1-2. Ве готареда, әме чь һин бьбьн?

ЖИЙАНА мә бь рʹасти жи кьн у «тʹери тәнгасийе» йә (Иб. 14:1). Ләма, әм щарьна дьлтәнг дьбьн. Һьнә хьзмәткʹаред Йаһоԝа Хԝәде, йед кӧ ль дәмед бәре дьжитьн, әʹйни тьшт тʹәхмин дькьрьн. Һьнә жь ԝан һәла һе мьрьне жи хԝәрʹа дьхԝәстьн (1 Пʹадш. 19:2-4; Иб. 3:1-3, 11; 7:15, 16). Ле бәле, ԝана хԝә дьспарт Йаһоԝа, у әԝи тʹьме ԛәԝат у мерхаси дьда ԝан. Сәрһатийед ԝана бона дьлбинийа у һинбуна мә һатьнә ньвисандьн (Рʹом. 15:4).

² Ве готареда, әме дина хԝә бьдьн һьнә хьзмәткʹаред Йаһоԝа, йед кӧ рʹасти тәнгасийа дьһатьн: Усьв кӧрʹе Аԛуб, Наһоми у бука ԝе Рʹутʹ, мерәки Леԝи йе кӧ Зәбура 73 ньвиси у Пәтрусе шанди. Гәло Йаһоԝа чаԝа ԛәԝат дьда ԝан? Әм дькарьн жь сәрһатийед ԝана чь дәрса бьстиньн? Щабед ван пьрса ԝе нишани мә кьн кӧ Йаһоԝа «незики дьлшкәстийа йә» у «мәʹрьм-бәләнгаза дьдәбьринә» (Зәб. 34:18).

3-4. Гава Усьв щаһьл бу, чь һатә сәре ԝи?

³ Гава Усьв ԝәкә 17 сали бу, әԝи дӧ хәԝнед жь Хԝәде дитьн. Ван хәԝна нишан дьда кӧ рʹожәке, Усьв ԝе нав у дәнгәки ӧса бьстанда кӧ малбәта ԝи ԝе һӧрмәт бьдайа ԝи (Дәстп. 37:5-10). Ле бәле, дәмәкә кьн паши кӧ Усьв әв хәԝн дитьн, жийана ԝи тʹәвльһәв бу. Бьред ԝи әԝ фьротьн, у әԝ ԝәк хӧлам кʹәтә мала сәрԝерәки Мьсри йе бь наве Потифар (Дәстп. 37:21-28). Усьв, йе кӧ бона баве хԝә кӧрʹе һәри һʹьзкьри бу, ньшкева ль Мьсре бу хӧлам (Дәстп. 39:1).

 ⁴ Паше, тьштед һе хьраб һатьн сәре Усьв. Жьна Потифар шәрʹ авитә Усьв. Әԝе гот кӧ әԝи бь зоре дьхԝәст сәре хԝә перʹа дайнә. Потифар леколин нәкьр кʹа Усьв бь рʹасти жи тьштәки ӧса кьрьбу йан на, ле әԝи әԝ рʹастә-рʹаст авитә кәле, у ль ԝедәре, әԝ бь зьнщиред һʹәсьн һат гьредан (Дәстп. 39:14-20; Зәб. 105:17, 18). Бинә бәр чʹәʹве хԝә кӧ Усьв чьԛас хәмгин бу, жь бо кӧ бӧхданәки ӧса хьраб авитьн сәр ԝи. Ӧса жи, бьфькьрә кӧ әв бӧхдан наве Йаһоԝа чаԝа рʹәш дькьр. Бәле, гәләк сәбәб һәбун жь бо чь жи Усьв дьлтәнг дьбу!

5. Усьв чаԝа ньһерʹандьнәкә позитив хԝәй дькьр?

⁵ Гава Усьв хӧлам бу у паше кʹәтә кәле, азайа ԝи тʹӧнә бу у әԝи нькарьбу һʹале хԝә бьгӧһаста. Гәло чь али ԝи дькьр кӧ әԝ ньһерʹандьнәкә позитив хԝәй бькә? Әԝи дина хԝә нәдьда тьштед кӧ ида нькарьбу бькьра, ле әԝи шьхӧлед хԝә бь дьл у щан дьани сери. Йа һәри фәрз жи әв ә кӧ әԝи һәртʹьм хирәт дькьр кӧ дьле Йаһоԝа ша бькә. Ләма, Йаһоԝа һʹәму кʹаред Усьв бьбәрәкʹәт дькьрьн (Дәстп. 39:21-23).

