1. Әм чь сәр хԝә тʹәхмин дькьн кӧ Йаһоԝа изьн дайә мә, ԝәки ԝирʹа дӧа бькьн?

 ДӦА пʹешкʹешәкә гәләк ԛимәт ә, чьмки бь сайа ве, әм дькарьн Әʹфьрандаре әʹрд у әʹзманарʹа аза дӧа бькьн. Һәла бьфькьрә: Сьһʹәт чь бә жи у әм кʹидәре бьн жи, әм дькарьн дьле хԝә Йаһоԝарʹа вәкьн. Йаһоԝа һәр зьмани фәʹм дькә, у пешийа кӧ әм дӧа бькьн, нә лазьм ә ԝәки әм жь ԝи изьне бьстиньн. Һәрге әм нәхԝәшханеда йан кәледа бьн жи, Баве мәйи дьлован һәртʹьм гӧһ дьдә дӧайед мә. Әм бона ве пʹешкʹеша ԛимәт гәләк рʹази нә!

2. Даԝьд Пʹадша ча нишан дькьр, ԝәки әԝ мәщала дӧа ԛимәт дькә?

² Даԝьд Пʹадша мәщала дӧа гәләк ԛимәт дькьр. Әԝи Йаһоԝарʹа ӧса гот: «Бьра дӧайе мьн мина бьхуре ль бәр Тә бе ԛәбулкьрьне» (Зәбур 141:1, 2). Рʹожед Даԝьдда, бьхура пироз, йа кӧ жь алийе кʹаһинава бона һʹәбандьне дьһатә хәбьтандьне, фәсал дьһатә һазьркьрьне (Дәркʹәтьн 30:34, 35). Мина ве йәке, Даԝьд дьхԝәст хәбәред дӧайед хԝә жи рʹьнд бьжберә. Хԝәстьна мә жи әв ә, чьмки әм жи дьхԝазьн ԝәки дӧайед мә Йаһоԝа хԝәш бен.

3. Гава әм Йаһоԝарʹа дӧа дькьн, гәрәке әм чь бир нәкьн?

³ Чахе әм Йаһоԝарʹа дӧа дькьн, гәрәке әм бь ԛәдьр хәбәр дьн. Ԝәрә әм дина хԝә бьдьнә хәԝн-хәйала Ишайа, Һәзәԛел, Данийел у Йуһʹәнна. Әв хәԝн-хәйал чьԛас жь һәв щӧдә бьн жи, әԝ аликива мина һәв ьн. Ван хәԝн-хәйалада Йаһоԝа ча Пʹадшаки мәзьн әʹйан дьбә. Мәсәлә, хәԝн-хәйала Ишайа пʹехәмбәрда, Йаһоԝа «ль сәр тʹәхтәки бьльнд у мәзьн рʹуньшти» бу (Ишайа 6:1-3). Хәԝн-хәйала Һәзәԛел  пʹехәмбәрда, Йаһоԝа ль сәр әʹрәбәйа хԝә йа әʹзмани рʹуньшти бу, у дәр-дора ԝи мина кʹәскәсор дьбьрьԛи (Һәзәԛел 1:26-28). Хәԝн-хәйала Данийелда, «Йе Һәрһәйи» бь кʹьнще сьпи хӧйа дькьр у тʹәхте ԝи мина алава агьр дьшьхӧли (Данийел 7:9, 10, ИМ). Хәԝн-хәйала Йуһʹәннайе шандида, Йаһоԝа ль сәр тʹәхтәки рʹуньшти бу, у «кʹәскәсоре жи дора тʹәхт гьртьбу, мина ишьԛа зьмруде» (Әʹйанти 4:2-4). Гава әм рʹумәта Йаһоԝайә мәзьн дьдьн бәр чʹәʹве хԝә, әм фәʹм дькьн ԝәки дӧа ԛәдьрәки чьԛас мәзьн ә. Ләма жи гәрәке әм бь ԛәдьр Ԝирʹа дӧа бькьн. Гәло чь щурʹәйи?

4. Готьнед пешьн жь дӧайе кӧ Иса шагьртед хԝә һин кьр, чь мә һин дькьн?

