Муса пʹехәмбәр гот, кӧ һәрге әм гӧрʹа тʹәмийед Хԝәде дькьн, әме жь ԝи кʹәрәма бьстиньн (Ԛануна Дӧщари 10:13; 11:27). Әм нә жь бо ԝе йәке гӧрʹа Хԝәде дькьн, кӧ щәзакьрьна ԝи дьтьрсьн. Ле әм ԝи һʹьз дькьн жь бо хәйсәт-һʹӧнӧред ԝийә баш. Әԝ һʹьзкьрьн мә һелан дькә гӧрʹа ԝида бьминьн у хԝә дур бьгьрьн жь ԝан тьшта, чь кӧ ԝе дьле ԝи бешинә. «Бь ве йәке әм һʹьзкьрьна хԝә һьндава Хԝәдеда дьдьнә кʹьфше, гава әм тʹәмийед ԝи дьԛәдиньн» (1 Йуһʹәнна 5:3).

Ле гӧһдарикьрьн ԝе чь кʹәрәма мәрʹа бинә? Ԝәрен дәрһәԛа дӧ кʹәрәма шеԝьр кьн.

«Әз Йаһоԝа, Хԝәдайе тә мә, кʹижан кӧ тьштед ԛәнщ тә һин дькә у ве рʹерʹа тә дьбә, ль сәр кʹижани тӧ гәрәке һәрʹи» (ИШАЙА 48:17, ДТʹ).

Әʹфьрандаре мә, Йаһоԝа Хԝәде, рʹьнд мә нас дькә у рʹебәрийа керһати дьдә мә. Әм гәрәке жь Ньвисаред Пироз пебьһʹәсьн, ԝәки Хԝәде чь жь мә дәʹԝа дькә у ль гора ԝе йәке бьжин. Һьнге һинкьрьнед Хԝәде ԝе али мә бькьн сафикьрьнед билани бькьн.

«Хԝәзи ль ԝан, йед кӧ хәбәра Хԝәде дьбьһен у пек тиньн» (ЛУԚА 11:28).

Рʹожед мәда бь милйона мәрьв, йед кӧ ль гора Хәбәра Хԝәде дьжин, бь рʹасти бәхтәԝар ьн. Ԝәрен мәсәләкә мәрьвәки жь Испанйайе шеԝьр кьн. Әԝ һьндава мәрьвада йәки бәрзәԛ у сәрт бу, һәла һе һьндава жьна хԝәда жи. Щарәке әԝи ньвисаред Муса пʹехәмбәрда сәрһатийа дәрһәԛа Усьве кӧрʹе Аԛуб хԝәнд, йе кӧ хәйсәте хԝәда йәки нәрм бу. Усьв фьротьн дилтийе у паше жи ԝи нәһәԛ кьрьн у авитьнә кәле. Ле ԝи һале хԝәйи гьранда әԝ диса жи нәрм, әʹдьлайиһʹьз у дьлрʹәʹм бу (Дәстпебун, сәред 37-45). Әԝ мәрьве жь Испанйайе дьбежә: «Әз дьфькьрим сәр мәсәла Усьв у әве йәке әз һелан кьрьм, кӧ нав хԝәда мьлуктийе, ԛәнщийе у хԝәгьртьне пешда биньм. У ньһа әз бь рʹасти жи бәхтәԝар ьм».

Ньвисаред Пирозда гәләк ширәтед керһати тенә дайине, кӧ әм һьндава мәрийада гәрәке чаԝа бьн. Әме готара дьнда дәрһәԛа ԝе йәке һур бь һур шеԝьр кьн.