1. Иса шагьртед хԝәрʹа мәсәләкә чаԝа һишт, у паши мьрьна ԝи, ԝана чь кьр? (Бьньһерʹә шькле рʹуйе журнале.)

ИСА МӘСИҺ хьзмәта хԝә һәр тʹьм бь шабуне дьани сери, у әԝи дьхԝәст кӧ шагьртед ԝи жи бь шабуне хьзмәт бькьн (Йуһʹәнна 4:35, 36). Һʹәта кӧ Иса Мәсиһ ль щәм ԝан бу, ԝана мьзгин бь шабун у бь хирәт бәла дькьрьн (Луԛа 10:1, 5-11, 17). Ле паши кӧ Иса Мәсиһ һат кӧштьн, ԝана ԝәхтәке хирәта хԝә ӧнда кьр (Йуһʹәнна 16:32). Паше, гава Иса Мәсиһ жь мьрьне һат рʹакьрьн, әԝи ԝанрʹа гот кӧ гәрәке әԝана мьзгине бәла бькьн. Ләма шагьртед Иса Мәсиһ диса дәстпекьрьн бь хирәт мьзгине бәла кьн. Паши кӧ Иса чу әʹзмана, шагьртед ԝи дь ише бәлакьрьна мьзгинеда һаԛас бьхирәт бун кӧ дьжмьна готьнә ԝан: «Һәла дина хԝә бьдьне ԝә Оршәлим бь һинкьрьна хԝәва тʹьжи кьрийә» (Кʹаред Шандийа 5:28).

2. Йаһоԝа шьхӧле бәлакьрьна мьзгине чаԝа кʹәрәм кьрийә?

² Ԛьрʹна йәкеда, Иса Мәсиһ рʹебәрийа шьхӧле бәлакьрьна мьзгине дькьр, у Йаһоԝа әв шьхӧл кʹәрәм дькьр. Мәсәлә, рʹожа Пенщийе Һʹәсабе йа сала 33 Д.М., ԝәкә 3 000 кәс һатьн ньхӧмандьн (Кʹаред Шандийа 2:41). Паши ве йәке, һәжмара шагьрта һәр кӧ дьчу зедә дьбу (Кʹаред Шандийа 6:7). Диса жи, Иса пʹехәмбәрти кьрьбу кӧ рʹожед ахьрийеда, шьхӧле бәлакьрьна мьзгине ԝе дьһа пешда һәрʹә (Йуһʹәнна 14:12; Кʹаред Шандийа 1:8).

3-4. Һьнә дәра, хьзмәт чьма зор ә, у ве готареда, әме чь һин бьн?

³ Әм һьлбәт дьхԝазьн хьзмәта хԝә бь шабуне биньн сери. Һьнә ԝәлатада, гәләк кәс дьхԝазьн һинбуна Кʹьтеба  Пироз дәрбаз бьн. У щарна лазьм ә ԝәки кәсед ӧса һьнәки һивийе бьн һʹәта кӧ ԝәхта Шәʹдәки Йаһоԝа һәбә кӧ тʹәви ԝан һинбуна Кʹьтеба Пироз дәрбаз бькә. Ләма хушк у бьред ль ԝан дәра жь хьзмәта хԝә шабуне дьстиньн. Ле һьнә ԝәлатада, бәлакьрьна мьзгине һаԛас һеса нинә, чьмки гәләк мәрьв нә ль мале нә, у йед кӧ ль мале нә жи, гәләк жь ԝан гӧһ надьн мьзгине.

⁴ Һәгәр тӧ хьзмәтеда рʹасти ви щурʹә чәтьнайа тейи, тӧйе жь ширәтед ве готареда кʹаре бьстини. Әме бьвиньн кӧ һьнә хушк у бьра чь кьрьн кӧ хьзмәтеда мьзгине бьгьһиньн дьһа зедә мәрьва. Ӧса жи, әме бьвиньн кӧ һәгәр мәрьв мьзгине ԛәбул нәкьн жи, әм чаԝа дькарьн шабуна хԝә хԝәй бькьн.

