1. Усьв рʹасти чь щерʹьбандьне һат, у әԝи чь кьр?

 УСЬВ, кӧрʹе Аԛуб рʹасти щерʹьбандьнәкә чәтьн һат. Жьна ахайе ԝи жерʹа ӧса гот: «Сәре хԝә мьнрʹа дайнә». Усьв хԝәстьна ԝе инкʹар кьр. Дьбәкә һьнә кәс ԝе ӧса бежьн: «Гәло Усьв чьма хԝәстьна ԝе ԛәбул нәкьр?» Нә ахайе ԝи мал нибу? Һьм жи, әԝ хӧлам бу у ве жьньке дькарьбу сәре Усьв бькьра бәлайе, чьмки әԝи ле инкʹар кьр. Ле һәр щар, чахе жьньке дьготе ԝәки Усьв сәре хԝә перʹа дайнә, әԝи хԝәстьна ԝе инкʹар дькьр. Гәло чьрʹа? Усьв ӧса гот: «Әзе чаԝа ве хьрабийа мәзьн бькьм у ль бәр Хԝәде гӧнә бькьм?» (Дәстпебун 39:7-12).

2. Усьв жь кʹӧ заньбу кӧ бенамуси бәр чʹәʹве Хԝәде гӧнә йә?

² Гәло Усьв жь кʹӧ заньбу ԝәки бенамуси бәр чʹәʹве Хԝәде гӧнәки гьран ә? Ԛануна Муса, кʹидәре кӧ дьһатә готьне «Зьнийе нәки», ԝәкә 200 сал шунда Исраелийарʹа һатә дайине (Дәркʹәтьн 20:14). Рʹаст ә әв ԛанун һе нәһатьбу дайине, диса жи Усьв рʹьнд фәʹм дькьр кӧ Йаһоԝа сәр зьнийе, демәк сәр бенамусийе чаԝа дьньһерʹә. Мәсәлә, Усьв бешьк заньбу кӧ Йаһоԝа зәԝащ бь жьнәке у мерәки саз кьрьбу. Дьԛәԝьмә әԝи бьһистьбу, ԝәки Йаһоԝа намуса Сарайе чаԝа дӧ щара парастьбу. Ӧса жи, Хԝәде намуса жьна Исһаԛ, Рʹевекайе жи парастьбу (Дәстпебун 2:24; 12:14-20; 20:2-7; 26:6-11). Гава Усьв сәр ван тьшта дьфькьри, әԝи тедәрдьхьст, ԝәки бәр чʹәʹве Хԝәде чь рʹаст ә у чь на. Усьв Хԝәде һʹьз дькьр,  ләма жи әԝи дьхԝәст ль гора принсипед Йаһоԝа бьжита.

3. Ве готареда, әме дәрһәԛа чь шеԝьр кьн?

³ Ле тӧ рʹастийе һʹьз дьки? Бешьк әре. Ле диса жи, әм гӧнәкʹар ьн, у һәрге әм һаш жь хԝә тʹӧнә бьн, ньһерʹандьна ве дьнйайе дәрһәԛа рʹастийе дькарә сәр мә һʹӧкӧм кә (Ишайа 5:20; Рʹомайи 12:2). Ләма жи, әме ньһа бьвиньн кӧ рʹасти чь йә у чьма фәрз ә ԝәки әм рʹастийе һʹьз бькьн. Паше, әме дина хԝә бьдьн се гавед кӧ әм дькарьн бавежьн, ԝәки принсипед Йаһоԝа һе зедә һʹьз бькьн.

4. Бь ньһерʹандьна гәләк мәрьва, рʹасти чь йә?

⁴ Гәләк кәс дьфькьрьн, ԝәки мәрьвәки рʹаст йәки ԛӧрʹә йә, кәсед дьн сущдар дькә, йан жи хԝә жь йед дьн четьр һʹәсаб дькә. Ле Хԝәде хәйсәтед ӧса нәфрʹәт дькә. Гава Иса сәр әʹрде бу, әԝи сәрԝеред религи сущдар дькьрьн, чьмки ԝана нормед хԝәйә рʹастийе пешда дьбьрьн (Ԝаиз 7:16; Луԛа 16:15). Мәрьве кӧ ль гора принсипед Йаһоԝа дьжи, тʹӧ щар нафькьрә ԝәки әԝ жь кәсед дьн четьр ә.

