1. Гава тә щара пешьн кәсед дьнрʹа бәʹса Кʹьтеба Пироз кьр, чь ԛәԝьми?

ГАВА тә фәʹм кьр кӧ тә рʹасти дитийә, тә чь тʹәхмин кьр? Бәле готьнед Кʹьтеба Пироз тәрʹа ча ава зәлал әʹйан бун. Тӧ дьбәкә фькьри кӧ һәр кәс ԝе рʹастийа Кʹьтеба Пироз һеса ԛәбул бькә. Тӧ баԝәр буйи кӧ әԝана ԝе бь сайа готьнед Кʹьтеба Пироз дьһа бәхтәԝар бьн у һевикә пʹьрʹ баш ԛазанщ бькьн (Зәбур 119:105). Ләма, тә һʹәму һәвал у мәрьвед хԝәрʹа бь хирәт бәʹса рʹастийед Кʹьтеба Пироз кьр. Ле чь ԛәԝьми? Гәләка жь ԝан готьнед тә ԛәбул нәкьрьн, нә ӧса йә?

2-3. Ль рʹожед Иса Мәсиһ, пʹьрʹанийа мәрьва дәрһәԛа ԝи у мьзгина ԝи чь дьфькьрин?

² Һәгәр кәсед дьн мьзгина кӧ әм бәла дькьн, ԛәбул нәкьн, гәрәке әм әʹщебмайи нәминьн. Ль рʹожед Иса Мәсиһ, пʹьрʹанийа мәрьва әԝ инкʹар кьрьн. Кʹәрәмәтед кӧ Иса Мәсиһ дькьрьн, избат дькьр кӧ Хԝәде пьштгьрийа ԝи дькә. Мәсәлә, әԝи һәвале хԝә Лазар жь мьрьне рʹакьр. Кәсед кӧ Иса һʹьз нәдькьрьн жи нькарьбу әв кʹәрәмәт инкʹар бькьрана. Диса жи, сәрԝеред дине Щьһуйа, Иса ча Мәсиһе создайи ԛәбул нәдькьрьн. Сәрда жи, ԝана дьхԝәст һьм Иса һьм жи Лазар бькӧштана! (Йуһʹәнна 11:47, 48, 53; 12:9-11).

³ Иса заньбу кӧ пʹьрʹанийа мәрьва ԝе ԝи ча Мәсиһ ԛәбул нәкьн (Йуһʹәнна 5:39-44). Әԝи һьнә шагьртед Йуһʹәннайе Ньхӧмдаррʹа ӧса гот: «Хԝәзи ль ԝи, кӧ мьнда шьк накʹәвә» (Мәтта 11:2, 3, 6). Иса Мәсиһ чьма жь алийе гәләк кәсава дьһат инкʹаркьрьн?

4. Ве готареда, әме чь һин бьн?

⁴ Ве готареда у готара дьнда, әме бьвиньн кӧ ль ԛьрʹна йәке, гәләк кәса чьрʹа баԝәрийа хԝә һьндава  Иса Мәсиһ нәдьани. Ӧса жи, әме бьвиньн кӧ иро гәләк кәс чьрʹа мьзгина мә ԛәбул накьн. Йа һәри фәрз жи, әме бьвиньн кӧ әм чаԝа дькарьн баԝәрийа хԝә Иса биньн ԝәки әм нәлькʹӧмьн.

5. Һьнә мәрьв дьбәкә чьрʹа Иса ча Мәсиһе создайи ԛәбул нәдькьрьн?

