1-2. Ньвискʹарәки чь гот, у ве готареда, әме чь леколин бькьн?

ИРО бь милйона инсан дьбежьн кӧ әԝана баԝәрийа хԝә Иса Мәсиһ тиньн, ле бь рʹасти әԝана һинкьрьнед ԝи ԛәбул накьн (2 Тимотʹейо 4:3, 4). Ньвискʹарәки фькра хԝә ӧса гот: «Һәгәр иро ‹Исаки ну› һәбуйа, йе кӧ ча Исайе бәре хәбәр да . . . гәло мәйе жи мина мәрьвед кӧ 2 000 сал бәре ԝи ԛәбул нәкьрьбун, әԝ ԛәбул нәкьра? . . . Щаб ӧса йә: Әре, мәйе жи әԝ ԛәбул нәкьра».

² Ԛьрʹна йәкеда, гәләк кәса готьнед Иса Мәсиһ дьбьһистьн у кʹәрәмәтед ԝи дьдитьн, ле ԝана баԝәрийа хԝә бь ԝи нәдьани. Гәло чьма? Готара пешийа веда мә дина хԝә дабу чар сәбәба кӧ мәрьв сәва готьн у кьрьнед Иса Мәсиһ чьма дькʹәтьн шьке. Ньһа әме ль чар сәбәбед дьн бьньһерʹьн у бьвиньн кӧ иро гәләк кәс чьма шагьртед Иса Мәсиһ ԛәбул накьн. Ӧса жи, әме бьвиньн кӧ гәрәке әм чь бькьн ԝәки тʹӧ тьшт мә жь Йаһоԝа дур нәхә.

3. Һьнә мәрьва жь бо чь Иса ԛәбул нәдькьрьн?

³ Гава Иса Мәсиһ ль дьнйайе дьжит, әԝи тʹәви щурʹә-щурʹә мәрьва һәвалти дькьр. Рʹаст ә, әԝи тʹәви кәсед дәԝләмәнд у нав у дәнг хԝарьн дьхԝар, ле әԝи тʹәви кәсед кʹәсиб у бәләнгаз жи гәләк ԝәхт дәрбаз дькьр. Сәрда жи, дьле ԝи сәр кәсед кӧ жь алийе хәлԛева ча «гӧнәкʹар» дьһатьн дитьн, дьшәԝьти. Һьнә кәсед ԛӧрʹә бь кьрьнед Иса Мәсиһ нә рʹази бун. Ԝана жь шагьртед ԝи ӧса пьрси: «Чьма һун тʹәви хәрщгьр у гӧнәкʹара дьхԝьн у вәдьхԝьн?» Иса Мәсиһ ӧса щаб да: «Сахләм нә һʹәԝще  һʹәким ьн, ле нәхԝәш. Әз нәһатьмә гази йед рʹаст кьм, ле гази гӧнәкʹара бона тʹобәйийе» (Луԛа 5:29-32).

4. Ль гора готьнед Ишайа пʹехәмбәр, гәрәке Щьһуйа дәрһәԛа Мәсиһ чь бьзаньбуна?

⁴ Ньвисаред Пироз чь дьбежьн? Чәнд сәдсал пешийа һатьна Мәсиһ, Ишайа пʹехәмбәр готьбу кӧ дьнйа ԝе Мәсиһ ԛәбул нәкә. Әԝи дәрһәԛа Мәсиһ ӧса ньвисибу: «Жь алийе мәрьвава әԝ һат кемкьрьн у рʹәдкьрьн. . . . Ԝәки зьламе кӧ мәрьв рʹуйе хԝә же вәдьшерьн, әԝ һат кемкьрьн. Мә ԛәдьр нәда ԝи» (Ишайа 53:3, ИМ). Ль гора готьнед ве рʹезе, гәрәке Щьһуйед ль ԛьрʹна йәке бьзаньбуна кӧ Мәсиһ ԝе бьһата рʹәдкьрьн.

5. Гәләк кәс шагьртед Иса Мәсиһ чаԝа дьбиньн?

