Йаһоԝа бь Һәзәԛел пʹехәмбәр гот кӧ щьмәʹта Исраел, ԝе вәгәрʹьнә Әʹрде Создайи у чаԝа щьмәʹтәк диса тʹәви һәв бьн. Әԝ пʹехәмбәрти ӧса жи һатә готьне дәрһәԛа йәктийа щьмәʹта Хԝәде, ԝәʹде рʹожед ахьрийеда.

Йаһоԝа готә Һәзәԛел ԝәки әԝ дӧ дара һьлдә у сәр ԝан бьньвисә. Сәр дарәки әԝи гәрәке бьньвисийа, «Бона Щьһудайе у бона лаԝед Исраел йед кӧ һәвалед ԝи нә», у сәр йе дьн бьньвисә, «Бона Усьв чойе [даре] Әфрайим у бона һʹәмуйа мала Исраеле йед һәвалед ԝи». Әԝ дӧ дар әԝи гәрәке тʹәвкьра, сәва әԝ дар дәсте ԝида «йәк бьбьн» (Һәзԛл. 37:15-17).

 Ле кʹе дьһатә һʹәсабе «Әфрайим»? Бәрәка Әфрайим жь һʹәму бәрәкед Исраели йа сәрәкә бу. Пʹадшайе пешийе сәр пʹадшатийа бакʹурейә дәһ бәрәки, Йәровам бу, кʹижан кӧ жь бәрәка Әфрайим бу (Ԛан. Дщр. 33:13, 17; 1 Пʹадш. 11:26). Әԝ бәрәк жь Әфрайиме кӧрʹе Усьв дәркʹәт (Жьмар 1:32, 33). Усьв жь баве хԝә Аԛуб кʹәрәма мәхсус сьтанд. Ләма фәʹмдари йә кӧ даре «Әфрайим» бь симболик дьһатә һʹәсабе пʹадшатийа бакʹурейә дәһ бәрәки. Пешийа кӧ Һәзәԛел әԝ пʹехәмбәртийа дәрһәԛа дӧ дара бьньвисийа, Ашурийа пʹадшатийа Исраелейә дәһ бәрәки зәфт кьрьн, у щьмәʹт дилти бьрьн. Әԝ йәк сала 740 Б.Д.М. ԛәԝьми (2 Пʹадш. 17:6). Паше һьнә ԝәʹдә шунда, Бабилонийа Империйа Ашуре зәфт кьрьн. У ләма чахе Һәзәԛел әԝ пʹехәмбәрти ньвиси бу, һʹәчʹи зәʹф Исраели нава Империйа Бабилонеда бәлабуйи бун.

Сала 607 Б.Д.М., Бабилонийа пʹадшатийа башурейә Щьһуда йа дӧ бәрәки, зәфт кьрьн, у щьмәʹт дилти бьрьн. Дьԛәԝьмә кӧ Бабилонийа ӧса жи һьнәкед жь пʹадшатийа бакʹуре дилти бьрьн. Пʹадшед пʹадшатийа башуре, жь бәрәка Щьһуда бун. У һʹәму кʹаһинти, йед кӧ пʹарьстгәһеда хьзмәт дькьрьн, пьштгьрийа ԝан дькьрьн (2 Дир. 11:13, 14; 34:30). Демәк әʹйан ә кӧ әԝ пʹадшатийа дәһ бәрәки, те һʹәсабе даре «бона Щьһудайе».

Ле гәло кʹәнге әԝ дӧ дар тʹәви һәв бун? Әԝ йәк сала 537 Б.Д.М., ԛәԝьми, чахе Исраелийа жь дилтийа Бабилоне аза бун у вәгәрʹийанә сәва кӧ тʹәзәда пʹарьстгәһе ава кьн. Ԝи чахи әԝ һәр дӧ пʹадшати, демәк йа бакʹуре у йа башуре, тʹәви һәв бун. Демәк, щьмәʹта Исраел ида бәлабуйи нибу (Һәзԛл. 37:21, 22). Әԝана диса жи йәктийеда Йаһоԝа дьһʹәбандьн. Әԝ йәкти ӧса жи һатә пʹехәмбәртикьрьне бь Ишайа у Йерәмйа пʹехәмбәр (Иша. 11:12, 13; Йерәм. 31:1, 6, 31).

Әԝ пʹехәмбәртийа Һәзәԛел чь әʹйан кьр дәрһәԛа һʹәбандьна рʹаст? Әв пʹехәмбәрти әʹйан кьр кӧ Йаһоԝа ԝе ӧса бькә, ԝәки һʹәму хьзмәткʹаред ԝи «бьбьнә йәк» (Һәзԛл. 37:18, 19). Ле гәло әԝ йәкти кӧ Хԝәде соз да, ԝәʹде мәда жи һатә сери? Бәле. Әԝ пʹехәмбәрти сала 1919 дәстпебу бе сери. Пешийа ԝе йәке Шәйтʹан дьхԝәст щьмәʹта Хԝәде бь тʹәмами жь һәв бәла кә, ле жерʹа һәв нәһат. Сала 1919 Хԝәде щьмәʹта хԝә паԛьж кьр, тʹәзәда организә кьр, у диса әԝана кьрьнә йәк.

Ԝи чахи һʹәчʹи зәʹф жь щьмәʹта Хԝәде, йед кӧ бунә йәк, һивийе бун кӧ ԝе тʹәви Иса сәр әʹзмана бьбьнә пʹадша у кʹәшиш (Әʹйан. 20:6). Бь симболик, әԝана мина даре бона Щьһуда бун. Ле ԝәʹдә дәрбаз дьбу, у әԝед кӧ һивийа жийина сәр әʹрде бун, һе зедә у зедә дьбун, у тʹәви Щьһуйед рʹӧһʹани дьбун (Зәкәр. 8:23). Әԝана бь симболик мина даре бона Усьв бун, у әԝана һивийе нибун кӧ тʹәви Иса ԝе сәрԝертийе бькьн.

Иро әԝ һәрдӧ кʹом тʹәвайи йәктийеда Йаһоԝарʹа хьзмәт дькьн. Пʹадшайе ԝан йәк ә, Иса Мәсиһ. Пʹехәмбәртийа Һәзәԛелда Йаһоԝа сәр Иса дьбежә «ԛуле [хьзмәткʹаре] мьн Даԝьд» (Һәзԛл. 37:24, 25). Иса сәва пәйчуйед хԝә, Баве хԝәрʹа дӧа дькьр, кӧ әԝана «һʹәму жи бьбьнә йәк» * (Йуһʹн. 17:20, 21). Иса ӧса жи пʹехәмбәрти кьр кӧ кәрийе ԝийи бьчʹук, демәк рʹункьри, ԝе тʹәви «пәзед дьн . . . бьбьнә кәрик». У әԝ «кәрик» ԝе бьн рʹебәрийа «шьванәки» бьн (Йуһʹн. 10:16). Чаԝа кӧ Иса гот, иро щьмәʹта Хԝәде йәктийеда ньн, у фьрԛи тʹӧнә әԝана һивийа жийина сәр әʹзмана нә йан сәр әʹрде!