⁵ Гәләк кәс Иса ԛәбул нәдькьрьн жь бо щийе кʹидәре кӧ әԝ мәзьн бьбу у жь бо малбәта ԝи. Рʹаст ә әԝана әʹщебмайи дьман сәр һинкьрьн у кʹәрәмәтед Иса, ле диса жи, бь дитьна ԝан, әԝ кӧрʹе нәщарәки кʹәсиб бу. Ӧса жи, әԝ жь бажаре Ньсрәте бу, бажарәки кӧ жь алийе гәләк мәрьвава дьһат ньмьздитьн. Мәсәлә, пешийа кӧ Натанйел бу шагьрте Иса Мәсиһ, әԝи ӧса готьбу: «Ԛәт дьбә кӧ тьштәки пʹак жь Ньсрәте дәркʹәвә?» (Йуһʹәнна 1:46). Дьбәкә Натанйел бажаре Ньсрәте һʹьз нәдькьр. Йан жи, әԝи бәлки дьани бира хԝә кӧ ль гора Ньвисаред Пироз, Мәсиһ ԝе нә кӧ Ньсрәтеда, ле Бәйтләһʹмеда бьһата буйине (Миха 5:2).

6. Ль рʹожед Иса, мәрьва чаԝа дькарьбу фәʹм бькьра кӧ Иса йә Мәсиһе создайи?

⁶ Ньвисаред Пироз чь дьбежьн? Ишайа пʹехәмбәр жь бәрева готьбу кӧ дьжмьнед Иса Мәсиһ ԝе һур бь һур дина хԝә нәдьн кӧ Мәсиһ жь кʹижан рʹькʹьнийате һат (Ишайа 53:8). Пʹехәмбәра гәләк жь ван һургьлийа жь бәрева әшкәрә кьрьбун. Һәгәр мәрьвед ль рʹожед Иса Мәсиһ дина хԝә бьдана ван һургьлийа, ԝана ԝе фәʹм бькьра кӧ ча Миха 5:2-да һатийә пʹехәмбәртикьрьне, Иса Мәсиһ Бәйтләһʹмеда һатьбу буйине. Ӧса жи, әԝ жь зӧрʹәта Даԝьд Пʹадша бу (Луԛа 2:4-7). Гәло проблема ԝан мәрьва чь бу? Әԝана дькʹәтьн шьке чьмки һʹәму избаткьрьна рʹьнд леколин нәкьрьбун.

7. Гәләк кәс Шәʹдед Йаһоԝа чьма ԛәбул накьн?

⁷ Гәло әв проблем иро жи һәйә? Бәле! Пʹьрʹанийа хьзмәткʹаред Йаһоԝа мәрьвед нав у дәнг ниньн. Ль дьнйайе, һьнә мәрьв Шәʹдед Йаһоԝа ча «мәрьвнә нәхԝәнди у нәзан» дьвиньн (Кʹаред Шандийа 4:13). Һьнә кәс жи дьфькьрьн кӧ хьзмәткʹаред Хԝәде мәкʹтәбед религи хьлаз нәкьрьнә, у ләма изна ԝан тʹӧнә кӧ Кʹьтеба Пироз һин бькьн. Бь дитьна һьнә кәса, Шәʹдед Йаһоԝа «религийәкә Америкайи йә», ле бь рʹасти жь һәр 7 Шәʹдед Йаһоԝа, тʹәне йәк ль Америкайе дьжи. Һьнә кәса жи бьһистийә кӧ Шәʹдед Йаһоԝа Иса Мәсиһ баԝәр накьн, йан жи кӧ әԝана «комунист», «щәʹсусед Америкайе» йан «екстремист» ьн. Кәсед кӧ ван дәрәԝа баԝәр дькьн, рʹастийе леколин накьн йан жи ԛәбул накьн, ләма жи дькʹәвьн шьке у дьлькʹӧмьн.

8. Ль гора Кʹаред Шандийа 17:11, сәва кӧ мәрьв фәʹм бькьн кӧ кʹи бь рʹасти хьзмәткʹаред Хԝәде нә, гәрәке әԝ чь бькьн?