⁵ Гәло әв проблем иро жи һәйә? Бәле. Гәләк сәрԝеред религи фьрнаԛ дьбьн, гава кәсед дәԝләмәнд, навдар у йед кӧ жь алийе дьнйайева ча кәсед билан тен дитьн, дьбьнә әндәмед щьватед ԝан. Бона ԝан, ԛәт фьрԛи тʹӧнә кӧ жийина ван әндәмед тʹәзә ль гора принсипед Хԝәде йә йан на. Хенщи ве йәке, сәрԝеред религи хьзмәткʹаред Йаһоԝа йед хирәт, кӧ хԝә ль принсипед намусийе дьгьрьн, бәр тьштәки һʹәсаб накьн, чьмки әԝана бәр чʹәʹве дьнйайе кәсед навдар ниньн. Ле ча Паԝлосе шанди готьбу, Хԝәде кәсед кӧ жь алийе дьнйайева «йед нә тʹӧ тьшт» ьн, хԝәрʹа дьжберә (1 Корьнтʹи 1:26-29). Бәле, Йаһоԝа һʹәму хьзмәткʹаред хԝә йед амьн ԛимәт дькә.

6. Ль гора Мәтта 11:25, 26, Иса Мәсиһ чь готьбу, у әм чаԝа дькарьн чʹәʹв бьдьнә ԝи?

⁶ Сәва кӧ әм нәлькʹӧмьн, гәрәке әм чь бькьн? (Мәтта 11:25, 26 бьхунә). Бьра ньһерʹандьна дьнйайе йа ль сәр хьзмәткʹаред Хԝәде сәр тә һʹӧкӧм нәкә. Бир нәкә кӧ Йаһоԝа тʹәне мәрьвед мьлук ча хьзмәткʹаред хԝә ԛәбул дькә (Зәбур 138:6). Сәрда жи, бьфькьрә кӧ Йаһоԝа бь дәсте кәсед кӧ дьнйа нәзан у нәхԝәнди дьвинә, шьхӧлед чьԛас мәзьн дькә!

7. Иса Ферьсийарʹа чьрʹа дьгот «дӧрʹу», у ԝана ча хԝә да кʹьфше?

⁷ Иса Мәсиһ дӧрʹутийа сәрԝеред религи бь мерхаси әшкәрә дькьр у ԝана сущдар дькьр. Мәсәлә, әԝи дӧрʹутийа Ферьсийа әшкәрә дькьр, йед кӧ ԛәдре де у баве хԝә нәдьгьртьн, ле дькʹәтьн пәй тьштед бьчʹук, мәсәлә әʹдәтед дәстшуштьне (Мәтта 15:1-11). Шагьртед Иса сәва готьнед ԝи әʹщебмайи ман у жь ԝи пьрсин: «Тӧ зани гава ферьсийа әв хәбәр бьһист, дьле ԝан ма?» Иса Мәсиһ ӧса щаб да: «Һәр дара кӧ Баве мьни Әʹзмана данәчʹькандийә, ԝе жь кʹокева бе рʹакьрьне. Жь ԝан вәгәрʹьн! Әԝә кор ьн у рʹебәре кора нә. Һәгәр кор рʹебәрийе кора бькә, һәр дӧйе жи бькʹәвьнә чʹәʹле» (Мәтта 15:12-14). Бәле, Иса Мәсиһ изьн нәдьда кӧ ньһерʹандьна нәрʹаст йа сәрԝеред религи рʹийа ԝи бьгьрә у бьбә сәбәб кӧ әԝ рʹастийе нәбежә.

8. Иса чаԝа зәлал кьр кӧ Хԝәде һʹәму религийа у баԝәрийа ԛәбул накә?

