1-2. Гәләк хушк у бьра рʹасти чь щурʹә тәнгасийа тен?

ПАԜЛОСЕ ШАНДИ һәвале хԝә Тимотʹейо у һʹәму шагьртед Иса Мәсиһ һелан кьрьбун кӧ әԝана хьзмәта хԝә биньн сери (2 Тимотʹейо 4:5). Әм һьлбәт һазьр ьн кӧ ль гора ве ширәта Паԝлос бькьн. Диса жи, әв йәк щарна һеса нинә. Бона гәләк хушк у бьред мә, мерхасикә мәзьн лазьм ә кӧ мьзгине бәла бькьн (2 Тимотʹейо 4:2). Мәсәлә, ль һьнә ԝәлата, шьхӧле бәлакьрьна мьзгине ԛәдәхә йә. Гава хушк у бьред кӧ ль ван ԝәлата дьжин, мьзгине бәла дькьн, әԝана заньн кӧ әԝана дькарьн бькʹәвьн кәле.

² Гәләк тьшт дькарьн мерхасийа хьзмәткʹаред Йаһоԝа бьшкеньн. Мәсәлә, бона гәләка һеса нинә кӧ әʹбура мала хԝә бькьн. Әԝана гәләк дьхԝазьн хьзмәта хԝә зедә бькьн, ле ль хьлазийа һʹәфтийе ида ԛәԝата ԝан наминә. Һьнә хушк у бьред мә жи бь нәхԝәшийед кʹроник дьчәрчьрьн йан ида кал у пир бунә, у ләма, һьнә жь ԝан ида нькарьн жь мале дәркʹәвьн. Һьнә кәс жи хԝә беԛимәт һʹәсаб дькьн. Хушкәкә бь наве Мәрйәм *, йа кӧ ль Рʹожһьлата Навин дьжи, ӧса дьбежә: «Әз сәр хԝә дьхәбьтьм кӧ фькред негатиф жь сәре хԝә дәрхьм, у әв йәк мьн гәләк дьдә ԝәстандьне. Паше, әз хԝә сущдар дькьм, чьмки бона хьзмәте ԝәхт у ԛәԝата мьн наминә».

3. Ве готареда, әме чь бьвиньн?

³ Һʹале мә чь бә жи, Йаһоԝа дькарә ԛәԝате бьдә мә кӧ әм бькарьбьн ль һьмбәри тәнгасийед хԝә сәбьр бькьн у чьԛас жь дәсте мә те ԝирʹа хьзмәт бькьн. Пешийа кӧ әм бьвиньн кӧ Йаһоԝа чаԝа дькарә али мә бькә, ԝәрә әм бьвиньн кӧ әԝи чаԝа ԛәԝат дьда Паԝлос у Тимотʹейо кӧ әԝана хьзмәта хԝә ԝәʹде тәнгасийа биньн сери.

4. Паԝлосе шанди рʹасти чь щурʹә тәнгасийа дьһат?

⁴ Паԝлосе шанди рʹасти гәләк тәнгасийа дьһат. Илаһи гава әԝ дьһат ледане, ԝи дьданә бәр кәвьра у давитьн кәле, әԝ һьнге һʹәԝще ԛәԝате бу (2 Корьнтʹи 11:23-25). Паԝлос дьани сәр хԝә у вәнәдьшарт кӧ щарна әԝ һьмбәри фькред хԝәйә негатиф шәрʹ дькә (Рʹомайи 7:18, 19, 24). Ӧса жи, дь бәдәна ԝида «стьрийәк» һәбу, у әԝи гәләк щара рʹәща кьр кӧ Хԝәде ԝи жь ве еше хьлаз кә (2 Корьнтʹи 12:7, 8, ИМ).

5. Паԝлосе шанди ԝәʹде тәнгасийа чь шьхӧлед мәзьн дькьрьн?