6. Усьв бәлки жь хәԝнед хԝә чаԝа дьлбини дьстанд?

⁶ Усьв бәлки хәԝнед хԝә йед бәре дьанин бира хԝә у дәрһәԛа ԝан дьфькьри. Ван хәԝна бешьк дьлбини дьда ԝи, чьмки ван әшкәрә дькьр кӧ рʹожәке, әԝе малбәта хԝә диса бьвинә у һʹале ԝи ԝе баш бьбә. Бь рʹасти жи ӧса бу. Гава Усьв ԝәкә 37 сали бу, хәԝнед ԝи бь щурʹәки нәһевикьри һатьн сери (Дәстп. 37:7, 9, 10; 42:6, 9).

7. Ль гора 1 Пәтрус 5:10, чь ԝе али мә бькә кӧ әм ль һьмбәри тәнгасийа сәбьр бькьн?

⁷ Дәрсед бона мә. Сәрһатийа Усьв тинә бира мә кӧ дьнйа берʹәʹм ә у дьхԝазьн нахԝазьн әме рʹасти нәһәԛийа  бен. Хушк-бьред мә жи дькарьн дьле мә бьешиньн. Ле бәле, һәгәр әм Йаһоԝа ԝәк Зьнар у Стара хԝә бьвиньн, әме мерхасийа хԝә ӧнда нәкьн у хьзмәта хԝә нәдьн сәкьнандьн (Зәб. 62:6, 7; 1 Пәтрус 5:10 бьхунә). Ӧса жи, бинә бира хԝә кӧ гава Усьв хәԝнед жь Хԝәде дитьн, әԝ тʹәне ԝәкә 17 сали бу. Әв йәк нишани мә дькә кӧ Йаһоԝа бь хьзмәткʹаред хԝә йед щаһьл жи баԝәр ә. Иро, гәләк щаһьл ԝәк Усьв ьн. Мина ԝи, әԝ баԝәрийа хԝә Йаһоԝа тиньн. Һьнә жь ԝан сәва амьнийа хԝә бь нәһәԛи кʹәтьнә кәле (Зәб. 110:3).

8. Чь һат сәре Рʹутʹ у Наһомийе?

⁸ Сәба хәлайәкә гьран, жьнькәкә бь наве Наһоми тʹәви малбәта хԝә жь ԝәлате Щьһуда дәркʹәт у чу ԝәлате Моԝаб. Ль ԝедәре, зьламе ԝе Әлимәләх мьр. Наһоми тʹәви кӧрʹед хԝә тʹәне ма. Ԝәхт шунда, һәр дӧ кӧрʹед ԝе бь жьнед Моԝабирʹа зәԝьщин. Навед букед ԝе Рʹутʹ у Орпа бун. Ԝәкә 10 сал шунда, кӧрʹед Наһомийе жи мьрьн, у зарʹед ԝан тʹӧнә бун (Рʹутʹ 1:1-5). Бинә бәр чʹәʹве хԝә кӧ әв се жьн чьԛас хәмгин бун! Рʹутʹ у Орпа һьлбәт аза бун кӧ диса мер бькьн. Ле бәле, гәло кʹе ԝе Наһоми хԝәй бькьра? Әԝ ида пир бу, у лазьм бу кӧ кәсәк ле бьньһерʹә. Наһоми щарәке сәва хәмед хԝә һаԛас дьлтәнг бу кӧ әԝе ӧса гот: «Мьнрʹа нәбежьн Наһоми , ле мьнрʹа бежьн Мара, чьмки Йе Һәри Зор дәрд у кӧлава әз данимә». Паши ван ԛәԝьмандьнед хьраб, Наһомийе сафи кьр кӧ вәгәрә Бәйтʹләһәме, у Рʹутʹ жи тʹәви ԝе чу (Рʹутʹ 1:7, 18-20).

9. Ль гора Рʹутʹ 1:16, 17, 22, Рʹутʹе чаԝа дьлбини да Наһомийе?

