1-2. Ль гора Зәбур 25:14, әм чаԝа дькарьн бьбьн достед Йаһоԝа?

 БЬ НЬҺЕРʹАНДЬНА ԝә, бона һәвалтийе кʹижан һʹӧнӧр фәрз ьн? Дьбәкә тәйе бьгота кӧ һәвалед баш гәрәке һәвдӧ һʹьз бькьн у пьштгьрийа һәв бькьн. Бь рʹасти, һәвал гәрәке һәвдӧ нәтьрсьн. Ле рʹеза сәрәкәда те готьне, ԝәки кʹе кӧ дьхԝазә бьбә досте Йаһоԝайә незик, гәрәке хофа Хԝәде дьле ԝанда һәбә (Бьхунә Зәбур 25:14).

² Лазьм ә кӧ тьрса Хԝәде дьле һʹәму хьзмәткʹаред Йаһоԝада һәбә. Ле чь те һʹәсабе Хԝәде бьтьрсьн? Әм чаԝа дькарьн һин бьн, кӧ Йаһоԝа бьтьрсьн? Ве йәке әм дькарьн һин бьн жь Обадйа нобәдаре ԛәсьре, жь Сәрәккʹаһин Йәһойада у жь Йоаш Пʹадша?

3. Чь дькарә бьбә мәʹни кӧ әм бьтьрсьн, у әв тьрс ча дькарә сәр мә һʹӧкӧм кә?

³ Гава әм рʹасти дәрәщәкә хоф тен, тьрс дькарә бькʹәвә дьле мә, ле әԝ тьрс дькарә али мә бькә сафикьрьна рʹаст бькьн у бенә хԝәйкьрьне. Мәсәлә, гава әм сәр зьнарәкирʹа дәрбаз дьбьн, тьрс али мә дькә незики ԛәрахе ԝи нәбьн, ԝәки нәкʹәвьн. Жь тьрса бьриндарбуне, әм хԝә дури дәрәщед хоф дьгьрьн. Ӧса жи тьрс али мә дькә, ԝәки әм бь гьли у кьред хьраб, достийа хԝә тʹәви һәвале хԝәйи незик ӧнда нәкьн.

4. Мире-щьна дьхԝазә кӧ әм чь щурʹәйи Йаһоԝа бьтьрсьн?

⁴ Мире-щьна дьхԝазә кӧ зьраве мәрьва жь Йаһоԝа бьԛәтә. Мире-щьна дьхԝазә кӧ мәрьв ԝан тьшта баԝәр кьн, чь кӧ Әлифаз дәрһәԛа Йаһоԝа гот, кӧ Әԝ йәки  берʹәʹм ә, дьхԝазә мә щәза бькә, у тʹӧ кәс нькарә дьле ԝи хԝәш бе (Ибо 4:18, 19). Мире-щьна дьхԝазә кӧ тьрсәкә ӧса һьндава Йаһоԝа дьле мәда пешда бе, жь бо чь жи әме нәхԝазьн Ԝирʹа хьзмәт кьн. Бь рʹасти тьрса бәр Хԝәде гәрәке мә һелан кә ԛәдьре ԝи бьгьрьн у тьштед ӧса нәкьн, чь кӧ ԝе дьле ԝи бешинә.

5. Чь те һʹәсабе Хԝәде бьтьрсьн?

⁵ Кәсе кӧ бь щурʹе рʹаст жь Хԝәде дьтьрсә, бь рʹасти ԝи һʹьз дькә. Әԝ нахԝазә тьштәки хьраб бькә, чь кӧ дькарә зьраре бьдә достийа ԝи тʹәви Хԝәде. Тьрса Хԝәде дьле Иса Мәсиһда жи һәбу (Ибрани 5:7). Зьраве ԝи жь Йаһоԝа нәдьԛәтийа, ле әԝи Хԝәде һʹьз дькьр у бь дьл ԛьрара ԝи дьани сери (Ишайа 11:2, 3; Йуһʹәнна 14:21, 31). Һʹӧнӧред Йаһоԝайә сәрәкә һʹьзкьрьн, билани, һәԛи у ԛәԝат ә. Ләма әм жи мина Иса ԛәдьре ԝи дьгьрьн у һӧрмәте дьдьнә ԝи. Ӧса жи әм заньн, кӧ Йаһоԝа гәләки мә һʹьз дькә у рʹебәрийа мә дькә. Бь готьн у кьред хԝә, әм дькарьн дьле ԝи йан бешиньн йан жи ша бькьн (Зәбур 78:41; Мәтʹәлок 27:11).

