ГОТАРА БОНА ҺИНБУНЕ 33
Чʹәʹве Йаһоԝа сәр Хьзмәткʹаред Ԝи нә
«Чʹәʹве Хӧдан ль сәр хофкʹешед Ԝи нә» (ЗӘБУР 33:18).
КʹЬЛАМА 4 «Йаһоԝа Шьване Мьн ә»
ВЕ ГОТАРЕДА *
1. Иса чьрʹа жь Йаһоԝа һиви кьрьбу, ԝәки әԝ шагьртед ԝи бьпарезә?
ШӘВА пешийа мьрьна хԝә, Иса тьштәки мәхсус жь Баве хԝәйи әʹзмана һиви кьрьбу. Әԝи жь Йаһоԝа хԝәстьбу ԝәки әԝ шагьртед ԝи бьпарезә (Йуһʹәнна 17:15, 20). Йаһоԝа һьлбәт хьзмәткʹаред хԝә һәртʹьм хԝәй дькьр, у чʹәʹве ԝи тʹьме сәр ԝан бу. Ле Иса Мәсиһ заньбу кӧ Мире-щьна ԝе дьһа зедә мьԛабьли ԝан шәрʹ бькә. Ләма жи сәва кӧ әԝана бькарьбуна һьмбәри һʹьщуме Мире-щьна ԛәԝи бьсәкьнийана, әԝана һʹәԝще аликʹарийа Йаһоԝа бун.
2. Ль гора Зәбур 33:18-20, чьрʹа нә лазьм ә кӧ әм тәнгасийа бьтьрсьн?
2 Иро, дьнйа Мире-щьна Мәсиһийед рʹастрʹа гәләк чәтьнайа тинә. Тәнгасийед кӧ рʹасти мә тен, дькарьн мерхасийа мә бьшкеньн у амьнийа мә бьщерʹьбиньн. Ле әв готар ԝе мәрʹа нишан кә, кӧ нә лазьм ә ԝәки әм бьтьрсьн. Чʹәʹве Йаһоԝа сәр мә йә, әԝ һʹәму тәнгасийед мә дьвинә, у һәр гав һазьр ә али мә бькә, ԝәки әм сәбьр кьн. Ԝәрә әм дина хԝә бьдьн дӧ сәрһатийед жь Кʹьтеба Пироз, йед кӧ нишан дькьн, ԝәки «чʹәʹве Хӧдан ль сәр хофкʹешед Ԝи нә» (Зәбур 33:18-20 бьхунә).
ГАВА ӘМ ХԜӘ ТʹӘНЕ ТʹӘХМИН ДЬКЬН
3. Кʹәнге әм дькарьн хԝә тʹәне тʹәхмин кьн?
3 Тʹәмамийа дьнйайеда хушк-бьред мә гәләк ьн, ле диса жи дьбәкә әм хԝә щарна тʹәне тʹәхмин бькьн. Мәсәлә, гава лазьм ә кӧ щаһьл баԝәрийа хԝә һәвалдәрсханед хԝәрʹа шьровәкьн, йан гава әԝана дәрбази щьватәкә дьн дьбьн, дьбәкә әԝ хԝә тʹәне тʹәхмин бькьн. Щарна әм дьбәкә хәмгин дьбьн, дькʹәвьн депресийе у дьфькьрьн кӧ әм тʹәне манә. Дьбәкә әм дьле хԝә кәсәкирʹа вәнакьн, чьмки дьтьрсьн кӧ әԝана ԝе мә фәʹм нәкьн. Щар-щара әм дьбәкә дьлтәнг дьбьн у дьфькьрьн кӧ сәре кәсәки мәрʹа тʹӧнә йә. Сәбәб чь бә жи, гава әм хԝә тʹәне тʹәхмин дькьн, дьԛәԝьмә еш бькʹәвә дьле мә у әм хԝә бечʹарә тʹәхмин кьн. Ле Йаһоԝа тʹӧ щар нахԝазә кӧ әм бькʹәвьн һʹаләки ӧса. Әм ве йәке жь кʹӧ заньн?
4. Гәло Елйас пʹехәмбәр чьрʹа гот: «Әз тʹәне мам»?