⁹ Дь ви һʹале хьрабда, чь дьлбини да Наһомийе? Һʹьзкьрьна амьн! Мәсәлә, гава Рʹутʹе Наһомийерʹа гот кӧ әԝе тʹәви ԝе бьминә, әԝе һʹьзкьрьна амьн әʹйан кьр (Рʹутʹ 1:16, 17, 22 бьхунә). Ль Бәйтʹләһәме, Рʹутʹе бона кӧ әʹбура хԝә у Наһомийе бькә, зәвийа щәһ тʹоп дькьр. Дь ахьрийеда, пʹьрʹ ԝәхт дәрбаз нәбу кӧ Рʹутʹе навәки баш ԛазанщ кьр (Рʹутʹ 3:11; 4:15).

10. Йаһоԝа һʹьзкьрьна хԝә кәсед кʹәсибрʹа чаԝа нишан дькьр?

¹⁰ Йаһоԝа бона һʹәԝщед кʹәсиба хәм дькьр, у ләма жи ԛанунәкә мәхсус да Исраелийа. Ль гора ве ԛануне, лазьм бу кӧ әԝ ль ԝәхта дьруне ԛәрахед зәвийан бона мәрьвед кʹәсиб бьһельн (Ԛан. Кʹаһ. 19:9, 10). Ләма, нә лазьм бу кӧ Рʹутʹ у Наһоми пʹарсә бькьн, у бь сайа ве ԛануне ԝана дькарьбу әʹбура хԝә бькьн.

11-12. Боԝаз чаԝа дьле Рʹутʹ у Наһомийе ша кьр?

¹¹ Хԝәйе зәвийа кӧ Рʹутʹе ль ԝьр щәһ тʹоп дькьр, мәрьвәки дәԝләмәнд бь наве Боԝаз бу. Гава әԝи дьдит кӧ Рʹутʹ Наһомийерʹа чьԛас амьн ә, ве йәке дьле ԝи гьрт. Ләма, ԝәхт шунда Боԝаз миратʹа малбәте кʹьрʹи у Рʹутʹерʹа зәԝьщи (Рʹутʹ 4:9-13). Ԝанрʹа зарʹокәки бь наве Овед һатә буйине, йе кӧ паше бу кальке Даԝьд Пʹадша (Рʹутʹ 4:17).

¹² Буйина Овед бешьк дьле Наһомийе пʹьрʹ ша кьр. Ле бәле, Рʹутʹ у Наһоми ԝе бәрәкʹәтед дьһа мәзьн бьстиньн. Әԝе жь мьрьне бен рʹакьрьн у пебьһʹәсьн кӧ Овед йәк жь кал у бавед Мәсиһе Создайи бу!

13. Сәрһатийа Рʹутʹ у Наһомийе чь мә һин дькә?

¹³ Дәрсед бона мә. Гава әм рʹасти тәнгасийа тен, әм дькарьн бәрхԝә кʹәвьн у һәла һе дьлшкәсти жи бьн. Ль  дәмед ӧса, гәрәке әм хԝә бь тʹәмами бьсперьн Йаһоԝа у хԝә незики хушк-бьред хԝә бьгьрьн. Әм һьлбәт заньн кӧ иро Йаһоԝа мә жь һʹәму тәнгасийа хьлаз накә. Мәсәлә, әԝи мер у кӧрʹед Наһомийе жь мьрьне рʹанәкьрьн. Ле әԝ дькарә бь сайа дьлованийа хушк у бьра сәбре у дьлбинийе бьдә мә (Мәтʹлк. 17:17).

14. Мерәки Леԝи мерхасийа хԝә чьма ӧнда кьр?

¹⁴ Ньвискʹаре Зәбура 73 мерәки Леԝи бу, ләма ԝи ль пʹарьстгәһе хьзмәт дькьр. Диса жи, әԝ щарәке пʹьрʹ дьлтәнг бу. Гәло чьма? Әԝи чʹәʹвнәбарийа кәсед хьраб у ԛӧрʹә кьр – нә сәва хьрабийа ԝан, ле сәва ве кӧ жийана ԝан жь жийана ԝи рʹьһʹәттьр хӧйа дькьр (Зәб. 73:2-9, 11-14). Ӧса дьһатә кʹьфше кӧ һәр тьшт щәм ԝан һәбу, жийина баш, һәбук у әʹмьре бехәм. Ве йәке зәбурбеж һаԛас әʹщьз дькьр кӧ ԝи гот: «Кӧ ӧса йә бадиһәԝа мьн хԝә паԛьж хԝәйи кьрийә у дәстед хԝә пе бесущийе шуштьнә». Бәле, һьндьк мабу кӧ әԝи хьзмәта хԝә Йаһоԝарʹа бьда сәкьнандьне.

