ГӘЛӘК хушк-бьред мә, йед кӧ бәрбь ԝәлатед дәԝләмәндва кʹоч кьрьбун, ида вәгәрʹийанә ԝәлатед хԝә. Жь бәр кӧ әԝана Йаһоԝа у инсана һʹьз дькьн, әԝ чунә щийед кӧ ль ԝе дәре мьзгинван һьндьк ьн (Мәт. 22:37-39). Гәло ԝан чь фәдакʹари кьрьнә у чь бәрәкʹәт стандьнә? Кʹа әм ль сәрһатийед һьнә хушк у бьра бьньһерʹьн, йед кӧ вәгәрʹийанә Камеруне, ԝәлатәки ль Африкайа рʹоава.

Дь сала 1998-да, бьраки бь наве Онисиме жь Камеруне дәрбази ԝәлатәки дьн бубу у 14 сал ль ԝедәре ма. Рʹожәке, әԝи ль щьвинәке дәрһәԛа бәлакьрьна мьзгинеда мәсәләк бьһист. Готарван ӧса гот: «Дӧ һәвал ль щийед щӧдә мәʹсийа дьгьрьн. Йәк жь ԝан жь йе дьн зедәтьр мәʹсийа дьгьрә. Ма йе кӧ һьндьк мәʹсийа дьгьрә ԝе нәчә щийе кӧ ль ԝедәре мәʹси зедә нә?»

Паши ве мәсәле, Онисиме дьхԝәст вәгәрʹә Камеруне, чьмки ише «мәʹсигьртьна» рʹӧһʹани ль ԝедәре баш пешда дьчә. Ле бәле, һьнә тьрсед ԝи һәбун. Мәсәлә, әԝи хәм дькьр кʹа әԝе бькарьбә паши һаԛас сала жь нува һини ԝәлате хԝә бьбә. Сәва кӧ хԝә бьщерʹьбинә, Онисиме сәр 6 мәһа чу Камеруне. Паше, дь сала 2012-да, әԝи мала хԝә бар кьр у дәрбази Камеруне бу.

Онисиме дьбежә: «Лазьм бу кӧ әз һини һәԝайа гәрм у һʹале жийане бьбьм. Ль Ода щьвате, лазьм бу кӧ әз диса һин бьбьм кӧ ль сәр тʹәхтед сәрт рʹунем. Ле бәле, һәр кӧ мьн дина хԝә дьда бәрнаме, мьн кʹӧрсийед нәрм бир дькьрьм».

Дь сала 2013-да, Онисиме бь хушкәкә бь наве Гералдине зәԝьщи, йа кӧ 9 сал ль Франсайе мабу у паше вәгәрʹийа Камеруне. Жь бәр кӧ ԝан һәри зедә бь ише Йаһоԝа мьжул бун, ԝана чь бәрәкʹәт стандьн? Онисиме дьбежә: «Әм тʹәвайи чун Мәкʹтәба Мьзгинванед Пʹадшатийе у мә ль Бәйтʹәле хьзмәт кьр. Сала пар, 20 хԝәндәкʹаред щьвата мә һатьн ньхӧмандьн. Мьн фәʹм кьр кӧ әз һатьм щийе рʹаст бона ‹мәʹсигьртьне›» (Марԛ. 1:17, 18). Гералдине жи ӧса дьбежә: «Әз тʹӧ щара нәдьфькьрим кӧ әзе һаԛас бәрәкʹәта бьстиньм».

Щудит ль Дәԝләтед Йәкбуйи йед Америкайе дьжит, ле әԝе дьхԝәст хьзмәта хԝә зедә бькә. Әԝ ӧса дьбежә: «Гава әз жь бо тʹәсәлийа малбәта хԝә дьчум Камеруне, мьн һәр щар чәнд һинбунед ну дәстпедькьр, у әз кʹәлогьри дьбум жь бәр кӧ мьн әԝ ль ԝедәре дьһиштьн». Ле бәле, Щудит дьтьрсийа кӧ бь тʹәмами вәгәрʹә Камеруне, чьмки бь пʹәре кӧ әԝе ль Америкайе ԛазанщ дькьр,  әԝе һәԛе ԛәнщкьрьна баве хԝә дьдан, йе кӧ ль Камеруне дьжит. Диса жи, Щудите хԝә дьспарт Йаһоԝа у дәрбази Камеруне бу. Һьлбәт әԝе щарьна бира жийана ль Америкайе дькьр, ле әԝе дӧа кьр кӧ Йаһоԝа али ԝе бькә кӧ әԝ һини жийана ль Камеруне бьбә. Ӧса жи, һелана кӧ әԝе жь бәрпьрсийарәки мьһале у жьна ԝи дьстанд, мерхаси да ԝе.

