1. Әм гәрәке чь бькьн сәва кӧ ԝәʹде рʹожа Йаһоԝа сах бьминьн?

 ЛЬ ГОРА Кʹьтеба Пироз, рʹожа Йаһоԝа те һʹәсабе дәма кӧ Йаһоԝа ԝе дьжмьнед хԝә ԛьрʹ бькә у щьмәʹта хԝә хьлаз кә. Бәре, Йаһоԝа щара дьжмьнед хԝә щәза дькьрьн (Ишайа 13:1, 6; Һәзәԛел 13:5; Сефанйа 1:8). Ԝәʹде мәда, рʹожа Йаһоԝа ԝе бь һʹьщумкьрьна сәр Бабилона Мәзьн дәстпебә у бь шәрʹе Һармәгәдоне хьлаз бә. Сәва кӧ әм ԝәʹде рʹожа Йаһоԝа сах бьминьн, гәрәке әм хԝә ньһада һазьр кьн. Иса әшкәрә готьбу, кӧ гәрәке әм һәртʹьм бона тәнгасийа мәзьн «һазьр бьн» (Мәтта 24:21; Луԛа 12:40).

2. Нәʹма 1 Тʹесалоники бона мә чьрʹа керһати йә?

² Паԝлосе шанди нәʹма 1 Тʹесалоникида бь сайа мәсәла зәлал кьрьбу, кӧ хьзмәткʹаред Хԝәде чаԝа дькарьн хԝә бона рʹожа диԝана Хԝәде һазьр кьн. Ԝе дәме Паԝлос заньбу, кӧ рʹожа Йаһоԝа һе дур ә (2 Тʹесалоники 2:1-3). Ле диса жи әԝи хушк-бьра һелан дькьрьн, ԝәки хԝә ӧса һазьр бькьн, кӧ ча бежи әԝ рʹож ԝе сьбе бе. Ԝәрә әм жи ль гора ве ширәте һәрәкʹәт бькьн! Ньһа әме дина хԝә бьдьне, кӧ Паԝлосе шанди дәрһәԛа ве йәке диса чь готьбу: (1) Рʹожа Йаһоԝа ԝе чаԝа бе? (2) Кʹе ԝе бе ԛьрʹкьрьне? (3) Әм чаԝа дькарьн хԝә һазьр кьн, ԝәки сах бьминьн?

3. Чаԝа рʹожа Йаһоԝа ԝе мина дьзе шәве ньшкева бе? (Бьньһерʹә ӧса жи шькьл.)

³ «Ԝе мина дьзе шәве бе» (1 Тʹесалоники 5:2). Әв мәсәлә йәк жь се мәсәла йә, йед кӧ Паԝлосе шанди бона шьровәкьрьна рʹожа Йаһоԝа да хәбате. Дьз зу һәрәкʹәт дькә, у шәв гава кӧ мәрьв нә һивийе нә, ньшкева те. Рʹожа Йаһоԝа жи ԝе ӧса бе у һʹәчʹи зәʹф мәрьв ԝе әʹщебмайи бьминьн. Гава әм бьвиньн кӧ һәр тьшт чьԛас зу дьԛәԝьмә,  дьбәкә әм жи әʹщебмайи бьминьн. Ле фьрԛи әв ә, кӧ әме тʹәви йед хьраб нәйенә ԛьрʹкьрьне.

4. Рʹожа Йаһоԝа чьма бәрамбәри «еша кʹӧлфәта һʹәмлә» дьбә?

⁴ «Мина еша кʹӧлфәта һʹәмлә» (1 Тʹесалоники 5:3). Жьна һʹәмлә ньзанә ԝе кʹәнге санщийед ԝе дәстпебьн, ле әԝ рʹьнд занә кӧ рʹожәке, әв йәк ԝе бьԛәԝьмә. Һәмьки әв еш ԝе ньшкева дәстпебьн, у тʹӧ кәс нькарә ве йәке бьдә сәкьнандьн. Рʹожа Йаһоԝа жи мина ве йәке йә. Әм нә рʹож нә жи сьһʹәте заньн. Ле әм баԝәр ьн, кӧ рʹожа диԝана Хԝәде ԝе ньшкева бе.

5. Тәнгасийа мәзьн чьрʹа бәрамбәри дәстпека рʹожәкә тʹәзә дьбә?