15. Ль гора Зәбур 73:16-19, 22-25, зәбурбеже Леԝи чаԝа жь дьлтәнгийе фьльти?

¹⁵ Зәбур 73:16-19, 22-25 бьхунә. Паше, әв Леԝи чу пʹарьстгәһа Хԝәде. Ль ԝедәре, дь нав хьзмәткʹаред Хԝәдеда, әԝи һʹале хԝә бь зәлали щерʹьбанд у дӧа кьр. Дь ахьрийеда, әԝи фәʹм кьр кӧ фькред ԝи шаш ьн, у һәгәр әԝ тʹәрька ԝан фькра нәкә, әԝе достийа хԝә тʹәви Йаһоԝа ӧнда кә. Ӧса жи, әԝи фәʹм кьр кӧ кәсед хьраб ль сәр рʹийа шьмьток дьсәкьньн у ԝе рʹожәке тʹӧнә бьбьн. Жь бо кӧ зәбурбеж жь чʹәʹвнәбарийе у жь дьлшкәстибуне бьфьльтә, лазьм бу кӧ әԝ мина Йаһоԝа сәр тьшта бьньһерʹә. Гава әԝи ӧса кьр, әԝи дьлрьһʹәти станд у шабуна ԝи вәгәрʹийа. Әԝи гот: «Ль сәр әʹрде жи пештьри [Йаһоԝа] тьштәки дьн әз нахԝазьм».

16. Сәрһатийа зәбурбежәки Леԝи чь мә һин дькә?

¹⁶ Дәрсед бона мә. Бьра әм тʹӧ щара  чʹәʹвнәбарийа хьраба нәкьн. Жийана ԝан һәр чьԛас рʹьһʹәт те кʹьфше жи, шабуна ԝан дьреж накʹьшинә у һевийа ԝан тʹӧнә (Ԝаиз 8:12, 13). Һәгәр әм чʹәʹвнәбарийа ԝан бькьн, әме һьм мерхасийа хԝә һьм жи достийа хԝә тʹәви Йаһоԝа ӧнда бькьн. Ләма, һәгәр тӧ тедәрхи кӧ тӧ чʹәʹвнәбарийа сәркʹәтибуна хьраба дьки, зәбурбеже Леԝи бинә бира хԝә. Гӧһ бьдә ширәта Хԝәде у хԝә ль хушк-бьра бьгьрә. Һәгәр тӧ һәри зедә Йаһоԝа һʹьз бьки, тӧйе бәхтәԝарийа рʹасти ԛазанщ ки, у тӧйе ль сәр рʹийа «жийина кӧ рʹасти жийин ә», бьмини (1 Тимтʹ. 6:19).

17. Пәтрус чьма дьлтәнг бу?

¹⁷ Пәтрус мәрьвәки жир бу, ле әԝи щарьна беһәмде хԝә хәбәр дьда, ләз дькʹәт тьштәки бькә у бона ве йәке гәләк шаши дькьр. Ле паше әԝ пʹошман дьбу у бәрхԝә дькʹәт. Мәсәлә, гава Иса Мәсиһ шандийед хԝәрʹа гот кӧ әԝе бе кӧштьн, Пәтрус ԝирʹа гот: «Әԝ тьшт ԝе тʹӧ щар нәйе сәре тә!» (Мәт. 16:21-23). Һьнге Иса Мәсиһ ньһерʹандьна Пәтрус рʹаст кьр. Ԝәхта кӧ әʹлаләтәк һат кӧ Иса бьгьрә, Пәтрус гӧһе хӧламәки сәрәккʹаһин жекьр (Йуһʹн. 18:10, 11). Диса, Иса Мәсиһ әԝ рʹаст кьр. Хенщи ве йәке, Пәтрус пәсне хԝә да кӧ һәгәр һәр кәс дӧдьли у сьст бә жи, әԝе тʹӧ щара дӧдьли у сьст нәбә (Мәт. 26:33). Ле паше, Пәтрус кʹәтә бәр байе тьрсе у хԝәбаԝәрийа хԝә ӧнда кьр, у се щара Иса инкʹар кьр. Пәтрус пʹьрʹ дьлтәнг бу, «дәркʹәтә дәрва у кʹәлә-кʹәл гьрийа» (Мәт. 26:69-75). Бешьк әԝ бәрхԝә дькʹәт, гәло Иса ԝе бьбахшинә ԝи йан на.