⁴ Мәтта 6:9, 10 бьхунә. Ԝәʹде хьзмәтийа сәр Чʹийе, Иса шагьртед хԝәрʹа гот, кӧ әԝана гәрәке ча дӧа бькьн, ԝәки Хԝәде жь ԝан рʹази бә. Йа пешьн, Иса бәʹса чәнд тьштед фәрз кьр, йед кӧ рʹастә-рʹаст нета Йаһоԝава гьредайи нә: Әԝ һәйә пирозкьрьна наве Хԝәде, һатьна Пʹадшатийа Ԝи, йа кӧ ԝе һʹәму дьжмьнед Хԝәде ԛьрʹ кә у кʹәрәмед кӧ әԝе сәр әʹрде у сәр инсанәтеда бьбаринә. Ԝе баш бә ԝәки әм жи дӧайед хԝәда бәʹса тьштед ӧса бькьн. Бь ви щурʹәйи, әм дькарьн нишан кьн, кӧ ԛьрара Хԝәде бона мә чьԛас фәрз ә.

5. Гәло Йаһоԝа дӧайе мә дьбьһе, гава әм бона тьште шәхси дӧа дькьн?

⁵ Паше, Иса нишан кьр кӧ әм дькарьн дәрһәԛа тьштед шәхси жи дӧа бькьн. Мәсәлә, әм дькарьн жь Йаһоԝа рʹәща бькьн, ԝәки әԝ нане рʹоже бьдә мә, гӧнед мә бьбахшинә, мә жь щерʹьбандьна бьпарезә у жь дәсте Мире-щьна хьлаз кә (Мәтта 6:11-13). Гава әм бона ван тьшта Йаһоԝарʹа дӧа дькьн, әм нишан дькьн, ԝәки әм бей ԝи нькарьн у кӧ әм дьхԝазьн дьле ԝи ша кьн.

6. Гәло гәрәке әм тʹәне бона ван тьшта дӧа бькьн, чь кӧ Иса дӧада әм һин кьрьн? Шьровәкә.

⁶ Иса шагьртед хԝәрʹа нәгот, ԝәки әԝана гәрәке хәбәред ви дӧайи кӧ әԝи ԝана һин кьр, бьԝәкʹьлиньн. Дӧайед дьнда, Иса бәʹса тьштед дьн дькьр, йед  кӧ ԝе дәме бона ԝи фәрз бун (Мәтта 26:39, 42; Йуһʹәнна 17:1-26). Әм жи дькарьн дӧайед хԝәда бәʹса һʹәму дәрдед хԝә бькьн. Гава лазьм ә кӧ әм сафикьрьнәке бькьн, әм дькарьн дӧа бькьн кӧ Йаһоԝа биланийе бьдә мә (Зәбур 119:33, 34). Пешийа кӧ әм шьхӧләки чәтьн бькьн, әм дькарьн дӧа бькьн, ԝәки Әԝ рʹебәрийа мә бькә (Мәтʹәлок 2:6). Де-бав дькарьн бона зарʹед хԝә дӧа бькьн, зарʹ дькарьн бона де-баве хԝә дӧа бькьн, у әм гьшк дькарьн бона хԝәндәкʹаред хԝә у бона йед кӧ әм хьзмәтийеда рʹасти ԝан тен, дӧа бькьн. Ле һәмьки гәрәке әм нә тʹәне тьшта жь Йаһоԝа дәʹԝа кьн.

7. Чьма лазьм ә ԝәки әм дӧайед хԝәда пәсьне Йаһоԝа бьдьн?

⁷ Гава әм дӧа дькьн, гәрәке әм бир нәкьн кӧ пәсьне Йаһоԝа бьдьн. Хԝәде бь рʹасти жи һежайи һʹәму пәсьна йә. Кʹьтеба Пироз дәрһәԛа ԝи ӧса дьбежә: «Тӧ Хӧдано, ԛәнщ у афу кьр и . . . Хԝәдейе рʹәʹме у дьлшәԝатийе» (Зәбур 86:5, 15). Бәле, гәләк мәʹни һәнә кӧ әм пәсьне Йаһоԝа бьдьн, һьм бона һʹӧнӧред ԝи, һьм жи бона кьред ԝи.

