәрәке чь сафикьрьна бькьн?

⁸ Кәсед кӧ тʹәглифа ‹жьна ахмах› дьбьһен, дькарьн ве тʹәглифе йан ԛәбул кьн йан жи инкʹар кьн. Дьбәкә әм жи бькʹәвьнә дәрәщәкә ӧса, кʹижанеда әм гәрәке сафикьрьне бькьн. Һәрге әм интернетеда йан жи щийед дьн рʹасти бенамусийе йан жи порнографийайе бен, әме чь бькьн?

9-10. Чьрʹа әм гәрәке бенамусийе нәкьн?

⁹ Гәләк мәʹнийед фәрз һәнә, кӧ чьрʹа әм бенамусийе накьн. ‹Жьна ахмах› дьбежә: «Ава дьзийе ширьн ә». Гәло «ава дьзийе» чь йә? Кʹьтеба Пироз һәләԛәтийа сексуал ортʹа жьн-мере кӧ бь ԛануни зәԝьщи нә, бәрамбәри ава сар дькә, йа кӧ рʹожәкә гәрмда мәрьва һеньк дькә (Мәтʹәлок 5:15-18). Бәле, әԝана дькарьн жь ве һәләԛәтийе шабуне бьстиньн. Ле «ава дьзийе» щӧдә йә. Әв йәк дәрһәԛа бенамусийе те готьне, йа кӧ Хԝәде ԛәдәхә дькә. Кәсед кӧ бенамусийе  дькьн, ве йәке дьзикава дькьн. Гава әԝана дьфькьрьн, ԝәки тʹӧ кәс ԝе ԝана нәвинә у әԝе бе щәза бьминьн, ви чахи «ава дьзийе» ль бәр дьле ԝан гәләк ширьн дьбә. Дәрәԝәкә чьԛас мәзьн ә! Әԝана дькарьн хԝә бьхапиньн, ле нькарьн Йаһоԝа бьхапиньн, чьмки Йаһоԝа һәр тьшти дьвинә. Кәсе кӧ достийа хԝә тʹәви Хԝәде ӧнда дькә, һәр тьшти ӧнда дькә. Жь ве йәке хьрабтьр тьштәк тʹӧнә (1 Корьнтʹи 6:9, 10). Бенамуси зьрарәкә дьн жи тинә.

¹⁰ Жь бо бенамусийе мәрьв дькарә шәрми бә, хԝә бекер һʹәсаб кә, ньшкева гьран дәркʹәвә у малбәта хԝә ӧнда кә. Ләма жи, дьһа баш ә тʹәглифкьрьна ‹жьна ахмах› инкʹар ки у нәчи мала ԝе. Бенамуси дькарә мәрьва ча рʹӧһʹанида ӧса жи физикида бькӧжә (Мәтʹәлок 7:23, 26). Мәтʹәлок 9:18 дьбежә: «Меванед ԝе гәлийе дийаре мьрийада нә». Һәрге ӧса йә, чьрʹа гәләк мәрьв дькʹәвьнә ве тʹәльке? (Мәтʹәлок 9:13-18)

11. Тʹәмашәкьрьна порнографийайе чаԝа зьрарәкә мәзьн дьдә?

¹¹ Гәләк щар порнографийа дьбә мәʹни кӧ мәрьв бенамусийе дькьн. Һьнәк дьфькьрьн кӧ порнографийа тьштәки нә хьраб ә. Ле әв йәк нә рʹаст ә. Порнографийа зьрарәкә мәзьн тинә. Һьм жи һеса нинә тʹәрка ве бьдьн. Шькьлед бенамусийе мина жәʹре һʹьше мәрьвада дьминьн. Ӧса жи порнографийа хԝәстьнед хьраб дьлда пешда тинә у мина агьр гӧрʹ дькә (Колоси 3:5; Аԛуб 1:14, 15). Бәле, гәләк кәсед кӧ порнографийайе дьньһерʹьн ахьрийеда бенамусийе дькьн.

12. Әм чаԝа дькарьн хԝә жь шькьлед кӧ һәстед мәрийа гӧрʹ дькьн, бьпарезьн?