⁸ Ӧса жи, Иса Мәсиһ һинкьрьнед ԛәлп әшкәрә дькьрьн. Әԝи нәгот кӧ Хԝәде һʹәму баԝәрийа ԛәбул дькә, ле әԝи гот: «Гәләки тәнг ә әԝ дәри у зәʹмәт ә әԝ рʹийа кӧ дьбә бәрбь жийине у һьндьк ьн әԝед кӧ ԝе рʹейе дьбиньн» (Мәтта 7:13, 14). Ӧса жи, әԝи әшкәрә кьр кӧ һьнә кәсед кӧ ча хьзмәткʹаред Хԝәде хԝә дьдьнә кʹьфше бь рʹасти хԝәстьна Хԝәде найньн сери. Иса ӧса гот: «Һʹәвза хԝә жь пʹехәмбәред дәрәԝ бькьн. Әԝе бь пʹосте пез бенә щәм ԝә, ле һьндӧрʹва гӧред  пʹәрʹани нә. Һуне ԝана жь бәред ԝан нас бькьн» (Мәтта 7:15-20).

9. Һьнә һинкьрьнед ԛәлп, йед кӧ Иса Мәсиһ әшкәрә дькьрьн, чь бун?

⁹ Ньвисаред Пироз чь дьбежьн? Кʹьтеба Пироз пʹехәмбәрти кьрьбу кӧ Мәсиһ ԝе һьндава мала Йаһоԝа гәләк бьхирәт бә (Зәбур 69:9; Йуһʹәнна 2:14-17). Бь сайа ве хирәте, Иса Мәсиһ әʹдәт у баԝәрийед ԛәлп әшкәрә дькьрьн. Мәсәлә, Ферьсийа баԝәр дькьр кӧ рʹӧһʹ намьрә. Ле Иса Мәсиһ һин дькьр кӧ йед мьри хәԝеда ньн (Йуһʹәнна 11:11). Садуԛийа рʹабуна мьрийа инкʹар дькьр, ле Иса досте хԝә Лазар жь мьрьне рʹакьр (Йуһʹәнна 11:43, 44; Кʹаред Шандийа 23:8). Ферьсийа баԝәр дькьр кӧ һәр тьшт жь Хԝәде у жь фәләке йә, ле Иса Мәсиһ һин дькьр кӧ мәрьв дькарә хԝәха бьжберә кӧ Хԝәдерʹа хьзмәт бькә йан на (Мәтта 11:28).

10. Гәләк кәс чьма сәва һинкьрьнед Шәʹдед Йаһоԝа дьлькʹӧмьн?

¹⁰ Гәло әв проблем иро жи һәйә? Бәле. Гәләк мәрьв әʹщьз дьбьн у дьлькʹӧмьн, чьмки әм ԛәлпийа һинкьрьнед религийед майин әшкәрә дькьн. Сәрԝеред религи әндәмед хԝәрʹа дьбежьн кӧ Хԝәде кәсед хьраб давежә щәʹньме. Бь ве һинкьрьне, әԝана инсана бьн дәсте хԝәда дьгьрьн. Ле бәле, Шәʹдед Йаһоԝа әшкәрә дькьн кӧ әв йәк дәрәԝ ә, чьмки Хԝәде һʹьзкьрьн ә. Ӧса жи, сәрԝеред религи дьбежьн кӧ рʹӧһʹ намьрә, ле Шәʹдед Йаһоԝа избат дькьн кӧ әв фькьр жь пʹутпʹарьстийе те. Бәʹса хәбәре, һәгәр әв фькьр рʹаст буйа, рʹабуна мьрийа ԝе пʹучʹ буйа. Хенщи ве йәке, гәләк религийа һин дькьн кӧ һәр тьшт бьн контрола фәләкеда йә, ле Шәʹдед Йаһоԝа дьбежьн кӧ инсан хԝәйе азайа бьжартьне йә у дькарә бь хԝәстьна дьле хԝә Хԝәдерʹа хьзмәт бькә. Гава Шәʹдед Йаһоԝа дәрәԝа әшкәрә дькьн, гәло реаксийа сәрԝеред религи чаԝа йә? Әԝана гәләк һерс дькʹәвьн!

11. Ль гора Йуһʹәнна 8:45-47, Хԝәде жь хьзмәткʹаред хԝә чь дәʹԝа дькә?