5. Ль гора Кʹьтеба Пироз, рʹасти чь йә?

⁵ Рʹасти һʹӧнӧрәки гәләк хԝәш ә. Мәрьве рʹаст ван тьшта дькә, йед кӧ бәр чʹәʹве Йаһоԝа рʹаст ьн. Кʹьтеба Пирозда, хәбәра «рʹасти» дьдә кʹьфше, кӧ мәрьв гәрәке ль гора принсипед Йаһоԝайә бьльнд бьжи. Мәсәлә, Йаһоԝа готьбу ԝәки базьрган гәрәке мезина рʹаст бьдә хәбате (Ԛануна Дӧщари 25:15). Ләма жи, Мәсиһийе кӧ дьхԝазә бәр чʹәʹве Хԝәде рʹаст бе кʹьфше, гәрәке һʹәму кьред хԝәда һʹәлал бә. Мәрьве рʹаст һәԛийе жи һʹьз дькә. Гава кәсәки дьн рʹасти нәһәԛийе те, әԝ хәмгин дьбә. Ӧса жи, мәрьве кӧ жь дьл рʹаст ә, һьлдьдә һʹәсаб кӧ Йаһоԝа ԝе сәр сафикьрьнед ԝи чаԝа бьньһерʹә, чьмки әԝ дьхԝазә дьле Йаһоԝа ша кә (Колоси 1:10).

6. Әм чьма дькарьн баԝәр бьн, кӧ принсипед Йаһоԝа бона ԛәнщийа мә нә? (Ишайа 55:8, 9)

⁶ Кʹьтеба Пироз дьбежә кӧ Йаһоԝа Канийа рʹастийе йә. Ләма жи, Йаһоԝа ча «ԝәлате рʹастийе» те навкьрьне (Йерәмйа 50:7). Йаһоԝа Әʹфьрандаре һәр тьшти йә, ләма жи тʹәне изьна ԝи һәйә ԝәки бежә, кӧ чь рʹаст ә у чь на. Әм гӧнәкʹар ьн, ләма жи кемасийед мә гәләк щара сәр ньһерʹандьнед мә һʹӧкӧм дькьн. Ле Йаһоԝа беԛьсур ә, у әԝ мә баштьр занә ԝәки чь рʹаст ә у чь на (Мәтʹәлок 14:12; Ишайа 55:8, 9 бьхунә). Рʹаст ә әм сурәте Хԝәдеда һатьнә хӧльԛандьне, диса жи әм дькарьн ль гора принсипед ԝийи рʹастийе бьжин (Дәстпебун 1:27). Әм жь дьл дьхԝазьн ве йәке бькьн! Әм Баве хԝәйи әʹзмана гәләк һʹьз дькьн, ләма жи чьԛас жь дәсте мә те, әм дьхԝазьн чʹәʹв бьдьнә ԝи (Әфәси 5:1).

7. Әм чьрʹа һʹәԝще нормед бь итʹбар ьн? Мәсәле биньн.

⁷ Принсип у нормед Йаһоԝа тʹьме мәрʹа кʹаре тиньн. Гәло чьрʹа? Ве мәсәле бьдә бәр чʹәʹве хԝә: һәрге һәр банкәке хԝәха сафи кьра кӧ ԛимәта доларәке чьԛас ә, йан һәрге һәр фирмәкә авакьрьне хԝәха сафи кә кӧ дьрежайа метрәке чьԛас ә, хаосәкә мәзьн ԝе һәбуйа, ӧса нинә? Йан жи, һәрге һʹәким гӧрʹа ԛәйда нәкьрана, гәләк кәсед нәхԝәш ԝе жийина хԝә ӧнда кьрана. Бәле, нормед бь итʹбар мә дьпарезьн. Мина ве йәке, нормед Йаһоԝа у принсипед ԝи жи мә дьпарезьн.

8. Мәрьвед кӧ рʹастийе һʹьз дькьн, ԝе чь кʹәрәма бьстиньн?

