На, Кʹьтеба Пироз у чʹәʹвканийед тʹәрихи бәʹса әʹдәтәкә ӧса накьн.

Һьнәк дьфькьрьн кӧ ль рʹожед Паԝлос, һьнә кәс жь бо хатьре мьрийа дьһатьн ньхӧмандьн. Сәбәб әв ә кӧ ль гора һьнә ԝәлгәрʹандьна, әв рʹез ӧса дьбежә: «Һәгәр мьрийе тʹӧ щар рʹанәбьн, иди чьма бона мьрийа тенә ньхӧмандьне?»

Гәло зандаред Кʹьтеба Пироз ль сәр ве йәке чь дьбежьн? Мәсәлә, Др. Грегори Локԝуд гот кӧ Кʹьтеба Пирозда у ль чʹәʹвканийед тʹәрихи ԛәт избат тʹӧнә кӧ кәсәк жь бо хатьре кәсед мьри һат ньхӧмандьн. Професор Гордон Фи жи ньвиси кӧ Кʹьтеба Пироз у чʹәʹвканийед тʹәрихи бәʹса әʹдәтәкә ӧса накьн. Ӧса жи, әԝи гот кӧ тьштәки ӧса ль ԛьрʹнед паши сазкьрьна щьвата Мәсиһийа жи нәдьһат кьрьн.

Иса Мәсиһ шагьртед хԝәрʹа ӧса готьбу: «Ньһа һәрʹьн һʹәму мьләта һин кьн у ԝана . . . бьньхӧминьн у ԝан һʹәму тʹәмийед кӧ мьн данә ԝә мьләта һин кьн» (Мәт. 28:19, 20). Ләма, пешийа кӧ кәсәк бькарьбә бьбә шагьртәки Иса Мәсиһ, гәрәке әԝ дәрһәԛа Йаһоԝа у Иса Мәсиһ занәбуне бьстинә, баԝәрийа хԝә бь ԝан бинә у гӧһ бьдә ԝан. Әшкәрә йә кӧ кәсәки мьри нькарә ве йәке бькә, у кәсәки сах жи нькарә ве йәке дәԝса кәсәки мьри бькә (Ԝаиз 9:5, 10; Йуһʹн. 4:1; 1 Корн. 1:14-16).

Һәгәр ӧса йә, гәло Паԝлос дьхԝәст чь бьгота?

Һьнә хушк у бьред ль бажаре Корьнтʹе инкʹар дькьр кӧ мьри ԝе бен рʹакьрьн (1 Корн. 15:12). Ле бәле, Паԝлос избат кьр кӧ ньһерʹандьна ԝан шаш ә. Дәрһәԛа тәнгасийед кӧ рʹасти ԝи дьһатьн, әԝи гот: «Әз һәр рʹож дәст жь әʹмьре хԝә дькʹьшиньм!» Паԝлос һьлбәт һе сах бу, ле әԝи дьхԝәст бьгота кӧ әԝ һәр рʹож дькʹәт дәрәщед хоф, демәк бәр мьрьне бу, у һәгәр әԝ бьмьрә жи, әԝ баԝәр бу кӧ әԝе ԝәк Иса Мәсиһ жь мьрьне бе рʹакьрьн у һәрә әʹзмана (1 Корн. 15:30-32, 42-44).

Лазьм бу кӧ хушк у бьрайед ль Корьнтʹе фәʹм бькьн кӧ жь бәр кӧ әԝ шагьртед бь рʹӧһʹ кʹьфшкьри нә, әԝе рʹож бь рʹож рʹасти тәнгасийа бен у пешийа кӧ бен рʹакьрьн әԝе бьмьрьн. Гава әԝ «йәктийа Мәсиһ Исада» һатьнә ньхӧмандьне, әԝ «мьрьна ԝида» жи һатьнә ньхӧмандьне (Рʹом. 6:3). Әԝ те һʹәсабе кӧ мина Иса Мәсиһ, әԝе жи рʹасти тәнгасийа бьһатана у бьмьрана пешийа кӧ әԝе бьһатана рʹакьрьн у бьчуна әʹзмана.

Дӧ сал зедәтьр паши кӧ Иса Мәсиһ һатьбу ньхӧмандьн, әԝи дӧ шандийед хԝәрʹа ӧса гот: «Һуне . . . бенә ньхӧмандьне бь ԝе ньхӧмандьна кӧ әзе пе бемә ньхӧмандьне» (Марԛ. 10:38, 39). Бь ван готьна, Иса дьхԝәст бьгота кӧ әԝе сәва беԛьсуртийа хԝә бе кӧштьн. Паԝлос Мәсиһийед бь рʹӧһʹ кʹьфшкьрирʹа ӧса ньвиси: «Әм тʹәви щәфайе Мәсиһ бунә, әме тʹәви рʹумәта ԝи бьн жи» (Рʹом. 8:16, 17; 2 Корн. 4:17). Бәле, пешийа кӧ кәсед бь рʹӧһʹ кʹьфшкьри бона жийана ль әʹзмана бьһатана рʹакьрьн, әԝе бьмьрана.

Ләма, готьнед Паԝлос ль гора «Ԝәлгәрʹандьна Дьнйа Тʹәзә» ӧса тен ԝәлгәрʹандьн: «Йан на, йед кӧ тен ньхӧмандьн бона кӧ әԝ бьбьн кәсед мьри, ԝе чь бькьн? Һәгәр мьри ԛәт нәйен рʹакьрьн, әԝ чьма бона нетәкә ӧса тен ньхӧмандьн?»