5. Гәләк Шәʹдед Йаһоԝа рʹасти чь щурʹә чәтьнайа тен?

⁵ Һьнә ԝәлатада, бона Шәʹдед Йаһоԝа гәләк зор ә кӧ мәрьва ль мале бьвиньн. Гәләк хани у авайи пʹарасти нә, у чәтьн ә кӧ хушк-бьред мә бькʹәвьн щийед ӧса. Нобәдар дьбәкә изне надьн кӧ кәсед кӧ нәһатьнә тʹәглифкьрьн бькʹәвьн һӧндӧр. Ль һьнә дәра жи, хушк-бьред мә дькарьн бь сәрбәсти мал бь мал һәрʹьн, ле гәләк кәс нә ль мале нә. Һьнә мьзгинван жи ль щийед дур хьзмәт дькьн. Әԝана дьбәкә гәләк рʹе дьчьн сәва кӧ һәрʹьн маләке, ле гава әԝана дьгьһижьн ԝе дәре, тʹӧ кәс ль мале нинә. Гава әм рʹасти чәтьнайед ӧса тен, гәрәке әм хирәта хԝә ӧнда нәкьн. Гәло әм чаԝа дькарьн шабуна хԝә хԝәй бькьн у дь хьзмәтеда пешдачуйи бьн?

6. Мьзгинван чаԝа мина мәʹсигьр ьн?

⁶ Иса ише бәлакьрьна мьзгине бәрамбәри шьхӧле мәʹсигьра кьр (Марԛос 1:17). Һьнә мәʹсигьр щарна гәләк рʹожа ԛәт мәʹси нагьрьн. Диса жи, әԝана дәсте хԝә бәржер накьн, ле ԝәхт, щи йан метода мәʹсигьртьне дьгӧһезьн. Әм жи дькарьн дь хьзмәтеда һьнә гӧһастьна бькьн. Ньһа, әме дина хԝә бьдьн һьнә ширәтед дәрһәԛа хьзмәте.

7. Ԝе чьма баш бә кӧ әм щурʹә-щурʹә ԝәхтда һәрʹьн хьзмәте?

⁷ Сьһʹәтәкә дьн һәрә хьзмәте. Сәва кӧ әм рʹасти дьһа зедә мәрьва бен, гәрәке әм рʹож у сьһʹәтед кӧ әԝана ль мале нә һәрʹьн щәм ԝан. Зу йан дәрәнг, һәр кәс дьчә мала хԝә, нә ӧса йә? Гәләк хушк у бьра паши нивро йан еваре дьчьн хьзмәте, чьмки ԝе ԝәхте зедәтьр мәрьв ль мале нә. Ӧса жи, хԝәйед мале ԝе дьбәкә ль ԝан сьһʹәта дьһа рʹьһʹәт бьн у һазьр бьн кӧ хәбәр дьн. Йан жи, тӧ дькари ширәтәкә жь рʹуспики бь наве Давид кʹаре бьвини. Һәгәр кәсәк нә ль мале йә, әԝ паши дәмәке диса дьчә ве мале. Давид дьбежә: «Чь һʹәԝас ә кӧ щара дьда, гәләк мәрьв ида ль мале нә!» *

8. Хьзмәтеда, әм чаԝа дькарьн рʹеза Ԝаиз 11:6 бьдьнә хәбате?

⁸ Ча рʹеза сәрәкә нишан дькә, гәрәке әм тʹӧ щара хирәт у шабуна хԝә ӧнда нәкьн (Ԝаиз 11:6 бьхунә). Бьре мә Давид бәʹса кʹижани мә жоре кьр, бона хирәта хԝә һатә кʹәрәмкьрьне. Щарәке, әԝ рʹасти мерәки һат, йе кӧ һәртʹьм малда нибу. Әԝ мерьк хԝәст дәрһәԛа Кʹьтеба Пироз хәбәр дә, у әԝи гот: «Ида 8 сал ә кӧ әз ль вьр дьжим, ле мьн һʹәта ньһа тʹӧ Шәʹдеки Йаһоԝа бәр дәре хԝә нәдитийә». Давид дьбежә: «Гава әм ахьрийа-ахьрийе мәрьва малда дьвиньн,  әԝана гәләк щара һазьр ьн кӧ гӧһ бьдьн мьзгине».