¹² Һәрге сәр һащәта мәйә әләктроник ньшкева шькләки порнографи вәбә, гәрәке әм чь бькьн? Гәрәке әм дәрберʹа бәре хԝә бьзьвьрʹиньн у әве шькьле нәньһерʹьн. Ԝе мәрʹа һеса бә ве йәке бькьн, һәрге әм биньн бира хԝә, кӧ достийа мә тʹәви Йаһоԝа чьԛас ԛимәт ә. Һьнә шькьлед кӧ рʹастә-рʹаст найенә һʹәсабе порнографийа, диса жи дькарьн һәстед мәрийа гӧрʹ бькьн. Чьрʹа лазьм ә кӧ әм жь шькьлед ви щурʹәйи жи бьрʹәвьн? Чьмки чаԝа кӧ Иса готьбу, «кʹи бь тәме хьраб жьнәке бьньһерʹә, әԝи дьле хԝәда иди тʹәви ԝе зьнекʹари кьр» (Мәтта 5:28, 29). Рʹуспики бь наве Девид, йе кӧ Тайландеда дьжи, дьбежә: «Әз һәртʹьм жь хԝә дьпьрсьм: ‹Һәрге әз шькьләкә нәщайиз, йа кӧ найе һʹәсабе порнографийа, бьньһерʹьм, гәло Йаһоԝа ԝе жь мьн рʹази бә?› Фькьред ӧса али мьн дькьн, ԝәки әз сафикьрьнед рʹаст бькьм».

13. Чь али мә дькә ԝәки әм сафикьрьнед баш бькьн?

¹³ Гәло чь дькарә али мә бькә, кӧ әм сафикьрьнед баш бькьн у дьле Йаһоԝа нәешиньн? Кʹьтеба Пироз нишан дькә, ԝәки тьрса Хԝәде дәстпека биланийа рʹаст ә (Мәтʹәлок 9:10). Әв йәк кʹьтеба Мәтʹәлок сәре 9, рʹезед пешьнда те зәлалкьрьне. Ԝедәре биланийа рʹаст бәрамбәри жьнәкә дьн дьбә.

14. Мәтʹәлок 9:1-6 дәрһәԛа кʹижан тʹәглифкьрьне те готьне?

¹⁴ Бьхунә Мәтʹәлок 9:1-6. Тʹәглифкьрьна ԝан рʹезада жь Хԝәде йә. Әԝ Канийа биланийа рʹаст ә (Мәтʹәлок 2:6; Рʹомайи 16:27). Әв сәри бәʹса маләкә мәзьн бь һʹәфт стуна дькә. Жь ве мәсәле әм фәʹм дькьн, кӧ Йаһоԝа йәки мәрʹд ә,  у һәр кәсе кӧ дьхԝазә ль гора биланийа ԝи бьжи, ԛәбул дькә.

15. Хԝәде дьхԝазә кӧ әм чь бькьн?

¹⁵ Йаһоԝа Бавәки мәрʹд ә у мә дьбә хԝәйи. Әв һʹӧнӧр биланийа рʹаства гьредайи йә, йа кӧ Мәтʹәлок сәре 9-да бь симболик ча жьнәкә билан те һʹәсабе. Әԝе гошт у шәрав һазьр кьрийә у сьфьрә рʹаст кьрийә (Мәтʹәлок 9:2). Паше, рʹеза 4 у 5-да те готьне, кӧ билани гази кәсед ‹беһʹьш› дькә у ԝанрʹа дьбежә: «Ԝәрьн бьхԝьн нане мьн». Гәло чьрʹа фәрз ә, кӧ әм һәрʹьн мала биланийа рʹаст у бәр сьфьре рʹунен? Чьмки Йаһоԝа дьхԝазә, ԝәки зарʹед ԝи сафикьрьнед баш бькьн. Әԝ нахԝазә кӧ әм сәре хԝә бькьнә бәлайе у паше пʹошман бьн. Ләма жи, Әԝ бона кәсед рʹаст биланийе хԝәй дькә (Мәтʹәлок 2:7). Һәрге тьрса Хԝәде дьле мәда һәбә, әме бьхԝазьн дьле ԝи ша кьн. Әме гӧһ бьдьн ширәтед ԝи у ль гора ԝан бьжин (Аԛуб 1:25).

16. Тьрса Хԝәде чаԝа али бьраки кьр, ԝәки сафикьрьнед баш бькә у ахьрийа ве йәке чь бу?