⁸ Гәрәке мәрьв чь бькьн сәва кӧ нәлькʹӧмьн? Пʹьрʹ фәрз ә кӧ әԝ леколин бькьн кӧ чь рʹаст ә у чь на. Гава Луԛа кʹьтеба хԝә ньвиси, әԝи жи ӧса кьр. Әԝи бь хирәт һәр тьшти рʹьнд леколин дькьр, ԝәки хԝәндәван тедәрхьн һәла тьштед кӧ ԝана дәрһәԛа Иса Мәсиһ бьһистьбун, рʹаст ьн йан на (Луԛа 1:1-4). Щьһуйед кӧ ль бажаре Бәройайе дьжитн жи мина Луԛа бун. Гава ԝана мьзгина дәрһәԛа Иса Мәсиһ щара пешьн бьһист, әԝана «һәр рʹож ньвисарада кʹур дьбун, кʹа әв тьшт ӧса нә» (Кʹаред Шандийа 17:11 бьхунә). Иро жи  лазьм ә кӧ мәрьв рʹьнд леколин бькьн у готьнед Шәʹдед Йаһоԝа бь готьнед Кʹьтеба Пироз бәрамбәри һәв кьн. Ӧса жи, ԝе баш бә кӧ әԝана тʹәриха Шәʹдед Йаһоԝа жи леколин бькьн. Һәгәр мәрьв ве йәке бькьн, әԝана ԝе нәкʹәвьн бәр байе ньһерʹандьна нәрʹаст.

9. Гава Иса Мәсиһ хԝәстьна Ферьси у Садуԛийа нәани сери, ԝана чь кьр?

⁹ Ль рʹожед Иса Мәсиһ, һьнә мәрьварʹа һинкьрьнед Иса бәс нибун. Ԝана дьхԝәст кӧ әԝ «жь әʹзмана нишанәке нишани ԝана кә» у бь ви аԝайи избат бькә кӧ Мәсиһе создайи әԝ ә (Мәтта 16:1). Сәбәба хԝәстьна ԝан дьбәкә әԝ бу кӧ ԝана готьнед Данийел 7:13, 14 шаш фәʹм дькьрьн. Ле бь рʹасти ԝәхт нәһатьбу кӧ әв готьнед кʹьтеба Данийел бенә сери. Гәрәке Ферьси у Садуԛийа жь һинкьрьнед Иса фәʹм бькьрана кӧ Мәсиһе создайи әԝ ә. Ле гава Иса бь йа ԝан нәкьр, ԝана әԝ инкʹар кьр (Мәтта 16:4).

10. Иса готьнед Ишайа пʹехәмбәр йед дәрһәԛа Мәсиһ чаԝа анин сери?

¹⁰ Ньвисаред Пироз чь дьбежьн? Ишайа пʹехәмбәр дәрһәԛа Мәсиһ жь бәрева ӧса ньвисибу: «Ԝе әԝ нәԛерә у дәнге хԝә бьльнд нәкә у ԝе дь кʹӧчеда нәдә бьһистьн» (Ишайа 42:1, 2). Иса Мәсиһ бь мьлукти хьзмәт дькьр у дина мәрьва нәдькʹьшандә сәр хԝә. Әԝи дер йан пʹарьстгәһ ава нәдькьрьн, кʹьнщед мәхсус ль хԝә нәдькьрьн у нәдьхԝәст кӧ мәрьв ԝи бь сәрнавед мәхсус рʹумәт бькьн. Гава Иса Мәсиһ дьһат диԝанкьрьн, әԝи кʹәрәмәтәкә мәхсус нәкьр кӧ Һеродәс Пʹадша әʹщебмайи бькә (Луԛа 23:8-11). Бәле, Иса Мәсиһ һьнә кʹәрәмәт дькьрьн, ле әԝи һәри зедә дина хԝә дьда шьхӧле бәлакьрьна мьзгине. Әԝи шагьртед хԝәрʹа ӧса гот: «Әз бона ве йәке һатьмә» (Марԛос 1:38).

11. Баԝәрийа Шәʹдед Йаһоԝа чьрʹа һьнә мәрьва хԝәш найе?