Щудит дьбежә: «Нава 3 салада, мьн 4 зарʹед рʹӧһʹани мәзьн кьрьн». Ԝәʹдә шунда, Щудит бу пешәнга мәхсус. Иро, әԝ тʹәви мере хԝә Сем-Кастел, йе кӧ бәрпьрсийаре мьһале йә, дьчә сәрледана щьвата. Гәло һʹале баве Щудите чаԝа бу? Щудит у малбәта ԝе ль ԝәлатәки дьн нәхԝәшханәк дит, йа кӧ һазьр бу кӧ операсйона баве ԝе бе пʹәрә бькә. Шькьр кӧ операсйон пʹьрʹ баш дәрбаз бу.

Бьраки бь наве Виктор бәрбь Канадайева кʹоч кьрьбу. Паши кӧ әԝи готарәкә ль «Бьрща Ԛәрәԝьлийе» дәрһәԛа хԝәндьна бьльнд, хԝәнд, у әԝ дәрһәԛа һинбуна хԝәйә занингәһеда фькьри. Ахьрийеда, әԝ жь занингәһе дәркʹәт у һьнә курсед текники станд, йед кӧ бь зедәйи ԝәхт нәдькʹьшанд. Әԝ дьбежә: «Бь ви аԝайи мьн зу хԝәрʹа хәбат дит, у әз бум пешәнг». Паше, Виктор бь хушкәкә бь наве Каролинрʹа зәԝьщи, у әԝ тʹәвайи бона татиле чун Камеруне. Гава әԝ чун Бәйтʹәле сәр екскурсийайе, жь ԝан пьрсин кʹа әԝ дькарьн ль Камеруне хьзмәт бькьн. Виктор дьбежә: «Сәбәба мә тʹӧнә бу кӧ әм ве тʹәглифе ԛәбул нәкьн, у жь бәр кӧ мә бь жийанәкә садә дьжит, мә дькарьбу ве тʹәглифе ԛәбул бькьн». Сьһʹәта Каролине нә баш бу, ле ԝан диса жи сафи кьр кӧ дәрбази Камеруне бьбьн.

Серида, Виктор у Каролин бун пешәнгед һәртʹьм, у ԝан бь пʹәре кӧ ԝан бәре тʹоп кьрьбу, әʹбура хԝә дькьр. Паше, әԝана сәр чәнд мәһа чун Канадайе у ль ԝе дәре хәбьтин. Бь ви аԝайи, ԝана дькарьбу вәгәрʹьн Камеруне у хьзмәта хԝә бәрдәԝам бькьн. Ԝана чь бәрәкʹәт стандьн? Әԝ чун Мәкʹтәба Мьзгинванед Пʹадшатийе, бун пешәнгед мәхсус у ньһа жи дь ише авакьрьнеда дьхәбьтьн. Виктор дьбежә: «Мә жийана хԝә йа рʹьһʹәт бәрда у изьн да кӧ Йаһоԝа али мә бькә».

Дь сала 2002-да, бьраки бь наве Ален, йе кӧ ль Алманйайе дьчу занингәһе, бәлавокәкә бь наве «Щаһьлно: Һуне Әʹмьре Хԝә Ча Дәрбаз кьн?» хԝәнд. Ве бәлавоке али ԝи кьр кӧ әԝ хԝәрʹа һьнә нета дайнә. Дь сала 2006-да, әԝ чу Мәкʹтәба Башкьрьна Хьзмәтийе, у әԝ һат кʹьфш кьрьн кӧ ль ԝәлате хԝә, демәк ль Камеруне, хьзмәт бькә.

Ль Камеруне, Ален хԝәрʹа ишәки ниврʹожи дит. Паше, әԝи хԝәрʹа хәбатәкә һе баш дит, ле әв хәбат ԝе гәләк ԝәʹдә жь ԝи  бьстанда. Ләма, гава әԝ һат тʹәглиф кьрьн кӧ бьбә пешәнге мәхсус, әԝи дәрберʹа ԛәбул кьр. Мәзьне ве хәбате ԝирʹа һе зедә пʹәрә соз да, ле Ален сафикьрьна хԝә нәгӧһаст. Паше, әԝ бь хушкәкә бь наве Стефанийерʹа зәԝьщи, йа кӧ бь гәләк сала ль Франсайе мабу. Гава хушка мә дәрбази Камеруне бу, гәло әԝ рʹасти чь тәнгасийа һат?

Стефани ӧса дьбежә: «Чәнд нәхԝәшийед бьчʹук у алержийед мьн дәстпебу, ле бь сайа дәрмана кӧ мьн һәртʹьм дьхԝар, әз рʹьһʹәт бум». Гәло әԝ жьн-мер хәлата сәбра хԝә стандьн? Бәле. Ален дьбежә: «Щарәке,  әм бона хьзмәте чун гӧндәки дур бь наве Кате. Ль ԝедәре, чәнд кәса дьхԝәст Кʹьтеба Пироз һин бьбьн. Паше, мә бь ԝанрʹа һинбуна Кʹьтеба Пироз бь тәләфоне дәрбаз кьр. Жь ван хԝәндәкʹаред Кʹьтеба Пироз, дӧ кәс һатьн ньхӧмандьн, у кʹомәкә мьзгинвана һат саз кьрьн». Стефани дьбежә: «Жь ве шабуне мәзьнтьр тʹӧнә кӧ әм али мәрьва бькьн кӧ әԝ жийана хԝә бьдьн дәсте Йаһоԝа. Бь сайа хьзмәта кӧ әм ль вьр тиньн сери, мә әв дьлхԝәши гәләк щара станд». Иро, Ален бәрпьрсийаре мьһале йә у тʹәви Стефани дьчә сәрледана щьвата.