⁵ Йаһоԝа ԛәԝат дьда Паԝлосе шанди, ԝәки әԝ бькарьбә хьзмәта хԝә ԝәʹде тәнгасийа бинә сери. Бинә бәр чʹәʹве хԝә кӧ Паԝлос шьхӧлед чьԛас мәзьн дькьрьн. Мәсәлә, гава әԝ ль Рʹоме ль мале гьрти бу, әԝи дәрһәԛа мьзгине бь дьл у щан гьли дькьр рʹебәред Щьһуйарʹа у дьбәкә жи сәрԝеред дәԝләтерʹа (Кʹаред Шандийа 28:17; Филипи 4:21, 22). Ӧса жи, әԝи дәрһәԛа мьзгине гәләк нобәдарарʹа у һʹәму кәсед кӧ дьһатьн тʹәсәлийа ԝи, гьли дькьр (Кʹаред Шандийа 28:30, 31; Филипи 1:13). Нәʹмед кӧ Паԝлосе шанди ль ԝе дәме бь рʹебәрийа Хԝәде ньвиси, иро жи гәләк керһати нә. Ӧса жи, мәсәла Паԝлос мерхаси дьда хушк у бьред ль Рʹоме, ԝәки «хәбәра Хԝәде бе хоф у тьрс бежьн» (Филипи 1:14). Бәле, һьнә синоред Паԝлос һәбун, ле әԝи чь жь дәсте ԝи дьһат, дькьр, у ахьрийеда, «чь кӧ һатә сәре [ԝи], әԝе һе кʹар да пешдачуйина Мьзгинийе» (Филипи 1:12).

6. Ль гора 2 Корьнтʹи 12:9, 10, чь али Паԝлосе шанди дькьр кӧ әԝ хьзмәта хԝә бинә сери?

⁶ Паԝлосе шанди заньбу кӧ гәрәке әԝ хьзмәта Йаһоԝа, нә бь ԛәԝата хԝә, ле бь ԛәԝата Хԝәде бинә сери. Әԝи ԛәбул кьр кӧ ԛәԝата Хԝәде «сьстийада мийасәр дьбә» (2 Корьнтʹи 12:9, 10 бьхунә). Бь сайа рʹӧһʹе пироз, Йаһоԝа ԛәԝат дьда Паԝлос, ԝәки әԝ бькарьбә хьзмәта хԝә ԝәʹде зерандьне, гьртьне у тәнгасийед дьн бинә сери.

7. Тимотʹейо хьзмәта хԝә нава чь щурʹә тәнгасийада дьани сери?

⁷ Һәвале Паԝлос Тимотʹейо жи һʹәԝще ԛәԝата Хԝәде бу кӧ хьзмәта хԝә бинә  сери. Тимотʹейо тʹәви Паԝлос дьчу щийед дур кӧ мьзгине бәла бькә. Ӧса жи, Паԝлос әԝ тʹәне дьшанд щийед дьн жи, ԝәки әԝ мерхасийе бьдә щьвата (1 Корьнтʹи 4:17). Тимотʹейо дьбәкә щарна дьфькьри кӧ әԝ һаԛас щерʹьбанди нинә кӧ бькарьбә ван тьшта бькә. Ле Паԝлосе шанди ԝирʹа ӧса гот: «Нәбә кӧ йәк щаһьлтийа тә беһӧрмәт кә» (1 Тимотʹейо 4:12). Сәрда, те кʹьфше кӧ бал Тимотʹейо жи «стьрийәк» һәбу, чьмки Кʹьтеба Пироз дьбежә кӧ әԝ гәләк щара нәхԝәш дькʹәт (1 Тимотʹейо 5:23). Ле Тимотʹейо заньбу кӧ бь сайа рʹӧһʹе пироз, Йаһоԝа ԝе ԛәԝате бьдә ԝи, ԝәки әԝ бькарьбә мьзгине бәла бькә у аликʹарийа хушк у бьра бькә (2 Тимотʹейо 1:7).

8. Йаһоԝа чаԝа ԛәԝате дьдә хьзмәткʹаред хԝә?

⁸ Иро жи, Йаһоԝа «зорайийа ԛәԝате» дьдә хьзмәткʹаред хԝә, ԝәки әԝана бькарьбьн ԝирʹа бь амьни хьзмәт бькьн (2 Корьнтʹи 4:7). Ньһа әме бьвиньн кӧ Йаһоԝа чаԝа бь сайа дӧа, Кʹьтеба Пироз, һәвалтийа хушк-бьра у хьзмәте ԛәԝате дьдә мә, ԝәки әм ԝирʹа амьн бьминьн.

9. Дӧа чаԝа дькарә али мә бькә?