6. Әм чаԝа дькарьн һин бьн кӧ жь Хԝәде бьтьрсьн? (Зәбур 34:11)

⁶ Тьрса бәр Хԝәде жь буйине мәрʹа нәһатийә дайине. Ләма жи лазьм ә кӧ әм тьрса Хԝәде дьле хԝәда пешда биньн (Бьхунә Зәбур 34:11). Мәщаләк кӧ ча әм дькарьн тьрса бәр Хԝәде пешда биньн әв ә, кӧ дина хԝә бьдьнә тʹәбийәте у сәр ԝе кʹур бьфькьрьн. Чьԛас әм билани, ԛәԝат у һʹьзкьрьна Хԝәде әʹфринада бьвиньн, һаԛас һе зедә әме ԛәдьре ԝи бьгьрьн у ԝи һʹьз бькьн (Рʹомайи 1:20). Хушкәкә мә ӧса гот: «Әʹфринада биланийа Йаһоԝа те кʹьфше. Гава әз дина хԝә дьдьмә әʹфрина, әз һʹӧжмәкʹар дьминьм. Әԝ тиньн бира мьн, кӧ Хԝәде кʹара мьн дьхԝазә». Фькьрандьна кʹур али ԝе кьр, ԝан гьлийа бежә: «Жь бәр кӧ Йаһоԝа әʹмьр дайә мьн, әз ԛә нахԝазьм шашийа бькьм, кʹижан кӧ дькарьн зьраре бьдьнә достийа мьн тʹәви ԝи». Ле тӧ дькари ве һʹәфтийе ԝәʹдә бьвини, ԝәки дина хԝә бьди әʹфринәки у кʹур сәр бьфькьри? Бь ви щурʹәйи тӧйе дьһа зедә Йаһоԝа һʹьз бьки у ԛәдьре ԝи бьгьри (Зәбур 111:2, 3).

7. Дӧакьрьн ча али мә дькә, кӧ әм тьрса бәр Йаһоԝа пешда биньн?

⁷ Мәщаләкә дьн кӧ ча тьрса бәр Хԝәде пешда биньн әв ә, кӧ һәр рʹож дӧа бькьн. Әм чьԛас зедә дӧа бькьн, һаԛас әме дьһа баш Йаһоԝа нас бькьн. Һәр щар гава әм рʹасти чәтьнайа тен у жь Ԝи рʹәща дькьн ԝәки сәбьр у ԛәԝате бьдә мә, әв йәк тинә бира мә кӧ Әԝ чьԛас ԛәԝат ә. Гава әм бона ԛӧрбана Иса Йаһоԝарʹа рʹазибуна хԝә дьдьнә кʹьфше у чахе әм лавайа ԝи дькьн, кӧ әԝ чәтьнайед мәда али мә бькә, әм һʹьзкьрьн у биланийа ԝи дьвиньн. Дӧайед ӧса али мә дькьн, кӧ әм дьһа зедә ԛәдьре Йаһоԝа бьгьрьн у жь һәр тьште кӧ дькарә достийа мә тʹәви ԝи хьраб кә, хԝә дур бьгьрьн.

8. Әм ча дькарьн тьрса бәр Хԝәде дьле хԝәда хԝәй кьн?

⁸ Сәва кӧ тьрса бәр Хԝәде дьле мәда бьминә, әм гәрәке Кʹьтеба Пироз леколин кьн ԝәки жь мәсәлед баш у йед хьраб дәрса һин бьн. Ԝәрә әм дина хԝә бьдьнә дӧ хьзмәткʹаред Йаһоԝайә амьн. Йәк жь ԝан Обадйа бу, нобәдаре ԛәсьра Аһаб Пʹадша, у йе дьн жи Сәрәккʹаһин Йәһойада бу. Паше әме бьвиньн, кӧ әм жь Йоаш Пʹадша чь дькарьн һин бьн, йе  кӧ серида амьн бу, ле паше пьшта хԝә да Йаһоԝа.