⁵ Мина дәстпека рʹожа тʹәзә. Паԝлосе шанди мәсәла хԝәйә сьсийада диса бәʹса дьза кьр, йед кӧ шәв дьзийе дькьн. Ле ве мәсәледа, Паԝлос рʹожа Йаһоԝа бәрамбәри рʹонайа рʹоже кьр (1 Тʹесалоники 5:4). Дьзед кӧ шәв дькʹәвьнә маләке щарна бир дькьн, кӧ ԝәʹдә чьԛас зу дәрбаз дьбә. Бона ԝан сьбә дькарә ньшкева сафи бә у кьред ԝан әшкәрә бькә. Һәма бь ви щурʹәйи, тәнгасийа мәзьн, ԝе кәсед кӧ мина дьза тәʹрийеда ньн у хьрабийе дькьн, әшкәрә бькә. Сәва кӧ әм мина ԝан нибьн у бона рʹожа Йаһоԝа һазьр бьн, гәрәке әм тьштед кӧ Йаһоԝа хԝәш найен бьтʹәрькиньн у тьштед ӧса бькьн чь кӧ «ԛәнщи, һәԛи у рʹасти» йә (Әфәси 5:8-12). Рʹезед дьнда, Паԝлос бь сайа дӧ мәсәла дәрһәԛа ԝан мәрьва шьровәдькә, йед кӧ ԝе бенә ԛьрʹкьрьне.

6. Чь те һʹәсабе, кӧ һʹәчʹи зәʹф мәрьв хәԝеда ньн? (1 Тʹесалоники 5:6, 7)

⁶ «Әԝед кӧ рʹадьзен» (Бьхунә 1 Тʹесалоники 5:6, 7). Паԝлосе шанди кәсед кӧ  ԝе ԛьрʹ бьн, бәрамбәри ԝан кьр йед кӧ хәԝеда ньн. Әԝана ньзаньн кӧ дәр-дора ԝан чь дьԛәԝьмә у ԝәхт чаԝа дәрбаз дьбә. Ләма жи, гава тьштәки фәрз дьԛәԝьмә, әԝана пенаһʹәсьн у нькарьн гавед лазьм бавежьн. Иро жи, һʹәчʹи зәʹф мәрьв бь симболик хәԝеда ньн (Рʹомайи 11:8). Әԝана нахԝазьн ԛәбул кьн, кӧ әм рʹожед ахьрийеда дьжин у тәнгасийа мәзьн незик ә. Гава дьнеда тьштәки әʹщеб дьԛәԝьмә, һьнәк кәс жь хәԝа симболик һʹьшйар дьбьн у мьзгинийе ԛәбул дькьн. Ле гәләк жь ԝан һʹьшйар наминьн у диса хәԝрʹа дьчьн. Рʹаст ә, һьнә мәрьв баԝәр дькьн кӧ рʹожа диԝане ԝе бе, ле диса жи әԝана дьфькьрьн, кӧ әв рʹож гәләк дур ә (2 Пәтрус 3:3, 4). Әм нә мина ԝан ьн. Әм фәʹм дькьн, ԝәки тʹәмийа Хԝәде кӧ гәрәке әм һʹьшйар бьминьн, чьԛас дьчә һаԛас дьһа фәрз дьбә.

7. Чьрʹа кәсед кӧ ԝе рʹожа диԝана Хԝәде бенә ԛьрʹкьрьне, бәрамбәри сәрхԝәша дьбьн?

⁷ «Әԝед кӧ сәрхԝәш дьбьн». Паԝлосе шанди кәсед кӧ ԝе рʹожа диԝана Хԝәде бенә ԛьрʹкьрьне, бәрамбәри сәрхԝәша кьр. Мәрьвед вәхԝари, гьран-гьран у бе дьшьрмишбун тьшта дькьн. Һәма бь ви щурʹәйи, кәсед хьраб гӧһ надьн тʹәмийед Хԝәде. Рʹийа кӧ ԝана жьбартийә бәрбь кʹӧтабуне дьбә. Ле хьзмәткʹаред Хԝәде гәрәке ль сәр һʹьше хԝә бьн (1 Тʹесалоники 5:6). Ль гора зандарәки Кʹьтеба Пироз, кәсе кӧ ль сәр һʹьше хԝә йә, рʹьһʹәт ә у пешийа кӧ сафикьрьна бькә, рʹьнд дьфькьрә. Чьрʹа әм гәрәке рʹьһʹәт бьминьн у сәр һʹьше хԝә бьн? Сәва кӧ әм нәкʹәвьнә нава шьхӧле политики у сосйали. Чьԛас рʹожа Йаһоԝа незик дьбә, һаԛас дьһа чәтьн дьбә пьрсед ӧсада амьнийа хԝә хԝәй кьн. Диса жи, нә лазьм ә кӧ әм хәмгин бьн. Хԝәде ԝе бь сайа рʹӧһʹе пироз али мә бькә, ԝәки әм рʹьһʹәт бьминьн у сафикьрьнед билан бькьн (Луԛа 12:11, 12).