⁹ Дӧа ԛәԝате дьдә мә. Ль Әфәси 6:18, Паԝлосе шанди готьбу кӧ бьра әм «һәр гав» дӧа бькьн, ԝәки Хԝәде ԛәԝате бьдә мә. Ԝәхта кӧ бьраки бь наве Щони, йе кӧ ль Боливйайе дьжи, рʹасти тәнгасийа һат, әԝи бь сайа дӧа дәсте Йаһоԝа дит. Һьм жьна ԝи һьм жи де у баве ԝи әʹйни ԝәхтда гьран нәхԝәш кʹәтьн. Щонирʹа гәләк чәтьн бу кӧ бона һʹәԝщед һәр сека хәм бькә. Паше, дийа ԝи мьр, у гәләк ԝәхт дәрбаз бу һʹәта кӧ жьн у баве ԝи ԛәнщ бун. Щони ӧса дьбежә: «Гава әз гәләк дьлтәнг дьбум, мьн Йаһоԝарʹа бәʹса дәрдед хԝә дькьр, у әԝ йәк гәләк али мьн дькьр». Йаһоԝа ԛәԝат дьда Щони, ԝәки әԝ бькарьбә сәбьр бькә. Рʹуспики бь наве Роналд, йе кӧ ль Боливйайе дьжи, бьһист кӧ дийа ԝи бь кансәре нәхԝәш кʹәт, у мәһәк шунда, әԝ мьр. Гәло чь али бьре мә дькьр кӧ әԝ бәр дәрдәки ӧса гьран сәбьр бькә? Әԝ ӧса дьбежә: «Гава әз Йаһоԝарʹа дӧа дькьм, әз дьле хԝә ԝирʹа вәдькьм. Әз баԝәр ьм кӧ әԝ жь һәр кәси баштьр мьн фәʹм дькә, у һәла һе жь мьн баштьр жи занә кӧ чь дьле мьнда нә». Щарна, әм дьбәкә ньзаньн кӧ дӧайед хԝәда чь бежьн. Ле чьԛас мәрʹа зор бә жи хәбәред рʹаст бьжберьн, Йаһоԝа дьхԝазә кӧ әм ԝирʹа дӧа бькьн (Рʹомайи 8:26, 27).

10. Ль гора Ибрани 4:12, чьма фәрз ә кӧ әм Кʹьтеба Пироз бьхуньн у ль сәр ԝе кʹур бьфькьрьн?

¹⁰ Кʹьтеба Пироз ԛәԝате дьдә мә. Чаԝа кӧ Паԝлосе шанди жь Ньвисаред Пироз ԛәԝат у дьлбини дьстанд, ԝе баш бә кӧ әм жи хԝә бьсперьн Кʹьтеба Пироз (Рʹомайи 15:4). Һәрге әм Кʹьтеба Пироз бьхуньн у ль сәр ԝе кʹур бьфькьрьн, Йаһоԝа дькарә бь сайа рʹӧһʹе пироз нишани мә бькә кӧ әм чаԝа дькарьн жь ве хԝәндьне кʹаре бьстиньн (Ибрани 4:12 бьхунә). Роналд ӧса дьбежә: «Һәр евар, әз пʹарәкә жь Кʹьтеба Пироз дьхуньм, у әз ль сәр һʹӧнӧред Йаһоԝа у ль сәр дьлованийа ԝи кʹур дьфькьрьм. Әв йәк ԛәԝате дьдә мьн».

11. Хушкәке чаԝа жь Кʹьтеба Пироз ԛәԝат станд?

¹¹ Гава әм ль сәр Хәбәра Хԝәде кʹур дьфькьрьн, әв йәк дькарә али мә бькә кӧ әм ньһерʹандьна хԝә рʹаст кьн. Мәсәлә, хушкәкә кӧ мере хԝә ӧнда кьрьбу жь Кʹьтеба Пироз дьлбиникә мәзьн станд. Рʹуспики ԝерʹа готьбу кӧ ԝе баш бә ԝәки әԝ кʹьтеба Ибо бьхунә, ләма әԝе дәстпекьр ве кʹьтебе бьхунә. Серида, әԝе Ибо сәва фькред ԝи йед шаш сущдар дькьр. Әԝе ча бежи дьхԝәст Иборʹа ӧса бьгота: «Ибо, ща һаԛас нәкʹәвә һʹәйра проблемед хԝә!» Ле паше, әԝе тедәрхьст кӧ фькред ԝе мина фькред Ибо бун. Ве йәке али ԝе кьр кӧ әԝ ньһерʹандьна хԝә рʹаст бькә у ԛәԝат да ԝе кӧ әԝ сәбьр бькә.

12. Йаһоԝа чаԝа бь аликʹарийа хушк у бьра ԛәԝате дьдә мә?

