ТӦ НАС дьки хушк у бьред кʹижан кӧ дәрбази ԝи ԝәлати бунә, кʹидәре кӧ һе зедә хьзмәткʹар лазьм ьн? Дьбәк тәрʹа һʹәԝас ә пебьһʹәси: «Гәло чь ԝана һелан кьр кӧ ԝәлате дьнда хьзмәт кьн? Гәло чаԝа ԝана хԝә һазьр дькьр бона ве йәке? Гәло әзе бькарьбьм хьзмәт кьм ԝи щурʹәйи?» Сәва кӧ щаба ԝан пьрса бьстини, һе баш ә хут жь ԝан бьпьрси, йед кӧ дәрбази ԝәлатәки дьн бунә. Ньһа әме һәма әве йәке бькьн.

Чьрʹа тә дәстпекьр бьфькьри бона ԝе йәке кӧ хьзмәт ки ԝәлатәки дьнда? Еми, ньһа ԝәкә 30 сали йә, у әԝ жь Амәрикайе йә. Әԝе гот: «Гәләк сала мьн дьхԝәст хьзмәт кьра ԝәлатәки дьнда, ле әз дьфькьрим кӧ ԝе нәйе стандьн». Гәло чаԝа бу кӧ әԝе фькьре хԝә гӧһаст? «Сала 2004-да щотәки зәԝaще, кӧ Белизеда хьзмәт дькьрьн, гази мьн кьрьн кӧ әз тʹәви ԝана мәһәке хьзмәт кьм чаԝа пешәнг. Мьн һәма ӧса жи кьр, у гәләк мьн хԝәш һат! Саләк шунда әз дәрбази Ганайе бум, ԝәки хьзмәт кьм чаԝа пешәнг».

Стефани, ньһа ԝәкә 30 сали йә. Әԝ жи жь Амәрикайе йә. Чәнд сал пешда әԝе рʹьнд дина хԝә да дәрәще хԝә у ӧса фькьри: «Сьһʹәт-ԛәԝата мьн баш ә у әз бона тʹӧ кәси малбәтеда щабдар ниньм. Әз бь рʹастийе жи һе зедә дькарьм бькьм». Әԝе бь мьлукти дина хԝә да дәрәще хԝә, у ләма һелан бу кӧ дәрбази Ганайе бә, кӧ һе зедә хьзмәт кә. Ида у Филип щоте зәԝаще нә у хьзмәт дькьн чаԝа пешәнг Дәнмаркеда. Әԝана тʹьме дьхԝәстьн дәрбази щийед ӧса бьн, кʹидәре кӧ аликʹари лазьм ә. Ԝана чь бежи дькьр ԝәки бе стандьн кӧ дәрбаз бьн. Филип гот: «Чахе һʹәму тьшт ләв һат кӧ әм бькарьбьн дәрбаз бьн, те бежи хԝәха Йаһоԝа мәрʹа гот: ‹Пешда һәрʹьн!›». Сала 2008-да, әԝана дәрбази Ганайе бунә, у ль ԝе дәре се сала зедәтьр хьзмәт кьрьнә.

 Һанс у Броук, жи щоте зәԝьщи нә, әԝана жь Амәрикайе нә у хьзмәт дькьн чаԝа пешәнг. Сала 2005-да ԝана аликʹари дьда ԝан кʹе жь Багәра Катрине зийане кʹәтьн. Паше жи әԝана ньвисин кӧ дьхԝазьн хьзмәт кьн сәр проектед авакьрьна һʹәмдьнйайе, ле гази ԝан нәкьрьн. Һанс дьбежә: «Паше мә сәр щьвата мәзьн бьһист готар дәрһәԛа Даԝьд, кӧ чахе әԝ пеһʹәсийа ԝәки әԝ ԝе пʹарьстгәһе ава нәкә, әԝи ԛәбул кьр әԝ әʹламәти у нетәкә дьн дани пешийа хԝә. Әԝе йәке али мә кьр фәʹм кьн кӧ ԝе йәкеда тьштәки хьраб тʹӧнә кӧ нетәкә дьн дайньн пешийа хԝә» (1 Дир. 17:1-4, 11, 12; 22:5-11). Броук жи зедә кьр: «Демәк Йаһоԝа дьхԝәст кӧ әм дәрики дьн хьн».

