1. Дәмәкә кьн паши кӧ Адәм у Һеԝайе гӧнә кьрьн, Йаһоԝа чь кьр? (Дәстпебун 3:15)

 ДӘМӘКӘ кьн паши кӧ Адәм у Һеԝайе гӧнә кьрьн, Йаһоԝа бь сайа пʹехәмбәртике һеви да зӧрʹәта ԝан. Готьнед ԝи Дәстпебун 3:15-да һатьнә ньвисаре (бьхунә).

2. Әв пʹехәмбәрти чьрʹа фәрз ә?

² Әв пʹехәмбәрти Кʹьтеба Пирозда, кʹьтеба пешьнда ньвисар ә. Бь рʹасти һʹәму кʹьтебед дьн, йед Хәбәра Хԝәде бь готьнед Дәстпебун 3:15-ва гьредайи нә. Готьнед ве рʹезе нишан дькьн, кӧ Хԝәде ԝе Хьлазкʹарәки бьшинә, ԝәки Мире-щьна у һʹәму пьштгьред ԝи ԛьрʹ кә. * Әв йәк ԝе бона достед Йаһоԝа кʹәрәмәкә гәләк мәзьн бә!

3. Ве готареда, әме дәрһәԛа чь хәбәр дьн?

³ Ве готареда, әме щабед ван пьрсед дәрһәԛа готьнед жь Дәстпебун 3:15 бьстиньн: Кәсед кӧ әв рʹез бәʹса ԝан дькә, кʹе нә? Әв пʹехәмбәрти чаԝа те сери? Әм чаԝа жь пекһатьна ве пʹехәмбәртийе кʹаре дьстиньн?

4. «Мәʹр» кʹе те һʹәсабе, у әм ве йәке жь кʹӧ заньн?

⁴ Дәстпебун 3:14, 15 гьли дькә дәрһәԛа «мәʹр», «зӧрʹәта» мәʹр, «кʹӧлфәт» у «зӧрʹәта» кʹӧлфәте. Кʹьтеба Пироз мәрʹа зәлал дькә, кӧ бь симболик әԝана кʹе тенә һʹәсабе. * Йа пешьн, ԝәрә әм бьвиньн  кӧ «мәʹр» кʹе те һʹәсабе. Те кʹьфше кӧ әв рʹез бәʹса мәʹрәки реали накә, чьмки һʹәйԝан ԝе нькарьбуйа готьнед Йаһоԝа Хԝәде фәʹм кьра. Ләма жи әшкәрә йә, кӧ Йаһоԝа фәрмана хԝә дабу әʹфринәки хԝәйифәʹм. Гәло әв әʹфрин кʹи йә? Әʹйанти 12:9 рʹастә-рʹаст дьбежә, кӧ әв «мәʹре бәре», Мире-щьна йә. Ле гәло зӧрʹәта мәʹр кʹи йә?

5. Зӧрʹәта мәʹр кʹи нә?

⁵ Кәсед кӧ чʹәʹв дьдьнә ньһерʹандьн у рʹабун-рʹуньштьна кәсәки, Кʹьтеба Пироз ԝана бь симболик ча «зӧрʹәта» ԝи нав дькә. Ләма жи һʹәму мәләк у мәрьв, йед кӧ дьжмьнед Хԝәде у хьзмәткʹаред ԝи нә, пʹара зӧрʹәта мәʹр ьн. Мәсәлә, һьм мәләк, йед кӧ рʹожед Нӧһда кʹьфшкьрьна хԝә һиштьн у дакʹәтьн сәр әʹрде, һьм жи мәрьвед кӧ чʹәʹв дьдьнә баве хԝә, Мире-щьна, зӧрʹәта мәʹр ьн (Дәстпебун 6:1, 2; Йуһʹәнна 8:44; 1 Йуһʹәнна 5:19; Щьһуда 6).

6. Әм жь кʹӧ заньн кӧ «кʹӧлфәт» Һеԝа нинә?

⁶ Гәло «кʹӧлфәт» кʹи йә? Әшкәрә йә кӧ Һеԝа нинә, чьмки рʹез дьбежә кӧ зӧрʹәта кʹӧлфәте ԝе сәре мәʹр «бьһʹьнщьрʹинә». Ле чаԝа мә дит, мәʹр Мире-щьна йә, у тʹӧ мәрьвәки гӧнәкʹар жь зӧрʹәта Һеԝайе нькарә сәре ви мәләке хьраб бьһʹьнщьрʹинә. Ле гәло Мире-щьна ԝе ча бе ԛьрʹкьрьне?

7. Чаԝа кӧ Әʹйанти 12:1, 2, 5, 10 нишан дькьн, әв кʹӧлфәта жь Дәстпебун 3:15 кʹе йә?