8. Әм дькарьн бона чь жь Йаһоԝа рʹазибуна хԝә бьдьнә кʹьфше? (Зәбур 104:12-15, 24)

⁸ Хенщи ве йәке кӧ әм дӧайед хԝәда пәсьне Йаһоԝа дьдьн, әм дьхԝазьн ԝирʹа бона һʹәму тьшти, чь кӧ әԝи данә мә, рʹази бьн. Мәсәлә, әм дькарьн бона бах у кӧлиркед бәдәԝ, бона хԝарьнед тәʹм у бона һәвалед ԛимәт, рʹазибуна хԝә бьдьнә кʹьфше. Баве мәйи дьлован ван тьшта у гәләк тьштед дьн дьдә мә, ԝәки әм ша бьн (Зәбур 104:12-15, 24 бьхунә). Ле йа һәри фәрз әԝ ә, кӧ әм дькарьн Йаһоԝарʹа рʹази бьн, чьмки әԝ тʹер-тʹьжә хԝарьна рʹӧһʹани дьдә мә у һевийа лапә баш дайә мә.

9. Чь дькарә али мә бькә, ԝәки әм бир нәкьн кӧ рʹазибуна хԝә Йаһоԝарʹа бьдьнә кʹьфше? (1 Тʹесалоники 5:17, 18)

⁹ Гәло чь дькарә али тә бькә, ԝәки тӧ кʹәрәмед Йаһоԝа бир нәки? Мәсәлә, тӧ дькари хԝәрʹа бьньвиси кӧ тә бона чь дӧа кьрьбу у паше бьньһерʹи ԝәки Йаһоԝа ча щаба дӧайед тә дайә. Паше,  рʹазибуна хԝә ԝирʹа бьдә кʹьфше (1 Тʹесалоники 5:17, 18 бьхунә). Гава кәсәк рʹазибуна хԝә мәрʹа дьдә кʹьфше, гәло әм ша набьн? Мина ве йәке, гава әм шекьрдар бьн у рʹазибуна хԝә Йаһоԝарʹа нишан кьн, кӧ әԝ щаба дӧайед мә дьдә, дьле ԝи ԝе гәләк ша бә (Колоси 3:15). Диса бона кʹижан тьштәки фәрз әм гәрәке жь Хԝәде рʹази бьн?

10. Ль гора 1 Пәтрус 2:21, гәрәке әм чьрʹа рʹази бьн, кӧ Йаһоԝа Кӧрʹе хԝә шандә сәр әʹрде?

¹⁰ 1 Пәтрус 2:21 бьхунә. Гәрәке әм жь Йаһоԝа рʹази бьн, чьмки әԝи Кӧрʹе хԝәйи дәлал шанд кӧ мә һин кә. Чахе әм жийина Иса леколин дькьн, әм дәрһәԛа Йаһоԝа гәләк тьшт педьһʹәсьн, у әм фәʹм дькьн кӧ гәрәке чь бькьн, ԝәки әԝ жь мә рʹази бә. Һәрге әм баԝәрийа хԝә ԛӧрбана Иса биньн, әм дькарьн бьбьнә достед Йаһоԝа Хԝәде у тʹәви Ԝи әʹдьлайеда бьн (Рʹомайи 5:1).

11. Чьма фәрз ә кӧ әм бь наве Иса Мәсиһ Йаһоԝарʹа дӧа бькьн?

¹¹ Әм жь Йаһоԝа рʹази нә кӧ әм дькарьн бь наве Кӧрʹе ԝи, ԝирʹа дӧа бькьн. Бь сайа Иса, Йаһоԝа щаба дӧайед мә дьдә. Гава әм бь наве Иса дӧа дькьн, Йаһоԝа мә дьбьһе. Иса ӧса готьбу: «Пе наве мьн һун чь бьхԝазьн, әзе бькьм, ԝәки Бав пе Кӧрʹ бе рʹумәткьрьне» (Йуһʹәнна 14:13, 14).

12. Диса чьрʹа әм гәрәке бона ԛӧрбана Иса рʹази бьн?