4 Сәрһатийа Елйас пʹехәмбәр бинә бира хԝә. Изабеле сонд хԝарьбу кӧ әԝе ԝи бькӧжә, ләма Елйас рʹәвийа у 40 рʹожи зедәтьр рʹеда бу (1 Пʹадшати 19:1-9). Ахьрийа-ахьрийе, әԝ һӧндӧрʹе шкәфтәке рʹуньшт у Йаһоԝарʹа гот: «[Ча пʹехәмбәр] әз тʹәне мамә» (1 Пʹадшати 19:10, ИМ). Ԝәлатда пʹехәмбәред дьн жи һәбун. Мәсәлә, Обадйа 100 пʹехәмбәр жь дәсте Изабеле хьлаз кьрьбу (1 Пʹадшати 18:7, 13). Ле Елйас чьма хԝә тʹәне тʹәхмин дькьр? Кʹьтеба Пироз бь тʹәмами зәлал накә чьрʹа Елйас хԝә тʹәне тʹәхмин дькьр. Гәло дьбәкә әԝ дьфькьри кӧ һʹәму пʹехәмбәред кӧ Обадйа ԝан хьлаз кьрьбу, ида һатьнә кӧштьне? Гәло сәбәб әв бу кӧ паши рʹабәрибуна сәр Чʹийайе Кармәле, тʹӧ кәс вәнәгәрʹийа сәр рʹийа Йаһоԝа? Йан жи, гәло Елйас дьфькьри кӧ тʹӧ кәс дәрде ԝи ньзанә у бона ԝи хәм накә? Мәʹни чь бу жи, әм баԝәр ьн кӧ Йаһоԝа рʹьнд фәʹм дькьр, ԝәки Елйас хԝә чьрʹа тʹәне тʹәхмин дькьр, у әԝи заньбу кӧ әԝ чаԝа дькарә али ԝи бькә.
Гава әм хԝә тʹәне тʹәхмин дькьн, сәрһатийа Елйас чаԝа дькарә дьле мә рʹьһʹәт кә? (Абзаса 5 у 6 бьньһерʹә)
5. Йаһоԝа ча Елйас да баԝәр кьрьне, ԝәки әԝ хԝә тʹәне тʹәхмин нәкә?
5 Гәло Йаһоԝа чаԝа али Елйас кьр? Сәва кӧ Елйас дьле хԝә вәкә, пешийе Йаһоԝа дӧ щара жь ԝи пьрси: «Елйас тӧ ль вьр чь дьки?» (1 Пʹадшати 19:9, 13, ИМ). Гава Елйас дәрде дьле хԝә Йаһоԝарʹа рʹет, Йаһоԝа гӧһ да ԝи. Паше, Йаһоԝа ԛәԝата хԝә нишани Елйас кьр у избат кьр кӧ әԝ кʹеләка ԝи йә. Ӧса жи, әԝи Елйасрʹа гот кӧ хенщи ԝи, гәләк кәсед дьн жи Ԝи дьһʹәбиньн (1 Пʹадшати 19:11, 12, 18). Паши кӧ Елйас дьле хԝә Йаһоԝарʹа вәкьр у щаба ԝи бьһист, бешьк әԝи хԝә һе рʹьһʹәт тʹәхмин кьр. Һьнге Йаһоԝа чәнд шьхӧлед фәрз данә Елйас: Әԝи жерʹа гот кӧ бьра әԝ Һазаел ча пʹадше Сурйайе, Йәһу ча пʹадше Исраеле у Елиша ча пʹехәмбәр кʹьфш бькә (1 Пʹадшати 19:15, 16). Бь ви щурʹәйи, Йаһоԝа али ԝи кьр кӧ әԝ дина хԝә бьдә тьштед баш. Ӧса жи, Хԝәде Елиша ча аликʹар да ԝи. Гава тӧ хԝә тʹәне тʹәхмин дьки, гәло тӧ чаԝа дькари жь Йаһоԝа аликʹарийе бьстини?