¹¹ Гәло әв проблем иро жи һәйә? Бәле. Гәләк мәрьв фьрнаԛ дьбьн бь хәмьл у рʹәԝша дера, сәрнавед бьльнд йед  кʹәшиша у әʹйд-ԛәйдед хԝә йед кӧ гәләка ида бир кьрийә кӧ кʹока ԝан жь пʹутпʹарьстийе тен. Ле занәбуна ԝан дәрһәԛа Хԝәде у нета ԝи бь рʹасти һьндьк ә. Ле йед кӧ тен щьвинед мә һин дьбьн кӧ Йаһоԝа жь мә чь дьхԝазә у әм чаԝа дькарьн ль гора хԝәстьна ԝи бьжин. Одед мә паԛьж у хԝәшьк ьн, ле гәләк бәрбьчʹәʹв ниньн. Йед кӧ щьватеда рʹебәрийе дькьн кʹьнщед мәхсус ль хԝә накьн у бь сәрнавед мәхсус надьнә сәр хԝә. Һʹиме баԝәрийа мә Кʹьтеба Пироз ә. Диса жи, гәләк кәс дькʹәвьн шьке, чьмки әԝана дьфькьрьн кӧ һʹәбандьна мә гәләк бәрбьчʹәʹв нинә, у тьштед кӧ әм һин дькьн ль гора дьле ԝан ниньн.

12. Ча әм ль Ибрани 11:1, 6 дьхуньн, гәрәке баԝәрийа мә ль сәр чь ава бә?

¹² Сәва кӧ әм нәлькʹӧмьн, гәрәке әм чь бькьн? Паԝлосе шанди шагьртед Иса йед Рʹомайирʹа ӧса гот: «Баԝәри жь бьһистьне те у бьһистьн жи жь готьнед бона Мәсиһ» (Рʹомайи 10:17). Гәләк әʹйд-ԛәйдед религи ль мәрьва хԝәш тен, ле бь рʹасти әԝана нә ль гора Кʹьтеба Пироз ьн. Гәләк фәрз ә кӧ әм баԝәрийа хԝә, нә кӧ бь әʹйд-ԛәйдед пʹутпʹарьст, ле бь леколина Ньвисаред Пироз ава бькьн. Лазьм ә кӧ баԝәрийа мә ль сәр занәбуна рʹаст ава бә, чьмки «бе баԝәри тʹӧ щар набә кӧ инсан ль Хԝәде хԝәш бе» (Ибрани 11:1, 6 бьхунә). Мәрʹа нәлазьм ә кӧ кʹәрәмәтәки жь әʹзмен бьвиньн, ԝәки фәʹм бькьн һәла әм ль сәр рʹийа рʹаст ьн йан на. Готьнед Кʹьтеба Пироз баԝәрийа мә дьһа ԛәԝи дькьн у мә дьдьнә баԝәркьрьне кӧ мә рʹасти дитийә.

13. Гәләк кәса чьрʹа Иса Мәсиһ ԛәбул нәдькьр?

¹³ Ль рʹожед Иса Мәсиһ, шагьртед Йуһʹәннайе Ньхӧмдар әʹщебмайи дьман, чьмки шагьртед Иса Мәсиһ рʹожи нәдьгьртьн. Иса ԝанрʹа гот кӧ һʹәта әԝ сах ә, нәлазьм ә кӧ әԝана рʹожийе бьгьрьн (Мәтта 9:14-17). Ферьси у дьжмьнед дьн йед Иса, ԝи нәһәԛ  дькьрьн чьмки әԝи әʹрф-әʹдәтед ԝан нәдьанин сери. Ԝәхта кӧ Иса Мәсиһ кәсед нәхԝәш ль рʹожа Шәмийе ԛәнщ дькьрьн, әԝана һерс дькʹәтьн (Марԛос 3:1-6; Йуһʹәнна 9:16). Жь алийикива, Щьһуйа дьгот кӧ әԝана ԛәдре рʹожа Шәмийе дьгьрьн, ле жь алийе дьнва, ԝана пʹарьстгәһеда арш-верши дькьрьн, у гава Иса сәва ве йәке ԝана сущдар кьр, әԝана гәләк һерс кʹәтьн (Мәтта 21:12, 13, 15). Щарәке жи, гава Иса Мәсиһ ль кʹьништа Ньсрәте бәʹса һьнә мәсәлед жь тʹәрихе кьр у ӧса жи хԝәһʹьзи у бебаԝәрийа ԝана әшкәрә кьр, һерса ԝан рʹабу (Луԛа 4:16, 25-30). Гәләк кәс сәр готьн у кьрьнед ԝи дьлькʹӧмин, чьмки әв ль гора дьле ԝан нибун (Мәтта 11:16-19).