 ⁸ Йаһоԝа кәсед кӧ хирәт дькьн ԝәки ль гора принсипед ԝи бьжин, кʹәрәм дькә. Әԝ соз дьдә: «Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29). Ԝе дәме, әʹдьлайи у йәкти ԝе һәбә, у һәр кәс ԝе ша бә. Йаһоԝа ԝе һәма жийинәкә ӧса бьдә мә. Бәле, гәләк сәбәб һәнә кӧ әм рʹастийе һʹьз бькьн! Гәло әм чаԝа дькарьн ви һʹӧнӧри һе зедә һʹьз бькьн? Ԝәрә әм дина хԝә бьдьнә ван 3 гава.

9. Чь ԝе али мә бькә кӧ әм рʹастийе һʹьз бькьн?

⁹ Гава 1: Кәсе кӧ принсипа датинә, һʹьз бькә. Сәва кӧ әм бькарьбьн рʹастийе һʹьз бькьн, гәрәке әм Кәсе кӧ сафи дькә чь рʹаст ә у чь нәрʹаст ә, һʹьз бькьн. Чьԛас әм Йаһоԝа дьһа зедә һʹьз бькьн, һаԛас әме бьхԝазьн ль гора принсипед ԝи бьжин. Бьфькьрә: Һәрге Адәм у Һеԝайе Йаһоԝа һʹьз бькьрана, гәло ԛә ԝана ԝе ԛануна ԝи пьшт гӧһе хԝәва бавитана? (Дәстпебун 3:1-6, 16-19)

10. Бьраһим чь кьр кӧ фькьред Йаһоԝа дьһа баш фәʹм бькә?

¹⁰ Сәва кӧ әм шашийа Адәм у Һеԝайе дӧбарә нәкьн, гәрәке әм бәрдәԝам кьн дәрһәԛа Йаһоԝа һе зедә пебьһʹәсьн, һʹӧнӧред ԝи ԛимәт бькьн у хирәт кьн, кӧ әм фькьред ԝи фәʹм кьн. Чьԛас һе зедә әм ве йәке бькьн, һаԛас әме Йаһоԝа дьһа зедә һʹьз бькьн. Бинә бира хԝә кӧ Бьраһим Йаһоԝа чьԛас һʹьз дькьр. Гава жерʹа чәтьн бу ԝәки сафикьрьнед Йаһоԝа фәʹм кә, әԝ диса жи нәбу рʹабәр, ле әԝи дьхԝәст Йаһоԝа дьһа незик нас бькә. Мәсәлә, гава Бьраһим бьһист кӧ Йаһоԝа дьхԝазә бажаред Содом у Гоморайе ԝеран кә, әԝ пешийе дьтьрсийа кӧ «һʹакьме тʹәмамийа дьнйайе» ԝе кәсед рʹаст тʹәви кәсед хьраб ԛьрʹ кә. Бьраһим дьхԝәст бьзаньбуйа һәла Хԝәде ԝе бь рʹасти ве йәке бькә йан на, ләма әԝи бь мьлукти чәнд пьрс пьрсин. Йаһоԝа бь сәбьр щаба ԝи да. Хьлазийеда, Бьраһим тедәрхьст кӧ Йаһоԝа дьле һәр кәси дьньһерʹә у тʹӧ щара кәсед бесущ тʹәви кәсед сущдар щәза накә (Дәстпебун 18:20-32).

11. Бьраһим чаԝа нишан кьр, ԝәки әԝ Йаһоԝа һʹьз дькә у баԝәрийа хԝә ԝи тинә?

¹¹ Паши кӧ Бьраһим тʹәви Йаһоԝа дәрһәԛа бажаред Содом у Гоморайе хәбәр дабу, Бьраһим бешьк Баве хԝәйи әʹзмана һе зедә һʹьз кьр у һӧрмәт кьр. Чәнд сал шунда, баԝәрийа Бьраһим бь щурʹәки гьран һатә щерʹьбандьне. Йаһоԝа жь ԝи хԝәст, ԝәки әԝ кӧрʹе хԝә Исһаԛ ԛӧрбан бькә. Бьраһим ида Йаһоԝа рʹьнд нас дькьр, ләма әԝ бе пьрс у дӧдьлибуне һазьр бу ԝәки хԝәстьна Йаһоԝа бинә сери. Ԝәрә биньн бәр чʹәʹве хԝә, кӧ жерʹа чьԛас зор бу, ԝәки хԝә һазьр кә у бькʹәвә рʹе. Ԝи ԝәʹдәйи дьбәкә Бьраһим тьштед кӧ әԝи дәрһәԛа Йаһоԝа заньбу, ани бира хԝә. Мәсәлә, әԝи заньбу кӧ Йаһоԝа ԝе тʹӧ щар зӧлми у нәһәԛийе нәкә. Чаԝа кӧ Паԝлосе шанди ньвиси, Бьраһим баԝәр бу кӧ Йаһоԝа дькарә кӧрʹе ԝи Исһаԛ жь мьрьне рʹакә (Ибрани 11:17-19). Хԝәха Йаһоԝа соз дабу кӧ Исһаԛ ԝе бьбә баве мьләтәки, ле ԝе дәме, зарʹед Исһаԛ һе тʹӧнә бун. Бьраһим Йаһоԝа һʹьз дькьр, у әԝ баԝәр бу кӧ Йаһоԝа ԝе һәртʹьм рʹастийе бькә. Чьԛас зор бу жи, Бьраһим бь баԝәрийе гӧрʹа Йаһоԝа кьр (Дәстпебун 22:1-12).