9. Әм чаԝа дькарьн бьгьһижьн мәрьвед кӧ нә ль мале нә?

⁹ Щики дьн хьзмәт бькә. Сәва кӧ бьгьһижьн кәсед кӧ нә ль мале нә, һьнә мьзгинван дәрбази щики дьн дьбьн. Мәсәлә, бь сайа хьзмәта ль кʹуче у хьзмәта бь стенда, әм дькарьн мьзгине рʹу бь рʹу бьгьһиньн мәрьвед кӧ авайед пʹарастида дьжин йан мәрьвед кӧ әм нькарьн щики дьн бьвиньн. Ӧса жи, һьнә мәрьв ль парка, дькʹана у щийед хәбате дьһа зедә һазьр ьн кӧ тʹәви мә хәбәр дьн йан әʹдәбйәта ԛәбул бькьн. Бьраки бь наве Флоиран, йе кӧ ль Боливйайе бәрпьрсийаре мьһале йә, ӧса дьбежә: «Паши нивро, хәбата базьргана һьндьк ә, ләма әм незики сьһʹәта 1 һʹәта 3 дькʹанада у щийед хәбата хьзмәт дькьн. Гәләк щара хәбәрданед хԝәш дәстпедьбьн, у һьнә кәс һинбуна Кʹьтеба Пироз жи ԛәбул дькьн».

10. Диса пе кʹижан метода тӧ дькари мьзгине бьгьһини мәрьва?

¹⁰ Методәкә дьн бьдә хәбате. Бәʹса хәбәре кӧ тә гәләк щара хирәт кьрийә кӧ рʹасти кәсәки бейи. Гәло тӧ дькари бь методәкә дьн рʹасти кәсед ӧса бейи? Хушкәкә бь наве Катарина дьбежә: «Әз ԝан мәрьварʹа йед кӧ ԛәт нә ль мале нә, нәʹма дьньвисьм. Дь ван нәʹмада, әз тьштед кӧ мьн дьхԝәст рʹу бь рʹу ԝанрʹа бьгота, дьньвисьм». Бәле, гава тӧ хьзмәта хԝә тини сери, хирәт бькә кӧ тӧ бь щурʹә-щурʹә метода бьгьһини һʹәму мәрьва.

11. Һьнә кәс чьма гӧһ надьн мьзгине?

¹¹ Һьнә кәс гӧһ надьн мьзгине. Әԝ дьфькьрьн кӧ әԝ һʹәԝщәйи Хԝәде йан Кʹьтеба Пироз ниньн. Жь бәр кӧ дьнйа бь хьрабийева тʹьжә йә, гәләк кәс ида баԝәр накьн кӧ Хԝәде һәйә. Әԝана Кʹьтеба Пироз ԛәбул накьн, чьмки дӧрʹутийа сәрԝеред религи дьвиньн, йед кӧ дьбежьн кӧ ль гора Кʹьтеба Пироз дьжин, ле бь рʹасти ӧса нинә. Һьнә кәс жи бь шьхӧлед хԝә, бь малбәта хԝә йан бь проблемед шәхси гәләк мьжул ьн у фәʹм накьн кӧ Кʹьтеба Пироз дькарә али ԝан бькә. Гава әм дь нав кәсед ӧсада хьзмәт дькьн, әм чаԝа дькарьн шабуна хԝә хԝәй кьн?

12. Хьзмәтеда, әм чаԝа Филипи 2:4 дькарьн бьдьнә хәбате?