⁷ Кʹьтеба пашьн йа Кʹьтеба Пироз зәлал дькә, ԝәки кʹӧлфәт, дәрһәԛа кʹижане Дәстпебун 3:15-да те готьне, кʹе йә (Әʹйанти 12:1, 2, 5, 10 бьхунә). Әв кʹӧлфәт мәрьв нинә. Ль гора рʹезе, «һив бьне пʹийада» йә у «кʹофикә жь  донздәһ стәйрка жи ль сери бу». Жерʹа зарʹәкә мәхсус дьбә, демәк Пʹадшатийа Хԝәде. Пʹадшати йа әʹзмани йә, ләма гәрәке кʹӧлфәт жи әʹзмани бә. Бь ве йәке әм фәʹм дькьн кӧ кʹӧлфәт, пʹара әʹзмани йа тʹәшкиләта Йаһоԝа йә, йа кӧ жь мәләкед амьн ә (Галати 4:26).

8. Пʹара сәрәкә йа зӧрʹәта кʹӧлфәте кʹи йә, у әԝ кʹәнге бу пʹара ве зӧрʹәте? (Дәстпебун 22:15-18)

⁸ Хәбәра Хԝәде мәрʹа әʹйан дькә, кӧ зӧрʹәта сәрәкә йа кʹӧлфәте кʹи йә. Кʹьтеба Пирозда һатьбу пʹехәмбәртикьрьне, ԝәки әв кәсе создайи ԝе жь зӧрʹәта Бьраһим бе (Дәстпебун 22:15-18 бьхунә). Ль гора ве пʹехәмбәртийе, Иса һәма жь рʹькʹьнийата ви мере амьн бу (Луԛа 3:23, 34). Ле сәва кӧ зӧрʹәт бькарьбә Мире-щьна кʹӧта кә, гәрәке әԝ жь мәрьва ԛәԝаттьр бә. Ләма жи, гава Иса ԝәкә 30 сали бу, әԝ бь рʹӧһʹе пироз, ча Кӧрʹе Хԝәде һатә кʹьфшкьрьне. Жь ви ԝәʹдәйи, әԝ ида бу пʹара сәрәкә йа зӧрʹәта кʹӧлфәте (Галати 3:16). Паши мьрьн у рʹабуна Иса, Хԝәде «бь рʹумәт у һӧрмәт кʹофи дани сери» у һʹәму һʹӧкӧм да ԝи, «ԝәки кьред Мирещьн хьраб кә» (Ибрани 2:7; Мәтта 28:18; 1 Йуһʹәнна 3:8).

9-10. (а) Пʹара дӧда йа зӧрʹәта кʹӧлфәте кʹи нә, у әԝана чаԝа дьбьн пʹара зӧрʹәта кʹӧлфәте? (б) Ньһа әме дәрһәԛа чь шеԝьр кьн?

⁹ Ле хенщи Иса, кәсед дьн жи ԝе бьбуна пʹара зӧрʹәте. Паԝлосе шанди зәлал кьр, кӧ әԝ кʹи нә. Әԝи Щьһу у Нәщьһуйед бь рʹӧһʹе пироз кʹьфшкьрирʹа ӧса гот: «Һәгәр һун пʹара Мәсиһ ьн, ԝәки ӧса йә зӧрʹәта Бьраһим ьн у ԝаред ԝи сози нә» (Галати 3:28, 29). Чахе Йаһоԝа Мәсиһик бь рʹӧһʹе пироз кʹьфш дькә, әв кәс ида дьбә пʹара зӧрʹәта кʹӧлфәте. Демәк зӧрʹәт жь Иса Мәсиһ у 144 000 һәмпʹадшед ԝи нә (Әʹйанти 14:1). Әԝана гьшк хирәт дькьн кӧ чʹәʹв бьдьнә Баве хԝә Йаһоԝа.

¹⁰ Ньһа әм заньн ԝәки кәсед дәрһәԛа кʹижана кӧ Дәстпебун 3:15-да те готьне, кʹи нә. Ԝәрә әм бь тʹәмами бьвиньн, кӧ Йаһоԝа әве пʹехәмбәртийе чаԝа тинә сери, у әм жь ве пʹехәмбәртийе чь кʹаре дьстиньн.

11. «Пәʹнийа» зӧрʹәта кʹӧлфәте ча бьриндар бу?

¹¹ Ль гора Дәстпебун 3:15, мәʹр ԝе «пәʹнийа» зӧрʹәта кʹӧлфәте бьгәзта. Әв готьн һатә сери, гава Мире-щьна, Щьһу у Рʹомайа да хәбате, ԝәки әԝана Кӧрʹе Хԝәде бькӧжьн (Луԛа 23:13, 20-24). Чаԝа кӧ бьрина пәʹнийе дәмәке дьбә сәбәб кӧ кәсәк нькарә рʹе һәрʹә, Иса жи дәмәке нькарьбу тьштәк бькьра, чьмки әԝ се рʹожа мьри бу (Мәтта 16:21).