14. Иса Мәсиһ һьнә әʹрф-әʹдәт чьма инкʹар дькьрьн?

¹⁴ Ньвисаред Пироз чь дьбежьн? Йаһоԝа бь сайа Ишайа пʹехәмбәр ӧса готьбу: «Әв гәл бь дәве хԝә незики мьн дьбә у бь левед хԝә мьн бьрумәт дькә ле дьле ԝан жь мьн дур ә. Тьрса ԝан йа жь мьн жи, тʹәне әʹмред мәрьва ьн кӧ жь ԝан һин бунә» (Ишайа 29:13). Иса Мәсиһ әʹрф-әʹдәтед кӧ мьԛабьли Ньвисаред Пироз бун, инкʹар дькьрьн. Ле мәрьвед кӧ жь Ньвисаред Пироз зедәтьр ԛәйд-әʹдәтед хԝә ԛимәт дькьрьн, һьм Йаһоԝа һьм жи Мәсиһ инкʹар дькьрьн.

15. Гәләк кәс чьрʹа Шәʹдед Йаһоԝа һʹьз накьн?

¹⁵ Гәло әв проблем иро жи һәйә? Бәле. Гәләк кәс дьхәйидьн, чьмки Шәʹдед Йаһоԝа рʹожед мәхсус у щәжнед ӧса ча рʹожа буйине йан Сәре Сале тʹәви ԝан дәрбаз накьн. Һьнә кәс жи һерс дькʹәвьн, чьмки Шәʹдед Йаһоԝа щәжнед мьләтийе дәрбаз накьн, ӧса жи әʹйдед мьрийа у әʹдәтед чʹәлкьрьне накьн, йед кӧ мьԛабьли Хәбәра Хԝәде нә. Мәрьвед кӧ сәва ван тьшта әʹщьз дьбьн дьбәкә жь дьл баԝәр ьн кӧ әԝ бь щурʹе рʹаст Хԝәде дьһʹәбиньн. Ле һʹәта кӧ әԝана әʹрф-әʹдәтед дьнйайе сәр готьнед Кʹьтеба Пирозрʹа бьгьрьн, Хԝәде ԝе жь ԝан рʹази нибә (Марԛос 7:7-9).

16. Ль гора Зәбур 119:97, 113, 163-165, гәрәке әм чь бькьн у чь нәкьн?

¹⁶ Сәва кӧ әм нәлькʹӧмьн, гәрәке әм чь бькьн? Гәрәке әм ԛанун у принсипед Йаһоԝа жь дьл һʹьз бькьн (Зәбур 119:97, 113, 163-165 бьхунә). Һәгәр әм Йаһоԝа һʹьз бькьн, әме әʹрф-әʹдәтед кӧ ль ԝи хԝәш найен, инкʹар бькьн. Әме изне нәдьн кӧ тьштәк достийа мә тʹәви Йаһоԝа хьраб кә.

17. Ль рʹожед Иса Мәсиһ, гәләк кәса әԝ чьрʹа ԛәбул нәкьр?