9. Тьрса бәр Хԝәде чаԝа али Обадйа кьр? (1 Пʹадшати 18:3, 12)

⁹ Кʹьтеба Пироз дәрһәԛа Обадйа b ӧса дьбежә: «Обадйа жь Хӧдан гәләки дьтьрсийа, ИМ» (Бьхунә 1 Пʹадшати 18:3, 12). Бь сайа тьрса бәр Хԝәде, Обадйа йәки рʹаст, һәԛ у бь итʹбар бу. Ләма жи пʹадша әԝ кьрә нобәдаре ԛәсьре (Бәрамбәр кә Нәһәмийа 7:2). Ӧса жи тьрса бәр Хԝәде али ԝи дькьр, кӧ әԝ йәки гәләк мерхас бә. Әԝ һена сәрԝертийа Аһаб Пʹадшада дьжит, йе кӧ «жь һʹәму кәсед бәрийа [пешийа] хԝә зедәтьр тьштед дь чʹәʹве Хӧданда хьраб ьн, кьрьн» (1 Пʹадшати 16:30). Жьна Аһаб Изабел, Баәʹлрʹа хьзмәт дькьр. Әԝе Йаһоԝа нәфрʹәт дькьр, ләма жи һәр тьшт дькьр, ԝәки һʹәбандьна Йаһоԝа кʹӧта кә. Әԝе һәла һе гәләк пʹехәмбәред Хԝәде жи да кӧштьне (1 Пʹадшати 18:4). Бешьк, Обадйа рʹожед чәтьнда дьжит.

10. Обадйа чаԝа избат кьр, кӧ әԝ йәки гәләк мерхас ә?

¹⁰ Обадйа ча избат кьр, кӧ әԝ йәки гәләк мерхас бу? Гава Изабел пʹехәмбәред Хԝәде дьгәрʹийа ԝәки ԝана бькӧжә, Обадйа «сәд пʹехәмбәред Хӧдан пенщи пенщи дь шькәфтада вәшартьн у әԝ бь нан у ав кьрьн» (1 Пʹадшати 18:13, 14, ИМ). Һәрге Изабел дәрһәԛа ве йәке пебьһʹәсийа, бешьк Обадйа ԝе бьһата кӧштьне. Һәмьки, Обадйа дьбәкә дьтьрсийа у нәдьхԝәст бьмьрә, ле әԝи жь әʹмьре хԝә зедәтьр Йаһоԝа у хьзмәткʹаред ԝи һʹьз дькьр.

11. Хьзмәткʹаред Йаһоԝа чьда чʹәʹв дьдьнә Обадйа? (Бьньһерʹә ӧса жи шькьл.)

¹¹ Иро гәләк хьзмәткʹаред Йаһоԝа ԝан ԝәлатада дьжин, кʹидәре кӧ шьхӧле мә ԛәдәхәкьри йә. Рʹаст ә әԝана ԛәдьре дәԝләте дьгьрьн, ле мина Обадйа, әԝ хушк-бьред ԛимәт диса жи бәрдәԝам дькьн Йаһоԝарʹа хьзмәт кьн у ԝирʹа амьн бьминьн (Мәтта 22:21). Әԝана тьрса бәр Хԝәде бь ве йәке дьдьнә  кʹьфше, кӧ гӧра Хԝәде дькьн, нә кӧ гӧра мәрьва (Кʹаред Шандийа 5:29). Ләма жи әԝана бәрдәԝам дькьн мьзгинийе бәла кьн у дьзикава щьвинед хԝә тʹәвайи дәрбаз дькьн (Мәтта 10:16, 28). Әԝана хәм дькьн, кӧ һʹәму хушк-бьра хԝарьна рʹӧһʹани бьстиньн. Ԝәрә әм дина хԝә бьдьнә мәсәла бьре мә Һенри, йе кӧ ԝәлатәки Африкайеда дьжи. Ԝедәре шьхӧле мә ԝәʹдәки һатьбу ԛәдәхәкьрьне. Ԝи чахи Һенри дьхԝәст әʹдәбйәтед мә хушк-бьрарʹа бьвә. Әԝи ньвиси: «Бь әʹсьле хԝә, әз йәки шәрмокә мә. Ле жь бо ве йәке кӧ әз гәләк Йаһоԝа һӧрмәт дькьм, мьн бь мерхаси әԝ щабдарийа хԝә ани сери». Һәрге тьрса бәр Хԝәде дьле тәда һәбә, тӧ жи дькари мина Һенри мерхас би!

12. Сәрәккʹаһин Йәһойада у жьна ԝи, ча амьнийа хԝә Йаһоԝарʹа нишан кьрьн?