6. Гава тӧ хԝә тʹәне тʹәхмин дьки, тӧ дькари дәрһәԛа чь дӧа бьки? (Зәбур 62:8)
6 Йаһоԝа дьхԝазә кӧ тӧ ԝирʹа дӧа бьки. Әԝ дәрдед тә дьвинә, у әԝи соз дайә кӧ әԝе һәр гав гӧһ бьдә дӧайед тә (1 Тʹесалоники 5:17). Кʹьтеба Пироз дьбежә кӧ дӧайе рʹаста бәр дьле Ԝида ширьн ә (Мәтʹәлок 15:8). Чахе тӧ хԝә тʹәне тʹәхмин дьки, гәло тӧ дькари дәрһәԛа чь дӧа бьки? Мина Елйас, дьле хԝә Йаһоԝарʹа вәкә (Зәбур 62:8 бьхунә). Ԝирʹа бәʹса хәм у дәрдед хԝә бькә у бежә кӧ әԝана сәр тә чаԝа һʹӧкӧм дькьн. Жь Йаһоԝа рʹәща бькә кӧ әԝ сәбьре бьдә тә. Һәрге тӧ хԝә мәкʹтәбеда тʹәне тʹәхмин дьки у дьтьрси кӧ һәвалдәрсханед хԝәрʹа бәʹса Кʹьтеба Пироз бьки, дӧа бькә кӧ Йаһоԝа билани у мерхасийе бьдә тә, ԝәки тӧ бькарьби бь зәлали у бь зарширьни хәбәр ди (Луԛа 21:14, 15). Һәрге тӧ хәмгин и йан фькьред нәбаш тенә һʹьше тә, жь Йаһоԝа бьхԝазә кӧ әԝ али тә бькә, ԝәки тӧ хушк йан бьраки щерʹьбандирʹа бәʹса һәстед хԝә бьки. Тӧ дькари жь Йаһоԝа рʹәща бьки ԝәки әԝ али ви кәси бькә, кӧ әԝ дәрде дьле тә рʹьнд фәʹм кә. Дьле хԝә Йаһоԝарʹа вәкә, дина хԝә бьдә щаба ԝи у аликʹарийа кәсед дьн ԛәбул кә. Әв йәк ԝе али тә бькә кӧ тӧ хԝә бь зедәйи тʹәне тʹәхмин нәки.
Гәло тӧ хирәт дьки кӧ һе зедә хьзмәт ки у тʹәви кәсед дьн дәркʹәви хьзмәте? (Абзаса 7 бьньһерʹә)
7. Тӧ жь сәрһатийа Маурисйо чь һин буйи?
7 Йаһоԝа шьхӧләки фәрз дайә мә һʹәмуйа. Баԝәр бә кӧ әԝ хирәта тә дьвинә у һьм хьзмәта тә, һьм жи шьхӧле кӧ тӧ щьватеда дьки, ԛимәт дькә (Зәбур 110:3). Чахе тӧ шьхӧле Йаһоԝа дьки, гәло әԝ йәк ча дькарә али тә бькә, гава тӧ хԝә тʹәне тʹәхмин дьки? Ԝәрә әм дина хԝә бьдьнә сәрһатийа бьраки щаһьл бь наве Маурисйо. * Дәмәкә кьн паши кӧ Маурисйо һатьбу ньхӧмандьне, һәваләки ԝи һеди-һеди жь рʹийа рʹастийе дур дькʹәт. Маурисйо дьбежә: «Гава мьн дьдит кӧ әԝ чаԝа жь Йаһоԝа дур дькʹәвә, әз хԝәда дӧдьли бум. Әз бәрхԝә дькʹәтьм һәла әзе бькарьбьм созе кӧ мьн дабу Йаһоԝа биньм сери у малбәта Йаһоԝада бьминьм. Мьн хԝә тʹәне тʹәхмин дькьр, у әз дьфькьрим кӧ тʹӧ кәс мьн фәʹм накә». Гәло чь али Маурисйо кьр? Әԝ дьбежә: «Мьн дьһа зедә хьзмәт дькьр. Әԝ йәк али мьн кьр кӧ нәкʹәвьмә һʹәйра хԝә у фькьред нәбаш жь һʹьше хԝә дәрхьм. Гава әз тʹәви кәсед дьн дәрдькʹәтьм хьзмәтийе, әз ша дьбум у мьн хԝә һаԛас тʹәне тʹәхмин нәдькьр». Һәрге найе стандьне ԝәки әм тʹәви хушк-бьра дәркʹәвьн хьзмәтийе, әм диса жи дькарьн тʹәви ԝан нәʹма бьньвисьн йан пе тʹеле хьзмәт бькьн. Диса чь али Маурисйо кьр? Әԝ дьбежә: «Мьн ӧса жи щьватеда гәләк шьхӧл дькьр. Гава мьн щьватеда дәрс дьстанд, мьн бь дьл у щан хԝә һазьр дькьр у пе ван дәрса дәрдькʹәтьм. Бь сайа ве йәке мьн тʹәхмин дькьр кӧ Йаһоԝа у кәсед дьн мьн ԛимәт дькьн».