¹⁶ Ԝәрә әм дина хԝә бьдьнә сәрһатийа рʹуспики бь наве Алан, йе кӧ мәкʹтәбеда дәрсдар бу. Әԝ ӧса дьбежә: «Гәләк һәвалкʹаред мьн филмед порнографи һʹәсаб дькьрьн ча дәрсед дәрһәԛа сексе». Ле Алан нәдькʹәтә бәр байе ԝан. Әԝ дьбежә: «Жь тьрса Хԝәде, мьн филмед ӧса ԛә нәдьньһерʹи. Ӧса жи мьн һәвалкʹаред хԝәрʹа шьровәдькьр, кӧ чьрʹа мьн ӧса сафи кьрийә». Алан гӧһ дьда ве ширәта биланийа рʹаст: «Ль рʹийа билантийе бьгьрьн» (Мәтʹәлок 9:6). Бь сайа ве йәке кӧ Алан нәкʹәтә бәр байе ԝан, әв йәк гәләк баш сәр чәнд дәрсдаред дьн һʹӧкӧм кьр, у ньһа әԝана жи Кʹьтеба Пироз һин дьбьн у дьчьнә щьватед Шәʹдед Йаһоԝа.

17-18. Һʹәму кәсед кӧ тʹәглифкьрьна биланийа рʹаст ԛәбул дькьн, чь кʹәрәма дьстиньн? (Бьньһерʹә ӧса жи шькьл.)

¹⁷ Бь сайа ван дӧ мәсәла, Йаһоԝа рʹийа һәрә баш нишани мә дькә. Кәсед кӧ тʹәглифкьрьна ‹жьна ахмах› ԛәбул дькьн, дьфькьрьн кӧ гӧнәкьрьна дьзикава, тьштәки ширьн ә. Әԝана сәр кьред хԝәйә хьраб нафькьрьн, кӧ әв йәк ԝе ча сәр ахьрийа ԝан һʹӧкӧм кә. Рʹийа ԝан дьбә бәрбь ‹гәлийе дийаре мьрийа› (Мәтʹәлок 9:13, 17, 18).

¹⁸ Һʹале кәсед кӧ тʹәглифкьрьна биланийа рʹаст ԛәбул дькьн, бь тʹәмами щӧдә йә. Әԝана бәр сьфьрәкә бь хԝарьна рʹӧһʹани тʹер у тʹьжә рʹуньштьнә (Ишайа 65:13). Йаһоԝа бь сайа  Ишайа пʹехәмбәр ӧса дьбежә: «Баш мьн бьбьһисьн! Бьра һун тьштед ԛәнщ бьхԝьн, бьра бь хԝарьна дәԝләмәнда щане ԝә зәԝԛе бьстинә» (Ишайа 55:1, 2, ИМ). Бь сайа ве йәке, әм һин дьбьн ԝәки чаԝа тьштед кӧ Йаһоԝа һʹьз дькә, һʹьз бькьн у тьштед кӧ әԝ нәфрʹәт дькә, нәфрʹәт бькьн (Зәбур 97:10). Ӧса жи, әм бь шабуне кәсед дьн жи тʹәглифи мала биланийа рʹаст дькьн. Ча бежи әм ль мәйдана бажер ӧса дькьн гази: «Кʹи беһʹьш ә, бьра бе вьра!» Һʹәму кәсед кӧ гӧһ дьдьнә ве газикьрьне, дькарьн нә тʹәне иро, ле һʹәта-һʹәтайе «хԝә ль рʹийа билантийе бьгьрьн» (Мәтʹәлок 9:3, 4, 6).

19. Ль гора Ԝаиз 12:13, 14, гәрәке әм чь бькьн? (Ӧса жи бьньһерʹә чаргошә « Тьрса Хԝәде бона Кʹара Мә йә».)

¹⁹ Бьхунә Ԝаиз 12:13, 14. Бьра тьрса Хԝәде һәртʹьм дьле мәда һәбә у али мә бькә, ԝәки әм ве дьнйа бенамусда тʹәмьз бьминьн у сәр рʹийа Хԝәде бьмәшьн. Бь сайа тьрса Хԝәде, әме бь дьл у щан кәсед дьн һелан кьн, ԝәки әԝана жи биланийа рʹаст ԛәбул кьн у кʹаре бьстиньн.