¹⁷ Ль рʹожед Иса Мәсиһ, һьнә кәс тʹәв ль политике дьбун, у ԝана дьхԝәст кӧ Мәсиһ ԝана жь бьндәстийа Рʹоме аза бькә. Ле гава ԝана дьхԝәст Иса бькьра пʹадше хԝә, әԝ ԛайил нәбу (Йуһʹәнна 6:14, 15). Жь алийе дьнва, дәԝләта Рʹоме ԛәԝат у һʹӧкӧм дабу дәсте сәрԝеред религи, йед кӧ дьтьрсийан ԝәки Иса ԝе система политики бьгӧһезә у һерса Рʹомайа гӧрʹ бькә, жь бо чь жи ԝана дькарьбу ԛәԝат у һʹӧкӧме хԝә ӧнда кьра. Сәва ван хәмед политики, гәләк Щьһуйа Иса Мәсиһ ԛәбул нәкьр.

18. Гәләк кәса дина хԝә нәдьда кʹижан рʹеза?

¹⁸ Ньвисаред Пироз чь дьбежьн? Рʹаст ә кӧ жь бәрева һатьбу готьн кӧ Мәсиһ ԝе бьбә Шәрванәки сәркʹәти, ле хенщи ве йәке, әшкәрә һатьбу готьн кӧ гәрәке Мәсиһ пешийе жь бо гӧнед мә бьмьрә (Ишайа 53:9, 12). Проблема  Щьһуйа чь бу? Ԝана дина хԝә нәдьда рʹезед кӧ дьбежьн ԝәки бона сафикьрьна проблемед дьнйайе ԝәхт лазьм ә (Йуһʹәнна 6:26, 27).

19. Гәләк кәс чьрʹа мә һʹьз накьн?

¹⁹ Гәло әв проблем иро жи һәйә? Бәле. Гәләк кәс мә һʹьз накьн, чьмки әм тʹәвнәбуйине хԝәй дькьн у нәкʹәвьнә нава шьхӧлед политики. Әԝана дьхԝазьн кӧ әм жи дь һьлбьжартьнед политикда пьштгьрийа партийәке йан сәрԝерәки бькьн. Ле әԝед кӧ инсана ча һʹӧкӧмдаред хԝә һьлдьбьжерьн бь рʹасти Йаһоԝа инкʹар дькьн (1 Самуйел 8:4-7). Ӧса жи, гәләк кәс дьфькьрьн кӧ гәрәке әм мәкʹтәб у нәхԝәшхана ава бькьн у тьштед дьнда али мәрьва бькьн. Әԝана фәʹм накьн кӧ әм чьрʹа тьштәки накьн кӧ проблемед дьнйайе сафи бькьн, ле һәри зедә дина хԝә дьдьн бәлакьрьна мьзгине.

20. Ль гора Мәтта 7:21-23, гәрәке әм һәр тьшти зедәтьр дина хԝә бьдьн чь?

²⁰ Сәва кӧ әм нәлькʹӧмьн, гәрәке әм чь бькьн? (Мәтта 7:21-23 бьхунә). Гәрәке әм жь һәр тьшти зедәтьр дина хԝә бьдьн шьхӧле кӧ Иса Мәсиһ тʹәсмили мә кьрийә (Мәтта 28:19, 20). Гәрәке әм изне нәдьнә хԝә кӧ бькʹәвьнә нава проблемед политики у сосйали. Әм һәмьки инсана һʹьз дькьн у бона ԝана хәм дькьн, ле әм заньн кӧ аликʹарийа һәри баш әв ә ԝәки әм ԝанрʹа бәʹса Пʹадшатийа Хԝәде бькьн у али ԝан бькьн кӧ әԝана бьбьн достед Йаһоԝа.

21. Сафикьрьна тә чь йә?

²¹ Ве готареда, мә дит кӧ ль ԛьрʹна йәке, гәләк кәса Иса Мәсиһ жь бо кʹижан чар сәбәба инкʹар дькьрьн. Иро жи, гәләк кәс жь бо ван чар сәбәба шагьртед Иса ԛәбул накьн. Готара дьнда, әме бьвиньн кӧ мәрьв бона кʹижан чар сәбәбед дьн жи дьлькʹӧмьн. Ԝе баш бә кӧ әм тʹӧ щар нәкʹәвьн шьке у нәлькʹӧмьн, ле бьбьн хԝәйе баԝәрикә ԛәԝи!