ГАВА ӘМ РʹАСТИ ТӘНГАСИЙЕД ГЬРАН ТЕН
8. Тәнгасийед гьран чаԝа дькарьн сәр мә һʹӧкӧм кьн?
8 Әм заньн кӧ ван рʹожед ахьрийеда, әм дькарьн рʹасти тәнгасийа бен (2 Тимотʹейо 3:1). Ле диса жи әм дькарьн ньшкева рʹасти чәтьнайед ӧса бен, йед кӧ әм нә жи һивийе бун. Мәсәлә, чәтьнайед алийе пʹәрада, нәхԝәшикә гьран йан мьрьна мәрьве мәйи дәлал. Ԝи ԝәʹдәйи, әм дькарьн хԝә бечʹарә тʹәхмин кьн, илаһи һәрге тәнгаси пәй тәнгасийарʹа тен, йан жи һәрге гьшк дәрбәкерʹа тенә сәре мә. Ле бир нәкә кӧ чʹәʹве Йаһоԝа сәр мә йә, у бь аликʹарийа ԝи әм дькарьн нава һʹәму тәнгасийада сәбьр кьн.
9. Ибо рʹасти чь тәнгасийа һат?
9 Ԝәрә әм биньн бира хԝә кӧ Йаһоԝа чаԝа али Ибо кьрьбу. Дәрбәкерʹа, чәнд кӧл-дәрд һатьн сәре ви мере амьн. Рʹожәкеда, Ибо һʹәму кәрийед хԝә ӧнда кьрьн, у хӧламед ԝи һатьнә кӧштьне. Ле йа һәри хьраб әԝ бу, кӧ һʹәму зарʹед ԝи мьрьн (Ибо 1:13-19). Ԝәхтәкә кьн паши ве йәке, гава әԝи һе шина зарʹед хԝә дькьр, Ибо гьран нәхԝәш кʹәт (Ибо 2:7). Һʹале Ибо һаԛас хьраб бу, кӧ әԝи гот ԝәки әʹмьре ԝи ида бәр чʹәʹве ԝи рʹәш буйә (Ибо 7:16).
Йаһоԝа дьбежә Ибо ԝәки Әԝ бона һʹәму әʹфринед хԝә хәм дькә, сәва кӧ Ибо баԝәр бә, кӧ Әԝ ԝи һʹьз дькә у ԝе бона ԝи хәм бькә (Абзаса 10 бьньһерʹә)
10. Йаһоԝа ча али Ибо кьр, ԝәки әԝ бькарьбә амьн бьминә? (Бьньһерʹә шькьле рʹуйе журнале.)
10 Чʹәʹве Йаһоԝа сәр Ибо бу. Йаһоԝа ԝи һʹьз дькьр, ләма жи әԝи али ԝи кьр, ԝәки әԝ бькарьбә амьн бьминә. Мәсәлә, сәва кӧ Ибо билани у һʹьзкьрьна Йаһоԝа дьһа баш фәʹм бькә, Йаһоԝа ԝирʹа бәʹса чәнд һʹәйԝанед һʹәԝас кьр (Ибо 38:1, 2; 39:9, 13, 19, 27; 40:15; 41:1, 2). Ӧса жи, Йаһоԝа бь сайа хортәки амьн бь наве Әлиһу мерхаси у дьлбини да Ибо. Әлиһу ԝирʹа гот кӧ Йаһоԝа сәбьра хьзмәткʹаред хԝә һәртʹьм хәлат дькә. Хенщи ве йәке, Йаһоԝа һьнә фькьред Ибо бь сайа Әлиһу рʹаст кьрьн. Әлиһу али Ибо кьр ԝәки әԝ бь зедәйи сәр хԝә нәфькьрә, ле дина хԝә бьдә мәзьнайа Йаһоԝа (Ибо 37:14). Ӧса жи, Йаһоԝа шьхӧләк да Ибо; әԝи жерʹа гот ԝәки әԝ бона се һәвалед хԝә, йед кӧ гӧнә кьрьбун, дӧа бькә (Ибо 42:8-10). Гава әм рʹасти тәнгасийед гьран тен, гәло Йаһоԝа ча али мә дькә?
11. Гава әм рʹасти тәнгасийа тен, Кʹьтеба Пироз ча дьле мә рʹьһʹәт дькә?