12. Әм чаԝа дькарьн чʹәʹв бьдьнә Бьраһим? (Зәбур 73:28)

 ¹² Әм чаԝа дькарьн чʹәʹв бьдьнә Бьраһим? Мина Бьраһим, гәрәке әм жи хирәт бьн ве йәкеда, кӧ Йаһоԝа дьһа баш нас бькьн. Әв йәк ԝе али мә бькә, ԝәки әм дьһа незики ԝи бьн у ԝи дьһа зедә һʹьз бькьн (Зәбур 73:28 бьхунә). Исафа мә ԝе ль гора фькьред Йаһоԝа бе һинкьрьне (Ибрани 5:14). Исафәкә ӧса ԝе мә ԝәʹде щерʹьбандьна хԝәй кә. Әме хԝә жь һәр тьште кӧ дькарә дьле Баве мәйи әʹзмана бешинә у зьраре бьдә достийа мә тʹәви Ԝи, дур бьгьрьн. Ӧса жи, әм ча дькарьн нишан кьн, кӧ әм рʹастийе һʹьз дькьн?

13. Әм чаԝа дькарьн пәй рʹастийе һәрʹьн? Мәтʹәлок 15:9)

¹³ Гава 2: Рʹож бь рʹож дьһа зедә рʹастийе һʹьз бькә. Мәрьве кӧ дьхԝазә бәдәна хԝә дьһа ԛәԝи кә, гәрәке һәр рʹож спортева мьжул бә. Мина ве йәке, сәва кӧ әм принсипед Йаһоԝа дәрһәԛа рʹастийе һе зедә һʹьз бькьн, гәрәке әм жи һәр рʹож сәр хԝә бьхәбьтьн. Йаһоԝа синоред мә рʹьнд занә, ләма жи әԝ жь мә тьштед ӧса дәʹԝа накә, кӧ жь ԛәԝата мә дәр ьн (Зәбур 103:14). Йаһоԝа «йед ль пәй рʹастийе дьчьн һʹьз дькә» (Мәтʹәлок 15:9 бьхунә). Паши кӧ мә хьзмәтийа Йаһоԝада хԝәрʹа нетәк данийә, әм хирәт дькьн кӧ пәй ве нете һәрʹьн. Лазьм ә ԝәки әм ӧса жи бь хирәт пәй рʹастийе һәрʹьн. Йаһоԝа ԝе бәрдәԝам кә али мә бькә, кӧ әм ве йәкеда пешда һәрʹьн (Зәбур 84:5, 7).

14. Зьрьһʹе рʹастийе чь йә у әԝ чьрʹа мәрʹа лазьм ә?

¹⁴ Йаһоԝа дьбежә кӧ «тʹәмийед ԝи нә гьран ьн» (1 Йуһʹәнна 5:3). Бь рʹасти тʹәмийед ԝи һәр рʹож мә дьпарезьн. Бинә бира хԝә чʹәкед рʹӧһʹани, йед кӧ Паԝлос бәʹса ԝан кьрьбу (Әфәси 6:14-18). Кʹижан чʹәк дьле мә дьпарезә? Әв һәйә зьрьһʹе һәԛийе, йе кӧ те һʹәсабе принсипед Йаһоԝайә рʹастийе. Чаԝа кӧ зьрьһʹ дьле әскәра дьпараст, принсипед Йаһоԝайә рʹастийе жи дькарьн дьле  мәйи симболик, демәк хԝәстьн, һәст у фькьред мә, бьпарезьн. Ләма жи, избат бә кӧ зьрьһʹе рʹастийе бал тә һәйә! (Мәтʹәлок 4:23)

15. Тӧ чаԝа дькари зьрьһʹе рʹастийе ль хԝә ки?