8. Ль гора 1 Тʹесалоники 5:8, чь ԝе али мә бькә һʹьшйар бьминьн у һаш жь хԝә һәбьн? (Бьньһерʹә ӧса жи шькьл.)

⁸ Зьрьһʹ у кʹӧмзьрьһʹ ль хԝә бькьн. Паԝлос әм бәрамбәри ԝан әскәра кьрьн, йед кӧ чʹәкед хԝә ль хԝә кьрьнә у бона шәрʹ һазьр ьн (Бьхунә 1 Тʹесалоники 5:8). Ԝәʹде шәрʹ, жь әскәра те дәʹԝакьрьне кӧ һәр гав бона шәрʹ һазьр бьн. Дәрәща мә жи ӧса йә. Гава әм зьрьһʹа баԝәрийе у һʹьзкьрьне у кʹӧмзьрьһʹе гӧмане хԝә дькьн, әм дьдьнә кʹьфше кӧ бона рʹожа Йаһоԝа һазьр ьн. Әв һʹӧнӧр ԝе али мә бькьн һʹьшйар бьминьн у һаш жь хԝә һәбьн.

9. Баԝәри чаԝа мә дьпарезә?

⁹ Чаԝа кӧ зьрьһʹ дьле әскәр дьпараст, баԝәри у һʹьзкьрьн жи дьле мәйи симболик дьпарезьн. Әв йәк али мә дькьн, кӧ әм тʹьме Хԝәдерʹа хьзмәт кьн у пәй Иса һәрʹьн. Бь сайа баԝәрийе, әм заньн ԝәки Йаһоԝа ԝе кәсед кӧ бь дьл у щан дьхԝазьн незики ԝи бьн, хәлат бькә (Ибрани 11:6). Баԝәри дьле мә ԛәԝи дькә, кӧ әм рʹожед чәтьнда жи пәй Рʹебәре хԝә Иса Мәсиһ һәрʹьн. Гәләк хушк-бьред мә, һәла һе ԝәʹде пәйкʹәтьн у проблемед материйали жи амьнийа хԝә хԝәй дькьн. Мәсәлед ԝан дькарьн али мә бькьн, кӧ әм баԝәрийа хԝә ԛәԝи кьн, ԝәки бькарьбьн һьмбәри чәтьнайа сәбьр кьн. Ӧса жи һьнә хушк-бьра жийина хԝә ӧса сьвьк кьрьнә, кӧ бькарьбьн бәри пешьн дина хԝә бьдьнә сәр шьхӧлед Пʹадшатийа Хԝәде. Әм дькарьн чʹәʹв бьдьнә ԝан у пәй һәбуке нәкʹәвьн. b

10. Һʹьзкьрьна һьндава Хԝәде у мәрьва чаԝа али мә дькә тәйах кьн?

 ¹⁰ Сәва кӧ әм һʹьшйар бьминьн у һаш жь хԝә һәбьн, лазьм ә кӧ әм һьм Хԝәде һьм мәрьва һʹьз бькьн (Мәтта 22:37-39). Һʹьзкьрьна һьндава Хԝәде али мә дькә, кӧ әм нава чәтьнайада жи бәлакьрьна мьзгинийе бәрдәԝам кьн (2 Тимотʹейо 1:7, 8). Әм һʹәму мәрьва һʹьз дькьн, ләма жи әм бь сайа хьзмәтийа мал бь мал, телефон йан жи нәʹма, бәрдәԝам дькьн ԝанрʹа дәрһәԛа Хәбәра Хԝәде гьли кьн. Әм баԝәр ьн кӧ рʹожәке әԝана ԝе жийина хԝә бьгӧһезьн у бенә сәр рʹийа рʹастийе (Һәзәԛел 18:27, 28).