Һәвалед Һанс у Броук, йед кӧ ԝәлатед дьнда хьзмәт дькьрьн, тʹьме тьштед һʹәԝас ԝанрʹа гьли дькьрьн. Ӧса Һанс у Броук һелан бун кӧ дәрбази ԝәлатәки дьн бьн. Сала 2012 әԝана чун Ганайеда у чар мәһа аликʹари дьдан щьвата кәрʹ-лала. Паше әԝана вәгәрʹийан Амәрикайеда. Ле хьзмәткьрьна Ганайеда али ԝан кьр кӧ бәрдәԝам кьн һе зедә пʹадшатийа Хԝәде дайньн щийе пешьн. Паши ԝе йәке әԝана аликʹари дьдан бона авакьрьна филиала Микронесйайеда.

Тә чаԝа хԝә һазьр дькьр сәва дәрбази ԝи щийи би, кʹидәре кӧ аликʹари лазьм ә? Стефани * гот: «Мьн дәрһәԛа ԝе йәке һьнә готаред жь Бьрща Ԛәрәԝьлийе дьхԝәнд. Мьн дәрһәԛа хԝәстьна хԝә ԝәлате хәрибда хьзмәт кьм, хәбәрда тʹәви рʹуспийа, тʹәви бәрпьрсийаре мьһале у жьна ԝи. Хенщи ԝе йәке, мьн дәрһәԛа нета хԝә тʹьме дӧайед хԝәда Йаһоԝарʹа дьгот». Һәмьки, Стефани дәстпекьр һьндьки пʹәра хәрщ кә, у әԝ йәк али ԝе кьр һьнәк пʹәра тʹоп кә, кӧ бькарьбә ԝәлатәки дьнда хьзмәт кә.

Һанс дьбежә: «Мә дӧа дькьр Хԝәдерʹа, чьмки мә дьхԝәст бьчуна ԝи  щийи, кʹидәре кӧ Йаһоԝа рʹебәри кьра. Мә ӧса жи дӧада дьготә Йаһоԝа, дәрһәԛа ԝи ԝәхти, хут кʹәнге мә дьхԝәст дәстпекьра әԝ хьзмәткьрьн». Әԝ тʹәви жьна хԝә нәʹмә шандьн чар филиаларʹа. Паше ԝана жь филиала Ганайе щаб сьтанд у сафи кьрьн тʹәне сәр дӧ мәһа һәрʹьн. Һанс тинә бира хԝә: «Хьзмәткьрьн тʹәви ԝе щьвате ӧса мә хԝәш һат, кӧ мә сафи кьр һе гәләк ԝәхт бьминьн».

Щорщ у Адрийа, щоте зәԝьщи нә жь Канадайе. Ԝана тʹьме бира хԝәда хԝәй дькьр кӧ Йаһоԝа кʹәрәм дькә нә кӧ тʹәне нетед баш, ле ӧса жи сафикьрьнед баш. Ләма жи ԝана сафи кьр тьштәки бькьн, сәва бьгьһижнә нета хԝә. Әԝана рʹасти хушкәки һатьнә, йа кӧ Ганайеда хьзмәт дькә, у перʹа хәбәрдан сәва кӧ щабед һьнә пьрса пебьһʹәсьн. Ԝана ӧса жи ньвисин филиала Канадайерʹа у филиала Ганайерʹа. Адрийа дьбежә: «Әм дьшьрмиш дьбун, кӧ әм ча диса дькарьн әʹмьре хԝә сьвьк кьн у һе һьндьк пʹәра хәрщ кьн». Әԝ һʹәму тьшта али ԝан кьр у сала 2004-да әԝана дәрбази Ганайе бун.