¹² Йаһоԝа сәр һʹиме ԛӧрбана Иса гӧнед мә дьбахшинә. Ль гора Ньвисаред Пироз, Иса Мәсиһ Сәрәккʹаһине мә йә, «кӧ ль әʹзмана сәр тʹәхте мәзьнайийа Хԝәдейә рʹасте рʹуньштийә» (Ибрани 8:1). Иса кʹеләка Баве мә Йаһоԝа йә, у пьштгьрийа мә дькә (1 Йуһʹәнна 2:1). Әм гәләк жь Йаһоԝа рʹази нә, кӧ Әԝи Сәрәккʹаһинәки ӧса дьлован кʹьфш кьрийә, йе кӧ кемасийед мә фәʹм дькә у бона мә рʹәща дькә (Рʹомайи 8:34; Ибрани 4:15). Әм мәрьвнә гӧнәкʹар ьн, ләма жи мәйе нькарьбуйа бе ԛӧрбана Иса Мәсиһ Йаһоԝарʹа дӧа бькьра. Бәле, хәбәр тʹера мә накьн, ԝәки әм рʹазибуна хԝә бона ԛӧрбана Иса бьдьнә кʹьфше!

13. Шәва пешийа мьрьна хԝә, Иса чаԝа нишан кьр кӧ шагьртед хԝә һʹьз дькә?

¹³ Шәва пешийа мьрьна хԝә, Иса бона шагьртед хԝә дьреж дӧа кьр. Әԝи жь Баве хԝә рʹәща кьр, ԝәки әԝ ԝана жь Мире-щьна хԝәй кә (Йуһʹәнна 17:15). Әв йәк нишан дькә кӧ Иса чьԛас ԝана һʹьз дькьр. Рʹаст ә әԝ һʹаләки гәләк гьранда бу, ле йәкә әԝи бона шандийед хԝә хәм дькьр.

14. Әм ча дькарьн нишан кьн, ԝәки әм хушк-бьра һʹьз дькьн?

¹⁴ Мина Иса гәрәке әм жи нә тʹәне дәрһәԛа һʹәԝщед хԝә бьфькьрьн. Ԝе баш бә кӧ әм һәр гав бона хушк-бьра жи дӧа бькьн. Бь ве йәке, әм дькарьн нишани Йаһоԝа бькьн, кӧ әм гӧһ дьдьн тʹәмийа Иса, ԝәки һәвдӧ һʹьз бькьн (Йуһʹәнна 13:34). Дӧайед бона хушк-бьра бадиһәԝа ниньн. Хәбәра Хԝәде дьбежә кӧ «дӧайе йе рʹаст гәләки ԛәԝат ә у һʹӧкӧм дькә» (Аԛуб 5:16).

15. Хушк-бьред мә чьма һʹәԝще дӧайед мә нә?

¹⁵ Сәр тʹәмамийа дьнйайе хушк-бьред мә рʹасти гәләк тәнгасийа тен. Ләма жи, әԝана һʹәԝще дӧайед мә нә.  Әм дькарьн жь Йаһоԝа рʹәща бькьн, кӧ әԝ али ԝан бькә, ԝәки әԝана бәр нәхԝәши, тʹәшԛәлед тʹәбийәте, шәрʹ, пәйкʹәтьн у тәнгасийед дьн, сәбьр бькьн. Ӧса жи, әм дькарьн бона ԝан хушк-бьра дӧа бькьн, йед кӧ али кәсед дәсттәнг дькьн. Һәрге тӧ һьнә жь ван хушк-бьра шәхси нас дьки, тӧ дькари илаһи бона ԝан дӧа бьки. Әв йәк кӧ тӧ жь Йаһоԝа рʹәща дьки ԝәки әԝ али ԝан бькә, нишан дькә, ԝәки тӧ бь рʹасти ԝана һʹьз дьки.

16. Чьрʹа әм гәрәке бона бьред щабдар дӧа бькьн?

¹⁶ Бьред кӧ рʹебәрийа щьвате дькьн, гәләк дьшекьриньн гава әм бона ԝан дӧа дькьн. Бь рʹасти жи, һʹӧкӧме дӧа гәләк мәзьн ә. Паԝлосе шанди жи заньбу кӧ әԝ һʹәԝще дӧайед хушк-бьра йә. Әԝи ӧса ньвиси: «Бона мьн жи дӧа бькьн, кӧ гава әз хәбәр дьм, готьнәк мьнрʹа бе дайине, ԝәки меркʹими сӧрʹа Мьзгинийе әʹйан кьм» (Әфәси 6:19). Иро жи гәләк бьред жир һәнә, йед кӧ гәләк шьхӧл дькьн у рʹебәрийа мә дькьн. Гава әм жь Йаһоԝа рʹәща дькьн, ԝәки әԝ шьхӧле ԝан кʹәрәм бькә, әм нишан дькьн кӧ әм ԝана һʹьз дькьн.