¹² Нишан бькә кӧ тӧ жь дьл бона мәрьва хәм дьки. Гәләк мәрьв серида гӧһ нәдьда мьзгине, ле паше, гава ԝана дьлгәрмийа мьзгинвана дит, әԝана һатьн сәр рʹийа рʹастийе (Филипи 2:4 бьхунә). Мәсәлә, бьре Давид ӧса дьбежә: «Гава кәсәк нахԝазә гӧһ бьдә мьзгине, әм Кʹьтеба Пироз йан әʹдәбйәта датиньн алики у ӧса дьпьрсьн: ‹Тӧ чьма ӧса дьфькьри?›» Мәрьв рʹьнд фәʹм дькьн кӧ кәсәк бь рʹасти бона ԝан хәм дькә йан на. Әԝана ԝе дьбәкә бир бькьн кӧ мә чь готьбу, ле әԝ йәк кӧ әм һьндава ԝанда ча бун, ԝе зу бир нәкьн. Һәгәр әԝана изне нәдьн кӧ әм хәбәр дьн жи, әм дькарьн бь бәшәр у щурʹе хәбәрдана хԝә нишан бькьн кӧ әм бона ԝан хәм дькьн.

13. Әм чаԝа дькарьн хәбәрдана хԝә ль гора һʹәԝщед хԝәйе мале бьгӧһезьн?

¹³ Ԝәхта кӧ әм хәбәрдана хԝә ль гора һʹәԝще хԝәйед мале дьгӧһезьн, әм нишан дькьн кӧ әм дькʹәвьн һʹәйра ԝан. Мәсәлә, һәгәр ль мале зарʹ һәбьн, әм дьбәкә дькарьн дина де у бав бькʹьшиньн сәр ширәтед Кʹьтеба Пироз, йед кӧ нишан дькьн кӧ әԝана ча дькарьн зарʹед хԝә баш мәзьн бькьн у дь малбәтеда дьһа бәхтәԝар бьн. Һәгәр дәри бь чәнд кʹьлита дадайи йә, әм дьбәкә дькарьн дәрһәԛа зӧльм у зордарийа ль дьнйайе хәбәр дьн у нишани хԝәйе мале бькьн кӧ Хԝәде ԝе һʹале дьнйайе чаԝа рʹаст бькә. Чь жи һәбә, мәрьварʹа нишан бькә кӧ ширәтед Кʹьтеба Пироз чьма керһати нә. Катарина ӧса дьбежә: «Әз тиньм бира хԝә кӧ жийина мьн бь сайа рʹастийе чаԝа четьр буйә». Ләма жи ԝәʹде хьзмәтийе Катарина бь баԝәри хәбәр дьдә, у мәрьвед кӧ гӧһ дьдьн ԝе, бешьк ве йәке тʹәхмин дькьн.

14. Ль гора Мәтʹәлок 27:17, әм чаԝа дькарьн дь хьзмәтеда али һәвдӧ бькьн?

¹⁴ Жь кәсед дьн аликʹарийе ԛәбул бькә.  Ԛьрʹна йәкеда, Паԝлос методед бәлакьрьна мьзгине у һинкьрьне Тимотʹейо һин кьр, у әԝи Тимотʹейо һелан кьр кӧ әԝ бь сайа ван метода аликʹарийа кәсед дьн жи бькә (1 Корьнтʹи 4:17). Ча Тимотʹейо, әм жи дькарьн жь хушк у бьред щерʹьбанди һин бьн (Мәтʹәлок 27:17 бьхунә). Мәсәлә, дина хԝә бьдьнә сәрһатийа бьраки бь наве Шон. Әԝи ԝәхтәки гӧндада хьзмәт дькьр, у гәләк мәрьвед ль ԝе дәре гӧһ нәдьда мьзгине, чьмки әԝана бь дине хԝәва гьредайи бун. Гәло әԝи шабуна хԝә чаԝа хԝәй дькьр? Әԝ ӧса дьбежә: «Һәр кӧ мәщал чедьбу, әз тʹәви хушк йан бьраки дьчум хьзмәте. Гава әм жь маләке дәрдькʹәтьн у дьчун маләкә дьн, мә али һәвдӧ дькьр кӧ дь һʹӧнӧред һинкьрьнеда пешда һәрʹьн. Мәсәлә, мә дьани бира хԝә кӧ хәбәрдан чаԝа дәрбаз бу. Паше, мә шеԝьр дькьр кӧ һәгәр әм диса рʹасти һʹаләкә ӧса бен, әм чаԝа дькарьн щабәки һе баш бьдьн».