¹¹ Сәва кӧ әм нәлькʹӧмьн, гәрәке әм чь  бькьн? Һәгәр әм дьбежьн кӧ әм рʹастийе һʹьз дькьн, гәрәке әм готьнед Хԝәде ԛәбул бькьн (Йуһʹәнна 8:45-47 бьхунә). Әм мина Шәйтʹан ниньн, йе кӧ хԝә рʹастийе нәгьрт. Чь жи бьбә, әм хԝә ль рʹастийе дьгьрьн у һәр тʹьм ль гора баԝәрийа хԝә дьжин (Йуһʹәнна 8:44). Хԝәде дьхԝазә кӧ хьзмәткʹаред ԝи мина Иса хьрабийе нәфрʹәт бькьн у «хԝә ль ԛәнщийе бьгьрьн» (Рʹомайи 12:9; Ибрани 1:9).

12. Әв йәк кӧ Иса Мәсиһ чаԝа һат кӧштьн, бона гәләк Щьһуйа чьрʹа бу мәʹни кӧ бьлькʹӧмьн?

¹² Гәло гәләк Щьһуйа диса жь бо кʹижан сәбәбе Иса ԛәбул нәдькьрьн? Паԝлосе шанди зәлал кьр ԝәки әв йәк кӧ Иса Мәсиһ ль сәр стуна щәфайе һат кӧштьн, Щьһуйарʹа бу мәʹни кӧ бьлькʹӧмьн (1 Корьнтʹи 1:23). Гәло чьрʹа? Чьмки Иса Мәсиһ ль сәр стуне һат мьхкьрьн, бона ԝан әԝ нә кӧ ча Мәсиһ, ле ча ԛачах у гӧнәкʹарәк һатә кʹьфше (Ԛануна Дӧщари 21:22, 23).

13. Кәсед кӧ Иса Мәсиһ инкʹар дькьрьн, чь фәʹм нәдькьрьн?

¹³ Щьһуйед кӧ Иса Мәсиһ инкʹар дькьрьн, фәʹм нәдькьрьн кӧ әԝ бесущ ә. Иса бь нәһәԛи һат диԝанкьрьн. Диԝана бьльнд йа Щьһуйа бь ләз ль һәв тʹоп бун, у диԝанкьрьна Иса Мәсиһ бь щурʹәки нәԛануни һат дәрбаз кьрьн (Луԛа 22:54; Йуһʹәнна 18:24). Бь рʹасти дәԝса кӧ һʹакьма дина хԝә бьдана избаткьрьна у бь һәԛи диԝана Иса бькьрана, ԝана «ль шәʹдәтикә мьԛабьли Иса дьгәрʹийан, ԝәки ԝи бькӧжьн». Бәле, кьрьнед ԝан бь тʹәмами мьԛабьли ԛануне бун (Мәтта 26:59; Марԛос 14:55-64). Ӧса жи, паши кӧ Иса Мәсиһ жь мьрьне рʹабу, ван һʹакьмед хьраб «гәләк пʹәрә» данә нобәдаред Рʹомайи, йед кӧ ль бәр тʹьрба ԝи сәкьнибун, ԝәки әԝана дәрәԝәке бәла бькьн кӧ тʹьрбә чьма вала бу (Мәтта 28:11-15).

14. Ньвисаред Пироз жь бәрева дәрһәԛа мьрьна Мәсиһ чь пʹехәмбәрти кьрьбу?

¹⁴ Ньвисаред Пироз чь дьбежьн? Ль рʹожед Иса Мәсиһ, гәләк Щьһуйа фәʹм нәдькьрьн кӧ гәрәке Мәсиһ бьмьрә. Ле  Ньвисаред Пироз жь бәрева дәрһәԛа Мәсиһ пʹехәмбәрти кьрьбу: «Жь бәр кӧ щане хԝә мьрьнерʹа рʹьжанд у бь гӧнәкʹарарʹа һатә һʹәсьбандьн; суще гәләка ԝи кʹьшанд у бона гӧнәкʹара лава кьр» (Ишайа 53:12). Ләма, гава Иса Мәсиһ ча гӧнәкʹар һатә кӧштьн, әв йәк гәрәке Щьһуйарʹа нәбуйа лькʹӧмандьн.