11 Йаһоԝа тʹәви мә хәбәр надә чаԝа кӧ әԝи тʹәви Ибо хәбәр дабу, ле әԝ бь сайа Кʹьтеба Пироз тʹәви мә хәбәр дьдә (Рʹомайи 15:4). Бь сайа һевийа кӧ әԝ дьдә мә, әԝ дьле мә рʹьһʹәт дькә. Гава әм рʹасти тәнгасийа тен, әм дькарьн жь гәләк рʹеза дьлбинийе бьстиньн. Мәсәлә, Кʹьтеба Пироз дьбежә кӧ тʹӧ тьшт у тʹӧ тәнгаси нькарә «һʹьзкьрьна Хԝәде сәр мә сар кә» (Рʹомайи 8:38, 39). Ӧса жи, Кʹьтеба Пироз дьбежә кӧ Йаһоԝа «незики ԝан һʹәмуйа йә, кʹижан кӧ гази Ԝи дькьн» (Зәбур 145:18). Йаһоԝа мәрʹа дьбежә кӧ һәрге әм хԝә бьсперьн ԝи, әме бькарьбьн нава һʹәму тәʹли-тәнгасийада сәбьр кьн у шабуна хԝә ӧнда нәкьн (1 Корьнтʹи 10:13; Аԛуб 1:2, 12). Хәбәра Хԝәде тинә бира мә ԝәки хәлата кӧ Йаһоԝа дьдә мә, һʹәта-һʹәтайе йә, ле тәнгасийед кӧ әм ньһа дькʹьшиньн, ԝәʹдәлу нә (2 Корьнтʹи 4:16-18). Йаһоԝа соз дьдә кӧ әԝе Мире-щьна у пьштгьред ԝи, йед кӧ сәбәбе һʹәму тәнгасийед мә нә, сәр һʹәта-һʹәтайе кʹӧта кә (Зәбур 37:10). Гәло тӧ чәнд рʹезед кӧ дьлбинийе дьдьн, әзбәри зани, йед кӧ дькарьн али тә бькьн, ԝәки нава тәнгасийед ахьрийеда сәбьр ки?
12. Сәва кӧ әм жь Кʹьтеба Пироз дьһа зедә кʹаре бьстиньн, гәрәке әм чь бькьн?
12 Йаһоԝа дьхԝазә кӧ әм бәрдәԝам кьн Кʹьтеба Пироз леколин бькьн у кʹур сәр бьфькьрьн. Әм чьԛас тьштед кӧ һин дьбьн жийина хԝәда тиньн сери, һаԛас баԝәрийа мә дьһа ԛәԝи дьбә, у әм дьһа незики Баве хԝәйи әʹзмана дьбьн. Әв йәк али мә дькә ԝәки әм нава тәнгасийада сәбьр кьн. Ӧса жи, Йаһоԝа рʹӧһʹе пироз дьдә кәсед кӧ хԝә дьсперьн Хәбәра ԝи. Тәнгасийа мә чь бә жи, рʹӧһʹе пироз «зорайийа ԛәԝате жь Хԝәде» дьдә мә, ԝәки әм бькарьбьн бәр һәр тьшти сәбьр бькьн (2 Корьнтʹи 4:7-10).
13. Хԝарьна рʹӧһʹани, йа кӧ «хӧламе амьн» дьдә мә, чаԝа али мә дькә кӧ әм нава тәнгасийада сәбьр кьн?
13 Пе аликʹарийа Йаһоԝа, «хӧламе амьн у сәрԝахт» хԝарьна рʹӧһʹани тʹер у тʹьжә дьдә мә. Бь сайа ве йәке, Йаһоԝа али мә дькә, ԝәки әм баԝәрийа хԝә ава кьн у рʹӧһʹанида һʹьшйар бьминьн (Мәтта 24:45). Әм гәрәке ван тьштед кӧ Йаһоԝа дьдә мә, рʹьнд бьдьнә хәбате. Хушкәкә кӧ Америкайеда дьжи, дьбежә ԝәки әԝ чьԛас ван хԝарьнед рʹӧһʹани ԛимәт дькә: «Нава 40 салед кӧ мьн Йаһоԝарʹа хьзмәт кьрийә, амьнийа мьн гәләк щар дьһатә щерʹьбандьне». Ажованәки сәрхԝәш пе авта хԝә кальке ԝе хьст у әԝ мьр, де-баве ԝе гьран нәхԝәш кʹәтьн у мьрьн у әԝ хԝәха жи дӧ щара бь кʹансәре нәхԝәш кʹәт. Гәло чь али ԝе дькьр кӧ әԝ сәбьр бькә? Әԝ ӧса дьбежә: «Йаһоԝа һәртʹьм мьн хԝәй дькьр. Хԝарьна рʹӧһʹани, йа кӧ әԝ бь сайа хӧламе амьн дьдә мә, али мьн дькьр ԝәки әз нәшкем. Ләма жи әз дькарьм мина Ибо ӧса бежьм: ‹Һʹәта мьрьне беԛьсуртийа хԝә наһельм!›» (Ибо 27:5, ДТʹ).