¹² Тьрса бәр Хԝәде али Сәрәккʹаһин Йәһойада дькьр, ԝәки әԝ амьн бьминә у пьштгьрийа һʹәбандьна рʹаст бькә. Рʹожәке, ԛиза Изабеле, Аталйа, тʹәхте пʹадшатийа Щьһудайе бь дәсте зоре зәфти хԝә кьр. Щьмәʹт гәләк жь Аталйайе дьтьрсийа, чьмки әԝ йәкә зӧлм бу. Сәва кӧ бьбә жьн-пʹадша, Аталйа һазьр бу тʹәмамийа хәза пʹадше кʹӧта кә, һәла һе нәбийед хԝә жи! (2 Дирок 22:10, 11) Ле Йоаш, нәбики ԝе, һатә хьлазкьрьне. Йәһойада у жьна ԝи Йәһошабәата, әԝ вәшартьн у хԝәй кьрьн. Бь ви щурʹәйи ԝана хәза пʹадшатийа Даԝьд хԝәй кьр. Йәһойада Йаһоԝарʹа амьн ма у жь Аталйайе нәдьтьрсийа (Мәтʹәлок 29:25).

13. Гава Йоаш һʹәфт сали бу, Йәһойада ча избат кьр, кӧ әԝ йәки амьн ә?

¹³ Гава Йоаш һʹәфт сали бу, Йәһойада диса избат кьр, кӧ әԝ Йаһоԝарʹа амьн ә. Әԝи нетәк дани пешийа хԝә у һәрге әв нета ԝи бьһата сери, Йоаш ԝе бьбуйа пʹадше ԛануни. Ле һәрге нета ԝи нәһата сери, әԝи дькарьбу әʹмьре хԝә ӧнда кьра. Бь аликʹарийа Йаһоԝа, әԝ гьһиштә нета хԝә. Сәрока у Леԝийа пьштгьрийа ԝи кьрьн у әԝи Йоаш кьрә пʹадша у Аталйа да кӧштьне (2 Дирок 23:1-5, 11, 12, 15; 24:1). Паше Йәһойада ортʹа Йаһоԝа, пʹадшеда у щьмәʹтеда, пәйманәк гьреда кӧ әԝана бәрдәԝам кьн ча щьмәʹта Йаһоԝа бенә һʹәсабе (2 Пʹадшати 11:17). Ӧса жи, Йәһойада нобәдар данин бәр дәргәһед мала Йаһоԝа, ԝәки кәсед нәпаԛьж нәкʹәвьн ԝедәре (2 Дирок 23:19).

14. Йаһоԝа ча Йәһойада рʹумәт кьр?

¹⁴ Йаһоԝа готьбу: «Кәсе кӧ мьн рʹумәт бькә, әзе жи рʹумәт бькьм» (1 Самуйел 2:30, ИМ). Мәсәлә, Әԝи сәрһатийа Йәһойада Кʹьтеба Пирозда да ньвисандьне, ԝәки әм жь ԝи һин бьн (Рʹомайи 15:4). Йәһойада бона мала Хԝәде ԛәнщи кьрьбу, ләма жи Йаһоԝа изьн да, ԝәки әԝ ԝедәре бе дәфьнкьрьне, кʹидәре кӧ пʹадша дьһатьнә дәфьнкьрьне. Әв йәк ԛәдьрәки гәләк мәзьн бу (2 Дирок 24:15, 16).

15. Әм жь сәрһатийа Йәһойада чь дькарьн һин бьн? (Бьньһерʹә ӧса жи шькьл.)

¹⁵ Сәрһатийа Йәһойада дькарә али мә һʹәмуйа бькә, кӧ әм тьрса бәр Хԝәде дьле хԝәда пешда биньн. Рʹуспи дькарьн мина Йәһойада һʹьшйар у амьн бьминьн у щьмәʹта Хԝәде бьпарезьн (Кʹаред Шандийа 20:28). Йед кӧ әʹмьрда мәзьн ьн, дькарьн жь Йәһойада һин бьн, кӧ һәрге әԝ һӧрмәте бьдьн Йаһоԝа у ԝирʹа амьн бьминьн, Йаһоԝа ԝе ԝана бьдә хәбате, сәва кӧ  нета хԝә бинә сери. Йаһоԝа һьндава Йәһойада ԛәнщ бу. Кәсед щаһьл дькарьн чʹәʹв бьдьнә Йаһоԝа у һьндава йед әʹмьрда мәзьн ԛәнщ бьн, ԛәдьре ԝан бьгьрьн у пʹайе ԝан бьдьн, илаһи йед кӧ гәләк сал бь амьни Йаһоԝарʹа хьзмәт дькьн (Мәтʹәлок 16:31). Әм гьшк дькарьн чʹәʹв бьдьнә сәрок у Леԝийа, йед кӧ пьштгьрийа Йәһойада дькьрьн. Ԝәрә әм бь амьни пьштгьрийа «рʹебәред хԝә бькьн у гӧрʹа ԝанда бьн» (Ибрани 13:17).