15. Дӧа чьма бона хьзмәта мә фәрз ә?

¹⁵ Жь Йаһоԝа аликʹарийе бьхԝазә. Һәр кӧ тӧ дьчи хьзмәте, жь Йаһоԝа рʹебәрийе бьхԝазә. Бе аликʹарийа рʹӧһʹе пироз, әм нькарьн сәркʹәвьн (Зәбур 127:1; Луԛа 11:13). Дь дӧайед хԝәда рʹастә-рʹаст бежә кӧ хԝәстьна тә чь йә. Мәсәлә, жь Йаһоԝа рʹәща бькә кӧ әԝ рʹебәрийа тә бькә ԝәки рʹасти ԝи кәси бейи, йе кӧ һазьр ә гӧһ бьдә мьзгине. Паше, ль гора дӧайе хԝә һәр тьшти бькә у шәʹдәтийе бьдә һʹәму кәсед кӧ тӧ рʹасти ԝан тейи.

16. Леколина шәхси бона хьзмәте чьма фәрз ә?

¹⁶ Бона леколина шәхси ԝәхт вәԛәтинә. Хәбәра Хԝәде ӧса дьбежә: «Бьзаньбьн чь йә ԛьрара Хԝәде, кӧ ԛәнщи, хԝәши у кʹамьли йә» (Рʹомайи 12:2). Чьԛас кӧ баԝәрийа мә зедә дьбә кӧ әм ль сәр рʹийа рʹаст ьн, кәсед кӧ әм мьзгине дьдьн ԝан ԝе әʹсәйи баԝәрийа мә бьвиньн. Хушка мә Катарина ӧса дьбежә: «Чәндәк пешда, мьн фәʹм кьр кӧ гәрәке әз баԝәрийа хԝә һьндава һинкьрьнед сәрәкә йед Кʹьтеба Пироз дьһа ԛәԝи бькьм. Ләма мьн избаткьрьнед кӧ Әʹфьрандар һәйә, кӧ Кʹьтеба Пироз бь рʹасти жь алийе Хԝәдева һатийә ньвисандьн у кӧ тʹәшкиләта Хԝәде һәйә, һур у кʹур леколин кьрьн». Бь сайа леколина шәхси, баԝәрийа Катаринайе дьһа ԛәԝи бу, у әԝе хьзмәтеда дьһа зедә шабун дьстанд.

17. Иса дь хьзмәтеда чьрʹа шабуна хԝә ӧнда нәдькьр?

¹⁷ Һьнә мәрьв чьԛас гӧһ нәдьда Иса жи, әԝи шабуна хԝә ӧнда нәдькьр у бәрдәԝам дькьр мьзгине бәла кә. Гәло чьма? Әԝи заньбу кӧ мәрьв чьԛас һʹәԝще рʹастийе нә, у әԝи дьхԝәст мәщале бьдә мәрьва кӧ әԝана мьзгина Пʹадшатийе ԛәбул бькьн. Ӧса жи, әԝи заньбу кӧ һьнә кәсед кӧ серида гӧһ нәдьданә мьзгине ԝе паше бенә сәр рʹийа рʹастийе. Мәсәлә, бинә бира хԝә дәма кӧ Иса Мәсиһ ль дьнйайе хьзмәт дькьр, бьред ԝи нәбун шагьртед ԝи (Йуһʹәнна 7:5). Ле паши кӧ әԝ жь мьрьне рʹабу, әԝана бунә шагьртед ԝи (Кʹаред Шандийа 1:14).