15. Һьнә кәс сәва кʹижан дәрәԝа дәрһәԛа Шәʹдед Йаһоԝа дьлькʹӧмьн?

¹⁵ Гәло әв проблем иро жи һәйә? Бәле! Иса Мәсиһ бь нәһәԛи һатьбу диԝанкьрьн, у мина ԝи, Шәʹдед Йаһоԝа жи рʹасти нәһәԛийе тен. Мәсәлә, жь сала 1930 һʹәта сала 1950, Шәʹдед Йаһоԝа ль Америкайе гәләк щара мәщбур бун кӧ бьчуна диԝане сәва азайа һʹәбандьне бьстиньн. Һьнә һʹакьм рʹастә-рʹаст мьԛабьли Шәʹда бун. Ль Кԝебеке (Канада), дер у дәԝләте мьԛабьли мә һәвкʹари дькьрьн. Ԝана гәләк мьзгинван авитьн кәле, чьмки ԝана кәсед дьнрʹа дәрһәԛа Пʹадшатийа Хԝәде гьли дькьр. Ԝәʹде Натсиста, гәләк бьред щаһьл сәва баԝәрийа хԝә жь алийе дәԝләта Алманйайева һатьн кӧштьн. Ньһа жи, гәләк хушк-бьред ль Русйайе тен диԝанкьрьне у дькʹәвьнә кәле, чьмки әԝана мәрьварʹа мьзгина жь Кʹьтеба Пироз бәла дькьн, у мәрьвед дәԝләте әв шьхӧле мә ча «шьхӧле екстремиста» нав дькьн. Сәрда жи, «Ԝәлгәрʹандьна Дьнйа Тʹәзә» сәр зьмане Руси һатийә ԛәдәхәкьрьне у ча «әʹдәбйәта екстремист» һатә һʹәсабе, чьмки теда наве Йаһоԝа һәйә.

16. Ль гора 2 Пәтрус 2:1, гәрәке әм чьма һʹьшйар бьминьн?

¹⁶ Сәва кӧ әм нәлькʹӧмьн, гәрәке әм чь бькьн? Пебьһʹәсә кӧ бь рʹасти чь ԛәԝьмийә. Иса Мәсиһ гӧһдаред хԝәрʹа готьбу кӧ мәрьв ԝе «һәр щурʹә бӧхдан» бавежьнә ԝан (Мәтта 5:11). Канийа ван дәрәԝа, Шәйтʹан ә. Әԝ ль сәр дьжмьна һʹӧкӧм дькә, ԝәки әԝана бӧхдана бавежьн сәр хьзмәткʹаред Йаһоԝа (Әʹйанти 12:9, 10). Гәрәке әм дәрәԝед ӧса рʹәд бькьн у тʹӧ щара изне нәдьн кӧ әԝ мә бьтьрсиньн йан баԝәрийа мә сьст бькьн (2 Пәтрус 2:1 бьхунә).

17. Һьнә кәс бәлки чьма сәва ԛәԝьмандьнед пешийа мьрьна Иса Мәсиһ лькʹӧмин?

¹⁷ Шандики Иса нәмамийа ԝи кьр у пьшта хԝә да ԝи. Шандики дьн жи се щара Иса инкʹар кьр, у ль шәва пешийа мьрьна ԝи, һʹәму шандийа әԝ һиштьн (Мәтта 26:14-16, 47, 56, 75). Иса Мәсиһ әʹщебмайи нәʹма, чьмки әԝи жь бәрева заньбу кӧ әв йәк ԝе бьԛәԝьмә (Йуһʹәнна 6:64; 13:21, 26, 38; 16:32). Ле һьнә кәс дьбәкә лькʹӧмин у фькьрин: «Һәгәр шандийед Иса Мәсиһ мәрьвед ӧса ньн, әз нахԝазьм нав ԝанда бьм!»

18. Ль дәма мьрьна Иса Мәсиһ, кʹижан пʹехәмбәртийед жь Ньвисаред Пироз һатьнә сери?