¹⁵ Тӧ чаԝа дькари зьрьһʹе рʹастийе ль хԝә ки? Бь ве йәке кӧ тӧ сафикьрьна ль гора принсипед Хԝәде бьки. Мәсәлә, гава тӧ сафи дьки кӧ чь бежи, гӧһ бьди кʹижан кʹьламе, чь щурʹә филм йан малпәред Интернете тʹәмашә бьки, йан кʹижан кʹьтебе бьхуни, жь хԝә бьпьрсә: «Әв тьшт ԝе сәр дьле мьн чаԝа һʹӧкӧм кә? Гәло әв тьшт Йаһоԝа хԝәш тен, йан жи гәло ван тьштада бенамуси, зӧлми, зордари, тьмайи у хԝәһʹьзи һәйә?» (Филипи 4:8). Һәрге тӧ ль гора хԝәстьна Йаһоԝа сафикьрьна бьки, принсипед ԝийә рʹастийе ԝе дьле тә бьпарезьн.

16-17. Готьнед жь Ишайа 48:18 чаԝа нишан дькьн, ԝәки әм дькарьн һʹәта-һʹәтайе ль гора принсипед Йаһоԝа бьжин?

¹⁶ Гәло тӧ бәрхԝә дькʹәви, һәла тӧйе бькарьби рʹож бь рʹож, сал бь сал ль гора принсипед Йаһоԝа бьжи? Дина хԝә бьде кӧ Ишайа 48:18-да Йаһоԝа чь дьбежә (бьхунә). Йаһоԝа соз дьдә кӧ һәԛийа мә ԝе бьбә «мина лейед [пʹелен] бәʹре». Бьдә бәр чʹәʹве хԝә кӧ тӧ бәр бәʹре сәкьни йи у пʹелед аве пәй һәв тен. Гәло тӧйе бьфькьри кӧ рʹожәке, әв пʹел ԝе хьлаз бьн? На! Тӧ зани кӧ пʹел бь һʹәзара сала дәве бәʹре дькʹәвьн, у ԝе һʹәта-һʹәтайе ӧса бә.

¹⁷ Һәԛийа тә дькарә бьбә мина пʹелед бәʹре! Гәло чь щурʹәйи? Пешийа кӧ тӧ сафикьрьнәке бьки, бьфькьрә кӧ Йаһоԝа ԝе бьхԝәста ԝәки тӧ чь бьки, у һәма ӧса жи бькә. Сафикьрьна тә чьԛас чәтьн бә жи, Баве тәйи дьлован ԝе али тә бькә, ԝәки тӧ һәр рʹож ль гора рʹастийе бьжийи (Ишайа 40:29-31).

18. Чьма гәрәке әм кәсед дьн ль гора ньһерʹандьна хԝә сущдар нәкьн?

¹⁸ Гава 3: Бьһелә ԝәки Йаһоԝа сафи кә, кӧ чь рʹаст ә у чь на . Чахе әм сәр хԝә дьхәбьтьн кӧ ль гора принсипед Йаһоԝа бьжин, әм гәрәке фәсал бьн, ԝәки кәсед дьн сущдар нәкьн у хԝә жь ԝан четьр һʹәсаб нәкьн. Изьна мә тʹӧнә кӧ ль гора ньһерʹандьна хԝә мәрьва сущдар кьн, чьмки «Һʹакьме тʹәмамийа дьнйайе» Йаһоԝа йә (Дәстпебун 18:25). Йаһоԝа әм кʹьфш нәкьрьнә, ԝәки кәсед дьн сущдар кьн. Иса ӧса гот: «Лома нәкьн, кӧ ломә ль ԝә нәбьн» (Мәтта 7:1). *

19. Усьв ча нишан кьр, ԝәки әԝи итʹбарийа хԝә диԝана Йаһоԝа дьани?