18. Иса Мәсиһ чаԝа али Пәтрус кьр кӧ әԝ жь дьлтәнгийе бьфьльтә?

¹⁸ Пәтрусе шанди сәва дьлтәнгийе хьзмәта хԝә нәда сәкьнандьне. Паши  кӧ әԝи шаши кьр, әԝ диса һат сәр хԝә, у вәгәрийа бал шандийед дьн (Йуһʹн. 21:1-3; Кʹар. Шанд. 1:15, 16). Гәло чь али ԝи кьр? Йа пешьн, Иса дӧа кьрьбу кӧ баԝәрийа Пәтрус хьлаз нәбә, у әԝи Пәтрусрʹа готьбу кӧ бьра әԝ вәгәрә у ԛәԝате бьдә бьред хԝә. Әшкәрә йә кӧ Йаһоԝа щаба ве дӧайе Иса да. Паше, Иса Пәтрусрʹа жи хӧйа бу. Нета ԝи бешьк әв бу кӧ дьлбинийе бьдә ԝи (Луԛа 22:32; 24:33, 34; 1 Корн. 15:5). Иса шандийед хԝәрʹа диса хӧйа бу, паши шәва кӧ әԝана ԛәт мәʹси нәгьртьбун. Әԝи мәщал да Пәтрус кӧ әԝ бежә ԝәки әԝ ԝи чьԛас һʹьз дькә. Бәле, Иса Мәсиһ досте хԝәйи һежа әʹфу кьр, у щабдарикә фәрз да дәсте ԝи (Йуһʹн. 21:15-17).

19. Ль гора Зәбур 103:13, 14, Йаһоԝа ль гӧнәһед мә чаԝа дьнерә?

¹⁹ Дәрсед бона мә. Әв йәк кӧ Иса Мәсиһ чаԝа дьл дьда Пәтрус нишан дькә кӧ Иса йәки дьлрʹәʹм ә. Ӧса жи, әм заньн кӧ Иса Мәсиһ бь тʹәмами чʹәʹв дьда Баве хԝә. Ләма, гава әм шашийа дькьн, гәрәке әм нәфькьрьн кӧ һʹале мә бечʹарә йә. Бир нәкә кӧ Мире-щьн дьхԝазә кӧ әм ӧса бьфькьрьн. Ләма, гәрәке әм биньн бира хԝә кӧ Йаһоԝа мә һʹьз дькә у синоред мә занә. Әԝ һазьр ә кӧ бьбахшинә мә, у гәрәке әм жи һазьр бьн кӧ бьбахшин ԝан йед кӧ дьле мә дьешиньн (Зәбур 103:13, 14 бьхунә).

20. Готара дьнда, әме чь һин бьбьн?

²⁰ Сәрһатийед Усьв, Рʹутʹ у Наһоми, зәбурбеже Леԝи у Пәтрус нишани мә дькьн кӧ Йаһоԝа «незики дьлшкәстийа йә» (Зәб. 34:18). Әԝ щарьна изне дьдә кӧ әм рʹасти тәнгасийа бен у дьлтәнг бьбьн. Ле бәле, гава әм бь сайа аликʹарийа Йаһоԝа бәр тәнгасийа сәбьр дькьн, баԝәрийа мә дьһа ԛәԝи дьбә (1 Пәт. 1:6, 7). Готара дьнда, әме бьвиньн кӧ Йаһоԝа чаԝа пьштгьрийа хьзмәткаред хԝә дькә, йед кӧ сәва кемасийед хԝә йан жи сәва зәʹмәтед жийане дьлтәнг дьбьн.