Чахе һун ида дәрбаз бун, чь чәтьнайи рʹасти ԝә һатьн у ԝә ча тәйах кьр? Бона Еми, чәтьн әԝ бу кӧ әԝе бира мала хԝә дькьр. Әԝ дьбежә: «Ль ԝьр һәр тьшт щурʹәки йә, нә ӧса йә чаԝа кӧ әз һин бумә». Гәло чь али ԝе кьр? «Нәфәред мала мьн, мьнрʹа пе тʹеле хәбәр дьдан у дьготьн кӧ чьԛаси ԛимәт дькьн хьзмәтийа мьн. Әԝе йәке али мьн кьр, кӧ бир нәкьм әз чьрʹа дәрбази вьра бумә. Паше жи мьн тʹәви малбәта хԝә пе видеойе хәбәрдьда. Мә һәвдӧ дьдит у әԝ йәк али мьн кьр, те бежи әз жь ԝана  ида нә ӧса дур бум». Еми гьли кьр, кӧ ль ве дәре хушкәкә һәвалһʹьз али ԝе кьр һин бә у фәʹм бькә һьнә әʹрф-әʹдәтед ԝан. «Әԝ хушк бьбу һәваләкә баш бона мьн. Һәгәр мьн фәʹм нәдькьр кӧ мәрьв чь дьбежьн у чьрʹа ӧса дькьн, әз дьчумә бал ԝе хушке. Әԝе хушке али мьн кьр кӧ әз һин бьн чь бькьм у чь нәкьм, бь сайа ԝе йәке хьзмәта мьн бь шабуне дәрбаз дьбу».

Щорщ у Адрийа готьн кӧ чахе әԝана дәрбази Ганайе бун, ԝана тʹьре кӧ әԝана дәрбази ԝәхтәки дьн бун. Адрийа дьбежә: «Дәԝса мәкʹина бона кʹьнщшуштьне, мә тʹәшт дьда хәбате. Бәре малда мә зу хԝарьн чедькьр, ле ньһа мәрʹа дәһ щара зедәтьр ԝәхт лазьм бу». Әԝе зедә кьр: «Ле һьнәк ԝәхт дәрбаз бу у әԝ ида проблем нибу бона мә, әм һини ԝан тьшта һатьн». Броук дьбежә: «Рʹаст ә әм рʹасти һьнә чәтьнайа тен, ле әʹмьре мә баш ә у әм бәхтәԝар ьн. Әԝ һʹәму дәрәщед әʹмьре мәда, гәләк тьшта әм һин кьрьн. Әԝ мина кӧлиркед бәдәԝ ьн бира мәда, әм ԝана гәләк ԛимәт дькьн».

Чьрʹа тӧ һʹәсаб дьки кӧ әԝ хьзмәтийа гәләк баш ә, у һежа йә кӧ әм жи ӧса хьзмәт кьн? Стефани дьбежә: «Мәрьвед ӧса рʹасти мьн дьһатьн кӧ дьхԝәстьн һәр рʹож Кʹьтеба Пироз һин бьн, чьмки ԝана гәләк дьхԝәст пебьһʹәсьн дәрһәԛа рʹастийе. Хьзмәткьрьн ль щики ӧса шабунәкә гәләк мәзьн ә. Әʹмьре мьнда сафикьрьнәки лапи баш әԝ бу, кӧ әз дәрбази ԝан щийа бум, кʹидәре кӧ аликʹари лазьм бу». Сала 2014-да Стефани Аарон сьтанд у ньһа әԝана тʹавайи филиала Ганайеда хьзмәт дькьн.

«Әԝ гәләк тьштәки баш ә», дьбежә Кристин, пешәнгәк жь Алманйайе, йа кӧ ԝәкә 30 сали йә. Пешийа кӧ дәрбази Ганайе буйа, Кристине ль Боливйайе хьзмәт дькьр. Әԝе ӧса жи гот: «Әз жь малбәта хԝә дур бум, у мьн тʹьме аликʹари жь Йаһоԝа дьхԝәст. Ләма Йаһоԝа бона мьн бу кәсе һе реали. Мьн ӧса жи һе рʹьнд тʹәхмин кьр йәктийа нава щьмәʹта Хԝәдеда. Әԝ хьзмәткьрьн рʹасти жи әʹмьре мьн һе дәԝләмәнд кьр». Һьнәк ԝәхт пешда Кристине Гидәон станд у әԝана тʹәвайи ль Ганайе хьзмәт дькьн.