 ¹² Һәвалтийа тʹәви хушк-бьра ԛәԝате дьдә мә. Йаһоԝа бь сайа хушк у бьра жи ԛәԝате дьдә мә. Паԝлосе шанди гәләк ԛимәт дькьр бәрдьлийа кӧ жь хушк у бьра дьстанд (Рʹомайи 1:11, 12). Мина Паԝлос, хушка мә Мәрйәм жи һәвалтийа хушк у бьра гәләк дьшекьринә. Әԝ ӧса дьбежә: «Йаһоԝа бь сайа хушк у бьред кӧ дәрдед мьн ньзаньбун жи али мьн кьрийә. Готьнед ԝан йед хԝәш у смсед кӧ ԝана мьнрʹа дьшандьн ԛәԝат дьда мьн. Хенщи ве йәке, әз дьле хԝә хушкед кӧ мина мьн рʹасти тәнгасийа һатьнә вәдькьм у жь мәсәла ԝан кʹаре дьстиньм. Ӧса жи, рʹуспийед щьвате һәр тʹьм ԛәдре мьн дьгьрьн у һʹьзкьрьна хԝә мьнрʹа дьдьн кʹьфше».

13. Сәр щьвина, әм чаԝа дькарьн ԛәԝате бьдьн һәвдӧ?

¹³ Сәр щьвина, әм дькарьн һәвдӧ бьшьдиньн у гәш кьн. Гава әм ль щьвина тʹәви хушк у бьра хәбәр дьдьн, ԝе баш бә кӧ әм пе гьлийед хԝә нишан бькьн кӧ әм ԝана ԛимәт дькьн у ԝана һʹьз дькьн. Мәсәлә, рʹуспики бь наве Питер хушкәкерʹа, йа кӧ мере ԝе нә Шәʹде Йаһоԝа йә, ӧса гот: «Гава әм ԝә дьвиньн, дьле мә гәләк ша дьбә. Тӧ у шәш зарʹед тә, һун һәр гав тен щьвина у һазьр ьн кӧ щаба бьдьн». Чʹәʹвед хушка мә бь һесьра тʹьжи бу, у әԝе жь рʹазибуне ӧса ԝирʹа гот: «Тӧ ньзани кӧ готьнед тә дьле мьн чьԛас рʹьһʹәт кьр у чьԛас ԝәхтда бун!»

14. Хьзмәт чаԝа дькарә ль сәр мә һʹӧкӧм бькә?

¹⁴ Хьзмәт ԛәԝате дьдә мә. Гава әм кәсед дьнрʹа дәрһәԛа рʹастийед жь Кʹьтеба Пироз гьли дькьн, әԝана гӧһ дьдьнә мә йан на, йәкә шабуна мә ӧнда набә (Мәтʹәлок 11:25). Хушкәкә бь наве Стейси жь хьзмәте гәләк ԛәԝат дьстанд. Гава мәрьвәки ԝе жь щьвате һатә дәрхьстьн, әԝ гәләк хәмгин бу, у әԝе һәр тʹьм жь хԝә дьпьрси: «Гәло дьбәкә мьн гәрәке һе зедә али ԝи бькьра?» Әв фькьр жь сәре ԝе дәрнәдькʹәт. Ле хьзмәти али ԝе дькьр кӧ әԝ ԝан фькра жь һʹьше хԝә дәрхә. Чьԛас зедә әԝ дьчу хьзмәте, һаԛас әԝе дина хԝә дьда мәрьвед кӧ һʹәԝще аликʹарийа ԝе бун. Әԝ дьбежә: «Ԝе дәме, Йаһоԝа хԝәндәкʹарәк да мьн, йа кӧ жь алийе рʹӧһʹанива зу пешда дьчу. Әԝ йәк һелан да мьн у әз гәләк ԛәԝи кьрьм. Мьн һәри зедә жь хьзмәте ԛәԝат дьстанд».

15. Тӧ жь готьнед Мәрйәме чь һин дьби?

