Хԝәде Бьраһим пʹехәмбәррʹа соз дабу, ԝәки бь сайа йәки жь зӧрʹәта ԝи ԝе «дӧа ль һʹәму мьләтед дьнйайе бьбә» (Дәстпебун 22:18). Гәло әԝ зӧрʹәт ԝе кʹе буйа?

Паши ԝәкә 2 000 сал, Хԝәде ԛәԝат да Иса, йе кӧ жь зӧрʹәта Бьраһим бу, ԝәки кʹәрәмәтед мәзьн бькә. Әԝан кʹәрәмәта данә кʹьфше, ԝәки әԝ созе кӧ Бьраһимрʹа һатьбу дайине, ԝе бь сайа Иса сәр мьләтед дьнйайе бе сери (Галати 3:14).

Бь сайа кʹәрәмәтед кӧ Иса дькьр, зәлал бу ԝәки һәма Иса йә әв зӧрʹәта создайи, бь сайа кʹижани кӧ Хԝәде дӧа ль һʹәму мьләтед дьнйайе бькьра. Әԝан кʹәрәмәта ӧса жи данә кʹьфше, ԝәки Хԝәде ԝе бь Иса чь щурʹәйи әԝе йәке бькә. Дина хԝә бьдьне, кʹәрәмәтед Иса кʹижан һʹӧнӧред ԝи әʹйан кьрьн.

Һʹьзкьрьн: Иса йед нәхԝәш ԛәнщ дькьрьн.

Щарәке мәрьве кʹоти лавайа Иса дькьр, ԝәки ԝи ԛәнщ кә. Иса дәсте хԝә дьреж кьр, ле кʹәт у готе: «Әз дьхԝазьм». Йе кʹоти дәрберʹа ԛәнщ бу (Марԛос 1:40-42).

Мәрʹдани: Иса мәрьв тʹер дькьрьн.

Иса нәдьхԝәст, ԝәки мәрьв бьрʹчи бьминьн. Иса чәнд щара бь кʹәрәмәти һʹәзара мәрьв пе чәнд нан у мәʹсийа тʹер кьр (Мәтта 14:17-21; 15:32-38). Паши нанхԝарьне, гава гьшк тʹер бун, гәләк хԝарьн бәр ԝан ма.

Дьлшәԝати: Иса йед мьри сах дькьрьн.

Гава Иса дит, ԝәки жьнәбийе шина кӧрʹе хԝәйи тайе-тʹәне дькьр, гӧне ԝи ле һат, чьмки тʹәне әԝ кӧрʹ бу чʹар у илаща ԝе. Ләма жи Иса кӧрʹе ԝе жь мьрьне рʹакьр (Луԛа 7:12-15).