¹⁹ Ԝәрә әм диса дина хԝә бьдьнә сәрһатийа Усьв. Әԝи мәрьва сущдар нәдькьр, һәла һе ԝана жи, йед кӧ хьраби ԝи дькьрьн. Бьред ԝи нәмамийа ԝи кьрьн, у әԝ ча хӧлам фьротьнә дилтийе у паше баве хԝәра готьн, ԝәки әԝ мьрийә. Гәләк сал шунда, Усьв диса рʹасти бьред хԝә һат. Ви чахи әԝ ида сәрԝерәки ԛәԝи бу, у дькарьбу диԝана ԝан бькьра у һʹәйфе һьлда. Бьред ԝи чьԛас жи сәва кьред хԝә пʹошман бьбун, диса жи әԝана дьтьрсийан кӧ Усьв ԝе һʹәйфе һьлдә. Ле Усьв ԝанрʹа гот: «Нәтьрсьн, чьма әз дәԝса Хԝәде дьгьрьм?» (Дәстпебун 37:18-20, 27, 28, 31-35; 50:15-21). Бәле, Усьв бь мьлукти әв йәк да дәсте Йаһоԝа, чьмки әԝи  заньбу ԝәки тʹәне изьна Йаһоԝа һәйә диԝана мәрьва бькә.

20-21. Сәва кӧ әм хԝә жь кәсед дьн четьр һʹәсаб нәкьн, гәрәке әм чь бькьн?

²⁰ Мина Усьв, әм жи һәр тьшти дьдьн дәсте Йаһоԝа. Мәсәлә, әм нафькьрьн, ԝәки әм заньн кӧ бь чь нети у чьрʹа хушк-бьра фьлан тьшти дькьн, чьмки әм нькарьн бьвиньн кӧ дьле ԝанда чь һәйә. Тʹәне Йаһоԝа занә кӧ нета мәрьва бь рʹасти чь йә (Мәтʹәлок 16:2). Әв мәрьва һʹьз дькә. Фьрԛи тʹӧнә мәрьв жь чь мьләти йан бәрәки йә, әԝ дьхԝазә ԝәки әм жи чʹәʹв бьдьнә ԝи (2 Корьнтʹи 6:13). Ләма жи, әм һәр тьшти дькьн кӧ һʹәму нәфәред малбәта хԝәйә рʹӧһʹани һʹьз бькьн, у ԝана сущдар нәкьн.

²¹ Ӧса жи, гәрәке әм кәсед кӧ Шәʹдед Йаһоԝа ниньн жи сущдар нәкьн (1 Тимотʹейо 2:3, 4). Ԛә тәйе дәрһәԛа мәрьвәки хԝәйи нәбаԝәрмәнд ӧса бьгота, «Әԝе тʹӧ щара рʹастийе ԛәбул нәкә»? Тʹәне кәсе ԛӧрʹә, йе кӧ хԝә жь мәрьвед дьн четьр һʹәсаб дькә, ԝе ӧса бежә. Йаһоԝа мәщале дьдә һʹәму мәрьва, ԝәки кьред хԝәйә нәрʹаст тʹобә бькьн (Кʹаред Шандийа 17:30). Тʹӧ щар бир нәкьн, ԝәки Йаһоԝа ԝан мәрьва, йед кӧ хԝә жь кәсед дьн четьр һʹәсаб дькьн, ча мәрьвед нәрʹаст һʹәсаб дькә.

22. Тә чьрʹа сафи кьрийә кӧ рʹастийе һʹьз бьки?

²² Һәрге әм принсипед Йаһоԝайә рʹастийе ԛимәт кьн, әме шабуне бьстиньн у кәсед дьнрʹа бьбьн мәсәләкә баш. Ахьрийеда, әԝана ԝе һе зедә мә һʹьз бькьн у дьһа незики Хԝәде бьн. Ԝәрә әм һәртʹьм «тʹи у бьрʹчийе рʹастиԛәдандьне» бьн (Мәтта 5:6). Баԝәр бә, кӧ Йаһоԝа дьвинә ԝәки тӧ сәр хԝә дьхәбьти у әԝ тʹьме пешдачуйина тәрʹа ша дьбә. Дьнйайеда нәрʹасти чьԛас зедә бә жи, һевийа хԝә ӧнда нәкә. Тʹӧ щар бир нәкә, кӧ «Хӧдан рʹаста һʹьз дькә» (Зәбур 146:8).