16. Йоаш Пʹадша йәки чаԝа бу?

¹⁶ Йәһойада али Йоаш пʹадша кьр, ԝәки әԝ бьбә мәрьвәки баш (2 Пʹадшати 12:2). Ләма жи щаһьлтийа хԝәда, Йоаш дьхԝәст дьле Йаһоԝа ша кьра. Ле паши мьрьна Йәһойада, Йоаш дәстпекьр гӧрʹа сәрокед рʹабәр бькә. Ахьрийеда, Йоаш у бьнәлийед ԝи дәстпекьрьн сәре хԝә бәр пʹута дайньн (2 Дирок 24:4, 17, 18). Ԝана гӧһ нәдьда пʹехәмбәред Йаһоԝа. Бь ве йәке, ԝана дьле Йаһоԝа дешанд. Йоаш һәла һе гӧһ нәдьда Зәкәрйа жи, кӧрʹе Йәһойада, йе кӧ һьм пʹехәмбәре Йаһоԝа бу һьм жи мәрьве Йоаш бу. Йоаш Пʹадша дәԝса кӧ жь малбәта Йәһойада рʹази буйа, әԝи Зәкәрйа да кӧштьне (2 Дирок 22:11; 24:19-22).

17. Чь һатә сәре Йоаш?

¹⁷ Жь бәр кӧ тьрса бәр Хԝәде дьле Йоашда нәмабу, һʹале ԝи хьраб бу. Йаһоԝа готьбу, кӧ кʹе Ԝи нәфрʹәт дькә, ԝе бе нәфрʹәткьрьне (1 Самуйел  2:30). Паше, ордийа бьчʹук йа Сурйайе ордийа мәзьн йа Йоаш алт кьр у ԝи бьриндар кьрьн. Чахе ордийа Сурйайе вәкʹьшийа, хӧламед Йоаш һʹәйфа Зәкәрйа һьлдан у ԝи кӧштьн. Ләма жи әԝ пʹадше хьраб һежа нибу, кӧ ԝи щийи бе дәфьнкьрьне, кʹидәре кӧ пʹадша дьһатьнә дәфьнкьрьне (2 Дирок 24:23-25; Мәтта 23:35).

18. Ль гора Йерәмйа 17:7, 8, чь дькарә али мә бькә кӧ әм нәбьн мина Йоаш?

¹⁸ Әм жь мәсәла Йоаш чь дькарьн һин бьн? Чаԝа кӧ дарәкә бе кʹока ԛәԝи, һʹәԝщә шьдандьне йә, Йоаш жи һʹәԝще аликʹарийе бу. Гава Йәһойада, йе кӧ аликʹари дьда ԝи, мьр, Йоаш кʹәтә бәр байе кәсед кӧ жь рʹийа Хԝәде дәркʹәтьбун. Мәсәла ԝи нишан дькә, кӧ әм гәрәке нә кӧ бона хатьре малбәта хԝә, нә жи бона хатьре хушк у бьра Йаһоԝа бьтьрсьн, ле чьмки әм ԝи һʹьз дькьн. Сәва кӧ әм рʹӧһʹанида ԛәԝи бьминьн, әм гәрәке һәр тьшти бькьн, ԝәки амьнийа хԝә хԝәй кьн. Бона ве йәке, лазьм ә кӧ әм һәртʹьм леколина шәхси бькьн, сәр тьштед кӧ дьхуньн кʹур бьфькьрьн у дӧа бькьн (Бьхунә Йерәмйа 17:7, 8; Колоси 2:6, 7).

19. Йаһоԝа дьхԝазә кӧ әм чь бькьн?

¹⁹ Бь рʹасти, Йаһоԝа тьштед жь ԛәԝата мә дәр жь мә дәʹԝа накә. Кʹьтеба Пироз ӧса дьбежә: «Жь Хԝәде бьтьрсә у әʹмред ԝи бьгьрә, ԝәзифәйа һʹәму мәрьва әв ә» (Ԝаиз 12:13, ИМ). Бь сайа тьрса бәр Хԝәде, әме бькарьбьн бәр тәнгасийед ахьрийе сәбьр кьн у мина Обадйа у Йәһойада амьн бьминьн. Бь ви щурʹәйи тʹӧ тьшт ԝе нькарьбә достийа мә тʹәви Йаһоԝа хьраб кә.