11. Һʹьзкьрьна һьндава хушк-бьра мә һелан дькә чь бькьн? (1 Тʹесалоники 5:11)

¹¹ Әм хушк-бьра жи һʹьз дькьн. Ләма жи, әм гәрәке «дьл бьдьнә һәв у аликʹарийа һәвдӧ бькьн» (Бьхунә 1 Тʹесалоники 5:11). Чаԝа кӧ әскәр пьшта һәв дьгьрьн у тʹәвайи мьԛабьли дьжмьна шәрʹ дькьн, әм жи һәвдӧ һелан дькьн у пьштгьрийа һәв дькьн. Рʹаст ә, ӧса дьбә кӧ шәрʹда әскәрәк дькарә ньшкева һәваләки хԝә бьриндар кә, ле әԝе тʹӧ щар бь һʹәмде хԝә ве йәке нәкә. Мина ве йәке, әм жи щарна дьле хушк-бьра дешиньн, ле әме тʹӧ щар ве йәке бь һʹәмде хԝә нәкьн (1 Тʹесалоники 5:13, 15). Ӧса жи, әм щьватеда ԛәдьре бьред щабдар дьгьрьн у бь ви щурʹәйи һʹьзкьрьна хԝә нишан дькьн (1 Тʹесалоники 5:12). Гава Паԝлосе шанди нәʹмә Тʹесалоникийарʹа ньвиси, һе саләк жи дәрбаз нәбьбу кӧ әв щьват һатьбу сазкьрьне. Дьԛәԝьмә ве щьватеда бьред щабдар щерʹьбанди нибун у шаши дькьрьн. Йәкә әԝана һежайи пʹайа бун. Чьԛас тәнгасийа мәзьн незик дьбә, һаԛас һе зедә әм гәрәке итʹбарийа хԝә рʹебәрийа рʹуспийа биньн. Дьбәкә ӧса бьԛәԝьмә, кӧ әм нькарьбьн тʹәви Офиса Сәрәкә у Бәйтʹәле текли бьн, ләма жи гәләк фәрз ә, кӧ әм ньһада рʹуспийа һʹьз бькьн у ԛәдьре ԝан бьгьрьн. Чь жи бьԛәԝьмә, ԝәрә әм һаш жь хԝә һәбьн у дина хԝә нәдьн кемасийед рʹуспийа у бира хԝәда хԝәй кьн, кӧ Йаһоԝа бь сайа Иса Мәсиһ рʹебәрийа ван меред амьн дькә.

12. Һевийа мә чаԝа һʹьше мә дьпарезә?

 ¹² Чаԝа кӧ кʹӧмзьрьһʹ сәре әскәр дьпарезә, һевийа мә жи һʹьше мә дьпарезә у али мә дькә рʹаст бьфькьрьн. Һәрге һевийа мә ԛәԝи бә, әме тьштед ве дьнйайеда беԛимәт һʹәсаб кьн (Филипи 3:8). Һевийа мә али мә дькә, кӧ әм рʹьһʹәт у ԛәԝи бьминьн. Ԝәрә әм дина хԝә бьдьнә сәрһатийа Ԝолес у Лауриндайе, йед кӧ Африкайеда хьзмәт дькьн. Се һʹәфтийада, Ԝолес баве хԝә ӧнда кьр, Лауриндайе жи дийа хԝә. Жь бо пандемийа коронавирусе, ԝана нькарьбун һәрʹьн ԝәлате хԝә. Ԝолес дьбежә: «Һевийа рʹабуна мьрийа али мьн дькә, кӧ әз бьдьмә бәр чʹәʹве хԝә ԝәки паши рʹабуна жь мьрьне, әʹмьре ԝан ԝе чаԝа бә. У чахе әз дьлтәнг дьбьм әв йәк дьлбинийе дьдә мьн».

13. Сәва кӧ Хԝәде рʹӧһʹе пироз бьдә мә, гәрәке әм чь бькьн?

¹³ «Рʹӧһʹе Пироз нәтәмьриньн» (1 Тʹесалоники 5:19). Паԝлос рʹӧһʹе пироз бәрамбәри агьрәки һʹӧнӧре дьле мәда кьр. Рʹӧһʹе пироз хирәта мә зедә дькә, ԝәки әм тьштед рʹаст бькьн у хԝәстьна Йаһоԝа биньн сери (Рʹомайи 12:11). Сәва кӧ әм рʹӧһʹе пироз бьстиньн, әм гәрәке дӧа бькьн, Хәбәра Хԝәде бьхуньн у хԝә ль тʹәшкиләта ԝи бьгьрьн, йа кӧ бь рʹебәрийа рʹӧһʹе пироз пешда дьчә. Ӧса әме бькарьбьн «бәре рʹӧһʹ» пешда биньн (Галати 5:22, 23, ДТʹ).

14. Сәва кӧ әм бәрдәԝам кьн рʹӧһʹе Хԝәде бьстиньн, гәрәке әм хԝә жь чь дур бьгьрьн? (Бьньһерʹә ӧса жи шькьл.)