12. Сәре мәʹр ԝе кʹәнге у чаԝа бе һʹьнщьрʹандьне?

¹² Сәва кӧ пʹехәмбәртийа жь Дәстпебун 3:15 бьһата сери, лазьм бу кӧ Иса жь мьрьне бьһата рʹакьрьне. Гәло чьрʹа? Чьмки ль гора ве рʹезе, зӧрʹәт ԝе сәре мәʹр бьһʹьнщьрʹинә. Бона ве йәке, лазьм бу кӧ бьрина пәʹнийа Иса ԛәнщ бә. Һәма ӧса жи ԛәԝьми. Рʹожа сьсийа паши мьрьна Иса, әԝ ча кәсе рʹӧһʹанийә нәмьри жь мьрьне һатә рʹакьрьне. Ве рʹожа кӧ Хԝәде ида кʹьфш кьрийә, Иса Мәсиһ ԝе сәре Мире-щьна бьһʹьнщьрʹинә (Ибрани 2:14). Иса у һәмпʹадшед ԝи, ԝе һʹәму  дьжмьнед Хԝәде, демәк зӧрʹәта мәʹр, ԛьрʹ кьн (Әʹйанти 17:14; 20:4, 10). *

13. Әм жь пекһатьна ве пʹехәмбәртийе ча кʹаре дьстиньн?

¹³ Хьзмәткʹаред Хԝәде жь пекһатьна ве пʹехәмбәртийе гәләк кʹаре дьстиньн. Гава Иса сәр әʹрде дьжит, әԝи бь щурʹәки беԛьсур чʹәʹв дьда хәйсәте Баве хԝә (Йуһʹәнна 14:9). Ләма жи мә Йаһоԝа Хԝәде бь сайа Иса нас кьр у ԝи һʹьз кьр. Ӧса жи, әм жь готьнед Иса у жь ве йәке кӧ әԝ иро чаԝа рʹебәрийа щьвате дькә, кʹаре дьстиньн. Иса мә һин дькә, кӧ гәрәке әм ча бьжин, ԝәки Йаһоԝа жь мә рʹази бә. Ӧса жи, әм гьшк жь мьрьна Иса, демәк жь бьриндаркьрьна пәʹнийа ԝи, кʹаре дьстиньн. Гәло чь щурʹәйи? Гава Иса жь мьрьне рʹабу, әԝи ԛимәта хуна хԝә ча ԛӧрбанәкә беԛьсур бәрва да, йа кӧ «мә жь һʹәму гӧна» паԛьж дькә (1 Йуһʹәнна 1:7).

14. Жь бо пекһатьна пʹехәмбәртийа Йаһоԝа чьма ԝәхт лазьм бу? Шьровәкә.

¹⁴ Гьлийед кӧ Йаһоԝа бахче Еденеда готьбу, нишан дькьрьн, ԝәки әв пʹехәмбәрти ԝе дәрберʹа бь тʹәмами нәһата сери. Ԝәхт лазьм бу ԝәки зӧрʹәта кʹӧлфәте пешда бьһата, ԝәки Мире-щьна пьштгьред хԝә тʹоп кьра у ԝәки нав ԝанда нәфрʹәт у дьжмьнати пешда бьһата. Ча баш ә ԝәки бь сайа ве пʹехәмбәртийе әм һаш жь ве йәке һәнә, кӧ дьнйа Мире-щьна ԝе хьзмәткʹаред Йаһоԝа нәфрʹәт бькә. Иса жи шагьртед хԝәрʹа гот кӧ әԝана ԝе бәр чʹәʹве ве дьнйайе рʹәш бьн (Марԛос 13:13; Йуһʹәнна 17:14). Илаһи 100 салед пашԝәхтийе, мә пекһатьна пʹарәкә ве пʹехәмбәртийе дитийә. Гәло чаԝа?

15. Дьнйа чьрʹа дьһа зедә мә нәфрʹәт дькә, у чьрʹа нә лазьм ә ԝәки әм Мире-щьна бьтьрсьн?