18. Әм чьма бәлакьрьна мьзгине бәрдәԝам дькьн?

¹⁸ Әм ньзаньн кӧ хьлазийеда, кʹи ԝе рʹастийа Кʹьтеба Пироз ԛәбул бькә у кʹи на. Һьнә кәсарʹа дьһа зедә ԝәхт лазьм ә кӧ әԝана мьзгине ԛәбул бькьн. Кәсед кӧ гӧһ надьн мьзгине диса жи шьхӧлед мә  йед баш дьбиньн, у рʹожәке, дьԛәԝьмә әԝана ԝе «шькьрийе бьдьнә Хԝәде» (1 Пәтрус 2:12).

19. Ль гора 1 Корьнтʹи 3:6, 7, гәрәке әм чь фәʹм бькьн?

¹⁹ Чьԛас кӧ әм тʹохьмед рʹастийе дьчиньн у ав дьдьн, гәрәке әм рола Хԝәде фәʹм бькьн (1 Корьнтʹи 3:6, 7 бьхунә). Бьраки бь наве Гетаһун, йе кӧ ль Әтйопйайе хьзмәт дькә, ӧса дьбежә: «Зедәтьри 20 сала, ль һәрема мә тʹәне әз Шәʹде Йаһоԝа бум. Ле ньһа, 14 мьзгинван һәнә. Дь нав ԝанда, жьна мьн, се зарʹед мә у нәһ кәсед дьн һатьн ньхӧмандьне. Һәр тʹьм ԝәкә 32 кәс тен щьвина». Гетаһун пʹьрʹ ша йә, чьмки әԝи бәлакьрьна мьзгине нәдьда сәкьнандьне, ле бь сәбьр һивийа Йаһоԝа ма кӧ әԝ мәрьвед дьлпʹак бькʹьшинә бал тʹәшкиләта хԝә! (Йуһʹәнна 6:44).

20. Хәбата мә чаԝа мина хәбата легәрʹин у хьлазкьрьне йә?

²⁰ Йаһоԝа һʹәму мәрьва ԛимәт дькә. Ләма, әԝ дьхԝазә кӧ әм тʹәви Кӧрʹе ԝи һәвкʹарийе бькьн у пешийа хьлазийа ве системе мәрьвед жь һʹәму мьләта тʹоп бькьн (Һагай 2:7). Хәбата бәлакьрьна мьзгине мина хәбата легәрʹин у хьлазкьрьне йә. Паши әʹрдһәжәке, кәсед кӧ хәбата легәрʹин у хьлазкьрьне дькьн, заньн кӧ йед кӧ һе сах ьн дьбәкә һьндьк ьн. Диса жи, һәгәр тʹәне кәсәки сах һәбә, әԝана бь дьл у щан дьхәбьтьн кӧ ԝи хьлаз кьн. Ләма жи, шьхӧле легәрʹин у хьлазкьрьне пʹьрʹ һежа йә. Әм ньзаньн кӧ чьԛас мәрьв ԝе ԝәʹде кʹӧтакьрьна система Шәйтʹан хьлаз бьн. Ле Йаһоԝа дькарә бь дәсте мә али ван кәса бькә. Бьраки бь наве Андреас, йе кӧ ль Боливйайе дьжи, ӧса дьбежә: «Бь дитьна мьн, гава кӧ кәсәк Кʹьтеба Пироз һин дьбә у те ньхӧмандьне, әв йәк сәркʹәтьна һʹәму хушк у бьра йә.» Ԝәрә әм жи сәр хьзмәта хԝә ӧса бьньһерʹьн! Һәгәр әм ньһерʹандьнәкә позитив хԝәй бькьн, Йаһоԝа ԝе мә бәрәкʹәт бькә, у әме жь хьзмәта хԝә шабуне бьстиньн.