¹⁵ Һьнә кәс дьбәкә дьфькьрьн кӧ һʹале ԝан изне надә кӧ дьһа зедә хьзмәт бькьн. Һәгәр тӧ жи ӧса дьфькьри, бир нәкә кӧ һәгәр тӧ чь жь дәсте тә те бьки, Йаһоԝа ԝе жь тә рʹази бә. Сәрһатийа Мәрйәме диса бинә бәр чʹәʹве хԝә. Гава әԝ чу хәрибийе, әԝе зьмане ԝе дәре рʹьнд ньзаньбу у хԝә бекер тʹәхмин дькьр. Әԝ дьбежә: «Серида, мьн тʹәне дькарьбу щабед кьн бьдана, рʹезәк бьхԝәнда йан ль хьзмәте бәлавокәк пʹешкʹеш бәла кьра». Ләма, әԝ дьфькьри кӧ хьзмәта ԝе бадиһәԝа йә, чьмки әԝ зьмане ви щийи рʹьнд ньзанә.  Ле паше, әԝе ньһерʹандьна хԝә гӧһаст. Әԝе фәʹм кьр кӧ рʹастийа Кʹьтеба Пироз һаԛас һеса йә кӧ зьмане ԝе чьԛас шкәсти бә жи, әԝ дькарә ве рʹастийе бьгьһинә инсана, у әв рʹасти дькарә жийина ԝан бьгӧһезә.

16. Кәсед кӧ нькарьн жь мале дәркʹәвьн чаԝа дькарьн ԛәԝате бьстиньн?

¹⁶ Һәгәр әм нькарьн жь мале дәркʹәвьн жи, Йаһоԝа занә кӧ әм һазьр ьн кӧ мьзгине бәла кьн, у әԝ ԛимәт дькә ве хԝәстьна мә. Ләма, Хԝәде дькарә мәщала чекә кӧ әм мьзгине бьдьн кәсед кӧ тен мала мә. Сәва кӧ дьлтәнг нәбьн, гәрәке әм һʹале хԝәйи иро бәрамбәри һʹале хԝәйи бәре нәкьн. Ле һәгәр әм фәʹм бькьн кӧ Йаһоԝа ньһа чаԝа али мә дькә, әме ԛәԝате бьстиньн кӧ ль һьмбәри тәнгасийа бь шабуне сәбьр бькьн.

17. Ль гора Ԝаиз 11:6, һәгәр әм кʹара хьзмәта хԝә зу нәвиньн жи, гәрәке әм чьрʹа хьзмәта хԝә нәдьн сәкьнандьне?

¹⁷ Әм ньзаньн кӧ жь тʹохьмед кӧ әм дьчиньн, кʹижане ԝе кʹок бәрʹдә у мәзьн бьбә (Ԝаиз 11:6 бьхунә). Мәсәлә, хушкәкә бь наве Барбара, йа кӧ ԝәкә 80 сали йә, бәрдәԝам дькә бь тʹеле у нәʹма хьзмәт дькә. Щарәке, әԝе журналәк тʹәви нәʹмәке шанд сәр адресәке. Журналеда, готарәк бь наве «Хԝәде Бона Тә Чь Кьрийә?» һәбу («Бьрща Ԛәрәԝьлийе», 1 Адаре 2014). Әԝе ньзаньбу кӧ әв нәʹмә гьһишт жьн у мерәки кӧ 27 сал пешда жь щьвате һатьбун дәрхьстьн. Ԝана әв готар чәнд щара хԝәнд. Мер ӧса тʹәхмин кьр те бежи Йаһоԝа рʹастә-рʹаст тʹәви ԝи хәбәр дьда. Ве йәке әԝана һелан кьрьн кӧ диса һәрʹьн щьвина, у ԝәʹдә шунда, әԝана диса бунә Шәʹдед Йаһоԝа. Бьдьнә бәр чʹәʹве хԝә кӧ Барбара чьԛас дьлша бу кӧ нәʹма ԝе кʹарәкә һаԛас мәзьн ани!

18. Әм чаԝа дькарьн жь Хԝәде ԛәԝате бьстиньн?

¹⁸ Йаһоԝа бь гәләк щурʹә ԛәԝате дьдә мә. Гава әм аликʹарийа ԝи ԛәбул дькьн, йа кӧ әԝ бь сайа дӧа, Кʹьтеба Пироз, һәвалтийа хушк у бьра у хьзмәте дьдә мә, әм нишан дькьн кӧ әм баԝәр ьн, ԝәки Йаһоԝа дькарә у дьхԝазә пьштгьрийа мә бькә. Бьра әм хԝә һәр тʹьм бьсперьн Баве хԝәйи әʹзмани, йе кӧ һазьр ә ԝәки ԛәԝата хԝә бона кʹара хьзмәткʹаред хԝә йед амьн бьдә хәбате (2 Дирок 16:9).