¹⁴ Паши кӧ Хԝәде рʹӧһʹе пироз дьдә мә, гәрәке әм һаш жь хԝә һәбьн ԝәки әм агьре «Рʹӧһʹе Пироз нәтәмьриньн». Хԝәде рʹӧһʹе пироз дьдә тʹәне ԝан мәрьва фькьр у кьред кʹижана тʹәмьз ә. Һәрге әм бәрдәԝам кьн сәр тьштед хьраб бьфькьрьн, йан жи ль гора фькьред нәбаш тьшта бькьн, Хԝәде ԝе рʹӧһʹе пироз нәдә мә (1 Тʹесалоники 4:7, 8). Хенщи ве йәке, сәва кӧ әм бәрдәԝам кьн рʹӧһʹе пироз бьстиньн, әм гәрәке «пʹехәмбәртийа берʹумәт нәкьн» (1 Тʹесалоники  5:20). Ве рʹезеда, хәбәра ‹пʹехәмбәрти› те һʹәсабе хәбәред кӧ Хԝәде бь һʹӧкӧме рʹӧһʹе пироз дайә мә. Мәсәлә, һьнә жь ван хәбәра бәʹса рʹожа Йаһоԝа дькьн у тиньн бира мә, кӧ әв рʹож чьԛас незик ә. Гәрәке әм нәфькьрьн ԝәки әме пе чʹәʹве хԝә Һармәгәдоне нәвиньн. Дәԝса ве йәке, сәва кӧ әм бир нәкьн, ԝәки рʹожа Хԝәде чьԛас незик ә, әм гәрәке һәр рʹож «жийина һʹәлал у хԝәденасийеда бьмәшьн» (2 Пәтрус 3:11, 12).

15. Әм чаԝа дькарьн хԝә жь хәбәред дәрәԝ у пропаганда щьна бьпарезьн? (1 Тʹесалоники 5:21)

¹⁵ Дәмәкә незикда, дьжмьнед Хԝәде ԝе әʹлам кьн, ԝәки «дьне сәԛьрʹи у бехофи йә» (1 Тʹесалоники 5:3). Һʹәчʹи зәʹф мәрьв ве пе пропаганда щьна бенә хапандьне (Әʹйанти 16:13, 14). Ле һʹале мә ԝе чаԝа бә? Һәрге әм «һәр тьшти бьщерʹьбиньн», әме нәйенә хапандьне (Бьхунә 1 Тʹесалоники 5:21). Хәбәра Йунани, йа кӧ һатийә ԝәлгәрʹандьне ча «һәр тьшти бьщерʹьбиньн», бона щерʹьбандьна металед бьһа дьһатә хәбьтандьне. Демәк лазьм ә, кӧ әм бьщерʹьбиньн һәла әв тьштед кӧ әм дьбьһен йан дьхуньн рʹаст ьн йан на. Әв йәк бона Тʹесалоникийа фәрз бу, ле бона мә дьһа фәрз ә, чьмки тәнгасийа мәзьн незик дьбә. Дәԝса кӧ әм баԝәрийа хԝә һәр тьшти биньн, гәрәке әм рʹьнд бьфькьрьн һәла тьштед кӧ әм дьбьһен йан дьхуньн, ль гора Кʹьтеба Пироз у тʹәшкиләта Йаһоԝа рʹаст ьн йан на. Һәрге әм ӧса бькьн, әме пе пропаганда щьна нәйенә хапандьне (Мәтʹәлок 14:15; 1 Тимотʹейо 4:1).

16. Әм һивийа чь нә у әм дьхԝазьн чь бькьн?

¹⁶ Чаԝа кʹом, хьзмәткʹаред Хԝәде ԝе жь тәнгасийа мәзьн сах дәрбаз бьбьн. Ле һәр кәс жь мә ньзанә кӧ сьбе ԝе чь бьԛәԝьмә (Аԛуб 4:14). Тьште һәри фәрз әв ә, кӧ әм амьн бьминьн. Һәрге әм пешийа тәнгасийа мәзьн бьмьрьн жи, йәкә әме бенә сахкьрьне у жийина һʹәта-һʹәтайе бьстиньн. Йед бьжарти ԝе тʹәви Иса Мәсиһ сәр әʹзмана бьжин, у бәрхед дьн жи ԝе һʹәта-һʹәтайе дьнйа тʹәзәда бьжин. Ԝәрә әм һәртʹьм дина хԝә бьдьн һевийа хԝәйә баш у бона рʹожа Йаһоԝа һазьр бьн!