¹⁵ Ԝәхтәкә кьн паши кӧ Иса сала 1914-да бу Пʹадше Пʹадшатийа Хԝәде, Мире-щьна жь әʹзмана һатә авитьне. Әԝ ида нькарә вәгәрʹә әʹзмана, у дәмәкә незикда, ԝе ԛьрʹа ԝи бе (Әʹйанти 12:9, 12). Ләма әԝ гәләк һерс ә, хԝәрʹа щи навинә у һерса хԝә сәр хьзмәткʹаред Хԝәдеда дьрʹьжинә (Әʹйанти 12:13, 17). Әԝ ә мәʹни кӧ әв дьнйа, Шәʹдед Йаһоԝа һе зедә нәфрʹәт дькә. Диса жи, нә лазьм ә ԝәки әм Мире-щьна у пьштгьред ԝи бьтьрсьн. Мина Паԝлосе шанди, әм дькарьн бь баԝәри ӧса бежьн: «Һәгәр Хԝәде пьшта мә йә, кʹи дькарә мьԛабьли мә бә?» (Рʹомайи 8:31). Әм дькарьн бь тʹәмами итʹбарийа хԝә Йаһоԝа биньн, чьмки ча мә дит, гәләк готьнед жь Дәстпебун 3:15 ида һатьнә сери.

16-18. Куртис, Урсула у Щесикайе жь фәʹмкьрьна Дәстпебун 3:15, ча кʹар дитьнә?

¹⁶ Готьнед Дәстпебун 3:15 дькарьн али мә бькьн, ԝәки әм нава тәнгасийада амьн бьминьн. Мисйонерәк бь наве Куртис, йе кӧ Гуамеда хьзмәт дькә, дьбежә: «Гава әз рʹасти тәнгасийа тем у амьнийа мьн те щерʹьбандьне, фькьрандьна сәр Дәстпебун 3:15 али мьн дькә, ԝәки әз итʹбарийа хԝә һьндава Баве хԝәйи әʹзмана ӧнда нәкьм». Куртис һʹьзрәта ве рʹоже йә, гава Йаһоԝа мә жь һʹәму тәнгасийа хьлаз кә.

¹⁷ Хушкәкә бь наве Урсула, йа кӧ  Алманйайеда дьжи, дьбежә кӧ фәʹмкьрьна Дәстпебун 3:15 баԝәрийа ԝе ве йәкеда дьһа ԛәԝи кьрийә, кӧ Кʹьтеба Пироз жь бина бәр Хԝәде һатийә ньвисаре. Әԝ йәк кӧ һʹәму пʹехәмбәртийед дьн ве пʹехәмбәртийева гьредайи нә, сәр ԝе гәләк һʹӧкӧм кьрийә. Ӧса жи, әԝ дьбежә: «Гава әз пеһʹәсийам, кӧ Йаһоԝа дәрберʹа чʹарә дит, ԝәки инсанәт бе һеви нәминә, мьн һе зедә Йаһоԝа һʹьз кьр».

¹⁸ Хушкәкә бь наве Щесика, йа кӧ Микронесйайеда дьжи, ӧса дьбежә: «Те бира мьн кӧ гава мьн щара пешьн фәʹм кьр, ԝәки мьн рʹийа рʹастийе дитийә, әз гәләк ша бум! Пекһатьна пʹехәмбәртийа жь Дәстпебун 3:15 нишани мьн дькә, кӧ жийина иро гәрәке ӧса нибуйа. Ӧса жи, ве пʹехәмбәртийе баԝәрийа мьн дьһа ԛәԝи кьрийә кӧ хьзмәтийа Йаһоԝарʹа жийина лапә баш ә, у ахьрийеда жийина мьн ԝе дьһа баш бә».

19. Әм чьрʹа дькарьн баԝәр бьн, кӧ пʹара хьлазийе йа ве пʹехәмбәртийе ԝе бе сери?

¹⁹ Чаԝа мә дит, Дәстпебун 3:15 ньһа те сери. Әм рʹьнд заньн кӧ зӧрʹәта кʹӧлфәте у зӧрʹәта мәʹр кʹи нә. Пʹара сәрәкә йа зӧрʹәта кʹӧлфәте, Иса Мәсиһ йә. Бьрина пәʹнийа ԝи ԛәнщ буйә, у әԝ ньһа ча Пʹадша сәр тʹәхт рʹуньштийә. Дәмәкә незикда, һьлбьжартьна кәсед кӧ пʹара дӧда йа зӧрʹәте нә, ԝе хьлаз бә. Һәрге пʹара пешьн йа ве пʹехәмбәртийа Хԝәде ида һатийә сери, әм дькарьн баԝәр бьн кӧ пʹара хьлазийе жи ԝе бе сери, демәк сәре мәʹр ԝе бе һʹьнщьрʹандьне. Гава Мире-щьна бе ԛьрʹкьрьне, ньгед хьзмәткʹаред Хԝәде ԝе шабуна әʹрд нәгьрә! Һʹәта кӧ әв рʹож бе, мерхасийа хԝә ӧнда нәкьн. Хԝәдайе мә ԝе әʹсәйи созед хԝә бинә сери. Бь сайа зӧрʹәта кʹӧлфәте, әԝе сәр «һʹәму мьләтед дьнйайе» кʹәрәмед беһʹәсаб бьбаринә (Дәстпебун 22:18).