17-18. Гава әм бәр кәсед дьн дӧа дькьн, гәрәке әм чь бир нәкьн?

¹⁷ Щарна лазьм ә, ԝәки әм бәр кәсед дьн дӧа бькьн. Мәсәлә, бьдә бәр чʹәʹве хԝә, кӧ дӧ хушк дьчьн сәр һинбунәкә Кʹьтеба Пироз. Хушка кӧ һинбуне дәрбаз дькә, хушка дьнрʹа дьбежә ԝәки әԝ дӧа бькә. Һәрге хушка аликʹар, ве хԝәндәкʹаре һәла һе рʹьнд нас накә, дьбәкә дьһа баш бә кӧ әԝ паши дәрсе дӧа бькә. Әв йәк ԝе али ԝе бькә, ԝәки ль гора һʹәԝщед хԝәндәкʹаре дӧа бькә.

¹⁸ Гава бьрарʹа щабдари те дайине, ԝәки щьватеда йан ԝәʹде щьвинед бона хьзмәтийе дӧа бькьн, гәрәке әԝана бир нәкьн кӧ нета щьвине чь йә. Нәщайиз ә ԝәки бьра дӧада ширәта бьдә йан жи дәрһәԛа тьштәки әʹлам бькә. Бона һʹәчʹи зәʹф щьвата, бь тʹәмами 5 дәԛә те дайине бона кʹьлам у дӧа,  ләма жи нә лазьм ә ԝәки бьре кӧ дӧа дькә, готьнед хԝә дьреж кә, илаһи чахе щьвин дәстпедьбә (Мәтта 6:7).

19. Чь ԝе али мә бькә, ԝәки әм бона рʹожа Йаһоԝа һазьр бьн?

¹⁹ Чьԛас әм незики рʹожа Йаһоԝа дьбьн, һаԛас һе зедә әм гәрәке дӧа бькьн. Иса ӧса готьбу: «Һʹьшйар бьминьн у һәр гав дӧа бькьн, ԝәки һун бькарьбьн жь ԝан һʹәму тьштед кӧ ԝе бьԛәԝьмьн бьрʹәвьн-хьлаз бьн» (Луԛа 21:36). Бәле, ԝе баш бә кӧ әм бәрдәԝам кьн дӧа бькьн, ԝәки әм рʹӧһʹанида һʹьшйар бьминьн у бона рʹожа Хԝәде һазьр бьн.

20. Дӧайед мә чаԝа дькарьн мина бьхура бинхԝәш бьн?

²⁰ Ве готареда әм чь һин бун? Әм пʹешкʹеша дӧа гәләк ԛимәт дькьн. Дӧайед хԝәда, ԝе баш бә ԝәки әм һәри зедә дина хԝә бьдьн тьштед кӧ рʹастә-рʹаст ԛьрара Йаһоԝава гьредайи нә. Ӧса жи ԝе баш бә кӧ әм рʹазибуна хԝә нишан кьн сәва Кӧрʹе Хԝәде у Пʹадшатийа ԝи. Гәләк фәрз ә кӧ әм бона хушк-бьра дӧа бькьн. Әм һьлбәт дькарьн бона һʹәԝщед хԝәйә физики у рʹӧһʹани жи дӧа бькьн. Дӧа бь рʹасти жи пʹешкʹешәкә мәзьн ә, ләма жи ԝе баш бә ԝәки әм рʹьнд бьфькьрьн, һәла әме дӧайед хԝәда чь бежьн. Һәрге әм ӧса бькьн, Йаһоԝа ԝе дӧайед мә мина бьхура бинхԝәш һʹәсаб кә. Бәле, «дӧайе рʹаста ль бәр дьле Ԝида ширьн ә» (Мәтʹәлок 15:8).