Әм чаԝа дькарьн али хушк-бьра бькьн? (Абзаса 14 бьньһерʹә)
14. Гава әм рʹасти тәнгасийа тен, Йаһоԝа чаԝа бь сайа хушк-бьра аликʹари у дьлбини дьдә мә? (1 Тʹесалоники 4:9)
14 Йаһоԝа дьхԝазә кӧ хьзмәткʹаред ԝи һәвдӧ һʹьз бькьн у ԝәʹде тәнгасийа, дьлбинийе бьдьнә һәв (2 Корьнтʹи 1:3, 4; 1 Тʹесалоники 4:9 бьхунә). Гава әм рʹасти тәнгасийа тен, хушк-бьра мина Әлиһу дьхԝазьн али мә бькьн, кӧ әм амьн бьминьн (Кʹаред Шандийа 14:22). Мәсәлә, гава мере хушкәкә бь наве Диана, гьран нәхԝәш кʹәт, щьвата ԝе али ԝе кьр кӧ әԝ рʹӧһʹанида ԛәԝи бьминә. Әԝ дьбежә: «Мьнрʹа гәләк чәтьн бу. Ле ԝан мәһед зорда, мә ԛәԝат у дәсте Йаһоԝа дьдит. Щьвата мә пьштгьрийа мә дькьр. Ԝана тʹәсәлийа мә дькьр, мәрʹа тʹеле дьхьстьн у әм һʹәмез дькьрьн, ԝәки әм сьст нәбьн. Әз әʹрәбе нажом, ләма жи хушк-бьра әз дьбьрьм щьвина у хьзмәте». Әм чьԛас бәхтәԝар ьн, ԝәки әм пʹара малбәтәкә ӧса дьлгәрм ьн!
БОНА ҺʹЬЗКЬРЬНА ЙАҺОԜА ШЕКЬРДАР БӘ
15. Әм чьма баԝәр ьн кӧ әм дькарьн нава чәтьнайада амьн бьминьн?
15 Зу йан дәрәнг, әме гьшк рʹасти тәнгасийа бен. Ле ча мә дит, әме тʹӧ щар тʹәне нибьн. Мина бавәки дьлован, чʹәʹве Йаһоԝа һәртʹьм сәр мә йә. Әԝ кʹеләка мә йә, әԝ һәԝар-газийа мә дьбьһе, у әԝ һазьр ә кӧ пьштгьрийа мә бькә (Ишайа 43:2). Әм заньн кӧ әм дькарьн нава чәтьнайада амьн бьминьн, чьмки Йаһоԝа бь мәрʹдани һәр тьшт дайә мә, ԝәки әм бькарьбьн сәбьр кьн. Ԝәʹде чәтьнайа әм жь дӧа, Кʹьтеба Пироз, хԝарьна рʹӧһʹани у хушк-бьред дьлгәрм, ԛәԝате дьстиньн.
16. Әм чаԝа дькарьн бьн пʹәрʹе Йаһоԝада бьминьн?
16 Әм чьԛас шекьрдар ьн кӧ чʹәʹве Баве мәйи әʹзмана сәр мә йә. «Дьле мә пе Ԝи ша дьбә» (Зәбур 33:21). Сәва кӧ әм Йаһоԝарʹа нишан кьн, ԝәки әм аликʹарийа ԝи ԛимәт дькьн, әм гәрәке һʹәму тьштед кӧ әԝи дайә мә, бьдьнә хәбате. Ӧса жи, гәрәке әм хирәт бькьн кӧ бьн пʹәрʹе Хԝәдеда бьминьн. Һәрге әм чь жь дәсте мә те бькьн, ԝәки гӧһ бьдьн Йаһоԝа у тьштед рʹаст бькьн, чʹәʹве ԝи ԝе һʹәта-һʹәтайе сәр мә бә! (1 Пәтрус 3:12)
КʹЬЛАМА 30 Бав, Хԝәде у Дост