Гава Гисел һатә ньхӧмандьне, әԝ ль Италйайе дьчу занингәһе кӧ бьбә доктор. Жьн-мере кӧ һинбуна Кʹьтеба Пироз тʹәви ԝе дәрбаз кьрьбун, пешәнг бун, у ԝана бь жийанәкә сьвьк дьжит. Ве йәке ль сәр Гисел һʹӧкӧм кьр, у әԝе жи дьхԝәст хьзмәта хԝә зедә бькә. Ләма, гава әԝ һе дьчу занингәһе, әԝ бу пешәнга һәртʹьм.

Гисел дьхԝәст вәгәрʹә Камеруне, ԝәки хьзмәта хԝә һе зедә бькә, ле һьнә тьрсед ԝе һәбун. Әԝ дьбежә: «Әз дьтьрсийам кӧ әзе изна бажарванийе ӧнда бькьм у нькарьбьм вәгәрʹьм Италйайе. Ӧса жи, ԝе лазьм буйа кӧ әз жь һәвал у мәрьвед хԝә, йед кӧ ль Италйайе дьжин, дур бькʹәвьм». Диса жи, ль мәһа Гӧлане йа сала 2016, Гисел вәгәрʹийа Камеруне. Чәндәк шунда, әԝ бь бьраки бь наве Леонс мер кьр, у Бәйтʹәла Камеруне әԝ һелан кьрьн кӧ әԝана дәрбази бажаре Айосе бьбьн, чьмки ль ԝедәре мьзгинван һьндьк бун.

Жийана ль Айосе чаԝа бу? Гисел дьбежә: «Гәләк щара, әләктрик бь чәнд һʹәфтийа дьһат бьрин, у мә нькарьбу әнәржийа тәләфонед хԝә тʹьжә бькьн. Тәләфонед мә гәләк щара нәдьхәбьтин. Әз һин бум кӧ ль сәр егьр хԝарьне чекьм, у әм ниве шәве бь дәстгәрә у фәнәра дьчун сәр канийе кӧ аве бькʹьшиньн, чьмки ль ԝе сьһʹәте гәләк мәрьв тʹӧнә бу». Ԝана чаԝа нава ԝан тәнгасийада сәбьр кьр? Гисел дьбежә: «Рʹӧһʹе Йаһоԝа, мере мьн, һелана һәвал у мәрьва у аликʹарийа алийе пʹәрәда, йа кӧ нәфәред мә щарьна дьда мә, али мә дькьр».

Гәло Гисел бәхтәԝар ә кӧ әԝ вәгәрʹийа ԝәлате хԝә? Әԝ ӧса дьбежә: «Бәле! Бешьк! Серида, әм рʹасти һьнә тәнгасийа дьһатьн у мә щарьна мерхасийа хԝә ӧнда дькьр, ле ԝәʹдә шунда, әм ча бежи рʹабунә сәр пʹийа, у мә фәʹм кьр кӧ мә сафикьрьна рʹаст кьрийә. Әм хԝә дьсперьн Йаһоԝа, у әм хԝә һе незики ԝи тʹәхмин дькьн». Леонс у Гисел чун Мәкʹтәба Мьзгинванед Пʹадшатийе, у ньһа әԝ ԝәʹдәлу ԝәк пешәнгед мәхсус хьзмәт дькьн.

Ԝәк мәʹсигьред кӧ һазьр ьн, ԝәки дь ише мәʹсигьртьнеда зәʹмәте бькʹьшиньн, кәсед кӧ вәдьгәрʹьн ԝәлате хԝә жи һазьр ьн кӧ бона бәлакьрьна мьзгине фәдакʹарийе бькьн. Тʹӧ шьк тʹӧнә кӧ Йаһоԝа һʹьзкьрьна кӧ ван мьзгинванед хирәт бона наве ԝи әʹйан кьрийә, тʹӧ щар бир накә (Нәһәм. 5:19; Ибрн. 6:10). Һәгәр тӧ ԝәлате хәрибда дьжи, ле ль ԝәлате тә һʹәԝщәдарийа мьзгинвана һәйә, гәло тӧ дькари вәгәрʹи ԝәлате хԝә? Һәгәр тӧ ве йәке бьки, тӧйе бәрәкʹәтед мәзьн бьстини (Мәтʹлк. 10:22).