Филип у Ида мәрʹа гьли дькьн кӧ ԝана чь кьр, сәва кӧ шагьртед ԝан пешда һәрʹьн: «Бәре щәм мә тʹьме ԝәкә 15 йан һе зедә һинкьрьнед Кʹьтеба Пироз һәбун, ле мә кем кьр кӧ тʹәне 10 һинбун һәбә, сәва кӧ әм бькарьбьн һәр кәси рʹьнд һин кьн». Гәло әԝ йәк кʹар ани? Филип дьбежә: «Мьн һинбуна Кʹьтеба Пироз тʹәви гәде щаһьл дәрбаз дькьр, наве ԝи Микаел бу. Әԝ һәр рʹож һин дьбу у ӧса баш һазьр дьбу, кӧ мә нава мәһәкеда хьлаз кьр кʹьтеба ‹Чь Һин Дькә Кʹьтеба Пироз?›. Паше әԝ бу мьзгинване нәньхӧманди. Чахе рʹожа пешьн әм дәркʹәтьн хьзмәтийе, әԝи мьнрʹа гот: ‹Тӧ дькари тʹәви мьн бейи сәр һинкьрьнед мьн?› Әз әʹщебмайи мам. Паше Микаел мьнрʹа шьровәкьр кӧ 3 һинкьрьнед ԝи һәнә у ԝирʹа лазьм ә аликʹари кӧ чаԝа дәрбаз кә». Бьдьнә һʹәсабе хԝә кӧ дәрсдаред Кʹьтеба пироз һаԛас лазьм ьн, кӧ хԝәндәване Кʹьтеба Пироз һьм хԝәха шагьрт ьн, һьм жи дәрсдар.

Еми гьли дькә кӧ чаԝа әԝе хԝәха дит кӧ аликʹари гәләк лазьм ә: «Паши ԝе йәке кӧ әм дәрбази Ганайе бунә, һьнәк ԝәхт шунда мә хьзмәт дькьр гӧндәки бьчʹукда у дьгәрʹийан һәла ль ԝьр кәрʹ-лал һәнә йан на. Тʹәне ԝи гӧндәкида мә нәһ мәрьвед кәрʹ-лал дит!» Паше Еми у Ерик һәв стандьн у тʹәвайи чаԝа пешәнгед мәхсус хьзмәт дькьрьн. Әԝана щьвата кәрʹ-лалада бун у аликʹари дьдан 300 мьзгинванед кәрʹ-лала, у ӧса жи мәрьвед кӧ Кʹьтеба Пироз һин дьбун. Хьзмәткьрьна Ганайеда мәщаләкә баш да ԝан кӧ әԝана тәʹм кьн чь йә хьзмәткьрьна чаԝа мисйонер. Әԝана гәләк ша бун чахе һатьн тʹәглифкьрьне сәр мәкʹтәба Гиләд! Ньһа әԝана хьзмәт дькьн чаԝа мисйонер Мозамбикда.

Мә дит чьԛас хушк у бьра жь щурʹә-щурʹә ԝәлата ԛәԝи дьхәбьтьн, кӧ нандрунеда али хушк бьред дьн бькьн, у әԝ йәк бешьк дьле мә гәрм кьр (Йуһʹн 4:35). Ньһа һәр һʹәфти Ганайеда ԝәкә 120 мәри тенә ньхӧмандьне. Ԝәкә 17 мьзгинванед жь ԝәлатед дьн дәрбази Ганайе бунә. Һʹьзкьрьна һьндава Йаһоԝа һелан кьр ԝана у диса бь һʹәзара хушк у бьред дьн, кӧ «бь рʹәзәдьли хьзмәт кьн» ль ԝе дәре, кʹидәре аликʹари лазьм ә. Бь рʹастийе жи, әԝ хьзмәткʹаред рʹәзәдьл, пʹьрʹ дьле Йаһоԝа ша дькьн! (Зәб. 110:3; Мәтʹлк. 27:11).