¹⁸ Ньвисаред Пироз чь дьбежьн? Йаһоԝа чәнд сәдсал бәре бь сайа Хәбәра хԝә әʹйан кьрьбу кӧ Мәсиһ ԝе бь 30 зиви бе дайин дәсте хьраба (Зәкәрийа 11:12, 13). Жь бәрева һатьбу готьн кӧ йәк жь достед Иса ԝе нәмамийа ԝи бькә (Зәбур 41:9). Зәкәрийа пʹехәмбәр ӧса ньвисибу: «Ль шьван бьхә кӧ, бьра миһ бәла бьбьн» (Зәкәрийа 13:7). Гава әв пʹехәмбәртийед жь Ньвисаред Пироз һатьнә сери, мәрьвед дьлсах нәкʹәтьн шьке у нәлькʹӧмин, ле баԝәрийа ԝан дьһа ԛәԝи бу.

19. Кәсед дьлпʹак чь заньн?

¹⁹ Гәло әв проблем иро жи һәйә? Бәле. Ль рʹожед мә, һьнә Шәʹдед Йаһоԝа кӧ гәләка ԝана нас дькьр, рʹийа рʹастийе  дәркʹәтьнә, бунә рʹабәр у паше хԝәстьнә кӧ кәсед дьн жи жь рʹийа рʹастийе дәрхьн. Ԝана хәбәред ниврʹаст у дәрәԝед дәрһәԛа Шәʹдед Йаһоԝа рʹожнәʹмә, телевизйон у интернетеда бәла кьрьнә. Ле кәсед дьлпʹак накʹәвьн шьке у налькʹӧмьн. Әԝана рʹьнд заньн кӧ Кʹьтеба Пироз пешда готьбу кӧ тьштед ӧса ԝе бьԛәԝьмьн (Мәтта 24:24; 2 Пәтрус 2:18-22).

20. Сәва кӧ әм нәкʹәвьн бәр байе кәсед кӧ жь рʹийа рʹастийе дәркʹәтьнә, гәрәке әм чь бькьн? (2 Тимотʹейо 4:4, 5)

²⁰ Сәва кӧ әм нәлькʹӧмьн, гәрәке әм чь бькьн? Сәва кӧ баԝәрийа мә ԛәԝи бә, гәрәке әм бәрдәԝам Кʹьтеба Пироз леколин бькьн, дӧа бькьн у шьхӧле кӧ Йаһоԝа дайә мә, бь дьл у щан бькьн (2 Тимотʹейо 4:4, 5 бьхунә). Һәгәр баԝәрийа мә ԛәԝи бә, әме сәва әʹламәтийед хьраб тʹәвльһәв нәбьн (Ишайа 28:16). Әм Йаһоԝа, Хәбәра ԝи у хушк-бьра һʹьз дькьн, ләма жи әме нәкʹәвьн бәр байе кәсед кӧ жь рʹийа рʹастийе дәркʹәтьнә.

21. Һәгәр пʹьрʹанийа мәрьва мьзгине ԛәбул накьн жи, әм чьда баԝәр ьн?

²¹ Ԛьрʹна йәкеда, гәләк кәс лькʹӧмин, у ԝана Иса Мәсиһ ԛәбул нәкьрьн. Жь алийе дьнда, гәләк кәсед дьн Иса ча Мәсиһе создайи ԛәбул кьрьн. Дь нав ԝанда, гәләк кʹаһин бун у һәри кем әндәмәки щьвина гьрәгьра жи һәбу (Кʹаред Шандийа 6:7; Мәтта 27:57-60; Марԛос 15:43). Иро жи, бь милйона кәс накʹәвьн шьке у налькʹӧмьн. Гәло чьма? Чьмки әԝана рʹастийа Кʹьтеба Пироз заньн у ве рʹастийе һʹьз дькьн. Хәбәра Хԝәде ӧса дьбежә: «Әԝед хԝәйе һинкьрьна Тә нә, жь рʹе накʹәвьн, әʹдьлайеда нә» (Зәбур 119:165).